| s-1
| ϩⲟⲙⲟⲓⲱⲥ ⲟⲩϩⲟⲙⲟⲗⲓⲁ ⲉⲁϥⲧⲁⲩⲟⲥ ϩⲛⲕⲱⲛⲥⲧⲁⲛⲧⲓⲛⲟⲩⲡⲟⲗⲓⲥ ϩⲛⲧⲉⲕⲕⲗⲏⲥⲓⲁ ⲛⲁⲛⲑⲉⲙⲓⲟⲥ ⲛϭⲓⲡⲣⲟⲕⲗⲟⲥ ⲡⲉⲡⲓⲥⲕⲟⲡⲟⲥ ⲛⲕⲩⲍⲓⲕⲟⲥ ϩⲛⲧⲕⲩⲣⲓⲁⲕⲏ ⲙⲡⲃⲱⲗ ⲉⲃⲟⲗ · ϩⲙⲡⲧⲣⲉⲩⲑⲙⲥⲟϥ ⲉϫⲛⲧⲕⲁⲑⲉⲇⲣⲁ ⲛⲧⲙⲛⲧⲁⲣⲭⲏⲉⲡⲓⲥⲕⲟⲡⲟⲥ ⲉϥⲙⲙⲁⲩ ⲛϭⲓⲛⲉⲥⲧⲟⲣⲓⲟⲥ ⲡϩⲁⲓⲣⲉⲧⲓⲕⲟⲥ · ◈ — ◈ — ◈ : |
| s-2
| ⲙⲁⲣⲉⲧⲉϣⲡⲏⲣⲉ ⲙⲡϣⲁ ⲙⲡⲉⲛⲥⲱⲧⲏⲣ ϫⲣⲟ ⲉⲛⲉⲛϣⲁϫⲉ · |
| s-3
| ⲙⲁⲣⲉⲥϭⲱϫⲃ ⲛϭⲓⲧⲙⲛⲧⲣⲉϥϫⲉ ⲛⲟϭ ⲛϣⲁϫⲉ ⲙⲡⲉⲛⲗⲁⲥ ⲛⲛⲁϩⲣⲛⲧⲉⲓϣⲡⲏⲣⲉ ⲙⲡϩⲟⲟⲩ · ⲉⲃⲟⲗ ϫⲉⲥⲛⲁϣⲡⲱϩ ⲁⲛ ⲉⲡϣⲓ ⲛⲛⲧⲁϣⲉⲟⲉⲓϣ ⲛⲧⲙⲛⲧⲣⲉϥⲣⲡⲉⲧⲛⲁⲛⲟⲩϥ ⲙⲡⲉⲛⲧⲁⲩⲥⲧⲁⲩⲣⲟⲩ ⲙⲙⲟϥ ϩⲁⲣⲟⲛ · ⲕⲁⲧⲁⲡⲉⲥⲙⲡϣⲁ · |
| s-4
| ⲁϣ ⲅⲁⲣ ⲡⲉ ⲡϩⲱⲃ ⲉⲛⲧⲁϥϣⲱⲡⲉ ⲛⲧⲉⲓϩⲉ ϫⲓⲛⲛⲉⲛⲉϩ · ⲛⲧϩⲉ ⲙⲡⲉⲧⲛⲛⲁⲩ ⲉⲣⲟϥ · ⲧⲉⲛⲟⲩ ϩⲛⲟⲩⲡⲓⲥⲧⲓⲥ · |
| s-5
| ⲛⲧⲁⲁϣ ⲛⲛⲟⲩⲥ ⲙⲉⲉⲩⲉ ⲟⲛ ⲛⲧⲉⲓϩⲉ ⲉⲛⲉϩ · |
| s-6
| ⲏ ⲛⲧⲁⲁϣ ⲛⲗⲟⲅⲓⲥⲙⲟⲥ ⲙⲟⲕⲙⲉⲕ ⲉⲣⲟϥ ⲉⲛⲉϩ · |
| s-7
| ⲏ ⲁϣ ⲡⲉ ⲡϩⲏⲧ ⲉⲛⲧⲁϥⲡⲗⲁⲥⲥⲉ ⲙⲙⲟϥ · |
| s-8
| ⲏ ⲁϣ ⲡⲉ ⲡϣⲁϫⲉ ⲉⲛⲧⲁϥϫⲟⲟϥ · |
| s-9
| ⲏ ⲡⲃⲁⲗ ⲉⲛⲧⲁϥⲛⲁⲩ ⲉⲣⲟϥ · |
| s-10
| ⲏ ⲡⲙⲁⲁϫⲉ ⲉⲛⲧⲁϥⲥⲱⲧⲙ ⲉⲧⲉⲓⲥⲙⲏ ⲛϣⲡⲏⲣⲉ ⲛⲧⲉⲓⲙⲉ · ⲉⲧⲉⲡⲁⲓ ⲡⲉ ⲡⲉⲭⲣⲓⲥⲧⲟⲥ ⲉⲛⲧⲁϥϫⲓⲥⲁⲣⲝ ϩⲛⲟⲩⲙⲉ · ⲉⲁϥⲭⲁⲣⲓⲍⲉ ⲛⲁⲛ ⲙⲡⲱⲛϩ · |
| s-11
