Universal Dependencies - Classical_Armenian - CAVaL

s-301

MATT_13.49b

ելցեն հրեշտակք. եւ մեկնեսցեն զչարս ի միջոյ արդարոց՝ եւ արկցեն զնոսա ի հնոց հրոյն՝

s-302

MATT_13.50

անդ եղիցի լալ եւ կրճել ատամանց:

s-303

MATT_13.51a

Ասէ ցնոսա Յիսուս՝ իմացարո՞ւք զայս ամենայն,

s-304

MATT_13.51b

ասեն ցնա՝ այո Տէր:

s-305

MATT_13.52

Եւ նա ասէ ցնոսա՝ վասն այսորիկ ամենայն դպիր աշակերտեալ արքայութեան երկնից. նման է առն տանուտեառն՝ որ հանէ ի գանձէ իւրմէ զնոր եւ զհին:

s-306

MATT_13.53

Եւ եղեւ իբրեւ կատարեաց Յիսուս զառակս զայսոսիկ. փոխեցաւ անտի:

s-307

MATT_13.54-55a

Եւ եկեալ ի գաւառ իւր. ուսուցանէր զնոսա ի ժողովրդեանն նոցա. մինչեւ զարմանալ նոցա եւ ասել՝ սմա ուստի՞ իցէ այս իմաստութիւն եւ զաւրութիւնք՝

s-308

MATT_13.55b

ոչ սա է հիւսանն որդի՞

s-309

MATT_13.55c-56a

ոչ մայր սորա կոչի Մարիա՞մ եւ եղբարք սորա Յակովբոս եւ Յովսէս, եւ Սիմովն եւ Յուդա՝

s-310

MATT_13.56a

եւ քորք սորա ոչ ամենեքին առ մե՞զ են

s-311

MATT_13.56c-57a

արդ ուստի՞ է սմա այս ամենայն՝

s-312

MATT_13.57b

եւ գայթագղեին ի նա:

s-313

MATT_13.57c

Եւ Յիսուս ասէ ցնոսա՝ չիք մարգարէ անարգ. եթե ոչ յիւրում գաւառի՝ եւ յիւրում տան:

s-314

MATT_13.58

Եւ ոչ արար անդ զաւրութիւնս բազումս. վասն անհաւատութեան նոցա:

s-315

MATT_14.1-2a

Յայնմ ժամանակի լուաւ Հէրովդէս չորրորդապետ զլուր Յիսուսի. եւ ասէ ցծառայս իւր նա՞ է Յովհաննէս մկրտիչ՝

s-316

MATT_14.2b

նա յարեա՞ւ ի մեռելոց, եւ վասն այնորիկ զաւրութի՞ւնք լինին նովաւ:

s-317

MATT_14.3-5

Քանզի Հէրովդէս կալաւ զՅովհաննէս՝ կապեաց զնա եւ եդ ի բանդի, վասն Հէրովդիայ կնոջ Փիղիպոսի եղբաւր նորա, զի ասէր ցնա Յովհաննէս՝ չէ արժան քեզ ունել զդա՝ եւ կամէր զնա սպանանել. բայց երկնչէր ի ժողովրդենէ անտի՝ քանզի իբրեւ զմարգարէ ունեին զնա:

s-318

MATT_14.6-7a

Եւ իբրեւ եղեն ծնունդք Հէրովդի, կաքաւեաց դուստրն Հէրովդիայ ի մէջ բազմականին. եւ հաճոյ թուեցաւ Հերովդի,

s-319

MATT_14.7b

ուստի եւ երդմամբ խոստացաւ նմա տալ զինչ եւ խնդրեսցէ:

s-320

MATT_14.8

Եւ նա յառաջագոյն խրատեալ ի մաւրէ իւրմէ՝ տուր ինձ ասէ այսր ի վերայ սկտեղ. զգլուխն Յովհաննու մկրտչի:

s-321

MATT_14.9

Եւ տրտմեցաւ թագաւորն՝ բայց վասն երդմանցն եւ բարձակցացն. հրամայեաց տալ նմա:

s-322

MATT_14.10

Եւ առաքեաց գլխատեաց զՅովհաննէս ի բանդի՝

s-323

MATT_14.11

եւ բերաւ գլուխ նորա սկտեղբ՝ եւ տուաւ աղջկանն. եւ տարաւ առ մայր իւր:

s-324

MATT_14.12

Եւ մատուցեալ աշակերտքն նորա՝ բարձին զմարմինն եւ թաղեցին. եւ եկեալ պատմեցին Յիսուսի:

s-325

MATT_14.13a

Եւ իբրեւ լուաւ Յիսուս. գնաց անտի նաւու յանապատ տեղի առանձինն:

s-326

MATT_14.13b

Իբրեւ լուան ժողովուրդքն. գնացին զհետ նորա հետի ի քաղաքաց անտի:

s-327

MATT_14.14

Եւ իբրեւ ել ետես ժողովուրդ բազում՝ գթացաւ ի նոսա. եւ բժշկեաց զհիւանդս նոցա:

s-328

MATT_14.15a

Իբրեւ ընդ երեկս եղեւ. մատեան առ նա աշակերտքն եւ ասեն՝ տեղիս անապատ է՝ եւ ժամս տարաժամեալ՝

s-329

MATT_14.15b

արձակեա զժոլովուրդսդ. զի երթիցեն շուրջ ի շէնսն գնեսցեն իւրեանց կերակուրս:

s-330

MATT_14.16

Եւ ասէ Յիսուս՝ ոչ ինչ պիտո է դոցա երթալ՝ դուք տուք դոցա ուտել:

s-331

MATT_14.17

Եւ նոքա ասեն ցնա՝ ոչ ինչ ունիմք աստ՝ բայց հինգ նկանակ եւ երկուս ձկունս:

s-332

MATT_14.18

Եւ ասէ ցնոսա՝ բերէք այսր զայն:

s-333

MATT_14.19-20a

Եւ հրամայեաց բազմեցուցանել զժողովուրդսն ի վերայ խոտոյ՝ եւ առեալ զհինգ նկանակն եւ զերկուս ձկունսն՝ հայեցաւ յերկինս. աւհրնեաց, եւ եբեկ եւ ետ ցաշակերտսն զնկանակսն՝ եւ աշակերտքն ժողովրդոցն՝

s-334

MATT_14.20b

կերան ամենեքին եւ յագեցան՝ եւ բարձին զնշխար կոտորոցն. երկոտասան սակառի լի:

s-335

MATT_14.21

Եւ որք կերանն եին իբրեւ հինգ հազար. թող զկանայս եւ զմանկտի:

s-336

MATT_14.22

Եւ ստիպեաց վաղվաղակի զաշակերտսն մտանել ի նաւ՝ եւ յառաջել յայնկոյս. մինչ ինքն զժողովուրդսն արձակեսցէ:

s-337

MATT_14.23a

Եւ իբրեւ արձակեաց զժողովուրդսն. ել ի լեառն առանձինն կալ յաղաւթս:

s-338

MATT_14.23b

Եւ իբրեւ ընդ երեկս եղեւ. անդ էր միայն:

s-339

MATT_14.24

Եւ նաւն մեկնեալ էր ի ցամաքէն բազում ասպարիսաւք՝ ծփեալ յալեացն. քանզի ընդդէմ էր հողմն:

s-340

MATT_14.25

Եւ ի չորրորդում պահու գիշերւոյն եկն առ նոսա գնալով ի վերայ ծովուն:

s-341

MATT_14.26

Իբրեւ տեսին զնա աշակերտքն զի գնայր ի վերայ ծովուն. խռովեցան՝ եւ ասեն թե առ աչա՞ւք ինչ իցէ՝ եւ առ ահին աղաղակեցին:

s-342

MATT_14.27

Եւ վաղվաղակի խաւսեցաւ ընդ նոսա Յիսուս եւ ասէ՝ քաջալերեցարուք՝ ես եմ՝ մի երկնչիք:

s-343

MATT_14.28

Պատասխանի ետ նմա Պետրոս. եւ ասէ՝ Տէր. եթե դու ես հրամայեա ինձ գալ առ քեզ ի վերայ ջրոցս:

s-344

MATT_14.29a

Եւ նա ասէ՝ եկ:

s-345

MATT_14.29b

Եւ իջեալ ի նաւէն Պետրոս. գնաց ի վերայ ջրոցն եւ եկն առ Յիսուս:

s-346

MATT_14.30

Եւ տեսեալ զհողմն սաստիկ երկեաւ՝ եւ իբրեւ սկսաւ ընկղմել. աղաղակեաց եւ ասէ՝ Տէր, փրկեա զիս:

s-347

MATT_14.31

Եւ վաղվաղակի Յիսուս ձգեաց զձեռն իւր կալաւ զնա. եւ ասէ՝ թերահաւատ, ընդէ՞ր երկմտեցեր:

s-348

MATT_14.32

Եւ իբրեւ ելին ի նաւն. հանդարտեաց հողմն:

s-349

MATT_14.33

Եւ որ ի նաւին եին մատեան երկիր պագին նմա եւ ասեն՝ արդարեւ որդի Աստուածոյ ես դու:

s-350

MATT_14.34-35a

Եւ անցեալ եկին ի ցամաք ի Գեննեսարեթ՝

s-351

MATT_14.35b-36

եւ իբրեւ ծանեան զնա արք տեղւոյն այնորիկ. առաքեցին ընդ ամենայն գաւառն՝ եւ ածին առ նա զամենայն հիւանդս, եւ աղաչեին զնա զի գոնէ միայն ի քղանցս հանդերձի նորա մերձեսցին՝ եւ որ միանգամ մերձեցան փրկեցան:

s-352

MATT_15.1-2

Յայնժամ մատեան առ Յիսուս որ յԵրուսաղէմէ Փարիսեցիքն եւ դպիրք եւ ասեն՝ ընդէ՞ր աշակերտքն քո անցանեն զաւանդութեամբ ծերոցն՝ զի ոչ լուանան զձեռս յորժամ հաց ուտեն:

s-353

MATT_15.3

Նա պատասխանի ետ եւ ասէ ցնոսա՝ իսկ դուք ընդէր անցանէք զպատուիրանաւն Աստուածոյ. վասն ձերոյ աւանդութեանն:

s-354

MATT_15.4-5a

Զի Աստուած ասաց, պատուեա զհայր քո եւ զմայր՝ եւ որ բամբասէ զհայր կամ զմայր. մահու վախճանեսցի՝

s-355

MATT_15.5b

եւ դուք ասէք, որ ասիցէ ցհայր իւր կամ ցմայր իւր թե պատարագ է զոր յինէնն աւգտիցիս. եւ ոչ պատուիցէ զհայր իւր եւ զմայր իւր՝

s-356

MATT_15.6

եւ խոտէք զբանն Աստուածոյ վասն ձերոյ աւանդութեանն:

s-357

MATT_15.7-8a

Կեղծաւորք. բարւոք մարգարէացաւ ի վերայ ձեր Էսայի. եւ ասէ՝ ժողովուրդս այս շրթամբք պատուէ զիս.

s-358

MATT_15.8b

եւ սիրտ իւրեանց հեռացեալ մեկուսի է յինէն՝

s-359

MATT_15.9

զուր պաշտեն զիս՝ ուսուցանեն վարդապետութիւնս զմարդկան պատուիրեալս:

s-360

MATT_15.10-11a

Եւ կոչեցեալ առ ինքն զժողովուրդսն ասէ ցնոսա՝ լուարուք եւ ի միտ առէք՝

s-361

MATT_15.11b

ոչ որ ինչ մտանէ ընդ բերան պղծէ զմարդ՝ այղ որ ինչ ելանէ ի բերանոյ. այն պղծէ զմարդ:

s-362

MATT_15.12

Յայնժամ մատուցեալ աշակերտացն նորա ասեն ցնա՝ գիտե՞ս զի Փարիսեցիքն իբրեւ լուան զբանն գայթագղեցին:

s-363

MATT_15.13

Նա պատասխանի ետ նոցա եւ ասէ՝ ամենայն տունկ զոր ոչ տնկեաց հայր իմ երկնաւոր. խլեսցի:

s-364

MATT_15.14a

Թոյլ տուք զնոսա՝ կոյրք են՝ կուրաց առաջնորդ,

s-365

MATT_15.14b

կոյր կուրի յորժամ առաջնորդէ. սխալէ՝ եւ երկոքին ի խորխորատ անկանին:

s-366

MATT_15.15

Պատասխանի ետ նմա Պետրոս եւ ասէ՝ մեկնեա մեզ զառակս զայս:

s-367

MATT_15.16-17

Ասէ Յիսուս՝ տակաւին եւ դուք անմի՞տք էք՝ եւ ո՞չ իմանայք եթե ամենայն որ մտանէ ի բերան՝ յորովայն երթայ՝ եւ արտաքս ելանէ՝

s-368

MATT_15.18

իսկ որ ելանէ ի բերանոյ ի սրտէ անտի գայ. եւ այն պղծէ զմարդն:

s-369

MATT_15.19-20a

Զի ի սրտէ ելանեն խորհուրդք չարք՝ սպանութիւնք՝ շնութիւնք պոռնկութիւնք՝ գողութիւնք՝ սուտ վկայութիւնք՝ հայհոյութիւնք՝

s-370

MATT_15.20b

այս ամենայն է որ պղծէ զմարդ՝

s-371

MATT_15.20c

այղ անլուայ ձեռաւք ուտել ոչ պղծէ զմարդ:

s-372

MATT_15.21

Եւ եկեալ անտի Յիսուսի. գնաց ի կողմանս Տիւրոսի եւ Սիդովնի:

s-373

MATT_15.22a

Եւ ահա կին մի Քանանացի ի սահմանաց անտի նոցա ելեալ. աղաղակէր եւ ասէր՝ ողորմեաց ինձ Տէր որդի Դաւթի.

