| s-203
| ⲡⲁⲓ ⲅⲁⲣ ϥϫⲓⲙⲟⲉⲓⲧ ϩⲏⲧϥ ⲛⲧⲕⲉⲙⲛⲧⲣⲉϥϣⲡϩⲓⲥⲉ ⲙⲡⲥⲱⲙⲁ . |
| s-204
| ⲛⲁⲓ ⲛⲉ ⲛⲉϩⲃⲏⲩⲉ ⲙⲡⲉⲑⲃⲃⲓⲟ ⲛϩⲏⲧ . |
| s-205
| ⲁⲥϫⲟⲟⲥ ⲛϭⲓⲧⲙⲁⲕⲁⲣⲓⲁ ⲥⲩⲅⲕⲗⲏⲧⲓⲕⲏ ϫⲉⲛⲧϩⲉ ⲉⲧⲉⲙⲛϭⲟⲙ ⲛϫⲟⲓ ⲉⲧⲁϩⲟⲉⲣⲁⲧϥ ⲁϫⲛⲉⲓϥⲧ . ⲧⲁⲓ ⲧⲉ ⲧϩⲉ ⲟⲩⲁⲧϭⲟⲙ ⲡⲉ ⲟⲩϫⲁⲓ ⲭⲱⲣⲓⲥ ⲡⲉⲑⲃⲃⲓⲟ ⲛϩⲏⲧ . |
| s-206
| ⲁϥϫⲟⲟⲥ ⲛϭⲓⲁⲡⲁ ϩⲩⲡⲏⲣⲉⲭⲓⲟⲥ . ϫⲉⲟⲩϣⲏⲛ ⲛⲱⲛϩ ⲉϥⲡⲏⲧ ⲉⲡϫⲓⲥⲉ ⲡⲉ ⲡⲉⲑⲃⲃⲓⲟ ⲛϩⲏⲧ |
| s-207
| ⲁϥϫⲟⲟⲥ ⲟⲛ ϫⲉⲧⲛⲧⲱⲛⲅ ⲉⲡⲧⲉⲗⲱⲛⲏⲥ . ϫⲉⲛⲛⲉⲩⲧϭⲁⲓⲟⲕ ⲙⲛⲡⲉⲫⲁⲣⲓⲥⲥⲁⲓⲟⲥ . |
| s-208
| ⲥⲱⲧⲡ ⲛⲁⲕ ⲟⲛ ⲛⲧⲙⲛⲧⲣⲙⲣⲁϣ ⲙⲙⲱⲩⲥⲏⲥ . ϫⲉⲕⲁⲥ ⲉⲕⲛⲁⲡⲱⲱⲛⲉ ⲙⲡⲉⲕϩⲏⲧ ⲛⲧϩⲉ ⲛⲧⲡⲉⲧⲣⲁ . ⲉϩⲉⲛⲡⲏⲅⲏ ⲙⲙⲟⲟⲩ . |
| s-209
| ⲁϥϫⲟⲟⲥ ⲛϭⲓⲁⲡⲁ ϩⲱⲣⲥⲓⲏⲥⲓ . ϫⲉⲟⲩⲧⲱⲱⲃⲉ ⲛⲟⲙⲉ ⲉⲩϣⲁⲛⲛⲟϫⲥ ⲉⲩⲥⲛⲧⲉ ϩⲁⲧⲙⲡⲓⲉⲣⲟ . ⲛⲥⲛⲁϩⲩⲡⲟⲙⲓⲛⲉ ⲁⲛ ⲛⲟⲩϩⲟⲟⲩ ⲛⲟⲩⲱⲧ . |
| s-210
| ⲧⲉⲧⲉⲣⲡⲟⲥⲉ ⲇⲉ ϣⲁⲥⲙⲟⲩⲛ ⲉⲃⲟⲗ ⲛⲧϩⲉ ⲙⲡⲱⲛⲉ . |
| s-211
| ⲧⲁⲓ ⲧⲉ ⲧϩⲉ ⲙⲡⲣⲱⲙⲉ ⲉⲟⲩⲛⲧⲁϥ ⲙⲙⲁⲩ ⲙⲡⲉϥⲙⲉⲉⲩⲉ ⲙⲙⲛⲧⲕⲱⲥⲙⲓⲕⲟⲛ . ⲛϥⲡⲟⲥⲉ ⲁⲛ ϩⲛⲧϩⲟⲧⲉ ⲙⲡⲛⲟⲩⲧⲉ . |
| s-212
| ⲉϥϣⲁⲛⲉⲓ ⲉϩⲣⲁⲓ ⲉⲩⲙⲛⲧⲛⲟϭ ϣⲁϥⲃⲱⲗ ⲉⲃⲟⲗ . |
| s-213
| ϩⲁϩ ⲅⲁⲣ ⲛⲉ ⲙⲡⲉⲓⲣⲁⲥⲙⲟⲥ ⲛⲛⲁⲧⲉⲓⲙⲓⲛⲉ ⲙⲁⲗⲓⲥⲧⲁ ⲉⲩϣⲟⲟⲡ ϩⲛⲧⲙⲏⲧⲉ ⲛⲛⲣⲱⲙⲉ . |
| s-214
