| s-1
| ⲁⲑⲁⲛⲁⲥⲓⲟⲥ ⲡⲁⲣⲭⲏⲉⲡⲓⲥⲕⲟⲡⲟⲥ ⲛⲣⲁⲕⲟⲧⲉ ⲉϥϣⲁϫⲉ ⲉⲧⲃⲉⲡⲛⲁ ⲙⲛⲡϩⲁⲡ · — ◈ — ◈ — ◈ — ◈ — ◈ |
| s-2
| ⲡⲕⲟⲥⲙⲟⲥ ⲉⲧⲣⲡⲱⲃϣ ⲙⲡⲛⲟⲩⲧⲉ ⲛⲉⲥⲛⲏⲩ · ⲥⲉⲁⲙⲁϩⲧⲉ ⲙⲙⲟϥ ϩⲙⲡϫⲓⲛϭⲟⲛⲥ ⲉⲧϫⲓ ⲉϩⲟⲩⲛ ⲉⲛⲉⲧϩⲓⲧⲟⲩⲱⲟⲩ · ⲙⲛⲧⲙⲛⲧⲁⲡⲁⲛⲑⲣⲟⲡⲟⲥ ⲉⲧϫⲓ ⲉϩⲟⲩⲛ ⲉⲛⲁⲧϭⲟⲙ · |
| s-3
| ⲛⲧϩⲉ ⲉⲧϥϫⲱ ⲙⲙⲟⲥ ⲛϭⲓⲡⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ · ϫⲉⲕⲁⲧⲁⲧϩⲉ ⲉⲧⲉⲙⲡⲟⲩⲇⲟⲕⲓⲙⲁⲍⲉ ⲙⲡⲛⲟⲩⲧⲉ ⲉⲕⲁⲁϥ ⲛⲁⲩ ϩⲛⲟⲩⲥⲟⲟⲩⲧⲛ · ⲁⲡⲛⲟⲩⲧⲉ ⲧⲁⲁⲩ ⲉϩⲣⲁⲓ ⲉⲩϩⲏⲧ ⲛϫⲟⲟⲩⲧ ⲉⲩⲉⲓⲣⲉ ⲛⲛⲉⲧⲉⲙⲉϣϣⲉ · |
| s-4
| ⲉⲩϫⲏⲕ ⲉⲃⲟⲗ ⲛϫⲓⲛϭⲟⲛⲥ ⲛⲓⲙ · ϩⲓⲕⲁⲕⲓⲁ · ϩⲓⲡⲟⲛⲏⲣⲓⲁ ϩⲓⲙⲁⲓⲧⲟ ⲛϩⲟⲩⲟ · ⲉⲩⲙⲉϩ ⲛⲗⲁ ϩⲓϩⲱⲧⲃ · ϩⲓϯⲧⲱⲛ ϩⲓⲕⲣⲟϥ ⲛϩⲏⲧ ⲉϥϩⲟⲟⲩ ⲛⲣⲉϥⲕⲁⲥⲕⲥ ⲛⲣⲉϥⲕⲁⲧⲁⲗⲁⲗⲉⲓ · ⲙⲙⲁⲥⲧⲛⲟⲩⲧⲉ ⲛⲣⲉϥϣⲱⲥ · ⲛϫⲁⲥⲓϩⲏⲧ ⲛⲃⲁⲃⲉⲣⲱⲙⲉ ⲛⲣⲉϥⲕⲱⲧⲉ ⲛⲥⲁⲡⲡⲉⲧϩⲟⲟⲩ · |
| s-5
| ⲛⲥⲉⲥⲱⲧⲙ ⲁⲛ ⲛⲥⲁⲛⲉⲩⲉⲓⲟⲧⲉ · ⲛⲁⲧϩⲏⲧ ⲛⲁⲧⲛⲁϩⲧⲉ ⲛⲟⲩⲁϩⲓⲏⲧ ⲛⲁⲧⲛⲁϩⲧⲉ · ⲛⲟⲩⲁϩⲓⲏⲧ ⲛⲁⲧⲛⲁ · |
| s-6
| ⲛⲉⲧⲉⲣⲉⲡⲛⲟⲩⲧⲉ ⲕⲧⲟ ⲙⲙⲟⲟⲩ ⲉϩⲟⲩⲛ ⲉⲩⲙⲛⲧⲣⲉϥϣⲙϣⲉⲛⲟⲩⲧⲉ · ϣⲁϥⲧⲥⲁⲃⲟⲟⲩ ⲟⲛ ⲉⲧⲣⲉⲩⲥⲁϩⲱⲟⲩ ⲉⲃⲟⲗ ⲛⲙⲡⲉⲧϩⲟⲟⲩ · ⲁⲩⲱ ⲉⲧⲣⲉⲩϥⲓ ⲡⲣⲟⲟⲩϣ ⲙⲡⲛⲁ ⲉϩⲟⲩⲛ ⲉⲡⲉⲧϩⲓⲧ ϩⲓⲧⲟⲩⲱⲟⲩ · |
| s-7
| ⲕⲁⲧⲁⲧϩⲉ ⲉⲛⲧⲁⲏⲥⲁⲓⲁⲥ ϯⲥⲃⲱ ⲛⲁⲛ ⲉϥϫⲱ ⲙⲙⲟⲥ ϩⲙⲡⲉⲡⲣⲟⲥⲟⲡⲟⲛ ⲙⲡⲛⲟⲩⲧⲉ ϫⲉⲁⲗⲱⲧⲛ ϩⲛⲛⲉⲧⲛⲡⲟⲛⲏⲣⲓⲁ ϫⲓⲥⲃⲱ ⲉⲣⲡⲉⲧⲛⲁⲛⲟⲩϥ · |
| s-8
| ⲡⲛⲟⲙⲟⲥ ⲅⲁⲣ ⲟⲩⲛⲧⲁϥ ϩⲉⲛⲟⲩⲉϩⲥⲁϩⲛⲉ ⲙⲙⲁⲩ ⲉⲛⲁϣⲱⲟⲩ · ⲉⲧⲙⲡⲗⲁⲡⲧⲉⲓ ⲙⲡⲉⲧϩⲓⲧⲟⲩⲱⲛ · |
| s-9
| ⲟⲩⲛⲧⲁϥ ⲇⲉ ⲟⲛ ⲙⲙⲁⲩ ⲛϩⲉⲛⲉⲛⲧⲟⲗⲏ ⲉⲧⲃⲉⲧⲙⲛⲧⲙⲁⲓⲣⲱⲙⲉ · ⲁⲩⲱ ⲉⲛⲁ ⲛⲛⲉⲛⲉⲣⲏⲩ · |
| s-10
| ⲉϣⲱⲡⲉ ⲅⲁⲣ ⲉⲣϣⲁⲛⲟⲩⲣⲱⲙⲉ ⲕⲱ ⲛⲥⲱϥ ⲛⲟⲩⲁ ϩⲛⲛⲁⲓ · ϥⲣⲱϣⲉ ⲁⲛ ⲛϭⲓⲡⲕⲉⲟⲩⲁ ⲉⲧⲁϩⲉ ⲡⲣⲱⲙⲉ ⲉⲣⲁⲧϥ · |
