| s-1
| ⲉⲣϣⲁⲛⲧⲃⲁϣⲟⲣ ⲁϣϣⲕⲁⲕ ⲉⲃⲟⲗ ⲁⲛ ⲉⲧⲉⲛⲧⲟⲕ ⲡⲉ ⲡϩⲙϩⲁⲗ ⲙⲡⲙⲁⲙⲙⲱⲛⲁⲥ ϩⲛϩⲉⲛϩⲣⲟⲟⲩ ⲉⲩⲟϣ , ⲉⲣⲉⲡⲙⲟⲩⲓⲧⲣⲣⲉ ⲉⲧⲉⲁⲛⲟⲕ ⲡⲉ ⲡϩⲙϩⲁⲗ ⲙⲡⲉⲭⲣⲓⲥⲧⲟⲥ , |
| s-2
| ϯⲥⲟⲟⲩⲛ ϫⲉⲉⲕϯⲟⲩⲃⲏⲓ ⲁⲛ , |
| s-3
| ⲁⲗⲗⲁ ⲉⲕϯⲟⲩⲃⲉⲓⲏⲥⲟⲩⲥ ⲉⲧⲟⲩⲏϩ ϩⲛⲛⲉⲭⲣⲉⲓⲥⲧⲓⲁⲛⲟⲥ . |
| s-4
| ⲓⲏⲥⲟⲩⲥ ⲟⲛ ⲣⲱϣⲉ ⲉⲣⲟⲕ ⲛⲧⲟⲕ ⲙⲛⲡⲉⲕⲉⲓⲱⲧ ⲡⲇⲓⲁⲃⲟⲗⲟⲥ ⲉⲧⲟⲩⲏϩ ⲛϩⲏⲧⲕ ⲉⲧⲕϩⲉⲗⲡⲓⲍⲉ ⲉⲣⲟϥ · |
| s-5
| ⲛⲧⲟⲟⲩ ϩⲱⲟⲩ ⲙⲛⲡⲉⲩⲉⲓⲱⲧ ⲉⲧⲟⲩⲏϩ ⲛϩⲏⲧⲟⲩ ⲓⲏⲥⲟⲩⲥ ⲉⲧⲟⲩⲕⲱ ⲛϩⲧⲏⲩ ⲉⲣⲟϥ · |
| s-6
| ⲙⲙⲛⲧⲉⲣⲱⲙⲉ ⲉⲟⲩⲛⲧϥⲓⲏⲥⲟⲩⲥ ⲙⲙⲁⲩ ϣⲓⲡⲉ ⲉⲛⲉϩ ⲛⲧϩⲉ ⲛⲧⲁⲕϫⲟⲟⲥ , ⲡϣⲓⲡⲉ ⲙⲡⲉⲓⲙⲁ , ⲡⲉⲟⲟⲩ ⲙⲡⲉⲓⲙⲁ ⲁⲓⲡⲁⲣⲁⲓⲧⲉⲓ ⲙⲙⲟⲩ , |
| s-7
| ϯⲥⲟⲟⲩⲛ ⲅⲁⲣ ⲉⲡⲉⲧⲓϭⲱϣⲧ ⲉⲃⲟⲗ ϩⲏⲧϥ . |
| s-8
| ⲛⲉⲧⲉⲟⲩⲛⲧⲁⲩⲡⲉⲟⲟⲩ ⲙⲛⲡⲧⲁⲉⲓⲟ ⲉⲃⲟⲗ ϩⲓⲧⲛⲓⲏⲥⲟⲩⲥ . |
| s-9
| ⲉⲩⲣⲟⲩ ⲛⲉⲟⲟⲩ ϩⲓⲧⲁⲉⲓⲟ ⲛⲣⲱⲙⲉ . |
| s-10
| ⲛⲧϩⲉ ⲅⲁⲣ ⲉⲧⲉⲙⲛⲙⲛⲧⲗⲏⲥⲧⲏⲥ ϣⲟⲟⲡ ⲛⲛⲉⲧⲉⲟⲩⲛⲧⲁⲩ ⲓⲏⲥⲟⲩⲥ ϩⲛⲟⲩⲙⲉ ⲕⲁⲧⲁⲡⲉⲛⲧⲁⲕϫⲟⲟϥ ⲉⲣⲟⲓ ⲉⲃⲟⲗ ϫⲉⲁⲓϥⲓ ⲛⲛⲉⲕⲛⲟⲩⲧⲉ ϩⲛⲟⲩⲥⲣⲁϩⲧ ⲁⲩⲱ ϫⲉⲁⲓⲧⲣⲉⲩⲙⲟⲩⲣ ⲙⲡⲉⲕⲥⲱϣ ⲙⲛⲡⲉⲕϣⲓⲡⲉ ⲉϩⲟⲩⲛ ⲉⲛⲟⲩⲉϭⲣⲟ ⲙⲡⲉⲕⲏⲓ ⲉⲩⲥⲏϩ ⲉϩⲉⲛⲭⲁⲣⲧⲏⲥ · |
| s-11
| ⲉⲁⲩⲟⲩⲱϭⲡ ⲛⲛⲉⲕⲙⲏⲙⲟⲟⲩ ⲉⲧϩⲛϩⲉⲛϣⲟϣⲟⲩ ϩⲱⲥ ⲏⲣⲡ ϩⲓϫⲛⲙⲡⲛⲏ ⲙⲡⲉⲕⲏⲓ . ⲁⲩⲱ ⲉϩⲟⲩⲛ ϩⲙⲡⲉⲕⲣⲟ , ⲙⲛⲡⲣⲟ ⲛⲛⲉⲧⲉⲓⲛⲉ ⲙⲙⲟⲕ , |
| s-12
| ⲉⲙⲙⲛⲙⲛⲧⲣⲙϩⲉ ϣⲟⲟⲡ ⲛⲛⲉⲧⲕⲱ ⲛϩⲧⲏⲩ ⲉⲕⲣⲟⲛⲟⲥ , ⲉⲧⲉⲛⲧⲟⲕ ⲡⲉ ⲙⲛⲛⲉⲧⲧⲛⲧⲱⲛ ⲉⲣⲟⲕ ϩⲛⲙⲙⲛⲧⲁⲡⲓⲥⲧⲟⲥ , ⲙⲛⲙⲛⲧⲁⲕⲁⲑⲁⲣⲧⲟⲥ ⲛⲓⲙ . |
| s-13
| ⲟⲩ ⲛϩⲱⲃ ⲏ ⲁϣ ⲛϣⲁϫⲉ ϩⲛⲛⲉⲛⲧⲁⲕϫⲟⲟⲩ ⲛⲉⲧⲟ ⲙⲙⲛⲧⲣⲉ ⲉⲣⲟⲕ ⲁⲛ ϫⲉⲉⲕⲏⲡ ⲉⲡⲥⲁⲧⲁⲛⲁⲥ . |
