| s-402
| һайн мориндо эзэн олон, һайн хүндэ нүхэр олон. |
| s-403
| Нүүдэлшэдэй замаар нэгэдүүлэгдэһэн соёл |
| s-404
| Эдэ үдэрнүүдтэ Буряадаймнай урдаа хараха дуу, хатарай «Байгал» театр ялас гэмэ концерт наадаар харагшадаа үшөө дахин бая-суулба. |
| s-405
| Оперо болон баледэй театрай танхим соо сүлөө һуури байгаагүй. |
| s-406
| Олон зоной һонирхол татаһан афиша-соносхолнууд харагшадай найдал мэхэлээгүй. |
| s-407
| Үнэхөөрөө энэ концерт «Байгал» театрай үндэр шатын мэргэжэлтэ бэлиг шадабари үшөө дахин гэршэлбэ. |
| s-408
| Концертын нэгэдэхи хубидань театрай артистнар дуу, хатараа бэлэглээ. |
| s-409
| Хоёрдохи хубида театрай дэлгэһэн нааданай эршэ, эгээл дээдэ талын туйлалта Энэдхэг гүрэнэй артистнарай хабаадалгаар табигдаа. |
| s-410
| Театрай артистнар дундаршагүй бэлиг шадабаритай, үндэр бүхэдэлхэйн искусствын хэмжээндэ табимаар шадабари мэргэжэлтэй байһанаа үшөө дахин гэршэлээ. |
| s-411
| Дандар Бадлуевай һанаһан проектые ойлгожо, бэелүүлэлсэһэн Хойто Энэдхэг ороной артистнар дуушан Правин Мишра, хатаршад Анужд Мишра, Нэха Сингх гэгшэдэй гүйсэдхэһэн дуу, хатар харагшадта ехэтэ һайхашаагдаа. |
| s-412
| Аяар холоһоо бууһан айлшан артистнар хадаа Агууехэ Могоолнуудай ордон соо гүйсэдхэдэг байһан дуу, хатарые үеһөө үедэ дамжуулдаг угай үри һаданар гээшэ. |
| s-413
| Бэлигтэй артистнарай гүйсэдхэһэн алишье дуу, хатар халуун альга ташалгаар угтагдаа. |
| s-414
| Түгэсхэлэй нааданда тайзан дээрэ гараһан бүхы хабаадагшадые харагшад табиха, тэдээнтэй хахасаха аргагүйгөөр, үшөө удаан хүл дээрэ зогсон, альгаа ташажал, ташажал байгаа. |
| s-415
| Премьерын гол удха тухай |
| s-416
| Энэ юрэ суглуулагдаһан дуу, хатарай концерт наадан бэшэ, өөрын онсо удхатай бүридхэмэл проект болоно. |
| s-417
| Ушар юуб гэхэдэ, тайзан дээрэ табигдаһан дуу, хатар һэлгэлдэн, Чингисхаанай эзэмдэн ябаһан газарнууд руу нүүдэлшэ монгол арадай соёл Азиин болон Энэдхэг орон хүрэтэр нэбтэрүүлэгдэн шэнгэжэ, өөрын нүлөө үзүүлһэн тухай хөөрэгдэнэ. |
| s-418
| Тиимэһээ концертын программада хамаг монголшуудай хойто монгол-буряадуудай, ойрод, хальмагуудай, Афганай газарта үлэшэһэн хазар-монголшууд, уйгуурнууд болон Хойто Энэдхэгэй Агууехэ Моголнуудай үри һадаһадай соёлнуудай холбоо харуулагдана. |
| s-419
| Гоё һайхан дуу, хатараар, хүгжэм маяг, эдэ арадуудай хубсаһа шэмэг харуулан, дэлхэйн арадуудай соёл байдалда монголшуудай үлөөһэн мүр сараа гэршэлэн харуулжа шадаа. |
| s-420
