| s-303
| ⲉⲃⲟⲗ ϫⲉⲁⲧⲉⲧⲛⲕⲱ ⲛⲥⲱⲧⲛ ⲛⲧϩⲟⲧⲉ ⲙⲡⲛⲟⲩⲧⲉ · |
| s-304
| ⲉⲁⲧⲉⲧⲛⲙⲉⲣⲉⲡⲕⲁⲕⲉ ⲉϩⲟⲩⲉ ⲉⲡⲟⲩⲟⲉⲓⲛ · |
| s-305
| ⲉⲁⲧⲉⲧⲛⲉⲡⲡⲉⲧⲥⲁϣⲉ ⲇⲉ ⲟⲛ ϫⲉϥϩⲟⲗϭ · ⲁⲩⲱ ⲡⲉⲧϩⲟⲗϭ ϫⲉϥⲥⲁϣⲉ · |
| s-306
| ⲉⲧⲃⲉⲡⲁⲓ ⲟⲩⲟⲓ ⲛⲏⲧⲛ ⲙⲡⲟⲛⲏⲣⲟⲥ ϫⲉⲙⲡⲉⲧⲛⲣⲡⲙⲉⲉⲩⲉ ⲙⲡϩⲓⲥⲉ ⲧⲏⲣϥ ⲉⲛⲧⲁⲡⲉⲛⲉⲓⲱⲧ ϣⲟⲡϥ ⲛⲙⲙⲏⲧⲛ ⲧⲏⲣⲧⲛ · |
| s-307
| ⲉⲁⲧⲉⲧⲛⲕⲱ ⲛⲥⲱⲧⲛ ⲛⲛⲉϥⲥⲃⲟⲟⲩⲉ ⲛⲱⲛϩ ⲙⲛⲛⲁⲛⲥⲙⲙⲉ ⲛⲛⲉⲧⲛⲉⲓⲟⲧⲉ : |
| s-308
| ⲡⲗⲏⲛ ⲉⲓⲥⲛϩⲗⲗⲟ ⲉⲓ ⲙⲛⲛⲉⲛⲥⲛⲏⲩ ⲁⲩⲉⲓ ϣⲁⲣⲱⲧⲛ ⲛⲕⲉⲥⲟⲡ · |
| s-309
| ⲉⲛⲟⲛϩ ϩⲛⲟⲩⲛⲟϭ ⲛⲗⲩⲡⲏ ⲙⲛⲟⲩⲙⲕⲁϩ ⲛϩⲏⲧ ⲉⲛⲁϣⲱϥ · |
| s-310
| ⲉⲧⲣⲉⲩⲉⲓⲣⲉ ⲛⲧⲟⲩⲉⲓ ⲧⲟⲩⲉⲓ ⲙⲙⲱⲧⲛ ⲕⲁⲧⲁⲡⲉⲥⲙⲡϣⲁ · |
| s-311
| ⲉⲃⲟⲗ ϫⲉⲁⲧⲉⲧⲛⲕⲱ ⲛⲥⲱⲧⲛ ⲛⲧⲡⲏⲅⲏ ⲙⲙⲟⲟⲩ ⲛⲱⲛϩ · |
| s-312
| ⲉⲁⲧⲉⲧⲛϣⲓⲕⲉ ⲛⲏⲧⲛ ⲛϩⲉⲛϣⲏⲓ ⲉⲩⲟⲩⲟϭⲡ ϩⲙⲡⲧⲣⲉⲡⲉⲧⲛϩⲏⲧ ⲛⲁⲧⲥⲃⲱ ⲣⲕⲁⲕⲉ ⲉⲣⲱⲧⲛ · |
| s-313
| ⲉⲧⲉⲧⲛϫⲱ ⲙⲙⲟⲥ ϫⲉⲁⲛⲟⲛ ϩⲉⲛⲥⲁⲃⲉ · ⲁⲧⲉⲧⲛⲣⲥⲟϭ · |
| s-314
| ⲉⲁⲧⲉⲧⲛϣⲓⲃⲉ ⲙⲡⲉⲟⲟⲩ ⲙⲡⲛⲟⲩⲧⲉ ϩⲛϩⲉⲛϩⲃⲏⲩⲉ ⲉⲙⲉϣϣⲉ . |
| s-315
| ⲉⲧⲃⲉⲡⲁⲓ ⲁⲡⲛⲟⲩⲧⲉ ϯⲧⲏⲩⲧⲛ ⲉϩⲣⲁⲓ ⲉϩⲉⲛⲡⲁⲑⲟⲥ ⲉⲩⲥⲏϣ ⲉⲧⲉⲡϫⲓⲟⲩⲉ ⲡⲉ ⲙⲛⲡϫⲱϩⲙ ⲙⲛⲡⲟⲛⲏⲣⲟⲛ ⲛⲓⲙ · |
| s-316
| ⲛⲁⲓ ⲉⲧⲉⲣⲉⲧⲓⲙⲱⲣⲓⲁ ⲛⲓⲙ ϣⲟⲟⲡ ⲛⲛⲉⲧⲉⲓⲣⲉ ⲙⲙⲟⲟⲩ · ⲟⲩ ⲙⲟⲛⲟⲛ ϩⲙⲡⲉⲓⲁⲓⲱⲛ · ⲁⲗⲗⲁ ϩⲙⲡⲕⲉⲟⲩⲁ : |
| s-317
| ⲕⲟⲥⲙⲟⲥ ⲉⲛⲙⲟⲟϣⲉ ϩⲛⲛϫⲱϩⲙ ⲙⲛⲛϯϩⲉ · ⲙⲛⲛϫⲏⲣ · ⲙⲛⲛⲥⲱ · ⲙⲛⲙⲙⲛⲧⲣⲉϥϣⲙϣⲉⲉⲓⲇⲱⲗⲟⲛ ⲉⲧϫⲁϩⲙ · |
| s-318
| ⲉⲛⲙⲟⲟϣⲉ ϩⲛⲟⲩⲕⲁⲕⲓⲁ ⲙⲛⲟⲩⲫⲑⲟⲛⲟⲥ · ⲉⲛⲟ ⲙⲙⲉⲥⲧⲉ ⲉⲛⲙⲟⲥⲧⲉ ⲛⲛⲉⲛⲉⲣⲏⲩ · |
| s-319
| ⲉⲛⲟ ⲛⲁⲧⲥⲱⲧⲙ · ⲉⲛⲡⲗⲁⲛⲁ · |
| s-320
| ⲉⲛⲙⲟⲟϣⲉ ϩⲙⲡⲡⲉⲧϣⲟⲩⲉⲓⲧ ⲙⲡⲉⲛϩⲏⲧ · ⲉⲛⲟ ⲛⲕⲁⲕⲉ ϩⲛⲛⲉⲛⲙⲉⲉⲩⲉ · |
