| s-501
| audaga augona þoei saiƕand þoei jus saiƕiþ |
| s-502
| qiþa auk izwis þatei managai praufeteis jah þiudanos wildedun saiƕan þatei jus saiƕiþ jah ni gaseƕun jah hausjan þatei jus hauseiþ jah ni gahausidedun |
| s-503
| jah sai witodafasteis sums ustoþ fraisands ina jah qiþands |
| s-504
| laisari ƕa taujands libainais aiweinons arbja wairþa |
| s-505
| þaruh qaþ du imma |
| s-506
| in witoda ƕa gameliþ ist |
| s-507
| ƕaiwa ussiggwis |
| s-508
| iþ is andhafjands qaþ |
| s-509
| frijos fraujan guþ þeinana us allamma hairtin þeinamma jah us allai saiwalai þeinai jah us allai mahtai þeinai jah us allai gahugdai þeinai jah neƕundjan þeinana swe þuk silban |
| s-510
| þanuh qaþ du imma |
| s-511
| raihtaba andhoft |
| s-512
| þata tawei jah libais |
| s-513
| iþ is wiljands uswaurhtana sik domjan qaþ du Iesua |
| s-514
| an ƕas ist mis neƕundja |
| s-515
| andhafjands þan Iesus qaþ |
| s-516
| manna sums galaiþ af Iairusalem in Iaireikon jah in waidedjans frarann þaiei jah biraubodedun ina jah banjos analagjandans |
| s-517
| Jah inngaleiþands þairhlaiþ Iaireikon |
| s-518
| jah sai guma namin haitans Zakkaius |
| s-519
| sah was fauramaþleis motarje jah was gabigs jah sokida gasaiƕan Iesu ƕas wesi jah ni mahta faura managein unte wahstau leitils was |
| s-520
| jah biþragjands faur usstaig ana smakkabagm ei gaseƕi ina unte is and þata munaida þairhgaggan |
| s-521
| jah biþe qam ana þamma stada insaiƕands iup Iesus gasaƕ ina jah qaþ du imma |
| s-522
| Zakkaiu sniumjands dalaþ atsteig |
| s-523
| himma daga auk in garda þeinamma skal ik wisan |
| s-524
| jah sniumjands atstaig jah andnam ina faginonds |
| s-525
| jah gasaiƕandans allai birodidedun qiþandans þatei du frawaurhtis mans galaiþ ussaljan |
| s-526
| standands þan Zakkaius qaþ du fraujin |
| s-527
| sai halbata aiginis meinis frauja gadailja unledaim jah jabai ƕis ƕa afholoda fidurfalþ fragilda |
| s-528
| qaþ þan du imma Iesus þatei |
| s-529
| himma daga naseins þamma garda warþ unte jah sa sunus Abrahamis ist |
| s-530
| qam auk sunus mans sokjan jah nasjan þans fralusanans |
| s-531
| at gahausjandam þan im þata biaukands qaþ gajukon bi þatei neƕa Iairusalem was jah þuhta im ei suns skulda wesi þiudangardi gudis gaswikunþjan |
| s-532
| qaþ þan |
| s-533
| manna sums godakunds gaggida landis franiman sis þiudangardja jah gawandida sik |
| s-534
| athaitands þan taihun skalkans seinans atgaf im taihun dailos jah qaþ du im |
| s-535
| kaupoþ unte ik qimau |
| s-536
| iþ baurgjans is fijaidedun ina jah insandidedun airu afar imma qiþandans |
| s-537
| ni wileima þana þiudanon ufar unsis |
| s-538
| jah warþ biþe atwandida sik aftra andnimands þiudangardja jah haihait wopjan du sis þans skalkans þaimei atgaf þata silubr ei gakunnaidedi ƕa ƕarjizuh gawaurhtedi |
| s-539
| qam þan sa frumista qiþands |
| s-540
| frauja skatts þeins gawaurhta taihun skattans |
| s-541
| jah qaþ du imma |
| s-542
| waila goda skalk unte in leitilamma wast triggws sijais waldufni habands ufar taihun baurgim |
| s-543
| jah qam anþar qiþands |
| s-544
| frauja skatts þeins gawaurhta fimf skattans |
| s-545
| qaþ þan jah du þamma |
| s-546
| jah þu sijais ufaro fimf baurgim |
| s-547
| jah sums qam qiþands |
| s-548
| frauja sai sa skatts þeins þanei habaida galagidana in fanin |
| s-549
| nimis þatei ni lagides jah sneiþis þatei ni saisost |
| s-550
| jah qaþ du imma |
| s-551
| us munþa þeinamma stoja þuk unselja skalk jah lata |
| s-552
| wisseis þatei ik manna hardus im nimands þatei ni lagida jah sneiþands þatei ni saiso |
| s-553
| jah duƕe ni atlagides þata silubr mein du skattjam |