| Юрэ хүн бүхэн газарай габаһаа гараа бэшэ, дэлхэйн амитан зон түүхэтэ үйлын ашаар нэгэл утаһаар холбоотой ажа амидарна ха юм. |
| s-421
| Энээниие бүхы дэлхэйн арадуудай соёл искусство, байдал, ажаһуудал, өөһэд хоорондын харилсаан гэршэлдэг. |
| s-422
| «Монголһоо Могол хүрэтэр» |
| s-423
| «Байгал» театрай директор Дандар Жапович Бадлуев анхан «Монголһоо Могол хүрэтэр» гэһэн проект сэдьхэлдээ удаахан буйлуулаа. |
| s-424
| «Угайм сүлдэ», «Баргажан Түхэм» гэһэн зүжэг мэтээр энэ проект бэелүүлэгдэхэ аад, мүнгэн зөөриин хомор шалтагһаа энэ концерт боложо тодорбо. |
| s-425
| - Манай Монголой агууехэ тала дайдаар хэдэн мянгаад жэлэй саана элдэб һонин үйлэ хэрэгүүд тохёолдожо, бүхы арадуудай ажаһуудалда мүр сараа үлөөһэн байна. |
| s-426
| Тиимэһээ монголшуудай соёл баруун зүг руу шэнгэн ороһон тухай ехэ һонирхооб. |
| s-427
| Агууехэ Чингисхаанай үри һадаһад юугээрээ адли, юугээрээ ондоо гээшэбибди, арадайнгаа һүлдэ, заншал али нэгэмнай сахижа ябаа гү, али нэгэниинь алдаа гү гэһэн бодолоор шэнжэлэн үзэһэн байнаб, гэжэ Дандар Жапович хөөрэнэ. |
| s-428
| Дандар Бадлуев зорижо, Хойто Энэдхэг аяншалан ошоһон байна. |
| s-429
| Тэндэ ябахадаа, ехэ һонин, һалбаран хүгжэһэн Моголнуудай соёлтой дүтэ танилсаа. |
| s-430
| Могол гээшэ Индостанай Монголшуудай нэрэ зэргэ гэжэ толи соо тайлбарилаатай. |
| s-431
| Агууехэ Моголнуудай импери байгуулһан юм |
| s-432
| Чингисхаанай аша хүбүүн болохо Бабур шах хадаа Чагатай эсэгынгээ утаһаар Чингисхаанай аша хүбүүн, эхынгээ утаһаар Тимур хаанай мусульман яһатанай зээ хүбүүн болоно. |
| s-433
| Харин Тимур хан Түмүрид эхынгээ талаар Алан-гуагай зээ хүбүүн гэжэ хэлсэдэг. |
| s-434
| Бабур шах хадаа Агууехэ Моголнуудай импери байгуулһан. |
| s-435
| Тэрэнэй мэдэлдэ Афганистан, Пакистан, Хойто Энэдхэг гээд нэгэдүүлэгдэһэн юм. |
| s-436
| Энэ ехэ импери тэрэ үедэ ганса газар уһа эзэмдэжэ ябаа бэшэ харин бүхы бэлигтэй дуушад, хатаршад, уран зохёолшод, архитекторнүүд гээд, эрдэм бэлигтэй зонуудые суглуулдаг байгаа. |
| s-437
| Энэ империин хүтэлбэрииин үедэ индус, мусульман арадуудай соёл моголнуудай соёлоор нэбтэрүүлэгдэжэ, эгээл үндэр хүгжэлтэ нүлөөлһэн түүхэтэ саг гээшэ гэжэ эрдэмтэд тэмдэглэдэг. |
| s-438
| Дандар Жаповичай Энэдхэг ороноор ябахада, тэндэхи зон архитектурна дурасхаалай элдэб һайхан байшангуудые харуулаад, «энэ танай монголшуудай уг гарбалтанай бүтээһэн зүйлнүүд гээшэ» гэжэ тэмдэглээ. |
| s-439
| Энэдхэг гүрэнэй олондо мэдээсэл тараадаг хэблэлнүүдтэ Хойто Энэдхэгэй соёлдо монголшуудай үлөөһэн мүр сараа тухай элидхэлнүүд соо энэ мүнөө табигдаһан проект тухай, моголнуудай аша туһаар тэндэхи арадуудай соёл һонин, үндэр хэмжээнэй болоо гэжэ бэшэгдэһэн байна. |
