| s-1
| ▢ ⲡⲁⲓ ⲡⲉ ⲡⲃⲓⲟⲥ ⲙⲡⲙⲁⲕⲁⲣⲓⲟⲥ ⲓⲱϩⲁⲛⲛⲏⲥ ⲡⲙⲟⲛⲁⲭⲟⲥ ⲛⲧⲉⲗⲓⲟⲛ ⲡⲁⲓ ⲛⲧⲁⲛⲉϥⲉⲓⲟⲧⲉ ⲥⲙⲓⲛⲉ ⲛⲁϥ ⲙⲡⲉⲩⲁⲅⲅⲉⲗⲓⲟⲛ ⲛⲛⲟⲩⲃ · |
| s-2
| ⲉⲁϥϫⲱⲕ ⲉⲃⲟⲗ ⲙⲡⲉϥⲃⲓⲟⲥ ⲉⲧⲛⲁⲛⲟⲩϥ ϩⲛⲟⲩⲙⲛⲧⲧⲉⲗⲓⲟⲥ ⲙⲛⲟⲩϩⲩⲡⲟⲙⲟⲛⲏ ⲉⲛⲁⲛⲟⲩⲥ · ⲛⲥⲟⲩϥⲧⲟⲟⲩ ⲙⲡⲉⲃⲟⲧ · ⲙϣⲓⲣ ϩⲛⲟⲩⲉⲓⲣⲏⲛⲏ ⲛⲧⲉⲡⲛⲟⲩⲧⲉ ⲥⲙⲟⲩ ⲉⲣⲟⲛ ⲧⲏⲣⲛ ϩⲁⲙⲏⲛ ⁛— |
| s-3
| —ⲡⲉⲓⲃⲓⲟⲥ ⲅⲁⲣ ⲧⲉⲛⲟⲩ ⲉⲧⲓⲛⲁϣⲁϫⲉ ⲛⲙⲙⲏⲧⲛ ⲉⲧⲃⲏⲏⲧϥ · ⲡⲁⲣⲁⲟⲩⲣⲱⲙⲉ ⲛⲧⲉⲡⲛⲟⲩⲧⲉ ⲡⲉ ⲁⲩⲱ ⲛϣⲟⲩⲣϣⲡⲏⲣⲉ ⲙⲙⲟϥ ⲛⲧⲁϥϣⲱⲡⲉ ϩⲙⲡⲉⲛⲟⲩⲟⲉⲓϣ · |
| s-4
| ⲡⲁⲓ ⲧⲉⲛⲟⲩ ⲛⲉⲩⲛⲟⲩⲣⲱⲙⲉ ϣⲟⲟⲡ ϩⲛⲧⲡⲟⲗⲓⲥ ϩⲣⲱⲙⲏ ⲟⲩⲣⲙⲙⲁⲟ ⲉⲙⲁⲧⲉ ⲡⲉ · |
| s-5
| ⲛⲧⲟϥ ⲡⲉ ⲡⲁⲣⲭⲱⲛ ⲛⲧⲡⲟⲗⲓⲥ · |
| s-6
| ⲡⲉϥⲣⲁⲛ ⲡⲉ ⲉⲩⲧⲣⲟⲡⲓⲟⲥ · |
| s-7
| ⲡⲣⲁⲛ ⲛⲧⲉϥⲥϩⲓⲙⲉ ⲡⲉ ⲑⲉⲟⲇⲱⲣⲁ · ⲁⲩⲱ ⲛⲉⲩⲟ ⲛⲣⲉϥϣⲙϣⲉⲛⲟⲩⲧⲉ ⲙⲡⲉⲥⲛⲁⲩ ϫⲓⲛⲧⲉⲩⲙⲛⲧⲕⲟⲩⲓ ⁛— |
| s-8
| ⲛⲁⲓ ⲇⲉ ⲛⲉⲣⲉϣⲟⲙⲛⲧ ⲛϣⲏⲣⲉ ϣⲟⲟⲡ ⲛⲁⲩ · |
| s-9
