Text view

Universal Dependencies - Old East Slavic - RNC

LanguageOld East Slavic
ProjectRNC
Corpus Parttest
AnnotationLyashevskaya, Olga; Skachedubova, Maria
Javascript seems to be turned off, or there was a communication error. Turn on Javascript for more display options.
index • sentence 1 - 6 < sentence 7 - 17 > sentence 18 - 24
И вы бы к своим отцом духовным, к священником, на покаяние приходили почасту. А что вам заповедают держать по правилом святых апостол и святых отець пост или молитву, или ино что, и вы то приимайте с любовью и держите крепко. А во вся бы есте говения постилися и мясных брашен и млека и яиць не ели. Также и межь говениев в среду и в пяток мяса и млека, и яиць не ясте. А кумиром бы есте не служили, ни треб их не приимали, ни Войпелю болвану не молитеся по древнему обычяю и всех богу ненавидимых тризнищ не творите идолом. Ни женитв незаконных не чините богумерскых, якоже слышу о вас, что деи у вас поимаются в племени по ветхому по татарскому обычаю: хто у вас умрет, и вторы[й] деи его брат жену его поимает, и третьи деи брат его такожде творит. А жены деи ваши ходят простовласы, непокровеными главами. Ино то чините не по закону християнскому, то есть развратно вере нашой православной, и вы бы от сих мест напред так не чинили, как невернии чинят. А которым у вас женитися, и они бы женилися с благословением от священника, с обручянием и с венчанием, по закону християнскому, ни в роду, ни в племяни. А жены бы ваши имели покровены главы. Да и о всем управлении християнском въспрашивайтеся своими отци духовными с священники, чтобы есте жили по закону великаго нашего православья, занеже кто от вас незаконно что учинят, и за то божий гнев приходит на християнство - овогда рати, иногда же глади, овогда падение человеком и скотом, сиречь смерть.

Download XML • Download text • Sentence view • Dependency trees