| ⲛⲁⲛⲟⲩⲥ ⲇⲉ ⲉⲧⲣⲉⲡⲣⲱⲙⲉ ⲥⲟⲩⲛⲡⲉϥϣⲓ ⲙⲙⲓⲛⲙⲙⲟϥ . ⲉⲧⲣⲉϥⲡⲱⲧ ⲇⲉ ⲉⲃⲟⲗ ⲙⲡⲉϩⲣⲟϣ ⲛⲧⲙⲛⲧⲛⲟϭ |
| s-215
| ⲛⲉⲧⲧⲁϫⲣⲏⲩ ⲇⲉ ϩⲓⲧⲛⲧⲡⲓⲥⲧⲓⲥ ϩⲉⲛⲁⲧⲕⲓⲙ ⲉⲣⲟⲟⲩ ⲛⲉ . |
| s-216
| ⲉⲧⲃⲉ ⲡⲡⲉⲧⲟⲩⲁⲁⲃ ⲇⲉ ⲓⲱⲥⲏⲫ |
| s-217
| ⲉⲣϣⲁⲛⲟⲩⲁ ⲟⲩⲱϣ ⲉϣⲁϫⲉ ⲉⲣⲟϥ · ϥⲛⲁϫⲟⲟⲥ ϫⲉⲟⲩⲣⲙⲛⲕⲁϩ ⲁⲛ ⲡⲉ · ϫⲉⲁⲩⲡⲉⲓⲣⲁⲍⲉ ⲙⲙⲟϥ ϩⲛⲟⲩⲏⲣ ⲙⲡⲉⲓⲣⲁⲥⲙⲟⲥ · ⲁⲩⲱ ϩⲛⲁϣ ϭⲉ ⲛⲭⲱⲣⲁ · ϩⲙⲡⲙⲁ ⲉⲧⲉⲙⲛⲟⲩϣⲥ ⲛⲧⲁϭⲥⲉ ⲛϩⲏⲧϥ ⲙⲙⲛⲧⲣⲉϥϣⲙϣⲉⲛⲟⲩⲧⲉ · |
| s-218
| ⲁⲗⲗⲁ ⲛⲉϥϣⲟⲟⲡ ⲛⲙⲙⲁϥ ⲛϭⲓⲡⲛⲟⲩⲧⲉ ⲛⲛⲉϥⲉⲓⲟⲧⲉ · |
| s-219
| ⲁⲩⲱ ⲁϥⲧⲟⲩϫⲟϥ ⲉⲃⲟⲗ ϩⲛⲑⲗⲓⲯⲓⲥ ⲛⲓⲙ · |
| s-220
| ⲁⲩⲱ ⲧⲉⲛⲟⲩ ϥϣⲟⲟⲡ ⲙⲛⲛⲉϥⲉⲓⲟⲧⲉ ϩⲛⲧⲙⲛⲧⲣⲣⲟ ⲛⲙⲡⲏⲩ̣ⲉ |
| s-221
| ⲁⲛⲟⲛ ϭⲉ ϩⲱⲱⲛ ⲁⲛⲥⲟⲩⲉⲛ ⲡⲉⲛϣⲓ ⲙⲙⲓⲛⲙⲙⲟⲛ · |
| s-222
| ⲙⲁⲣⲛⲁⲅⲱⲛⲓⲍⲉ · |
| s-223
| ⲙⲱⲅⲓⲥ ⲅⲁⲣ ϩⲛⲛⲁⲓ ⲧⲏⲣⲟⲩ ⲛⲧⲛϣϭⲙϭⲟⲙ ⲉⲡⲱⲧ ⲛⲧⲟⲟⲧⲥ ⲛⲧⲉⲕⲣⲓⲥⲓⲥ ⲙⲡⲛⲟⲩⲧⲉ . |
| s-224
| ⲟⲩϩⲗⲗⲟ ⲇⲉ ⲛⲁⲛⲁⲭⲱⲣⲏⲧⲏⲥ ⲉϥⲥⲟⲣⲙ ϩⲛⲧⲉⲣⲏⲙⲟⲥ · |
| s-225
| ⲁⲩⲱ ⲡⲉϫⲁϥ ϩⲣⲁⲓ ⲛϩⲏⲧϥ ϫⲉⲁⲓⲕⲁⲧⲟⲣⲑⲟⲩ ⲛⲧⲁⲣⲉⲧⲏ · |
| s-226
| ⲁⲩⲱ ⲁϥϣⲗⲏⲗ ⲉⲡⲛⲟⲩⲧⲉ ⲉϥϫⲱ ⲙⲙⲟⲥ · ϫⲉⲟⲩⲡⲉϯϣⲁⲁⲧ ⲙⲙⲟϥ ⲧⲁⲁⲁϥ · |
| s-227
| ⲁϥⲟⲩⲱϣ ⲇⲉ ⲛϭⲓⲡⲛⲟⲩⲧⲉ ⲉⲑⲃⲃⲓⲉⲡⲉϥⲙⲉⲉⲩⲉ ⲻ |
| s-228
| ⲡⲉϫⲁϥ ⲛⲁϥ ϫⲉⲃⲱⲕ ϣⲁⲙⲉϣⲉ ⲛⲓⲙ ⲛⲁⲣⲭⲓⲙⲁⲛⲇⲣⲓⲧⲏⲥ · |