| s-554
| jah ik qimands miþ wokra galausidedjau þata |
| s-555
| jah du þaim faurastandandam qaþ |
| s-556
| nimiþ af imma þana skatt jah gibiþ þamma þos taihun dailos habandin |
| s-557
| jah qeþun du imma |
| s-558
| frauja habaiþ taihun dailos |
| s-559
| qiþa allis izwis þatei ƕarjammeh habandane gibada iþ af þamma unhabandin jah þatei habaiþ afnimada af imma |
| s-560
| aþþan sweþauh fijands meinans jainans þaiei ni wildedun mik þiudanon ufar sis briggiþ her jah usqimiþ faura mis |
| s-561
| jah qiþands þata iddja fram usgaggands in Iairusaulwma |
| s-562
| jah warþ biþe neƕa was Beþsfagein jah Beþanijin at fairgunja þatei haitada alewjo insandida twans siponje seinaize qiþands |
| s-563
| gaggats in þo wiþrawairþon haim in þizaiei inngaggandans bigitats fulan asilaus gabundanana ana þammei ni ainshun aiw manne sat |
| s-564
| andbindandans ina attiuhiþ |
| s-565
| jah jabai ƕas inqis fraihnai duƕe andbindiþ swa qiþaits du imma |
| s-566
| þatei frauja þis gairneiþ |
| s-567
| galeiþandans þan þai insandidans bigetun swaswe qaþ du im |
| s-568
| andbindandam þan im þana fulan qeþun þai fraujans þis du im |
| s-569
| duƕe andbindats þana fulan |
| s-570
| iþ eis qeþun |
| s-571
| fraujin þaurfts þis ist |
| s-572
| jah attauhun þana fulan Iesua jah uswairpandans wastjos seinos ana þana fulan ussatidedun Iesu |
| s-573
| gaggandin þan imma ufstrawidedun wastjom seinaim ana wiga |
| s-574
| biþe þan is neƕa was juþan at ibdaljin þis fairgunjis alewabagme dugunnun alakjo managei siponje faginondans hazjan guþ stibnai mikilai in allaizo þoze seƕun mahte qiþandans |
| s-575
| þiuþida sa qimanda þiudans in namin fraujins |
| s-576
| gawairþi in himina jah wulþus in hauhistjam |
| s-577
| jah sumai Fareisaie us þizai managein qeþun du imma |
| s-578
| laisari sak þaim siponjam þeinaim |
| s-579
| jah andhafjands qaþ du im |
| s-580
| qiþa izwis þatei jabai þai slawand stainos hropjand |
| s-581
| jah sunsei neƕa was gasaiƕands þo baurg gaigrot bi þo qiþands þatei |
| s-582
| iþ wissedeis jah þu in þamma daga þeinamma þo du gawairþja þeinamma |
| s-583
| iþ nu gafulgin ist faura augam þeinaim þatei qimand dagos ana þus jah bigraband fijands þeinai grabai þuk jah bistandand þuk jah biwaibjand þuk allaþro |
| s-584
| jah airþai þuk gaïbnjand jah barna þeina in þus jah ni letand in þus stain ana staina in þizei ni ufkunþes þata mel niuhseinais þeinaizos |
| s-585
| jah galeiþands in alh dugann uswairpan þans frabugjandans in izai jah bugjandans qiþands du im |
| s-586
| gameliþ ist þatei |
| s-587
| gards meins gards bido ist |
| s-588
| iþ jus ina gatawideduþ du filegrja þiube |
| s-589
| jah was laisjands daga ƕammeh in þizai alh |
| s-590
| iþ þai auhmistans gudjans jah bokarjos sokidedun ina usqistjan jah þai frumistans manageins |
| s-591
| jah ni bigetun ƕa gatawidedeina |
| s-592
| managei auk alakjo hahaida du hausjan imma |
| s-593
| in Beþanijin þarei was Lazarus sa dauþa þanei urraisida us dauþaim Iesus |
| s-594
| þaruh gawaurhtedun imma nahtamat jainar jah Marþa andbahtida |
| s-595
| iþ Lazarus was sums þize anakumbjandane miþ imma |
| s-596
| iþ Marja nam pund balsanis nardaus pistikeinis filugalaubis jah gasalboda fotuns Iesua jah biswarb fotuns is skufta seinamma |
| s-597
| iþ sa gards fulls warþ daunais þizos salbonais |
| s-598
| qaþ þan ains þize siponje is Judas Seimonis sa Iskariotes izei skaftida sik du galewjan ina |
| s-599
| duƕe þata balsan ni frabauht was in ·t· skatte jah fradailiþ wesi þarbam |
| s-600
| þat uþ þan qaþ ni þeei ina þize þarbane kara wesi ak unte þiubs was jah arka habaida jah þata innwaurpano bar |