| s-101
| Мы, на имѧ Ѡксентеи кожевник, Стефан портнои мастер, Иван Твѣритин, Моисеи котелник, Иван Ржова, Семен Иголка, Тимох котелник, кꙋпци пъсковскии, вызнаваемъ сим нашим листом вси посполито. |
| s-102
| Рꙋчили есмо по Иване по Цюзоновѣ с(ы)не, по Василевѣ брате. |
| s-103
| А тот Васил(ь), Иванов брат, в Ризком месте загиб без ведома. |
| s-104
| И Иван, приехав к Риз(е), хотел побрати товары брата своег(о) Василѧ, ино тыи товары побрали пановѣ Ризког(о) места на ратꙋшю. |
| s-105
| Ино Иван просил панов их м(и)л(о)сти, штобы их м(и)л(о)сть пановѣ тыи товары емꙋ дали, и пановѣ емꙋ тых товаров не дали, не вѣрѧчи, што тот Иван Василю томꙋ брат, которыи загиб. |
| s-106
| И мы длѧ тог(о) по Иване рꙋчили, што ж Василю тому брат, и пановѣ их м(и)л(о)сть нам повѣрили, и томꙋ Ивану, брату Василевꙋ, товары ѡтдали. |
| s-107
| А естьли ж хто иншии бꙋдеть тых товаров поисковати на панов их м(и)л(о)стьи после тог(о) Иван(а) Василева брата, и мы вси посполите бꙋдем платити томꙋ, а пановѣ ѡт тог(о) просты. |
| s-108
| И на то есмо паном Ризког(о) места дали сес(ь) наш листъ под нашеми пѣчатми. |
| s-109
| А писал поп Иван, служител(ь) С(вя)т(о)го Николы в Ризе, м(е)с(ѧ)ца июл(ѧ) 15 д(е)нь, індік(та) 4 . |
| s-110
| Тако хочемъ мы, горожане, с мѣштеремь. |
| s-111
| [1.] Переже, како вѣсити воскъ на скалвахъ, а вамъ чинити тако жь, нъ тѧжелѣи нашего полупуда. |
| s-112
| [2.] Тотъ товаръ, которыи вѣсити на скалвахъ, а языкъ пускати на товаръ, а коли товаръ на стану станеть, ѡтступи прочь, а рукою не приимаи. |
| s-113
| [3.] А вѣсцѣви кр(е)стъ цѣловати, какъ ѥму право вѣсити, какии ни товаръ будеть. |
| s-114
| [4.] А немцѣмъ дати вѣсчего ѡт бѣрковьска заоушнѧ, ѡт воску, ѡт мѣди, ѡт олова. |
| s-115
| [5.] А соль вѣсити оу пудныи рѣмѣнь, ѡт бѣрковьска оузѧти ѥму долгаѧ, ѡт рублѧ дати ѥму долгая. |
| s-116
| [6.] А в Ризѣ рускому купцѣви ѡт вѣса дати ѥму ѡт бѣрковьска полъоврѧ, ѡт воску, ѡт мѣди, ѡт олова, ѡт хмѣлю. |
| s-117
| [7.] А cоль вѣсити пуднымь рѣмѣнемь, ѡт бѣрковьска дати ѥму ѡт вѣса любѣцьскыи. |
| s-118
| [8.] Ѡт гривны серебра любѣцьскии. |
| s-119
| [9.] А вѣсти чистыи воскъ безъ подъсады, безъ смолы, безъ сала, какъ вѣрхъ, тако исподъ. |
| s-120
| [10.] Ажо привѣзеть нечистыи товаръ, а нелюбъ будеть, поѥхати ѥму назадъ со своимь товаромь, а свои кнѧзь тамо казнить ѥго. |
| s-121
| [11.] Аже наидуть оу немѣць нечистыи товаръ оу Рускои земли, поити ѥму назадъ с товаромь оу Ригу, тамъ ѥго свои кнѧзь судить. |
| s-122
| А се ѧзъ, вѣликии кнѧзь Ѡндре[и] полоцкии, дал […] есми С(вѧ)т(ои) Троици реку Званицю з гоны з бровыми ѡт Звана ѡзера да до Дрысы. |
| s-123
| А к тои реце никому прихода нетъ. |
| s-124
| А по моемъ животе, которыи кн(ѧ)зь иметь ѡтнимати, судить ему С(вѧ)та Тр(ои)ца, да будет[ъ] проклѧтъ. |
| s-125
| Се аз, князь великий Андрей Ольгердович Полоцкий. |
| s-126
| Дали есмы Федору и сыну его Дмитрию село Семенцово на Березвячи. |
| s-127
| А тому селу велели есмо и рубеж зарубити от реки от Березвячи по реку по Прудышчину и вверх ку частым, а от верховья от Прудышчаного рубеж по мху в озерцо в Демьяное, а от Демьяного дорогою к Заборью, а от Заборья дорогою ку Озерцом, а от Озерец дорогою к Залесью, а от Залесья в озеро в Городно, а с Городна в озеро в Мурычно, а с Мурычна в озеро в Белое, а с Белого озера рубеж в мох великии, а со мха на Гривос, а от Гривса в ручай, а по ручьи в озеро в Полов, а с Полова по Половице в реку в Дисну. |
| s-128
| А через тот рубеж нашим людем не надобе ходити никому ни с собакою, а ни с пешнею. |
| s-129
| А кто тот рубеж переступит, даст князю великому три гривны золота. |
| s-130
| А при том был князь Василий Друцкий, а Братоша, а Гирдений Забельский. |
| s-131
| А того рубежа зарубати посылали есмо ездоком Донярку. |
| s-132
| Ѡтко кнѧгини Андреѥвоѥ и ѡт ѥ, детеи, ѡто кнѧзѧ Семона, ѡто кнѧзѧ Ивана ко всимъ ратъманомъ и ко вьсимъ купьцомъ. |
| s-133
| Што Федоръ Сорочьковъ привезлъ белъку ис Полотьска и поставилъ белъку тую у Федька, а то ѥ белъка наша. |
| s-134
| Ѡтдате нашу белъку. |
| s-135
| А велели ѥсмо продати белъку тую Проньку да Кольцу. |
| s-136
| Владисла, Б(ож)ье м(и)л(о)сти король полскии, литовскии, руски, иных земль г(о)с(по)д(а)рь. |
| s-137
| Чинимъ славно и знаемо и даемъ ведомо оусем, хто коли сюю грамоту видить а любо слышить прочитаѧ. |
| s-138
| Б(ог)ъ далъ намъ всего много, а ныне язъ и своимъ братомъ со кн(ѧ)з(е)мъ Скирикгаиломъ оумыслили есмы и приимаемъ Б(ож)ии даръ ч(е)сно по Б(ож)ью изволенью и его тое М(а)т(е)ри д(е)в(и)ци Б(огороди)ци М(а)рье, ажь сѧ намъ то прилучило тая вѣра принѧти и держати. |
| s-139
| Про то мы ѡбѣчаемъ и слюбуемъ нашему брату кнѧзю Скиригкаилу и нѧлисѧ есмы крѣпко блюсти его кнѧж(е)ньѧ и д(е)рж(а)вы под братомъ нашимъ кн(ѧ)з(е)мъ Скирикгаиломъ, што жь и ныне держить братъ нашь кн(ѧ)зь Скирикгаило оу Литовьскои земли кн(ѧ)ж(е)нье Троцкое, всего ми того под братомъ н(а)ш(и)мъ не подисковати а ни ѡбидети, а никоторымъ веременемъ не ѡтнимати, ни злобою, а никоторымъ гн(е)в(о)мъ, не слушати ми лихихъ людеи, хто коли на него молвить, тому ми веры не нѧти. |
| s-140
| А брата ми своего не оутаити: сказати ми ему и лихо, и добро. |
| s-141
| А держати ми его выше оусее н(а)шее братье и слушати ми его боле оусехъ своихъ приѧтелии и братьи. |
| s-142
| А всѧкому ми делу исправа ему чинити и его люд(е)мъ. |
| s-143
| А в обиду ми брата своего кн(ѧ)зѧ Скирикгаила не выдати, хто коли его приѡбидить: любо братъ а любо иные которые люд(и). |
| s-144
| Стати ми за своего брата крепко, во всемъ обида его правити. |
| s-145
| Також на рускои стороне город Менескъ Литовьского жь кн(ѧ)ж(е)ньѧ весь и со всеми людми, и с землею, и со всѧкою пошлиною, и с доходомъ, и кн(ѧ)зи служебные — тымь оусемъ володети кн(ѧ)зю Скирикгаилу, брату н(а)ш(е)му. |
| s-146
| Такжь волость Свислочь и с данью, и с землею, и с людми, и со всѣмь доходомъ. |
| s-147
| Такжь Бобруескъ, ѡбѣ половине, и с данью, и с землею, и с людми, и со оусеми доходы. |
| s-148
| Такжь и Речица всѧ и весь доходъ, и дань. |
| s-149
| Також Любечь весь и люд(и), и землѧ, и весь доходъ и с данью. |
| s-150
| Також Пропошескъ весь и люд(и), и землѧ, и весь доходъ, и всѧ дань серебрьная. |
| s-151
| Такжь и Любошаны и с данью, и с людми, и землѧ, и весь доходъ. |
| s-152
| Також Игумена и всѧ дань, и люди, и землѧ, и доход весь. |
| s-153
| Такжь Логожескъ весь и Рылова долѧ, люд(и) и села, и землѧ, и дань Рылова, и весь доходъ. |
| s-154
| Такожь логозкаѧ дань и люд(и), и весь доходъ, што Воишвилтъ держалъ. |
| s-155
| То есва по слову оуч(и)нила и доспела есва манастырь ц(е)рк(о)вь С(вѧ)т(о)го Івана и прилучила есва к ц(е)ркви на веки С(вѧ)т(о)му Іѡану Пр(е)д(те)чи. |
| s-156
| И далъ мои братъ, кн(ѧ)зь Скирикгаило, оусю тую дань, што нь есть дохода, — дань серебренаѧ, бобры, белки и лукна всѧ, и люди оуси. |
| s-157
| А што ѡтлучила есва с(вѧ)тои ц(е)ркви тую истную дань с людми со всѧкимъ доходомъ, того нама не порушити никоторымь дѣломъ а ни приѡбидети ни ѡднымь п(е)н(ѧ)з(е)мъ, а хто приѡбидить или ѡтиметь ѡт С(вѧ)т(о)го Івана ц(е)ркви, тотъ будеть проклѧтъ оу сии вѣкъ и оу будущии. |
| s-158
| А то есва оучинила собѣ на памѧть, а с(вѧ)т(о)му Ивану в ч(е)сть и оу славу. |
| s-159
| Такжь село Лебедево, што и к Лебедеву тѧгло и тѧгнеть, и што Лебедевьская волостка, люди вси и села, тая околица. |
| s-160
| Також Дмитрьево село Груздовица, Анципорово село и Сколубино, и Тургкенево село, тые 4-ри села и што к нимъ тѧгло и тѧгнеть, — тыми городы и селы и всѣми людми володети кнѧзю Скиригкаилу. |
| s-161
| А ѡколо Троковъ таѧ места по Ваку по старыи рубежь, а по Вельи оунизъ такжь по старыи рубежь, толко ѡпроче Жеимовъ и Кулвы. |
| s-162
| А на су сторону по Сколву город Радынѧ и оусѧ тая волость со всѧкою службою, оуси люд(и) и села, и оусѧкии доходъ. |
| s-163
| Солчники и вси люде, и оусѧ тая села, што оу Солчницехъ, и в тои волости тое село Иваново, што Андреи держалъ Борисовичь. |
| s-164
| А ныне кн(ѧ)зю Скирикгаилу. |
| s-165
| Також и Ментвино село, што Ѧць держалъ. |
| s-166
| Тое кн(ѧ)зю Скирикгаилу. |
| s-167
| Такжь што на Ваце село, што Борисъ держалъ. |
| s-168
| А ныне кн(ѧ)зю Скирикгаилу и с тымь, што к тому тѧгло и тѧгнеть. |
| s-169
| А ѡт Троковъ за Немонъ рубежь ѡт Мерецкого города, поколѧ Мерецкаѧ волость, ѡттулѧ оунизъ по Немну алижь и до Немець обаполъ Немна, и пуща по старому, и городки: 1-и Немунекъ и волоска, 2-и Ѡлита и волостка, 3-и Пунѧ и волостка, 4-и Бирштанъ и волостка, и Воикгува, и село Румшишки, и Шловоишува, алижь и до Ковна. |
| s-170
| А ѡт Ковна дале оунизъ. |
| s-171
| А за Велью и за Невѧжю и по Невѧжи оуверхъ Лобунова, Арвистова, Пѧди, а ѡттолѧ алижь до Шатеевъ. |
| s-172
| А ѡт Шатеевъ оуверхъ алижь до Хурмокголы и до Лепиниковъ. |
| s-173
| А ѡт Лепиниковъ по тои стороне Вельи оуверхъ алижь и до Ваки. |
| s-174
| А ѡколо Троковъ села Лѣпуны и с волостью, другое Перелаѧ и с волостью, Навиники, таѧ волость Сомилишки и Стрѧвиники, волость Троки, Попорти и Новое село. |
| s-175
| Такожь Новыи городъ на Вельи противъ Шатеевъ поставили есмы кн(ѧ)зю Скирикгаилу, брату своему. |
| s-176
| А стеречи и помагати намъ оусемъ со ѡдиного. |
| s-177
| А тые люди, што живуть, ѡт Немець подмагати ихъ намъ оусемъ заѡдно. |
| s-178
| А нинечи Б(ог)ъ намъ далъ городъ Полтескъ, а братъ нашь кн(ѧ)зь Скирикгаило Б(ож)ьею помочью и нашею оузѧлъ свое место оу свои руки, што еще ѡ(те)ць ему оуделилъ. |
| s-179
| Також и мы ему даемъ и дали есмы тотъ городъ Полтескъ. |
| s-180
| А иному никому оу Полтескъ не оуступапатисѧ, толко кн(ѧ)зю Скирикгаилу володети городомъ Полоцкомъ и оусеми тыми месты и городы, и волостми, и людми, оусею тою землею, што коли тѧгло и тѧгнеть к городу Полоцку. |
| s-181
| На семъ на всемъ далъ есмь правду крепкую брату своему кн(ѧ)зю Скирикгаилу, ажбы то было не измешано. |
| s-182
| На то жь дали есмы сю грамоту и под нашею печатью завеситою. |
| s-183
| А при томъ были ч(е)сные люди: панъ Хр(е)сщ(о)нъ Козегловьскии и докторъ С(вѧ)тославъ. |
| s-184
| А кончано и написано оу ловехъ Скоистерскихъ, оу первую нед(е)лю по с(вѧ)т(е)мъ Марку еуанг(е)листе, под леты Б(ож)ьими 1387-е. |
| s-185
| Ѡт намесника ѡт полочького ѡт Монтигирда і ѡт оусехъ мужъ ѡт полочанъ кнѧзѧ великого Вытовътовымъ повеленьѥмъ къ ратъманомъ. |
| s-186
| Што ѥсте со кнѧземъ съ Семеномъ миръ оузѧли і с мужи полочаны, штобы то такъ і здержали тотъ миръ крепъко. |
| s-187
| А мы такъ і держимъ крепъко, доколе ізыідеть. |
| s-188
| А на томъ миру ваши пусть к намъ ѥдуть чисто. |
| s-189
| А наши к вамъ ѥдуть чисто. |
| s-190
| А вамъ блюсти полочанина, какъ бы своѥго немъчина. |
| s-191
| А мы хочемъ вашего немъчина блюсти, какъ бы своѥго полочанина. |
| s-192
| Ратъманомъ |
| s-193
| Мы, великии кн(ѧ)зь Витовтъ, дали есмо сию грамот(у) буркгимистру ризском(у) Никгиборкг(у) и всѣмъ нѣмцем, купцем ризским и инымъ всѣм, што ж оу Полоцку полочѧном добрым людемъ цѣловати кр(е)стъ на том, што имъ чинит(и) нѣмцем все оу правду и оу вѣсѣх, и оу торговли, и во всем торговом дѣлѣ; а тако ж оу Ризѣ к полочѧном цѣловати крестъ нѣмцем добрым людемъ на том, што полочѧном чинит(и) все оу правду и оу вѣсѣх, и оу торговли, и во всемъ торговом дѣлѣ. |
| s-194
| А рубежѧ не чити промежи себе на ѡбѣ сторонѣ ни нѣмцем, а ни полочѧном. |
| s-195
| Знати истцю истьцѧ. |
| s-196
| А на то на все дали есмо сию грамот(у) и печѧт(ь) свою велѣли привѣсити. |
| s-197
| А псан оу Полоцку, оу четвергъ четвертоѣ недли поста марта оу шестыи д(е)нь, по Божьем нароженьи вышло лѣт тисѧч(а) и четыри ста безъ ѡдиног(о) лѣта. |
| s-198
| Сам |
| s-199
| Здороваѥть намѣсник полоцькии і вси полочане посадьниковъ ризьских і всѣхъ ратъманъ. |
| s-200
| Што жо писали ѥсте намъ ѡ вѣсу ѡ солоном, ѡ томъ вѣсу много было словъ і послы ваши были у нас. |