| s-1
| Мы, мужи полочѧн(е), даемъ вѣдати, кто на сию грамот(у) оузрит(ь) или оуслышит(ь) чтучи. |
| s-2
| Кнѧз(ь) великыи Витовтъ литовьскии, наш осп(о)д(а)рь, докончал промежи нас и смирилъ нас вѣчно межи Полоцког(о) город(а) и Ризьког(о) города, штобы полочѧном доброволно ехат(и) к Ризѣ, такьже рижѧном к Полоцку, безъ всѧкоѧ завады, ни ѡдног(о) не выемши, доброволно ему купит(и) и продат(и). |
| s-3
| Также полочѧн(о)мъ оу Ризѣ, а рижѧном оу Полочку никакое малое торговле не торговати, што розницею зовут(ь). |
| s-4
| А то мы какъ оу Полоцку, а рижѧне оу Ризѣ, оучинимъ и поставим, а любо какъ можем межи себе оуровнат(и). |
| s-5
| Также могут(ь) полочѧне мимо Ригу оу землю, а рижѧном мимо Полтескъ оу землю, куда хочют(ь), то на ѡбѣ сторонѣ межи нас волно водою и землею. |
| s-6
| Н(ы)не ж бы кнѧз(ь) великыи Витовтъ, ѡсп(о)д(а)рь наш, а любо его послѣдкове, кто коли будет(ь) ѡсп(о)д(а)рь полоцкіи, оу Полоцку исклад вчинили, а любо мештерь задвиньскии в Ризѣ, а тотъ исклад держѧт(и) на ѡбѣ сторонѣ оу Полоцку и в Ризѣ такъ, какъ оуставленъ будет(ь). |
| s-7
| А полочѧном блюсти рижѧнина оу Полоцку, какъ себе, а рижѧном блюсти полочѧнина оу Ризѣ, себе ѡборонѧт(и). |
| s-8
| Аже полочѧнин што проступит(ь) оу Ризѣ, ино имъ того до Полоцка послат(и), ино его тамъ полочѧне ѡсудѧт(ь) по своему праву. |
| s-9
| Также нѣмецкии купець што проступить оу Полоцку, ино его послат(и) к Ризѣ, ино его тамъ ѡсудѧт(ь) по ризькому праву. |
| s-10
| Также оу Полоцку соль вѣсити на скалвах тым же вѣсомъ, што воскъ вѣсѧть, тыми же колоколы. |
| s-11
| Вѣсу полоцкому быти ризьког(о) полупудом болши. |
| s-12
| Про то же сперва рижѧном послат(и) свои колоколы и скалвы к Полоцьку на свою истраву. |
| s-13
| Потом же сотрутсѧ тыи колоколы, или изломѧтсѧ, или погибнуть, ино намъ, полочѧном, послат(и) к Ризѣ на свою истраву на свои пѣнѧзи да оучинит(и) тыи колоколы по старому праву и полѣпшит(и). |
| s-14
| Также серебрьныи вѣсы оу Ризѣ дѣржѧт(и) полузолотником болши во ѡдног(о) рублѧ. |
| s-15
| Также вѣсцѣмъ кр(е)сть цѣловат(и) нынѣ и потом, коли надобѣ, што имъ право вѣсити на ѡбѣ сторонѣ, ѡдном(у), какъ и другом(у), а вѣсцю ѡтступит(и) прочь ѡт скалвъ, а рукою не примат(и). |
| s-16
| А вѣсебное имати вѣсцю, как оу Полоцку на рижѧнех емлют(ь), такъ имат(и) оу Ризе на полочѧнех вѣсебное. |
| s-17
| Аже будет(ь) котораѧ ѡбида или завад(а) межи кимъ на ѡбѣ сторонѣ, ино знати истьцю истьца, а никому иному в тое сѧ не вступати, ни томъ рубежѧ держѧт(и) на ѡбѣ сторонѣ. |
| s-18
| Аже будет(ь) межи мештерем задвиньскимь или которыи ѡпослѣ будет(ь), межи земли и люди, ино купцюви ч(и)стъ путь, его товару, на ѡбѣ сторонѣ и его животу, оузѧт(и) ему свои товаръ, куда хочет ехат(и) и поити, коли ему надобѣ: или по воде, или по суху, или оу город, или на пути. |
| s-19
| Про то ж бы тое смиренье вѣчно стоѧло непорушено со ѡбою сторону межи нами, полочѧны и рижѧны. |
| s-20
| И пѣчѧти есмо свои привѣсили к сеи грамоте. |
| s-21
| А писана быс(ть) грамот(а) сѧ оу Могилевѣ, по Б(о)жьемь роженьи 1000 лѣт и 400 и 7 лѣт. |
| s-22
| А пѣчѧтана оу Ризѣ, оу семую суботу, м(есе)ца маѧ 14 день. |