| s-440
| Хойто Энэдхэгтэ Лангхау гэһэн хото Агууехэ Моголнуудай соёлой, искусствын түб болоно. |
| s-441
| Тэндэхи соёлой ажалшад, артистнартай «Байгал» театр холбоо харилсаа эрхилжэ, хани барисаата ажал ябуулна. |
| s-442
| Проект дээрэ ажаллагшад тухай |
| s-443
| Дандар Бадлуевай тэмдэглэһээр, энэ мүнөө табигдаһан концерт хадаа ехэ проектын эхин боложо үгэнэ. |
| s-444
| «Байгал» театрай уран һайханиие хүтэлбэрилэгшэ Жаргал Жалсанов энэ проектын найруулагша, хатар табигшад Ирина Баторова, Арсалан Санданов болон өөрөө Дандар Бадлуев гээд ажаллаа. |
| s-445
| Чингисхаанай дайшалхы замаар нэгэдүүлэгдэһэн арадуудай дуу хүгжэм, хатар, үндэһэн хубсаһан шэнжэлэгдээ. |
| s-446
| Эдэ бүгэдые үзэжэ, тааруулжа, ехэхэн ажал ябуулагдаа. |
| s-447
| Тэдэнэй үндэһэн хубсаһанда үнэхөөрөө манай монголшуудай хубсаһадтай адлихан онсо шэнжэнүүд олдоно. |
| s-448
| Ганса хубсаһан бэшэ, мүн дуу хүгжэм, хатарха маяг баһал зарим ушартаа адлихан байһыень проект бэлдэгшэд харагшадтаа ойлгуулжа шадаа. |
| s-449
| Энэ табигдаһан проект Агууехэ Чингисхаан газар дэлхэй эзэмдэжэ, байдал һандаргажа ябаа бэшэ, харин элдэб арадуудай ажаһуудал, соёл заншал хүгжөөжэ, онсо нүлөө оруулжа, бүхы арадуудые нэгэдүүлхэ агууехэ зорилготой ябаа гэһэн мэдэрэл түрүүлнэ гэбэл, алдуугүй. |
| s-450
| «Байгал» театрайхид буряад арадайнгаа соёл заншал һэргээхэ, хүгжөөлхэдэ өөрын хубитаяа оруулдаг нилээн үндэр шатын эмхи гээшэ. |
| s-451
| Гансал өөһэдын байра байшангүй, эндэ тэндэ арендэ-түлбэри хэжэ, ажаллажа ябахадань, хайшаа юм? |
| s-452
| Өөһэдын гоё һайхан ордонтой болобол, бэлиг шадабаритай театр үшөө һайхан бүтээлнүүдээрээ ганса Буряад Республикын, Россиин зониие бэшэ, мүн бүхэдэлхэйн арадуудые баясуулха аргатай ха юм! |
| s-453
| Угаараа дамжуулагдаһан бэлиг |
| s-454
| Угаараа дамжуулагдаһан бэлигтэй хатаршан |
| s-455
| Буряадай Гүрэнэй академическэ оперо болон баледэй театрай солист, Буряад Республикын гүрэнэй шангай лауреат Булат Раднаев мүнөө жэл Буряад Республикын габьяата артист гэһэн үндэр нэрэ зэргэдэ хүртэбэ. |
| s-456
| Булад Раднаев гүрэн түрын хэмжээнэй хэдэн харалга-наадануудта хабаадажа, амжалта туйлаһан, түрэл театрайнгаа тайзан дээрэ «Лебединое озеро», “Жизель”, “Дон Кихот”, “Тысяча и одна ночь” болон бусад балетнэ зүжэгүүдтэ гол парти гүйсэдхэжэ, харагшадай үндэр сэгнэлтэдэ хүртэнхэй. |
| s-457
| Өөрөөшье мэдэнгүй артист болошооб |
| s-458
| Бэшүүрэй аймагай Шэбэртэ нютагта түрэһэн Булад хүбүүхэнэй 8 наһатай байхадань, нагаса абгань болохо Григорий Михеевич Багадаев наһанайнгаа нүхэр Лариса Иннокентьевна Протасоватай айлшаар ерэһэн юм. |
| s-459
| Буладай шпагат болон уян нугархайгаар орёо трюгүүдые харуулхадань, тэдэнэр ехэтэ һонирхоод, заабол балетнэ училищида һурахаш гээ бэлэй. |
| s-460
| - Би балет гэжэ юумэ мэдэхэгүй, гоё городто байхаш, фонтан болон гоё һайхан юумэнүүдые харахаш гэхэдэнь, мэхэлэгдээд ерээ хүм. |
| s-461
| 3-дахи классай һүүлээр ерээд, хотын һуралсалай программа ондоо байжа, нютагайнгаа һургуулиин 4-дэхи класста орохо аад, нэгэ класс алгадажа, одоо ганса “2” гэһэн сэгнэлтэнүүдые абажа эхилээб. |
| s-462
| Тиигэһээр тэрэмни мэдэгдэжэ, Лариса Иннокентьевна намда математика, ород хэлэ һайнаар үзүүлжэ, үетэнөө хүсэһэн байгааб, - гэжэ Булад хөөрэнэ. |
| s-463
| Угаараа бэлиг дамжуулагдаа |
| s-464
| Хүндэ мэргэжэлэй ба ямар нэгэ бэлигэй шадабарида һурахын хажуугаар, заабол байгаалиин бэлэглэһэн бэлиг, мүн угаараа дамжуулһан бэлиг гэжэ байдаг. |
| s-465
| Буладай абын аха Раднаев Еши гэжэ абгань 1940 ондо Москва хотодо үнгэргэгдэһэн буряад соёлой декадада хабаадажа, бөө удаганай хатар гүйсэдхэһэн байна. |
| s-466
| Булад томохон болоод, Буряад драмын театр ерээд бэдэрхэдэнь, нэгэшье фото баримта олдоогүй. |
| s-467
| Түрэһэн эжы-Раднаева Надежда Гатыповнагай түрэлнүүд Михей Багадаев, Валентина Цыдыпова, Ольга Аюрова гээд булта бэлигтэй мэдээжэ артистнар ха юм даа. |
| s-468
| - Минии түрэһэн аба республикын 1-дэхи лицей-интернадта 7-дохи класс хүрэтэр һураад, мүнгэ зөөриин дуталдахада, һөөргөө Шанагаяа бусашаһан юм. |
| s-469
| Тиигээд намайе ходол һургуули хэ, хүн болохош гэдэг байгаа. |
| s-470
| Би бага байхадаа, “Космонавт болоходоо ядахагүйб” гэжэ шүлэг уншадаг һэм, - гэжэ Булад энеэнэ. |
| s-471
| Буряад хэлэ мэдэдэг байхада, эшхэбтэр һэн |
| s-472
| 90-ээд онуудта хүдөөгэй хүбүүд, басагад Улаан-Үдэ ерээд, хотын хүүгэдтэй адлихан һуража эхилхэдээ, ород хэлэ муутай, ядалсадаг бэлэй. |
| s-473
| Юумэ хэлэжэ ядаха, буряадаар хэлэхэеэ эшэхэ, тиимэһээ бэеэ абанги, дуугай ябаха. |
| s-474
| Тэрэ үедэ тиимэл байгаа ха юм. |
| s-475
| Булад Бэшүүрэй аймагай хадаа ород арадтаяа харилсажа һураһан ород хэлэндэ ядалдаагүй. |
| s-476
| - Мүнөө саг ондоо болоо. |
| s-477
| Үхибүүд хэлэ һайн мэдэхэ болонхой. |
| s-478
| Буряад хүбүүд, басагад уян нугархай байбал, юунһээшье айн, эшэнгүй, баледэй һургуулида ерэгты, - гэжэ Булад уряална. |