| ⲡⲉⲥⲛⲁⲩ ⲙⲉⲛ ⲁⲩϯ ⲛⲁⲩ ⲛⲟⲩⲛⲟϭ ⲛⲧⲁⲝⲓⲥ · ϩⲙⲡⲡⲁⲗⲗⲁϯⲟⲛ ⲛⲛⲣⲣⲱⲩ · |
| s-10
| ⲡⲕⲟⲩⲓ ϩⲱⲱϥ ⲁⲩⲧⲁⲁϥ ⲉⲧⲣⲉϥϫⲓⲥⲃⲱ ⲉⲛⲉϩⲃⲏⲩⲉ ⲙⲡⲛⲟⲩⲧⲉ · |
| s-11
| ⲙⲛⲛⲥⲁⲛⲁⲓ ⲇⲉ ⲁϥⲉⲓⲙⲉ ⲉⲛⲱϣ ⲛⲛⲉⲥⲭⲟⲗⲁⲥⲧⲓⲕⲟⲥ · ⲁⲩⲱ ⲛⲉϥϩⲛⲧⲉⲩⲙⲏⲏⲧⲉ ⲡⲉ · |
| s-12
| ⲡⲁⲗⲓⲛ ⲟⲛ · ⲁϥⲧⲥⲁⲃⲟ ⲛⲛⲉϩⲃⲏⲩⲉ ⲙⲡⲛⲟⲩⲧⲉ ⲁⲩⲱ ⲛϥⲙⲏⲣ ⲉⲧⲉⲕⲕⲗⲏⲥⲓⲁ ⲉϥϣⲓⲛⲉ ⲛⲥⲁⲡⲛⲟⲩⲧⲉ · ⲙⲡⲉϩⲟⲟⲩ ⲙⲛⲧⲉⲩϣⲏ · |
| s-13
| ⲟⲩϩⲟⲟⲩ ⲇⲉ ⲉⲃⲟⲗ ϩⲛⲟⲩϩⲟⲟⲩ ⲁϥⲡⲁⲣⲁⲅⲉ ⲙⲙⲟϥ ⲛϭⲓⲟⲩⲥⲟⲛ ⲙⲙⲟⲛⲁⲭⲟⲥ ⲛⲧⲉⲧⲙⲟⲛⲏ ⲉⲧⲥⲁϩⲟⲩⲛ · ⲧⲁⲓ ⲉⲧⲟⲩⲙⲟⲩⲧⲉ ⲉⲣⲟⲥ ϫⲉⲛⲉⲧⲉⲙⲉⲩⲛⲕⲟⲧⲕ ⲉϥⲟⲩⲱϣ ⲉⲃⲱⲕ ⲉⲧϩⲓⲉⲣⲟⲩⲥⲁⲗⲏⲙ · ⲉϣⲗⲏⲗ ϩⲛⲙⲙⲁ ⲉⲧⲟⲩⲁⲁⲃ · |
| s-14
| ⲡⲁⲓ ⲇⲉ ⲁϥϣⲁϫⲉ ⲙⲛⲓⲱϩⲁⲛⲛⲏⲥ ϩⲁϩⲧⲛⲡⲉϥⲏⲓ · ϩⲙⲡϣⲁϫⲉ ⲙⲡⲛⲟⲩⲧⲉ · |
| s-15
| ⲁϥⲣϣⲡⲏⲣⲉ ⲛϭⲓⲓⲱϩⲁⲛⲛⲏⲥ ⲉⲡⲉϩⲟⲩⲟ · ⲉϥⲛⲁⲩ ⲉⲡⲥⲟⲛ ⲙⲙⲟⲛⲁⲭⲟⲥ ⲙⲛⲡⲉϥⲥⲭⲏⲙⲁ · ⲙⲛⲧⲉϥϭⲓⲛϣⲁϫⲉ ⲉⲧϩⲟⲗϭ ⲙⲛⲛⲉϥⲙⲉⲉⲩⲉ · ⲉϩⲟⲩⲛ ⲉⲡⲛⲟⲩⲧⲉ ⲛⲧϩⲉ ⲛⲟⲩⲕⲱϩⲧ ⁛ |