| s-229
| ⲁⲩⲱ ⲡⲉⲧⲉϥⲛⲁϫⲟⲟϥ ⲛⲁⲕ ⲁⲣⲓϥ · |
| s-230
| ⲁⲡⲛⲟⲩⲧⲉ ⲇⲉ ϭⲱⲗⲡ ⲉⲃⲟⲗ ⲙⲡⲓⲁⲣⲭⲓⲙⲁⲛⲇⲣⲓⲧⲏⲥ ⲉϥϫⲱ ⲙⲙⲟⲥ · ϫⲉⲉⲓⲥⲙⲉϣⲉ ⲛⲓⲙ ⲁⲛⲁⲭⲱⲣⲏⲧⲏⲥ ⲛⲏⲩ ϣⲁⲣⲟⲕ |
| s-231
| ϯⲟⲩⲫⲣⲁⲅⲉⲗⲗⲓⲟⲛ ⲛⲁϥ · ⲛⲅⲧⲣⲉϥⲙⲟⲟⲛⲉ ⲛⲛⲣⲓⲣ · ⲻ |
| s-232
| ⲁϥⲉⲓ ⲇⲉ ⲛϭⲓⲡϩⲗⲗⲟ ⲁϥⲕⲱⲗϩ ⲉⲡⲣⲟ |
| s-233
| ⲁⲩⲱ ⲁϥⲃⲱⲕ ⲉϩⲟⲩⲛ ϣⲁⲡⲁⲡⲉ ⲛⲧⲥⲟⲟⲩϩⲥ · |
| s-234
| ⲁⲩⲁⲥⲡⲁⲍⲉ ⲛⲛⲉⲩⲉⲣⲏⲩ ⲁⲩϩⲙⲟⲟⲥ ⲻ |
| s-235
| ⲁⲩⲱ ⲡⲉϫⲁϥ ⲛϭⲓⲡⲁⲛⲁⲭⲱⲣⲏⲧⲏⲥ ϫⲉⲟⲩ ⲡⲉϯⲛⲁⲁⲁϥ ϫⲉⲉⲓⲉⲟⲩϫⲁⲓ · |
| s-236
| ⲡⲉϫⲁϥ ⲛⲁϥ ⲛϭⲓⲡⲁⲣⲭⲓⲙⲁⲛⲇⲣⲓⲧⲏⲥ ϫⲉⲡⲉϯⲛⲁϫⲟⲟϥ ⲛⲁⲕ ⲕⲛⲁⲁϥ · |
| s-237
| ⲛⲧⲟϥ ⲇⲉ ⲡⲉϫⲁϥ ϫⲉⲥⲉ |
| s-238
| ⲡⲉϫⲁϥ ⲛⲁϥ ϫⲉϥⲓ ⲛⲧⲉⲓⲙⲁⲥⲧⲓⲅⲝ ⲛⲅⲙⲟⲟⲛⲉ ⲛⲛⲣⲓⲣ ⲻ |
| s-239
| ⲛⲉⲧⲥⲟⲟⲩⲛ ⲇⲉ ⲙⲙⲟϥ ⲁⲩⲛⲁⲩ ⲉⲣⲟϥ ⲉϥⲙⲟⲟⲛⲉ ⲛⲛⲣⲓⲣ · |
| s-240
| ⲛⲉⲩϫⲱ ⲙⲙⲟⲥ ϫⲉⲁⲛⲁⲩ ⲉⲡⲉⲓⲛⲟϭ ⲛⲁⲛⲁⲭⲱⲣⲏⲧⲏⲥ ⲉⲁⲡⲉϥϩⲏⲧ ⲡⲱϣⲥ |
| s-241
| ⲁⲩⲱ ⲟⲩⲛⲟⲩⲇⲁⲓⲙⲱⲛ ϩⲓⲱⲱϥ · ⲉϥⲙⲟⲟⲛⲉ ⲛⲉⲛⲣⲓⲣ · ⲻ |
| s-242
| ⲁϥⲛⲁⲩ ⲇⲉ ⲛϭⲓⲡⲛⲟⲩⲧⲉ ⲉⲡⲉϥⲑⲃⲃⲓⲟ ϫⲉⲁϥϩⲩⲡⲟⲙⲓⲛⲉ ⲛⲧⲉⲓϩⲉ ⲉⲡⲛⲟϭⲛⲉϭ ⲛⲛⲣⲱⲙⲉ · |
| s-243
| ⲁϥϫⲟⲟⲩϥ ⲟⲛ ⲉⲡⲉϥⲙⲁ · · |
| s-244
