| s-1
| ⲁⲩⲱ ⲃⲟⲉⲥ ⲁϥⲃⲱⲕ ⲉϩⲣⲁⲓ ⲉⲣⲛⲧⲡⲩⲗⲏ ⲁϥϩⲙⲟⲟⲥ ϩⲙⲡⲙⲁ ⲉⲧⲙⲙⲁⲩ ⲁⲩⲱ ⲉⲓⲥⲡⲉⲧϩⲏⲛ ⲉϩⲟⲩⲛ ⲉⲡⲅⲉⲛⲟⲥ ⲛϩⲟⲩⲟ ⲛⲉϥⲙⲟⲟϣⲉ ⲡⲁⲓ ⲉⲛⲧⲁⲃⲟⲉⲥ ϫⲟⲟⲥ ⲉⲧⲃⲏⲏⲧϥ ⲡⲉϫⲁϥ ⲉϩⲟⲩⲛ ⲉϩⲣⲁϥ ⲛϭⲓⲃⲟⲉⲥ ϫⲉⲁⲙⲟⲩ ⲛⲅϩⲙⲟⲟⲥ ⲙⲡⲉⲓⲙⲁ ⲡⲉⲧϩⲏⲡ ⲏ ⲡⲉⲧⲉⲛⲥⲉⲉⲓⲙⲉ ⲉⲣⲟϥ ⲁⲛ ⲁϥⲃⲱⲕ ⲁϥϩⲙⲟⲟⲥ |
| s-2
| ⲁⲩⲱ ⲃⲟⲉⲥ ⲁϥϫⲓ ⲙⲙⲏⲧ ⲛⲣⲱⲙⲉ ⲉⲃⲟⲗ ϩⲛⲛⲉⲡⲣⲉⲥⲃⲩⲧⲉⲣⲟⲥ ⲛⲧⲡⲟⲗⲓⲥ ⲡⲉϫⲁϥ ⲛⲁⲩ ϫⲉϩⲙⲟⲟⲥ ⲛⲏⲧⲛ ⲙⲡⲉⲓⲙⲁ ⲁⲩϩⲙⲟⲟⲥ |
| s-3
| ⲁⲩⲱ ⲃⲟⲉⲥ ⲡⲉϫⲁϥ ⲙⲡⲉⲧϩⲏⲛ ⲉϩⲟⲩⲛ ⲉⲡⲅⲉⲛⲟⲥ ϫⲉⲉⲧⲃⲉⲧⲙⲉⲣⲓⲥ ⲛⲧⲥⲱϣⲉ ⲉⲧⲧⲁⲡⲉⲛⲥⲟⲛ ⲧⲉ ⲁⲃⲓⲙⲉⲗⲉⲭ ⲧⲁⲓ ⲉⲛⲧⲁⲩⲧⲁⲁⲥ ⲛⲛⲟⲉⲙⲓⲛ ⲧⲉⲛⲧⲁⲥⲕⲧⲟⲥ ⲉⲃⲟⲗ ϩⲛⲧⲥⲱϣⲉ ⲙⲙⲱⲁⲃ |
| s-4
| ⲁⲛⲟⲕ ϩⲱ ⲁⲓϫⲟⲟⲥ ϫⲉϯⲛⲁⲧⲁⲩⲉⲡϣⲁϫⲉ ⲉⲛⲉⲕⲙⲁⲁϫⲉ ⲉⲓϫⲱ ⲙⲙⲟⲥ ϫⲉϫⲓ ⲛⲁⲕ ⲛⲧⲙⲉⲣⲓⲥ ⲙⲡⲉⲙⲧⲟ ⲉⲃⲟⲗ ⲛⲛⲉⲧϩⲙⲟⲟⲥ ⲁⲩⲱ ⲙⲡⲉⲙⲧⲟ ⲉⲃⲟⲗ ⲛⲛⲉⲡⲣⲉⲥⲃⲩⲧⲉⲣⲟⲥ ⲙⲡⲗⲁⲟⲥ ⲉϣⲱⲡⲉ ϭⲉ ⲕⲛⲁⲟⲡⲕ ⲉⲣⲟⲥ ϫⲓⲧⲥ ⲉϣⲱⲡⲉ ⲇⲉ ⲛⲅⲛⲁϫⲓⲧⲥ ⲁⲛ ⲙⲁⲧⲁⲙⲟⲓ ⲁⲩⲱ ϯⲛⲁⲉⲓⲙⲉ ϫⲉⲙⲛϭⲉ ⲛⲃⲗⲗⲁⲕ ⲉⲧⲣⲉϥϫⲓⲧⲥ ⲁⲩⲱ ⲁⲛⲟⲕ ⲡⲉⲧⲛⲏⲩ ⲙⲛⲛⲥⲱⲕ ⲛⲧⲟϥ ⲇⲉ ⲡⲉϫⲁϥ ϫⲉⲁⲛⲟⲕ ⲡⲉ ⲉⲧⲛⲁϫⲓⲧⲥ |