| s-16
| ⲡⲉϫⲉⲓⲱϩⲁⲛⲛⲏⲥ · ϫⲉⲡⲁϫⲟⲉⲓⲥ ⲛⲉⲓⲱⲧ ⲛⲧⲟⲕ ⲡⲁⲧⲱⲛ · ⲏ ⲉⲣⲉⲡⲉⲕⲙⲟⲛⲁⲥⲧⲏⲣⲓⲟⲛ · ⲏ ⲉⲣⲉⲡⲉⲕⲙⲟⲛⲁⲥⲧⲏⲣⲓⲟⲛ ⲧⲱⲛ · |
| s-17
| ⲡⲉϫⲉⲡⲥⲟⲛ ⲙⲙⲟⲛⲁⲭⲟⲥ ⲛⲁϥ ϫⲉⲁⲛⲟⲕ ⲉⲓϣⲟⲟⲡ ϩⲛⲧⲙⲟⲛⲏ ⲛⲛⲉⲧⲉⲙⲉⲩⲛⲕⲟⲧⲕ · |
| s-18
| ⲁⲩⲱ ⲉⲣϣⲁⲛⲡⲛⲟⲩⲧⲉ ⲣϩⲛⲁϥ ⲉⲓⲟⲩⲱϣ ⲉⲃⲱⲕ ⲉⲧϩⲓⲉⲣⲟⲩⲥⲁⲗⲏⲙ ⲛⲧⲁϣⲗⲏⲗ ⲙⲙⲁⲩ ϩⲙⲡⲙⲁ ⲉⲧⲟⲩⲁⲁⲃ · ⲁⲩⲱ ϩⲙⲡⲟⲩⲱϣ ⲙⲡⲛⲟⲩⲧⲉ · ϯⲛⲁⲕⲧⲟⲓ ⲉⲡⲁⲙⲁ ⲛⲕⲉⲥⲟⲡ · |
| s-19
| ⲁⲩⲱ ⲁⲡⲙⲟⲛⲁⲭⲟⲥ ⲧⲁⲙⲟϥ ⲉⲧⲃⲉϩⲱⲃ ⲛⲓⲙ ⲛⲧⲁⲓⲱϩⲁⲛⲛⲏⲥ ⲧⲁⲙⲟϥ ⲉⲧⲃⲏⲏⲧϥ · |
| s-20
| ⲛⲧⲉⲣⲉϥⲥⲱⲧⲙ ⲇⲉ ⲛϭⲓⲓⲱϩⲁⲛⲛⲏⲥ ⲉⲛⲉⲓϣⲁϫⲉ ⲁϥⲁⲙⲁϩⲧⲉ ⲛⲧϭⲓϫ ⲙⲡⲥⲟⲛ ⲙⲙⲟⲛⲁⲭⲟⲥ ⲁϥϫⲓⲧϥ ⲉⲩⲙⲁ ⲉϥⲉⲥⲩⲭⲁⲍⲉ |
| s-21
| ⲁⲩⲱ ⲁϥⲧⲁⲣⲕⲟϥ ⲛϩⲉⲛⲛⲟϭ ⲛⲁⲛⲁϣ ⲉϥϫⲱ ⲙⲙⲟⲥ ⲛⲁϥ ϫⲉⲉⲕϣⲁⲛⲃⲱⲕ ⲡⲁⲙⲉⲣⲓⲧ ⲛⲥⲟⲛ ⲉⲧϩⲓⲉⲣⲟⲩⲥⲁⲗⲏⲙ ⲛⲅⲕⲟⲧⲕ ϩⲛⲟⲩⲉⲓⲣⲏⲛⲏ ⲙⲡⲣϩⲟⲡⲕ ⲉⲣⲟⲓ · |
| s-22