| s-321
| ⲉⲛⲟ ⲛⲁⲗⲗⲟⲧⲣⲓⲟⲥ ⲉⲡⲱⲛϩ ⲙⲡⲛⲟⲩⲧⲉ , ⲉⲧⲃⲉⲧⲙⲛⲧⲁⲧⲥⲟⲟⲩⲛ ⲉⲧϣⲟⲟⲡ ⲛϩⲏⲧⲛ ⲉⲧⲃⲉⲡⲉⲛⲧⲱⲛ ⲛϩⲏⲧ · |
| s-322
| ⲉⲁⲛⲧⲁⲁⲛ ⲙⲙⲓⲛⲙⲙⲟⲛ ⲙⲡϫⲱϩⲙ ⲙⲛⲡⲣϩⲱⲃ ⲉⲁⲕⲁⲑⲁⲣⲥⲓⲁ ⲛⲓⲙ · |
| s-323
| ⲧⲉⲛⲟⲩ ⲇⲉ ⲛⲧⲁⲩⲧⲥⲁⲃⲟⲛ ⲁⲛ ⲛⲧⲉⲓϩⲉ · |
| s-324
| ⲁⲗⲗⲁ ⲉⲛⲧⲁⲩϯⲥⲃⲱ ⲛⲁⲛ ϫⲉϩⲛⲟⲩϩⲟⲧⲉ ⲙⲛⲟⲩⲥⲧⲱⲧ ⲁⲣⲓϩⲱⲃ ⲉⲡⲉⲧⲛⲟⲩϫⲁⲓ . |
| s-325
| ⲡⲛⲟⲩⲧⲉ ⲅⲁⲣ ⲡⲉⲧⲉⲛⲉⲣⲅⲉⲓ ⲛϩⲏⲧⲧⲏⲩⲧⲛ ⲙⲡⲟⲩⲱϣ ⲙⲛⲡϫⲱⲕ ⲉⲃⲟⲗ ⲙⲡⲟⲩⲱϣ · |
| s-326
| ⲕⲁⲓ ⲅⲁⲣ ⲛϣⲏⲣⲉ ⲙⲡⲓⲥⲣⲁⲏⲗ ⲙⲡⲓⲟⲩⲟⲉⲓϣ ⲁⲙⲱⲩⲥⲏⲥ ⲛⲁⲩ ⲉⲣⲟⲟⲩ ⲛⲧϩⲉ ⲉⲧⲟⲩϭⲉⲡⲏ ⲉⲣⲡⲱⲃϣ ⲛⲛⲉⲛⲧⲟⲗⲏ ⲙⲡⲛⲟⲩⲧⲉ |
| s-327
| ⲁϥⲟⲩⲉϩⲥⲁϩⲛⲉ ⲛⲁⲩ ⲉⲧⲣⲉⲩⲧⲁⲙⲓⲟ ⲛϩⲉⲛⲧⲱⲱⲧⲉ ⲉϫⲛⲛⲧⲛϩ ⲛⲛⲉⲩϩⲟⲉⲓⲧⲉ , ϫⲉⲕⲁⲥ ⲉⲩⲛⲁⲛⲁⲩ ⲉⲣⲟⲟⲩ ⲛⲥⲉⲣⲡⲙⲉⲉⲩⲉ ⲛⲛⲉⲛⲧⲟⲗⲏ ⲙⲡⲛⲟⲩⲧⲉ ⲛⲥⲉⲧⲙⲣⲡⲉⲩⲱⲃϣ : |
| s-328
| ⲁⲛⲟⲛ ⲇⲉ ϩⲱⲱⲛ ⲙⲁⲣⲛⲕⲱ ⲛⲁⲛ ⲛⲧϩⲟⲧⲉ ⲙⲡⲛⲟⲩⲧⲉ ϩⲙⲡⲉⲛϩⲏⲧ ⲉⲡⲙⲁ ⲛⲛⲧⲱⲧⲉ . ϫⲉⲕⲁⲥ ⲛⲛⲉⲛⲣⲡⲱⲃϣ ⲛⲛⲉⲛⲧⲟⲗⲏ ⲉⲛⲧⲁⲛⲉⲛⲉⲓⲟⲧⲉ ⲧⲁⲁⲩ ⲉⲧⲟⲟⲧⲛ : |
| s-329
| ⲉⲧⲃⲉⲡⲁⲓ ϭⲉ ⲛⲉⲥⲛⲏⲩ ⲙⲁⲣⲛⲕⲧⲟⲛ ⲛⲧⲛⲙⲉⲧⲁⲛⲟⲉⲓ ⲉⲙⲡⲁⲧⲉⲡⲕⲁⲓⲣⲟⲥ ⲱϫⲛ ⲛⲧⲟⲟⲧ ⲛ . ⲁⲩⲱ ϩⲱⲥ ⲉⲣⲉⲡⲟⲩⲟⲉⲓⲛ ϣⲟⲟⲡ ⲛⲙⲙⲁⲛ ⲉⲧⲉⲛⲉⲥⲃⲟⲟⲩⲉ ⲛⲉ ⲛⲛⲉⲛⲉⲓⲟⲧⲉ . |
| s-330
| ⲛⲧϩⲉ ⲉⲛⲧⲁⲡϫⲟⲉⲓⲥ ϫⲟⲟⲥ ϫⲉⲙⲟⲟϣⲉ ϩⲟⲥⲟⲛ ⲉⲟⲩⲛⲧⲏⲧⲛ ⲡⲟⲩⲟⲉⲓⲛ · ϫⲉⲛⲛⲉⲡⲕⲁⲕⲉ ⲧⲁϩⲉⲧⲏⲩⲧⲛ · : |
| s-331
| ⲁⲩⲱ ϫⲉϩⲱⲥ ⲉⲛϩⲙⲡⲉϩⲟⲟⲩ , ⲙⲁⲣⲛⲙⲟⲟϣⲉ ⲉⲛⲧⲥⲁⲛⲏⲩ · |
| s-332
| ⲁⲩⲱ ϫⲉⲛⲉⲧⲛⲕⲟⲧⲕ ⲅⲁⲣ . ⲉⲩⲛⲕⲟⲧⲕ ⲛⲧⲉⲩϣⲏ · |
| s-333
| ⲁⲩⲱ ⲛⲉⲧⲧⲁϩⲉ . ⲉⲩⲧⲁϩⲉ ⲛⲧⲉⲩϣⲏ · |
| s-334
| ⲁⲛⲟⲛ ⲇⲉ ⲁⲛⲟⲛ ⲛⲁⲡⲉϩⲟⲟⲩ ⲙⲁⲣⲛⲛⲏⲫⲉ · ⲉⲁⲛϯ ϩⲓⲱⲱⲛ ⲙⲡϩⲱⲕ ⲛⲧⲡⲓⲥⲧⲓⲥ |
