| s-1
| ⲣⲙⲏ ⲉϩⲣⲁⲓ ⲉⲩⲃⲁⲩⲕⲁⲗⲓⲟⲛ ⲏ ⲉϩⲣⲁⲓ ⲉⲩϣⲟϣⲟⲩ ⲉϩⲣⲁⲓ ⲉϭⲉⲗⲁⲁⲩ ⲛϩⲛⲁⲁⲩ ⲉϥⲧⲛⲧⲱⲛ ⲉⲛⲁⲓ ⲉⲙⲡⲟⲩⲟⲩⲉϩⲥⲁϩⲛⲉ ⲛⲁϥ ϩⲓⲧⲙⲡϩⲗⲗⲱ ⲉⲓⲙⲏⲧⲓ ⲡⲙⲁ ⲛⲛⲣⲱⲙⲉ ⲉⲧϣⲱⲛⲉ ⲙⲙⲁⲧⲉ ⲙⲛⲛϩⲗⲗⲟ ⲁⲩⲣϩⲁϩ ⲛⲣⲟⲙⲡⲉ ⲁⲩⲱ ⲛⲉⲓⲕⲟⲟⲩⲉ ⲉⲧⲣⲉⲩϣⲓⲛⲉ ⲛⲧⲟⲟⲧϥ ⲙⲡϩⲗⲗⲟ |
| s-2
| ⲁⲩⲱ ⲉⲣϣⲁⲛⲟⲩⲁⲛⲁⲅⲕⲏ ϣⲱⲡⲉ ⲉⲧⲣⲉϩⲓⲟⲛⲉ ⲣⲭⲣⲉⲓⲁ ⲛϩⲱⲃ ⲛⲧⲉⲓϩⲉ ϩⲣⲁⲓ ⲛϩⲏⲧⲛ ⲉⲧⲣⲉⲩⲥⲣⲣⲁⲧⲟⲩ ⲉϩⲣⲁⲓ ⲉⲗⲁⲁⲩ ⲛϩⲛⲁⲁⲩ ⲛⲧⲉⲓⲙⲓⲛⲉ ⲉⲧⲃⲉⲧⲁⲛⲁⲅⲕⲏ ⲛⲟⲩⲡⲗⲏⲅⲏ · ⲏ ⲟⲩϫⲣⲟⲡ ⲉⲁϥϣⲱⲡⲉ ϩⲓⲧⲟⲩⲉⲣⲏⲧⲉ ⲛⲟⲩⲁ ⲉⲙⲛϭⲟⲙ ⲙⲙⲟϥ ⲉⲙⲟⲟϣⲉ ⲉⲉⲓ ⲉⲃⲟⲗ ⲉⲩⲉϫⲛⲉⲡϩⲗⲗⲟ |
| s-3
| ⲁⲩⲱ ⲭⲱⲣⲓⲥⲛⲁⲓ ϩⲉⲛϣⲏⲣⲉ ϣⲏⲙ ⲏ ϭⲉⲗⲁⲁⲩ ⲛⲣⲱⲙⲉ ⲉⲩϣⲁⲛⲥⲣⲣⲁⲧⲟⲩ ⲉϩⲣⲁⲓ ϩⲛⲗⲁⲁⲩ ⲛϩⲛⲁⲁⲩ ⲛⲧⲉⲓⲙⲓⲛⲉ ⲉⲩⲉϣⲱⲡⲉ ⲉⲩⲥϩⲟⲩⲟⲣⲧ |
| s-4
| ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲧⲱϣ ⲛⲟⲩϩⲱⲃ ⲉϥⲟ ⲛⲛⲟⲃⲉ ⲉⲡⲉⲧϩⲓⲧⲟⲩⲱϥ ϩⲛⲟⲩⲙⲛⲧⲣⲉϥϩⲓⲗⲁ |
| s-5
| ⲉⲙⲉϥⲉⲓⲙⲉ ⲉⲡⲱⲣϫ · ⲁⲗⲗⲁ ⲉⲧⲃⲉⲟⲩⲙⲟⲥⲧⲉ ⲉϥϫⲱ ⲙⲡⲉⲧⲉⲛϥϣⲟⲟⲡ ⲁⲛ ⲉϣⲱⲡⲉ ⲉⲩϩⲟⲟⲩⲧ ⲡⲉ ⲉϣⲱⲡⲉ ⲉⲩⲥϩⲓⲙⲉ ⲧⲉ · |
| s-6
| ϥⲥϩⲟⲩⲟⲣⲧ ⲛϭⲓⲡⲉⲧϫⲱ ⲙⲙⲟⲥ ϩⲛⲟⲩⲙⲛⲧⲣⲉϥⲧⲱϩ ϫⲉⲁⲓⲛⲁⲩ ⲉⲩⲣⲁⲥⲟⲩ ⲉⲣⲉⲛⲓⲙ ⲙⲛⲛⲓⲙ ϣⲱⲗ ⲙⲙⲟⲟⲩ ⲉⲃⲟⲗ ϩⲣⲁⲓ ϩⲛϩⲱⲃ ⲛⲓⲙ ⲙⲡⲟⲛⲏⲣⲟⲛ ⲉϣⲱⲡⲉ ⲉⲩϩⲟⲟⲩⲧ ⲡⲉ ⲉϣⲱⲡⲉ ⲉⲩⲥϩⲓⲙⲉ ⲧⲉ · |
| s-7
| ⲥⲉ ⲥϩⲟⲩⲟⲣⲧ ⲛϭⲓⲟⲩⲟⲛ ⲛⲓⲙ ⲉⲧⲉⲓⲣⲉ ⲛϩⲉⲛⲕⲣⲟϥ ϩⲣⲁⲓ ϩⲛⲥⲩⲛⲁⲅⲱⲅⲏ ⲧⲏⲣⲟⲩ ⲙⲡϫⲟⲉⲓⲥ · ⲉⲧⲣⲉⲡⲛⲟⲩⲧⲉ ϭⲱⲛⲧ ⲉⲩⲛⲟϭ ⲙⲙⲏⲏϣⲉ ⲛϥⲕⲧⲟ ⲙⲡⲉϥϩⲟ ⲉⲃⲟⲗ ⲙⲙⲟⲟⲩ ϩⲛⲟⲩⲟⲣⲅⲏ ⲉⲧⲃⲉⲧⲙⲛⲧϣⲁϥⲧⲉ ⲛⲛⲉⲧⲉⲓⲣⲉ ⲛⲧⲁⲛⲟⲙⲓⲁ ϩⲛⲟⲩϩⲱⲡ ⲏ ϩⲛⲟⲩⲱⲛϩ ⲉⲃⲟⲗ ϩⲣⲁⲓ ⲛϩⲏⲧⲛ · |
| s-8
| ⲁⲩⲱ ⲟⲩⲟⲓ ⲛⲛⲉⲧⲉⲣⲉⲡⲛⲟⲩⲧⲉ ⲛⲁϩⲟϫϩϫ ⲉⲃⲟⲗ ϩⲓⲧⲟⲟⲧⲟⲩ ⲁⲩⲱ ⲛϥⲕⲱⲧⲉ ⲛⲥⲁⲧϩⲉ ⲛⲉⲓ ⲉⲉⲃⲟⲗ ϩⲛⲧⲉⲩⲙⲏⲧⲉ · ⲛⲧϩⲉ ⲛⲟⲩⲣⲱⲙⲉ ⲛⲇⲓⲕⲁⲓⲟⲥ ⲉⲁϥⲕⲱⲧⲉ ⲛⲥⲁⲧϩⲉ ⲛⲕⲱ ⲛⲥⲱϥ ⲛⲟⲩⲗⲁⲟⲥ ⲉⲧⲃⲉⲛⲉⲩϩⲃⲏⲩⲉ ⲉⲧϩⲟⲟⲩ ⲕⲁⲧⲁⲡϣⲁϫⲉ ⲙⲡⲉⲡⲣⲟⲫⲏⲧⲏⲥ ϫⲉⲛⲓⲙ ⲡⲉⲧⲛⲁϯⲛⲁⲓ ϩⲙⲡϫⲁⲓⲉ ⲛⲟⲩⲙⲁ ⲛϣⲱⲡⲉ ⲉϥⲟⲩⲏⲩ ⲛⲧⲁⲕⲱ ⲛⲥⲱⲓ ⲙⲡⲉⲓⲗⲁⲟⲥ ⲛⲧⲁⲟⲩⲉ ⲉⲃⲟⲗ ⲙⲙⲟⲟⲩ · |
| s-9
| ⲛⲁⲉⲓⲁⲧⲟⲩ ⲇⲉ ⲛⲟⲩⲟⲛ ⲛⲓⲙ ⲉⲧⲉⲣⲉⲡⲛⲟⲩⲧⲉ ⲛⲁⲧⲱⲧ ⲛϩⲏⲧ ⲉⲃⲟⲗ ϩⲓⲧⲟⲟⲧⲟⲩ ⲉⲧⲣⲉϥⲣϩⲛⲁϥ ⲉϭⲱ ϩⲛⲧⲉⲩⲙⲏⲧⲉ · ⲛⲧϩⲉ ⲛⲟⲩⲣⲱⲙⲉ ⲛⲇⲓⲕⲁⲓⲟⲥ ⲉⲁϥⲧⲱⲧ ⲛϩⲏⲧ ⲛⲧⲟⲟⲧⲟⲩ ⲛϩⲉⲛⲣⲱⲙⲉ ⲙⲡⲓⲥⲧⲟⲥ ⲁⲩⲱ ⲉⲁϥⲣϩⲛⲁϥ ⲉϭⲱ ⲛⲟⲩⲟⲉⲓϣ ⲛⲓⲙ ϩⲛⲧⲉⲩⲙⲏⲧⲉ · ⲉⲧⲃⲉϫⲉⲛⲧⲟϥ ϩⲱⲱϥ ⲡϫⲟⲉⲓⲥ ϥⲱⲟⲟⲡ ϩⲛⲧⲉⲩⲙⲏⲧⲉ ⲛⲟⲩⲟⲉⲓϣ ⲛⲓⲙ ⲉⲧⲃⲉⲛⲉⲩϩⲃⲏⲩⲉ ⲙⲙⲉ ⲁⲩⲱ ⲛⲇⲓⲕⲁⲓⲟⲛ · |
| s-10
| ⲟⲩⲟⲛ ⲇⲉ ⲛⲓⲙ ϩⲣⲁⲓ ⲛϩⲏⲧⲛ ⲉⲧⲛⲁⲛⲁⲩ ⲉⲩϩⲱⲃ ⲛⲕⲣⲟϥ ϩⲛⲟⲩϫⲱϩⲙ · ⲏ ϩⲛⲟⲩϫⲓⲟⲩⲉ ⲏ ϩⲛϭⲉⲗⲁⲁⲩ ⲛⲛⲟⲃⲉ ⲉϥϫⲓ ⲉϩⲟⲩⲛ ⲉⲡⲙⲟⲩ ⲁⲩⲱ ⲛⲧⲟⲟⲩ ⲛⲥⲉⲧⲙⲧⲁⲙⲟⲓ ϫⲉⲛⲓⲙ ⲡⲉ ⲏ ϫⲉⲟⲩ ⲛⲉ ⲛⲉϩⲃⲏⲩⲉ ⲛⲡⲟⲛⲏⲣⲟⲛ ⲉⲧⲙⲙⲁⲩ · ⲉⲩⲉⲉⲓ ⲉϩⲣⲁⲓ ⲉϫⲱⲟⲩ ⲛϭⲓⲛⲉⲓⲥⲁϩⲟⲩ ⲧⲏⲣⲟⲩ ⲉⲃⲟⲗ ϩⲓⲧⲛⲡⲛⲟⲩⲧⲉ ⲉϣⲱⲡⲉ ⲉⲩϩⲟⲟⲩⲧ ⲡⲉ ⲉϣⲱⲡⲉ ⲉⲩⲥϩⲓⲙⲉ ⲧⲉ · |
| s-11
| ⲛⲕⲟⲟⲩⲉ ⲇⲉ ⲧⲏⲣⲟⲩ ⲉⲧⲉϣϣⲉ ⲉⲥⲁϩⲟⲩ ⲉϩⲣⲁⲓ ⲉⲧⲉⲓⲉⲡⲓⲥⲧⲟⲗⲏ · ⲁⲩⲱ ⲙⲡⲛⲥⲁϩⲟⲩ · ⲉⲓⲥϩⲏⲏⲛⲉ ⲥⲉⲥⲏϩ ⲧⲏⲣⲟⲩ ϩⲛⲛⲉⲭⲁⲣⲧⲏⲥ ⲉⲧⲥⲏϩ ϫⲓⲛⲛϣⲟⲣⲡ · |
| s-12
| ⲛϣⲁϫⲉ ⲇⲉ ⲉⲧⲟⲩⲁⲁⲃ ⲛⲧⲉⲡⲉⲛϫⲟⲉⲓⲥ ⲓⲏⲥⲟⲩⲥ ⲉⲧⲥⲏϩ ϩⲛⲛⲉⲅⲣⲁⲫⲏ · ⲁⲩⲱ ϩⲛϯⲉⲡⲓⲥⲧⲟⲗⲏ ϯⲛⲁⲧⲁⲙⲱⲧⲛ ϫⲉⲉⲩⲧⲛⲧⲱⲛ ⲉⲟⲩ · |
| s-13
| ⲉⲩⲧⲛⲧⲱⲛ ⲉϩⲉⲛϩⲏⲃⲥ ⲉⲁⲩϫⲉⲣⲱⲟⲩ ϩⲛϩⲉⲛⲙⲁ ⲛⲕⲁⲕⲉ · |
| s-14
| ⲁⲩⲱ ⲉⲩⲧⲛⲧⲱⲛ ⲉⲡⲟⲩⲟⲉⲓⲛ ⲙⲡⲉϩⲟⲟⲩ · |
| s-15
| ⲁⲩⲱ ⲛⲁⲧϩⲏⲧ ⲉⲧⲣϩⲟⲩⲟ ⲉⲙⲁⲧⲉ ϩⲛϩⲉⲛⲙⲛⲧⲥⲟϭ · ⲉⲩⲧⲛⲧⲱⲛ ⲉϩⲉⲛⲛⲩⲕⲧⲉⲣⲓⲥ · |
| s-16
| ⲁⲩⲱ ⲛⲧϩⲉ ⲉⲧⲉϣⲁⲩⲣⲱϩⲧ ⲉⲡⲉⲥⲏⲧ ⲏ ⲛⲥⲉⲡⲱⲧ ⲉϩⲟⲩⲛ ⲉⲡⲕⲁⲕⲉ · ⲏ ⲉϩⲣⲁⲓ ⲉϩⲉⲛⲙⲁ ⲉⲩϣⲟⲕϩ ⲛϭⲓϩⲉⲛⲛⲩⲕⲧⲉⲣⲓⲥ ⲉⲧⲉϭⲓⲛϭⲗⲱ ⲡⲉ · ϩⲟⲧⲁⲛ ⲉⲩϣⲁⲛⲛⲁⲩ ⲉⲡⲟⲩⲟⲉⲓⲛ ⲙⲡϣⲁϩ ⲛϩⲉⲛϩⲏⲃⲥ ⲙⲛⲡⲟⲩⲟⲉⲓⲛ ⲙⲡⲉϩⲟⲟⲩ · |
| s-17
| ⲧⲁⲓ ⲟⲛ ⲧⲉ ⲧϩⲉ ⲉⲧⲉⲣⲉⲛⲁⲧϩⲏⲧ ⲙⲛⲛⲉⲧⲣϩⲟⲩⲟ ⲉⲙⲁⲧⲉ ϩⲛϩⲉⲛⲙⲛⲧⲥⲟϭ ⲛⲁⲣⲱϩⲧ ⲉⲡⲉⲥⲏⲧ ⲏ ⲉϩⲣⲁⲓ ⲉⲛⲉⲩⲡⲁⲑⲟⲥ ⲙⲛⲛⲉⲩⲟⲩⲱϣ · ⲙⲛⲡⲕⲁⲕⲉ ⲙⲡⲉⲩⲥⲟⲟⲩⲛ ⲛⲛⲟⲩϫ ⲛⲛⲁϩⲣⲛⲛϣⲁϫⲉ ⲧⲏⲣⲟⲩ ⲙⲡⲉⲛϫⲟⲉⲓⲥ · ⲉⲓⲧⲉ ⲛⲉⲃⲟⲗ ϩⲛⲛⲉⲅⲣⲁⲫⲏ · ⲉⲓⲧⲉ ⲛⲉⲃⲟⲗ ϩⲛⲧⲉⲓⲉⲡⲓⲥⲧⲟⲗⲏ ⲙⲙⲁⲧⲉ ⲁⲛ · ⲁⲗⲗⲁ ⲛⲛⲁϩⲣⲛⲛⲕⲟⲟⲩⲉ ⲧⲏⲣⲟⲩ ⲉⲧⲥⲏϩ ϩⲣⲁⲓ ϩⲛⲛⲉⲓⲭⲁⲣⲧⲏⲥ ⲉⲧⲥⲏϩ ϫⲓⲛⲛϣⲟⲣⲡ |
| s-18
| ⲡⲁⲗⲓⲛ ⲇⲉ ⲟⲛ ⲉⲩⲧⲛⲧⲱⲛ ⲛϭⲓⲛϣⲁϫⲉ ⲉⲧⲟⲩⲁⲁⲃ ⲛⲧⲉⲡⲉⲛϫⲟⲉⲓⲥ ⲓⲏⲥⲟⲩⲥ ⲉⲡⲟⲩⲟⲉⲓⲛ ⲛϩⲉⲛϩⲏⲃⲥ ⲉⲩϩⲛⲛϭⲓϫ ⲛⲟⲩⲣⲱⲙⲉ ⲛⲥⲁⲃⲉ · |
| s-19
| ⲉⲩⲣⲟⲩⲟⲉⲓⲛ ⲉⲣⲟϥ ϩⲛϩⲉⲛⲙⲁ ⲛⲕⲁⲕⲉ ⲉϥⲉⲓⲣⲉ ⲛⲛⲉϥϩⲃⲏⲩⲉ · |
| s-20
| ⲕⲁⲧⲁⲧϩⲉ ⲉⲧⲥⲏϩ ϫⲉⲡϩⲏⲃⲥ ⲛⲛⲁⲟⲩⲉⲣⲏⲧⲉ : ⲉⲡⲉⲕϣⲁϫⲉ |
| s-21
| ⲁⲩⲱ ⲉⲩⲧⲛⲧⲱⲛ ⲉⲡⲟⲩⲟⲉⲓⲛ ⲙⲡⲉϩⲟⲟⲩ · |
| s-22
| ⲁⲩⲱ ⲡⲉⲧϯ ⲛϩⲧⲏϥ ⲉⲣⲟⲟⲩ ⲛϥⲛⲁϫⲓϫⲣⲟⲡ ⲁⲛ ⲕⲁⲧⲁⲛⲉⲅⲣⲁⲫⲏ ϫⲉⲡⲉⲧⲙⲟⲟϣⲉ ϩⲛⲡⲉϩⲟⲟⲩ · ⲙⲉϥϫⲓϫⲣⲟⲡ · |
| s-23
| ⲉⲧⲃⲉⲡⲁⲓ ⲛⲁⲓⲁⲧⲟⲩ ⲛⲛϣⲏⲣⲉ ⲙⲡⲟⲩⲟⲉⲓⲛ ⲉⲧⲉⲛⲉⲧⲙⲟⲟϣⲉ ⲛⲉ ϩⲛⲧⲡⲁⲣⲣⲏⲥⲓⲁ ⲛϩⲩⲡⲟⲧⲁⲅⲏ ⲛⲓⲙ ϩⲓⲙⲛⲧⲥⲧⲙⲏⲧ ⲛⲓⲙ ϩⲓϩⲱⲃ ⲛⲓⲙ ⲛⲁⲅⲁⲑⲟⲛ |
| s-24
| ⲟⲩⲟⲓ ⲇⲉ ⲛⲛϣⲏⲣⲉ ⲙⲡⲕⲁⲕⲉ ⲉⲧⲉⲛⲉⲧⲙⲟⲟϣⲉ ⲛⲉ ϩⲛⲙⲛⲧⲁⲧⲥⲱⲧⲙ ⲛⲓⲙ ϩⲓⲙⲛⲧⲁⲧⲥⲃⲱ ⲛⲓⲙ · |
| s-25
| ⲉⲩⲡⲏⲧ ⲉϩⲟⲩⲛ ⲏ ⲉϩⲣⲁⲓ ⲉⲡⲕⲁⲕⲉ ⲛϩⲱⲃ ⲛⲓⲙ ⲉϥϩⲟⲟⲩ ⲛⲧϩⲉ ⲛⲛⲛⲩⲕⲧⲉⲣⲓⲥ ⲉⲧⲡⲏⲧ ⲉϩⲟⲩⲛ ⲏ ⲉϩⲣⲁⲓ ⲉϩⲉⲛⲙⲁ ⲛⲕⲁⲕⲉ ⲉⲩϣⲟⲕϩ ⲉⲙⲁⲧⲉ · |
| s-26
| ⲁϩⲣⲟϥ ⲁϥϫⲟⲟⲥ ⲛϭⲓⲡϫⲟⲉⲓⲥ ⲡⲛⲟⲩⲧⲉ ⲉⲃⲟⲗ ϩⲓⲧⲟⲟⲧⲟⲩ ⲛⲛⲉϥⲡⲉⲧⲟⲩⲁⲁⲃ ϫⲉⲉⲣϣⲁⲛⲡⲉⲕϫⲁϫⲉ ϩⲕⲟ ⲙⲁⲧⲙⲙⲟϥ ⲁⲩⲱ ⲉϥϣⲁⲛⲉⲓⲃⲉ ⲙⲁⲧⲥⲟϥ |
| s-27
| ⲉⲧⲃⲉⲟⲩ ϩⲱⲱϥ ⲁϥϫⲟⲟⲥ ϫⲉⲉⲣϣⲁⲛⲧⲙⲡⲉⲕⲥⲟⲛ ⲥⲱⲧⲙ ⲛⲥⲱⲕ ⲙⲁⲣⲉϥϣⲱⲡⲉ ⲛⲁⲕ ⲛⲧϩⲉ ⲛⲟⲩϩⲉⲑⲛⲓⲕⲟⲥ ⲙⲛⲟⲩⲧⲉⲗⲱⲛⲏⲥ · |
| s-28
| ϩⲙⲡⲧⲣⲉϥϫⲟⲟⲥ ⲇⲉ ϫⲉⲣⲡⲉⲧⲛⲁⲛⲟⲩϥ ⲛⲓⲙ ⲛⲛⲉⲧⲛϫⲓϫⲉⲉⲩⲉ ⲕⲁⲧⲁⲧⲉⲛⲧⲟⲗⲏ · ⲉϥⲟⲩⲱϣ ⲉⲧⲣⲉⲡⲁⲅⲁⲑⲟⲥ ⲛⲣⲱⲙⲉ ⲛⲧⲉⲡⲛⲟⲩⲧⲉ ϫⲱⲕ ⲉⲃⲟⲗ ⲛⲟⲩⲙⲛⲧⲁⲅⲁⲑⲟⲥ ϩⲓⲧⲛⲧⲡⲟⲛⲏⲣⲓⲁ ⲙⲡⲡⲟⲛⲏⲣⲟⲥ ⲛⲣⲱⲙⲉ ⲉⲧⲏⲡ ⲉⲡⲣⲉϥⲣⲛⲟⲃⲉ ⲡⲥⲁⲧⲁⲛⲁⲥ |
| s-29
| ⲉⲡⲉⲓⲇⲏ ⲉⲡⲙⲁ ⲛⲧⲡⲟⲛⲏⲣⲓⲁ ⲙⲡⲡⲟⲛⲏⲣⲟⲥ ⲛⲣⲱⲙⲉ ϣⲁⲣⲉⲧⲙⲛⲧⲁⲅⲁⲑⲟⲥ ⲙⲡⲁⲅⲁⲑⲟⲥ ⲛⲣⲱⲙⲉ ϥⲓ ⲙⲙⲁⲩ ⲛⲧⲡⲟⲛⲏⲣⲓⲁ ⲙⲡⲣⲱⲙⲉ ⲛϫⲁϫⲉ · |
| s-30
| ϩⲙⲡⲧⲣⲉⲡⲣⲱⲙⲉ ⲧⲱⲱⲃⲉ ⲛⲟⲩⲡⲉⲧⲛⲁⲛⲟⲩϥ ⲉⲡⲙⲁ ⲛⲟⲩⲡⲉⲧϩⲟⲟⲩ ⲉϣⲁϥϫⲱⲕ ⲉⲃⲟⲗ ⲛⲧⲙⲛⲧⲛⲟⲩⲧⲉ ⲙⲡⲛⲟⲩⲧⲉ · |
| s-31
| ϩⲙⲡⲧⲣⲉⲡⲣⲱⲙⲉ ⲇⲉ ⲧⲱⲱⲃⲉ ⲛⲟⲩⲡⲉⲧϩⲟⲟⲩ ⲉⲡⲙⲁ ⲛⲟⲩⲡⲉⲧⲛⲁⲛⲟⲩϥ ⲉϣⲁϥϫⲱⲕ ⲉⲃⲟⲗ ⲛⲧⲙⲛⲧⲁⲧⲛⲟⲩⲧⲉ ⲙⲡⲁⲧⲛⲟⲩⲧⲉ ⲛⲇⲓⲁⲃⲟⲗⲟⲥ · |
| s-32
| ϩⲙⲡⲧⲣⲉϥϫⲟⲟⲥ ⲇⲉ ϫⲉⲉⲣϣⲁⲛⲧⲙⲡⲉⲕⲥⲟⲛ ⲥⲱⲧⲙ ⲛⲥⲱⲕ ⲙⲁⲣⲉϥϣⲱⲡⲉ ⲛⲁⲕ ⲉⲩϫⲁϫⲉ ⲛⲧϩⲉ ⲙⲡⲉⲧⲉⲙⲡⲕⲛⲁⲩ ⲉⲣⲟϥ ⲉⲛⲉϩ · ϣⲟⲣⲡ ⲙⲉⲛ ⲉϥⲟⲩⲱϣ ⲛϭⲓⲡϫⲟⲉⲓⲥ ⲉⲧⲣⲉⲛϣⲁⲁⲧϥ ⲉⲃⲟⲗ ⲙⲙⲟⲛ ⲙⲛⲛⲥⲁⲧⲣⲉⲛϫⲡⲓⲟϥ ϫⲉⲁⲣⲏⲩ ⲣⲱ ⲛϥⲣϩⲧⲏϥ ⲙⲛⲛⲥⲁⲧⲣⲉϥϣⲱⲡⲉ ⲛⲧϩⲉ ⲛⲟⲩϣⲙⲙⲟ ⲉⲧⲃⲉⲡⲛⲟⲩⲧⲉ ⲉⲡⲉⲛⲥⲟⲛ ⲡⲉ ⲁⲩⲱ ⲛϥⲕⲧⲟϥ ⲛϥⲙⲉⲧⲁⲛⲟⲉⲓ ⲛⲧⲛⲕⲱ ⲛⲁϥ ⲉⲃⲟⲗ ϣⲁⲥⲁϣϥ ⲛϣϥⲉ ⲛⲥⲟⲡ ϩⲟⲧⲁⲛ ⲉϥϣⲁⲛⲧⲙⲟⲩⲁϩⲙⲉϥ ⲉϩⲣⲁⲓ ⲉⲡⲛⲟⲃⲉ ⲉⲛⲧⲁⲛⲙⲉⲉⲩⲉ ⲉϣⲁⲁⲧϥ ⲉⲃⲟⲗ ⲙⲙⲟⲛ ⲉⲧⲃⲏⲏⲧϥ · |
| s-33
| ⲁⲗⲗⲁ ⲉϣⲱⲡⲉ ⲉϥϣⲁⲛⲧⲙⲣϩⲛⲁϥ ⲉⲕⲧⲟϥ ⲉⲃⲟⲗ ϩⲙⲡⲛⲟⲃⲉ ⲉⲛⲧⲁⲛⲙⲉⲉⲩⲉ ⲉϣⲁⲁⲧϥ ⲉⲃⲟⲗ ⲙⲙⲟⲛ ⲉⲧⲃⲏⲏⲧϥ ⲉⲛⲛⲁϣⲁⲁⲧϥ ⲉⲃⲟⲗ ⲙⲙⲟⲛ ⲁⲩⲱ ⲛⲛⲉϥⲕⲧⲟϥ ⲉⲣⲟⲛ ⲁⲩⲱ ⲛⲛⲉⲛⲙⲉⲣⲓⲧϥ |
| s-34
| ⲁⲗⲗⲁ ⲉϥⲉϣⲱⲡⲉ ⲛⲁⲛ ⲛⲟⲩϫⲁϫⲉ ⲉⲧⲃⲉⲡⲛⲟⲩⲧⲉⲉⲡⲉⲛⲥⲟⲛ ⲡⲉ |
| s-35
| ⲁⲩⲱ ⲛⲧⲉⲓϩⲉ ϣⲁⲣⲉⲡⲙⲁⲓⲛⲟⲩⲧⲉ ⲟⲩⲱⲛϩ ⲉⲃⲟⲗ ⲙⲡⲉϥⲟⲩⲱϣ ⲧⲏⲣϥ ⲉϩⲟⲩⲛ ⲉⲡϫⲟⲉⲓⲥ ϫⲉⲁϥⲙⲉⲣⲓⲧϥ ⲉϩⲟⲩo ⲉⲡⲉϥⲥⲟⲛ · ⲁⲩⲱ ⲛϩⲟⲩⲟ ⲉⲡⲉϥⲉⲓⲱⲧ ⲙⲛⲧⲉϥⲙⲁⲁⲩ · |
| s-36
| ⲟⲩⲛⲟϭ ⲅⲁⲣ ⲙⲙⲛⲧⲧⲉⲗⲓⲟⲥ ⲧⲉ ⲉⲧⲣⲉⲡⲣⲱⲙⲉ ϣⲱⲱⲧ ⲉⲃⲟⲗ ⲙⲙⲟϥ ⲙⲡⲉϥⲥⲟⲛ ⲏ ⲡⲉϥϣⲏⲣⲉ ⲏ ⲧⲉϥϣⲉⲉⲣⲉ ⲏ ⲡⲉϥⲉⲓⲱⲧ ⲏ ⲧⲉϥⲙⲁⲁⲩ ⲏ ϭⲉⲗⲁⲁⲩ ⲛⲣⲱⲙⲉ ⲛⲧⲁϥ ⲉⲧⲃⲉⲡⲛⲟⲩⲧⲉ · |
| s-37
| ϩⲟⲧⲁⲛ ⲉⲩϣⲁⲛⲣⲛⲟⲃⲉ ⲉⲡⲉⲛⲧⲁϥⲧⲁⲙⲓⲟⲟⲩ ⲉⲧⲉⲡⲛⲟⲩⲧⲉ ⲡⲉ · |
| s-38
| ⲁⲩⲱ ⲟⲩⲛⲟϭ ⲙⲙⲛⲧϫⲱⲱⲣⲉ ⲧⲉ ⲉⲧⲣⲉⲡⲣⲱⲙⲉ ⲙⲉⲣⲉⲛⲉϥϫⲓϫⲉⲉⲩⲉ ⲉⲧⲃⲉⲡⲛⲟⲩⲧⲉ ⲁⲩⲱ ⲛϥϣⲗⲏⲗ ⲉϫⲛⲛⲉⲧⲡⲏⲧ ⲛⲥⲱϥ ⲉⲧⲣⲡⲉⲧϩⲟⲟⲩ ⲛⲁϥ ⲁⲩⲱ ⲉⲧⲃⲉⲡⲛⲟⲩⲧⲉ ⲛϥⲥⲙⲟⲩ ⲉⲛⲉⲧⲥⲁϩⲟⲩ ⲙⲙⲟϥ ⲉⲧⲣⲛⲟⲃⲉ ⲉⲣⲟϥ · |
| s-39
| ⲁⲩⲱ ⲧⲁⲓ ⲧⲉ ⲧϩⲉ ⲛⲧⲁϥϫⲟⲟⲥ ϫⲉⲙⲁⲣⲉⲡⲉⲕⲥⲟⲛ ϣⲱⲡⲉ ⲛⲁⲕ ⲛⲟⲩϩⲉⲑⲛⲓⲕⲟⲥ ⲙⲛⲟⲩⲧⲉⲗⲱⲛⲏⲥ ⲉⲧⲃⲉⲡⲛⲟⲩⲧⲉ ϩⲟⲧⲁⲛ ⲉϥϣⲁⲛⲣⲛⲟⲃⲉ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ · |
| s-40
| ⲡⲉⲕϫⲁϫⲉ ⲇⲉ ϩⲱⲱϥ ⲉⲧⲣⲛⲟⲃⲉ ⲉⲣⲟⲕ ⲛⲅⲙⲉⲣⲓⲧϥ ⲁⲩⲱ ⲛⲅⲥⲙⲟⲩ ⲉⲣⲟϥ ⲉⲧⲃⲉⲡⲛⲟⲩⲧⲉ · |
| s-41
| ⲁⲛⲟⲛ ⲇⲉ ϩⲱⲱⲛ ⲉⲥⲛⲏⲩ ⲉⲛϩⲟⲥⲟⲛ ⲉⲛⲟ ⲛⲕⲟⲓⲛⲱⲛⲟⲥ ⲙⲛⲛⲉⲛⲉⲣⲏⲩ ⲁⲛⲟⲛ ⲛϣⲏⲣⲉ ⲛⲟⲩⲣⲱⲙⲉ ⲛⲟⲩⲱⲧ ⲉⲧⲉⲡⲛⲟⲩⲧⲉ ⲡⲉ · |
| s-42
| ⲁⲩⲱ ⲁⲛⲟⲛ ⲛϣⲏⲣⲉ ⲛⲟⲩⲙⲁⲁⲩ ⲛⲟⲩⲱⲧ ⲉⲧⲉⲧϩⲓⲉⲣⲟⲩⲥⲁⲗⲏⲙ ⲛⲧⲡⲉ ⲧⲉ ⲕⲁⲧⲁⲛⲉⲅⲣⲁⲫⲏ · |
| s-43
| ⲙⲏ ⲁⲣⲁ ϭⲉ ⲉϥⲥⲟⲧⲡ ⲛϭⲓⲡⲉⲛⲉⲓⲱⲧ ⲙⲛⲧⲉⲛⲙⲁⲁⲩ ⲉⲛⲧⲁⲩϫⲡⲟⲛ ⲁⲩⲱ ⲉⲁⲩⲥⲁⲛⲟⲩϣⲛ ⲕⲁⲧⲁⲥⲁⲣⲝ ⲛϩⲟⲩⲟ ⲉⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲛⲉⲓⲱⲧ ⲁⲩⲱ ⲧⲉⲛⲙⲁⲁⲩ ⲛⲁⲙⲉ · |
| s-44
| ⲡⲁⲓ ⲉⲛⲧⲁϥϫⲡⲟⲛ ϩⲣⲁⲓ ϩⲙⲡⲉϥⲥⲛⲟϥ ⲉⲧⲟⲩⲁⲁⲃ |
| s-45
| ⲁϥϫⲟⲟⲥ ⲛϭⲓⲁⲡⲁ ⲓⲥⲁⲕ ϫⲉⲛⲉⲛⲉⲓⲟⲧⲉ ⲙⲛⲁⲡⲁ ⲡⲁⲙⲃⲱ ⲛⲉⲩⲫⲟⲣⲉⲓ ⲛϩⲉⲛϣⲧⲏⲛ ⲙⲡⲉⲗϭⲉ ⲉⲩϩⲛⲛⲧⲟⲉⲓⲥ ⲙⲛϩⲉⲛϣⲧⲏⲛ ⲛϣⲃⲛⲛⲉ . |
| s-46
| ⲛⲧⲱⲧⲛ ⲇⲉ ⲧⲉⲛⲟⲩ ⲧⲉⲧⲛⲫⲟⲣⲉⲓ ⲛϩⲉⲛϣⲧⲏⲛ ⲉⲩⲧⲁⲉⲓⲏⲩ . |
| s-47
| ⲃⲱⲕ ⲛⲧⲱⲧⲛ ⲙⲡⲉⲓⲙⲁ · |
| s-48
| ⲁⲧⲉⲧⲛⲧⲁⲕⲟϥ . |
| s-49
| ⲉⲩⲛⲁⲃⲱⲕ ⲇⲉ ⲉⲡⲱϩⲥ ⲡⲉϫⲁϥ ⲛⲁⲩ ϫⲉⲛϯⲛⲁⲃⲱⲕ ⲁⲛ ⲉⲕⲟⲧⲧ ⲉϯⲛⲧⲟⲗⲏ ⲛⲏⲧⲛ . |
| s-50
| ⲛⲧⲉⲧⲛ ϩⲁⲣⲉϩ ⲅⲁⲣ ⲁⲛ . |
| s-51
| ⲛⲧⲟϥ ⲟⲛ ⲁϥϫⲟⲟⲥ ϫⲉⲁ ⲁⲡⲁ ⲡⲁⲙⲃⲱ ϫⲟⲟⲥ ϫⲉⲧⲁⲓ ⲧⲉ ⲧϩⲉ ⲉⲧⲉϣϣⲉ ⲉⲡⲙⲟⲛⲁⲭⲟⲥ ⲉⲫⲟⲣⲉⲓ ⲛⲛⲉϥϩⲟⲓⲧⲉ · |
| s-52
| ϩⲱⲥⲧⲉ ⲉⲛⲉϫ ⲧⲉϥϣⲧⲏⲛ ⲙⲡⲃⲟⲗ ⲛⲧⲉϥⲣⲓ ⲛϣⲟⲙⲛⲧ ⲛϩⲟⲟⲩ . ⲛⲧⲉⲧⲙ ⲗⲁⲁⲩ ⲧⲁⲓⲟⲥ ⲉϥⲓⲧⲥ · |
| s-53
| ⲧⲟⲧⲉ ⲉϥⲉⲫⲟⲣⲉⲓ ⲙⲙⲟⲥ . |
| s-54
| ⲁϥϫⲟⲟⲥ ⲛϭⲓⲁⲡⲁ ⲕⲁⲥⲓⲁⲛⲟⲥ · ϫⲉⲁϥϫⲟⲟⲥ ⲛϭⲓⲟⲩⲁ ⲛⲛⲥⲩⲛⲕⲗⲏⲧⲓⲕⲟⲥ · ⲉⲁϥⲁⲡⲟⲧⲁⲥⲥⲉ ⲛⲛⲉϥⲭⲣⲏⲙⲁ ⲧⲏⲣⲟⲩ |
| s-55
| ⲁϥⲧⲁⲁⲩ ⲛⲛϩⲏⲕⲉ · |
| s-56
| ⲁϥⲕⲁ ϩⲉⲛⲕⲟⲩⲓ ⲛⲁϥ ⲉⲧⲃⲉⲧⲉϥⲭⲣⲉⲓⲁ ⲙⲁⲩⲁⲁϥ · |
| s-57
| ⲙⲡⲉϥⲟⲩⲱϣ ⲉⲱⲛϩ ϩⲛⲟⲩⲙⲛⲧⲁⲡⲟⲧⲁⲕⲧⲓⲕⲟⲥ ⲉⲧϫⲏⲕ ⲉⲃⲟⲗ · ⲻ ⲛⲧⲉⲡⲉⲑⲃⲃⲓⲟ ⲛϩⲏⲧ · ⲻ |
| s-58
| ⲡⲁⲓ ⲇⲉ ⲁϥϫⲱ ⲛⲟⲩϣⲁϫⲉ ⲛⲁϩⲣⲁϥ ⲛϭⲓⲃⲁⲥⲓⲙⲟⲥ ⲡⲉⲧϣⲟⲟⲡ ϩⲛⲛⲉⲧⲟⲩⲁⲁⲃ · ⲉϥϫⲱ ⲙⲙⲟⲥ ϫⲉⲧⲙⲛⲧⲥⲩⲛⲕⲗⲏⲧⲓⲕⲟⲥ ⲁⲕⲥⲟⲣⲙⲉⲥ · |
| s-59
| ⲁⲩⲱ ⲧⲙⲛⲧⲙⲟⲛⲁⲭⲟⲥ ⲙⲡⲉⲕϩⲉ ⲉⲣⲟⲥ · ⲻ |
| s-60
| ⲁⲩⲱ ⲁⲩⲙⲟⲟϣⲉ ⲉⲡⲉⲕⲣⲟ ⲛⲧⲉⲑⲁⲗⲁⲥⲥⲁ ⲉⲧⲉⲭⲱⲣⲁ ⲛⲛⲅⲉⲣⲁⲥⲏⲛⲟⲥ |
| s-61
| ⲁⲩⲱ ⲛⲧⲉⲣⲉϥⲫⲱϭⲉ ⲉⲡⲉⲕⲣⲟ ⲛⲧⲉⲩⲛⲟⲩ ⲁϥⲧⲱⲙⲛⲧ ⲉⲣⲟϥ ⲛϭⲓⲟⲩⲣⲱⲙⲉ ⲉϥⲛⲏⲩ ⲉⲃⲟⲗ ϩⲛⲛⲉⲙϩⲁⲟⲩ ⲉⲣⲉⲟⲩⲡⲛⲉⲩⲙⲁ ⲛⲁⲕⲁⲑⲁⲣⲧⲟⲛ ⲛⲙⲙⲁϥ |
| s-62
| ⲉϥϣⲟⲟⲡ ϩⲛⲛⲉⲙϩⲁⲟⲩ ⲉⲙⲡⲉϣⲗⲁⲁⲩ ϭⲉ ϭⲙϭⲟⲙ ⲉⲙⲟⲣϥ ϩⲛϩⲁⲗⲩⲥⲓⲥ ⲉⲃⲟⲗ |
| s-63
| ϫⲉⲁⲩⲙⲟⲣϥ ⲛϩⲁϩ ⲛⲥⲟⲡ ⲛϩⲉⲛⲡⲁⲓⲇⲉⲥ ⲛⲙϩⲉⲛϩⲁⲗⲩⲥⲓⲥ ⲁⲩⲱ ϣⲁϥⲥⲗⲡⲛϩⲁⲗⲩⲥⲓⲥ ⲛϥⲟⲩⲉϭⲡⲙⲡⲁⲓⲇⲉⲥ ⲉⲙⲡⲉϣⲗⲁⲁⲩ ϭⲙϭⲟⲙ ⲉⲣⲟϥ |
| s-64
| ⲁⲩⲱ ⲟⲩⲟⲉⲓϣ ⲛⲓⲙ ⲛⲧⲉⲩϣⲏ ⲙⲛⲡⲉϩⲟⲟⲩ ⲛⲉϥϩⲛⲛⲉⲙϩⲁⲟⲩ ⲁⲩⲱ ϩⲛⲛⲧⲟⲩⲓⲏ ⲉϥϫⲓϣⲕⲁⲕ ⲉⲃⲟⲗ ⲉⲩϩⲓⲟⲩⲉ ⲉⲣⲟϥ ϩⲛⲛⲱⲛⲉ . |
| s-65
| ⲛⲧⲉⲣⲉϥⲛⲁⲩ ⲉⲓⲏⲥⲟⲩⲥ ϩⲙⲡⲟⲩⲉ ⲁϥⲡⲱⲧ ⲁϥⲡⲁϩⲧϥ ϩⲁⲣⲁⲧϥ ⲁϥⲟⲩⲱϣⲧ ⲛⲁϥ |
| s-66
| ⲁϥⲱϣ ⲇⲉ ⲉⲃⲟⲗ ϩⲛⲟⲩⲛⲟϭ ⲛϩⲣⲟⲟⲩ ⲉϥϫⲱ ⲙⲙⲟⲥ ϫⲉⲁϩⲣⲟⲕ ⲛⲙⲙⲁⲓ ⲓⲏⲥⲟⲩⲥ ⲡϣⲏⲣⲉ ⲙⲡⲛⲟⲩⲧⲉ ⲉⲧϫⲟⲥⲉ ϯⲱⲣⲕ ⲉⲣⲟⲕ ⲙⲡⲛⲟⲩⲧⲉ . ϫⲉⲛⲛⲉⲕⲃⲁⲥⲁⲛⲓⲍⲉ ⲙⲙⲟⲓ . |
| s-67
| ⲛⲉⲣⲉⲓⲏⲥⲟⲩⲥ ⲅⲁⲣ ϫⲱ ⲙⲙⲟⲥ ⲛⲁϥ ϫⲉⲁⲙⲟⲩ ⲉⲃⲟⲗ ⲙⲡⲣⲱⲙⲉ ⲡⲉⲡⲛⲉⲩⲙⲁ ⲛⲁⲕⲁⲑⲁⲣⲧⲟⲛ . |
| s-68
| ⲁⲩⲱ ⲛⲉϥϫⲛⲟⲩ ⲙⲙⲟϥ ϫⲉⲛⲓⲙ ⲉⲣⲛⲧⲕ ⲡⲉϫⲁϥ ⲛⲁϥ ϫⲉⲗⲉⲅⲓⲱⲛ ⲡⲉ ⲡⲣⲁⲛ ϫⲉⲧⲛϫⲕϩⲁϩ |
| s-69
| ⲁⲩⲱ ⲁⲩⲥⲉⲡⲥⲱⲡϥ ⲉⲙⲁⲧⲉ ϫⲉⲕⲁⲁⲥ ⲛⲛⲉϥⲛⲟϫⲟⲩ ⲉⲃⲟⲗ ⲛⲧⲉⲭⲱⲣⲁ . |
| s-70
| ⲛⲉⲥⲙⲡⲙⲁ ⲇⲉ ⲉⲧⲙⲙⲁⲩ ϩⲁⲣⲁⲧϥ ⲙⲡⲧⲟⲟⲩ ⲛϭⲓⲟⲩⲛⲟϭ ⲛⲁⲅⲉⲗⲏ ⲛⲣⲓⲣ ⲉⲩⲙⲟⲟⲛⲉ ⲙⲙⲟⲥ |
| s-71
| ⲁⲩⲱ ⲁⲩⲥⲉⲡⲥⲱⲡϥ ⲉⲩϫⲱ ⲙⲙⲟⲥ ⲛⲁϥ ϫⲉϫⲟⲟⲩⲛ ⲉϩⲟⲩⲛ ⲉⲛⲉϣⲁⲩ |
| s-72
| ⲁⲩⲱ ⲁⲩⲕⲁⲁⲩ ⲉⲧⲣⲉⲩⲃⲱⲕ ⲛⲧⲉⲣⲉⲛⲉⲡⲛⲉⲩⲙⲁ ⲇⲉ ⲛⲁⲕⲁⲑⲁⲣⲧⲟⲛ ⲉⲓ ⲉⲃⲟⲗ ⲁⲩⲃⲱⲕ ⲉϩⲟⲩⲛ ⲉⲛⲉϣⲁⲩ ⲁⲩⲱ ⲁⲥⲣⲱϩⲧ ⲛϭⲓⲧⲁⲅⲉⲗⲏ ⲛⲣⲓⲣ ϩⲓϫⲛ ⲧϣⲱⲙⲉ ⲉⲡⲉⲕϩⲏⲧ ⲉⲩⲛⲁⲣϫⲟⲩⲱⲧ ⲛϣⲉ ⲁⲩⲙⲟⲩ ϩⲛⲧⲉⲑⲁⲗⲁⲥⲥⲁ . |
| s-73
| ⲛⲉⲧⲙⲟⲟⲛⲉ ⲇⲉ ⲙⲙⲟⲟⲩ ⲁⲩⲡⲱⲧ ⲁⲩϫⲓⲡⲟⲩⲱ ⲉϩⲣⲁⲓ ⲉⲧⲡⲟⲗⲓⲥ ⲙⲛⲛⲥⲱϣⲉ ⲁⲩⲉⲓ ⲉⲃⲟⲗ ⲉⲛⲁⲩ ⲉⲡⲉⲛⲧⲁϥϣⲱⲡⲉ . |
| s-74
| ⲁⲩⲉⲓ ⲇⲉ ⲉⲣⲁⲧϥ ⲛⲓⲏⲥⲟⲩⲥ ⲁⲩⲛⲁⲩ ⲉⲡⲉⲧⲟ ⲛⲣⲉϥϣⲟⲟⲣ ⲉϥϩⲙⲟⲟⲥ ⲉϩⲣⲁⲓ ⲉⲣⲉⲛⲉϥϩⲟⲓⲧⲉ ϩⲓⲱⲱϥ ⲁⲩⲱ ⲉⲣⲉⲡⲉϥϩⲏⲧ ⲥⲙⲟⲛⲧ . ⲡⲉⲛⲧⲁⲗⲉⲅⲓⲱⲛ ϣⲱⲡⲉ ⲛⲙⲙⲁϥ ⲁⲩⲱ ⲁⲩⲣϩⲟⲧⲉ . |
| s-75
| ⲛⲉⲛⲧⲁⲩⲛⲁⲩ ⲇⲉ ⲁⲩⲧⲁⲟⲩⲟ ⲉⲣⲟⲟⲩ ⲛⲧϩⲉ ⲛⲧⲁⲥϣⲱⲡⲉ ⲙⲡⲉⲧⲟ ⲛⲇⲁⲓⲙⲱⲛⲓⲟⲛ ⲁⲩⲱ ⲉⲧⲃⲉ ⲛⲉϣⲁⲩ |
| s-76
| ⲁⲩⲥⲉⲡⲥⲱⲡϥ ⲇⲉ ⲉⲧⲣⲉϥⲡⲱⲱⲛⲉ ⲉⲃⲟⲗ ϩⲛⲛⲉⲩⲧⲟϣ |
| s-77
| ⲁⲩⲱ ⲉϥⲛⲁⲧⲁⲗⲉ ⲉⲡϫⲟⲉⲓ ⲁϥⲥⲉⲡⲥⲱⲡϥ ⲛϭⲓⲡⲉⲧⲟ ⲛⲇⲁⲓⲙⲱⲛⲓⲟⲛ ⲉⲧⲣⲉϥⲟⲩⲁϩϥ ⲛⲥⲱϥ |
| s-78
| ⲁⲩⲱ ⲙⲡϥⲕⲁⲁϥ ⲉϥϫⲱ ⲙⲙⲟⲥ ⲛⲁϥ ϫⲉⲃⲱⲕ ⲉϩⲣⲁⲓ ⲉⲡⲉⲕⲏⲓ ϣⲁⲛⲉⲕⲣⲱⲙⲉ ⲛⲅⲧⲁⲟⲩⲟ ⲉⲣⲟⲟⲩ ⲛⲛⲉⲛⲧⲁⲡϫⲟⲉⲓⲥ ⲁⲁⲩ ⲛⲁⲕ |
| s-79
| ⲉⲁϥⲛⲁ ⲛⲁⲕ ⲁϥⲃⲱⲕ ⲇⲉ ⲁϥⲁⲣⲭⲉⲥⲑⲁⲓ ⲛⲧⲁϣⲉⲟⲉⲓϣ ϩⲛⲧⲇⲉⲕⲁⲡⲟⲗⲓⲥ ⲛⲛⲉⲛⲧⲁⲓⲏⲥⲟⲩⲥ ⲁⲁⲩ ⲛⲁϥ . ⲁⲩⲱ ⲁⲩⲣϣⲡⲏⲣⲉ ⲧⲏⲣⲟⲩ |
| s-80
| ⲛⲧⲉⲣⲉϥϫⲓⲟⲟⲣ ⲉⲃⲟⲗ ϩⲙⲡϫⲟⲉⲓ ⲛϭⲓⲓⲏⲥⲟⲩⲥ ⲁϥⲉⲓ ⲉⲡⲉⲕⲣⲟ . ⲁⲩⲛⲟϭ ⲙⲙⲏⲏϣⲉ ⲥⲱⲟⲩϩ ⲉⲣⲟϥ . ⲛⲉϥϩⲁⲧⲉⲑⲁⲗⲁⲥⲥⲁ ⲇⲉ |
| s-81
| ⲁⲩⲱ ⲁϥⲉⲓ ⲛϭⲓⲟⲩⲁ ⲛⲁⲣⲭⲓⲥⲩⲛⲁⲅⲱⲅⲟⲥ ⲉⲡⲉϥⲣⲁⲛ ⲡⲉ ⲓⲁⲉⲓⲣⲟⲥ . ⲛⲧⲉⲣⲉϥⲛⲁⲩ ⲇⲉ ⲉⲣⲟϥ ⲁϥⲡⲁϩⲧϥ ϩⲁⲣⲁⲧϥ |
| s-82
| ⲁⲩⲱ ⲁϥⲥⲉⲡⲥⲱⲡϥ ⲉⲙⲁⲧⲉ ⲉϥϫⲱ ⲙⲙⲟⲥ ϫⲉⲧⲁϣⲉⲉⲣⲉ ⲙⲟⲕϩ ⲛϣⲱⲛⲉ ϫⲉⲕⲁⲁⲥ ϭⲉ ⲉⲕⲉⲉⲓ ⲛⲅⲕⲁⲧⲟⲟⲧⲕ ϩⲓϫⲱⲥ ϫⲉⲉⲥⲉⲗⲟ ⲛⲥⲱⲛϩ |
| s-83
| ⲁϥⲃⲱⲕ ⲇⲉ ⲛⲙⲙⲁϥ . ⲁⲩⲱ ⲁϥⲟⲩⲁϩϥ ⲛⲥⲱϥ ⲛϭⲓⲟⲩⲛⲟϭ ⲙⲙⲏⲏϣⲉ ⲛⲉⲩⲑⲗⲓⲃⲉ ⲇⲉ ⲙⲙⲟϥ . |
| s-84
| ⲁⲩⲱ ⲟⲩⲥϩⲓⲙⲉ ⲉⲣⲉⲡⲉⲥⲛⲟϥ ϣⲟⲩⲟ ⲙⲙⲟⲥ ⲉⲓⲥⲙⲛⲧⲥⲛⲟⲟⲩⲥ ⲛⲣⲟⲙⲡⲉ . |
| s-85
| ⲁⲩⲱ ⲁⲥϣⲉⲡϩⲁϩ ⲛϩⲓⲥⲉ ⲛⲧⲟⲟⲧⲟⲩ ⲛϩⲁϩ ⲛⲥⲁⲉⲓⲛ ⲁⲩⲱ ⲁⲥϫⲟ ⲉⲃⲟⲗ ⲛⲛⲉⲧⲉⲩⲛⲧⲁⲥⲥⲉ ⲧⲏⲣⲟⲩ ⲉⲙⲡⲥⲙⲧⲟⲛ ⲗⲁⲁⲩ . ⲁⲗⲗⲁ ⲛⲧⲁⲥⲉⲓ ⲛⲧϩⲟ . |
| s-86
| ⲛⲧⲉⲣⲉⲥⲥⲱⲧⲙ ⲉⲧⲃⲉ ⲓⲏⲥⲟⲩⲥ ⲁⲥⲟϣⲥ ⲉϩⲟⲩⲛ ϩⲙⲡⲙⲏⲏϣⲉ ⲁⲥⲉⲓ ⲉⲡⲁϩⲟⲩ ⲙⲙⲟϥ ⲁⲥϫⲱϩ ⲉⲧⲉϥϣⲧⲏⲛ |
| s-87
| ⲁⲥϫⲟⲟⲥ ⲅⲁⲣ ϫⲉⲉⲓϣⲁⲛϫⲱϩ ⲉⲛⲉϥϩⲟⲓⲧⲉ ϯⲛⲁⲗⲟ . |
| s-88
| ⲁⲩⲱ ⲛⲧⲉⲩⲛⲟⲩ ⲁⲥϭⲱ ⲛϭⲓⲧⲡⲏⲅⲏ ⲙⲡⲉⲥⲥⲛⲟϥ . ⲁⲩⲱ ⲁⲥⲉⲓⲙⲉ ϩⲙⲡⲉⲥⲥⲱⲙⲁ ϫⲉⲁⲥⲗⲟ ⲉⲃⲟⲗ ϩⲛⲧⲙⲁⲥⲧⲓⲅⲝ ⲉⲧⲛⲙⲙⲁⲥ |
| s-89
| ⲓⲏⲥⲟⲩⲥ ⲇⲉ ⲛⲧⲉⲣⲉϥⲉⲓⲙⲉ ⲛⲧⲉⲩⲛⲟⲩ ϩⲣⲁⲓ ⲛϩⲏⲧϥ ⲉⲧϭⲟⲙ ⲉⲛⲧⲁⲥⲉⲓ ⲉⲃⲟⲗ ⲙⲙⲟϥ ⲁϥⲕⲧⲟϥ ϩⲙⲡⲙⲏⲏϣⲉ ⲉϥϫⲱ ⲙⲙⲟⲥ ϫⲉⲛⲓⲙ ⲡⲉⲛⲧⲁϥϫⲱϩ ⲉⲛⲁϩⲟⲉⲓⲧⲉ |
| s-90
| ⲡⲉϫⲉⲛⲉϥⲙⲁⲑⲏⲧⲏⲥ ⲛⲁϥ ϫⲉⲕⲛⲁⲩ ⲉⲡⲙⲏⲏϣⲉ ⲉⲧⲑⲗⲓⲃⲉ ⲙⲙⲟⲕ ⲉⲧⲃⲉ ⲡⲁⲓ ⲕϫⲱ ⲙⲙⲟⲥ ϫⲉⲛⲓⲙ ⲡⲉⲛⲧⲁϥϫⲱϩ ⲉⲣⲟⲓ . |
| s-91
| ⲁϥⲕⲧⲉⲓⲁⲧϥ ⲇⲉ ⲉⲛⲁⲩ ⲉⲧⲉⲛⲧⲁⲥⲣⲡⲁⲓ |
| s-92
| ⲧⲉⲥϩⲓⲙⲉ ⲇⲉ ⲁⲥⲣϩⲟⲧⲉ ⲁⲩⲱ ⲁⲥⲥⲧⲱⲧ ⲉⲥⲥⲟⲟⲩⲛ ⲙⲡⲉⲛⲧⲁϥϣⲱⲡⲉ ⲙⲙⲟⲥ ⲁⲥⲉⲓ ⲁⲥⲡⲁϩⲧⲥ ϩⲁⲣⲁⲧϥ ⲁⲥⲧⲁⲟⲩⲟ ⲉⲣⲟϥ ⲛⲧⲙⲉ ⲧⲏⲣⲥ |
| s-93
| ⲛⲧⲟϥ ⲇⲉ ⲡⲉϫⲁϥ ⲛⲁⲥ ϫⲉⲧⲁϣⲉⲉⲣⲉ ⲧⲟⲩⲡⲓⲥⲧⲓⲥ ⲧⲉⲛⲧⲁⲥⲛⲁϩⲙⲉ ⲃⲱⲕ ϩⲛⲟⲩⲉⲓⲣⲏⲛⲏ . ⲛⲧⲉⲗⲟ ⲉⲃⲟⲗ ϩⲛⲧⲟⲩⲙⲁⲥⲧⲓⲅⲝ . |
| s-94
| ⲉⲧⲓ ⲛⲧⲟϥ ⲉϥϣⲁϫⲉ . ⲁⲩⲉⲓ ⲛϭⲓⲛⲣⲱⲙⲉ ⲙⲡⲁⲣⲭⲓⲥⲩⲛⲁⲅⲱⲅⲟⲥ ⲉⲩϫⲱ ⲙⲙⲟⲥ ⲛⲁϥ ϫⲉⲧⲉⲕϣⲉⲉⲣⲉ ⲁⲥⲙⲟⲩ ⲉⲕⲛⲁϯϩⲟⲓ ϭⲉ ⲙⲡⲥⲁϩ ⲉⲧⲃⲉ ⲟⲩ |
| s-95
| ⲓⲏⲥⲟⲩⲥ ⲇⲉ ⲛⲧⲉⲣⲉϥⲥⲱⲧⲙ ⲉⲡϣⲁϫⲉ ⲉϥϫⲱ ⲙⲙⲟϥ ⲡⲉϫⲁϥ ⲙⲡⲁⲣⲭⲓⲥⲩⲛⲁⲅⲱⲅⲟⲥ ϫⲉⲙⲡⲣⲣϩⲟⲧⲉ ⲡⲓⲥⲧⲉⲩⲉ ⲙⲙⲁⲧⲉ |
| s-96
| ⲁⲩⲱ ⲙⲡϥⲕⲁⲗⲁⲁⲩ ⲉⲟⲩⲁϩϥ ⲛⲥⲱϥ . ⲛⲥⲁⲡⲉⲧⲣⲟⲥ ⲛⲙⲓⲁⲕⲱⲃⲟⲥ ⲛⲙⲓⲱϩⲁⲛⲛⲏⲥ ⲡⲥⲟⲛ ⲛⲓⲁⲕⲱⲃⲟⲥ |
| s-97
| ⲁⲩⲱ ⲁⲩⲉⲓ ⲉϩⲣⲁⲓ ⲉⲡⲏⲓ ⲙⲡⲁⲣⲭⲓⲥⲩⲛⲁⲅⲱⲅⲟⲥ ⲁϥⲛⲁⲩ ⲉⲣⲟⲟⲩ ⲉⲩϣⲧⲣⲧⲱⲣ ⲁⲩⲱ ⲉⲩⲣⲓⲙⲉ ⲉⲩⲟⲩⲛⲣⲟ ⲉⲙⲁⲧⲉ . |
| s-98
| ⲛⲧⲉⲣⲉϥⲃⲱⲕ ⲇⲉ ⲉϩⲟⲩⲛ ⲡⲉϫⲁϥ ⲛⲁⲩ ϫⲉⲁϩⲣⲱⲧⲛ ⲧⲉⲧⲛϣⲧⲣⲧⲱⲣ . ⲁⲩⲱ ⲧⲉⲧⲛⲣⲓⲙⲉ ⲉⲧϣⲉⲉⲣⲉ ϣⲏⲙ ⲙⲡⲥⲙⲟⲩ ⲁⲗⲗⲁ ⲉⲥⲛⲕⲟⲧⲕ |
| s-99
| ⲁⲩⲥⲱⲃⲉ ⲛⲥⲱϥ ⲛⲧⲟϥ ⲇⲉ ⲛⲧⲉⲣⲉϥⲛⲟϫⲟⲩ ⲉⲃⲟⲗ ⲧⲏⲣⲟⲩ ⲁϥϫⲓⲡⲉⲓⲱⲧ ⲛⲧϣⲉⲉⲣⲉ ϣⲏⲙ ⲙⲛⲧⲉⲥⲙⲁⲁⲩ ⲙⲛⲛⲉⲧⲛⲙⲙⲁϥ ⲁϥⲃⲱⲕ ⲉϩⲟⲩⲛ ⲉⲡⲙⲁ ⲉⲧⲉⲣⲉⲧϣⲉⲉⲣⲉ ϣⲏⲙ ⲛϩⲏⲧϥ . |
| s-100
| ⲁⲩⲱ ⲛⲧⲉⲣⲉϥⲁⲙⲁϩⲧⲉ ⲛⲧϭⲓϫ ⲛⲧϣⲉⲉⲣⲉ ϣⲏⲙ ⲡⲉϫⲁϥ ⲛⲁⲥ ϫⲉⲧⲁⲗⲉⲓⲑⲁ ⲕⲟⲩⲙ . ⲉⲧⲉⲡⲁⲓⲡⲉ ϣⲁⲩⲟⲩⲁϩⲙⲉϥ ϫⲉⲧϣⲉⲉⲣⲉ ϣⲏⲙ ⲉⲓϫⲉⲉⲣⲟ ⲧⲱⲟⲩⲛⲉ |