| ⲟⲩⲇⲉ ⲙⲡⲣⲃⲱⲕ ⲉⲧⲉⲕⲙⲟⲛⲏ ⲛⲅⲕⲁⲁⲧ ⲛⲥⲱⲕ ⲉⲃⲟⲗ ϫⲉⲛϯϩⲡⲗⲁⲁⲩ ⲁⲛ ⲉⲣⲟⲕ ϩⲙⲡⲁⲃⲓⲟⲥ ⲧⲏⲣϥ · ⲉⲡⲉⲓⲇⲏ ⲛⲁⲉⲓⲟⲧⲉ ⲙⲉ ⲙⲙⲟⲓ ⲉⲙⲁⲧⲉ ⲡⲁⲣⲁⲛⲁⲥⲛⲏⲩ · |
| s-23
| ⲕⲁⲓ ⲅⲁⲣ ⲁⲩⲧⲁⲁⲧ ⲉⲧⲟⲟⲧⲟⲩ ⲛϩⲉⲛⲥⲭⲟⲗⲁⲥⲧⲓⲕⲟⲥ · |
| s-24
| ⲁⲩⲱ ⲉⲣⲉⲡⲁⲉⲓⲱⲧ ϫⲱ ⲙⲙⲟⲥ ϫⲉϯⲛⲁϯ ⲛⲁⲕ ⲛϩⲉⲛⲛⲟϭ ⲛⲧⲁⲝⲓⲥ · |
| s-25
| ⲗⲟⲓⲡⲟⲛ ⲕⲁⲧⲁⲛⲉⲧϩⲙⲡⲉϥϩⲏⲧ ⲉϥⲟⲩⲱϣ ⲉϯ ⲛⲁⲓ ⲛⲕⲉⲥⲁϣϥ ⲛⲧⲁⲝⲓⲥ ⲉⲩϫⲟⲥⲉ ⲡⲁⲣⲁⲧⲱϥ · |
| s-26
| ⲁⲩⲱ ⲙⲛⲛⲥⲁⲛⲁⲓ ⲉϥⲟⲩⲱϣ ⲉⲛⲣϣⲉⲗⲉⲉⲧ ⲉⲣⲟⲓ · |
| s-27
| ⲁⲛⲟⲕ ⲇⲉ ϩⲱⲱⲧ ⲟⲛ ⲁⲓⲃⲱⲕ ⲉⲧⲉⲕⲕⲗⲏⲥⲓⲁ · ⲁⲓⲥⲱⲧⲙ ⲉⲣⲟⲟⲩ ⲉⲩⲱϣ ϩⲛⲟⲩⲙⲁ ⲉⲩϫⲱ ⲙⲙⲟⲥ ϫⲉⲡⲉⲟⲟⲩ ⲧⲏⲣϥ ⲙⲡⲉⲓⲕⲟⲥⲙⲟⲥ ⲟⲩϩⲱⲃ ⲛⲥⲱⲃⲉ ⲡⲉ · ⲁⲩⲱ ϫⲉⲡⲉⲧⲛⲁⲕⲁⲧⲁⲫⲣⲟⲛⲉⲓ ⲙⲡⲉⲓⲕⲟⲥⲙⲟⲥ ⲛϥⲟⲩⲁϩϥ ⲛⲥⲁⲡⲉⲭⲣⲓⲥⲧⲟⲥ ϩⲛⲟⲩϩⲏⲧ ⲉϥⲥⲟⲩⲧⲱⲛ · ⲙⲟⲅⲓⲥ ⲛϥⲛⲟⲩϩⲙ · |
| s-28
| ⲕⲉⲙⲁⲗⲓⲥⲧⲁ ⲡⲁⲥⲟⲛ ⲡⲣⲱⲙⲉ ⲛⲣⲉϥⲣⲛⲟⲃⲉ ⲛⲧⲁⲙⲓⲛⲉ · |
| s-29
| ⲉⲧⲃⲉⲡⲁⲓ ϯⲥⲟⲡⲥⲡ ⲙⲙⲟⲕ ⲡⲁⲉⲓⲱⲧ ⲉⲧⲟⲩⲁⲁⲃ · ⲉⲧⲣⲉⲕϫⲓⲧ ⲛⲙⲙⲁⲕ ⲉⲧⲉⲕⲙⲟⲛⲏ · |