| ⲙⲡⲉⲡⲣⲏ ⲛⲁⲩ ⲉⲡⲇⲓⲁⲃⲟⲗⲟⲥ ⲉⲛⲉϩ ⲉⲩⲥⲧⲏⲗⲓⲟⲩⲉ ⲙⲙⲟϥ ϩⲓϫⲙⲡϣⲉ ϩⲁⲣⲟⲛ · ϩⲓϫⲙⲡⲉⲥⲧⲁⲩⲣⲟⲥ · |
| s-12
| ⲟⲩⲇⲉ ⲙⲡϥⲛⲁⲩ ⲉⲣⲟϥ ⲉϥϣⲱⲡ ⲛⲧⲉⲛⲫⲩⲥⲓⲥ ϩⲁⲡⲥⲁϩⲟⲩ · |
| s-13
| ⲟⲩⲇⲉ ⲙⲡⲟⲩⲧⲁⲁϥ ⲉⲃⲟⲗ ⲉⲛⲉϩ · ⲉⲧⲣⲉϥⲥⲱⲧⲉ ⲙⲡⲕⲟⲥⲙⲟⲥ ϩⲁⲙⲁⲁⲃ ⲛϩⲁⲧ · |
| s-14
| ⲟⲩⲇⲉ ⲙⲡⲉⲡⲁⲑⲟⲥ · ⲏ ⲙⲟⲩ ⲛⲧⲟϥ ⲛⲁⲧⲛⲟⲃⲉ ϣⲱⲡⲉ ⲉⲛⲉϩ ⲙⲙⲁ ⲛⲟⲩⲱⲧϩ ⲙⲡⲛⲟⲃⲉ · |
| s-15
| ⲟⲩⲇⲉ ⲙⲡⲟⲩϭⲁⲓⲟ ⲉⲃⲟⲗ ⲙⲡⲧⲩⲣⲁⲛⲛⲟⲥ ⲉⲛⲉϩ ϫⲉⲟⲩⲁⲧⲉⲓⲱⲧ ⲡⲉ ⲕⲁⲧⲁⲥⲁⲣⲝ · |
| s-16
| ⲏ ϫⲉⲁⲩⲁϣⲧϥ ⲉⲡϣⲉ · ⲉⲧⲣⲉϥⲥⲉⲕⲟⲩⲟⲛ ⲛⲓⲙ ϣⲁⲣⲟϥ · ⲏ ⲉϯⲱⲛϩ ⲛⲁⲩ · |
| s-17
| ⲟⲩⲇⲉ ⲙⲡⲉⲧⲁⲫⲟⲥ ⲛⲧⲁϥ ϣⲱⲡ ⲉⲣⲟϥ ⲉⲛⲉϩ ⲛⲟⲩⲕⲱⲱⲛⲥ ⲛⲣⲉϥϣⲱⲗ ⲙⲡⲙⲟⲩ · |
| s-18
| ⲙⲡⲉⲧⲡⲉ ⲣⲕⲁⲕⲉ ϩⲛⲧⲙⲏⲧⲉ ⲙⲡⲉϩⲟⲟⲩ ⲉⲛⲉϩ ⲉⲧⲃⲉⲡⲉⲧⲙⲙⲁⲩ · ϫⲉⲕⲁⲥ ⲉⲛⲉⲥⲛⲁⲩ ⲉⲡⲉⲇⲣⲁⲙⲁ ⲉⲛⲧⲁⲩⲧⲟⲗⲙⲁ ⲉⲣⲟϥ ⲉϩⲟⲩⲛ ⲉⲡⲛⲟⲩⲧⲉ · ϩⲱⲥⲧⲉ ⲉϫⲱϩ ⲉⲧⲉϥⲥⲁⲣⲝ · |
| s-19
| ⲟⲩⲇⲉ ⲙⲡⲉⲁⲙⲛⲧⲉ ⲥⲧⲱⲧ ⲉⲧⲃⲉⲡⲉⲧⲙⲙⲁⲩ ⲡⲁⲓ ⲉⲛⲧⲁϥⲟⲙⲕϥ · |
| s-20
| ⲟⲩⲇⲉ ⲙⲡⲉⲡⲕⲁϩ ⲕⲁⲗⲗⲱⲡⲓⲍⲉ ⲉⲛⲉϩ ϩⲛⲟⲩⲙϩⲁⲁⲩ · ⲛⲧⲁϥⲛⲧⲙⲛⲧⲣⲉϥϯⲱⲛϩ · |
| s-21
| ⲙⲁⲗⲗⲟⲛ ⲇⲉ ϩⲛⲟⲩⲙϩⲁⲁⲩ ⲁⲛ ⲁⲗⲗⲁ ϩⲛⲟⲩⲛⲩⲙⲫⲱⲛ · |
| s-22
| ⲙⲡϥⲧⲁⲕⲟ ⲅⲁⲣ ⲛϭⲓⲡⲉⲛⲧⲁⲩⲧⲟⲙⲥϥ ⲛϩⲏⲏⲧϥ : ⲁⲗⲗⲁ ⲛⲧⲁϥϣⲱⲡⲉ ⲛⲛⲩⲙⲫⲓⲟⲥ ⲛϭⲓⲡⲉⲛⲧⲁϥⲃⲱⲕ ⲉⲡⲉⲥⲏⲧ · |
| s-23