| s-14
| ⲛⲉⲡⲓⲥⲧⲟⲗⲏ ⲛⲉ ⲉⲛⲧⲁⲕⲡⲁϩⲟⲩ , ⲏ ϯⲥⲟⲟⲩⲛ ⲁⲛ ⲙⲡⲁⲧⲓϫⲟⲟⲩⲥⲟⲩ ϫⲉⲕⲛⲁⲡⲁϩⲟⲩ , |
| s-15
| ⲡⲉϣⲃⲣⲣϩⲱⲃ ⲛⲛⲉⲛⲧⲁⲩϣⲱⲱⲧ ϩⲙⲡⲧⲟⲕ ⲙⲡⲉⲅⲣⲁⲙⲙⲁⲧⲉⲩⲥ ⲛⲛⲥⲉⲗⲓⲥ ⲙⲡϫⲱⲱⲙⲉ ⲛⲛϣⲁϫⲉ ⲛⲧⲁⲛⲉⲡⲣⲟⲫⲏⲧⲏⲥ ϫⲟⲟⲩⲥⲉ ⲛⲁⲩ ϩⲙⲡⲣⲁⲛ ⲙⲡⲛⲟⲩⲧⲉ ⲁⲩⲛⲟϫⲟⲩ ⲉϩⲣⲁⲓ ⲉⲛϫⲃⲃⲉⲥ ⲉⲧϫⲉⲣⲟ . |
| s-16
| ⲛⲧϩⲉ ⲟⲛ ⲛⲧⲁⲕϫⲟⲟⲥ ϫⲉⲛⲣⲱⲙⲉ ⲁⲩⲱ ⲛⲁⲟⲓⲕⲟⲛⲟⲙⲟⲥ ϫⲓϩⲛⲁⲩ ⲛⲁϥ . |
| s-17
| ⲉⲕⲧⲁⲙⲟ ⲙⲙⲟⲛ ⲁⲩⲱ ⲉⲕϭⲱⲗⲡ ⲉⲃⲟⲗ ⲛⲧⲉⲕⲕⲁⲕⲓⲁ ϫⲉⲙⲡⲉⲕⲟⲩⲱϣ ⲁⲛ ⲡⲉ ⲉⲧⲣⲉⲛϣⲏⲣⲉ ⲙⲡⲛⲟⲩⲧⲉ ϫⲓ ⲟⲩⲡⲣⲟⲥⲫⲟⲣⲁ ⲉⲧⲉϥⲉⲕⲕⲗⲏⲥⲓⲁ . ⲏⲉⲣⲟⲩⲡⲉⲧⲛⲁⲛⲟⲩϥ ⲛⲟⲩⲱⲧ ϩⲙⲡⲣⲁⲛ ⲛⲓⲏⲥⲟⲩⲥ . |
| s-18
| ⲕⲛⲁⲣⲁϣⲉ ⲉⲕϣⲁⲛⲥⲱⲧⲙ ϫⲉⲁⲩⲃⲱⲕ ⲉⲙⲙⲁ ⲛϣⲓⲛⲉ ⲛⲛⲇⲁⲓⲙⲱⲛ . ⲉⲃⲟⲗ ϫⲉⲛⲧⲟⲕ ϩⲱⲱⲕ ⲕⲟⲩⲱϣⲧ ⲁⲩⲱ ⲕϣⲙϣⲉ ⲙⲡⲥⲱⲛⲧ ⲡⲁⲣⲁⲡⲉⲛⲧⲁϥⲥⲱⲛⲧ ⲛⲛⲕⲁ ⲛⲓⲙ ⲓⲏⲥⲟⲩⲥ ⲡⲉⲧⲥⲙⲁⲙⲁⲁⲧ ϣⲁⲉⲛⲉϩ ⲛⲉⲛⲉϩ · |
| s-19
| ⲉϩⲟⲩⲉ ⲥⲱⲧⲙ ⲏ ⲉⲛⲁⲩ ⲉⲣⲟⲟⲩ ⲉⲩⲛⲁ ⲉⲣⲁⲧϥ ⲙⲡⲛⲟⲩⲧⲉ ϩⲙⲙⲁ ⲛⲓⲙ ⲉⲧⲟⲩⲉⲡⲓⲕⲁⲗⲉⲓ ⲙⲙⲟϥ ⲛϩⲏⲧⲟⲩ , ⲁⲩⲱ ⲉⲩⲥⲙⲟⲩ ⲉⲣⲟϥ ⲉⲩϯⲉⲟⲟⲩ ⲛⲁϥ · |
| s-20
| ⲏ ⲉⲣϣⲁⲛ ϩⲟⲩⲟ ⲉⲛⲙⲏⲏϣⲉ ⲛⲧⲁⲕϫⲟⲟⲥ ϫⲉⲥⲉϫⲓϩⲛⲁⲩ ⲛⲁϥ . ⲉⲩϣⲁⲛⲡⲱⲛⲅ ⲛⲁ ⲓ ⲁϫⲛϯⲥⲟ ϫⲉϯⲟ ϩⲱⲱⲧ ⲛϩⲙϩⲁⲗ ⲛⲁⲩ ⲕⲁⲗⲱⲥ ϫⲉⲛⲁⲥⲛⲏⲩ ⲛⲉ ⲉⲓⲥⲱⲟⲩϩⲛⲁⲩ ⲉϩⲟⲩⲛ ⲉϩⲉⲛⲁϩⲟ ϩⲛⲧⲡⲉ ⲛⲛⲉⲧⲟⲩϯ ⲙⲙⲟⲟⲩ ⲛⲧⲁⲉⲓⲟ ⲙⲡⲛⲟⲩⲧⲉ . ⲙⲏ ⲛⲧⲁⲩⲛⲧⲟⲩ ⲉⲃⲟⲗ ϩⲙⲡⲉⲕⲏⲓ ⲙⲛⲡⲏⲓ ⲛⲛⲉⲕⲉⲓⲟⲧⲉ . |
| s-21
| ⲕⲧⲱⲣⲡ ⲛⲛⲉⲧⲉⲛⲟⲩⲕ ⲁⲛ ⲛⲉ ⲡⲣⲱⲙⲉ ⲙⲡⲟⲛⲏⲣⲟⲥ . |
| s-22
| ⲕⲡⲟⲛⲏⲣⲉⲩⲉ ⲇⲉ ϩⲱⲱϥ ⲁⲩⲱ ⲕⲕⲁϫⲣⲟⲡ ⲉϩⲣⲁⲓ ⲛⲛⲣⲉϥϯ ⲛⲛϩⲏⲕⲉ . ⲉⲩⲥⲟⲟⲩⲛ ϫⲉⲛⲉⲧⲟⲩϯ ⲙⲙⲟⲟⲩ ⲏ ⲛⲉⲧⲟⲩⲛⲁ ⲛϩⲏⲧⲟⲩ ⲛⲛⲉⲧⲣϭⲣⲱϩ ⲛⲁⲡⲉⲭⲣⲓⲥⲧⲟⲥ ⲛⲉ ⲛⲧⲁϥⲧⲁⲁⲩ ⲛⲁⲩ ⲉⲩⲁⲡⲟⲗⲁⲩⲥⲓⲥ . ⲁⲩⲱ ⲣⲣⲙⲙⲁⲟ ϩⲛϩⲉⲛϩⲃⲏⲩⲉ ⲉⲛⲁⲛⲟⲩⲟⲩ . |