| s-11
| ⲟⲩⲇⲉ ⲅⲁⲣ ϥϣⲏⲡ ⲁⲛ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲛϭⲓⲡⲉⲧⲣⲡⲉⲧⲛⲁⲛⲟⲩϥ ⲛⲛⲉⲧϣⲁⲁⲧ ⲉⲃⲟⲗ ϩⲛϩⲉⲛϩⲏⲩ ⲛϭⲓϫⲓⲛϭⲟⲛⲥ · ⲉϣⲱⲡⲉ ⲇⲉ ϥⲛⲁϯ ⲗⲁⲁⲩ ⲁⲛ ⲉⲃⲟⲗ ϩⲛⲛⲉⲧϣⲟⲟⲡ ⲛⲁϥ · ⲉⲧⲃⲉⲛⲉⲧⲣϫⲓⲛϭⲟⲛⲥ ⲙⲉⲛ ⲅⲁⲣ ⲁⲩⲱ ⲉⲩⲉⲡⲓⲭⲓⲣⲉ ⲉⲧⲁⲗⲉⲇⲱⲣⲟⲛ ⲉϩⲣⲁⲓ ⲙⲡⲛⲟⲩⲧⲉ · |
| s-12
| ϥⲥⲏϩ ⲅⲁⲣ ϫⲉⲟⲩϥⲟⲧⲉ ⲙⲡϫⲟⲉⲓⲥ ⲧⲉ ⲧⲉⲑⲩⲥⲓⲁ ⲛⲛⲁⲥⲉⲃⲏⲥ · ⲉⲧⲃⲉⲡⲉⲧⲟ ϩⲱⲱϥ ⲛϣⲛⲁ ϣⲁϥϫⲟⲟⲥ ⲉⲧⲃⲏⲏⲧϥ ϫⲉⲡⲉⲧϣⲧⲁⲙ ⲛⲛⲉϥⲙⲁⲁϫⲉ ⲉⲧⲙⲥⲱⲧⲙ ⲉⲩϩⲏⲕⲉ ⲛⲧⲟϥ ϩⲱⲱϥ ϥⲛⲁⲉⲡⲓⲕⲁⲗⲉⲓ ⲙⲡⲛⲟⲩⲧⲉ ⲛϥⲧⲙⲥⲱⲧⲙ ⲉⲣⲟϥ · |
| s-13
| ⲉⲧⲃⲉⲡⲁⲓ ⲙⲡⲁⲣϩⲟⲓⲙⲓⲁ ⲥⲩⲛⲃⲟⲩⲗⲉⲩⲉ ⲛⲁⲛ ϫⲉⲙⲁⲧⲁⲓⲉ ⲡ ⲛⲟⲩⲧⲉ ⲉⲃⲟⲗ ϩⲛⲛⲉⲕϩⲓⲥⲉ ⲙⲙⲉ · ⲁⲩⲱ ⲛⲅϯ ⲛⲁϥ ⲛⲛⲁⲡⲁⲣⲭⲏ ⲉⲃⲟⲗ ϩⲛⲛⲕⲁⲣⲡⲟⲥ ⲛⲧⲉⲕⲇⲓⲕⲁⲓⲟⲥⲩⲛⲏ · |
| s-14
| ⲉϣϫⲉ ⲕⲛⲁⲛⲇⲱⲣⲟⲛ ⲅⲁⲣ ⲉϩⲟⲩⲛ ⲙⲡⲛⲟⲩⲧⲉ ⲉⲃⲟⲗ ϩⲛⲟⲩϫⲓⲛⲛϭⲟⲛⲥ ⲙⲛⲟⲩⲧⲱⲣⲡ · ϥⲥⲟⲧⲡ ⲛϩⲟⲩⲟ ⲟⲩⲇⲉ ⲉⲧⲙⲧⲣⲉⲕϫⲡⲟ ⲛⲁⲕ ⲛⲧⲉⲓⲕⲧⲏⲥⲓⲥ ⲛⲧⲉⲓⲙⲓⲛⲉ · ⲟⲩⲇⲉ ⲉⲧⲙⲧⲁⲗⲉⲇⲱⲣⲟⲛ ⲉϩⲣⲁⲓ ⲉⲃⲟⲗ ⲛϩⲏⲧⲥ · |
| s-15
| ⲕⲛⲁⲉⲓⲛⲉ ⲅⲁⲣ ⲉϩⲟⲩⲛ ⲙⲡⲉⲕⲉⲣⲏⲧ ⲛⲟⲩⲇⲱⲣⲟⲛ ⲉϥⲟⲩⲁⲁⲃ · ⲛⲧϩⲉ ⲉⲧⲥⲏϩ ϫⲉⲛⲉⲣⲏⲧ ⲛⲛⲉⲧⲥⲟⲩⲧⲱⲛ ϣⲏⲡ ⲛⲁϩⲣⲁϥ · |
| s-16
| ⲡⲁⲗⲓⲛ ⲟⲛ ⲉϣϫⲉ ⲉⲕϫⲡⲟ ⲉⲃⲟⲗ ϩⲛϩⲉⲛϩⲓⲥⲉ ⲛⲇⲓⲕⲁⲓⲟⲛ ⲛⲅⲧⲙⲉⲓⲛⲉ ⲉϩⲟⲩⲛ ⲙⲡⲛⲟⲩⲧⲉ ⲛϩⲉⲛⲡⲣⲟⲥⲫⲟⲣⲁ · ⲛⲁⲓ ⲉϣⲁⲣⲉⲛϩⲏⲕⲉ ⲥⲁⲛϣ ⲉⲃⲟⲗ ⲛϩⲏⲧⲟⲩ · ⲥⲉⲛⲁⲟⲡⲟⲩ ⲉⲣⲟⲕ ⲉⲩⲧⲱⲣⲡ · ⲕⲁⲧⲁⲧϩⲉ ⲉⲧϥϫⲱ ⲙⲙⲟⲥ ϩⲓⲧⲙⲡⲉⲡⲣⲟⲫⲏⲧⲏⲥ ⲙⲁⲗⲁⲭⲓⲁⲥ · ϫⲉⲛⲁⲡⲁⲣⲭⲏ ⲁⲩⲱ ⲛⲣⲉⲙⲏⲧ ⲥⲉ ⲁⲣⲱⲧⲛ · ⲁⲩⲱ ⲡⲧⲱⲣⲡ ⲛⲁϣⲱⲡⲉ ϩⲛⲛⲉⲧⲛⲏⲓ : |
| s-17
| ϣϣⲉ ⲅⲁⲣ ⲉⲣⲟⲛ ⲧⲉⲛⲟⲩ ⲉⲧⲣⲉⲛⲕⲉⲣⲁ ⲙⲡⲛⲁ ⲙⲛⲡϩⲁⲡ : ⲉⲧⲣⲉⲛϫⲡⲟ ⲙⲉⲛ ⲙⲡϩⲁⲡ ⲉⲧⲣⲉⲛϫⲟ ⲇⲉ ⲉⲃⲟⲗ ϩⲙⲡⲛⲁ ⲕⲁⲧⲁⲡⲉⲧⲥⲏϩ · ϫⲉϩⲁⲣⲉϩ ⲉⲡⲛⲁ ⲙⲛⲡϩⲁⲡ · ⲁⲩⲱ ⲛⲅϩⲛⲧⲕ ⲉϩⲟⲩⲛ ⲉⲡⲉⲕⲛⲟⲩⲧⲉ ⲛⲟⲩⲟⲉⲓϣ ⲛⲓⲙ · |
