| s-1
| Այն մասին թէ ինչպէս կիրակնօրեայ «մանղալավարութիւն»ս տապալեցին... |
| s-2
| Այս կիրակի մեծամասնութիւնը որոշած է մանղալ չվարել։ |
| s-3
| Դժուար կացութեան մէջ եմ։ |
| s-4
| Որոշումը առնուած է երկու երրորդ մեծամասնութեամբ եւ դժուար է բեկանել։ |
| s-5
| Քուէարկութիւնը տեղի ունեցաւ երէկ գիշեր։ |
| s-6
| Երկուքուկէս ձայն պէտք էր մանղալ վարելու համար բայց ես հաւաքեցի մէկ ձայն, կինս երեք ձայն ու մեծամասնութեան որոշումով այս կիրակի թեթեւ բան մը պիտի ուտենք... |
| s-7
| Թերեւս «փաթաթես» կը խաշենք, վրան թեթեւ աղ մը կը ցանենք ու քիչ մըն ալ ձէթ կը քսենք, հետն ալ սալաթ մը... |
| s-8
| Հիւանդանոցի ճաշ... |
| s-9
| Եղածը յեղափոխութիւն էր ու առանց քայլ առնելու... |
| s-10
| Նստած տեղերնին որոշեցին, քուէարկեցին ու այսքան տարուան իմ կիրակնօրեայ մանղալատիրութիւնը մէկ ակնթարթով տապալեցին... |
| s-11
| Զայրացած տունէն դուրս ելայ ու եալլա սինեմա... |
| s-12
| Գացի տեսայ երեք ֆիլմ կայ։ |
| s-13
| Իմ ճաշակիս ֆիլմ մը զատեցի ու մօտեցայ որ տոմս մը առնեմ բայց՝ |
| s-14
| — Մէկ հոգիի համար սրահը չենք բանար, ըսին։ |
| s-15
| Նուազագոյնը չորս հոգի պէտք է։ |
| s-16
| — Երեւի սխալ հասկցաք, ըսի, ուզածս վերելակի տոմս չէ, ֆիլմի համար է։ |
| s-17
| — Ընդհակառակը, շատ ճիշդ հասկցանք... |
| s-18
| Վերելակի պարագային առաւելագոյնը չորս է, իսկ այս սինեմայի պարագային չորսը նուազագոյնն է... |
| s-19
| Նկատի առէք որ այս երկրին մէջ վերելք չկայ, միայն վայրէջք կայ։ |
| s-20
| Բաւական սպասեցի բայց իմ զատած ֆիլմս դիտել ցանկացող մը չգտայ... |
| s-21
| Տոմսավաճառը թելադրեց որ մեծամասնութեան ճաշակին հետեւիմ ու միւս երկու ֆիլմերէն մէկը զատեմ բայց չընդունեցի... |
| s-22
| Ո՞վ ըսաւ թէ մեծամասնութեան ճաշակը անպայման լաւ է... |
| s-23
| Բայց ինչ ընէի... |
| s-24
| Զիս բնաւ չհետաքրքրող ֆիլմ մը դիտէի, պարտուած տուն վերադառնայի ու վրան ալ խաշած փաթաթե՞ս ուտէի... |
| s-25
| Թէ փորձ մը ընէի, երեք հոգի համոզէի ու նպատակիս հասնէի։ |
| s-26
| Փորձեցի ու պատկերացուցէք երեքի տեղ հինգ հոգի համոզեցի եւ ուզած ֆիլմս դիտեցի... |
| s-27
| Թէեւ մէկը քնացաւ ուրիշ մըն ալ ձգեց սրահը դուրս ելաւ բայց միւս երեքը գոհ մնացին եւ իրենց իսկ վկայութեամբ՝ թարմ ճաշակով տուն գացին։ |
| s-28
| Իսկ ես յաղթական տուն վերադարձայ ու փոխանակ մեծամասնութեան ճաշակին զոհ դառնալու, անոնց ճաշակը թարմացնել որոշեցի... |
| s-29
| Ձեր խաշած փաթաթեսն ու սալաթը անուշ ըլլայ ձեզի... |
| s-30
| Բայց կտոր մըն ալ միս հետը կարծեմ թէ բնաւ չի խանգարի... |