| s-23
| ⲙⲏ ⲁⲣⲁ ⲉⲓⲟⲩⲏϩ ⲟⲛ ϩⲓϫⲛⲧⲙⲏⲧⲉ ⲛϫⲱⲕ , |
| s-24
| ϫⲉⲕϫⲱ ⲙⲙⲟⲥ ϫⲉϣⲁⲛⲧⲉⲟⲩϣⲱⲡⲉ ⲙⲡϥⲥϭⲏⲣ , ⲉϥϫⲱ ⲙⲙⲟⲥ ϫⲉϯⲛⲁⲃⲱⲕ . ⲉϥⲛⲉϫ ϩⲟⲟⲩ ⲛⲥⲁϩⲟⲟⲩ . |
| s-25
| ⲉⲧⲃⲉⲟⲩ ⲉⲓⲟ ⲙⲡⲓⲛⲟϭ ⲛⲃⲁⲣⲟⲥ ⲉϩⲣⲁⲓ ⲉϫⲱⲕ ⲛⲧⲉⲓϩⲉ ⲧⲏⲣⲥ ϫⲉⲁⲓⲃⲱⲕ ϣⲁⲛⲉⲣⲣⲱⲟⲩ ⲏ ⲙⲡⲓⲃⲱⲕ . |
| s-26
| ⲙⲏ ⲙⲡⲏⲩⲉ ⲙⲛⲡⲕⲁϩ ⲛⲁⲡⲉⲭⲣⲓⲥⲧⲟⲥ ⲁⲛ ⲛⲉ ⲙⲛⲛⲉⲧⲛϩⲏⲧⲟⲩ ⲧⲏⲣⲟⲩ . |
| s-27
| ⲙⲏ ⲟⲩⲛⲧⲉ ⲡⲉⲕⲉⲓⲱⲧ ⲕⲣⲟⲛⲟⲥ ⲗⲁⲁⲩ ⲣⲱ ⲛⲧⲟϥ ⲛⲥⲁϩⲉⲛⲛⲟⲃⲉ ⲛⲁⲓ ⲉⲧⲕⲟ ⲛⲟⲩⲟⲉⲓⲉ ⲉⲣⲟⲟⲩ ⲛⲁϥ ⲛⲧⲟⲕ ⲙⲛⲛⲉⲧⲉⲓⲛⲉ ⲙⲙⲟⲕ . ⲉⲧⲉⲧⲛϫⲟ ⲁⲩⲱ ⲉⲧⲉⲧⲛⲱⲗ ⲛⲁϥ ⲉϩⲟⲩⲛ ⲛⲙⲙⲛⲧⲁⲡⲓⲥⲧⲟⲥ ⲙⲛⲛϭⲟⲗ , ⲙⲛⲛϫⲓⲛϭⲟⲛⲥ , ⲙⲛⲛⲟⲩⲁ ⲙⲛϩⲱⲃ ⲛⲓⲙ ⲙⲡⲟⲛⲏⲣⲟⲛ . |
| s-28
| ⲉⲛⲉ ⲛⲧⲕⲟⲩⲉⲛⲧⲏϭ ⲛⲧⲉⲓϩⲉ ⲉⲕⲣⲏⲧ ϩⲁⲣⲓϩⲁⲣⲟⲕ ⲛⲉⲡⲉⲧϣϣⲉ ⲡⲉ ⲉⲁⲛⲉⲭⲉ ⲙⲙⲟⲕ ϣⲁⲡⲉⲟⲩⲟⲉⲓϣ ⲙⲡⲱϩⲥ ⲕⲁⲧⲁⲡϣⲁϫⲉ ⲙⲡϫⲟⲉⲓⲥ ⲉⲛⲧⲁⲕϫⲓⲟⲩⲁ ⲉⲣⲟϥ . |
| s-29
| ⲁⲗⲗⲁ ⲛⲧⲕⲟⲩϣⲟⲛⲧⲉ ⲙⲛⲟⲩⲁⲣⲟⲟⲩⲉ ⲉⲕϩⲓⲛⲉϩⲓⲟⲟⲩⲉ ⲉⲕⲟ ⲛϫⲣⲟⲡ ⲛⲛⲉⲧⲙⲟⲟϣⲉ , |
| s-30
| ⲉⲧⲃⲉⲡⲁⲓ ⲡⲉⲧϣϣⲉ ⲡⲉ ⲉϣⲁⲁⲧⲕ ⲁⲩⲱ ⲉⲃⲟⲗⲃⲗ ⲛⲧⲉⲕⲛⲟⲩⲛⲉ . |
| s-31
| ⲉⲡⲉⲓⲇⲏ ⲁⲕϫⲟⲟⲥ ⲇⲉ ⲟⲛ ϩⲛⲛⲉⲕϣⲁϫⲉ ⲛⲉⲡⲣⲁ ϫⲉⲉⲛⲉ ⲟⲩⲙⲟⲛⲁⲭⲟⲥ ⲛⲁⲙⲉⲡⲉ ⲛⲉϥⲛⲁⲣϣⲟⲙⲧ ⲙⲫⲟⲛⲟⲥ ϩⲙⲡⲉϩⲙⲉ ⲛϩⲟⲟⲩ . ⲉⲕϫⲱ ⲙⲙⲟⲥ ⲉⲛⲣⲓⲣ ⲙⲛⲧⲉϩⲉ ⲛⲧⲁⲓⲕⲟⲛⲥⲟⲩ ϩⲛⲛⲏⲓ ⲛⲛϩⲉⲗⲗⲏⲛ ϫⲉⲙⲫⲟⲛⲟⲥ |
| s-32
| ϯⲛⲁϫⲟⲟⲥ ϩⲱⲱⲧ ⲛⲧⲉⲓϩⲉ ⲛⲛⲁϩⲣⲛ ⲛⲉⲕϣⲁϫⲉ ⲛⲕⲁⲃⲟⲗ ϫⲉⲉϣϫⲉ ⲟⲩⲡⲉⲧⲉϣϣⲉ ⲁⲛ ⲡⲉⲛⲧⲁⲓⲁⲁϥ ϫⲉⲁⲓⲡⲁⲣⲁⲇⲓⲅⲙⲁⲧⲓⲍⲉ ⲛϩⲉⲛⲣⲉϥϣⲙϣⲉⲉⲓⲇⲱⲗⲟⲛ . ⲉⲓⲉ ⲟⲩⲕⲁⲧⲁⲕⲣⲓⲙⲁ ⲛⲁⲕ ⲛⲟⲩⲏⲣ ⲡⲉ ϫⲉⲕⲡⲁⲣⲁⲃⲁ ϩⲙⲡⲉϩⲙⲉ ⲛϩⲟⲟⲩ , |