| s-335
| ⲡⲃⲓⲟⲥ ⲁⲩⲱ ⲧⲡⲟⲗⲓⲧⲉⲓⲁ ⲙⲡⲉⲛⲡⲉⲧⲟⲩⲁⲁⲃ ⲛⲉⲓⲱⲧ ⲉⲧⲧⲁⲓⲏⲩ ⲕⲁⲧⲁⲥⲙⲟⲧ ⲛⲓⲙ ⲡϩⲁⲅⲓⲟⲥ ⲁⲡⲁ ⲕⲩⲣⲟⲥ · ⲡⲧⲉⲗⲓⲟⲥ ⲛⲁⲙⲉ ⲛⲧⲁϥϩⲓⲥⲧⲟⲣⲓⲍⲉ ⲙⲙⲟϥ · ⲛϭⲓⲁⲡⲁ ⲡⲁⲙⲃⲱ ⲡⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ ⲛϣⲓⲏⲧ ⲛⲧⲁϥⲙⲧⲟⲛ ⲙⲙⲟϥ ⲛϭⲓⲡⲉⲧⲟⲩⲁⲁⲃ · ⲁⲡⲁ ⲕⲩⲣⲟⲥ ϩⲛⲥⲟⲩϣⲙⲟⲩⲛ ⲙⲡⲉⲃⲟⲧ ⲉⲡⲏⲡ ϩⲛⲟⲩⲉⲓⲣⲏⲛⲏ ⲛⲧⲉⲡⲛⲟⲩⲧⲉ · |
| s-336
| ⲉⲣⲉⲛⲉϥⲥⲙⲟⲩ ⲉⲧⲟⲩⲁⲁⲃ ⲛⲁⲉⲓ ⲉϩⲣⲁⲓ ⲉϫⲱⲛ ⲛⲧⲛⲟⲩϫⲁⲓ ϩⲁⲙⲏⲛ ⁛ — |
| s-337
| ⲁⲥϣⲱⲡⲉ ⲇⲉ ⲙⲡⲉⲟⲩⲟⲉⲓϣ ⲛⲁⲡⲁ ⲡⲁⲙⲃⲱ ⲡⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ ⲛϣⲓⲏⲧ · ⲙⲛⲛⲥⲁⲧⲣⲉϥⲥⲕⲉⲡⲁⲍⲉ ⲙⲡⲥⲱⲙⲁ ⲛⲧⲙⲁⲕⲁⲣⲓⲁ ϩⲓⲗⲗⲁⲣⲓⲁ ⲧϣⲉⲉⲣⲉ ⲙⲡⲣⲣⲟ ⲍⲏⲛⲱⲛ · |
| s-338
| ⲁⲩϩⲟⲣⲟⲙⲁ ϭⲱⲗⲡ ⲛⲁϥ ⲉⲃⲟⲗ · ϫⲉⲧⲱⲟⲩⲛ ⲛⲅⲙⲟⲟϣⲉ ⲉϩⲟⲩⲛ ϩⲙⲡⲥⲁ ⲙⲡⲱⲕⲉⲁⲛⲟⲥ · |
| s-339
| ⲕⲛⲁϭⲓⲛⲉ ⲛⲟⲩⲛⲟϭ ⲛⲁⲛⲁⲭⲱⲣⲏⲧⲏⲥ ⲡⲁⲓ ⲉⲧⲉⲙⲡⲕⲟⲥⲙⲟⲥ ⲧⲏⲣϥ ⲙⲡϣⲁ ⲁⲛ ⲛⲟⲩⲥϣ ⲛⲧⲁϭⲥⲉ ⲛⲟⲩⲱⲧ ⲛⲧⲉⲛⲉϥⲟⲩⲉⲣⲏⲧⲉ · |
| s-340
| ⲛⲧⲟϥ ⲇⲉ ⲡⲙⲁⲕⲁⲣⲓⲟⲥ ⲁⲡⲁ ⲡⲁⲙⲃⲱ · ⲁϥⲧⲱⲟⲩⲛ ⲁϥⲙⲟⲟϣⲉ ⲉϩⲟⲩⲛ ϩⲙⲡⲧⲟⲟⲩ ϩⲓⲧⲛⲧϭⲟⲙ ⲙⲡⲛⲟⲩⲧⲉ ⲉⲧϣⲟⲟⲡ ⲛⲙⲙⲁϥ ⲛⲧϩⲉ ⲙⲡⲙⲁⲕⲁⲣⲓⲟⲥ ⲁⲛⲧⲱⲛⲓⲟⲥ · ϩⲙⲡⲉⲟⲩⲟⲉⲓϣ ⲛⲧⲁϥⲙⲟⲟϣⲉ ⲁϥⲃⲱⲕ ϣⲁⲡⲙⲁⲕⲁⲣⲓⲟⲥ ⲁⲡⲁ ⲡⲁⲩⲗⲟⲥ ⲡⲙⲉϩⲥⲛⲁⲩ · |
| s-341
| ⲛⲧⲟϥ ⲇⲉ ⲡⲙⲁⲕⲁⲣⲓⲟⲥ ⲁⲡⲁ ⲡⲁⲙⲃⲱ ⲡⲉⲡⲣⲉⲥⲃⲩⲧⲉⲣⲟⲥ ⲁϥⲧⲱⲟⲩⲛ ⲁϥⲙⲟⲟϣⲉ ⲉϩⲟⲩⲛ ϩⲙⲡϫⲁⲓⲉ · |
| s-342
| ⲁϥⲉⲓ ⲉϩⲣⲁⲓ ⲉϫⲛⲟⲩⲕⲁⲧⲁⲅⲁⲓⲟⲛ · |
| s-343
| ⲁϥⲁϩⲉⲣⲁⲧϥ ⲁϥⲕⲱⲗϩ ⲉϩⲟⲩⲛ ⲉⲡⲣⲟ ⲛⲁⲧϣⲁⲩ ⲛⲟⲩⲟⲩⲛⲟⲩ |
| s-344
| ⲁϥⲙⲟⲩⲧⲉ ⲛϣⲟⲙⲛⲧ ⲛⲥⲟⲡ · ⲕⲁⲧⲁⲡⲕⲁⲛⲱⲛ ⲛⲛⲉⲥⲛⲏⲩ ⲙⲙⲟⲛⲁⲭⲟⲥ · ⲉϥϫⲱ ⲙⲙⲟⲥ ϫⲉⲥⲙⲟⲩ ⲉⲣⲟⲓ · |