| s-5
| ⲁⲩⲱ ⲃⲟⲉⲥ ⲡⲉϫⲁϥ ⲛⲁϥ ϫⲉϩⲙⲡⲉϩⲟⲟⲩ ⲉⲧⲕⲛⲁϫⲓ ⲛⲧⲥⲱϣⲉ ⲛⲧⲟⲟⲧⲥ ⲛⲛⲟⲉⲙⲓⲛ ⲁⲩⲱ ⲛⲧⲟⲟⲧⲥ ⲛϩⲣⲟⲩⲑ ⲧⲙⲱⲁⲃⲓⲧⲏⲥ ⲧϩⲓⲙⲉ ⲙⲡⲉⲛⲧⲁϥⲙⲟⲩ ⲛⲧⲟⲥ ϩⲱⲱⲥ ϩⲣⲟⲩⲑ ⲕⲛⲁϫⲡⲓϫⲓⲧⲥ ϩⲱⲥⲧⲉ ⲉⲧⲟⲩⲛⲉⲥ ⲡⲣⲁⲛ ⲙⲡⲉⲛⲧⲁϥⲙⲟⲩ ⲉϫⲛⲧⲉϥⲕⲗⲏⲣⲟⲛⲟⲙⲓⲁ |
| s-6
| ⲁⲩⲱ ⲡⲉⲧϩⲏⲛ ⲉϩⲟⲩⲛ ⲉⲡⲅⲉⲛⲟⲥ ⲡⲉϫⲁϥ ϫⲉⲛϯⲛⲁϣϫⲓⲧⲥ ⲁⲛ ⲛⲁⲓ ⲙⲏⲡⲟⲧⲉ ⲛⲧⲁⲧⲁⲕⲟ ⲛⲧⲁⲕⲗⲏⲣⲟⲛⲟⲙⲓⲁ ⲛⲧⲟⲕ ϫⲓ ⲛⲁⲕ ⲙⲙⲟⲥ ⲉⲡⲁⲙⲁ ϫⲉⲁⲛⲟⲕ ⲛϯⲛⲁϣϫⲓⲧⲥ ⲁⲛ |
| s-7
| ⲁⲩⲱ ⲡⲁⲓ ⲡⲉ ⲡⲇⲓⲕⲁⲓⲱⲙⲁ ϫⲓⲛⲛϣⲟⲣⲡ ϩⲙⲡⲓⲥⲣⲁⲏⲗ ⲉⲧⲃⲉⲡⲉⲧϫⲓ ⲉϩⲟⲩⲛ ⲉⲡⲅⲉⲛⲟⲥ ⲁⲩⲱ ⲉⲧⲃⲉⲧϣⲃⲓⲱ ⲉⲧⲁϩⲟ ⲉⲣⲁⲧⲟⲩ ⲛⲛϣⲁϫⲉ ⲛⲓⲙ ⲁⲩⲱ ⲡⲣⲱⲙⲉ ⲁϥⲃⲱⲗ ⲉⲃⲟⲗ ⲙⲡⲉϥϩⲩⲡⲟⲇⲏⲙⲁ ⲉⲧⲣⲉϥⲧⲁⲁϥ ⲙⲡⲉⲧϩⲓⲧⲟⲩⲱϥ ⲁⲩⲱ ⲡⲁⲓ ⲡⲉ ⲡⲙⲁⲣⲧⲩⲣⲓⲟⲛ ⲉⲧϩⲙⲡⲓⲥⲣⲁⲏⲗ |
| s-8
| ⲡⲉⲧϫⲓ ⲇⲉ ⲉϩⲟⲩⲛ ⲉⲡⲅⲉⲛⲟⲥ ⲡⲉϫⲁϥ ⲛⲃⲟⲉⲥ ϫⲉϫⲓ ⲛⲁⲕ ⲉⲡⲁⲙⲁ ⲁⲩⲱ ⲁϥⲃⲱⲗ ⲉⲃⲟⲗ ⲙⲡⲉϥϩⲩⲡⲟⲇⲏⲙⲁ ⲁϥⲧⲁⲁϥ ⲛⲁϥ |
| s-9
| ⲃⲟⲉⲥ ⲇⲉ ⲡⲉϫⲁϥ ⲛⲛⲉⲡⲣⲉⲥⲃⲩⲧⲉⲣⲟⲥ ⲙⲛⲡⲗⲁⲟⲥ ⲧⲏⲣϥ ϫⲉⲛⲧⲱⲧⲛ ⲧⲉⲧⲛⲟ ⲙⲙⲛⲧⲣⲉ ⲙⲡϩⲟⲟⲩ ϫⲉⲁⲓϫⲓ ⲛⲛⲁⲁⲃⲓⲙⲉⲗⲉⲭ ⲧⲏⲣⲟⲩ ⲁⲩⲱ ⲛⲉⲧϣⲟⲟⲡ ⲧⲏⲣⲟⲩ ⲛⲭⲁⲓⲗⲉⲱⲛ ⲙⲛⲙⲁⲁⲗⲱⲛ ⲛⲧⲟⲟⲧⲥ ⲛⲛⲟⲉⲙⲓⲛ |