| s-33
| ⲁⲩⲱ ϩⲙⲡⲛⲟϭ ⲙⲡⲁⲥⲭⲁ ⲉⲧⲟⲩⲁⲁⲃ ⲉⲧⲉⲣⲉⲟⲩⲟⲛ ⲛⲓⲙ ⲉⲓⲣⲉ ⲙⲙⲟϥ ϣⲁϩⲣⲁⲓ ⲉⲛⲕⲉⲣⲣⲱⲟⲩ ⲙⲙⲁⲓⲛⲟⲩⲧⲉ . |
| s-34
| ⲛⲧⲟⲕ ⲇⲉ ⲕⲧⲣⲉⲛⲉⲕⲙⲁⲅⲉⲓⲣⲟⲥ ⲣϩⲱⲃ ⲛⲁⲕ ⲛϩⲏⲧϥ , ⲉⲕⲧⲣⲩⲫⲁ ⲁⲩⲱ ⲉⲕⲁⲡⲁⲧⲁ ⲁϫⲛϩⲟⲧⲉ , ⲁⲩⲱ ⲉⲕⲧⲣⲉϩⲉⲛⲕⲟⲟⲩⲉ ⲁⲡⲁⲧⲁ ⲛⲙⲙⲁⲕ . |
| s-35
| ⲉⲃⲟⲗ ⲇⲉ ⲟⲛ ϫⲉⲁⲕⲧⲛⲛⲟⲟⲩ ϣⲁⲣⲟⲓ ϫⲉⲁⲙⲟⲩ ⲛⲅⲙⲉϣⲧⲛⲁⲏⲓ ⲉϣⲱⲡⲉ ⲉⲕϣⲁⲛϭⲛⲉⲓⲇⲱⲗⲟⲛ ⲛϩⲏⲧⲟⲩ , |
| s-36
| ⲛⲧⲉⲣⲉⲓⲙⲟϣⲧϥ ⲛⲕⲉⲥⲟⲡ ⲡⲉⲕⲏⲓ ⲙⲡⲓϭⲛ ⲗⲁⲁⲩ ⲛⲉⲓⲇⲱⲗⲟⲛ ⲛϩⲏⲧϥ . |
| s-37
| ⲏ ⲙⲛϭⲉ ϣⲟⲟⲡ ⲛⲁⲕ ⲛⲥⲁⲛⲉⲛⲧⲁⲓϥⲓⲧⲟⲩ , |
| s-38
| ⲏ ⲉⲓϣⲁⲛϥⲓ ⲛⲉⲓⲇⲱⲗⲟⲛ ⲉⲧϩⲙⲡⲉⲕⲏⲓ ⲙⲏ ⲉⲓⲛⲁϣϩⲱⲡ ⲟⲛ ⲙⲡⲣⲏ ϩⲛⲧⲡⲉ ⲙⲛⲡⲟⲟϩ ⲙⲛⲛⲥⲓⲟⲩ ⲛⲁⲓ ⲉⲧⲕϣⲙϣⲉ ⲛⲁⲩ , |
| s-39
| ⲏ ⲉⲓⲛⲁⲕⲱⲧ ⲛϩⲉⲛⲥⲟⲃⲧ ⲉⲛⲙⲁ ⲛϩⲱⲧⲡ ⲉⲧⲙⲧⲣⲉⲕϣⲗⲏⲗ ⲉⲛⲥⲁⲙⲡⲉⲙⲛⲧ , |
| s-40
| ⲏ ⲉⲓⲛⲁⲣⲟⲉⲓⲥ ϩⲓϫⲙⲡⲓⲉⲣⲟ , ⲁⲩⲱ ϩⲓϫⲛⲛⲉⲕⲉⲩⲣⲓⲡⲟⲥ ⲉⲧⲙⲧⲣⲉⲕⲟⲩⲱⲧⲛ ⲉⲃⲟⲗ ⲛⲕⲣⲟⲛⲟⲥ ⲉϩⲣⲁⲓ ⲉⲛⲙⲟⲩ ⲛⲉⲓⲟⲟⲩⲉ , |
| s-41
| ϩⲱ ϭⲉ ⲉⲣⲟⲕ ⲉⲕϫⲱ ⲛⲛⲓϣⲁϫⲉ ⲛϭⲟⲗ ϩⲓⲕⲟⲧⲥ , |
| s-42
| ⲡⲣⲱⲙⲉ ⲉⲧϩⲏⲩ ⲉϩⲣⲁⲓ ⲉϩⲉⲛⲛⲟϭ ⲙⲡⲉⲧϩⲟⲟⲩ . |
| s-43
| ⲛⲧϩⲉ ⲅⲁⲣ ⲉⲧⲕⲟ ⲛⲁⲧⲛⲟⲩⲧⲉ . |
| s-44
| ⲧⲁⲓ ⲧⲉ ⲧϩⲉ ⲉⲧⲕⲑⲗⲓⲃⲉ ⲛⲛϩⲏⲕⲉ ϩⲛⲛⲉⲕⲙⲛⲧⲣⲉϥϫⲓⲛϭⲟⲛⲥ , |
| s-45
| ⲏ ⲕⲉⲙⲓⲛⲉ ⲛⲇⲓⲱⲅⲙⲟⲥ ⲁⲛ ⲧⲉ ⲧⲁⲓ ⲉⲧⲉⲧⲛⲡⲏⲧ ⲛⲥⲁⲛⲣⲱⲙⲉ , |
| s-46
| ⲙⲁⲗⲓⲥⲧⲁ ⲛⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ ϣⲁⲛⲧⲉⲧⲛϭⲟⲧⲡⲟⲩ ⲉⲃⲟⲗ ϩⲛⲛⲉⲩⲏⲓ ϩⲙⲡⲓⲕⲁⲓⲣⲟⲥ ⲟⲛ ⲡⲁⲓ ϩⲣⲁⲓ ϩⲛⲛⲓⲛⲟϭ ⲛϩⲓⲥⲉ ⲉⲧϩⲓϫⲙⲡⲕⲁϩ , |