| s-345
| ⲁⲩⲱ ⲉⲧⲓ ⲉⲓⲁϩⲉⲣⲁⲧ ϩⲓⲡⲣⲟ ⲁⲛⲟⲕ ⲡⲁⲙⲃⲱ · ⲁⲡⲥⲟⲛ ⲣⲟⲩⲱ ⲛⲁⲓ ϩⲙⲡⲥⲁ ⲛϩⲟⲩⲛ ⲉϥϫⲱ ⲙⲙⲟⲥ ϫⲉⲭⲁⲓⲣⲉ ⲡⲁⲙⲃⲱ ⲡⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ ⲛϣⲓⲏⲧ ⲡⲛⲟϭ ⲛϫⲟⲓ ⲉⲧⲣϩⲱⲧ ϩⲙⲡϫⲁⲓⲉ ⲛⲁⲧⲙⲟⲟⲩ · |
| s-346
| ⲉⲓⲥⲛⲟϭ ⲅⲁⲣ ⲛⲟⲩⲟⲉⲓϣ ϯⲉⲡⲓⲑⲩⲙⲉⲓ ⲉⲛⲁⲩ ⲉⲣⲟⲕ · |
| s-347
| ⲉⲓⲥ ⲡⲁⲟⲩⲱϣ ⲁⲡⲛⲟⲩⲧⲉ ϫⲟⲕϥ ⲛⲁⲓ ⲉⲃⲟⲗ · ⲙⲡⲟⲟⲩ · |
| s-348
| ⲁⲙⲟⲩ ⲉϩⲟⲩⲛ ⲡⲣⲱⲙⲉ ⲉⲧⲥⲙⲁⲙⲁⲁⲧ ⁛ — |
| s-349
| ⲁϥⲟⲩⲱϣⲃ ⲛϭⲓⲁⲡⲁ ⲡⲁⲙⲃⲱ · ⲉϥϫⲱ ⲙⲙⲟⲥ ϫⲉⲭⲁⲓⲣⲉ · ⲁⲡⲁ ϩⲓⲉⲣⲁⲝ · ⲡⲉⲛⲧⲁϥⲣϣⲃⲏⲣ ⲉⲛⲁⲅⲅⲉⲗⲟⲥ ⲙⲡⲛⲟⲩⲧⲉ ⲉⲧⲃⲉⲡⲉϥⲧⲃⲃⲟ · |
| s-350
| ⲛⲧⲟϥ ⲇⲉ ⲟⲛ ⲁⲡⲁ ϩⲓⲉⲣⲁⲝ ⲁϥⲟⲩⲱⲛ ⲙⲡⲣⲟ · ⲁϥϫⲓⲧϥ · ⲉϩⲟⲩⲛ ⲁⲩϩⲙⲟⲟⲥ ⲙⲛⲛⲉⲩⲉⲣⲏⲩ · |
| s-351
| ⲡⲉϫⲁϥ ⲛⲁϥ ⲛϭⲓⲁⲡⲁ ⲡⲁⲙⲃⲱ ϫⲉⲡⲁⲙⲉⲣⲓⲧ ⲛⲥⲟⲛ ⲁⲡⲁ ϩⲓⲉⲣⲁⲝ · ⲉⲓⲥ ⲁⲟⲩⲏⲣ ⲛⲣⲟⲙⲡⲉ · ϫⲓⲛⲛⲧⲁⲕⲉⲓ ⲉϩⲟⲩⲛ ⲉⲡⲉⲓⲙⲁ · |
| s-352
| ⲡⲉϫⲁϥ ϫⲉⲉⲓⲥⲙⲛⲧϣⲙⲏⲛ ⲛⲣⲟⲙⲡⲉ ϯ ⲙⲡⲉⲓⲙⲁ · ⲁⲩⲱ ⲙⲡⲓⲟⲩⲉⲙⲗⲁⲁⲩ ⲛⲧⲣⲟⲫⲏ ⲉⲡⲁⲡⲉⲓⲕⲟⲥⲙⲟⲥ ⲡⲉ ⲁⲗⲗⲁ ⲉⲓⲟⲛϩ ⲛⲕⲁⲣⲡⲟⲥ ⲛⲛϣⲏⲛ · |
| s-353
| ⲛⲉⲩⲛⲟⲩⲃⲛⲛⲉ · ⲇⲉ ⲣⲏⲧ · ⲛⲥⲁⲃⲟⲗ ⲙⲡⲉϥⲙⲁ ⲛϣⲱⲡⲉ · ⲉⲥⲧⲁⲩⲟ ⲉⲃⲟⲗ ⲙⲙⲛⲧⲥⲛⲟⲟⲩⲥ ⲛⲗⲟⲟⲩ ⲟⲩⲗⲟⲟⲩ ⲕⲁⲧⲁⲉⲃⲟⲧ · |
| s-354
| ⲉϥⲟⲛϩ ⲉⲡⲉⲥⲕⲁⲣⲡⲟⲥ · |
| s-355
| ⲁⲛⲟⲕ ⲇⲉ ⲡⲁⲙⲃⲱ ⲡⲉϫⲁⲓ ⲛⲁϥ ϫⲉⲡⲁⲙⲉⲣⲓⲧ ⲛⲉⲓⲱⲧ ⲁⲣⲁ ⲟⲩⲛⲥⲟⲛ ⲙⲡⲉⲕϩⲟⲩⲛ · |
| s-356
| ⲡⲉϫⲁϥ ⲛⲁⲓ ϫⲉⲟⲩⲛⲟⲩⲟⲛ |
| s-357
| ⲥⲙⲟⲩ ⲉⲣⲟⲓ ⲛⲅⲃⲱⲕ ϣⲁⲣⲟⲟⲩ · ⲛⲅϫⲓⲥⲙⲟⲩ ⲉⲃⲟⲗ ϩⲓⲧⲟⲟⲧⲟⲩ · |
| s-358
| ⲛⲧⲉⲣⲓⲙⲟⲟϣⲉ ⲉⲃⲟⲗ ϩⲓⲧⲟⲟⲧϥ ⲉϩⲟⲩⲛ ϩⲙⲡⲧⲟⲟⲩ ⲁⲓⲉⲓ ⲉϩⲣⲁⲓ ⲉϫⲛⲟⲩⲕⲟⲩⲓ ⲛⲕⲁⲧⲁⲅⲉⲓⲟⲛ · |
| s-359
| ⲁⲓⲙⲟⲩⲧⲉ ⲉϩⲟⲩⲛ ⲕⲁⲧⲁⲡⲕⲁⲛⲱⲛ ⲛⲛⲉⲥⲛⲏⲩ ⲙⲙⲟⲛⲁⲭⲟⲥ · |
| s-360
| ⲉⲧⲓ ⲉⲓⲁϩⲉⲣⲁⲧ ϩⲓⲡⲥⲁ ⲛⲃⲟⲗ ⲁⲡⲥⲟⲛ ⲣⲟⲩⲱ ⲛⲁⲓ ϩⲙⲡⲥⲁ ⲛϩⲟⲩⲛ ⲉϥϫⲱ ⲙⲙⲟⲥ · ϫⲉⲭⲁⲓⲣⲉ ⲁⲡⲁ ⲡⲁⲙⲃⲱ · ⲡⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ · ⲛϣⲓⲏⲧ · ⲁⲩⲱ ⲡⲛⲟϭ ⲛϫⲟⲓ ⲉⲧⲣϩⲱⲧ ϩⲙⲡϫⲁⲓⲉ ⲛⲁⲧⲙⲟⲟⲩ · |
| s-361
| ⲉⲓⲥⲟⲩⲙⲏⲏϣⲉ ⲛϩⲟⲟⲩ ϯⲉⲡⲓⲑⲩⲙⲉⲓ ⲉⲛⲁⲩ ⲉⲣⲟⲕ · |
| s-362
| ⲗⲟⲓⲡⲟⲛ ⲁⲡϫⲟⲉⲓⲥ ϫⲱⲕ ⲉⲃⲟⲗ ⲙⲡⲁⲟⲩⲱϣ ⲛⲁⲓ ⲙⲡⲟⲟⲩ · |
| s-363
| ⲁⲙⲟⲩ ⲉϩⲟⲩⲛ ⲙⲡⲣⲁϩⲉⲣⲁⲧⲕ ϩⲓⲡⲥⲁ ⲛⲃⲟⲗ · |
| s-364
| ⲁⲓⲟⲩⲱϣⲃ ⲛⲁϥ · ⲁⲛⲟⲕ ⲡⲁⲙⲃⲱ ϫⲉⲡⲁⲙⲉⲣⲓⲧ ⲛⲉⲓⲱⲧ ⲁⲡⲁ ⲡⲁⲙⲟⲩⲛ · ⲡⲁⲙⲡⲟⲣⲕ ⲕⲩⲣⲓⲟⲥ ⲭⲁⲓⲣⲉ ⲡⲁⲙⲉⲣⲓⲧ ⲛⲥⲟⲛ ⲡⲁⲧⲉϣⲧⲏⲛ ⲛⲁⲩⲁⲛ ⲁⲩⲁⲛ ⲛⲧϩⲉ ⲛⲧⲉϣⲧⲏⲛ · ⲛⲓⲱⲥⲏⲫ ⲡⲇⲓⲕⲁⲓⲟⲥ · |
| s-365
| ⲛⲛⲁϩⲣⲙⲡⲛⲟⲩⲧⲉ ⲇⲉ ⲥⲧⲁⲓⲏⲩ ⲛϩⲟⲩⲟ ⲉⲡⲟⲣⲫⲩⲣⲁ ⲛⲓⲙ ⲛⲣⲣⲟ ⲛⲧⲉⲡⲉⲓⲕⲟⲥⲙⲟⲥ · |
| s-366
| ⲡⲓⲥⲧⲉⲩⲉ ⲛⲁⲓ ⲛⲁⲥⲛⲏⲩ ⲁⲩⲱ ⲛⲁⲉⲓⲟⲧⲉ · ⲁⲛⲟⲕ ⲡⲁⲙⲃⲱ ⲡⲉⲓⲉⲗⲁⲭⲓⲥⲧⲟⲥ ⲁⲓϣⲱⲗⲙ ⲙⲡⲉⲥϯⲛⲟⲩϥⲉ ⲙⲡⲥⲟⲛ ⲉⲧⲙⲙⲁⲩ ⲛⲁⲟⲩⲙⲓⲗⲓⲟⲛ ⲙⲡⲁⲧⲓⲡⲱϩ ⲉⲣⲟϥ · |
| s-367
| ⲛⲧⲉⲣⲛⲁⲥⲡⲁⲍⲉ ⲇⲉ ⲛⲛⲉⲛⲉⲣⲏⲩ ⲁⲛϣⲗⲏⲗ ⲁⲛϩⲙⲟⲟⲥ |
| s-368
| ⲡⲉϫⲁⲓ ⲛⲁϥ ϫⲉⲡⲁⲉⲓⲱⲧ ⲉⲓⲉ ⲙⲉⲕⲱϭⲃ ⲛⲧⲉⲡⲣⲱ · ⲟⲩⲇⲉ ⲙⲉⲕⲥⲱϣⲙ ϩⲙⲡϣⲱⲙ ⲉⲕⲫⲟⲣⲉⲓ · ⲛⲧⲉϣⲧⲏⲛ ⲛⲧⲉⲓⲙⲓⲛⲉ · |
| s-369
| ⲡⲉϫⲁϥ ⲛⲁⲓ ⲛϭⲓⲁⲡⲁ ⲡⲁⲙⲟⲩⲛ · ⲡⲁⲙⲡⲟⲣⲕ ⲉⲃⲟⲗ ϫⲉⲡⲁⲓ ⲙⲙⲁⲧⲉ · ⲡⲉ ⲡⲉϥⲣⲁⲛ · ϫⲉⲡⲁⲙⲉⲣⲓⲧ ⲛⲥⲟⲛ ⲁⲡⲁ ⲡⲁⲙⲃⲱ · ⲡⲓⲥⲧⲉⲩⲉ ⲛⲁⲓ ⲱ ⲡⲁⲙⲉⲣⲓⲧ ⲛⲉⲓⲱⲧ ϫⲉⲉⲓⲥϫⲟⲩⲱⲧⲉ ⲛⲣⲟⲙⲡⲉ · ϫⲓⲛⲛⲧⲁⲓⲉⲓ ⲉⲡⲉⲓⲙⲁ ⲧⲉⲓϩⲃⲥⲱ ⲛⲟⲩⲱⲧ ⲧⲉⲧⲓϭⲓⲛⲉ ⲛⲧⲁϩⲙⲙⲉ ⲛϩⲏⲧⲥ · ⲛⲧⲉⲡⲣⲱ · ⲁⲩⲱ ⲧⲕⲉⲕⲣⲁⲥⲓⲥ ⲙⲡⲁⲏⲣ ⲙⲡϣⲱⲙ · |
| s-370
| ⲁⲩⲱ ϯϩⲟⲙⲟⲗⲟⲅⲉⲓ ⲛⲁⲕ · ϫⲉⲧⲁⲓ ⲣⲱϣⲉ ⲉⲣⲟⲓ ϣⲁⲡⲉϩⲟⲟⲩ ⲙⲡⲁⲙⲟⲩ · |
| s-371
| ⲁⲩⲱ ϩⲙⲡⲁⲕⲉⲙⲟⲩ ⲟⲛ ⲥⲣⲱϣⲉ ⲉⲣⲟⲓ ⲛⲥⲉⲥⲟⲩⲗⲟⲩⲱⲗⲧ ⲙⲙⲟⲥ ϣⲁⲡⲉϩⲟⲟⲩ ⲙⲡϩⲁⲡ ⲙⲙⲉ · |
| s-372
| ⲡⲉϫⲁⲓ ⲛⲁϥ ϫⲉⲡⲁⲙⲉⲣⲓⲧ ⲛⲉⲓⲱⲧ ϫⲉⲁⲣⲁ ⲟⲩⲛⲥⲟⲛ ⲙⲡⲉⲕⲥⲁ ⲛϩⲟⲩⲛ · |
| s-373
| ⲡⲉϫⲁϥ ⲛⲁⲓ ϫⲉⲥⲉ ⲟⲩⲛⲟⲩⲁ ⲙⲙⲁⲩ · ⲉⲣⲉⲡⲕⲟⲥⲙⲟⲥ ⲧⲏⲣϥ ⲙⲡϣⲁ ⲁⲛ ⲛⲟⲩⲥϣⲛⲧⲁϭⲥⲉ ⲛⲟⲩⲱⲧ · ⲛⲧⲉⲛⲉϥⲟⲩⲣⲏⲏⲧⲉ · |
| s-374
| ⲁⲓⲃⲱⲕ ϣⲁⲣⲟϥ ⲛϩⲁϩ ⲛⲥⲟⲡ ⲉⲓⲟⲩⲱϣ ⲉϭⲙⲡϣⲓⲛⲉ · |
| s-375
| ⲁⲩⲱ ⲛⲉϣⲁϥⲣⲟⲩⲱ ⲛⲁⲓ ϩⲙⲡⲥⲁ ⲛϩⲟⲩⲛ ⲉϥϫⲱ ⲙⲙⲟⲥ · ϫⲉⲁⲗⲟⲕ ⲉⲕϯϩⲓⲥⲉ ⲛⲁⲕ ⲉⲕⲛⲏⲩ · ⲉⲡⲉⲓⲙⲁ |
| s-376
| ⲉⲡⲉⲓ ⲙⲛϭⲟⲙ ⲛⲣⲙⲛⲥⲁⲣⲝ ⲉⲛⲁⲩ ⲉⲡⲁϩⲟ · ⲉⲓⲙⲏⲧⲓ ⲡⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ · ⲛϣⲓⲏⲧ · |
| s-377
| ⲧⲉⲛⲟⲩ ⲇⲉ ⲙⲉϣⲁⲕ ⲱ ⲡⲁⲉⲓⲱⲧ ⲡⲧⲱϣ ⲡⲉ ⲡⲁⲓ ⲉⲧⲣⲁⲉⲓ ⲛⲙⲙⲁⲕ ⲛⲧⲁⲛⲁⲩ ⲉⲣⲟϥ ⲁⲩⲱ ⲛⲧⲁϫⲓⲥⲙⲟⲩ ⲉⲃⲟⲗ ϩⲓⲧⲟⲟⲧϥ ⲙⲡⲁⲧⲓⲙⲟⲩ ⁛ — |
| s-378
| ⲡⲉϫⲁⲓ ⲛⲁϥ · ϫⲉⲙⲙⲟⲛ · ⲡⲧⲱϣ ⲁⲛ ⲡⲉ ⲡⲁⲓ · ⲉⲧⲃⲉⲡⲁⲓ ⲣⲱ · ⲛⲧⲁⲓⲉⲓ ϣⲁⲣⲟⲕ ⲉⲡⲉⲓⲙⲁ · |
| s-379
| ⲁⲗⲗⲁ ϯⲛⲁⲣⲡⲉⲕⲙⲉⲉⲩⲉ ⲉⲣϣⲁⲛⲡϫⲟⲉⲓⲥ ⲥⲟⲟⲩⲧⲛ ⲛⲧⲁϩⲓⲏ ⲛⲧⲁⲁⲡⲁⲛⲧⲁ · ⲉⲡⲥⲟⲛ ⲉⲧⲙⲙⲁⲩ · |
| s-380
| ⲡⲗⲏⲛ ⲱ ⲡⲁⲉⲓⲱⲧ ⲁⲣⲓⲡⲁⲙⲉⲉⲩⲉ ϣⲁⲛⲧⲓⲁⲡⲟⲗⲁⲩⲉ ⲙⲡⲉⲥⲙⲟⲩ ⲙⲡⲥⲟⲛ ⲉⲧⲙⲙⲁⲩ · |
| s-381
| ⲛⲧⲉⲣⲓⲙⲟⲟϣⲉ ⲉϩⲟⲩⲛ ϩⲙⲡⲧⲟⲟⲩ ⲡⲁⲣⲁⲟⲩⲙⲓⲗⲓⲟⲛ · ϯⲱⲣⲕ ⲛⲏⲧⲛ ⲙⲡⲃⲏⲙⲁ · ⲉⲧϩⲁϩⲟⲧⲉ · ⲙⲡⲛⲟⲩⲧⲉ · ⲁⲛⲟⲕ ⲡⲁⲙⲃⲱ ⲡⲉⲓⲉⲗⲁⲭⲓⲥⲧⲟⲥ · ϫⲉⲛϯϫⲓϭⲟⲗ ⲁⲛ ϩⲙⲡⲉⲧⲓⲛⲁϫⲟⲟϥ · ⲧⲉⲛⲟⲩ ϫⲉⲡⲉⲛⲧⲁϥⲁⲙⲁϩⲧⲉ ⲛⲁⲃⲃⲁⲕⲟⲩⲙ ⲡⲉⲡⲣⲟⲫⲏⲧⲏⲥ ⲙⲡⲉⲟⲩⲟⲉⲓϣ ⲁϥⲉⲓⲛⲉ ⲙⲙⲟϥ ⲙⲛⲡⲁⲣⲓⲥⲧⲟⲛ ⲉⲧⲛⲧⲟⲟⲧϥ · ⲁϥⲛⲧϥ ⲉϫⲙⲡϣⲏⲓ ⲛⲙⲙⲟⲩⲓ · ⲁϥⲧⲁⲁϥ ⲛⲇⲁⲛⲓⲏⲗ · ϩⲙⲡϣⲏⲓ ⲛⲙⲙⲟⲩⲓ · ⲛⲧⲟϥ ⲟⲛ ⲡⲉⲛⲧⲁϥⲁⲙⲁϩⲧⲉ ⲙⲙⲟⲓ ϩⲛⲧϩⲟⲣⲙⲏ ⲙⲡⲉⲡⲛⲉⲩⲙⲁ ⲁϥⲉⲓⲛⲉ ⲙⲙⲟⲓ ⲉϫⲙⲡⲕⲁⲧⲁⲅⲉⲓⲟⲛ ⲙⲡⲥⲟⲛ ⲉⲧⲙⲙⲁⲩ · |
| s-382
| ⲁⲩⲱ ⲁⲓⲕⲱⲗϩ ⲉⲡⲣⲟ ⲕⲁⲧⲁⲡⲕⲁⲛⲱⲛ ⲛⲛⲉⲥⲛⲏⲩ ⲙⲙⲟⲛⲁⲭⲟⲥ · ⲁⲩⲱ ⲛⲉⲓⲁϩⲉⲣⲁⲧ ϩⲓⲣⲙⲡⲣⲟ · ⲛⲟⲩⲛⲟϭ ⲛⲛⲁⲩ |
| s-383
| ⲙⲛⲛⲥⲁⲛⲁⲓ ⲁⲡⲥⲟⲛ ⲣⲟⲩⲱ ⲛⲁⲓ ϩⲙⲡⲥⲁ ⲛϩⲟⲩⲛ · ⲉϥϫⲱ ⲙⲙⲟⲥ · ϫⲉⲭⲁⲓⲣⲉ ⲁⲡⲁ ⲡⲁⲙⲃⲱ ⲡⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ · ⲛϣⲓⲏⲧ ⲁⲩⲱ ⲡⲛⲟϭ ⲛϫⲟⲓ ⲉⲧⲣϩⲱⲧ ϩⲙⲡϫⲁⲓⲉ ⲛⲁⲧⲙⲟⲟⲩ · |
| s-384
| ⲉⲓⲥⲟⲩⲙⲏⲏϣⲉ ⲛϩⲟⲟⲩ ϯⲉⲡⲓⲑⲩⲙⲉⲓ ⲉⲛⲁⲩ ⲉⲣⲟⲕ · |
| s-385
| ⲉⲓⲥ ⲡⲁⲟⲩⲱϣ ⲁⲡⲛⲟⲩⲧⲉ ϫⲟⲕϥ ⲛⲁⲓ ⲉⲃⲟⲗ ⲙⲡϩⲟⲟⲩ · |
| s-386
| ⲁⲙⲟⲩ ⲉϩⲟⲩⲛ ⲙⲡⲣⲁϩⲉⲣⲁⲧⲕ ϩⲓⲡⲥⲁ ⲛⲃⲟⲗ · |
| s-387
| ⲛⲧⲉⲣⲓⲣⲡϩⲟⲩⲛ ⲙⲡⲣⲟ ⲙⲡⲕⲁⲧⲁⲅⲉⲓⲟⲛ ⲁⲓϭⲱϣⲧ ⲁⲓⲛⲁⲩ ⲉⲩⲛⲟϭ ⲛⲱⲛⲉ ⲙⲟⲅⲓⲥ · ⲛⲧⲉⲙⲛⲧⲥⲛⲟⲟⲩⲥ ⲛⲣⲱⲙⲉ ⲉϣⲧⲱⲟⲩⲛ ⲙⲙⲟϥ ⲉⲡⲟⲛϥ · |
| s-388
| ⲁϥϯⲡⲉϥⲟⲩⲟⲓ ⲛϭⲓⲡⲥⲟⲛ ⲉⲧⲙⲙⲁⲩ ⲁϥⲥⲕⲟⲣⲕⲣ ⲙⲡⲱⲛⲉ · ⲁϥⲧⲟϭϥ ⲉⲡⲣⲟ ⲙⲡⲕⲁⲧⲁⲅⲉⲓⲟⲛ · |
| s-389
| ⲛⲧⲉⲣⲓⲛⲁⲩ ⲉⲣⲟϥ ⲁⲓⲣϣⲡⲏⲏⲣⲉ ⲉⲙⲁⲧⲉ · |
| s-390
| ⲡⲗⲏⲛ ⲁⲓⲣⲡⲙⲉⲉⲩⲉ ⲙⲡⲡⲁⲧⲣⲓⲁⲣⲭⲏⲥ · ⲓⲁⲕⲱⲃ ϫⲉⲛⲧⲟϥ ϩⲱⲱϥ ⲟⲛ ⲙⲡⲉⲟⲩⲟⲉⲓϣ ⲛⲧⲁϥⲡⲱⲧ · ϩⲁⲡϩⲟ ⲛⲏⲥⲁⲩ · ⲡⲉϥⲥⲟⲛ ⲁϥⲃⲱⲕ ⲉⲧⲙⲉⲥⲟⲡⲟⲧⲁⲙⲓⲁ ⲛⲧⲥⲩⲣⲓⲁ ⲁϥⲉⲓ ⲉϫⲙⲡⲙⲁ ⲉⲧⲉⲣⲉⲛⲉⲥⲟⲟⲩ ⲛⲗⲁⲃⲁⲛ ⲛϩⲏⲧϥ · |
| s-391
| ⲁϥϯⲡⲉϥⲟⲩⲟⲓ ⲉⲧϣⲱⲧⲉ ⲁϥⲥⲕⲟⲣⲕⲣ ⲡⲱⲛⲉ ⲉⲧϩⲓϫⲛⲣⲱⲥ ⲭⲱⲣⲓⲥ ⲧⲣⲉⲣⲱⲙⲉ ϯⲧⲟⲟⲧϥ · ⲁϥⲧⲥⲟ ⲛⲛⲉⲥⲟⲟⲩ ⲛⲗⲁⲃⲁⲛ ⲁϥⲕⲁⲁⲩ ⲉⲃⲟⲗ ⲁⲩⲙⲟⲟⲛⲉ · |
| s-392
| ⲧⲟⲧⲉ ⲗⲟⲓⲡⲟⲛ ⲁⲓⲉⲓⲙⲉ ⲉⲡⲁⲓ ϫⲉϩⲱⲃ ⲛⲓⲙ ⲉⲧⲉⲣⲉⲛⲉⲧⲟⲩⲁⲁⲃ ⲉⲓⲣⲉ ⲙⲙⲟⲟⲩ ⲡⲛⲟⲩⲧⲉ ϯ ⲛⲧⲟⲟⲧⲟⲩ · |
| s-393
| ⲡⲉϫⲁⲓ ⲛⲁϥ ϫⲉⲡⲁⲉⲓⲱⲧ ⲉⲧⲟⲩⲁⲁⲃ ⲙⲁⲧⲁⲙⲟⲓ ⲉⲡⲉⲕⲣⲁⲛ ⲉⲧⲟⲩⲁⲁⲃ · ϫⲉⲁⲡϫⲟⲉⲓⲥ ϩⲉⲡⲡⲁⲓ ⲉⲣⲟⲓ · |
| s-394
| ⲛⲧⲟϥ ⲇⲉ ⲡⲉϫⲁϥ ϫⲉⲕⲩⲣⲟⲥ · ⲡⲉ ⲡⲁⲣⲁⲛ · |
| s-395
| ⲁⲛⲟⲕ ⲡⲉ ⲡⲥⲟⲛ ⲛⲑⲉⲟⲇⲱⲥⲓⲟⲥ ⲡⲣⲣⲟ · ⲁⲩⲱ ⲛⲧⲁⲩⲥⲁⲛⲟⲩϣⲧ ⲙⲛⲁⲣⲕⲁⲇⲓⲟⲥ · ⲙⲛⲟⲛⲟⲣⲓⲟⲥ ϩⲓϫⲛⲟⲩⲧⲣⲁⲡⲉⲍⲁ ⲛⲟⲩⲱⲧ ⲛⲙⲙⲁⲩ ⲁⲩⲱ ⲛⲁⲙⲉ · ⲁⲟⲛⲟⲣⲓⲟⲥ ϫⲟⲟⲥ ⲉⲣⲟⲓ ⲛϩⲁϩ ⲛⲥⲟⲡ ϫⲉϫⲓⲧ ⲉⲧⲉⲣⲏⲙⲟⲥ · ⲛⲙⲙⲁⲕ ⲧⲁⲣⲙⲟⲛⲁⲭⲟⲥ · |
| s-396
| ⲁⲛⲟⲕ ⲇⲉ ⲙⲡⲓⲉϣϫⲓⲧϥ ⲇⲉ ϫⲉⲡϣⲏⲣⲉ ⲡⲉ ⲙⲡⲣⲣⲟ ⲡⲉ · |
| s-397
| ⲛⲧⲉⲣⲛⲛⲁⲩ ⲇⲉ ϫⲉⲁⲡϫⲓⲛϭⲟⲛⲥ · ⲁϣⲁⲓ ⲁⲛⲣⲣⲱⲟⲩ ⲡⲁⲣⲁⲛⲟⲙⲉⲓ ⲁⲛⲁⲣⲭⲱⲛ ϫⲓ ⲛⲛϩⲏⲕⲉ ⲛϭⲟⲛⲥ ⲁⲟⲩⲟⲛ ⲛⲓⲙ ⲣⲓⲕⲉ ⲉⲃⲟⲗ ⲁⲩⲧⲁⲕⲟ ⲛⲧⲉⲩϩⲓⲏ ⲙⲡⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲁⲓⲧⲱⲟⲩⲛ ⲁⲓⲕⲁⲣⲁⲧ ⲉⲃⲟⲗ ⲁⲓⲉⲓ ⲉⲡⲉⲓϫⲁⲓⲉ ⲁⲓⲟⲩⲱⲛϩ · ⲛϩⲏⲧϥ ⲉⲧⲃⲉⲡⲁϣⲁⲓ ⲛⲛⲁⲛⲟⲃⲉ |
| s-398
| ⲧⲁⲣⲉⲡⲛⲟⲩⲧⲉ ⲕⲁⲁⲩ ⲛⲁⲓ ⲉⲃⲟⲗ |
| s-399
| ⲡⲉϫⲁⲓ ⲛⲁϥ ⲁⲛⲟⲕ ⲡⲁⲙⲃⲱ ϫⲉⲡⲁⲙⲉⲣⲓⲧ ⲛⲉⲓⲱⲧ ⲉϣⲁⲕϭⲛⲣⲱⲙⲉ ⲧⲱⲛ ϩⲛⲧⲉⲓⲉⲣⲏⲙⲁ · ⲛϥⲥⲗⲥⲱⲗⲕ ϩⲛⲛⲉⲕϩⲓⲥⲉ · |
| s-400
| ⲡⲉϫⲁϥ ⲛⲁⲓ ⲁⲡⲁ ⲕⲩⲣⲟⲥ ϫⲉⲡⲓⲥⲧⲉⲩⲉ ⲛⲁⲓ ⲡⲁⲙⲉⲣⲓⲧ ⲛⲥⲟⲛ ⲁⲡⲁ ⲡⲁⲙⲃⲱ · ⲡⲁⲛⲟⲩⲧⲉ ⲁⲩⲱ ⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲧϭⲓⲛⲉ ⲙⲡⲁϣⲓⲛⲉ ϩⲙⲡⲉⲓϫⲁⲓⲉ ⲉⲧⲓϣⲟⲟⲡ ⲛϩⲏⲧϥ |
| s-401
| ⲙⲡⲓⲛⲁⲩ ⲅⲁⲣ ⲉⲣⲱⲙⲉ ⲉϥⲛⲏⲩ ϣⲁⲣⲟⲓ ⲉⲓⲙⲏⲧⲓ ⲉⲩⲥⲟⲛ ⲙⲙⲟⲛⲁⲭⲟⲥ ⲉϥⲛⲏⲩ ϣⲁⲣⲟⲓ ⲉϥⲱϣ ⲉⲛⲁⲩ ⲉⲡⲁϩⲟ ⲁⲩⲱ ⲙⲡⲉⲡⲉⲓⲕⲉⲧ ⲛⲁⲩ ⲉⲣⲟⲓ · |
| s-402
| ⲁⲗⲗⲁ ϩⲓⲧⲛⲧϩⲉ ⲉⲧϥⲙⲏⲛ ⲉⲃⲟⲗ ⲉϥⲛⲏⲩ ϣⲁⲣⲟⲓ ⲁⲓϩⲱⲛ ⲉⲧⲟⲟⲧϥ ϩⲙⲡⲥⲁ ⲛϩⲟⲩⲛ ⲉⲓϫⲱ ⲙⲙⲟⲥ ϫⲉⲁⲗⲟⲕ ⲉⲕϯϩⲓⲥⲉ ⲛⲁⲕ · ⲉⲕⲛⲏⲩ ϣⲁⲣⲟⲓ |