| ⲙⲡⲟⲩϫⲡⲉⲗⲁⲁⲩ ⲙⲫⲩⲥⲓⲥ ⲉⲛⲉϩ ⲉⲁϥⲣϣⲟⲙⲛⲧ ⲛϩⲟⲟⲩ ⲙⲛϣⲟⲙⲧⲉ ⲛⲟⲩϣⲏ ϩⲙⲡⲕⲁϩ · ⲁⲩⲱ ⲁϥⲧⲱⲟⲩⲛ · ⲉⲓⲙⲏⲧⲓ ⲉⲡⲉⲛⲧⲁϥⲡⲗⲁⲥⲥⲉ ⲙⲁⲩⲁⲁϥ ϩⲛϩⲏⲧⲥ ⲛⲧⲡⲁⲣⲑⲉⲛⲟⲥ ⲛⲟⲩⲣⲡⲉ ⲙⲡⲉϥⲥⲱⲙⲁ ⲕⲁⲧⲁⲧϩⲉ ⲉⲧϥⲥⲟⲟⲩⲛ ⲉⲛⲧⲟϥ ⲡⲉⲛⲧⲁϥⲧⲱⲟⲩⲛ ϩⲙⲡⲙⲉϩϣⲟⲙⲛⲧ ⲛϩⲟⲟⲩ · |
| s-24
| ⲉⲁϥⲧⲟⲩⲛⲉⲥ ⲡⲉⲣⲡⲉ ⲉⲛⲧⲁϥⲃⲟⲗϥ ⲉⲃⲟⲗ ⲉⲃⲟⲗ ⲉϩⲛⲁϥ ϩⲓⲧⲙⲡⲙⲟⲩ · |
| s-25
| ⲉⲁϥⲟⲩⲱⲛϩ ⲉⲃⲟⲗ ⲛⲧⲁⲛⲁⲥⲧⲁⲥⲓⲥ ϩⲓⲧⲛⲧⲛⲁⲁⲕⲉ ⲛⲧⲡⲁⲣⲑⲉⲛⲟⲥ · |
| s-26
| ϩⲙⲡⲉⲓⲙⲁ ⲙⲉⲛ ⲉϣⲁⲣⲉⲡⲉⲭⲣⲟⲛⲟⲥ ⲧⲁϩⲉⲡⲉϫⲡⲟ · |
| s-27
| ⲙⲡⲉⲓⲙⲁ ⲇⲉ ϩⲱⲱϥ ⲡⲉⲧϭⲙϭⲟⲙ ⲡⲉⲧⲧⲁϣⲉⲟⲉⲓϣ ϩⲛⲟⲩϭⲉⲡⲏ · |
| s-28
| ⲙⲡⲉⲗⲁⲁⲩ ⲛϩⲓⲉⲓⲃ ⲉⲁⲩⲧⲁⲗⲟϥ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ · ϥⲓ ⲙⲡⲛⲟⲃⲉ ⲙⲡⲕⲟⲥⲙⲟⲥ · ⲉⲓⲙⲏⲧⲓ ⲉⲡⲉⲟⲩⲟⲉⲓϣ ⲉⲛⲧⲁⲡⲛⲟⲩⲧⲉ ϫⲓⲙⲟⲣⲫⲏ ⲛϩⲙϩⲁⲗ · |
| s-29
| ⲁⲩⲱ ⲁϥⲡⲗⲁⲥⲥⲉ ⲙⲡⲥⲱⲙⲁ ⲛⲁⲧϣⲁϫⲉ ⲉⲣⲟϥ · |
| s-30
| ⲁϥⲧⲁⲁϥ ϩⲓⲱⲱϥ · |
| s-31
| ⲡⲁⲓ ⲇⲉ ⲧⲉϥⲥⲁⲣⲝ ⲙⲉⲛ ⲡⲉ ⲡⲱⲛϩ · |
| s-32
| ⲡⲉϥⲥⲛⲟϥ ⲇⲉ ⲡⲉ ⲡⲥⲱⲧⲉ · |
| s-33
| ⲡⲉⲡⲛⲉⲩⲙⲁ ⲇⲉ ⲡⲉ ⲧⲉⲥⲫⲣⲁⲅⲓⲥ · |
| s-34
| ⲧⲉⲫⲩⲥⲓⲥ ⲇⲉ ⲙⲡⲛⲟⲩⲧⲉ ⲙⲛⲧⲥ ⲁⲣⲭⲏ · |
| s-35
| ⲕⲁⲗⲱⲥ ⲟⲩⲛ ⲁϥϫⲟⲟⲥ ⲛϭⲓⲡⲙⲁⲕⲁⲣⲓⲟⲥ ⲡⲁⲩⲗⲟⲥ ϫⲉⲁⲛⲁⲣⲭⲁⲓⲟⲛ ⲟⲩⲉⲓⲛⲉ · ⲉⲓⲥϩⲏⲏⲧⲉ ⲁϩⲉⲛⲃⲣⲣⲉ ϣⲱⲡⲉ · |
