| s-503
| Эндэ хүдэлхэдөө, рекламна ролигуудые буулгадаг, компьютерна графика хэрэглэжэ хүдэлдэг, өөрынгөө хубиин студи нээһэн, бодото хэрэг дээрээ өөрынгөө шадабари харуулһан, шэнэ онол аргануудые хэрэглэһэн юм. |
| s-504
| һүүлдэнь тэрэниие Москва хото «Питер ФМ» кинодо уран зурааша – найруулагшаар, раскадровщигоор хүдэлхыень уриһан байна. |
| s-505
| Эндэ хадаа урагшаа һанаатай Солбон дүй дүршэл олонгоо түлөөһэгүйгөөр шахуу мэргэжэлтэ уран һайханай кинодо хабаадалсаһан юм. |
| s-506
| Энэл үедэ наһанайнгаа нүхэр болгоһон баһал уран зурагта бэлиг шадабаритай залуу бэлигтэй Ася басагантай танилсаһан юм. |
| s-507
| Ася Зүүн Сибириин технологическа университет дүүргэжэ, инженер–биотехнологой мэргэжэлтэй болоо. |
| s-508
| Бэе бэеэ ололсожо, бэлиг талаангаа хамтадхаһан урагшаа һанаатай Лыгденовтэнэй бүлэ 2 урин хөөрхэн Алина ба Соёлма басагадые, угаа дамжуулха хүбүүе хүмүүжүүлнэ. |
| s-509
| Эхэ эсэгэдэнь байгаалиһаа үгтэһэн уранаар зураха талааниинь Алина ба Соёлма басагадынь баһал һажаанхай гэжэ тэмдэглэмээр. |
| s-510
| 1999 ондо Солбон Лыгденов Зүүн Сибириин соёлой ба искусствын академидэ театральна режиссёрой отделенидэ ороһон болоно. |
| s-511
| Москва хотодо Россиин нэрэ солотой режиссёрнуудтай суг хамта хүдэлжэ, мэдээжэ «Мы из будущего 2», «Талисман любви», «Каникулы строгого режима», «Обитаемый остров» ба бусадшье проектнүүдые бэелүүлсэһэн габьяатай. |
| s-512
| Бэлиг талаангаа мүлижэ, хари гүрэнэй «Код Апокалипсиса», «Миссия невыполнима-4» ба бусад кинофильмнүүдтэ хүдэлхэ азатай байһан юм. |
| s-513
| Һаяхана суута кинорежиссёр, продюсер Тимур Бекмамбетовэй Голливудта суг хүдэлхэеэ урихадань, арсаһан болоно. |
| s-514
| Тиимэл даа, түрэл газартаа, тоонто нютагтаа хүйһөөрөө холбоотой Солбон хүбүүмнай. |
| s-515
| Агууехэ Чингис хаанай намтарта, энэ гайхамшагта хүнэй сагай түүхэдэ эрдэмтэд, соёл болбосоролдо хабаатай хүнүүд онсо анхаралаа хандуулдаг. |
| s-516
| 2009 ондо Саха-Яхадай режиссёр Андрей Борисовтай суг хамта «Тайна Чингисхана» гэжэ кинодо уран зурааша-найруулагшаар хүдэлһэн юм. |
| s-517
| Буряад ороной Росси гүрэндэ һайн дураараа хамжан ороһоор 350 жэлэй ойн баярта дашарамдуулан, үзэсхэлэнтэ һайхан видеоролик буулгаһан байна. |
| s-518
| Интернедтэ энэнь дэлгээгдэнхэй. |
| s-519
| Манай Буряад орондо эгээл түрүүн «экшн» жанрда кино буулгаха хүсэлөө бэелүүлхэ гэжэ «Булаг» гэһэн проект дээрэ 2013 оной январь һарада хүдэлжэ эхилээ. |
| s-520
| Энэ киногоо Түнхэнэй аймагай Хойтогол нютагта, Зэдын, Захааминай аймагуудта буулгажа, 6 һарын туршада киностудинь ехэхэн ажал дүүргэһэн байна. |
| s-521
| Эгээл түрүүн энэ ажалыень июниин 25-да СМИ-гэй түлөөлэгшэд, ниитын хэмжээ ябуулагшад зохёохы бүлэгынь өөһэдөө хараһан байна. |
| s-522
| Августын 22-25-най үдэрнүүдтэ Якутск хотодо 1-дэхи Уласхоорондын кинофестиваль үнгэрһэн. |
| s-523
| 12 гүрэнүүдэй, жэшээлэн хэлэбэл, США-гай, Канадын, Германиин, Франциин, Швециин, Саха-Яхадай, Россиин 70 гаран кинофильмнүүд эндэ дурадхагдаһан байна. |
| s-524
| «Лучший полнометражный фильм» гэһэн номинацида Александр Адабашьян түрүүтэй жюриин комиссиин дүнгүүдээр Солбон Лыгденовэй «Булаг» гэһэн кинофильм фестивалиин Гран-при шанда хүртэбэ. |
| s-525
| Мүнөө үедэ бэлигтэй режиссёр 2012 ондо эхилһэн «Дарима» гэһэн кинофильмын проект дээрэ зохёохы бүлэгтэеэ саашань эршэтэйгээр хүдэлмэрилжэ байна. |
| s-526
| Кино буулгахада, горитойхон мүнгэн гаргашалагдадаг гээшэ. |
| s-527
| Хубиин олзо эрхилэгшэд, нютагаархидынь, нүхэдынь, танил ба дүтын зон энэ хүнгэн бэшэ ажалдань туһалдаг, дэмжэдэг гэжэ тэрэ Интернедтэ өөрынгөө сайт дээрээ уншагшадтаяа хубаалдана. |
| s-528
| Буряад оронойнгоо зоной хуби заяанай түлөө үнэн зүрхэнһөө һанаагаа зобоһон, ажабайдалдань онсо анхаралаа хандуулдаг манай хүндэтэ кино буулгагша Солбон Дондокович Лыгденовтэ элүүр энхэ бэетэй, ута наһатай, урагшатай ябахыень хүсэнэб. |
| s-529
| Үшөө саашадаа олон гүнзэгы удхатай фильмнүүдые буулгажа, харагшадаа хужарлуулыт гэхэ байнаб. |
| s-530
| Онсо өөрын арга дүрэтэй һэн |
| s-531
| Баяр Цыренгармаев 1954 оной модон хүхэ Морин жэлдэ Агын национальна тойрогой Зүдхэли нютагай Ерүүл Бодонгууд угай Жабай Цыренгармын бүлэдэ түрэһэн юм. |
| s-532
| Эбтэй эетэй энэ үнэр баян бүлэ 14 үхибүүтэй болоһон байгаа. |
| s-533
| Баяр хүбүүхэн гараха түрэхэһөө хурса һонор, һүбэлгэн бэрхэ байһан юм. |
| s-534
| Хани нүхэд Баяр Дамдинов, Мүнхэ Митупов Арсалан Батожапов, Баяр Цыренгармаев болон бусадһаа бүридүүлэгдэһэн Зүдхэлиин дунда һургуулиин баскетболистнуудай суглуулагдамал командын түрүүшынхеэ аймагай чемпион болоһыень эдир хүбүүн огто мартадаггүй һэн. |
| s-535
| Институт дүүргээд, районогой хубаарилгаар Зүдхэли ерэһэн классайнь хүтэлбэрилэгшэ Валентина Лочиновна Ракшаева, тэрэнэй нүхэр Доржо Ринчинович Дансаранов эдир хүбүүдые спортдо дурлуулһан байгаа. |
| s-536
| «Спорт хадаа һайнаар һурахадатнай туһалха бата найдамтай юумэн гээшэ», - гэжэ Валентина Лочиновна ходо хэлэдэг бэлэй. |
| s-537
| Энэ үедэ Баярай аха Балбар Доржо Ринчиновичэй хүтэлбэри доро дүрэ буляалдалгын барилдаагаар һорилго хэдэг байба. |
| s-538
| Тэрэ дүүгээ барилдаанай секцидэ асарба. |
| s-539
| Эршэмтэй һорилго, тренерэйнь үүсхэл эдэбхи хибэс дээрэ шабинартань түрүүшын амжалта түхөөбэ. |
| s-540
| Советскэ Союзай Герой Базар Ринчиногой дурасхаалай мүрысөөн Зүдхэлиин эдир барилдаашадай зориг бадаруулһан, мэргэжэл шадабарииень мүлиһэн байгаа. |
| s-541
| Энэ мүрысөөн агынхидта өөрсэ янзын бага олимпиада, хани нүхэсэлэй ба бэеын тамирай ёһотойл һайндэр болодог һэн. |
| s-542
| Зүдхэлиин эбтэй эетэй команда оло дахин илажа гараһан юм. |
| s-543
| Аюр Цырендоржиев, Баяр Цыренгармаев, Бальжинима Санжимитупов, Минжур Цыденов, Цыдып Иванов болон бусад түрэл нютагайнгаа нэрэ хүндые хамгаалдаг байгаа. |
| s-544
| Аяар холын 1972 ондо Зүдхэлиин эдир хүбүүн дүрэ буляалдалгын барилдаагаар СССР-эй спортын мастер Валерий Ивановтой хибэс дээрэ уулзаа һэн. |
| s-545
| Эрэшүүлэй дунда Сибирь болон Алас-Дурна зүгэй түрүү һуури эзэлхын түлөө мүрысөөн Шэтэ хотодо болобо. |
| s-546
| Тулалдаанай дүүрэтэр 30 секундын үлөөд бай үедэ залуу хүбүүн 1 баллаар шүүжэ ябаба. |
| s-547
| Эгээл энэ үедэ Иванов шиидхэхы арга хэжэ, диилээ бэлэй. |
| s-548
| Агын залуу хүбүүн бар хүсэтэй, яһала һайн арга дүрэтэй барилдаашан болохо аргатай байна гэжэ Валерий Николаевич ойлгоходоо, Баяр Цыренгармаевые Буряадай багшанарай институдай физическэ хүмүүжүүлгын факультедтэ орохыень уряа һэн. |
| s-549
| Тиин Баяр Валерий Ивановой бүлэгтэ һорилго хэжэ захалба. |
| s-550
| Һуралсал һорилгодоо бэеэ, хаба шадалаа, арга дүрэеэ сүм зорюулха, жаяг журамтай бай эрилтэ һурагшадтаа табихаһаа гадна, барилдаашан бүхэнэй хубиин арга боломжонуудые, шадабари мэргэжэлые хараада абажа, ажалдаа зохёохы ёһоор хандадаг байгаа. |
| s-551
| Бэлигтэй бэрхэ тренер В.Н.Иванов дүшөөд жэлдэ хүдэлхэдөө, СССР-эй болон Россиин 200 шахуу спортын мастернуудые һурган бэлдэһэн бай юм. |
| s-552
| Юрэдөөл, тиихэ үедэ Баяр манай республика дотор СССР-эй эгээл залуу спортын мастер болоһон гээшэ. |
| s-553
| Буряад хэлэн … Түрэл гү, али гүрэнэй гү? |
| s-554
| Үнгэрэгшэ амаралтын үдэрнүүдтэ Улаан-Үдэ хотодо буряад хэлэ ба литератураар олимпиада республикын хэмжээндэ үнгэргэгдөө. |
| s-555
| Эндэ республикымнай аймагуудай һуурингуудай үхибүүд буряад хэлэ мэдэхэ шадабаряараа мүрысэжэ, түрүү шалгаран гарагшад элирүүлэгдээ. |
| s-556
| Илагшадай нэрэ обогууд һуралсалай ба эрдэм ухаанай министерствын сайт соо табигданхай. |
| s-557
| Харин мүнөөдэрэй асуудал буряад хэлэнэй байдал тухай. |
| s-558
| Хаанашье дээдын зургаанда гү, али юрэ хөөрэлдөөндэ буряад хэлэн тухай асуудал эхилхэдээл, буряад хэлэнэй шанар һургуулиин багшанарһаа дулдыдана гэжэ хэлсэдэг. |
| s-559
| Тиимэһээ, хотын болон хүдөө һургуулинуудай багшанартай уулзажа, хөөрэлдэжэ, багшанарай һанамжа, дурадхалнууд мэдэжэ абабабди. |
| s-560
| Захааминай аймагай Санагын дунда һургуулиин буряад хэлэнэй багшанар Таисия Хандуевна Мархаева, Оюна Тогтохоевна Норбоева гэгшэд иигэжэ хэлэбэ: |
| s-561
| - Манай нютагта ажаһуугшад буряад хэлээр дуугардаг. |
| s-562
| Тиимэһээ, үхибүүднай буряад хэлэеэ һайн мэдэдэг. |
| s-563
| Нютагһаа холо гараад ябахадаал, буряад хэлээр хэлсэдэг зон үсөөн гэжэ мэдэрнэбди. |
| s-564
| Үхибүүдые бага наһанһаань лэ түрэл хэлэндэнь һургаха хэрэгтэй ха юм. |
| s-565
| Бүхыдөө Буряад орондо байдал хэсуу болонхой. |
| s-566
| Буряад хэлээр номууд хэблэгдэнхэй, харин литература хуушаранхай. |
| s-567
| Ивалгын дунда һургуулиин буряад хэлэнэй багша Мэдэгма Бабасановна Бадмацыбикова: |
| s-568
| - 31 жэлэй туршада һургуулида буряад хэлэ заанаб. |
| s-569
| Жэл бүри минии һурагшад аймагтаа түрүүлжэ, республикын олимпиадада хабаададагбди. |
| s-570
| Һүүлэй үедэ буряад хэлэн хоёр программаар заагдадаг болонхой. |
| s-571
| Буряад хэлэн-түрэл хэлэн, Буряад хэлэн-гүрэнэй хэлэн гээд эрдэмтэд буряад хэлэ шудалалгада ехэ анхарал табидаг болонхой. |
| s-572
| Илангаяа, «Бэлиг» хэблэлдэ баярые хүргэхэ хэрэгтэй. |
| s-573
| Электронно ном гарганхай. |
| s-574
| Иимэ хэмжээнэй олимпиаданууд аргагүй ехэ туһа үзүүлдэг, багшанар үхибүүдэйнгээ эрдэм шадабари шалгаха аргатай, хэжэ байһан ажалайнгаа дүн харана ха юм даа. |
| s-575
| Сэлэнгын аймагай Ноёхоной дунда һургуулиин буряад хэлэнэй багша Санжа Дулма Базаровна Болхоева: |
| s-576
| - Манай нютагайхид ехэ һайхан ордон мэтэ һургуулитай болонхойбди. |
| s-577
| Аймаг соогоо үндэһэн һургуули гэжэ тоологдодог. |
| s-578
| Буряад хэлэ түрэл хэлэн гэжэ аймагтамнай оройдоол 4 һургуулида заагдадаг. |
| s-579
| Зүгөөр аймаг дотор ехэ олон буряад зон ажаһууна ха юм. |
| s-580
| Жэшээнь, Харгана, Юрөө, Загастай гэһэн һуурингуудай һургуулида буряад хэлэеэ түрэл хэлэн гэжэ шудалхаар аргатай аад, 3-дахи программаар, хотын һургуулинуудтай адлихан үзэдэгынь гайхалтай. |
| s-581
| Иигэжэл, буряад хэлэмнай дутуу шудалагдан, хэсүү байдалда оруулагдана бэшэ гү? |
| s-582
| Цындыма Цырендоржиевна Сультимова, Хэжэнгын дунда һургуулиин буряад хэлэнэй багша: |
| s-583
| Би 21 жэлэй туршада багшалнаб. |
| s-584
| Ажалаймни эхиндэ буряад хэлэнэй орёо байдалаар табигдаһан асуудалнууд нэгэшье шиидхэгдээгүй, улам хэсүү боложол байдаг. |
| s-585
| Мүнөө үеын залуушуулай үхибүүд тордиһогүй буряадаар дуугарха үхибүүд һургуулида ерэнэгүй. |
| s-586
| Хэлэ шудалалга түрэл ба гүрэнэй хэлэн гээд хубааралга хэлэ хүгжөөнэгүй. |
| s-587
| Ород буряад хэлые холижо, хэшээлээ үнгэргэхэ баатай болонхойбди. |
| s-588
| Интернет гээшэ үхибүүдые ехээр татана. |
| s-589
| Тэндэнь ганса ород хэлэ хүгжөөнэ, буряад хэлэн ёһо заншалһаа холодожол байнабди. |
| s-590
| 45 минутын туршада зааһан юумыешни долоон хоног соо хуу мартаад лэ ерэнэ ха юм. |
| s-591
| Буряад хэлэнэй хүгжэлтын хүшэрхэн байдал ганса багшанар дээрэ тохожорхихо бэшэ, харин бүгэдэ, засаг түрэ, ниитэ зон булта нэгэдэн шиидхэхэ хэрэгтэй. |
| s-592
| Светлана Гончикова Будаина, Улаан-Үдын 1-дэхи лицей-интернадай багша: |
| s-593
| - Буряад хэлэнэй байдал орёохон. |
| s-594
| Сэхыень хэлэхэдэ, ород хэлэмнай түрүүл байдаг. |
| s-595
| Мүнөө бидэ ехэ баяртайбди. |
| s-596
| Ехэ гүнзэгы удха шанартай электронно ном бии болгогдоо. |
| s-597
| Тэрээн соо ехэ олон хэрэгтэй туһаламжанууд оронхой. |
| s-598
| Үхибүүдэй уншаха номууд, үзэхэ, эрдэм мэдэсэеэ һонирхуулха юумэн олон. |
| s-599
| Хэрбэеэ, республикымнай бүхы һургуулинууд компьютер хэрэглэн, буряад хэлэеэ шудалдаг болобол һайн бэлэй. |
| s-600
| Буряад литературын номууд хуушаранхай гэжэ һананагүйб. |
| s-601
| Пушкин, Толстой болон бусад классигуудай зохёолнуудые шудалжал байна ха юм, юундэ бидэ буряад классигуудые үзэхэгүй юм биибди. |
| s-602
| Буряад хэлэнэй баялиг шудалагдажал бай ёһотой. |