| s-18
| ⲉⲣⲉⲡⲛⲟⲩⲧⲉ ⲅⲁⲣ ⲙⲉ ⲙⲡⲛⲁ ⲙⲛⲡϩⲁⲡ · ⲉⲧⲣⲉϥⲑⲛⲟϥ ⲉϩⲟⲩⲛ ⲉⲡϫⲟⲉⲓⲥ ⲛϭⲓⲡⲉⲧϥⲓ ⲙⲡⲣⲟⲟⲩϣ ⲙⲡⲛⲁ · |
| s-19
| ⲗⲟⲓⲡⲟⲛ ϩⲙⲡⲉⲓⲙⲁ · ⲧⲉⲛⲟⲩ ⲙⲁⲣⲉⲡⲟⲩⲁ ⲡⲟⲩⲁ ⲉⲝⲉⲧⲁⲍⲉ ⲙⲙⲟϥ · |
| s-20
| ⲙⲁⲣⲉϥϯϩⲧⲏϥ ⲉⲛⲉⲧϥϫⲡⲟ ⲙⲙⲟⲟⲩ ⲛϭⲓⲡⲣⲙⲙⲁⲟ : ⲛⲁⲓ ⲉⲧϥⲙⲉⲉⲩⲉ ⲉⲛⲇⲱⲣⲟⲛ ⲙⲡⲛⲟⲩⲧⲉ ⲉⲃⲟⲗ ⲛϩⲏⲧⲟⲩ · ϫⲉⲙⲏⲧⲓ ⲁϥϫⲓ ⲡϩⲏⲕⲉ ⲛϭⲟⲛⲥ · ⲙⲏⲧⲓ ⲁϥⲥⲓⲁⲍⲉ ⲙⲡϭⲱⲃ ⲉⲣⲟϥ · ⲙⲏⲧⲓ ⲁϥⲡⲗⲉⲟⲛⲉⲕⲧⲉ ⲙⲡⲉⲧϩⲁⲣⲁⲧϥ · ⲉϥⲭⲣⲱ ⲛⲟⲩⲉⲝⲟⲩⲥⲓⲁ · ⲉⲡⲙⲁ ⲛⲟⲩⲇⲓⲕⲁⲓⲟⲥⲩⲛⲏ · |
| s-21
| ⲥⲉⲟⲩⲉϩⲥⲁϩⲛⲉ ⲅⲁⲣ ⲛⲁⲛ ⲉⲧⲣⲉⲛϩⲁⲣⲉϩ ⲉⲡⲇⲓⲕⲁⲓⲟⲛ · ⲁⲩⲱ ⲡϣⲱϣ ⲉϩⲟⲩⲛ ⲉⲛⲉⲛⲕⲉϩⲙϩⲁⲗ · |
| s-22
| ⲉⲃⲟⲗ ⲅⲁⲣ ϫⲉⲕⲁⲙⲁϩⲧⲉ ⲙⲡⲣⲣϫⲓⲛϭⲟⲛⲥ · ⲟⲩⲇⲉ ⲉⲃⲟⲗ ϫⲉⲟⲩⲛϭⲟⲙ ⲙⲙⲟⲕ ⲙⲡⲣⲡⲗⲉⲟⲛⲉⲕⲧⲉ · ⲁⲗⲗⲁ ⲉⲃⲟⲗ ϫⲉⲥⲉϣⲟⲟⲡ ⲛⲁⲕ ⲛϭⲓⲛⲉϩⲃⲏⲩⲉ ⲛⲧⲉⲝⲟⲩⲥⲓⲁ ⲟⲩⲱⲛϩ ⲉⲃⲟⲗ ⲛⲛⲉϩⲃⲏⲩⲉ ⲛⲧⲇⲓⲕⲁⲓⲟⲥⲩⲛⲏ · |
| s-23
| ⲟⲩ ⲅⲁⲣ ⲡⲉⲧⲉⲙⲛϣϭⲟⲙ ⲙⲙⲟⲕ ⲉⲁⲁϥ · |
| s-24
| ⲉⲕⲛⲁϯ ⲛⲧⲁⲡⲟⲇⲓⲝⲓⲥ ⲛⲧⲙⲛⲧⲥⲧⲙⲏⲧ ⲙⲛⲧϩⲟⲧⲉ ⲉⲧϣⲟⲟⲡ ⲛⲁⲕ ⲉϩⲟⲩⲛ ⲉⲡⲛⲟⲩⲧⲉ · ⲁⲗⲗⲁ ϩⲙⲡⲉⲧⲉⲩⲛϣϭⲟⲙ ⲙⲙⲟⲕ ⲉⲡⲁⲣⲁⲃⲁ ⲛϩⲏⲧϥ ⲛⲅⲧⲙⲡⲁⲣⲁⲃⲁ · |
| s-25
| ⲉϣϫⲉ ⲕⲛⲁϥⲓ ⲇⲉ ⲛⲛⲉϩⲛⲁⲁⲩ ⲛⲛϩⲏⲕⲉ ⲛⲅⲧⲁⲁⲩ ⲛϩⲉⲛⲕⲉϩⲏⲕⲉ · ⲕⲥⲟⲧⲡ ⲛϩⲟⲩⲟ ⲙⲡⲉⲕϩⲁⲣⲡⲁⲍⲉ ⲟⲩⲇⲉ ⲙⲡⲉⲕϯ · |
| s-26
| ⲉⲧⲃⲉⲟⲩ ⲉⲕⲧⲱⲗⲙ ⲛⲧⲉⲕⲙⲛⲧⲣⲙⲙⲁⲟ ⲉⲕⲉⲓⲛⲉ ⲉϫⲱⲥ ⲛⲛⲉϩⲃⲏⲩⲉ ⲉⲧⲉϩⲉⲛⲇⲓⲕⲁⲓⲟⲛ ⲁⲛ ⲛⲉ : |
| s-27
| ⲉⲧⲃⲉⲟⲩ ⲉⲕⲉⲓⲣⲉ ⲛⲧⲉⲕⲡⲣⲟⲥⲫⲟⲣⲁ ⲛⲃⲟⲧⲉ · ⲉⲕⲉⲡⲓⲭⲓⲣⲉ ⲉⲧⲁⲗⲟ ⲉϩⲣⲁⲓ ϩⲛⲟⲩϫⲓⲛϭⲟⲛⲥ · ϩⲙⲡⲉⲧⲕⲙⲉⲉⲩⲉ ⲉⲛⲁ ⲛⲕⲉϩⲏⲕⲉ ⲛϩⲏⲧϥ · |
| s-28
| ⲛⲁ ⲙⲡⲏ ⲉⲧⲙⲙⲁⲩ ⲉⲧⲕϫⲓ ⲙⲙⲟϥ ⲛϭⲟⲛⲥ · |
| s-29
| ⲭⲣⲱ ⲛⲧⲙⲛⲧⲙⲁⲓⲣⲱⲙⲉ ⲉϩⲟⲩⲛ ⲉⲡⲏ ⲁⲩⲱ ⲛⲅⲭⲁⲣⲓⲍⲉ ⲙⲡⲁⲓ · |