| s-36
| ⲧⲁⲓ ⲧⲉ ⲧϩⲉ ⲛⲧⲁⲡⲉⲛⲧⲁϥⲉⲓ ⲉⲡⲉⲥⲏⲧ ⲉⲃⲟⲗ ⲛϩⲏⲧⲥ ⲥⲙⲟⲩ ⲉⲧⲉⲛϭⲓⲛⲃⲱⲕ ⲉϩⲣⲁⲓ · |
| s-37
| ⲟⲩⲕⲁϩ ⲛⲃⲣⲣⲉ · ⲡⲁⲓ ⲉⲛⲧⲁⲡⲉⲛⲧⲁⲩⲕⲁⲁϥ ϩⲛⲟⲩⲟⲙϥ ⲧⲃⲃⲟϥ ϩⲓⲧⲛⲧⲥⲁⲣⲝ ⲉⲛⲧⲁⲩϫⲧⲟⲥ ⲛϩⲏⲧϥ · |
| s-38
| ⲟⲩⲑⲁⲗⲁⲥⲥⲁ ⲛⲃⲣⲣⲉ ⲉⲥϩⲗⲟⲩⲗⲱⲟⲩ · ⲏ ⲉⲥϫⲟⲥⲉ · |
| s-39
| ⲉⲙⲡⲉⲧⲁϭⲥⲉ ⲛⲣⲱⲙⲉ ⲛⲥⲁⲣⲝ ⲙⲟⲟϣⲉ ϩⲓϫⲱⲥ · ⲟⲩⲇⲉ ⲙⲡⲟⲩⲟⲣϣⲥ ϩⲓⲧⲙⲡⲛⲟⲃⲉ · |
| s-40
| ⲟⲩⲃⲓⲟⲥ ⲛⲃⲣⲣⲉ · ⲡⲁⲓ ⲉⲛⲧⲁϥⲧⲣⲉⲡⲡⲟⲗⲉⲙⲟⲥ ⲗⲟ ⲟⲩⲃⲏϥ · |
| s-41
| ⲁϥⲙⲁϩϥ ⲉⲁϥϫⲟⲕϥ ⲉⲃⲟⲗ ϩⲛⲟⲩⲉⲓⲣⲏⲛⲏ · |
| s-42
| ⲟⲩⲙⲛⲧⲣⲱⲙⲉ ⲛⲃⲣⲣⲉ · ⲧⲁⲓ ⲉⲛⲧⲁϥϫⲟⲕⲙⲥ ⲉⲁϥⲉⲓⲁⲁⲥ ⲉⲃⲟⲗ ϩⲛⲟⲩⲙⲟⲟⲩ · |
| s-43
| ⲉⲁϥⲟⲩⲟⲧϩⲥ ⲛⲕⲉⲥⲟⲡ ϩⲙⲡⲕⲱϩⲧ ⲙⲡⲉⲡⲛⲉⲩⲙⲁ ⲉⲧⲟⲩⲁⲁⲃ · |
| s-44
| ⲟⲩϣⲙϣⲉ ⲛⲃⲣⲣⲉ · ⲟⲩⲕⲉⲧⲓ ⲅⲁⲣ ⲙⲛⲥⲟⲩⲥⲟⲟⲩϣⲉ ⲅⲁⲣ ⲛⲕⲉⲥⲟⲡ ⲟⲩⲇⲉ ⲥⲃⲃⲉ · ⲁⲗⲗⲁ ⲉⲩϣⲙϣⲉ ϩⲛⲟⲩⲡⲓⲥⲧⲓⲥ · |
| s-45
| ⲉⲩϯⲉⲟⲟⲩ ϩⲛⲟⲩⲟⲩⲥⲓⲁ ⲛⲟⲩⲱⲧ · ⲛϣⲟⲙⲧⲉ ⲛϩⲩⲡⲟⲥⲧⲁⲥⲓⲥ · |
| s-46
| ⲛⲁⲓ ⲛⲉ ⲧⲉϥⲧⲁϣⲉⲟⲉⲓϣ ⲙⲙⲟϥ ⲛⲁⲛ ⲛϭⲓⲡⲉⲡⲣⲟⲫⲏⲧⲏⲥ ⲉϥϫⲱ ⲙⲙⲟⲥ ϫⲉϩⲙⲡⲉϩⲟⲟⲩ ⲉⲧⲙⲙⲁⲩ ⲡⲛⲟⲩⲧⲉ ⲛⲁⲟⲩⲱⲛϩ ⲉⲃⲟⲗ ⲛⲟⲩϣⲟϫⲛⲉ ⲙⲛⲟⲩⲉⲟⲟⲩ ϩⲓϫⲙⲡⲕⲁϩ · |
| s-47
| ϩⲛⲁϣ ⲛϩⲟⲟⲩ ⲁϫⲓⲥ ⲉⲣⲟⲛ ⲱ ⲡⲉⲡⲣⲟⲫⲏⲧⲏⲥ · |
| s-48
| ϩⲙⲡⲉϩⲟⲟⲩ ⲡⲉϫⲁϥ ⲉⲧⲉⲣⲉⲡⲛⲟⲩⲧⲉ ⲉⲧⲛⲧⲡⲉ ⲙⲫⲩⲥⲓⲥ ⲛⲓⲙ ⲛⲁϫⲓⲥⲁⲣⲝ ⲉⲃⲟⲗ ϩⲛⲟⲩⲥϩⲓⲙⲉ ⲕⲁⲧⲁⲧϩⲉ ⲉⲧϥⲥⲟⲟⲩⲛ ⲛⲧⲟϥ ⲙⲙⲟⲥ · |
| s-49
| ⲛⲥϫⲡⲟ ⲛϭⲓⲧⲡⲁⲣⲑⲉⲛⲟⲥ ⲙⲡⲙⲩⲥⲧⲏⲣⲓⲟⲛ ⲛⲁⲧϣⲁϫⲉ ⲉⲣⲟϥ · ⲁϫⲛϩⲟⲟⲩⲧ · ⲟⲩⲣⲱⲙⲉ ⲙⲙⲁⲓⲣⲱⲙⲉ ⲉⲙⲉϥϣⲓⲃⲉ · ⲉⲁϥⲧⲣⲉⲡⲙⲟⲩ ⲕⲁⲃⲟⲗ ⲙⲙⲟⲓ · ⲡⲁⲓ ⲉⲛⲧⲁϥⲟⲙⲕⲧ ⲉⲛϯⲥⲟⲟⲩⲛ ⲁⲛ · ⲉⲁⲡⲉϥⲧⲁⲫⲟⲥ ϣⲱⲡⲉ ⲛⲑⲏⲥⲁⲩⲣⲟⲥ ⲛⲧⲁⲛⲁⲥⲧⲁⲥⲓⲥ · ⲁⲩⲱ ⲧⲁⲓⲭⲙⲁⲗⲱⲥⲓⲁ ⲙⲡⲣⲱⲙⲉ · |
| s-50
| ⲁϥⲧⲣⲉⲥⲣⲙⲁⲁⲩ ⲛⲧⲁⲉⲗⲉⲩⲑⲉⲣⲓⲁ |
| s-51
| ⲁⲩⲱ ⲁϩⲣⲟⲓ ⲉⲓⲧⲁϣⲟ ⲙⲡϣⲁϫⲉ · |
| s-52
| ⲡⲡⲁⲑⲟⲥ ⲙⲉⲛ ⲡⲁⲧⲥⲁⲣⲝ ⲡⲉ · ⲡⲉⲕⲣⲁⲧⲟⲥ ⲇⲉ ⲡⲁⲧⲙⲛⲧⲛⲟⲩⲧⲉ ⲡⲉ · |
| s-53
| ⲁⲗⲗⲁ ⲁϫⲓⲥ ⲉⲣⲟⲛ ⲱ ⲡⲉⲡⲣⲟⲫⲏⲧⲏⲥ ϫⲉⲉⲣⲉⲡⲛⲟⲩⲧⲉ ⲛⲁⲟⲩⲱⲛϩ ⲉⲃⲟⲗ ⲛⲁϣ ⲛϩⲉ ϩⲓϫⲙⲡⲕⲁϩ : |
| s-54
| ⲁⲣⲁ ⲭⲱⲣⲓⲥⲧⲙⲛⲧⲣⲱⲙⲉ · |
| s-55
| ⲁⲣⲁ ⲭⲱⲣⲓⲥⲧⲥⲁⲣⲝ · |
| s-56
| ⲃⲱⲕ ⲛⲁⲕ ⲱ ⲡϩⲁⲓⲣⲉⲧⲓⲕⲟⲥ ⲙⲡⲣⲧⲁⲩⲉⲡⲁⲓ ⲉⲓϣⲁϫⲉ ⲉⲣⲟⲕ ⲁⲛ ⲱ ⲡⲉⲡⲣⲟⲫⲏⲧⲏⲥ |
| s-57
| ⲉⲛⲉⲛⲧⲁϥⲟⲩⲱⲛϩ ⲅⲁⲣ ⲉⲃⲟⲗ ⲭⲱⲣⲓⲥⲧⲁⲓ ⲉⲓϣⲁϫⲉ ⲉⲧⲥⲁⲣⲝ · ⲱ ⲡⲣⲉϥⲇⲟⲅⲙⲁⲧⲓⲍⲉ ⲛⲃⲣⲣⲉ · ⲁⲩⲱ ⲉⲧϣⲟⲩⲉⲓⲧ · ⲡⲉⲕϩⲟ ⲏ ⲛⲉⲕⲃⲁⲗ ⲛⲁϣϥⲓ ⲁⲛ ϩⲁⲛⲉϥⲁⲕⲧⲓⲛ · |
| s-58
| ⲡⲥⲱⲛⲧ ⲛⲁϣϩⲱⲃⲥ ⲁⲛ ⲛⲧⲉⲫⲩⲥⲓⲥ · |
| s-59
| ⲡⲇⲓⲁⲃⲟⲗⲟⲥ ⲛⲁϣϯ ⲙⲡⲉϥⲛⲟⲩⲟⲉⲓ ⲉⲣⲟϥ ⲁⲛ ⲉⲙⲓϣⲉ ⲛⲙⲙⲁϥ · |
| s-60
| ϥⲥⲧⲱⲧ ⲅⲁⲣ ϩⲏⲧϥ ⲙⲡⲣⲉϥⲥⲱⲛⲧ · |
| s-61
| ⲡⲙⲟⲩ ⲛⲁϣⲧⲟⲗⲙⲁ ⲁⲛ ⲉⲱⲙⲕ ⲛⲧⲉⲫⲩⲥⲓⲥ ⲛⲧⲙⲛⲧⲛⲟⲩⲧⲉ ⲛⲁⲧⲧⲁⲕⲟ · |
| s-62
| ⲁⲙⲛⲧⲉ ⲟ ⲛϩⲟⲧⲉ ϩⲏⲧϥ ⲙⲡⲛⲟⲩⲧⲉ ⲉϥⲕⲏⲕⲁϩⲏⲩ ⲛⲧⲥⲁⲣⲝ · |
| s-63
| ⲡⲉⲧⲉⲙⲁⲣⲉⲛⲥⲉⲣⲁⲫⲓⲛ ⲅⲁⲣ ⲛⲁⲩ ⲉⲣⲟϥ · |
| s-64
| ⲛⲁϣ ⲛϩⲉ ⲁⲙⲛⲧⲉⲛⲁⲥⲧⲱⲧ ϩⲏⲧϥ ⲁⲛ · |
| s-65
| ⲁⲗⲗⲁ ⲧⲉⲭⲣⲓⲁ ⲧⲉ ⲛⲟⲩⲕⲁⲗⲩⲙⲁ ⲛⲧⲉⲫⲩⲥⲓⲥ ⲙⲡⲛⲟⲩⲧⲉ · ⲉⲧⲣⲉϥϩⲱⲃⲥ ⲁⲛ ⲛⲧⲉⲧⲙⲙⲁⲩ · |
| s-66
| ⲉⲓϣⲁϫⲉ ⲉⲧⲉⲫⲩⲥⲓⲥ ⲛⲧⲙⲛⲧⲛⲟⲩⲧⲉ ⲛⲁⲧⲧⲁⲕⲟ · |
| s-67
| ⲁⲗⲗⲁ ⲉⲧⲣⲉⲛⲡⲗⲏⲥⲥⲉ ⲛⲧⲟϥ ⲉϫⲛⲧⲉϥⲑⲉⲱⲣⲓⲁ · |
| s-68
| ⲟⲩⲕⲁⲗⲩⲙⲁ ⲁⲛ ⲡⲉ ⲛⲧϩⲉ ⲙⲡⲁⲙⲱⲩⲥⲏⲥ ⲟⲩϩⲃⲥ ⲅⲁⲣ ⲛⲕⲁⲕⲉ ⲛⲧⲉⲧⲙⲛⲧⲁⲧⲥⲟⲟⲩⲛ ⲡⲉ ⲡⲉⲧⲙⲙⲁⲩ · |
| s-69
| ⲟⲩⲕⲁⲧⲁⲡⲉⲧⲁⲥⲙⲁ ⲡⲉ ⲁⲛ ⲛϩⲁⲣⲉⲓⲟⲡⲉ · |
| s-70
| ⲡⲉϥⲥⲁ ⲅⲁⲣ ⲟⲩ ⲉⲃⲟⲗ ⲡⲉ ϩⲛϩⲉⲛⲁⲩⲁⲛ ⲁⲩⲁⲛ · |
| s-71
| ⲟⲩϩⲓⲗⲁⲥⲧⲏⲣⲓⲟⲛ ⲁⲛ ⲡⲉ ⲉϥⲗⲁⲗⲱⲟⲩ ⲛⲛⲟⲩⲃ · |
| s-72
| ⲡⲉϥⲥⲁ ⲅⲁⲣ ⲟⲩⲉⲃⲟⲗ ⲡⲉ ϩⲛⲟⲩϩⲏⲗⲏ · |
| s-73
| ⲟⲩⲭⲉⲣⲟⲩⲃⲓⲛ ⲅⲁⲣ ⲁⲛ ⲙⲙⲟⲩⲛⲅ ⲛϭⲓϫ ⲛⲣⲱⲙⲉ · |
| s-74
| ⲟⲩϣⲡⲏⲣⲉ ⲅⲁⲣ ⲧⲉ ⲧⲉϥⲧⲉⲭⲛⲏ · |
| s-75
| ⲁⲗⲗⲁ ⲧⲉⲭⲣⲓⲁ ⲧⲉ ⲛⲟⲩϩⲃⲥⲱ ⲛⲉⲥⲟⲟⲩ ϫⲉⲕⲁⲥ ⲉϥⲉϭⲱⲣϭ ⲛϩⲏⲧⲥ ⲉⲡⲟⲩⲱⲛϣ ⲛⲟⲩⲁⲙⲣⲱⲙⲉ · |
| s-76
| ⲁⲗⲗⲁ ⲁϥⲃⲱⲕ ⲟⲛ ⲉϫⲛ ⲛⲁϣⲁϫⲉ ⲛϭⲓⲡⲓⲟⲩⲇⲁⲓ ⲛⲃⲣⲣⲉ · ⲁⲩⲱ ϥⲥⲱⲃⲉ ⲛⲥⲁⲧⲙⲛⲧⲛⲟϭ ⲙⲡϣⲁϫⲉ ⲙⲡⲉⲡⲣⲟⲫⲏⲧⲏⲥ ⲉϥⲙⲓϣⲉ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · |
| s-77
| ⲁⲩⲱ ⲟⲩ ⲡⲉⲧϥϫⲱ ⲙⲙⲟϥ · |
| s-78
| ⲁⲛⲟⲕ ϯⲡⲓⲥⲧⲉⲩⲉ ⲁⲛ ϫⲉⲁⲡⲛⲟⲩⲧⲉ ⲟⲩⲱⲛϩ ⲉⲃⲟⲗ ϩⲓϫⲙⲡⲕⲁϩ · ⲉⲁⲡⲉⲧⲉⲙⲛⲧϥⲥⲭⲏⲙⲁ ϫⲓⲙⲟⲣⲫⲏ ϩⲙⲡⲉⲓⲛⲉ ⲙⲡⲣⲱⲙⲉ · |
| s-79
| ⲁⲗⲗⲁ ⲉϣϫⲉ ⲕⲥⲱⲃⲉ ⲛⲥⲁⲡⲛⲟⲙⲟⲥ ⲱ ⲡⲓⲟⲩⲇⲁⲓ ⲁⲩⲱ ⲕⲟ ⲛⲁⲧⲥⲱⲧⲙ ⲛⲥⲁⲛⲉⲡⲣⲟⲫⲏⲧⲏⲥ · ⲁⲩⲱ ⲕⲕⲁⲧⲁⲫⲣⲟⲛⲉⲓ ⲛⲛⲉⲩⲁⲅⲅⲉⲗⲓⲥⲧⲏⲥ ⲁⲩⲱ ⲕⲡⲱⲱⲛⲉ ⲛⲛϣⲁϫⲉ ⲛⲛⲁⲡⲟⲥⲧⲟⲗⲟⲥ · ⲟⲩⲕ ⲟⲩⲛ ⲙⲁⲣⲛϫⲛⲉⲛⲉⲥⲧⲟⲓⲭⲓⲟⲛ ⲛⲧⲛⲉⲓⲙⲉ ⲉⲃⲟⲗ ϩⲓⲧⲟⲟⲧⲟⲩ · ϫⲉⲉⲩϩⲟⲙⲟⲗⲟⲅⲉⲓ ⲙⲡϫⲟⲉⲓⲥ ⲉⲛⲧⲁϥⲙⲟⲩ ϩⲛⲧⲥⲁⲣⲝ · ϫⲉⲛⲓⲙ ⲡⲉ · |
| s-80
| ⲁⲩⲉⲓⲥ ⲛⲧⲛϫⲛⲟⲩ ⲡⲣⲏ ⲛϣⲟⲣⲡ · |
| s-81
| ⲁϫⲓⲥ ⲉⲣⲟⲛ ⲱ ⲡⲣⲏ ϫⲉⲉⲧⲃⲉⲟⲩ ⲁⲕⲥⲱⲕ ⲉⲣⲟⲕ ⲛⲛⲉⲕⲁⲕⲧⲓⲛ · ⲛⲧⲉⲣⲟⲩⲥⲧⲁⲩⲣⲟⲩ ⲙⲡϫⲟⲉⲓⲥ · |
| s-82
| ⲉⲧⲃⲉⲟⲩ ϫⲉⲟⲩⲣⲱⲙⲉ ⲡⲉ ⲉϥϣⲟⲩⲉⲓⲧ ⲡⲉ ⲡⲉⲛⲧⲁⲩⲥⲧⲁⲩⲣⲟⲩ ⲙⲙⲟϥ · |
| s-83
| ⲟⲩⲕ ⲟⲩⲛ ⲕⲙⲡϣⲁ ⲛⲣⲡⲁⲓ ϩⲓⲁⲃⲉⲗ ⲡⲇⲓⲕⲁⲓⲟⲥ ⲉⲩϩⲱⲧⲃ ⲙⲙⲟϥ · |
| s-84
| ϯⲛⲁϫⲛⲉⲧⲡⲉ ⲟⲛ · |
| s-85
| ⲁϫⲓⲥ ⲉⲣⲟⲛ ⲱ ⲧⲡⲉ · ϫⲉⲉⲧⲃⲉⲟⲩ ⲁⲣϯϩⲓⲱⲱⲧⲉ ⲛⲟⲩⲕⲁⲕⲉ ⲙⲡⲛⲁⲩ ⲙⲙⲉⲉⲣⲉ · |
| s-86
| ⲉⲧⲃⲉ ϫⲉⲁⲛⲓⲟⲩⲇⲁⲓ ⲕⲱⲱⲛⲥ ⲙⲡⲉⲥⲡⲓⲣ ⲙⲡϫⲟⲉⲓⲥ · |
| s-87
| ⲉⲃⲟⲗ ϫⲉⲟⲩⲣⲱⲙⲉ ⲉϥϣⲟⲩⲉⲓⲧ ⲡⲉ ⲡⲉⲧⲟⲩⲥⲧⲁⲩⲣⲟⲩ ⲙⲙⲟϥ ϩⲁⲣⲟⲛ · |
| s-88
| ⲉⲧⲃⲉⲟⲩ ϭⲉ ⲟⲩⲛ ⲙⲡⲉⲣⲉⲉⲓⲙⲉ ⲉⲩϩⲓⲱⲛⲉ ⲉⲛⲁⲃⲟⲩⲑⲁⲓ ⲡⲓⲥⲣⲁⲏⲗⲓⲧⲏⲥ · |
| s-89
| ⲁϫⲓⲥ ⲉⲣⲟⲛ ⲱ ⲡⲕⲁϩ ϫⲉⲉⲧⲃⲉⲟⲩ ⲁⲕⲥⲧⲱⲧ ⲉⲣⲉⲛⲉⲓⲣⲉϥⲙⲓϣⲉ ⲟⲩⲃⲉⲡⲛⲟⲩⲧⲉ ⲉⲓⲣⲉ ⲛⲧⲉⲓⲛⲟϭ ⲛⲧⲟⲗⲙⲏⲣⲓⲁ · |
| s-90
| ⲉⲧⲃⲉϫⲉⲟⲩⲣⲱⲙⲉ ⲉϥϣⲟⲩⲉⲓⲧ ⲡⲉⲧⲟⲩⲥⲧⲁⲩⲣⲟⲩ ⲙⲙⲟϥ · |
| s-91
| ⲉⲧⲃⲉⲟⲩ ⲙⲡⲕⲥⲧⲱⲧ ⲉⲕⲛⲁⲩ ⲉⲏⲥⲁⲓⲁⲥ ⲉⲩⲟⲩⲉⲓⲥⲉ ⲙⲙⲟϥ ϩⲓⲧⲛⲙⲁⲛⲁⲥⲥⲏ · |
| s-92
| ⲁⲗⲗⲁ ⲙⲁϫⲛⲉⲡⲣⲡⲉ ϩⲱⲱϥ ⲟⲛ |
| s-93
| ϫⲉⲁϫⲓⲥ ⲉⲣⲟⲛ ⲱ ⲡⲣⲡⲉ ϫⲉⲉⲧⲃⲉⲟⲩ ⲁⲡⲕⲁⲧⲁⲡⲉⲧⲁⲥⲙⲁ ⲡⲱϩ ⲉⲩⲛⲁⲥⲧⲁⲩⲣⲟⲩ ⲙⲡⲉⲭⲣⲓⲥⲧⲟⲥ |
| s-94
| ⲉⲧⲃⲉϫⲉⲟⲩⲣⲱⲙⲉ ⲉϥϣⲟⲩⲉⲓⲧ ⲡⲉ ⲛⲧⲁⲩⲥⲧⲁⲩⲣⲟⲩ ⲙⲙⲟϥ · |
| s-95
| ⲉⲧⲃⲉⲟⲩ ⲙⲡⲕⲛⲁϩϥ ⲛⲧⲉⲣⲟⲩⲡⲱϩⲧ ⲉⲃⲟⲗ ϩⲛⲧⲉⲕⲙⲏⲧⲉ ⲙⲡⲉⲥⲛⲟϥ ⲛⲍⲁⲭⲁⲣⲓⲁⲥ · |
| s-96
| ⲁⲡⲟⲗⲟⲅⲓⲍⲉ ⲛⲁⲛ ⲧⲉⲛⲟⲩ ⲱ ⲧⲉⲕⲧⲏⲥⲓⲥ ⲧⲏⲣⲥ ⲉⲧⲉⲙⲉⲥϣⲁϫⲉ · |
| s-97
| ⲛⲧⲁⲛⲕⲏⲣⲩⲥⲥⲉ ⲁⲛ ⲡⲉϫⲁⲥ ⲛⲟⲩϩⲏⲃⲉ ⲙⲡⲣⲉϥⲥⲱⲛⲧ · |
| s-98
| ⲛⲟⲩϣⲃⲣϩⲙϩⲁⲗ ⲁⲛ ⲡⲉⲛⲧⲁⲩⲧⲟϭⲛⲉϥ ⲉⲡⲙⲟⲩ · |
| s-99
| ⲁⲗⲗⲁ ⲛⲧⲁⲛϣⲧⲟⲣⲧⲣ ⲁⲩⲱ ⲁⲛⲥⲧⲱⲧ ⲉⲩϣⲱⲥ ⲙⲡϫⲟⲉⲓⲥ · |
| s-100
| ⲧⲡⲉ ⲅⲁⲣ ⲱϣ ⲉⲃⲟⲗ ϫⲉⲡⲛⲟⲩⲧⲉ ⲉⲛⲧⲁϥⲣⲥⲁⲣⲝ ⲡⲉⲛⲧⲁⲩⲥⲧⲁⲩⲣⲟⲩ ⲙⲙⲟϥ ϩⲛⲧⲥⲁⲣⲝ · |