| ⲟⲩⲣⲱⲙⲉ ⲉϥⲟ ⲛⲇⲁⲓⲙⲱⲛⲓⲟⲛ · ⲁⲩⲱ ⲉϥⲙⲟⲕϩ ⲙⲙⲁⲧⲉ · ⲉϥⲧⲁⲩⲉⲥϩⲃⲏⲏⲧⲉ ⲉⲃⲟⲗ · ⲁϥⲣⲱϩⲧ ⲛⲟⲩⲙⲟⲛⲁⲭⲟⲥ ⲉⲃⲟⲗ ϩⲛⲛϩⲗⲗⲟ ⲉϩⲟⲩⲛ ⲉⲧⲉϥⲟⲩⲟϭⲉ · |
| s-245
| ⲡϩⲗⲗⲟ ⲇⲉ ϩⲛⲟⲩϭⲉⲡⲏ ⲁϥⲕⲧⲟ ⲉⲣⲟϥ ⲛⲧⲕⲉⲟⲩⲉⲓ · |
| s-246
| ⲡⲇⲁⲓⲙⲱⲛ ⲇⲉ ⲙⲡⲉϥⲧⲱⲟⲩⲛ ϩⲁⲡϫⲟϥϫϥ ⲙⲡⲉⲑⲃⲃⲓⲟ |
| s-247
| ⲁϥⲉⲓ ⲉⲃⲟⲗ ϩⲓⲱⲱϥ · ⲻ · |
| s-248
| ⲁϥϫⲟⲟⲥ ⲛϭⲓⲟⲩϩⲗⲗⲟ ϫⲉⲉϣⲱⲡⲉ ⲟⲩⲙⲉⲉⲩⲉ ⲡⲉ ⲉϥϫⲟⲥⲉ ⲙⲙⲛⲧϫⲁⲥⲓϩⲏⲧ · ⲛϥⲉⲓ ⲛⲁⲕ ⲉϩⲟⲩⲛ ϩⲟⲧϩⲧ ϩⲛⲛⲉⲕⲙⲉⲉⲩⲉ ϫⲉⲉⲛⲉⲁⲕϩⲁⲣⲉϩ ⲉⲛⲉⲛⲧⲟⲗⲏ · ⲉϣⲱⲡⲉ ⲁⲕⲙⲉⲣⲉⲛⲉⲕϫⲁϫⲉ ⲉϣⲱⲡⲉ ⲁⲕⲣⲁϣⲉ ϩⲓϫⲙⲡⲉⲟⲟⲩ ⲛⲛⲉⲕϫⲁϫⲉ ⲁⲩⲱ ⲁⲕⲗⲩⲡⲉⲓ ⲉϫⲙⲡⲉⲩϣⲱⲱⲧ ⲉϣⲱⲡⲉ ⲕⲟ ⲛⲁϩⲣⲁⲕ ⲙⲁⲩⲁⲁⲕ ⲛⲟⲩϩⲙϩⲁⲗ ⲛⲁⲧϣⲁⲩ ⲁⲩⲱ ⲛⲣⲉϥⲣⲛⲟⲃⲉ ⲙⲡⲁⲣⲁⲟⲩⲟⲛ ⲛⲓⲙ |
| s-249
| ⲁⲩⲱ ϩⲛⲛⲁⲓ ⲛⲅⲧⲙⲙⲉⲉⲩⲉ ⲉⲩⲙⲛⲧⲛⲟϭ ϩⲱⲥ ⲉⲁⲕⲕⲁⲧⲟⲣⲑⲟⲩ ⲛϩⲱⲃ ⲛⲓⲙ · ⲉⲕⲥⲟⲟⲩⲛ ϫⲉⲡⲉⲓⲙⲉⲉⲩⲉ ϣⲁϥⲃⲗϩⲱⲃ ⲛⲓⲙ ⲉⲃⲟⲗ · |
| s-250
| ⲁϥϫⲟⲟⲥ ⲛϭⲓⲟⲩϩⲗⲗⲟ ϫⲉⲙⲡⲣⲕⲁⲡⲉⲕϩⲏⲧ ⲉϣⲁϫⲉ ⲛⲥⲁⲡⲉⲕⲥⲟⲛ · ⲉⲕϫⲱ ⲙⲙⲟⲥ ϫⲉϩⲱⲥ ϯⲛⲏⲫⲉ ⲉϩⲟⲩⲉ ⲉⲣⲟϥ · ⲁⲩⲱ ⲟⲛ ϫⲉϯⲁⲥⲕⲉⲓ ⲉϩⲟⲩⲉ ⲉⲣⲟϥ · ⲁⲩⲱ ϫⲉϯⲛⲟⲉⲓ ⲡⲁⲣⲁⲣⲟϥ · |
| s-251
| ⲁⲗⲗⲁ ϩⲩⲡⲟⲧⲁⲥⲥⲉ ⲙⲡⲉⲡⲛⲉⲩⲙⲁ ⲛⲧⲙⲛⲧϩⲏⲕⲉ ⲉⲧⲃⲉⲡⲉⲭⲣⲓⲥⲧⲟⲥ · ⲛⲅϫⲡⲟ ⲛⲁⲕ ⲛⲧⲁⲅⲁⲡⲏ ⲁϫⲛϩⲩⲡⲟⲕⲣⲓⲛⲉ · ϫⲉⲛⲛⲉⲕⲃⲱⲗ ⲉⲃⲟⲗ ⲙⲡϣⲟⲩϣⲟⲩ ⲙⲡⲉⲡⲛⲉⲩⲙⲁ ⲉⲧⲉⲩⲛⲧⲁⲕⲥϥ |
| s-252
