| s-1
| Ռուբինյանը հաստատում է՝ ՀՀ-ն նոր առաջարկներ է ուղարկել դեմարկացիայի գործընթացի վերաբերյալ |
| s-2
| Նաիրա Նալբանդյան |
| s-3
| ԱԺ փոխնախագահ Ռուբեն Ռուբինյանը հաստատում է՝ Հայաստանը նոր առաջարկներ է ուղարկել Ադրբեջանի հետ դեմարկացիայի և դելիմիտացիայի գործընթացի վերաբերյալ, բայց թե կոնկրետ ինչ առաջարկներ, իշխանական պատգամավորը չի մանրամասնում։ |
| s-4
| Հորդորեց դիմել կառավարությանը։ |
| s-5
| Արդեն 3 ամսից ավելի մամուլի խոսնակ չունեցող վարչապետ Փաշինյանի գրասենյակից և ԱԳՆ-ից տեղեկություն ստանալ մեզ, սակայն, չհաջողվեց։ |
| s-6
| «Ազատությունը» անցած շաբաթ նաև գրավոր հարցում էր ուղարկել արտաքին գերատեսչությանը, որի պատասխանն առայժմ չունենք։ |
| s-7
| «Պատկերացումներն ընդհանրապես այն ծիրում են, որի մասին հրապարակային հայտարարել են մեր համապատասխան գերատեսչությունները և պաշտոնյաները», - այսօր ասաց Ռուբինյանը: |
| s-8
| Հայկական կողմից առաջարկների մասին հունվարի 14-ին խոսել էր Ռուսաստանի արտգործնախարարը։ |
| s-9
| Սերգեյ Լավրովն ասել էր, թե Հայաստանը նոր առաջարկներ է ներկայացրել Ադրբեջանի հետ սահմանազատման հանձնաժողով ձևավորելու հարցով, որը ռուսական կողմի միջոցով փոխանցվելու է Բաքվին։ |
| s-10
| Ընդդիմադիր պատգամավորները մտահոգված են, որ հերթական գործընթացի մասին հայ հանրությունը դարձյալ այլ երկրի պաշտոնյայից է տեղեկանում։ |
| s-11
| «Պատիվ ունեմ» խմբակցության պատգամավոր Տիգրան Աբրահամյանն ասում է՝ մինչև այժմ հասկանալի չէ, թե այս հարցում ինչ պատկերացում ունի իշխանությունը, քանի որ բազմիցս իրարամերժ հայտարարություններ են հնչել։ |
| s-12
| «Առհասարակ իմ տպավորությամբ՝ իշխանությունը ընդհանուր տրամաբանության մեջ պատկերացում էլ չունի, թե իրականության մեջ որ կետից է ճիշտ սկսելը և որ կետում ավարտելը: |
| s-13
| Կարծում եմ` նաև գնահատված չեն այն սպառնալիքները, որոնք այս գործընթացից, որովհետև գործընթացը բավականին երկարաժամկետ է, և պետք է գնահատել ոչ միայն մեկնարկի հետ կապված ռիսկերը, այլ այն ողջ սպառնալիքները, որոնք առաջիկա մի քանի տասնամյակը մեզ ուղեկցելու են: |
| s-14
| Որևէ զարմանալի բան չկա, որ իշխանությունը որևէ բան խորհրդարանական ընդդիմությանը չի փոխանցել: |
| s-15
| Ես նույնիսկ կասկածում եմ, որ նրանք նաև իրենց թիմակիցներին են փոխանցել, և կարծում եմ` բացառությամբ մի քանի անձանց, ամբողջական տեղեկատվություն նույնիսկ իշխանությունը չի տիրապետում», - ասում է Տիգրան Աբրահամյանը: |
| s-16
| Իշխանական շատ պատգամավորներ Մոսկվայի միջոցով Բաքվին ուղարկված առաջարկների մասին մեր հարցերը անպատասխան թողեցին, ասելով, որ տեղեկություններ չունեն։ |
| s-17
| ԱԺ ընդդիմադիր փոխնախագահ Իշխան Սաղաթելյանի համար տեղի ունեցողը հուսադրող չէ։ |
| s-18
| Ասում է՝ Ադրբեջանը ամիսներ շարունակ զավթել է Հայաստանի սուվերեն տարածքն ու ամրանում է այստեղ, սահմանին նոր զոհեր ենք ունենում, ոչ մի նպաստավոր պայման բանակցությունների համար չկա, կարծում է պատգամավորը: |
| s-19
| «Ի՞նչ պայմաններով, ի՞նչ իրավիճակում, ի՞նչ ֆորմատով, միայն ա՞յդ հարցն է քննարկվելու, արդյոք այդ հարցով չի փակվում Արցախի կարգավիճակի հարցը: |
| s-20
| Այո կամ ոչի պատասխան չի, պետք է ամբողջական նայել հարցին: |
| s-21
| Փաստն այն է, որ թշնամին իր քայլերով և գործողություններով այս սահմանազատման ու սահմանագծման աշխատանքն իրականացնում է, և այս պայմաններում, այս իրավիճակում մենք խոսել ենք այդ մասին, հարցերը պետք է քննարկվեն փաթեթային: |
| s-22
| Հիմա իրենք ինչ առաջարկություն են ներկայացրել` ես չգիտեմ», - նկատեց նա: |
| s-23
| Ըստ Լավրովի՝ գործընթացը կապ չունի Լեռնային Ղարաբաղի կարգավորման հետ։ |
| s-24
| Իսկ Ռուսաստանի դերը պատկերացնում են խորհրդատուի կարգավիճակով, քանի որ Ռուսաստանի գլխավոր շտաբում են քարտեզները, որտեղ արտացոլված են սահմանների փոփոխությունները տարբեր տարիներին։ |
| s-25
| Վարչապետ Փաշինյանը մի քանի անգամ հայտարարել է, որ դեմարկացիա ու դելիմիտացիա իրականացնելու՝ ՌԴ-ի առաջարկներն ընդունելի են Հայաստանի համար, բայց թե կոնկրետ ինչ առաջարկների մասին է խոսքը, մինչ այժմ ոչ Հայաստանը, ոչ Ադրբեջանը, ոչ էլ Ռուսաստանը չեն բացահայտել։ |
| s-26
| Փաշինյանը Ալիևի հետ Սոչիի ու Բրյուսելի հանդիպումներից հետո կառավարության նիստում պաշտպանության նախարար Սուրեն Պապիկյանին հանձնարարել էր կապի մեջ լինել ՌԴ գործընկերոջ հետ ու ճշգրտել դեմարկացիայի և դելիմիտացիայի մանրամասները։ |
| s-27
| Պաշտպանության նախարարությունը այս հանձնարարականից հետո գործընթացի մասին հրապարակային ոչ մի հայտարարություն չի արել։ |