| s-1
| Послание Симона митрополита всея Русии в Великую Пермь. |
| s-2
| Благословение Симона, митрополита всея Русии, в отчину великаго государя, царя русского, о святем дусе възлюбленнаго господина и сына нашего смирения, благороднаго и благовернаго, и христолюбиваго великого князя Иоанна Васильевича, всеа Русии самодръжца, в Великую Пермь, сына моего, великого князя, слузе князю Матфею Михайловичю Пермьскому да и всем пермичем, болшим людем и меншим, мужем и женам, юношам и младенцем, всем православным християном, новопросвещеным господним людем всея области Пермьския земли. |
| s-3
| Благодать и мир вам, и милость от господа бога вседръжителя и его пречистыя матери владычица нашея богородица и приснодевыя Мария, еже есть прибежище всем християном и пристанище тихое обуреваемым во гресех, и всем спасительное упокоение. |
| s-4
| О сем, чада, пишу вам, что есте божиею милостию въсприяли истинную православную християнскую веру греческаго закона и пришли есте от тмы на свет, от неверия в веру и от идолослужения на благочестие, и познали есте истиннаго бога, творца небу и земли, и всей твари, яже суть на небеси и на земли, и породилися есте в купели святым крещением во имя отца и сына и святого духа, и вы бы, сынове, имели велию веру к господу богу, Спасу нашему Исусу Христу, и пречистой его богоматери, да и ко всем святым, и к церквам божиим. |
| s-5
| А держали бы есте веру християнскую честно и твердо, и неподвижно, а к церквам божьим к вечерне и к заутрени, и к обедне приходите с молитвою и милостыню по силе давайте, а святого пения слушайте с страхом. |
| s-6
| А священников, игуменов и попов, и дияконов чтите и слушайте о всем и повинуйтеся им о всех духовных делех по апостольскому словеси, якоже рече: 'Братья, повинуйтеся наставником вашим и покаряйтеся, тии бо бдят о душах ваших, яко слово въздати хотяще, да с радостию се творят, а не воздыхающе', понеже тии суть ходатаи к богу о ваших прегрешениих, а по правилом святых апостол и святых отець и по нашему благословению имеют власть вязати и решати своих детей духовных. |
| s-7
| И вы бы к своим отцом духовным, к священником, на покаяние приходили почасту. |
| s-8
| А что вам заповедают держать по правилом святых апостол и святых отець пост или молитву, или ино что, и вы то приимайте с любовью и держите крепко. |
| s-9
| А во вся бы есте говения постилися и мясных брашен и млека и яиць не ели. |
| s-10
| Также и межь говениев в среду и в пяток мяса и млека, и яиць не ясте. |
| s-11
| А кумиром бы есте не служили, ни треб их не приимали, ни Войпелю болвану не молитеся по древнему обычяю и всех богу ненавидимых тризнищ не творите идолом. |
| s-12
| Ни женитв незаконных не чините богумерскых, якоже слышу о вас, что деи у вас поимаются в племени по ветхому по татарскому обычаю: хто у вас умрет, и вторы[й] деи его брат жену его поимает, и третьи деи брат его такожде творит. |
| s-13
| А жены деи ваши ходят простовласы, непокровеными главами. |
| s-14
| Ино то чините не по закону християнскому, то есть развратно вере нашой православной, и вы бы от сих мест напред так не чинили, как невернии чинят. |
| s-15
| А которым у вас женитися, и они бы женилися с благословением от священника, с обручянием и с венчанием, по закону християнскому, ни в роду, ни в племяни. |
| s-16
| А жены бы ваши имели покровены главы. |
| s-17
| Да и о всем управлении християнском въспрашивайтеся своими отци духовными с священники, чтобы есте жили по закону великаго нашего православья, занеже кто от вас незаконно что учинят, и за то божий гнев приходит на християнство - овогда рати, иногда же глади, овогда падение человеком и скотом, сиречь смерть. |
| s-18
| И вы бы о всем в благочестии и в управлении были, как всякии сущии православнии християне. |
| s-19
| А сию бы есте грамоту прочет, положили в церкви у своих отцов духовных у священников, а священници сию грамоту прочитали бы вам почясту на подкрепление вере християнстей божественаго закона. |
| s-20
| А вы, вси людие Пермьския земли, сее грамоты слушайте со вниманием и творите вся повеленная спасения ради своих душь единородных и бесмертных. |
| s-21
| А священником всем великопермьским также учительная глаголю, чтобы есте о своем священьстве и о душевней ползе, колико мочно, и о своей от бога врученной пастве всегда попечение имели по своему священническому долгу, по господню словеси, глаголющему: 'Ему же бо, рече, много дасться, и много взыщется от него', да не осуждени быхом пред богом были, да возмогли быхом пред господем богом кииждо нас рещи: 'Се яз и дети, яже ми еси дал. |
| s-22
| 'А милость божия и пречистые богородици, и святых великых чюдотворцов Петра и Алексея, и Леонтия, и Стефана епископа пермьскаго, и Сергия, и Кирила, и Варлаама, и всех святых молитва, и нашего смирения благословение да есть со всеми вами, с новопросвещенными господними людьми Христова стада словесных овець. |
| s-23
| Аминь. |
| s-24
| А писана на Москве, лета седмь тысящ девятаго, августа в 22 день. |