| s-30
| ⲕⲛⲁϫⲱⲕ ⲉⲃⲟⲗ ⲡⲉ ⲛⲟⲩⲛⲁ ⲙⲛⲟⲩϩⲁⲡ · |
| s-31
| ⲙⲁⲣⲉⲡⲛⲟⲩⲧⲉ ⲅⲁⲣ ⲕⲟⲓⲛⲱⲛⲉⲓ ⲙⲛⲡⲗⲉⲟⲛⲉⲝⲓⲁ · ⲟⲩⲇⲉ ⲡⲛⲟⲩⲧⲉ ⲡⲕⲟⲓⲛⲱⲛⲟⲥ ⲁⲛ ⲡⲉ ⲛⲛⲥⲟⲟⲛⲉ ⲛⲛⲣⲉϥⲧⲱⲣⲡ · ⲟⲩⲇⲉ ϩⲱⲥ ⲉⲙⲛϣϭⲟⲙ ⲙⲙⲟϥ ⲁⲛ ⲉⲥⲁⲛϣ ⲛⲛϩⲏⲕⲉ ⲉⲁϥⲕⲁⲁⲩ ⲛⲁⲛ · ⲁⲗⲗⲁ ⲉϥϣⲓⲛⲉ ⲛⲥⲁⲟⲩⲙⲛⲧⲣⲉϥϯⲕⲁⲣⲡⲟⲥ ⲛⲇⲓⲕⲁⲓⲟⲛ · ⲁⲩⲱ ⲙⲙⲁⲓⲣⲱⲙⲉ ⲉⲃⲟⲗ ϩⲓⲧⲟⲟⲧⲛ ⲉⲧⲉⲛⲛⲟⲃⲣⲉ · ⲁⲩⲱ ⲉⲩⲡⲉⲧⲛⲁⲛⲟⲩϥ ⲛⲁⲛ · |
| s-32
| ⲙⲁⲣⲉⲡⲛⲁ ϣⲱⲡⲉ ⲉⲃⲟⲗ ϩⲛϫⲓⲛϭⲟⲛⲥ · ⲟⲩⲇⲉ ⲙⲁⲣⲉⲥⲙⲟⲩ ϣⲱⲡⲉ ⲉⲃⲟⲗ ϩⲛⲥⲁϩⲟⲩ · ⲟⲩⲇⲉ ⲙⲁⲣⲉⲙⲛⲧⲣⲉϥⲣⲡⲉⲧⲛⲁⲛⲟⲩϥ ϣⲱⲡⲉ ⲉⲃⲟⲗ ϩⲛϩⲉⲛⲣⲙⲉⲓⲟⲟⲩⲉ · |
| s-33
| ⲡⲛⲟⲩⲧⲉ ⲅⲁⲣ ϫⲱ ⲙⲙⲟⲥ ⲉⲣⲉⲛⲣⲙⲉⲓⲟⲟⲩⲉ ⲕⲓⲙ ⲉⲣⲟϥ ⲛⲉⲧⲟⲩϫⲓ ⲙⲙⲟⲟⲩ ⲛϭⲟⲛⲥ ϫⲉⲛⲁⲓ ⲛⲉ ϯⲙⲟⲥⲧⲉ ⲙⲙⲟⲟⲩ ⲉⲧⲉⲧⲛⲉⲓⲣⲉ ⲙⲙⲟⲟⲩ ⲡⲉ ⲛⲉ · ⲧⲉⲧⲛϩⲱⲃⲥ ⲙⲡⲁⲑⲩⲥⲓⲁⲥⲧⲏⲣⲓⲟⲛ · ⲛϩⲉⲛⲣⲙⲉⲓⲟⲟⲩⲉ ⲙⲛⲟⲩⲣⲓⲙⲉ · ⲙⲛⲟⲩⲁϣⲁϩⲟⲙ ⲉⲃⲟⲗ ϩⲛϩⲉⲛϩⲓⲥⲉ · |
| s-34
| ϩⲉⲛⲙⲛⲧϣⲟⲩϣⲉ ⲛⲉ ⲛⲉⲓϩⲃⲏⲩⲉ ⲛⲧⲉⲓⲙⲓⲛⲉ · |
| s-35
| ϩⲉⲛⲕⲉⲛⲟⲇⲟⲝⲓⲁ ⲛⲉ · |
| s-36
| ⲁⲩⲱ ⲉⲩϣⲟⲟⲡ ⲉⲧⲃⲉⲡⲧⲁⲉⲓⲟ ⲛⲛⲣⲱⲙⲉ · |
| s-37
| ⲉⲩϣⲟⲟⲡ ⲁⲛ ⲉⲧⲃⲉⲡⲧⲁⲉⲓⲟ ⲡⲉ ⲉⲃⲟⲗ ϩⲓⲧⲙⲡⲛⲟⲩⲧⲉ · |
| s-38
| ⲉⲧⲃⲉⲡⲁⲓ ⲕⲁⲗⲱⲥ ⲁϥϫⲟⲟⲥ ⲛϭⲉⲡϫⲟⲉⲓⲥ ϫⲉⲙⲡⲣⲉⲓⲣⲉ ϫⲉⲕⲁⲥ ⲉⲣⲉⲛⲣⲱⲙⲉ ⲛⲁⲩ ⲉⲣⲱⲧⲛ · |
| s-39
| ⲉϣⲱⲡⲉ ⲇⲉ ⲉⲕⲛⲁⲉⲓⲣⲉ ⲛⲧⲉⲕⲙⲛⲧⲛⲁ ϩⲱⲥ ⲉⲡⲛⲟⲩⲧⲉ ⲡⲉⲧⲉⲓⲙⲉ ⲉⲣⲟⲥ ⲕⲛⲁϩⲁⲣⲉϩ ⲉⲣⲟⲕ ⲉⲧⲙⲁⲁⲥ ⲉⲃⲟⲗ ϩⲛⲟⲩⲙⲛⲧⲙⲁⲓⲧⲟ ⲛϩⲟⲩⲟ · ⲉⲕⲥⲟⲟⲩⲛ ϫⲉⲕⲉⲩⲫⲣⲁⲛⲉ ⲁⲛ ⲙⲡⲛⲟⲩⲧⲉ · ⲛⲧⲉⲓϩⲉ · ⲡⲁⲓ ⲉⲧϭⲱϣⲧ ⲉϫⲱⲛ |
| s-40
| ⲙⲁⲣⲛⲉⲓⲣⲉ ⲛⲟⲩⲙⲛⲧⲛⲁ ⲛⲧⲉⲓϩⲉ ϫⲉⲕⲁⲥ ⲉⲛⲛⲁϫⲓ ⲉⲃⲟⲗ ϩⲓⲧⲙⲡⲛⲟⲩⲧⲉ ⲙⲡⲉⲥⲧⲟⲩⲉⲓⲟ · |
| s-41
| ⲉϣⲁⲣⲉ ⲡⲛⲟⲩⲧⲉ ⲇⲉ ϯ ⲛⲛⲁⲓ ⲉⲧⲙⲙⲁⲩ ⲉⲧϥⲧⲁⲓⲟ ⲙⲙⲟⲟⲩ ⲛⲛⲉϥⲁⲅⲁⲑⲟⲛ · |
| s-42
| ⲙⲉϥⲧⲁⲓⲉⲗⲁⲁⲩ ⲇⲉ ⲙⲡⲗⲉⲟⲛⲉⲕⲧⲏⲥ · |