| ϥⲥⲏϩ ⲅⲁⲣ ϫⲉⲡⲉⲧⲁϩⲉⲣⲁⲧϥ ⲙⲁⲣⲉϥϭⲱϣⲧ ⲙⲏⲡⲱⲥ ⲛϥϩⲉ · ⲛⲅϣⲱⲡⲉ ⲉⲕϫⲟⲕⲣ ϩⲙⲡⲉϩⲙⲟⲩ ⲙⲡⲉⲭⲣⲓⲥⲧⲟⲥ · ⲻ |
| s-253
| ⲁϥϫⲟⲟⲥ ⲛϭⲓⲟⲩϩⲗⲗⲟ · ϫⲉⲡⲉⲧⲟⲩⲧⲁⲓⲟ ⲙⲙⲟϥ ⲡⲁⲣⲁⲡⲉϥⲙⲡϣⲁ · ⲏ ⲉϥϣⲟⲩϣⲟⲩ ⲙⲙⲟϥ ⲉϫⲱϥ ϣⲁϥϯⲟⲥⲉ ⲧⲱⲛⲟⲩ |
| s-254
| ⲡⲉⲧⲉⲛⲥⲉϯⲉⲟⲟⲩ ⲛⲁϥ ⲁⲛ ϩⲛⲛⲣⲱⲙⲉ ϣⲁϥϫⲓⲉⲟⲟⲩ ϩⲛⲙⲡⲏⲩⲉ · |
| s-255
| ⲁⲩⲥⲟⲛ ϫⲛⲉⲟⲩϩⲗⲗⲟ ϫⲉⲛⲁⲛⲟⲩϯϩⲁϩ ⲙⲙⲉⲧⲁⲛⲟⲓⲁ · ⲻ |
| s-256
| ⲡⲉϫⲁϥ ⲛϭⲓⲡϩⲗⲗⲟ ϫⲉⲧⲛⲛⲁⲩ ⲉⲓⲏⲥⲟⲩ ⲡϣⲏⲣⲉ ⲛⲛⲁⲩⲏ ϫⲉⲉⲧⲓ ⲉϥⲡⲁϩⲧ ⲉϫⲙⲡⲉϥϩⲟ · ⲁⲡⲛⲟⲩⲧⲉ ⲟⲩⲱⲛϩ ⲛⲁϥ ⲉⲃⲟⲗ · ⲻ |
| s-257
| ⲁⲩϫⲛⲉⲟⲩϩⲗⲗⲟ ϫⲉⲉⲧⲃⲉⲟⲩ ⲛⲇⲁⲓⲙⲱⲛ ⲙⲓϣⲉ ⲛⲙⲙⲁⲛ ⲛⲧⲉⲓϩⲉ ⲧⲏⲣⲥ · |
| s-258
| ⲡⲉϫⲉⲡϩⲗⲗⲟ ϫⲉⲉⲃⲟⲗ ϫⲉⲁⲛⲛⲟⲩϫⲉ ⲉⲃⲟⲗ ⲛⲛⲉⲛϩⲟⲡⲗⲟⲛ · ⲉⲧⲉⲛⲁⲓ ⲛⲉ ⲡⲥⲱϣ ⲙⲛⲡⲉⲑⲃⲃⲓⲟ ⲙⲛⲡⲧⲙⲕⲁⲗⲁⲁⲩ ⲛⲁⲛ ⲙⲛⲧϩⲩⲡⲟⲙⲟⲛⲏ ⲻ |
| s-259
| ⲁⲩⲥⲟⲛ ϫⲛⲉⲟⲩϩⲗⲗⲟ ϫⲉⲉⲣϣⲁⲛⲟⲩⲥⲟⲛ ⲉⲓⲛⲉ ⲛⲁⲓ ⲉϩⲟⲩⲛ ⲛϩⲉⲛϣⲁϫⲉ ϩⲓⲃⲟⲗ ⲕⲟⲩⲱϣ ⲉⲧⲣⲁϫⲟⲟⲥ ⲛⲁϥ ⲁⲡⲁ ϫⲉⲙⲡⲣⲛⲧⲟⲩ ⲛⲁⲓ ⲉϩⲟⲩⲛ |
| s-260
| ⲡⲉϫⲁⲡϩⲗⲗⲟ ⲛⲁϥ ϫⲉⲙⲡⲱⲣ · |
| s-261
| ⲡⲉϫⲉⲡⲥⲟⲛ ⲛⲁϥ ϫⲉⲉⲧⲃⲉⲟⲩ · |
| s-262
| ⲡⲉϫⲉⲡϩⲗⲗⲟ ϫⲉⲉⲧⲃⲉϫⲉⲟⲩⲇⲉ ⲁⲛⲟⲛ ϩⲱⲱⲛ ⲙⲡⲉⲛϣϭⲙϭⲟⲙ ⲉϩⲁⲣⲉϩ ⲉⲡⲁⲓ · ⲙⲏⲡⲟⲧⲉ ⲉⲛϫⲱ ⲙⲙⲟⲥ ⲉⲡⲉⲧϩⲓⲧⲟⲩⲱⲛ ϫⲉⲙⲡⲣⲣⲡⲁⲓ · ⲛⲧⲛϭⲛⲧⲛ ϩⲱⲱⲛ ⲙⲛⲛⲥⲁⲛⲁⲓ ⲉⲛⲉⲓⲣⲉ ⲙⲙⲟⲥ ⲻ |
| s-263