| s-47
| ⲉⲧⲉⲧⲛⲛⲁ ⲉϩⲟⲩⲛ ⲉⲛⲉⲩⲧⲟⲡⲟⲥ , |
| s-48
| ⲉⲙⲛϣⲏⲣⲉ ⲉⲙⲛⲉⲓⲱⲧ ⲉⲙⲛⲗⲁⲁⲩ ⲛϩⲏⲧⲟⲩ ϩⲟⲗⲱⲥ ⲙⲙⲁⲩ ⲉⲧⲃⲉϫⲉⲁⲩⲡⲱⲧ . |
| s-49
| ⲉⲧⲉⲧⲛϥⲓ ⲛⲛⲉⲩⲧⲃⲛⲟⲟⲩⲉ ⲙⲛⲧⲉⲩⲁϭⲟⲗⲧⲉ , ⲁⲩⲱ ⲡⲉⲩⲧⲱϩ ⲉⲧⲉⲧⲛϫⲓ ⲙⲙⲟⲟⲩ ⲉⲛⲉⲧⲛϭⲟⲟⲙ ⲉⲧⲉⲧⲛⲁⲛⲁⲅⲕⲁⲍⲉ ⲙⲙⲟⲟⲩ ⲉⲧⲣⲉⲩⲕⲱⲧⲉ ⲙⲙⲟⲟⲩ ⲡⲁⲣⲁⲧⲉⲩϭⲟⲙ · |
| s-50
| ⲟⲩ ⲟⲛ ⲡⲉ ⲡⲕⲉⲛⲟϭ ⲙⲡⲁⲥⲭⲁ ⲧⲉⲧⲛⲕⲱ ⲙⲙⲟⲟⲩ ⲁⲛ ⲉⲥⲣϥⲉ ⲉⲁⲁϥ · |
| s-51
| ϣⲁϩⲣⲁⲓ ⲉⲛϫⲟⲓ ⲛⲃⲣⲣⲉ ⲛⲧⲁⲧⲉⲧⲛⲙⲟⲛⲕⲟⲩ ⲉⲧⲉⲧⲛⲧⲣⲉⲩⲛⲟⲩϫⲉ ⲙⲙⲟⲟⲩ ⲉⲡⲙⲟⲟⲩ ⲛϩⲏⲧϥ , ⲉⲡⲙⲁ ⲛⲧⲣⲉⲩⲣϩⲏⲃⲉ ⲛϩⲏⲧϥ . |
| s-52
| ⲁⲧⲉⲧⲛⲧⲣⲉⲩⲉϣⲗⲟⲩⲗⲁⲓ ⲉⲡⲉⲩⲟⲩⲱϣ ⲁⲛ ⲡⲉ , |
| s-53
| ⲛⲓⲙ ⲡⲉⲧⲛⲁϣⲧⲁⲩⲉ ⲛⲉⲧⲛⲡⲉⲧϩⲟⲟⲩ ⲧⲏⲣⲟⲩ . |
| s-54
| ⲛⲧϩⲉ ⲟⲛ ⲉϣⲁⲧⲉⲧⲛϣⲱⲱⲧ ⲙⲡⲉⲧⲛⲙⲁⲥⲉ ⲉϥⲛⲁⲙⲟⲩ , ⲏ ⲉϥϣⲁⲛⲣⲥⲧ ⲉⲃⲟⲗ ⲛϥⲧⲙⲣϣⲁⲩ ⲙⲡⲉⲧⲛϩⲱⲃ , ⲛⲧⲉⲧⲛⲥⲟⲣϥ ⲉⲃⲟⲗ ⲙⲉⲣⲟⲥ ⲙⲉⲣⲟⲥ ⲛⲧϩⲉ ⲉⲧⲉϩⲛⲏⲧⲛ , |
| s-55
| ⲛⲧⲉⲧⲛⲛⲟϫϥ ⲉϫⲱⲟⲩ ϣⲁϩⲣⲁⲓ ⲉⲛⲉⲭⲏⲣⲁ , ⲁⲩⲱ ⲛϩⲗⲗⲟ ⲙⲛⲛϩⲗⲗⲱ ⲙⲛⲛⲟⲣⲫⲁⲛⲟⲥ ⲙⲛⲛϣⲙⲙⲟ . |
| s-56
| ⲉⲧⲉⲧⲛϣⲓⲧⲉ ⲙⲙⲟⲟⲩ ⲛϩⲉⲛϩⲟⲙⲛⲧ ⲡⲁⲣⲁⲧⲉⲩⲁⲥⲟⲩ ϣⲁⲛⲧⲉⲧⲛⲥⲉⲩϩ ⲧⲉⲧⲓⲙⲏ ⲙⲡⲙⲁⲥⲉ ⲉϩⲟⲩⲛ ⲉⲥⲕⲏⲃ ϩⲁϩⲉⲛⲉⲗⲁⲭⲓⲥⲧⲟⲛ ⲛⲁϥ , ⲉϩⲉⲛⲕⲉⲉⲥⲛⲉ ϩⲓϩⲛⲁⲩ ⲛⲁⲧϣⲁⲩ . |
| s-57
| ⲛⲧϩⲉ ⲟⲛ ⲉϣⲁⲧⲉⲧⲛϯ ϩⲉⲛⲙⲁⲥⲉ ⲛⲁⲩ ⲙⲛϩⲉⲛⲉϩⲟⲟⲩ ⲕⲁⲧⲁϩⲟⲓ ⲉⲧⲣⲉⲩⲥⲁⲛⲟⲩϣⲟⲩ ϣⲁⲛⲧⲟⲩⲣⲛⲟϭ ⲛⲧⲉⲧⲛϥⲓⲧⲟⲩ . |
| s-58
| ϩⲟⲓⲛⲉ ⲙⲉⲛ ⲉⲧⲣⲉⲩⲧⲁⲁⲩ ⲛⲏⲧⲛⲛⲧⲁⲉⲓⲟ , |
| s-59
| ⲛⲧⲉⲧⲛⲣⲗⲁⲁⲩ ⲁⲛ ⲙⲡⲉⲧⲛⲁⲛⲟⲩϥ ⲛⲁⲩ ⲛⲧⲉⲩϣⲃⲉⲓⲱ . |
| s-60
| ϩⲉⲛⲕⲟⲟⲩⲉ ⲟⲛ ⲉⲧⲣⲉⲩⲥⲁⲛⲟⲩϣⲟⲩ ⲛⲏⲧⲛⲛⲧⲉⲓϩⲉ ⲟⲛ ϩⲉⲛϩⲧⲟ , ⲁⲩⲱ ϩⲉⲛⲉⲓⲱ , ⲙⲛϩⲉⲛⲉⲥⲟⲟⲩ , ⲙⲛϩⲉⲛⲙⲁⲥⲉ , ⲙⲛϩⲉⲛⲣⲓⲣ , |