| s-43
| ⲥⲧⲟ ⲛⲁⲕ ⲁⲛ ⲉⲧⲁⲗⲉⲇⲱⲣⲟⲛ ⲉϩⲣⲁⲓ ⲙⲡⲛⲟⲩⲧⲉ · ⲉⲕϣⲁⲛⲗⲩⲡⲉⲓ ⲙⲡⲉⲕⲥⲟⲛ · |
| s-44
| ⲡⲉϫⲁϥ ϫⲉⲉⲕϣⲁⲛⲉⲓ ⲉⲧⲁⲗⲉⲇⲱⲣⲟⲛ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲛⲅⲣⲡⲙⲉⲉⲩⲉ ⲙⲡⲙⲁ ⲉⲧⲙⲙⲁⲩ ϫⲉⲟⲩⲛⲧⲉⲡⲉⲕⲥⲟⲛ ⲟⲩϩⲱⲃ ⲉⲣⲟⲕ · |
| s-45
| ⲃⲱⲕ ⲛϣⲟⲣⲡ ⲛⲅϩⲱⲧⲡ ⲙⲛⲡⲉⲕⲥⲟⲛ ⲧⲟⲧⲉ ⲛⲕⲉⲓ ⲛⲅⲧⲁⲗⲟ ⲉϩⲣⲁⲓ ⲙⲡⲉⲕⲇⲱⲣⲟⲛ · |
| s-46
| ⲁⲣⲓⲡⲙⲉⲉⲩⲉ ⲟⲩⲛ ⲛⲍⲁⲭⲁⲓⲟⲥ ⲡⲧⲉⲗⲱⲛⲏⲥ ⲡⲁⲓ ⲉⲛⲧⲁϥⲧⲟϣϥ ⲉϯ ⲙⲡⲉⲛⲧⲁϥϩⲟⲩⲗⲁ ⲉⲣⲟϥ ⲛϥⲧⲟⲩ ⲕⲱⲃ · |
| s-47
| ⲛⲧⲉⲓϩⲉ ⲁϥⲡⲱϣ ⲉϫⲛ ⲛϩⲏⲕⲉ ⲛⲛⲉϥϩⲩⲡⲁⲣⲭⲟⲛⲧⲁ · |
| s-48
| ⲛⲉϥⲥⲟⲟⲩⲛ ⲅⲁⲣ ϫⲉϥⲟⲩⲱϣ ⲉϣⲱⲡ ⲉⲣⲟϥ ⲙⲡⲉⲭⲣⲓⲥⲧⲟⲥ · ⲁⲩⲱ ⲙⲁⲣⲉⲡⲉⲭⲣⲓⲥⲧⲟⲥ ϣⲱⲡ ⲉⲣⲟϥ ⲛⲕⲉϩⲉ ⲛⲛⲉⲧϯ ⲁⲛ ⲉⲧⲣⲟⲟⲩⲧ ⲉϩⲟⲩⲛ ⲉⲛϩⲏⲕⲉ · ⲉⲓⲙⲏⲧⲓ ⲛⲥⲉⲃⲱⲗ ⲉⲃⲟⲗ ⲛⲧⲙⲛⲧⲙⲁⲓⲧⲟ ⲛϩⲟⲩⲟ · ⲛⲉⲛⲧⲁⲩϫⲓⲧⲟⲩ ⲛϭⲟⲛⲥ · |
| s-49
| ⲁⲩⲱ ⲛⲧⲉⲓϩⲉ ⲁⲡϫⲟⲉⲓⲥ ϣⲱⲡ ⲉⲣⲟϥ · ⲙⲡⲥⲟⲟⲩⲧⲛ ⲛⲍⲁⲭⲁⲓⲟⲥ · |
| s-50
| ⲁⲩⲱ ⲁϥϫⲟⲟⲥ ϫⲉⲁⲩⲟⲩϫⲁⲓ ϣⲱⲡⲉ ϩⲙⲡⲉⲓⲏⲓ ⲙⲡϩⲟⲟⲩ · |
| s-51
| ⲁⲩⲱ ⲛⲁⲓ ⲁⲛϫⲟⲟⲩ ⲛⲁϩⲣⲛⲛⲉⲧⲣⲙⲛⲧⲛⲁ · ⲉⲩϥⲓ ⲇⲉ ⲁⲛ ⲙⲡⲣⲟⲟⲩϣ ⲛⲟⲩϣⲱϣ ⲙⲛⲟⲩⲇⲓⲕⲁⲓⲟⲛ : |
| s-52
| ⲧⲛⲛⲁ ⲧⲛⲛⲁϣⲁϫⲉ ⲇⲉ ⲟⲛ ⲛⲛⲁϩⲣⲙ ⲡⲉⲧⲣⲟⲉⲓⲥ ⲙⲉⲛ ⲉⲣⲟϥ ⲉⲣϫⲓⲛϭⲟⲛⲥ · ⲉϥⲁⲙⲉⲗⲉⲓ ⲇⲉ ⲉⲛⲁ · ϫⲉⲟⲩϣⲏⲛ ⲛⲁⲧⲕⲁⲣⲡⲟⲥ ϣⲁⲩϣⲁⲁⲧϥ ⲛⲥⲉⲛⲟϫϥ ⲉⲡⲕⲱϩⲧ · |
| s-53
| ⲁⲩⲱ ⲙⲁⲣⲉⲡⲉⲓϣⲏⲛ ⲛⲧⲉⲓⲙⲓⲛⲉ ⲣⲁⲛⲁϥ ⲉⲛⲉϩ ⲙⲡⲟⲩⲟⲉⲓⲉ ⲉⲧⲏⲡ ⲉⲧⲡⲉ · ⲡⲁⲓ ⲉⲧϫⲱ ⲙⲙⲟⲥ ϫⲉⲁⲓⲉⲓ ⲉⲓϣⲓⲛⲉ ⲛⲥⲁⲕⲁⲣⲡⲟⲥ ⲛⲧⲉⲓⲃⲱ ⲛⲕⲛⲧⲉ · ⲁⲩⲱ ⲙⲡⲉⲓϩⲉ ⲉⲟⲩⲟⲛ · |
| s-54
| ⲁϥⲟⲩⲉϩⲥⲁϩⲛⲉ ⲉϣⲁⲁⲧⲥ ϫⲉⲕⲁⲥ ⲛⲛⲉⲥⲟⲩⲱⲥϥ ⲙⲡⲕⲉⲕⲁϩ · |
| s-55
| ϣⲁⲩϭⲛⲁⲣⲓⲕⲉ ⲇⲉ ⲟⲛ ⲉⲡⲉⲧⲉⲙⲡϥϯⲧⲉⲟⲩⲱ ⲛⲛϩⲏⲕⲉ ⲛⲁⲩ · ⲁⲩⲱ ϣⲁⲣⲉⲟⲩⲁⲡⲉⲓⲗⲏ ϣⲱⲡⲉ ⲉⲧⲃⲉⲡⲁⲓ ⲛϯⲙⲓⲛⲉ · |
