| s-1
| Սահա եմ՝ Արմէնին դիմացը։ |
| s-2
| Նոր հասայ, քանի մը բան պէտք է գնեմ Արմէնին քովէն ու շարժիմ դէպի տուն։ |
| s-3
| Ընդհանրապէս Կարոյին քովէն թաքսի կ՚առնէի ու կ՚երթայի, բայց քանի որ կ՚ուզեմ կոր ձեզի ծանօթացնել ճամբան, քալելով պիտի երթամ։ |
| s-4
| Ի միջի այլոց, միշտ զգացած եմ, որ Սահայէն դէպի Էքիզօլուխ երթալը շատ աւելի դժուար է ու յոգնեցուցիչ, քան հակառակը։ |
| s-5
| Յամենայն դէպս, կեցէք՝ գնումս ընեմ Արմէնին քովէն ու քալենք։ |
| s-6
| – Արմէ՛ն , հաճի՛ս , մէկ հատ իտալական, մէկ հատ մալինկ, մէկ հատ սիյահի հաց, մէկ տուփ «Սատա» լոխում, մէկ հատ լամիս պըսքուիթ՝ նորէն «Սատա», երկու հատ ալ մանտարին «Վինիթօ»։ |
| s-7
| Տոպրակներս առի, ու ճամբան սկսաւ։ |
| s-8
| Նախքան քալելս ըսեմ, որ Արմէնին դիմացի մայթը Քէսապի ամենասթրաթեճիկ մայթն է։ |
| s-9
| Ամէն մարդ կը նախընտրէ հոն նստիլ։ |
| s-10
| Ուրեմն Արմէնին քով ուրիշ խանութ մը կար, կարծեմ անունը Զահթարեան էր։ |
| s-11
| Ինծի համար միշտ զարմանալի էր, որ Արմէնը շատ աւելի յաճախորդ ունի քան այդ կողքի խանութը, հակառակ որ խանութները ոռ-ոռի են։ |
| s-12
| Քիչ մը որ բարձրանանք, դպրոցի մուտքն է։ |
| s-13
| Դէպի ձախ որ դառնանք, արդէն կը սկսին շարք մը խանութներ. Կարոն՝ որպէս թաքսի եւ ճամբորդութիւններու գրասենեակ, կողքը՝ նպարավաճառ մը։ |
| s-14
| Երեւի քովէն առնեմ վարունգ, լոլիկ եւ քիչ մը պտուղ։ |
| s-15
| Յիշածիս համաձայն, կողքը փուռ մը կայ՝ Նորմայենց փուռը, կողքը՝ խանութ մը, որ քունաֆէ պըլ ճըպնէ կը ծախէր, յետոյ ալ՝ դեղարանը։ |
| s-16
| Քիչ մըն ալ քալենք ու կը դառնանք աջ, ու արդէն կը սկսի զզուելի զառիվերին սկիզբը։ |
| s-17
| Ձախ կողմս գերեզմանատունն է, կողքը խանութ մը կար, որ քասեթներ կը ծախէր ժամանակին։ |
| s-18
| Շունչ առնելով կը բարձրանամ։ |
| s-19
| Ձախիս նոր շէնքեր են, անկիւնին վրայ սափրիչ մը կայ։ |
| s-20
| Աջիս՝ դէպի ներս քիչ մը, Մանճիկեաններու տունն է։ |
| s-21
| Կը շարունակեմ, մինչեւ հասնիմ «Օթել Ռաուտան», յետոյ քանի մը նոր շէնք ու քաքէն գուրպ մը՝ դէպի ձախ։ |
| s-22
| Ի միջի այլոց, դէպի աջ գաղտնի ճամբայ մը կայ, որ կը հասցնէ եկեղեցի։ |
| s-23
| Հիմա ժամանակը չէ։ |
| s-24
| Դժոխային զառիվերի երկրորդ մասն է՝ արդէն քրտինքներու մէջ եմ։ |
| s-25
| Մինչեւ որ ճամբան ետ շտկուի, լռեմ քիչ մը։ |
| s-26
| Կարծես թէ շտկուեցաւ։ |
| s-27
| Հիմա տեղ մըն եմ, որ, տղաքը կ՚ըսէին դամասկոսցիներու ՍԵՄ-ի բանակավայրը կը տանի. չեմ գացած հոն։ |
| s-28
| Քիչ մը առջեւ Դերձակեաններուն տունն է, յետոյ՝ մուստաուսաֆը, յետոյ՝ քանի մը նոր շէնք։ |
| s-29
| Երկու դրացի կայ այս շէնքին մէջ, որ կը ճանչնամ՝ Խայէլեանները եւ Գանտիլեանները։ |
| s-30
| Քանի մը քայլ առջեւ՝ հեռուէն կ՚երեւայ կարմիր գոյնի Փօլատեաններուն տունը, իսկ անկիւնին վրայ՝ կաթոլիկներու ճամբարը։ |
| s-31
| Այդ ճամբով, որ շարունակենք, կը հասնինք ՀՄՄ-ի բանակավայրը։ |
| s-32
| Դէ՛հ , բայց գիտէք՝ իմ ճամբաս դէպի տուն է։ |
| s-33