| s-10
| ⲁⲩⲱ ϩⲣⲟⲩⲑ ⲧⲙⲱⲁⲃⲓⲧⲏⲥ ⲧϩⲓⲙⲉ ⲙⲙⲁⲁⲗⲱⲛ ⲁⲓϫⲓⲧⲥ ⲉⲩⲥϩⲓⲙⲉ ⲛⲁⲓ ⲉⲧⲟⲩⲛⲉⲥ ⲡⲣⲁⲛ ⲙⲡⲉⲛⲧⲁϥⲙⲟⲩ ⲉϫⲛⲧⲉϥⲕⲗⲏⲣⲟⲛⲟⲙⲓⲁ ⲛϥⲧⲙϥⲱⲧⲉ ⲉⲃⲟⲗ ⲛϭⲓⲡⲣⲁⲛ ⲙⲡⲉⲛⲧⲁϥⲙⲟⲩ ⲉⲃⲟⲗ ϩⲛⲛⲉϥⲥⲛⲏⲩ ⲁⲩⲱ ⲉⲃⲟⲗ ϩⲛⲧⲉⲫⲩⲗⲏ ⲙⲡⲉϥⲗⲁⲟⲥ ⲛⲧⲱⲧⲛ ⲧⲉⲧⲛⲟ ⲙⲙⲛⲧⲣⲉ ⲙⲡϩⲟⲟⲩ |
| s-11
| ⲁⲩⲱ ⲡⲗⲁⲟⲥ ⲧⲏⲣϥ ⲛⲉⲧϩⲛⲧⲡⲩⲗⲏ ⲡⲉϫⲁⲩ ϫⲉⲧⲛⲟ ⲙⲙⲛⲧⲣⲉ ⲁⲩⲱ ⲛⲉⲡⲣⲉⲥⲃⲩⲧⲉⲣⲟⲥ ⲡⲉϫⲁⲩ ϫⲉⲉⲣⲉⲡϫⲟⲉⲓⲥ ϯ ⲛⲧⲉⲕⲥϩⲓⲙⲉ ⲉⲧⲛⲁⲉⲓ ⲉϩⲟⲩⲛ ⲉⲡⲉⲕⲏⲓ ⲛⲧϩⲉ ⲛϩⲣⲁⲭⲏⲗ ⲁⲩⲱ ⲛⲧϩⲉ ⲛⲗⲓⲁ ⲛⲁⲓ ϩⲓⲟⲩⲥⲟⲡ ⲉⲛⲧⲁⲩⲕⲉⲧⲡⲏⲓ ⲙⲡⲓⲥⲣⲁⲏⲗ ⲁⲩⲱ ⲉⲥⲉⲉⲓⲣⲉ ⲛⲟⲩϭⲟⲙ ϩⲛⲛⲉⲫⲣⲁⲑⲁ ⲛⲧⲉⲟⲩⲣⲁⲛ ϣⲱⲡⲉ ϩⲛⲃⲏⲑⲗⲉⲉⲙ |
| s-12
| ⲁⲩⲱ ⲛⲧⲉⲡⲉⲕⲏⲓ ϣⲱⲡⲉ ⲛⲧϩⲉ ⲙⲡⲏⲓ ⲙⲫⲁⲣⲉⲥ ⲡⲁⲓ ⲉⲛⲧⲁⲑⲁⲙⲁⲣ ϫⲡⲟϥ ⲛⲓⲟⲩⲇⲁⲥ ⲉⲃⲟⲗ ϩⲙⲡⲉⲕⲥⲡⲉⲣⲙⲁ ⲉⲧⲉⲣⲉⲡϫⲟⲉⲓⲥ ⲛⲁⲧⲁⲁϥ ⲛⲁⲕ ⲉⲃⲟⲗ ϩⲛⲧⲉⲓϣⲉⲉⲣⲉ ϣⲏⲙ |
| s-13
| ⲁⲩⲱ ⲃⲟⲉⲥ ⲁϥϫⲓ ⲛϩⲣⲟⲩⲑ ⲁⲥϣⲱⲡⲉ ⲛⲁϥ ⲉⲩⲥϩⲓⲙⲉ ⲁⲩⲱ ⲁϥⲃⲱⲕ ⲉϩⲟⲩⲛ ϣⲁⲣⲟⲥ ⲁⲡϫⲟⲉⲓⲥ ⲇⲉ ϯ ⲧϩⲉ ⲛⲁⲥ ⲉⲧⲣⲉⲥⲙⲓⲥⲉ ⲁⲥϫⲡⲉⲟⲩϣⲏⲣⲉ |
