| s-1
| Мы, ратьмане ризькии, скончали ме съ полочан(ы), на Б(о)жью м(и)л(о)сть надеючес(ѧ), што же полочаном всем немечькымъ купьцем ризьким слично и право дѣѧти всѧкомъ торговем дѣлѣ и торговлею, без всѧѧ хитрости право чинит(и) на обѣ сторон(е) межи собою. |
| s-2
| Потом полочаном немечьким купьцем съ всем oдинoчьcтвом за себе и за последнихъ будущихъ доброю волею ихъ пускати оу Полочьку торговат(и) и с гостемь, и съ полоч(а)ны все сполу, то будь мало или велико, во всѧкои торговли, какыи ли ни былъ товаръ, никакого чего выложено, безъ всѧкоѧ хитрости. |
| s-3
| Тако же мы хочем руськимъ купьцемь оу Ризе чинит(и). |
| s-4
| Потом полочаном стеречи немечьских купьцевъ какь своѧ брат(ь)ѧ, и право суд(и)ти ему, и право деяти во всѧком дѣле без всѧкоѧ хитрости. |
| s-5
| Тако же мы хочем полочаном оу Ризе чинит(и). |
| s-6
| Потом, аще которы немьчинъ извинитьсѧ оу Полочьсце, того немьчина ѡттослати оу Ригу; ратьмане его судѧт(ь) по своеи правде. |
| s-7
| Аже полочанин извинитьс(ѧ) оу Ризе, ино его послати оу Польтескь и тамо его свои и казнѧть по своеи правде. |
| s-8
| Потомь держати Полочьки весъ восков(ы)и берьковескъ большьши ризьког(о) берьковьска полъпуда. |
| s-9
| А соль весити пудьнымъ ременемь по старому закону. |
| s-10
| А за которыи весъ неправо будеть, ино ѡтслати оу Ригу правити по старому закону. |
| s-11
| А серебрыны весъ держати по старому закону. |
| s-12
| А весьцем хр(е)стъ целоват(и), што имъ право весити на обѣ стороне безъ всѧѧ хитрости во всѧком весу. |
| s-13
| А ѡт веса оузѧт(и) по ом закону. |
| s-14
| А мы оу Ризе руському купьцеви тако же чинимъ. |
| s-15
| Потомъ ажь бы какое стало нелюбье межи местерѧ и кнѧз(ѧ) великог(о) Витовта, любо межю боѧровъ, любо куньдоревъ, любо риделевъ, любо дворѧнинов на обѣ стороне, въ тое купьцемъ не оуступатисѧ, купьцеви приехат(и), ѡт(ъ)ехат(и) ч(и)сто всегды. |
| s-16
| Потомъ, што починит(ь)сѧ оу рубежи какое мешанье, то опрочь купьцев; а купьцемъ оу тое не оуступатисѧ. |
| s-17
| Знати истьцю истьца во всѧкомъ дѣле. |
| s-18
| А сую грату намъ, немьцемъ, и вамъ, полочан(о)мъ, межи себе крѣпко держати по хрестьному целованью и по чатемъ безъ всѧкоѧ хитрости. |
| s-19
| А писано въ лѣт(о) по Рож(е)стве Б(о)жии 1000 и 400 въ пѧтое лѣт(о), въ третью нед(е)лю перед Ишествиемь с(вя)т(о)го Д(у)ха. |