| s-1
| lors encontra en une valee le chevalier qui ses armes en avoit aporté avant hier. |
| s-2
| Quant cil le vit venir si nel salua pas, |
| s-3
| ainz li dist : |
| s-4
| « Garde toi de moi Lancelot |
| s-5
| car tu es morz se tu ne te puez de moi deffendre. » |
| s-6
| Si li vient le glaive aloignié, |
| s-7
| et le fiert si durement qu'il li perce l'escu et le hauberc, |
| s-8
| mes en char nel touche, |
| s-9
| et Lancelot qui son pooir i met le fiert si durement qu'il abat lui et le cheval a terre si felenessement qu'a poi qu'il ne li a le col brisié, |
| s-10
| il point oultre |
| s-11
| et revient arriere |
| s-12
| et voit le cheval qui ja se relevoit, |
| s-13
| et il le prent au frain |
| s-14
| si le meine a.i. arbre, |
| s-15
| et l'atache por ce que li chevaliers le truist prest quant il se relevera. |
| s-16
| Quant il a ce fet si se met a la voie, |
| s-17
| et chevauche jusqu'au soir, |
| s-18
| et lors fu vains et las com cil qui n'avoit mengié de tot le jor, ne de l'autre devant. |
| s-19
| Si ot chevauchié.ii. granz jornees qui assez l'orent grevé et travaillié. |
| s-20
| Tant a chevauchié qu'il vint par devant un hermitage qui estoit en une montaingne, |
| s-21
| il regarde cele part |
| s-22
| et voit devant l'uis seoir.i. hermite vielz hons et anciens, |
| s-23
| et il estoit mout liez, |
| s-24
| si le salue, |
| s-25
| et cil li rent son salu bel et cortoisement. |
| s-26
| « Sire, fet Lancelot, porriez vos herbergier.i. chevalier errant ? |
| s-27
| - Biau sire, fet li preudons, s'il vos plest je vos herbergerai huimés au mielz que je porrai, |
| s-28
| et vos donrai, fet li preudons, a mengier de ce que Diex nos a presté. » |
| s-29
| Et il dit qu'il ne demande mielz, |
| s-30
| et li preudons prent le cheval |
| s-31
| et le meine en.i. apentiz qui estoit devant son ostel, |
| s-32
| et li oste il meïsmes la sele et le frain, |
| s-33
| et li done de l'erbe dom il avoit laienz a plenté, |
| s-34
| et puis prent le glaive et l'escu Lancelot |
| s-35
| et le porte en son ostel. |
| s-36
| Et quant il est touz desarmez li preudons li demande s'il a oï vespres, |
| s-37
| et il dist qu'il ne vit home ne fame ne meson ne recet fors un sol home qu'il encontra ore a midi, |
| s-38
| lors s'en entre li preudons en sa chapele, |
| s-39
| et apele son clerc |
| s-40
| et comence vespres dou jor et puis de la mere Dieu. |
| s-41
| Et quant il ot ce dit qui au jor apartenoit si s'en issi de la chapele, |
| s-42
| lors demande a Lancelot qui il estoit et de quel païs, |
| s-43
| et il li devise son estre, |
| s-44
| et ne li çoile mie chose qui avenue li soit del saint Graal. |
| s-45
| Quant li preudons ot ceste aventure sil prent grant pitié de Lancelot |
| s-46
| car il vit qu'il comença a plorer des lors qu'il conta l'aventure dou saint Graal, |
| s-47
| lors li requiert ou non de sainte Marie et de sainte creance qu'il li die toute sa confession, et tout son estre, |
| s-48
| et il dist que si fera il volentiers puis qu'il le velt, |
| s-49
| si l'en remeine en sa chapele, |
| s-50
| et li conte toute sa vie einsi com il l'avoit autre foiz contee, |
| s-51
| puis le requiert por Dieu qu'il le conselt au salu de s'ame. |
| s-52
| Quant li preudons ot oïe sa vie et sa confession si le reconforte mout |
| s-53
| et aseure |
| s-54
| et li dit tant de bones paroles que Lancelot en est trop plus aeise que devant, |
| s-55
| lors li dist : |
| s-56
| « Sire conseilliez moi de ce que je vos demanderai se vos savez. |
| s-57
| - Dites, |
| s-58
| fet li preudons, |
| s-59
| car il n'est riens donc je ne vos conseil a mon pooir. |
| s-60
| - Sire, fet Lancelot, il m'avint en mon dormant anuit que devant moi venoit uns hons toz avironnez d'estoiles, |
