orv-rnc-test-doc3

Universal Dependencies - Old East Slavic - RNC

LanguageOld East Slavic
ProjectRNC
Corpus Parttest
AnnotationLyashevskaya, Olga; Skachedubova, Maria
Javascript seems to be turned off, or there was a communication error. Turn on Javascript for more display options.
index • sentence 18 - 28 < sentence 29 - 39 > sentence 40 - 47
А межи нас рѡздѣл землѣ по рекꙋ по Ѡкꙋ, ѡт Коломны вверхъ по Ѡцѣ, на Московскои сторонѣ, почен Нѡвгородѡк, Лужа, Вереа, Боровескъ, инаа мѣста Резанскаа, котораа ни бꙋдꙋт на тои сторонѣ, то к Москвѣ. А на низ по рецѣ по Ѡцѣ, по рѣкꙋ по Цнꙋ, ѡт ꙋсть Цны въверхъ по Цнѣ, што на Московскои сторонѣ, то к Москвѣ, а что на Резанскои сторонѣ, а то Резанѣ. А что Володимерское порꙋбеж[ь]е по томꙋ, как было при наших прадѣдех, при великом кн[ѧ]зѣ Иванѣ Даниловичѣ, и при великом кн[ѧ]зѣ Семенѣ Ивановичѣ, и при великом кн[ѧ]зѣ Иванѣ Ивановичѣ, и при моем дѣде, при великом кн[ѧ]зѣ Дмитріе Ивановичѣ и при моем о[т]цѣ, при великом кн[ѧ]зѣ Васил[ь]е Дмитріевичѣ, и при твоем прадѣде, при великом кн[ѧ]зѣ Иванѣ ꙗрославичѣ, и при твоем прадѣде, при великом кн[ѧ]зѣ Иванѣ Ивановичѣ, и при твоем прадѣде, при великом кн[ѧ]зи Иванѣ Ѡлександровичѣ, и при твоем дѣде, при великом кн[ѧ]зѣ Олзѣ Ивановичѣ, и при твоем о[т]цѣ, великом кн[ѧ]зе Ѳедѡрѣ Ѡлговичѣ. А что Резанское на Резанскои сторонѣ за Окою, что доселѣ тѧгло к Москвѣ, почен Лопасна, ꙋѣздъ Мстиславль, Жадѣне горѡдищо, Дꙋб, Жадемль, Броднич с мѣсты, как сѧ ѡтстꙋпили торꙋсскіе кн[ѧ]зи Ѳедѡрꙋ Свѧтославичю, и та мѣста к Резани. А в Тꙋлꙋ и в Берестеи не встꙋпат[и]сѧ мнѣ, великомꙋ кн[ѧ]зю Васил[ь]ю Васил[ь]евичю, ни моемꙋ братꙋ молодшемꙋ, кн[ѧ]зю Иванꙋ Андрѣевичю, ни нашемꙋ братꙋ молѡдшемꙋ, кн[ѧ]зю Михаилу Андрѣевичю, ни нашемꙋ братꙋ молодшемꙋ, кн[ѧ]зю Васил[ь]ю ꙗрославичю. Тако ж в землю в Резанскꙋю не встꙋпатис[ѧ] и во кн[ѧ]зи резанскіе. А со кн[ѧ]зем прѡнским и сь ег[о] брат[ь]ею любѡв[ь] взѧл еси ты, кнѧз[ь] велики Иван. А что сѧ промеж вас ꙋчинит, ино промеж вас ꙋправити мнѣ, великомꙋ кн[ѧ]зю Васил[ь]ю Васил[ь]евичю, а вам мене слꙋшати. А что сѧ ꙋчинит меж вас какова обида, и вам ѡтослат[и] своих боѧръ, ини ꙋчинѧт исправꙋ. А о чем сѧ сопрꙋт, ино им трети ѡ[те]ць наш, митрополит. А ког[о] митрополит обвинит, ино обидное ѡтдати.

Download XML • Download text • Sentence view • Dependency trees