| s-3
| И мы сѧ пакъ вамъ молимъ, такоже всемъ ратьманомъ и местицемъ рижаномъ, малу, велику, штобы есте пустили нашю брат(ь)ю на наши рукы, имъ бы ходити доброволно, а на нашихь руках, а кривды не оучинити вашимъ оу нас, а наши оу васъ. |
| s-4
| Ко всем ратьманомъ и местицемъ ризькимъ |
| s-5
| Ѡт пана Василиѧ Дмитріевича, и ѡт боѧръ полоцкых и ѡт мѣстичовъ, и ѡто всѣх моужь полочанъ, всего поспольства, приѧтелем нашим, паном ратманом ризьскым и всѣмъ моужом рижаном, всѣмоу поспольствоу поклон и вѣрнаѧ приѧтельскаѧ приѧзнь. |
| s-6
| Слышали есмо, ижь, дѣи, нашее братьи мног(о) выбегло изъ Жемоити, которіи в сии ж годъ на побитьи поимани были. |
| s-7
| Ено коли вже к вамъ нашь прибѣглъ, ино то бы какъ дома. |
| s-8
| Ино, дѣи, кн(ѧ)зь мештерь, поимавъ их, а держит(ь) по городом. |
| s-9
| И вы бы, пановѣ, говорили кн(ѧ)зю мештерю, штобъ велѣлъ наших людеи ѡтпускати по миру и по цѣлованью, заню ж Б(о)жьею м(и)л(о)стью есмо ѡдины люди. |
| s-10
| А мы вамъ також противу хочем приѧти. |
| s-11
| + Бл(а)г(о)с(ло)в(е)ніе Семиѡна, вл(а)д(ы)кы полотского, ѡ С(вѧ)т(е)мъ Д(у)сѣ възлюбленным приѧтелемъ нашимъ ратманомъ ризькым. |
| s-12
| Ведаите, мылые приѧтели, ѡт ѡгню много намъ и вамъ щкоты стало в нашои ц(е)ркви оу мурованои въ С(вѧ)т(е)мъ Софеи. |
| s-13
| Ино просим васъ, своих приѧтелеи, штобы есте намъ поволили изъвисти купити, занеже хотимъ ѡкна позамуровати. |
| s-14
| А што будеть вашои м(и)л(о)сти надобѣ до насъ, и мы вамъ ради проти заприѧти. |
| s-15
| А м(и)л(о)сть Б(о)жьѧ и наше бл(а)г(о)с(ло)в(е)ніе да будеть со всими вами. |
| s-16
| А псан в Полотску, м(есе)ца април(ѧ) 27 д(е)нь. |
| s-17
| Приѧтелемъ нашим ратманомъ ризькымъ |
| s-18
| + Бл(а)г(о)с(ло)в(е)ніе Семиѡна, вл(а)д(ы)кы полоцкаг(о), ѡ С(вѧ)т(е)мъ Д(у)се возлюбленнымъ дѣтемъ нашим, ратманомъ ризьскымъ. |
| s-19
| Ради слышимъ ваше здоровие. |
| s-20
| А также просимъ васъ и бл(а)г(о)с(ло)влѧемъ, своих милыхъ дѣтеи, будуть ли оу васъ пѣнѧзи ц(е)рк(о)вные С(вѧ)т(о)го Николы, и вы бы тымъ ц(е)рк(о)вь С(вѧ)т(о)го Николу накрыли. |
| s-21
| A што преже сего ваша братья, старые ратманове, давали ругу попомъ н(а)шимъ, которые пѣвали оу С(вѧ)т(о)го Николы, и вы бы, наши дѣти, дали по тому же ругоу къ С(вѧ)т(о)му Николе попу нашему Ивану. |
| s-22
| А ѡн молить Б(о)га за вашу м(и)л(о)сть. |
| s-23
| А м(и)л(о)сть Б(о)жіѧ и н(а)ша м(о)л(и)тва и бл(а)г(о)с(ло)в(е)ніе да есть со всѣми вами. |
| s-24
| А псан в Полоцку, декабрѧ 29 д(е)нь. |
| s-25
| + Ѡ С(вѧ)т(е)мъ Д(у)се возлюбленным дѣтем нашим ратманомъ ризьскымъ |
| s-26
| ꙋ Полоцку. |
| s-27
| 3- Ѡстафью Васильевичу шесть ч(о)л(о)в(е)ковъ данников на Псꙋи. |
| s-28
| Двадцать пꙋдов медꙋ дани дають. |
| s-29
| Сен(ь)ко Кгедкгольдовичъ. |
| s-30
| Кꙋшлеико. |
| s-31
| Василью Корсакꙋ шесть ч(о)л(о)в(е)ковъ, а дают(ь) тридцать пꙋдов медꙋ. |
| s-32
| Самъ великии кн(ѧ)зь. |
| s-33
| Довкгирдъ. |
| s-34
| Сопега. |
