| s-201
| Mu ni: Ba ñu dugalee Seexul Xadiim ci puq si woon ci Ndakaaru, mu xat lool, sëfees ko ak i ràbb ak i fital, ndeysaan, Soxna Jaara fekk na ko fay ko mastawu di ko ñaax. |
| s-202
| Soxna si di ko fàttali la mu ko yare woon, muy di xool ca gaa ñu baax ña wéy, ak la ñu dajoon ngir yelloo seen i cer. |
| s-203
| Yonent bi feeñu na ko di ko ñaaxe Amsatu, naan ko: Xoolal Amsatu (jàmmi Yàlla ci moom) di ab Sahaaba bu jàmbaare ak rayiin wu ñaaw wu ñu ko ray. |
| s-204
| Loolu la Sëriñ Muusaa Ka naan: nee na keroog gis na fa sunu maam Jaara, mu di ko ñaax te di ko dolli ay daara. |
| s-205
| Njool Màkka naan ko xamalal Sahaaba bu tudd Amsatu lan moo di Xitaaba. |
| s-206
| Sëriñ bi nag, ku fonkoon Soxna si la te daan ko wormaal. |
| s-207
| Dëkk bii mu nekkoon di Poroxaan dafa mujjoon gent, waaye Sëriñ bee ko dekkilul, lépp ngir worma ak fonkeel ak bëgg noo baaxe jeexiti soxna si. |
| s-208
| Xabru ba it reeroon na, ba xameesul fu mu nekkati, waaye Sëriñ bee jox ndigël Sëriñ Mbàkke Gani Buso, doomu nijaayam, ngir mu seetal ko te saytul ko barab boobee. |
| s-209
| Sëriñ Mbàkke Gani Buso def ay yitte, ba dégg ab pël bu ko xam. |
| s-210
| Mu ànd ak moom ñu wër ba gis ko, mu koy taxawu ci ndigëlul Sëriñ bi. |
| s-211
| Ginnaaw bi mu tàbbi ci loxol Sëriñ Muhammadu Basiiru Mbàkke, mu koy taxawu ba ni mu fi jógee. |
| s-212
| Noonu it la ko ag njabootam di taxawoo ba fimne. |
| s-213
| Am na sëriñ bu sàmmu woon, ragal Yàlla, di ab jàngkat te di ab jàngalekat, muy Sëriñ Sàmba Mareema Saa-kokki, doon wóllare wu Maam Moor Mbàkke, sëriñu Soxna si, wayoon na ay woy ci Araab ngir seere jikko yu sell te rafet yu mu gis ci Soxna soosii di soxnas wóllareem, Soxna Jaara Buso. |
| s-214
| Way yooyu waxees na ni lu Sëriñ bi fonkoon la, daan ko yër lu bari, ba mujj gi mu wayluwaat ko ngir ag yaatal. |
| s-215
| Loolu lépp di tektale ag cofeel ak ag fonkeel gu mu am ñeel way-jur wi. |
| s-216
| Waaw kon ana lu tee ñi dëkk ak moom xëntewoowuñu jéem a mel nii? |
| s-217
| Ana lu tee nu gaaral aw doxiinam ak i jikkoom ci kanamu sunu ag njaboot? |
| s-218
| Lu tee nu jàppe ko royuwaayu askan wi ñeel soxna yépp? |
| s-219
| Waaye fimne ak lii lépp tudd ci sunu aw làmmeñ Àllin Situwe Jaata mbaa ñu mel ni niki royuwaayu jigéeni réew mi moo di lu ràññeeku, te di lu dajale ba ñépp man ko a wax ci barab yépp it. |
| s-220
| Waaye tudd sunu soxna yi moom, dafa mel ni lu informel la te it ku ci nekk ña féete ak yaw rekk a di tudd sa aw tur, di wax sa ay jikko, di la misaaloo. |
| s-221
| Ba mujj sax ñu di am ag pasu ci tudd leen ngir bañ ñu ni fii nga bokk mbaa fee. |
| s-222
| Nangu naa ag bañam ak ag njàmbaaram ci kanamu notaakon yi. |
| s-223
| Waaye matul ab royuwaay sunu jigéen ñi ci wàllu diine, ndax wax dëgg Yàlla nag, moom dafa amoon ay gëm-gëmi boppam, muy la maam ya daan dund muy ag xërëm (animisme). |
| s-224
| Bokkoon na ci xeexam bi gënoon a rëy, delloo askan wi ak di leen xelal ci ñu dellu ci jaamu li fi maam yi bàyyi woon, te bàyyi diine yu bees yi fi ganesi (Nasaraan, Lislaam, añs...). |
| s-225
| Wax dëgg kii ak lu mu jàmbaare-jàmbaare matul royuwaay ñeel sunu soxnay jullit yi ngir ab pas-pas moo war a jëkk ci ag roy, te wuute nañu ci. |
| s-226
| Kon daal ku mu neex yamal ci di ko sargale li mu def rekk, ak taxawaay bi mu amee woon ci kanamu tubaab yi. |
| s-227
| Loolu mu gëmoon it nag du ab gàkk ci moom, ndax ci bañ gi mu doon bañ kenn moom nu rekk la ko tegoon, tax mu bañaale bépp diine bu fi nar a jële li fi nekkoon. |
| s-228
| Waaye ginnaaw diine yooyu nag noo ko tànnal sunu bopp ginnaaw bi, nanu ci farlu te roye ci ñi ci nekkoon waliif keneen. |
| s-229
| Ma ni nanu bàyyi par-parloo te yeewu, génn ci ag fasu, dugante, xam sunu ay nit, xam seen i jëf, seen i melo, xam li nuy jariñ nu jëfandikoo ko. |
| s-230
| Waaye kii fee la bokk ak fii bu mu nu tee xamale sunu soxna yu yéeme yii ci ay jëf, di yi ñu taamu te war leen a jàppe niki ay royuwaay, ñeel askan wépp, te di jàngale jikkoy Soxna yii ak seen ab taxawaay ci njaboot gi ak pénc mi. |
| s-231
| Ngir nu man a am pénc mu dal te bari jàmm, bari jaamukati Yàlla, di ay jullit, yu sàmmu, sàmm seen ngor, di dund ci sutura, te mucc ci tooñ... |
| s-232
| Lii daal lañu di sàkku ci Yàlla mayaakon bi. |
| s-233
| Kii nee na: Man de soxna laa te ab jullit laa, waaye nii Soxna Jaara mel manuma koo mel? |
| s-234
| Wax nga dëgg kay! |
| s-235
| Waaye bu la loolu tax a sàggan mukk ba doo def kem sa kàttan te defe fi nga toll. |
| s-236
| Ndax kat, bu ñu nee ku ñëw Tuuba dinañu faj sa aajo, sëriñ si ak taalube yi ñépp ay jógandoo wuti Tuubaa. |
| s-237
| Ñi yor wata taal ko. |
| s-238
| Ñi yorul wata paas dem. |
| s-239
| Ñi yorul paas dox wuti Tuuba. |
| s-240
| Ku di xalaate nii de doo nangoo tële dara lu sa moroomu nit def ndax danga di defe ca na nga ko mane rekk ak sa tolluwaay. |
| s-241
| Li ci des Yàlla aji-tedd ji moo koy mottali. |
| s-242
| Dama di wax ni: Yàlla laaju nu nu gën fi waaye li mu nu laaj kay mooy nu def sunu kem kàttan! |
| s-243
| Kon nanu farlu te xam ni nag Yàlla xam na li nu man. |
| s-244
| Bu nu ko deful rekk danoo lànk, te jaam bu lànkal boroomam ab atteem leer na. |
| s-245
| Nu leen di ñaanal Yàlla màggalug jàmm, ak i xeewal ak pajug aajo, ci bis bu tedd bii di màggalug Poroxaan, dees na ko fàttalikoo jëmm ju tedd, di soxna su nu taamu, Soxna Jaara Buso. |
| s-246
| Njiitu réew mi, Maki Sàll, tënk na léegi ci 8 at jéle ko ci 5, digub at yi oto yi di dugg Senegaal te di jóge bitim-réew war a am. |
| s-247
| Mu ngi ko dogale ci jotaayu jëwriñ yi amoon alxamis ci Ndakaaru. |
| s-248
| Moom (Maki Sàll) xaatim na dekkare n° 2012-444 soppi bu n° 2001-72 bu 26 samwie 2001 jëm ci dugal daamar ci biir réew mi. |
| s-249
| Dekkare boobu dafa di tënk léegi ci 8 at jéle ko ci 5 at yi oto yi di duggu Senegaal war a am. |
| s-250
| S. Sàll dige woon na ci baatum dagaan ne dina ko def bu ñu ko tegee ci boppu réew mi. |
| s-251
| Daamar yu ëpp 10 at a ngi daw ca Bennoo-Réew ak ca Tugal. |
| s-252
| Lu tax, daamar yooyu mënuñoo daw ci Senegaal? |
| s-253
| Loolu la waxoon. |
| s-254
| Dogal booboo ngi tukkee woon ci nguurug Abdulaay Wàdd, ngir yeesal pàrku daamar yi te aar kéew gi ci saxaar su bon si di tukkee ci oto yu màgget yi. |
| s-255
| Teewul, mu doonoon dogal bu doomi réew mi yi nekk Tugal ak ca Bennoo-Réew naqarlu woon. |
| s-256
| Waaye, nguur gi dëggër rekk ci fi mu jàppoon, naan dogal bi tax na njayum oto yu yees yokk ci ja yu biir réew mi. |
| s-257
| Milyoη ak 450 junni ay toni jën ñoo di jaar at mu nekk ci géeji Senegaal yi. |
| s-258
| Jëwriñ ji yor Koomug Géej gi, Xureysi Caam jibal na ne at mu jot 1 Milyoη ak 450 junni ay toni jëni biir géej dinañu di jóge géeju Kap-weer jaar ci sunu géej yi. |
| s-259
| Xureysi Caam mi doon àddu ci surnaalu 12 w bu Rfm, leeral na ne jën yooyu dañuy njëkke jaar Giné-Bisaaw, Gàmbi, Senegaal, Moritani, Marok door a dëppaat. |
| s-260
| Bu ñu egsiwaatee Moritani, te nappeesu leen, dañuy dee. |
| s-261
| Teg na ci ne: am na 1 milyoη ak 450 junni ay ton yu doomi réew mi mënul a napp, ndax amuñu jumtuwaay yu ko mën a napp. |
| s-262
| Jëwriñ jee ngi laaj: Ku di napp toni jën yooyu? |
| s-263
| Ay bato wëyyu ñoo koy napp, bato yu xarala lañu, gaaw lool te mëneesu leen a teg loxo. |
| s-264
| Loolu lanuy ñàkk at mu jot. |
| s-265
| Ndax jaadu na nguur gi di seetaan woowu yàqute, déedéet. |
| s-266
| Nee na, xalaat nanu ren, jàppandal ay batoy biir réew mi ak yu bitim-réew ngir ñu dem nappi jën yooyu. |
| s-267
| Nee na, li ñuy napp dina nu indil at mu nekk 35 Dollar (ton bu nekk). |
| s-268
| APS: Dibéer 15 maars 2009 |
| s-269
| Ku wax feeñ: demokaraasi ag làkki réew mi |
| s-270
| Wote bi nu dëgmal, ñépp xam nañu ko, wote bu jeggi dayoo la: ndax ci la ëllëgu réew mi aaju! |
| s-271
| Wote la wu ñuy tànne wan yoon la Senegaal war a teggu jëm ca kanam mbaa mu teggi ko, dellu gannaaw: lawla cat! |
| s-272
| Wante li ñu soxal ci jukki bii, lu lëkkëloo ag loolu gaa, wante leneen la. |
| s-273
| Loo xam ne soo ko seetloo, dafa mel ni dafa am jàllarbi ci ni 'politiciens' di jëfandikoo làkki réew mi! |
| s-274
| Li ñu leen doon faral di wax mooy : demokaraasi ci làkki jambuur ay kàcci neen la, mënul a nekk! |
| s-275
| Ndax demokaraasi mooy nguuru askan wi ngir askan wi! |
| s-276
| Waaw, bu fekkee ne nag fa ñuy takke ak a tekki, fa ñuy dogale, fa ñuy fasee ak a fecci, ña fay wax duñu wax lu askan wi mën a dégg, naka lees mën a tuddee mbir mooma demokaraasi? |
| s-277
| Dafa mel ni daal buum bi nu kolonisatëër bi nasoon, ba taxoon ñuy wéy ci waawaam, ba léegi dógagul! |
| s-278
| Te buum boobu, xàncc bi ñu ko ràbbee mooy di jëfandikoo làkki Nasaraan soofal sunu bos, di jàng cosaanam fàtte sunu bos, jël ay kureelam indi teg, jël doxalinam indi teg, jël xaalisam indi teg. |
| s-279
| Te loolu feek mu ngi fi, cóow li mooy bari rekk, wante demokaraasi dëgg, mbaa jëm-ca-kanam ci wàllu koom-koom caada ag nekkinu askan wi dina fi jafe lool! |
| s-280
| Li di firndeel loolu, mooy ba Nasaraan bi xamee ne léegi mu ñakk réewi Afrik yi mu kolonise woon, fekk Alseeri ngi di xare ngir moom boppam, Wietnam duma Faraas Jemben-Fuu, Kamerun tàmbali a fippu, Seneraal Degaulle dafa ne woon: 'nañu yolomal buum gi balaa moo dóg'! |
| s-281
| Te loolu li muy tekki mooy , na fi sunu jëmm yi jóge, wante sunu doxalin moom na sax ci xel yi ba fàww! |
| s-282
| Te looloo fi amoon, ba fi Seηóor nekkee ba ci Abdu Juuf ag ñi fi nekk téy! |
| s-283
| Xam nañu ne Seηóor ba mu fi jógee dafa dem Faraas nekk 'Accadémie francaise', Abdu Juuf jóge fi dem jiiteji 'francophonie' di bàkk, di bàkkoo làkki nasaaraan! |
| s-284
| Xalaas, loolu de du ngoóora! |
| s-285
| Te su caaxaan faaxee dëgg des, Afrikee rekk ngay gis muy nangu loolu! |
| s-286
| Kenn ñemewul xalaat sax, gis Sinwaa, mbaa Sapone mbaa Wietnamee buy soofal làkk wi mu nàmp, dem di bàkkoo làkki ñi ko mas a dëkkee tuutal ag nas buum! |
| s-287
| Dañu fee déggoon ci lu yàggul dara sax njiitu-réew mi di wax di bàkku naan, Senegaal mooy réew mi nga xam ne, soo limaaleewul Faraas, fa la nit ña gën a xereññe ci làkk Nasaraan! |
| s-288
| Wante nag Wolof Njaay dafa ne li nga moom nga mën a tiitaroo! |
| s-289
| Li nga moomul moom, Bafa rekk la sànt! |
| s-290
| Seex Anta yokk ca ne 'làkki jambuur de su safoon suukar ba mel ni lem itam, mënoo ko màcc ba cay taxamtiku'. |
| s-291
| Ñakk a xam daal ag ñakk fayda li ñu waral bari na! |
| s-292
| Ñu bari ci waay-xeltu yi sax dañoo defe ni, wax yu ni mel ay waxi-démb mbaa ay wax yu amul solo lañu, te fekk ne loolooy ndéyi-mbill ji! |
| s-293
| Amul xejj-ak-seen, amul benn réew bu mën a am yokkute, am tawféex ci kow topp aadaa, ag cosaanu weneen askan, rawatina dëkkee jëfandikoo làmmiñ woo moomul te fekk Yàlla natoowu la ag lu! |
| s-294
| Wante nag ba léegi yakaar tasagul! |
| s-295
| Ndax téy su nga seetee xale yiy 'rap', seen xarala ci làkki réew mi, li ñu ciy wax, li ñu di ciy yàtt ci ay kàddu yu di xalam, seen farlu ci siggil réew mi ag askan wi, dootoo amati benn siiki-saaka ne làkki réew mi ñu ngi ci yoonu suqaliku gu wér! |
| s-296
| Ba tax na sax, soo ko setantalee, dangay gis ne 'politiciens' yi seen bopp dafa mel ni dañoo xaw a nànd loolu! |
| s-297
| Ndax léegi ñoom ñépp a taamoo wut ay dàkkentali wolof: |
| s-298
| Moo xam 'Bennoo Siggil Senegaal la, Bes Du Ñàkk, Fekkee Ma Ci Boolee, Daas Fanaanal, Nay Leer, Car Leneen, Taxaw Temm' ag yeneen yeneen i yëngu-yëngu lañu! |
| s-299
| Loolu soo ko seetloo bu baax ag jàllarbi la daanaaka, ab 'revolution linguistique' la! |
| s-300
| Ndax ku ci nekk xam na ni soo nee askan wi 'Bennoo Siggil Senegaal' rekk nit ñi xam loo wax, jaratul sax nga leen di faram-fàcceel lenn. |