— 104 —
Es ist auch getaidingt, daz unser kainer sich verbinden,
fürbaz gen nimand sol, ez nem ainer den andern aus mit I
namen, und auch also, daz ez dieser puntnusse an disen
briefen nicht schade. Wenne auch dez Riche fürbaz ledig wirt,
wollen wir uns denne um das Riche annemen und darnach
stellen, so sullen uns diselben hertzogen von Osterich darzu
beholtfen sein, freuntlich trewlich, und sullen si da inne
besorgen mit allen sachen, als wir des notdürftig sein und
daz wir ez dester baz erzugen mügen.
Wer aber, daz wir uns um daz Riche nicht annemen
wolten und si darnach stellen wolten, so sullen wir in darzu
beholffen sein, freuntlich trewlich, vnd sullen wir si da inne
besorgen auch mit allen sachen, als sie des notdurftig sein
vnd daz sie es dester baz erzugen mügen.
Wer aber, daz der vorgenant herzog Albrecht oder
hertzog Otte sein bruder, des Gott nich engebe, abgienge und
stürbe, so sol doch dieselbe püntnusse stet beleiben zwischen
unser und ir einen, der denne lebet, und unsern beiden chinden
in aller der mazze, als vorgeschriben stet.
Wer auch, daz si beide abgiengen und nicht enwern, des
Gott nicht wolle, so sullen wir irre chinde, lant und leut
pfleger sein mit gantzen tuen, als unsers selbers kinde, als
lange untz dieselben ire chinde zu iren tagen komen; also
sullen si auch herwider, ob wir abgiengen, unser kinde, land
und leut pfleger sein mit denselben trewen, als ir selbes
chinde auch, als lang untz unser chinde zu ihren jaren komen,
an geuerde.
Und darumb loben wir dise püntnusse, als vorgeschriben
stet, gantz und stete ze haben bei dem aide, den wir darumb
oesworn haben ze den heiligen ewangelien, und geben darüber
disen brief versigelt mit unserm grozzen iusigel, daz daran
hanget, zu einer gezugnuzze der warheit.
Der ist geben ze Landow, do man zalt von Christes
gepurde drewzehen hundert jar, darnach in dem dreizzigsten
jar, der nechsten mitwochen nach dem suntag, wenne man
singet: Cantate Domino.