| s-30
| ⲛⲧⲉⲣϥⲥⲱⲧⲙ ⲇⲉ ⲉⲛⲁⲓ ⲛϭⲓⲡⲥⲟⲛ ⲙⲙⲟⲛⲁⲭⲟⲥ · ⲁϥⲱⲣⲕ ⲛⲟⲩⲁⲛⲁϣ ϫⲉⲉⲓϣⲁⲛⲕⲧⲟⲓ ϯⲛⲁϫⲓⲧⲕ ⲛⲙⲙⲁⲓ ⲉⲧⲁⲙⲟⲛⲏ · |
| s-31
| ⲛⲧⲉⲩⲛⲟⲩ ⲇⲉ ⲁⲩⲧⲁϫⲣⲉⲡϣⲁϫⲉ ⲙⲛⲛⲉⲩⲉⲣⲏⲩ ϩⲓⲟⲩⲥⲟⲡ · ⲁⲡⲟⲩⲁ ⲡⲟⲩⲁ ⲙⲙⲟⲟⲩ ⲙⲟⲟϣⲉ ⲉⲧⲉϥⲙⲟⲛⲏ ϩⲛⲟⲩⲉⲓⲣⲏⲛⲏ |
| s-32
| ⲙⲛⲛⲥⲁⲛⲁⲓ ⲇⲉ ⲁϥϫⲓϣⲟϫⲛⲉ ϩⲙⲡⲉϥϩⲏⲧ ⲛϭⲓⲡⲙⲁⲕⲁⲣⲓⲟⲥ ⲓⲱϩⲁⲛⲛⲏⲥ ⲉϥϫⲱ ⲙⲙⲟⲥ ϫⲉⲡⲣⲱⲧⲱⲛ ⲙⲉⲛ ⲕⲁⲁⲧ ⲛⲧⲁⲃⲱⲕ ϣⲁⲛⲁⲉⲓⲟⲧⲉ ⲛⲧⲁⲧⲣⲉⲩⲥⲙⲓⲛⲉ ⲛⲁⲓ ⲛⲟⲩⲉⲩⲁⲅⲅⲉⲗⲓⲟⲛ ⲛⲧⲁⲱϣ ϩⲓⲱⲱϥ · ϫⲉⲛϯⲥⲟⲟⲩⲛ ⲁⲛ ⲛⲛⲉⲛⲧⲟⲗⲏ ⲙⲡⲉⲭⲣⲓⲥⲧⲟⲥ · |
| s-33
| ⲁⲩⲱ ⲟⲛ ϯⲛⲁϭⲛⲧϥ ϩⲙⲡⲙⲁ ⲉⲧⲓⲛⲁⲃⲱⲕ ⲉⲣⲟϥ · |
| s-34
| ⲁϥⲉⲓ ⲇⲉ ⲉⲡⲏⲓ ⲛⲛⲉϥⲉⲓⲟⲧⲉ · |
| s-35
| ⲁϥϫⲱ ⲉⲣⲟⲟⲩ ⲛⲟⲩⲗⲟⲓϭⲉ ⲛϯⲙⲓⲛⲉ ⲉϥϫⲱ ⲙⲙⲟⲥ ϫⲉⲁⲛⲁⲩ ⲱ ⲛⲁⲉⲓⲟⲧⲉ · ϫⲉⲁⲛⲟⲕ ϯϣⲟⲟⲡ ϩⲛⲟⲩϣⲓⲛⲉ ⲛⲧⲙⲏⲧⲉ ⲛⲛⲁϣⲃⲏⲣⲥⲭⲟⲗⲁⲥⲧⲓⲕⲟⲥ ϫⲉⲥⲉϣⲟⲟⲡ ⲧⲏⲣⲟⲩ ϩⲛⲧⲉⲥⲭⲟⲗⲏ ⲉⲣⲉⲟⲩⲉⲩⲁⲅⲅⲉⲗⲓⲟⲛ ⲛⲛⲟⲩⲃ ⲛⲧⲟⲟⲧϥ ⲙⲡⲟⲩⲁ ⲡⲟⲩⲁ ⲛⲧⲁⲛⲉⲩⲉⲓⲟⲧⲉ ⲥⲙⲛⲧϥ ⲛⲁⲩ ⲉⲩⲱϣ ϩⲓⲱⲱϥ · |