| ⲡⲉϫⲉⲡⲥⲟⲛ ⲛⲁϥ ϫⲉⲟⲩ ϭⲉ ⲉⲧⲉϣϣⲉ ⲉⲁⲁϥ ⲻ |
| s-264
| ⲡⲉϫⲉⲡϩⲗⲗⲟ ϫⲉⲉⲛⲟⲩⲉϣⲡⲕⲁⲣⲱϥ · |
| s-265
| ⲡⲉϥⲥⲙⲟⲧ ⲣⲱϣⲉ ⲉⲡⲉⲧϩⲓⲧⲟⲩⲱⲛ |
| s-266
| ⲁⲩϫⲛⲉⲟⲩϩⲗⲗⲟ ϫⲉⲟⲩ ⲡⲉ ⲡⲉⲑⲃⲃⲓⲟ |
| s-267
| ⲡⲉϫⲁϥ ϫⲉⲉⲣϣⲁⲛⲡⲉⲕⲥⲟⲛⲣⲛⲟⲃⲉ ⲉⲣⲟⲕ ⲡⲉ ⲛⲅⲕⲱ ⲛⲁϥ ⲉⲃⲟⲗ ⲙⲡⲁⲧⲉϥⲙⲉⲧⲁⲛⲟⲉⲓ ⲻ |
| s-268
| ⲁϥϫⲟⲟⲥ ⲛϭⲓⲟⲩϩⲗⲗⲟ ϫⲉϩⲙⲡⲉⲓⲣⲁⲥⲙⲟⲥ ⲛⲓⲙ ⲙⲡⲣϭⲛⲁⲣⲓⲕⲉ ⲉⲣⲱⲙⲉ · |
| s-269
| ⲁⲗⲗⲁ ϭⲛⲁⲣⲓⲕⲉ ......... ⲉⲕϫⲱ ⲙⲙⲟⲥ ϫⲉⲉⲣⲉⲛⲁⲓ ϣⲟⲟⲡ ⲙⲙⲟⲓ ⲉⲧⲃⲉⲛⲁⲛⲟⲃⲉ ⲻ |
| s-270
| ⲁϥϫⲟⲟⲥ ⲛϭⲓⲟⲩϩⲗⲗⲟ ϫⲉⲙⲡⲓⲡⲁⲣⲁⲃⲁ ⲛⲧⲁⲧⲁⲝⲓⲥ ⲉⲛⲉϩ · ⲉⲧⲣⲁⲙⲟⲟϣⲉ ⲉⲡϫⲓⲥⲉ ⲙⲙⲟⲓ |
| s-271
| ⲁⲩⲱ ⲟⲛ ⲉⲩⲉⲓⲛⲉ ⲙⲙⲟⲓ ⲉⲡⲉⲥⲏⲧ ⲉⲩⲑⲃⲃⲓⲟ ⲙⲡⲓϣⲧⲟⲣⲧⲣ . |
| s-272
| ⲡⲁⲣⲟⲟⲩϣ ⲧⲏⲣϥ ⲡⲉ ⲉⲧⲣⲁⲧⲱⲃϩ ⲙⲡⲛⲟⲩⲧⲉ ϣⲁⲛⲧⲉϥ.. ⲙⲙⲟⲓ ⲉⲃⲟⲗ ⲙⲡⲣⲙⲛⲁⲥ . |
| s-273
| ⲁⲩⲥⲟⲛ ϫⲛⲉⲟⲩϩⲗⲗⲟ ϫⲉⲟⲩ ⲡⲉ ⲡⲉⲑⲃⲃⲓⲟ ⲛϩⲏⲧ |
| s-274
| ⲡⲉϫⲉⲡϩⲗⲗⲟ ⲛⲁϥ ϫⲉⲉⲧⲣⲉⲕⲣⲡⲡⲉⲧⲛⲁⲛⲟⲩϥ ⲡⲉ ⲛⲛⲉⲧⲣⲡⲉⲑⲟⲟⲩ ⲛⲁⲕ · |
| s-275
| ⲡⲉϫⲉⲡⲥⲟⲛ ⲛⲁϥ ϫⲉⲉⲣϣⲁⲛⲧⲙⲟⲩⲁ ⲡⲱϩ ⲉⲡⲉⲓϣⲓ ⲟⲩ ⲡⲉⲧⲉⲛⲁⲁⲁϥ · |
| s-276
| ⲡⲉϫⲉⲡϩⲗⲗⲟ ϫⲉⲙⲁⲣⲉϥⲥⲱⲧⲡ ⲛⲁϥ ⲙⲡⲕⲁⲣⲱϥ ⲻ |
| s-277
| ⲁⲩⲥⲟⲛ ϫⲛⲉⲟⲩϩⲗⲗⲟ ϫⲉⲁϫⲓⲟⲩϣⲁϫⲉ ⲉⲣⲟⲓ ⲁⲡⲁ ⲛⲟⲩϫⲁⲓ . |
| s-278