| s-61
| ϩⲁⲙⲟⲓ ⲟⲛ ⲛⲉ ϣⲁⲧⲉⲧⲛϭⲱ ⲛⲧⲉⲓϩⲉ ⲡⲉ , |
| s-62
| ⲛⲉⲧⲉⲧⲛⲛⲁⲉⲡⲓⲑⲩⲙⲉⲓ ⲅⲁⲣ ⲉⲣⲟⲟⲩ ϩⲛⲛⲉⲩⲧⲃⲛⲟⲟⲩⲉ ⲏ ⲛⲧⲟϥ ϩⲉⲛⲕⲉϩⲛⲁⲁⲩ , |
| s-63
| ⲧⲉⲧⲛⲧⲱⲣⲡ ⲙⲙⲟⲟⲩ ⲛⲧⲟⲟⲧⲟⲩ , ϩⲟⲓⲛⲉ ⲛϫⲓⲛϫⲏ . ϩⲉⲛⲕⲟⲟⲩⲉ ϩⲁϩⲉⲛⲕⲟⲩⲓ ⲛⲧⲓⲙⲏ , ⲭⲱⲣⲓⲥ ⲟⲉⲓⲕ ϩⲓⲏⲣⲡ , ϩⲓϭⲓⲛⲟⲩⲱⲙ , ϩⲓⲧⲱϩ . ϩⲓⲉⲓⲱⲧ ⲛⲛⲉⲧⲛⲧⲃⲛⲟⲟⲩⲉ , ⲙⲛⲛⲕⲟⲟⲩⲉ ⲧⲏⲣⲟⲩ . |
| s-64
| ⲛⲧϩⲉ ⲟⲛ ⲉϣⲁⲧⲉⲧⲛⲥⲟⲟⲩϩⲟⲩ ⲉⲧⲣⲉⲩⲣⲟⲉⲓⲥ ⲉⲣⲱⲧⲛ ϩⲓⲛⲉϫⲏⲩ ϩⲙⲡⲕⲁⲓⲣⲟⲥ ⲉϣⲁⲧⲉⲧⲛⲡⲱⲧ ϩⲁⲡϩⲟ ⲛⲛⲃⲁⲣⲃⲁⲣⲟⲥ . |
| s-65
| ⲏ ⲡⲃⲁⲣⲃⲁⲣⲟⲥ ⲡⲏⲧ ⲛⲥⲱⲟⲩ ⲛⲧⲟⲟⲩ ⲁⲛ . |
| s-66
| ⲉⲣⲉⲛⲉⲩϩⲓⲟⲙⲉ ⲙⲛⲛⲉⲩϣⲏⲣⲉ ⲙⲛⲡⲥⲟⲃⲧⲉ ⲛⲧⲉⲩⲙⲛⲧϩⲏⲕⲉ ϩⲓϫⲛⲛⲉⲩⲧⲃⲛⲟⲟⲩⲉ . |
| s-67
| ⲁⲩⲱ ϩⲛⲛⲉⲩⲁϭⲟⲗⲧⲉ ⲉⲩⲡⲏⲧ ϩⲱⲟⲩ ⲉⲃⲟⲗ ϩⲛⲛⲉⲩⲧⲟⲡⲟⲥ ⲉϩⲉⲛⲕⲉⲧⲟⲡⲟⲥ ⲉⲧⲣⲉⲩⲛⲁϩⲙⲟⲩ · |
| s-68
| ⲧⲁⲓ ⲧⲉ ⲧϩⲉ ⲉϣⲁⲣⲉϩⲁϩ ⲛϩⲏⲧⲟⲩ ⲧϩⲛⲉⲣⲱⲙⲉ ϩⲁⲡⲉⲩⲃⲉⲕⲉ ⲛⲥⲉϫⲟⲟⲩⲥⲉ ⲛⲏⲧⲛ ⲉⲣⲟⲉⲓⲥ ⲉⲣⲱⲧⲛ . |
| s-69
| ⲁⲩⲱ ⲛⲧⲉⲧⲛ ϩⲱ ⲁⲛ ⲉ ⲛⲁⲓ · |
| s-70
| ⲁⲗⲗⲁ ⲧⲉⲧⲛ ⲟⲩⲱϩ ⲟⲛ ⲉϫⲛⲛⲉⲧⲛϫⲓⲛϭⲟⲛⲥ · |
| s-71
| ⲛⲧϩⲉ ⲟⲛ ⲉϣⲁⲧⲉⲧⲛϣⲁⲧⲟⲩ ϩⲟⲓⲛⲉ ⲛⲟⲩϩⲛⲟ ⲛⲥⲟⲩⲟ ⲉⲡⲏⲓ ϫⲉⲥⲉⲟϣ ⲛⲣⲱⲙⲉ ϩⲉⲛⲕⲟⲟⲩⲉ ⲛϫⲟⲩⲧⲏ ⲙⲙⲁⲁϫⲉ , ϩⲉⲛⲕⲟⲟⲩⲉ ⲛⲟⲩⲣⲧⲁⲃ · |
| s-72
| ϩⲓⲧⲛⲧⲁⲫⲟⲣⲙⲏ ⲛϫⲱⲕⲙ ϩⲛϩⲉⲛⲥⲓⲟⲟⲩⲛⲉ · |
| s-73
| ⲉⲩⲣⲓⲙⲉ ϫⲉⲛⲧⲛⲟⲩⲉϣϫⲱⲕⲙ ⲁⲛ , |
| s-74
| ⲙⲛⲧⲁⲛ ⲟⲉⲓⲕ ⲉⲟⲩⲱⲙ ⲡⲉⲛⲣⲟⲟⲩϣ ⲁⲛ ⲡⲉ ϩⲱⲃ ⲛⲧⲉⲓϩⲉ · ⲉⲣⲉⲛⲉⲛϣⲏⲣⲉ ϩⲕⲁⲉⲓⲧ , ⲉⲩⲕⲏⲕⲁϩⲏⲩ · ⲉⲣⲉⲡⲉⲩϩⲟⲩⲟ ⲣⲙⲛⲧⲣⲉ ϫⲉⲙⲉ ⲛϫⲱⲕⲙ ϩⲛⲥⲓⲟⲟⲩⲛⲉ · |
| s-75