| Եկէք շարունակենք. քրտինքս կը հոսի կոր ու ճամբուն դեռ մէկ երրորդը հազիւ կտրեցինք, չնայած հիմա ճամբան ուղիղ է քիչ մը, աւելի դիւրին։ |
| s-34
| Ճամբարէն քանի մը քայլ առջեւ՝ ձախ կողմի վրայ, «Կազդուրման կայան»ն է։ |
| s-35
| Ընդհանրապէս այստեղ արծուիկները կ՚իջնէին, բայց ես քանի մը անգամ իջած եմ այնտեղ «Օգնութեան Խաչ»ին եւ «Պատսպարան»ին հետ։ |
| s-36
| Ասոնք երեւի զատ յօդուած մը կ՚ուզեն։ |
| s-37
| Շարունակեմ։ |
| s-38
| Հարիւր մեթր անդին՝ անկիւնը ճաշարան մը կայ, որուն անունը չեմ յիշեր, ու մէկ հատ ալ նպարավաճառ։ |
| s-39
| Դէպի աջ կը դառնամ, ու կը սկսին Քէսապի լեռներուն եւ ձորերուն հրաշալի տեսարանները։ |
| s-40
| Տեսարանը մտքիս մէջ քիչ մը պղտոր է։ |
| s-41
| Բայց, օրինակ, շատ լաւ կը յիշեմ Պալապանեաններուն տունը՝ ճամբու ձախ կողմը։ |
| s-42
| Կը տեսնեմ մէկական բերդի նման մեծ-մեծ շէնքեր՝ ճամբու աջ կողմը։ |
| s-43
| Կը քալեմ քիչ մը զառիվար, քիչ մը զառիվեր, մինչեւ յայտնուի ամերիկեան հին մեծ օթոն. «Եումուրթա»յին օթոն է։ |
| s-44
| Կարծես թէ Էքիզօլուխին մօտեցայ. Փանոյեաններուն տունն է աջիս, քիչ մը առջեւ՝ Հալլաճեաններունը, դիմացնին՝ Թութունճեաններու վիլլան, իսկ դիմացը՝ հրաշալի ակը։ |
| s-45
| Այ, հոս պէտք է կենալ։ |
| s-46
| Արդէն հերթ կայ. ամէն մէկը, ձեռքին կալոն մը կամ շիշ մը, ջուր պիտի լեցնէ, կամ պարզապէս կ՚ուզեն խմել ու լուացուիլ։ |
| s-47
| Կարեւորը՝ առանց հոսկէ ջուր խմելու տուն պիտի չերթամ։ |
| s-48
| Փոքր տարիքիս կը կարծէի, որ այս ակը սառնարանի մը կապուած է, որովհետեւ չի կրնար ասանկ տաք եղանակի այսքան պաղ ջուր գայ։ |
| s-49
| Հերթս եկաւ, կը լուացուիմ կոր, ջուր կը խմեմ կոր հնարաւորին չափ ու կ՚երեւակայեմ կոր ակին կապուած սառնարանը։ |
| s-50
| Կարծես թէ պէտք է շարժիմ, որովհետեւ ետեւս հերթը երկարեցաւ։ |
| s-51
| Քանի մը քայլ առաջ՝ ակին կողքը, «Չաղլասեան Օթել»ն է, դիմացը՝ նպարավաճառ մը ու քիչ մը վեր՝ ճաշարան մը։ |
| s-52
| Երկուքին ալ անունը չեմ յիշեր։ |
| s-53
| «Չաղլասեան Օթել»ին կողքը քասթըրմէ՝ կտրուկ ճամբայ մը կայ, որ դէպի բանակավայր կը հանէ. բայց գիտէք, եղածով զառիվեր է ու հեչ սիրտ չունիմ բարձրանալու։ |
| s-54
| Նորմալ ճամբաս կը շարունակեմ, մինչեւ գայ շատ մեծ, դէպի աջ գուրպ մը։ |
| s-55
| Աս գուրպը մեծ պատմութիւն ունի ողորմած Ապու Ազիզին հետ։ |
| s-56
| Ամէն անգամ, որ յաղթահարէր, «զամմուր հաուան» ամուր կը սեղմէր ու կարծես կ՚ուզէր գուրպին ճարտարապետին ըսել «Քաքնեմ խելքիդ, աս ինչ քաքէն գուրպ էր»։ |
| s-57
| Եկէք շարունակեմ տունիս կողմը։ |
| s-58
| Այստեղ քանի մը տուն կը յիշեմ՝ Էքմեքճեանները, Տաքէսեանները, Բախտիկեանները, ու յետոյ կը սկսէր գեղեցիկ վիլլաներու շարք մը։ |
| s-59
| Յետոյ հասկցայ, որ ատոնք բոլորն ալ զինուորական մարդոց տուներ էին։ |
| s-60
| Այս շարքին մէջ վերջին տունը մեր տունն էր՝ գետնայարկ, պճլիկ պալքոնով։ |
| s-61
| Ակոն եւ Մունան հանգիստ նստած իրենց սուրճը կը խմեն ու հեռուէն կը նետեն. «Ուշացար...» |