| s-14
| ⲁⲩⲱ ⲛⲉϩⲓⲟⲙⲉ ⲡⲉϫⲁⲩ ⲛⲛⲟⲉⲙⲓⲛ ϫⲉⲡϫⲟⲉⲓⲥ ⲥⲙⲁⲙⲁⲁⲧ ⲉⲧⲉⲙⲡϥⲛⲟⲩϫⲉ ⲙⲡϩⲟⲟⲩ ⲉⲃⲟⲗ ⲙⲙⲟ ⲙⲡⲉⲧϩⲏⲛ ⲉϩⲟⲩⲛ ⲉⲡⲅⲉⲛⲟⲥ ⲉⲧⲣⲉⲩⲧⲁⲩⲉⲡⲟⲩⲣⲁⲛ ϩⲙⲡⲓⲥⲣⲁⲏⲗ |
| s-15
| ⲁⲩⲱ ⲉϥⲛⲁϣⲱⲡⲉ ⲛⲉ ⲉⲧⲣⲉϥⲕⲧⲉⲯⲩⲭⲏ ⲁⲩⲱ ⲉⲥⲁⲛϣ ⲛⲧⲟⲩⲡⲟⲗⲓⲥ ⲉⲃⲟⲗ ϫⲉⲧⲟⲩϣⲉⲗⲉⲉⲧ ⲉⲛⲧⲁⲥⲙⲉⲣⲓⲧⲉ ⲛⲧⲟⲥ ⲧⲉⲛⲧⲁⲥϫⲡⲟϥ ⲛⲉ ⲉⲛⲁⲛⲟⲩⲥ ⲛⲉ ⲉⲥⲁϣϥ ⲛϣⲏⲣⲉ |
| s-16
| ⲁⲩⲱ ⲛⲟⲉⲙⲓⲛ ⲁⲥϫⲓ ⲙⲡϣⲏⲣⲉ ⲕⲟⲩⲓ ⲁⲥⲕⲁⲁϥ ϩⲛⲕⲟⲩⲛⲥ ⲁⲥϣⲱⲡⲉ ⲉⲥϩⲗⲟⲟⲗⲉ ⲙⲙⲟϥ |
| s-17
| ⲁⲩⲱ ⲛⲉⲥⲣⲙⲣⲁⲩⲏ ⲡⲉϫⲁⲩ ϫⲉⲁⲩϫⲡⲉⲟⲩϣⲏⲣⲉ ⲛⲛⲟⲉⲙⲓⲛ ⲁⲩⲱ ⲁⲩⲙⲟⲩⲧⲉ ⲉⲡⲉϥⲣⲁⲛ ϫⲉⲓⲱⲃⲏⲇ ⲡⲁⲓ ⲡⲉ ⲡⲉⲓⲱⲧ ⲛⲓⲉⲥⲥⲁⲓ ⲡⲉⲓⲱⲧ ⲛⲇⲁⲩⲉⲓⲇ |
| s-18
| ⲁⲩⲱ ⲛⲁⲓ ⲛⲉ ⲛⲉϫⲡⲟ ⲙⲫⲁⲣⲉⲥ ⲫⲁⲣⲉⲥ ⲁϥϫⲡⲉⲉⲥⲣⲱⲙ |
| s-19
| ⲁⲩⲱ ⲉⲥⲣⲱⲙ ⲁϥϫⲡⲉⲁⲣⲁⲙ ⲁⲣⲁⲙ ⲇⲉ ⲁϥϫⲡⲉⲁⲙⲓⲛⲁⲇⲁⲃ |
| s-20
| ⲁⲙⲓⲛⲁⲇⲁⲃ ⲇⲉ ⲁϥϫⲡⲉⲛⲁⲁⲥⲥⲱⲛ ⲛⲁⲁⲥⲥⲱⲛ ⲇⲉ ⲁϥϫⲡⲉⲥⲁⲗⲙⲱⲛ |
| s-21
| ⲥⲁⲗⲙⲱⲛ ⲇⲉ ⲁϥϫⲡⲉⲃⲟⲉⲥ ⲃⲟⲉⲥ ⲇⲉ ⲁϥϫⲡⲉⲓⲱⲃⲏⲇ |
| s-22
| ⲓⲱⲃⲏⲇ ⲇⲉ ⲁϥϫⲡⲉⲓⲉⲥⲥⲁⲓ ⲓⲉⲥⲥⲁⲓ ⲇⲉ ⲁϥϫⲡⲉⲇⲁⲩⲉⲓⲇ |