| s-56
| ⲡⲉϫⲁϥ ϫⲉⲡⲉⲧⲱⲃϣ ⲙⲙⲟϥ ⲉⲧⲙϯ ϯⲧⲉⲟⲩⲱ ⲙⲡϩⲏⲕⲉ ⲛⲛⲁⲏⲧ ⲡⲁⲓ ϥⲛⲁⲱϣ ⲉϩⲣⲁⲓ ⲉⲡⲛⲟⲩⲧⲉ ⲛϥⲧⲙⲥⲱⲧⲙ ⲉⲣⲟϥ · |
| s-57
| ⲡⲉϫⲁϥ ⲛϭⲓⲡⲛⲟⲩⲧⲉ ϫⲉⲁⲛⲅ ⲟⲩⲛⲁϩⲏⲧ ⲅⲁⲣ · |
| s-58
| ⲟⲩϩⲟⲧⲉ ⲅⲁⲣ ⲁⲩⲱ ⲟⲩϩⲱⲃ ⲡⲉ ⲡⲁⲣⲁⲡⲛⲟⲙⲟⲥ ⲡⲉ ⲉⲧⲣⲉⲕⲕⲟⲧⲕ ⲉⲥⲣⲓⲧ ⲙⲡⲉⲕⲱϩⲥ · ⲁⲩⲱ ⲡⲉⲕⲙⲁ ⲛⲉⲗⲟⲟⲗⲉ ⲉⲧⲣⲉⲕⲕⲟⲧⲕ ⲉϫⲟⲟⲗⲉϥ ⲛⲕⲉⲥⲟⲡ · ⲁⲩⲱ ⲡⲉⲕⲙⲁ ⲛϫⲟⲉⲓⲧ ⲉⲥⲣⲁⲧϥ ⲛⲕⲉⲥⲟⲡ · ⲉⲃⲟⲗ ϫⲉϣϣⲉ ⲉⲕⲁⲛⲁⲓ ⲛⲛϩⲏⲕⲉ · |
| s-59
| ⲉϣϫⲉ ⲁⲩⲟⲩⲉϩⲥⲁϩⲛⲉ ⲇⲉ ⲛⲛⲁⲓ · ⲛⲛⲉⲧϩⲙⲡⲛⲟⲙⲟⲥ · ⲟⲩ ⲡⲉⲧⲛⲛⲁϫⲟⲟϥ ⲉⲧⲃⲉⲛⲉⲧϩⲙⲡⲉⲭⲣⲓⲥⲧⲟⲥ · |
| s-60
| ⲛⲁⲓ ⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲥ ⲛⲁⲩ ϫⲉⲉⲥⲧⲙⲣϩⲟⲩⲟ ⲛϭⲓⲧⲉⲧⲛⲇⲓⲕⲁⲓⲟⲥⲩⲛⲏ ⲛϩⲟⲩⲉ ⲉⲧⲁⲛⲉⲅⲣⲁⲙⲙⲁⲧⲉⲩⲥ ⲙⲛⲛⲉⲫⲁⲣⲓⲥⲥⲁⲓⲟⲥ · ⲛⲧⲉⲧⲛⲃⲱⲕ ⲉϩⲟⲩⲛ ⲉⲧⲙⲛⲧⲣⲣⲟ ⲛⲙⲡⲏⲩⲉ · |
| s-61
| ⲉⲧⲃⲉⲡⲁⲓ ⲟⲩ ⲙⲟⲛⲟⲛ ⲉⲃⲟⲗ ϩⲛⲛⲥⲱϣⲉ ⲙⲛⲛⲉⲧⲛⲏⲩ ⲛⲁⲛ ⲉϩⲟⲩⲛ ⲉⲃⲟⲗ · ⲁⲗⲗⲁ ⲉⲃⲟⲗ ϩⲙⲡⲕⲉϩⲱⲃ ⲛⲛⲉⲛϭⲓϫ · |
| s-62
| ϥϯⲥⲃⲱ ⲛⲁⲛ ⲛϭⲓⲡⲁⲡⲟⲥⲧⲟⲗⲟⲥ ⲉⲧⲣⲉⲛϯ ⲛⲛⲉⲧⲉⲙⲛⲧⲁⲩ · |
| s-63
| ⲡⲉϫⲁϥ ϫⲉⲉⲧⲉⲧⲛϭⲓϫ ⲉⲛⲁⲅⲁⲑⲟⲛ ϫⲉⲕⲁⲥ ⲉⲧⲉⲧⲛⲁϩⲉ ⲉⲧϩⲉ ⲉϯⲙⲡⲉⲧϣⲁⲁⲧ · |
| s-64
| ⲡⲉⲧⲟⲩⲱϣ ⲇⲉ ⲉⲟⲩⲁϩϥ ⲛⲥⲁⲡⲥⲱⲧⲏⲣ · ⲁⲡϫⲟⲉⲓⲥ ⲧⲟⲩⲛⲉⲓⲁⲧϥ ⲉⲃⲟⲗ · ⲉⲧⲣⲉϥϯ ⲉⲃⲟⲗ ϩⲛⲧⲉϥⲕⲉⲟⲩⲥⲓⲁ ⲧⲏⲣⲥ ⲉⲩⲡⲉⲧⲛⲁⲛⲟⲩϥ ⲛⲛϩⲏⲕⲉ · ⲁⲩⲱ ⲛⲧⲉⲓϩⲉ ⲛϥⲟⲩⲁϩϥ ⲛⲥⲱϥ · |
| s-65
| ⲛⲉⲛⲧⲁⲩⲟⲩⲁϩⲟⲩ ⲇⲉ ⲛⲥⲱϥ ⲙⲛⲛⲧⲉⲗⲓⲟⲥ ⲉⲁⲩϫⲱⲕ ⲉⲃⲟⲗ ⲙⲡⲟⲩⲣⲟⲧ ⲉⲧⲛⲁϣⲱϥ · ⲁⲩⲱ ⲛⲧⲉⲗⲓⲟⲥ ⲛⲙⲙⲛⲧⲛⲁ · |
| s-66
| ϥⲟⲩⲉϩⲥⲁϩⲛⲉ ⲛⲁⲩ ϫⲉⲕⲁⲥ ⲉⲩⲉϫⲱⲕ ⲉⲃⲟⲗ ⲛⲧⲗⲓⲧⲟⲩⲣⲅⲓⲁ ⲧⲉⲉⲃⲟⲗ ϩⲓⲧⲛⲛⲉⲭⲣⲏⲙⲁ ⲉⲩⲉⲡⲱⲱⲛⲉ ⲉϩⲟⲩⲛ ⲉⲧⲗⲓⲧⲟⲩⲣⲅⲓⲁ ⲧⲉⲉⲃⲟⲗ ϩⲙⲡⲗⲟⲅⲟⲥ ⲙⲛⲡⲉⲡⲛⲉⲩⲙⲁ |
| s-67