| ⲏ ⲛⲧⲟⲟⲩ ⲁⲛ ⲡⲉⲧⲣⲕⲃⲁ ⲉⲣⲟⲟⲩ ϣⲁⲛⲧⲟⲩⲕⲟⲧⲟⲩ , ⲙⲛⲛⲕⲉⲏⲓ ⲉⲧⲉⲧⲛⲧⲣⲉⲩⲣⲕⲃⲁ ⲉⲧⲃⲏⲏⲧⲟⲩ · |
| s-76
| ⲏ ϩⲉⲛⲉⲡⲟⲓⲕⲓⲟⲛ ⲟⲛ ⲛⲉ ⲛϯⲙⲉ · |
| s-77
| ⲙⲏ ⲛⲧⲱⲧⲛ ⲟⲛ ⲁⲧⲉⲧⲛⲕⲉⲧ ⲛⲉⲩⲏⲓ ⲛϩⲏⲧⲟⲩ · |
| s-78
| ⲁⲩⲱ ⲛⲉⲓⲑⲗⲓⲯⲓⲥ ⲛⲟⲩⲱⲧ ⲛⲉⲧⲉⲧⲛⲑⲗⲓⲃⲉ ⲙⲙⲟⲟⲩ ⲛϩⲏⲧⲟⲩ ϩⲛⲛⲉⲧⲛⲕⲃⲁ ⲙⲛⲛⲉⲧⲛⲏⲣⲡ ⲉⲧⲗⲟⲙⲥ , ⲙⲛⲛⲉⲧⲛϩⲓⲥⲉ ⲧⲏⲣⲟⲩ ⲙⲛⲛⲉⲧⲛϫⲓⲛϭⲟⲛⲥ . |
| s-79
| ⲱ ⲛⲣⲱⲙⲉ ⲉⲧⲉⲣⲉϯⲥⲙⲏ ⲁⲡⲉⲓⲗⲉⲓ ⲉⲣⲱⲧⲛ ϫⲉⲛⲉⲃⲟⲗ ϩⲛⲟⲩϯⲧⲱⲛ ⲉⲧⲟ ⲛⲁⲧⲥⲱⲧⲙ ⲛⲥⲁⲧⲙⲉ ⲉⲧⲡⲉⲓⲑⲉ ⲇⲉ ⲉⲡϫⲓⲛϭⲟⲛⲥ , ⲛⲟⲩⲟⲣⲅⲏ ⲙⲛⲟⲩϭⲱⲛⲧ ⲙⲛⲟⲩⲑⲗⲓⲯⲓⲥ , ⲙⲛⲟⲩⲗⲱϫϩ ⲉϫⲙⲯⲩⲭⲏ ⲛⲓⲙ ⲛⲣⲱⲙⲉ ⲉⲧⲣϩⲱⲃ ⲉⲡⲡⲉⲧϩⲟⲟⲩ . |
| s-80
| ⲡⲗⲏⲛ ϯⲛⲁϣⲁϫⲉ ⲙⲡⲉⲕⲙⲧⲟ ⲉⲃⲟⲗ ⲡⲛⲟⲩⲧⲉⲛⲛϭⲟⲙ ⲡⲡⲁⲛⲧⲟⲕⲣⲁⲧⲱⲣ ⲙⲡⲣϭⲱⲛⲧ ⲉⲧⲁⲙⲛⲧⲁⲑⲏⲧ · |
| s-81
| ϯⲥⲟⲟⲩⲛ ϫⲉⲛⲅⲟⲃϣ ⲁⲛ ⲉⲗⲁⲁⲩ · |
| s-82
| ⲛⲧⲟⲕ ⲡⲉⲛⲧⲁⲕϣⲁϫⲉ ϩⲛⲛⲉⲕⲡⲉⲧⲟⲩⲁⲁⲃ ⲙⲡⲣⲟⲫⲏⲧⲏⲥ ⲛⲛⲁϩⲣⲛⲡⲓⲃⲁⲃⲉⲣⲱⲙⲉ ⲉⲧ ⲙⲙⲁⲩ ⲫⲁⲣⲁⲱ ϫⲉⲕⲱ ⲉⲃⲟⲗ ⲙⲡⲁⲗⲁⲟⲥ ϫⲉⲕⲁⲥ ⲉⲩⲉϣⲙϣⲉ ⲛⲁⲓ ⲏ ⲛⲥⲉⲣϣⲁ ⲛⲁⲓ . |
| s-83
| ⲛⲧⲟⲕ ⲟⲛ ⲡⲉⲛⲧⲁⲕϫⲟⲟⲥ ⲛϩⲏⲧⲟⲩ ϫⲉⲥⲣϥⲉ ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡⲛⲟⲩⲧⲉ , |
| s-84
| ϣⲛϩⲧⲏⲕ ϭⲉ ϩⲁⲡⲉⲕⲗⲁⲟⲥ ⲡϩⲁⲣϣϩⲏⲧ ⲉⲧⲉⲛⲁϣⲉⲡⲉϥⲛⲁ · |
| s-85
| ⲛⲅⲥⲟⲧⲟⲩ ⲉⲃⲟⲗ ϩⲛⲧϭⲓϫ ⲛⲛⲉⲧⲑⲗⲓⲃⲉ ⲙⲙⲟⲟⲩ · |
| s-86
| ⲛⲧϩⲉ ⲙⲡⲉⲕⲗⲁⲟⲥ ⲡⲓⲥⲣⲁⲏⲗ ⲙⲡⲓⲟⲩⲟⲉⲓϣ , ⲧⲁⲣⲟⲩⲥⲣϥⲉ ⲉⲉⲓⲙⲉ ϫⲉⲙⲛϭⲉⲛⲟⲩⲧⲉ ⲛⲃⲗⲁⲕ · |
| s-87
| ⲏ ⲛⲅⲛⲁⲩ ⲁⲛ ϫⲉⲙⲡⲉⲛϩⲉⲗⲗⲏⲛ ⲙⲛⲛϩⲉⲑⲛⲟⲥ ⲙⲛⲛⲁⲧⲛⲟⲩⲧⲉ ϭⲙϭⲟⲙ ⲉⲥⲟⲩⲱⲛⲅ ϫⲉⲙⲡⲟⲩⲥⲣϥⲉ ϩⲛⲛⲉⲩⲙⲛⲧⲁⲡⲟⲥⲧⲟⲥ · |
| s-88