s-374

MATT_15.22b

դուստր իմ չարաչար այսահարի

s-375

MATT_15.23a

Եւ նա ոչ ետ նմա պատասխանի:

s-376

MATT_15.23b

Եւ մատուցեալ աշակերտքն նորա աղաչեին զնա եւ ասեին՝ արձակեա զնա. զի աղաղակէ զհետ մեր:

s-377

MATT_15.24

Նա պատասխանի ետ եւ ասէ՝ ոչ ուրեք առաքեցայ եթե ոչ առ ոչխարս կորուսեալս տան Իսրայեղի

s-378

MATT_15.25

Եւ նա մատուցեալ երկիր պագանէր նմա եւ ասէր՝ Տէր՝ աւգնեա ինձ:

s-379

MATT_15.26

Պատասխանի ետ նմա եւ ասէ՝ ոչ է բարւոք առնուլ զհաց մանկանց եւ արկանել շանց:

s-380

MATT_15.27

Եւ նա ասէ՝ այո Տէր՝ քանզի եւ շունք կերակրին ի փշրանաց անկելոց ի սեղանոյ տեառն իւրեանց:

s-381

MATT_15.28a

Յայնժամ պատասխանի ետ նմա Յիսուս եւ ասէ՝ ով կին դու, մեծ են հաւատք քո,

s-382

MATT_15.28b

եղիցի քեզ որպէս եւ կամիս:

s-383

MATT_15.28c

Եւ բժշկեցաւ դուստր նորա ի նմին ժամու:

s-384

MATT_15.29

Եւ գնացեալ անտի Յիսուսի. եկն ի ծովեզրն Գաղիղեացւոց: Եւ ելեալ ի լեառն նստէր անդ:

s-385

MATT_15.30a

Մատեան առ նա ժողովուրդք բազումք որ ունեին ընդ իւրեանս կաղս. կոյրս, համերս. միակողմանիս. եւ այլս բազումս՝ եւ ընկեցին զնոսա առ ոտս նորա.

s-386

MATT_15.30b-31a

եւ բժշկեաց զնոսա: Մինչեւ զարմանալ ժողովրդոցն որ տեսանեին՝ զի համերքն խաւսեին՝ կաղք գնային՝ միակողմանիք բժշկեին՝ կոյրք տեսանեին՝

s-387

MATT_15.31b

եւ փառաւոր առնեին զԱստուած Իսրայեղի:

s-388

MATT_15.32a

Եւ կոչեալ առ ինքն Յիսուսի զաշակերտսն ասէ՝ գթամ ի ժողովուրդ՝ զի արդ երեք աւուրք են զի կան առ իս. եւ ոչ ունին զինչ ուտիցեն՝

s-389

MATT_15.32b

եւ արձակել զդոսա անաւթիս չկամիմ գուցէ նքթիցին զճանապարհայն:

s-390

MATT_15.33

Ասեն ցնա աշակերտքն իսկ արդ մեզ յանապատի աստ ուստի՞ իցէ այնչափ հաց՝ մինչեւ յագեցուցանել զայսչափ ժողովուրդ:

s-391

MATT_15.34a

Եւ ասէ ցնոսա Յիսուս՝ քանի՞ նկանակ ունիք:

s-392

MATT_15.34b

Եւ նոքա ասեն՝ եւթն. եւ սակաւ ձկունս:

s-393

MATT_15.35-36

Եւ հրամայեաց ժողովըրդեանն բազմել ի վերայ գետնոյ՝ եւ առեալ զեւթն նկանակն եւ զձկունսն՝ գոհացաւ՝ եւ եբեկ՝ եւ ետ ցաշակերտսն՝ եւ նոքա ժողովրդեանն:

s-394

MATT_15.37

Կերան ամենեքին եւ յագեցան՝ եւ զնշխարս կոտորոցն բարձին եւթն զամբիղ լի:

s-395

MATT_15.38

Եւ որք կերանն եին իբրեւ արք չորք հազարք թող զկանայս եւ զմանկտի:

s-396

MATT_15.39

Իբրեւ արձակեաց զժողովուրդսն. ել ի նաւ. եւ եկն ի սահմանս Մագդաղեայ:

s-397

MATT_16.1

Եւ մատուցեալ Փարիսեցիքն եւ Սադուկեցիք՝ փորձելով խնդրեին ի նմանէ նշան յերկնից ցուցանել նոցա:

s-398

MATT_16.2a

Նա պատասխանի ետ եւ ասէ ցնոսա՝ ազգ չար եւ շնացող նշան խնդրէ՝

s-399

MATT_16.2b

եւ նշան մի տացի նմա, բայց նշանն Յովնանու մարգարեի:

s-400

MATT_16.2c

Եւ եթող զնոսա եւ գնաց: