| s-1
| В лѣто 6979 вверже князь великий Иванъ Васильевич нелюбие на Великий Новъгород, нача рать свою копити и нача посылати на новъгородцкиа волости. |
| s-2
| И взяша преже Русу и святыя церкви пожгоша, и всю Русу выжгоша, и поидоша на Шалону воюючи; а псковичи по князѣ пособляюще, и много зла новгородцьким волостем учиниша. |
| s-3
| И новгородци изыдоша противу себе на Шалону, а к Русѣ послаша новгородци судовую рать, и пѣши бишися много, и побиша москвич много; и пѣшей рати паде много, а иныи разбѣгошася, а иных москвичи поимаша; а коневаа рать не пошла к пѣшей рати на срок в пособие, занеже владычнь стягъ не хотяху ударитися на княжю рать, глаголюще: 'Владыка нам не велѣл на великого князя руки подынути, послалъ нас владыка на пьскович'. |
| s-4
| И начаша новгородци вопити на больших людей, которыи приехали ратью на Шолону. |
| s-5
| 'Ударимся нынѣ', кождо глаголюще: 'Язъ человѣкъ молодый, испротеряхся конемъ и доспѣхом'. |
| s-6
| Моськвичамь же до понедѣлника отлагающим, бяше бо недиля. |
| s-7
| И начаша ся бити, и погнаша новгородци москвичь за Шолону рѣку, и ударишася на новгородцевъ западнаа рать татарове, и паде новгородцевъ много, а иныи побѣгоша, а иных поимаша, а иных в полонъ поведоша, и много зла учиниша; а все то створися до великого князя. |
| s-8
| И послаша новгородци посла в Литву, чтобы король всѣл на конь за Новъгород. |
| s-9
| И посол ездил кривымъ путем в Немци, до князя немецкого, до местера, и възвратися в Новъгород, глаголюще, яко: 'Местеръ не дасть пути чрес свою землю в Литву ѣхать'. |
| s-10
| И по малѣ времени прииде князь великий Иван Васильевич со всѣми силами на Русу, и болши зла учинишася. |
| s-11
| И бысть в Новѣгороди молва велика, и мятеж мног, и многа лжа неприазнена, сторожа многа по граду и по каменным кострам на переменах день и нощь. |
| s-12
| И раздѣлишася людие: инѣи хотяху за князя, а инии за короля за литовьского. |
| s-13
| И увѣдавъ, князь великий больма разгнѣвася и посѣче 4 боярина: посадника новгородцкаго Дмитрия Исаковича, Василья Ивановича, Киприана Сергиевича, Еремиа, владычня чашника, - полоняным глаголюще, яко: 'Вы за короля задаватися хотѣсте'; а иных с собою поведе на Москву. |
| s-14
| И пожгоша новгородци вси посады около Новагорода, и въ Звѣринцах церковь новаа святый Семионъ огорѣ, и Онтоновъ манастырь, и Полянку всю, и Юрьев манастырь, и Городище все, и Рожественый манастырь и церковь огори. |
| s-15
| И много бысть новгородцемь пагубы: и хлѣбъ дорог, и не бысть ржи на торгу в то время, ни хлѣба, толко пшеничный хлѣб, и того по оскуду. |
| s-16
| И бысть на лутьшии люди молва, яко тѣ приведоша великого князя на Новогород, а то Богъ сердевицедь и суди им, зачинающим рать и обидящим нас. |
| s-17
| В то же время князь великий Иван Васильевич посла рать свою за Волок, и князь Василей Васильевич и воевода заволоцкий Василей Микифорович изыдоша противу с своею ратью и съ заволочаны и с печеряны. |
| s-18
| И съступившимся имъ на ратный бой, и паде многое множество с обѣ половинѣ, а двинянѣ не тягнуша по князѣ по Васильи Васильевичѣ и по воеводѣ по Васильи по Микифоровичѣ, и шестники измогоша, и заволочанъ посѣкоша, и двинянъ иссѣкоша. |
| s-19
| А князя Василья Васильевича и воеводу Васильа Микифоровича Богъ ублюде, и приехаша в Новъгород в малѣ дружинѣ, а князю великому хотящю ити к Новугороду. |
| s-20
| И езди нареченый владыка Феофил с посадники новгородцкими и с житьими людми на Коростынѣ и докончал мирѣ съ княземъ великим; и даша князю великому Ивану Васильевичю новгородци полшестѣнацать тысячи рублев, и целоваша новгородци крестъ князю великому, што за короля новгородцемь не задаватися и очицевъ из Литвы не приимать; а все то Богу попущающу грѣх ради наших. |
| s-21
| А перевѣтника Упадыша новгородци казниша, занеже перевѣт держалъ на Новъгород и хотѣл зла Великому Новугороду с своими единомысленики: 5 пушокъ желѣзом заколачивал, оттого мзду взем от злоначалнаго бѣса, и оттого в напасти и в поползение погубное свѣта лишающася, якоже Павел рече: 'Хощет и богатитися, впадают во зло'. |
| s-22
| Како не вострепета, зло мысля на Великий Новъгород, не сытый лукавъства? |
| s-23
| На мьзды ли предаеши врагом Новъгород, о Упадыщче, сладкаго брашна вкусивъ в Великом Новѣградѣ? |
| s-24
| О, колика блага не памятивъ, недостаточное ума достиглъ еси! |
| s-25
| Оле бѣда, рещи, и безаконное поумѣние тогда обрѣте лукаво зломыслие и кознь нечтивую, не язвами уязвити кого, но вся яже во гради погубити и зборищу лукавому предати, якоже тогда ратоборющимся. |
| s-26
| И злочтивому злочтива пагуба. |
| s-27
| Уне бы ти, Упадыше, аще не был бы во утробѣ матерьни, не бы былъ нареченъ предатель Новуграду. |
| s-28
| Но не возможе свершениа положити своему хотѣнию, ни восхотѣ благословениа, но возлюби клятву, прииде ему; и крестьяньстѣй вѣрѣ не гиблющи, якоже козни тоя неподобные и не успѣшное злоимьство, но Богъ за милосердие щедрот, человѣколюбное долготрьпѣние и незлобивое его око како не презрит, и не оставляет благый Богъ нашь, не даст нас во уловление сѣти их и в помнение нечестивых. |
| s-29
| Клятвы убоявшеся, братие, плоды покааниа принесем. |
| s-30
| Но ты, милостивый Спасе, простри руку свою невидимую, изведи нас от всякого зла и буди нам смиренъ помощник в день печали нашия, егда вострепещет душа наша, видящи противныя силы. |
| s-31
| Но ты, милостивый Господи, посли нам от вышняго честнаго престола твоего помощь и оружие непобѣдимое, честный крестъ, молитвами святыя Богородица и всѣх святых. |
| s-32
| Христос - зачало спасению, конець пагубѣ. |