| s-35
| Яцкꙋ полочанꙋ во Быстрех 8 чоловеков, а Милковскаѧ землица, а Кобелковскаѧ. |
| s-36
| Ходорꙋ бобры гонити на себе на Начи а по Лежневцы; а нашому не надобе. |
| s-37
| А Ходорꙋ волость Собеж после Валфромеѧ. |
| s-38
| A Гридкꙋ Радковичу и с(ы)ну его Бенкꙋ Измаилꙋ и з братьею ѡтчина под Яцкомъ Григор(ь)евичемъ. |
| s-39
| Сопега. |
| s-40
| + Ѡт пан(а) Семена Кгедикговдович(а), воевод(ы) полоцкого, кнѧзем ризкимъ и суд(ь)ѧмъ. |
| s-41
| Жаловал нам зде на имѧ поночанин Бобоедъ, што сѧ тамъ ему великаѧ кривда стала, што там его стюрманове покрал(и), онъ тати тые поимал и бирич(у) вашему подавал. |
| s-42
| Ино теперь и тати оу вас, и тые пенѧзи оу вас. |
| s-43
| Ино просим вас, штобы есте ему тое заплатили, а оучинили право, как мы вашимъ зде право чиним и платим. |
| s-44
| Кнѧзем ризким и суд(ь)ѧмъ |
| s-45
| Ивашкꙋ Балавина землѧ на Травне, на Ꙋшаче и бобры гонити. |
| s-46
| Сопега. |
| s-47
| Ѡт великого кн(я)зя Казимера, королевича. |
| s-48
| Наместникꙋ полоцкому пану Сен(ь)ку Дедикголтовичу и иным, хто потом будет(ь). |
| s-49
| Дали есмо Ивану Булавичу на Ѡстровне ꙋ его ж землицы и в суседов его ꙋ- в Ысачка ꙋ Вилодеева, а в Офонасове и в Морхинича земли на Ѡстровне бобры гонити на себе. |
| s-50
| А нашому бобровнику не ꙋеждчати въ его землю, ведал бы Иван Булавинъ. |
| s-51
| А на Вшаце реце и по Сомницы такъже и где бобръ станет(ь), тут ему на себе бит(и). |
| s-52
| А бедчаном нашого бобровника не водити в Сомницꙋ, въ его землю, покуле его земля. |
| s-53
| А и борть есмо дали Ивану на Вшачы, покол(ь) его земля. |
| s-54
| А нашому бобровнику въ го земли бобров не гонити, гонил бы Иван Бꙋлавин ꙋ своее земли. |
| s-55
| А дали есмо ему вечно. |
| s-56
| А писан в Троцех, июля двадцат(ь) девятыи ден(ь), индикта третии. |
| s-57
| Ѡт пан(а) Ивашка Кгоицевич(а), намѣстник(а) полоцког(о), ратманом ризким поклон. |
| s-58
| Послал есмо к вам свои послы ѡ вашем добрѣ и ѡ нашом. |
| s-59
| Ино к нам наших пословъ нѣтъ, а нам не ѡткажете ничем. |
| s-60
| Ино слышим ѡт людеи, што есте пограбили правых людеи полочан, тымъ вернути не хотите ихъ товару. |
| s-61
| А мы к вам послали истьцевъ, хто кому будеть виноват, ино бы тому было право. |
| s-62
| И вы истцѧ ѡтслали к великому кн(ѧ)зю, а ѡнъ вам казал, што бы рекомо взѧто оу нег(о) 30 бочек вина. |
| s-63
| Ино то неправда: взѧли оу нег(о) 18 бочек вина а 5 бочек меду, a четырѣ бочки полишил в Полоцку вина, а собою свезлъ двѣ боцѣ вина на низъ. |
| s-64
| А в тых бочках по три травинки. |
| s-65
| И ѡнъ всим тым клеплет(ь). |
| s-66
| Ино на наших записех и на ваших так стоить, што жь знати истьцю истьцѧ. |
| s-67
| Ино сами свои записы ломите, а правых людеи грабите. |
| s-68
| Росмотрите, добро ль то будет(ь)? |
| s-69
| А мы права не бороним вам. |
| s-70
| Ино коли починаете грабити правых людеи, ино мы тѣжь протиоу наидем великог(о) кн(ѧ)зѧ державѣ ваших купцев, и мы велим за свое побрати. |