| ⲕⲁⲛ ⲉⲕϣⲁⲛϫⲟⲟϥ ⲛⲧⲛⲧⲙⲁⲙⲁϩⲧⲉ ⲙⲙⲟϥ ⲉⲃⲟⲗ ϫⲉⲟⲩⲕⲁϩ ⲙⲙⲉⲗϩ ⲡⲉ ⲡⲉⲛⲕⲁϩ |
| s-279
| ⲁⲟⲩⲥⲟ ϫⲛⲉⲟⲩϩⲗⲗⲟ ϫⲉⲟⲩ ⲡⲉ ⲡϩⲱⲃ ⲛⲧⲙⲛⲧϣⲙⲙⲟ .... |
| s-280
| ⲡⲉϫⲁϥ .....ⲟ... ⲟⲩⲥⲟⲛ ⲉ......ⲙ.... ⲁⲩⲱ ...... ϩⲛ.......... ⲁⲅⲁⲡⲏ ϣⲱⲡⲉ · |
| s-281
| ⲁⲩⲱ ⲁϥϩⲙⲟⲟⲥ ⲉⲧⲉⲧⲣⲁⲡⲉⲍⲁ ⲉⲟⲩⲱⲙ ⲙⲛⲛⲉⲥⲛⲏⲩ · |
| s-282
| ⲡⲉϫⲁⲩ ⲇⲉ ⲛϭⲓϩⲟⲓⲛⲉ ϫⲉⲛⲓⲙ ⲡⲉ ⲡⲉⲓⲕⲉⲟⲩⲁ · |
| s-283
| ⲁⲩⲁⲙⲁϩⲧⲉ ⲙⲙⲟϥ ⲁⲩⲧⲟⲩⲛⲟⲥϥ ⲉⲩϫⲱ ⲙⲙⲟⲥ ϫⲉⲧⲱⲟⲩⲛ ⲛⲅⲃⲱⲕ ⲉⲃⲟⲗ · |
| s-284
| ⲁϥⲧⲱⲟⲩⲛ ⲇⲉ ⲁϥⲃⲱⲕ · |
| s-285
| ⲁϩⲉⲛⲕⲟⲟⲩⲉ ⲇⲉ ⲙⲕⲁϩ ⲛϩⲏⲧ · |
| s-286
| ⲁⲩⲱ ⲁⲩⲙⲟⲩⲧⲉ ⲉⲣⲟϥ · ⲻ |
| s-287
| ⲙⲛⲛⲥⲁⲛⲁⲓ ⲁⲟⲩⲁ ϫⲛⲟⲩϥ ϫⲉⲛⲧⲁⲟⲩⲃⲱⲕ ⲉⲡⲉⲕϩⲏⲧ ϫⲉⲁⲩⲛⲟϫⲕ ⲉⲃⲟⲗ · ⲁⲩⲱ ⲁⲩⲛⲧⲕ ⲟⲛ ⲉϩⲟⲩⲛ · ⲻ |
| s-288
| ⲡⲉϫⲁϥ ϫⲉⲁⲓⲕⲁⲁⲥ ϩⲙⲡⲁϩⲏⲧ ϩⲁⲡⲥ ⲁⲛⲅⲟⲩⲟⲩϩⲟⲣ · |
| s-289
| ⲡⲁⲓ ⲉⲩϣⲁⲛⲛⲟϫϥ ⲉⲃⲟⲗ ϣⲁϥⲃⲱⲕ |
| s-290
| ⲉⲩϣⲁⲛⲙⲟⲩⲧⲉ ⲉⲣⲟϥ ϣⲁϥⲉⲓ · ⲻ |
| s-291
| ⲛⲉϩⲟⲟⲩ ⲉⲧⲙⲙⲁⲩ ⲛⲉⲩⲛⲟⲩⲛⲟϭ ⲟⲛ ⲙⲙⲏⲏϣⲉ ⲛⲙⲙⲁϥ ⲁⲩⲱ ⲉⲙⲙⲛⲧⲟⲩ ⲡⲉⲧⲟⲩⲛⲁⲟⲩⲟⲙϥ ⲁϥⲙⲟⲩⲧⲉ ⲉⲛⲉϥⲙⲁⲑⲏⲧⲏⲥ ⲡⲉϫⲁϥ ⲛⲁⲩ |
| s-292
| ϯϣⲛϩⲧⲏⲓ ⲉϫⲙⲡⲙⲏⲏϣⲉ ϫⲉⲏⲇⲏ ⲉⲓⲥϣⲟⲙⲛⲧ ⲛϩⲟⲟⲩ ⲥⲉⲡⲣⲟⲥⲕⲁⲣⲧⲉⲣⲉⲓ ⲉⲣⲟⲓ . ⲉⲙⲙⲛⲧⲟⲩ ⲡⲉⲧⲟⲩⲛⲁⲟⲩⲟⲙϥ |
| s-293
| ⲉⲓϣⲁⲛⲕⲁⲁⲩ ⲉⲃⲟⲗ ⲉⲙⲡⲟⲩⲟⲩⲱⲙ ⲥⲉⲛⲁⲥⲱϣⲙ ϩⲛⲧⲉϩⲓⲏ ⲉⲩⲛϩⲟⲓⲛⲉ ⲛϩⲏⲧⲟⲩ ϣⲟⲟⲡ ϩⲙⲡⲟⲩⲉ . |
| s-294
| ⲉⲩⲟⲩⲱϣⲃ ⲇⲉ ⲛⲁϥ ⲛϭⲓⲛⲉϥⲙⲁⲑⲏⲧⲏⲥ ϫⲉⲛⲓⲙ ⲡⲉⲧⲛⲁϣⲧⲥⲓⲉⲛⲁⲓ ⲛⲟⲉⲓⲕ ⲙⲡⲉⲓⲙⲁ ϩⲛⲟⲩϫⲁⲓⲉ . |
| s-295
| ⲁϥϫⲛⲟⲩⲟⲩ ϫⲉⲟⲩⲛⲧⲏⲧⲛ ⲟⲩⲏⲣ ⲙⲙⲁⲩ ⲛⲟⲉⲓⲕ . ⲛⲧⲟⲟⲩ ⲇⲉ ⲡⲉϫⲁⲩ ϫⲉⲥⲁϣϥ . |
| s-296
| ⲁϥϩⲱⲛ ⲉⲧⲟⲟⲧϥ ⲙⲡⲙⲏⲏϣⲉ ⲉⲧⲣⲉⲩⲛⲟϫⲟⲩ ϩⲓⲡⲉⲥⲏⲧ ⲁϥϫⲓ ⲇⲉ ⲙⲡⲥⲁϣϥ ⲛⲟⲉⲓⲕ ⲁϥϣⲡϩⲙⲟⲧ ⲉϫⲱⲟⲩ ⲁϥⲡⲟϣⲟⲩ ⲁⲩⲱ ⲁϥⲧⲁⲁⲩ ⲛⲛⲉϥⲙⲁⲑⲏⲧⲏⲥ ϫⲉⲉⲩⲉⲕⲁⲁⲩ ϩⲁⲣⲱⲟⲩ . ⲁⲩⲱ ⲁⲩⲕⲁⲁⲩ ϩⲁⲣⲱϥ ⲙⲡⲙⲏⲏϣⲉ |
| s-297
| ⲛⲉⲩⲛⲧⲟⲩ ⲕⲉϣⲏⲙ ⲇⲉ ⲛⲧⲃⲧ ⲛⲧⲉⲣⲉϥⲥⲙⲟⲩ ⲇⲉ ⲉⲣⲟⲟⲩ ⲁϥⲟⲩⲉϩⲥⲁϩⲛⲉ ⲉⲕⲁⲛⲉⲓⲕⲟⲟⲩⲉ ϩⲁⲣⲱⲟⲩ . |
| s-298
| ⲉⲩⲟⲩⲱⲙ ⲇⲉ ⲁⲩⲥⲉⲓ ⲁⲩⲱ ⲁⲩϥⲓ ⲛⲛⲗⲁⲕⲙ . ⲉⲛⲧⲁⲩⲣϩⲟⲩⲟ ⲉⲩⲛⲁⲣⲥⲁϣϥ ⲛⲃⲓⲣ |
| s-299
| ⲛⲉⲩⲛⲁⲣϩⲙⲉ ⲇⲉ ⲛϣⲉ ⲁⲩⲱ ⲁϥⲕⲁⲁⲩ ⲉⲃⲟⲗ . |
| s-300
| [..] ⲇⲉ ⲛⲧⲉⲣⲉϥⲁⲗⲉ ⲉⲡϫⲟⲉⲓ ⲙⲛⲛⲉϥⲙⲁⲑⲏⲧⲏⲥ ⲁϥⲉⲓ ⲉϩⲣⲁⲓ ⲉⲛⲥⲁ ⲛⲇⲁⲗⲙⲁⲛⲟⲩⲑⲁ . |
| s-301
| ⲁⲩⲉⲓ ⲉⲃⲟⲗ ⲛϭⲓⲛⲉⲫⲁⲣⲓⲥⲥⲁⲓⲟⲥ ⲁⲩⲁⲣⲭⲉⲓ ⲉϯⲧⲱⲛ ⲛⲙⲙⲁϥ ⲉⲩⲕⲱⲧⲉ ⲛⲥⲁⲟⲩⲙⲁⲉⲓⲛ ⲛⲧⲟⲟⲧϥ ⲉⲃⲟⲗ ϩⲛ ⲧⲡⲉ ⲉⲩⲡⲉⲓⲣⲁⲍⲉ ⲙⲙⲟϥ . |
| s-302
| ⲛⲧⲉⲣⲉϥⲁϣⲁϩⲟⲙ ϩⲙⲡⲉϥⲡⲛⲉⲩⲙⲁ ⲡⲉϫⲁϥ ϫⲉⲉⲧⲃⲉ ⲟⲩ ⲧⲉⲓⲅⲉⲛⲉⲁ ⲕⲱⲧⲉ ⲛⲥⲁⲟⲩⲙⲁⲉⲓⲛ ϩⲁⲙⲏⲛ ϯϫⲱ ⲙⲙⲟⲥ ⲛⲏⲧⲛ ϫⲉⲉϣⲱⲡⲉ ⲥⲉⲛⲁϯⲙⲁⲉⲓⲛ ⲛⲧⲉⲓⲅⲉⲛⲉⲁ . |