| s-61
| et avoit en sa compaignie.vii. rois et.ii. chevaliers. » |
| s-62
| Lors li conte tout mot a mot einsi com il l'avoit veue. |
| s-63
| Quant li preudons ot ceste parole si dist : |
| s-64
| « Ha.´ Lancelot la poïs tu apertement veoir la grant hautesce de ton lignage, et donc tu es descenduz. |
| s-65
| Saches veraiement que ci a mout greignor senefiance que maintes genz ne cuident. |
| s-66
| Or m'escoute se tu vels, |
| s-67
| et je te dirai le comencement de ton parenté. |
| s-68
| Mes je le prendrai mout loign, |
| s-69
| car einsi le couvient a fere. |
| s-70
| Voirs fu aprés la passion Jhesucrist.xlii. anz que Joseph d'Abarimacie li preudons li verais chevaliers issi de Jerusalem par le comandement Nostre Seignor por preechier et por annoncier la verité de la novele loi et les comandemenz de l'evangile. |
| s-71
| Quant il vint a la cité de Sarraz il trova.i. roi paien Ewalac ot a non qui avoit guerre contre.i. suen voisin riche et puissant. |
| s-72
| Quant il fu acointiez dou roi il le conseilla en tel maniere qu'il ot la victoire de son anemi, |
| s-73
| et le vainqui en champ par l'aide que Diex li envoia. |
| s-74
| Et maintenant qu'il fu reperiez a sa cité il reçut baptesme de la main Josephés li filz Joseph. |
| s-75
| Il ot un serorge qui avoit non Seraphe tant com il fu paiens. |
| s-76
| Mes quant il ot sa loi guerpie si ot a non Nasciens. |
| s-77
| Quant li chevaliers fu venuz a crestienté et il ot sa loi guerpie il crut si bien en Dieu |
| s-78
| et tant ama son creator qu'il fu ausi come pilers et fondement de foi, |
| s-79
| et bien fu aparant chose que il fu preudons et loiax la ou Nostre Sires li dona veoir les granz secrez et les granz repostailles del saint Graal donc onques chevalier n'avoit gueres veu a celui tens se Joseph n'estoit. |
| s-80
| Ne puis ne fu chevaliers qui gueres en veïst se ce ne fu ausi come en sonjant. |
| s-81
| A cel tens fu avis au roi Ewalac que d'un suen neveu filz Nascien issoit.i. lac grant en tel maniere qu'il li issoit del ventre, |
| s-82
| et de cel lac issoient.ix. flum don li.viii. estoient d'une grandor et d'une parfondece. |
| s-83
| Mes cil qui estoit darreains estoit de lé et de parfont plus grant que tuit li autre, |
| s-84
| et estoit si rades et si bruianz qu'il n'estoit riens qui le poïst soffrir. |
| s-85
| Cil fluns ert troubles ou comencement et espés come boe, et el mileu clers et nez, et en la fin d'autre maniere, |
| s-86
| car il estoit a cent doubles plus clers que au comencement, et si douz a boivre que nus ne s'em poïst saouler, |
| s-87
| tiex estoit li darreains des.ix. fluns que je vos ai dit. |
| s-88
| Aprés resgardoit li rois Ewalac, |
| s-89
| et veoit un home venir devers le ciel qui portoit le tesmong et la semblance de Nostre Seignor. |
| s-90
| Et quant il ert venuz au lac si lavoit dedenz ses mains et ses piez, |
| s-91
| et en chascun fesoit ausi, |
| s-92
| et quant il estoit venuz au nuevieme si i lavoit ses mains et ses piez et tout son cors. |
| s-93
| Ceste avision vit li rois Mordrains en son dormant, |
| s-94
| si t'en mostrerai ore la senefiance que ce fu a dire, |
| s-95
| li niés le roi Mordrain donc le lac issoit ce fu Celydoines li filz Nasciens que Nostre Sires envoia en ceste terre por confondre et por combatre contre les mescreanz, |
| s-96
| cil fu veraiement des serjanz Dieu, |
| s-97
| cil fu veraiement chevaliers Jhesucrist. |
| s-98
| Cil sot le cors des estoiles, et la maniere del firmament et des planetes autant ou plus que li philosophe. |
| s-99
| Et par ce qu'il en fu ausi come science en engin vint il devant toi avironnez d'estoiles. |
| s-100
| Ce fu li premiers rois crestiens qui maintint le roiaume d'Escoce. |