| ⲡⲕⲉⲥⲉⲉⲡⲉ ϥⲟⲩⲉϩⲥⲁϩⲛⲉ ⲛⲁⲩ ⲉⲧⲣⲉⲩⲉⲓⲣⲉ ⲛϩⲉⲛⲙⲛⲧⲣⲉϥϯ ⲙⲛϩⲉⲛⲕⲟⲓⲛⲱⲛⲓⲁ ⲉⲩⲙⲏⲛ ⲉⲃⲟⲗ ϩⲛⲛⲉⲧⲉⲩⲛⲧⲁⲩⲥⲟⲩ · ϫⲉⲕⲁⲥ ϩⲓⲧⲛⲛⲁⲓ ⲉⲩⲉϩⲉ ⲉⲣⲟⲟⲩ ⲉⲩⲧⲟⲛⲧⲛ ⲙⲙⲟⲟⲩ ⲉⲧⲙⲛⲧⲙⲁⲓⲣⲱⲙⲉ ⲙⲡⲛⲟⲩⲧⲉ ⲉⲩⲛⲁ · ⲁⲩⲱ ⲉⲩϯ · ⲁⲩⲱ ⲉⲩⲭⲁⲣⲓⲍⲉ · |
| s-68
| ⲡⲉϫⲁϥ ⲅⲁⲣ ϫⲉϯ ⲧⲁⲣⲟⲩϯ ⲛⲏⲧⲛ · ϣⲱⲡⲉ ⲛⲭⲣⲏⲥⲧⲟⲥ ⲧⲁⲣⲟⲩⲣⲭⲣⲏⲥⲧⲟⲥ ⲉⲣⲱⲧⲛ · |
| s-69
| ϩⲓⲧⲛⲛⲁⲓ ⲇⲉ ⲟⲛ ⲛⲧⲁϥⲉⲣⲏⲧ ⲛⲁⲩ ⲛⲧⲕⲟⲓⲛⲱⲛⲓⲁ ⲉⲧϣⲟⲟⲡ ϣⲁⲣⲟϥ · |
| s-70
| ⲛⲁⲓ ⲅⲁⲣ ⲛⲉⲧⲁϩⲉⲣⲁⲧⲟⲩ ⲛⲥⲁⲟⲩⲛⲁⲙ ⲙⲡϫⲟⲉⲓⲥ · ⲛⲁⲓ ⲉⲛⲧϥϫⲟⲟⲥ ⲛⲁⲩ ⲉϥϣⲁⲛⲉⲓ ⲛϭⲓⲡⲣⲣⲟ ϫⲉⲁⲙⲏⲉⲓⲛ ⲛⲉⲧⲥⲙⲁⲁⲧ ⲛⲧⲉⲡⲁⲉⲓⲱⲧ ⲛⲧⲉⲧⲛⲕⲗⲏⲣⲟⲛⲟⲙⲉⲓ ⲛⲧⲙⲛⲧⲣⲣⲟ ⲉⲛⲧⲁⲩⲥⲃⲧⲱⲧⲥ ⲛⲏⲧⲛ ϫⲓⲛⲛⲧⲕⲁⲧⲁⲃⲟⲗⲏ ⲙⲡⲕⲟⲥⲙⲟⲥ · |
| s-71
| ⲁⲓϩⲕⲟ ⲅⲁⲣ ⲁⲧⲉⲧⲛⲧⲙⲟⲓ · |
| s-72
| ⲁⲓⲉⲓⲃⲉ ⲁⲧⲉⲧⲛⲧⲥⲟⲓ · |
| s-73
| ⲉⲛⲉⲓⲟ ⲛϣⲙⲙⲟ · ⲁⲧⲉⲧⲛϣⲟⲡⲧ · ⲉⲣⲱⲧⲛ · |
| s-74
| ⲉⲓⲕⲏⲕⲁϩⲏⲩ ⲁⲧⲉⲧⲛϯ ϩⲓⲱⲱⲧ · |
| s-75
| ⲉⲓϣⲱⲛⲉ ⲛⲉ ⲡⲉ ⲁⲧⲉⲧⲛϭⲙⲡⲁϣⲓⲛⲉ · |
| s-76
| ⲛⲉⲓϩⲙⲡⲉϣⲧⲉⲕⲟ · ⲁⲧⲉⲧⲛⲉⲓ ϣⲁⲣⲟⲓ : |
| s-77
| ⲛⲧⲉⲣⲟⲩⲣϣⲡⲏⲣⲉ ⲇⲉ ⲛϭⲓⲛⲇⲓⲕⲁⲓⲟⲥ · ⲁⲩⲱ ⲁⲩϫⲟⲟⲥ ϫⲉⲡϫⲟⲉⲓⲥ ⲛⲧⲁⲛⲣⲛⲁⲓ ⲛⲁⲕ ⲛⲁϣ ⲛⲟⲩⲟⲉⲓϣ · |
| s-78
| ϥⲛⲁϫⲟⲟⲥ ⲛⲁⲩ ϫⲉϩⲁⲙⲏⲛ ϯϫⲱ ⲙⲙⲟⲥ ⲛⲏⲧⲛ ϫⲉⲉⲡϩⲟⲥⲟⲛ ⲁⲧⲉⲧⲛⲁⲁⲥ ⲛⲟⲩⲁ ⲛⲉⲓⲕⲟⲩⲓ ⲉⲧⲥⲟⲃⲕ · ⲁⲛⲟⲕ ⲡⲉⲛⲧⲁⲧⲉⲧⲛⲁⲁⲥ ⲛⲁⲓ · |
| s-79
| ⲡⲟⲩⲣⲟⲧ ⲅⲁⲣ ⲉϩⲟⲩⲛ ⲉⲛⲉⲧⲟⲩⲁⲁⲃ ⲟⲩⲙⲛⲧⲉⲩⲥⲉⲃⲏⲥ ⲧⲉ ⲉϩⲟⲩⲛ ⲉⲡⲉⲭⲣⲓⲥⲧⲟⲥ · |
| s-80
| ⲁⲩⲱ ⲡⲉⲓⲣⲟⲟⲩⲧ ⲉϩⲟⲩⲛ ⲉⲛⲁⲡⲉⲭⲣⲓⲥⲧⲟⲥ · ϣⲁⲩϩⲉ ⲉⲣⲟϥ ⲛϩⲩⲡⲉⲣⲉⲧⲏⲥ ⲙⲡⲉⲭⲣⲓⲥⲧⲟⲥ · |
| s-81
| ⲟⲩ ⲙⲟⲛⲟⲛ ϫⲉⲟⲩⲛⲧϥ ⲟⲩⲛⲟϭ ⲙⲙⲁⲩ · ⲁⲗⲗⲁ ⲉϣϫⲉ ⲟⲩⲕⲟⲩⲓ ⲟⲛ ⲡⲉ ⲡⲉⲧⲉⲩⲛⲧⲁϥϥ · ⲡⲁⲓ ⲛϥⲧⲁⲗⲟϥ ⲉϩⲣⲁⲓ · |
| s-82