| s-479
| “Дон Кихот” 15 жэл болоод дахин табигдаа |
| s-480
| Мүнөө жэлэй театральна хаһаяа театр “Дон Кихот” гэһэн премьерээр түгэсэбэ. |
| s-481
| Энэ зүжэг түрүүшынхиеэ 1963 ондо оперо болон баледэй театр табиһан байна. |
| s-482
| Тиигэжэ 50-дахи ойн баярай премьерэ үнгэрөө. |
| s-483
| Морихиро Ивато балетмейстер найруулан табяа. |
| s-484
| Москвагай Большой театрай “Хореография Горского” гэһэн бүлэгэй репетиторнүүд ерэжэ табилсаа. |
| s-485
| Ирина Зибарева, Тимофей Лавренюк гэгшэд артистнартай хүдэлөө |
| s-486
| Булад суг хамта һураһан Евгения Цыреноватай хатараа. |
| s-487
| - Тимофей Лавренюк зүжэгтэ бидэнэй гүйсэдхэхэдэ, хаанашье, Москвадашье хатархаар бэлигтэй, шадабаритай артистнар байнат, гэжэ магтаа. |
| s-488
| Бидэ ехэ сэгнэлтэ абаһандаа, урматай, улам саашаа урган хүгжэхэ хүсэлтэйбди, - гэжэ Булад хубаалдаба. |
| s-489
| Булад үшөө 5 жэл хүдэлөөд, наһанайнгаа амаралтада гарахаб гэжэ мэдүүлбэ. |
| s-490
| Иимэ залуухан наһандаа эртэ пенсидэ гарадаг ха юм даа, баледэй артистнар. |
| s-491
| 8-9 наһанһаа тайзан дээрэ хатаржа эхилһэн Булад 10 үдэр миин байгаад, дахин хатархаяа һанашадагби гэжэ хөөрэнэ. |
| s-492
| - Мүнөө амаралтадаа түрэл Шэбэртэеэ ошохоб. |
| s-493
| Хара багаһаа нютагаа бусаха гэһэн мэдэрэл минии сэдьхэл хүлгөөдэг. |
| s-494
| Илангаяа мүнөө жаахан басагамни эжы абатайм намайе ехэ хүлеэжэ байна, - гээд энеэбхилэн, хөөрөөгөө Булад дүүргэбэ. |
| s-495
| «Булагай» амжалта нютагһаа эхитэй |
| s-496
| Буряад ороной мэдээжэ кинорежиссёр, уран зурааша – найруулагша Солбон Дондокович Лыгденов нютагһаа холо олон жэлдэ хүдэлһэн хадаа тоонто нютагайнгаа татаса, үбгэ эсэгэнэрэйнгээ үнэтэ захяа сэдьхэлэйнгээ гүн оёорто мэдэрдэг байгаа. |
| s-497
| Үзэсхэлэн байгаалитай, үндэр мундаргата Түнхэнэй аймагай Мон нютагта 9 үхибүүтэй Дондок Дашиевич ба Раднажап Жамсаевнатанай бүлэдэ одхон үринь боложо, 1971 оной июниин 27-до түрэһэн юм. |
| s-498
| Бага наһанһаа хойшо тоонто нютагтаа хүлөө шоройдожо, арюун сэбэр агаараарнь амилжа, эм домто аршаан булагһаань ундалжа үндыһэн юм. |
| s-499
| һургуулиин наһанһаа зураг зураха ехэ шуналтай байһан тула Улаан-Үдын багшанарай училищиин уран һайханай-графическа отделенидэ орожо, тэрэнээ 1991 ондо дүүргэһэн юм. |
| s-500
| Тиигээд Россиин соёл болбосоролой хүгжэлтын үлгы болохо Ленинград хото зориһон болоно. |
| s-501
| Эндэ уран зурагай нюусануудаар, аялга хүгжэмөөр, театрнуудай ажабайдалаар ехэтэ һонирхоһон байна. |