| ⲙⲛⲛⲉⲩⲙⲛⲧⲁⲕⲁⲑⲁⲣⲧⲟⲥ ⲧⲏⲣⲟⲩ . |
| s-89
| ⲧⲱⲙ ϭⲉ ⲉⲣⲛⲁⲛⲟⲙⲓⲁ ⲛⲓⲙ · ⲙⲛϫⲓⲛϭⲟⲛⲥ ⲛⲓⲙ ϩⲙⲙⲁ ⲛⲓⲙ · |
| s-90
| ⲉⲃⲟⲗ ⲛⲛⲉⲧⲟⲩϫⲓ ⲙⲙⲟⲟⲩ ⲛϭⲟⲛⲥ ϫⲓⲛϫⲱϥ ⲙⲡⲕⲁϩ ϣⲁⲁⲣⲏϫⲥ ⲛⲧⲟⲓⲕⲟⲩⲙⲉⲛⲏ , ⲧⲁⲣⲉⲛⲉⲧⲥⲟⲟⲩⲛ ⲙⲙⲟⲕ ⲥⲣϥⲉ ⲉⲣϩⲙϩⲁⲗ ⲛⲁⲕ · |
| s-91
| ⲛⲥⲉⲛⲁϭⲙϭⲟⲙ ⲅⲁⲣ ⲁⲛ ⲉⲣϩⲙϩⲁⲗ ⲛⲁⲕ , ⲛⲥⲉⲣϩⲙϩⲁⲗ ⲛⲛⲣⲉϥϫⲓⲛϭⲟⲛⲥ , |
| s-92
| ⲉⲛⲉⲙⲡⲕⲥⲱⲧⲉ ⲙⲡⲉⲕⲗⲁⲟⲥ ⲡⲓⲥⲣⲁⲏⲗ ⲙⲡⲓⲟⲩⲟⲉⲓϣ ⲉⲃⲟⲗ ϩⲛⲛϭⲓϫ ⲙⲡⲓⲁⲛⲟⲙⲟⲥ ⲛⲁⲃⲟⲩⲭⲟⲇⲟⲛⲟⲥⲟⲣ , ⲙⲛⲛⲓⲕⲟⲟⲩⲉ ⲧⲏⲣⲟⲩ ⲉⲧⲉⲓⲛⲉ ⲙⲙⲟϥ ⲛⲧⲁⲩⲑⲙⲕⲟⲟⲩ ϩⲙⲡⲧⲣⲉⲕⲧⲁⲁⲩ ⲉϩⲣⲁⲓ ⲉⲧⲟⲟⲧⲟⲩ ϫⲉⲁⲕⲛⲟⲩϭⲥ ⲉⲣⲟⲟⲩ , |
| s-93
| ⲕⲁⲛ ⲥⲉϣⲓⲛⲉ ⲛⲥⲱⲕ ϩⲙⲡⲙⲁ ⲉⲧⲙⲙⲁⲩ , |
| s-94
| ⲁⲗⲗⲁ ⲛⲉⲩⲛⲁϣϫⲱ ⲁⲛ ⲡⲉ ⲛⲛⲉⲕⲥⲙⲟⲩ ⲛⲧϩⲉ ⲉⲧⲟⲩⲁϣⲥ · ϫⲉⲙⲛⲡⲁⲣⲣⲏⲥⲓⲁ ϣⲟⲟⲡ ⲛⲁⲩ ϩⲛⲧⲙⲛⲧϩⲙϩⲁⲗ ⲛⲛⲉϩⲃⲏⲩⲉ ⲉⲧⲟϣ · |
| s-95
| ⲛⲧϩⲉ ⲛⲧⲁⲩϫⲟⲟⲥ ϫⲉⲛⲁϣ ⲛϩⲉ ⲉⲛⲛⲁϣϫⲱ ⲛⲧⲱⲇⲏ ⲙⲡⲏⲓ ⲙⲡϫⲟⲉⲓⲥ ϩⲛⲛⲟⲩⲕⲁϩ ⲛϣⲙⲙⲟ . |
| s-96
| ⲛ ⲧⲉⲓ ϩⲉ ⲟⲛ ⲉⲕϣⲁⲛⲧⲙⲥⲱⲧⲉ ⲛⲛⲉⲧⲟⲩϫⲓ ⲙⲙⲟⲟⲩ ⲛϭⲟⲛⲥ ⲉⲃⲟⲗ ϩⲛⲛϭⲓϫ ⲛⲛⲓⲁⲧⲛⲁ , ⲕⲁⲛ ⲥⲉⲧⲁⲩⲟ ⲙⲡⲉⲕⲣⲁⲛ , ⲥⲉⲉⲡⲓⲑⲩⲙⲉⲓ ⲇⲉ ⲟⲛ ⲉⲣⲛⲉⲕⲟⲩⲱϣ ϫⲉⲛⲧⲟⲕ ⲡⲉ ⲧⲉⲩϩⲉⲗⲡⲓⲥ · ⲛⲥⲉⲛⲁϣϭⲙϭⲟⲙ ⲁⲛ ⲉϯⲛⲁⲕ ⲛⲛⲉⲩⲉⲣⲏⲧ · |
| s-97
| ϩⲛϩⲉⲛⲥⲙⲟⲩ ⲙⲛϩⲉⲛϣⲗⲏⲗ ⲙⲛϩⲉⲛⲛⲏⲥⲧⲉⲓⲁ ϫⲉⲙⲙⲛⲙⲛⲧⲣⲙϩⲉ ϣⲟⲟⲡ ⲛⲁⲩ ϩⲛⲟⲩⲥⲟⲟⲩⲧⲛ ⲉⲃⲟⲗ ϩⲛⲧⲙⲛⲧϩⲙϩⲁⲗ ⲛⲛⲉϩⲃⲏⲩⲉ ⲛⲛⲓⲣⲱⲙⲉ ⲉⲧⲙⲉⲉⲩⲉ ⲉϩⲉⲛⲡⲟⲛⲏⲣⲟⲛ ⲛⲛⲁⲩ ⲛⲓⲙ ⲉϩⲟⲩⲛ ⲉⲣⲟⲟⲩ . |
| s-98
| ⲓⲟⲩⲇⲁⲓ ⲙⲛ ⲛϩⲉⲗⲗⲏⲛ · |
| s-99
| ⲁⲛⲉⲛϩⲃⲏⲩⲉ ⲛⲥⲙⲛⲟⲛ ϣⲱⲡⲉ ⲛⲥⲱⲃⲉ · |
| s-100
| ⲁⲩⲱ ⲟⲛ ϫⲉⲱ ⲡⲣⲱⲙⲉ ⲓⲏⲥⲟⲩⲥ ⲡⲉ ⲧⲙⲉ · |