| ⲁⲩⲱ ⲉϥϣⲁⲛⲧⲥⲟ ⲛⲟⲩⲙⲁⲑⲏⲧⲏⲥ ⲛⲟⲩϫⲱ ⲙⲙⲟⲟⲩ ⲛⲱⲣϣ ⲙⲙⲁⲧⲉ ⲉⲡⲣⲁⲛ ⲛⲟⲩⲙⲁⲑⲏⲧⲏⲥ ϩⲁⲙⲏⲛ ϯϫⲱ ⲙⲙⲟⲥ ⲛⲏⲧⲛ ϫⲉⲛⲛⲉϥⲥⲱⲣⲙ ⲛϭⲓⲡⲉϥⲃⲉⲕⲉ · |
| s-83
| ϥϯ ⲛⲁⲕ ⲱ ⲡⲣⲙⲙⲁⲟ ⲛⲟⲩⲡⲣⲟⲫⲁⲥⲓⲥ ⲙⲙⲛⲧⲣⲙϩⲉ ⲙⲙⲉ · |
| s-84
| ⲉⲃⲟⲗ ⲅⲁⲣ ϩⲓⲧⲛⲛⲁⲓ ⲉⲩⲛⲁϩⲉ ⲉⲣⲟⲕ ⲛϣⲃⲣⲣϩⲱⲃ ⲙⲡⲛⲟⲩⲧⲉ ⲉⲕⲥⲁⲛϣ ⲛⲙⲙⲁⲧⲟⲓ ⲙⲡⲉⲭⲣⲓⲥⲧⲟⲥ : ⲁⲩⲱ ⲉⲕⲥⲁⲛϣ ⲙⲙⲟⲟⲩ ⲉϩⲛⲁⲕ ⲉⲩⲁⲛⲁⲅⲕⲁⲍⲉ ⲙⲙⲟⲕ ⲁⲛ · |
| s-85
| ⲡⲣⲣⲟ ⲇⲉ ⲛⲧⲡⲉ ⲙⲉϥⲁⲛⲁⲅⲕⲁⲍⲉ ⲟⲩⲇⲉ ⲙⲉϥϣⲉⲧⲧⲉⲗⲟⲥ · ⲁⲗⲗⲁ ϣⲁϥϣⲱⲡ ⲉⲣⲟϥ ⲛⲛⲣⲉϥϯ ⲉⲧⲣⲟⲟⲩⲧ ϫⲉⲕⲁⲥ ⲉⲩϯ ⲉⲩⲉϫⲓ · ⲁⲩⲱ ⲉⲩⲧⲓⲙⲁ ϫⲉⲕⲁⲥ ⲉⲩⲉⲧⲓⲙⲁ ⲙⲙⲟⲟⲩ · |
| s-86
| ⲁⲩⲱ ⲉⲩⲕⲟⲓⲛⲱⲛⲉⲓ ⲙⲛⲛϩⲏⲕⲉ ϩⲛⲛⲉ ⲡⲣⲟⲥⲟⲩⲟⲉⲓϣ ϫⲉⲉⲩⲉⲧⲁϩⲙⲟⲩ ⲉϩⲟⲩⲛ ⲉⲧⲕⲟⲓⲛⲱⲛⲓⲁ ⲛⲛϣⲁⲉⲛⲉϩ · |
| s-87
| ⲛⲁⲓ ⲙⲁⲣⲛⲣⲡⲉⲩⲙⲉⲉⲩⲉ ⲛϣⲁⲉⲛⲉϩ · ⲛⲟⲩⲟⲉⲓϣ ⲛⲓⲙ · |
| s-88
| ⲁⲩⲱ ⲙⲁⲣⲟⲩϣⲱⲡⲉ ⲙⲡⲉⲙⲧⲟ ⲉⲃⲟⲗ ⲛⲛⲉⲛⲃⲁⲗ · ⲛⲥⲉϣⲱⲡⲉ ϩⲛⲧⲉⲛⲯⲩⲭⲏ ϫⲉⲕⲁⲥ ⲉⲛϣⲁⲛϩⲉ ⲉⲡⲉⲟⲩⲟⲉⲓϣ · ⲛⲛⲉⲛⲕⲁⲁϥ ⲛⲥⲱⲛ · ⲟⲩⲇⲉ ⲛⲧⲛⲧⲙⲟⲃϣ ⲛⲡⲉⲧϣⲟⲟⲡ · |
| s-89
| ⲧⲉⲛⲟⲩ ⲛⲧⲛϭⲱϣⲧ ⲉⲃⲟⲗ ϩⲏⲧϥ ⲙⲡⲉⲧⲛⲏⲩ ⲙⲏⲡⲟⲧⲉ ϩⲙⲡⲧⲣⲉⲛϭⲱϣⲧ ⲉⲃⲟⲗ · ⲁⲩⲱ ⲉⲛⲛⲟⲩϫⲉ ⲙⲡϩⲱⲃ ⲉⲡⲁϩⲟⲩ · ⲛⲥⲧⲁϩⲟⲛ ⲛϭⲓⲧⲉⲛϩⲁⲏ · |
| s-90
| ⲉⲣⲉⲡϫⲟⲉⲓⲥ ⲇⲉ ⲧⲁⲁⲥ ⲛⲁⲛ ⲉⲧⲣⲉⲩϩⲉ ⲉⲣⲟⲛ ⲉⲛⲣⲟⲉⲓⲥ · ⲁⲩⲱ ⲉⲛϯⲕⲁⲣⲡⲟⲥ ⲉⲛⲉⲓⲣⲉ ⲙⲡⲙⲉⲉⲩⲉ ⲛⲛⲉϥⲉⲛⲧⲟⲗⲏ · ⲉⲛⲥⲃⲧⲱⲧ ⲉⲧⲉϥⲁⲛⲁⲡⲁⲩⲥⲓⲥ ⲉⲧϩⲁⲉⲟⲟⲩ · ⲁⲩⲱ ⲉⲙⲛⲗⲁⲁⲩ ϯϫⲣⲟⲡ ⲛⲁⲛ : |
| s-91
| ϩⲓⲧⲛⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲛϫⲟⲉⲓⲥ ⲡⲁⲓ ⲉⲃⲟⲗ ϩⲓⲧⲟⲟⲧϥ ⲡⲉⲟⲟⲩ ⲙⲡⲉⲓⲱⲧ ⲛⲙⲙⲁϥ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ϣⲁⲛⲁⲓⲱⲛ ⲧⲏⲣⲟⲩ ⲛⲁⲓⲱⲛ ϩⲁⲙⲏⲛ · — ◈ — ◈ — ◈ — ◈ — ◈ |
| s-92
| ⲁⲑⲁⲛⲁⲥⲓⲟⲥ ⲁⲣⲭⲏⲉⲡⲓⲥⲕⲟⲡⲟⲩ · — ◈ — ◈ — ◈ — ◈ — ◈ |