— 113 —
gen Tachow oder hintz dem Ellenbogen, sweders er wil. Wir,
chunig Johans, sullen ouch vnsrer tochter Annen geben zehen
tousent schok pfennig prager montze ze heimstewer, vnd
die sullen wir ir geben ouf di zil, als vnser lieber vetter her
Baldwin ertzbischof vnd graf Berthold von Hennenberch
vns heizzent.
Ez sol vnser, des cheisers sun, markgraf Ludowig von
Brandenburch, der vorgenanten vrowen Annen geben ze wider-
legung zehen tousend schok pfennig prager montze vnd sol
si der richten, nach dem der hyrat geendet wirt, in iares
vrist in der mark ze Brandenburch ouf den steten Franken-
fort, Struzperch vnd Munichperch vnd daz darzu gehoret.
Darzu sol er si nach seinen eren bemorgengaben. Swenn ouch
der vorgenant markgraf selber gelobt vnd gesworen hat den
hyrat ze vollfueren vnd sein brif dar vber gibt, so sullen wir,
der cheiser, des geduldes ledik sein von dem hyrat, daz man
vns dar umb nieht manen sol, wann er ze seinen tagen
chomen ist, doch sullen wir ez furdern, an allez gewerde.
Ez ist ouch zwischen uns geteidingt, daz wir, chunig
Johans, schaffen vnd zvbringen sullen, daz die stet vnd gut
ze Lamparten, die von dem cheiser vnser pfant sint, tun und
vollfueren allez, daz wir tun sullen nach den brifen, die dar
vber gegeben sint, und sol daz geschehen zwischen hie vnd
virtzehen tag nach dem ostertag, der schirist chomet. Geschehe
das nicht, so sullen die stot vnd gut dem cheiser an allez
get ledig sein. Wir, chunig Johans, sullen ouch dem cheiser oder
seinen boten die vorgenanten stet vnd gut wider ze losen geben,
als die brif sagent, di vor dar vber gegeben sint, vnd sol ouch
der pfening weren ze Venedi in aller der weise, als man ze
Trient getan solt haben.
Wir, der cheiser, sullen ouch schaffen, daz alle die laute
(sic), die ze Lamparten in steten vnd ouf dem lande mit dem
chunig von Beheim gewesen sint, gantz sun vnd friuntschaft
haben, an allez geverde. Wir, der chunig, geheizen ouch, daz
wir die selben stet vnd gut ze Lamparten niht versetzen
sullen, weder dem babst, noch dem chunig von Frankrich,
noch anders yemant von irn wegen.
Codex jur. boh. II. 1. 8