| s-71
| Тогды будем на ѡбѣ сторонѣ смотрити права. |
| s-72
| А тепере просим вас, штобы есте правым людем ихъ товаръ вернули, а хто будет(ь) вам виноват, на том ищите, а мы за виноватым не стоим. |
| s-73
| А протиоу наших листовъ к намъ ѡтпишит(е), ижь быхом ѡбослали к великому кн(ѧ)зю, к своему ѡсподарю, што нам с ты оукажеть оучинит(и). |
| s-74
| Ратманомъ ризким |
| s-75
| + Бл(а)г(о)с(ло)в(е)ніе Семиѡна, вл(а)д(ы)кы полоцког(о), ѡ С(вѧ)т(е)мъ Д(у)се възлюбленным дѣтем нашим ратманом рижьскым всѣмъ. |
| s-76
| Пишем вамъ ѡ томъ, што приходить к нашеи ц(е)ркви С(вѧ)тому Николѣ, што дають гости, а иное полаты ц(е)рк(о)вные. |
| s-77
| Ино все то беруть ваши ратманове к собѣ, а нашему попу с того нѣтъ ничего. |
| s-78
| А тымъ было ѡбрѧжать ц(е)рк(о)вь: кое крыть, кое муровать, ино ваши нѣмци собѣ корыстують. |
| s-79
| Ино просимъ васъ, своих дѣтеи, штобы есте своимъ нѣмцемъ в то не велѣли въступатсѧ, въ ц(е)рк(о)вное. |
| s-80
| А што оу них будеть ц(е)рк(о)вное, то бы дали нашему попу Ивану. |
| s-81
| И ѡнъ тымъ ц(е)рк(о)вь ѡбрѧдит(ь). |
| s-82
| Или ваша м(и)л(о)сть того не въсхочеть чинить, а въ ц(е)рк(о)вное велите въступатсѧ, и мнѣ великому кн(ѧ)зю ѡ томъ говорить, а за свое стоѧть. |
| s-83
| А м(и)л(о)сть Б(о)жіѧ и н(а)ше бл(а)г(о)с(ло)в(е)ніе да есть со всѣми вами. |
| s-84
| А псано в Полоцку, сентевріѧ 20 д(е)нь. |
| s-85
| + Дѣтем нашим ратманом рижьскым всѣмъ |
| s-86
| + Ратманом ризкимъ всьмъ полочанѣ чоломъ бьют(ь), ѡт вѣлика и до мала. |
| s-87
| Послали есмо Коурила к вамъ по колоколы, и по скалвы, и про вѣсь нарѧдъ. |
| s-88
| А даите намъ по старомоу. |
| s-89
| А вы насъ жалоуите. |
| s-90
| А мы чоломъ бьемъ. |
| s-91
| А што иметь вамь Коурило говорити, и вы томоу вѣрьте. |
| s-92
| Ѡт бояръ полоцкых и ѡт местичовъ, и ѡт всего посполства братьи нашои, посадникомъ и ратманом ризкимъ, поклонъ и вѣрнаа приазнь. |
| s-93
| Ѡ томъ вашеи м(и)л(о)сти пишемъ, што нашь брат местичь Роусан Кожчичь взѧлъ в- в Ывана в Бобина оу Смоленскꙋ кипоу соукна. |
| s-94
| И приехав вашь брат ратманинъ Филипь, a молвить такъ: «Наша робѧта тотъ тобе товаръ подавали, а намъ тотъ товар приходить, и ты бы мене ѡтлезль» . |
| s-95
| «И азъ емꙋ не хотелъ дати» . |
| s-96
| Енъ пришол с братьею своею, с ыными немци. |
| s-97
| Ени молвѧть: «Даи емоу, емоу тотъ товаръ приходить» . |
| s-98
| Енъ послоушал тых его товарышовъ, и далъ емꙋ тот товаръ, и розлезсѧ с нимъ, какии добрыи ч(о)л(ове)къ. |
| s-99
| И тотъ Филипъ, вашь ратманинъ, и грамотоу на себе далъ, и тоую запис(ь) нѧлсѧ прислати, што с Ываномъ з Бобинымъ записана. |
| s-100
| А были с нимъ Иван Высок, а Жидимонтъ, а Индрицо Герков, а Иванъ Чортовъ Палець. |
| s-101
| Ино н(ы)нѣ прислалъ Иван Бобинъ иного своиго приятелѧ и просить на немъ своих пенѧзеи оу дроугое. |
| s-102
| A н(ы)нѣ было поехати нашемꙋ братоу к Новоугородоу. |