| s-36
| ⲁⲛⲟⲕ ⲇⲉ ϩⲱ ⲉⲓⲟ ⲛⲧϩⲉ ⲛⲟⲩϩⲏⲕⲉ ϩⲛⲧⲉⲩⲙⲏⲏⲧⲉ ⲉⲙⲛⲧϥⲉⲓⲱⲧ ⲙⲙⲁⲩ ⲏ ⲙⲁⲁⲩ · |
| s-37
| ⲁϥⲡⲁϩⲧϥ ⲇⲉ ⲉϫⲙⲡⲉϥϩⲟ ⲛϭⲓⲓⲱϩⲁⲛⲛⲏⲥ ϩⲁⲣⲁⲧⲟⲩ ⲛⲛⲉϥⲉⲓⲟⲧⲉ ⲉϥϫⲱ ⲙⲙⲟⲥ ϫⲉϯⲥⲟⲡⲥⲡ ⲙⲙⲱⲧⲛ ⲛⲁⲉⲓⲟⲧⲉ ⲉϣⲱⲧ ⲉⲙⲁⲧⲉ ⲧⲛⲥⲙⲓⲛⲉ ⲛⲁⲓ ⲛⲟⲩⲉⲩⲁⲅⲅⲉⲗⲓⲟⲛ ϩⲱ ϫⲉⲕⲁⲥ ⲉⲓⲛⲁϩⲉ ⲉⲣⲟϥ ϩⲛⲛⲁϭⲓϫ ⲛⲧⲁϫⲓⲥⲃⲱ ⲉⲃⲟⲗ ⲛϩⲏⲧϥ · |
| s-38
| ⲛⲧⲉⲣⲉⲥⲥⲱⲧⲙ ⲇⲉ ⲛϭⲓⲧⲉϥⲙⲁⲁⲩ ⲁⲥⲣⲁϣⲉ ⲉⲙⲁⲧⲉ ϫⲉⲛⲉⲥⲟⲩⲱϣ ⲡⲉ ⲉⲧⲣⲉϥⲧⲥⲁⲃⲟ ⲕⲁⲗⲱⲥ · |
| s-39
| ⲉⲧⲓ ⲇⲉ ⲉⲥⲉⲓⲣⲉ ϩⲓⲛⲁⲓ ⲁⲥϣⲁϫⲉ ⲙⲛⲡⲉⲥϩⲁⲓ ⲉⲥϫⲱ ⲙⲙⲟⲥ ⲡⲁϫⲟⲉⲓⲥ ⲛⲥⲟⲛ ⲧⲁⲙⲓⲟ ⲛⲟⲩⲉⲩⲁⲅⲅⲉⲗⲓⲟⲛ ⲛⲛⲟⲩⲃ ⲙⲡⲉⲛϣⲏⲣⲉ ⲓⲱϩⲁⲛⲛⲏⲥ · |
| s-40
| ⲟⲩⲙⲟⲛⲟⲛ ϫⲉⲥϩⲁⲓϥ ⲙⲙⲁⲧⲉ ⲁⲗⲗⲁ ⲕⲟⲥⲙⲉⲓ ⲙⲙⲟϥ ⲕⲁⲗⲱⲥ ϩⲛϩⲉⲛⲱⲛⲉ ⲙⲙⲉ · ⲉⲛⲁϣⲉⲥⲟⲩⲛⲧⲟⲩ · |
| s-41
| ϩⲛⲧⲉⲩⲛⲟⲩ ⲉⲧⲙⲙⲁⲩ ⲁϥⲟⲩⲉϩⲥⲁϩⲛⲉ ⲛϭⲓⲡⲉϥⲉⲓⲱⲧ · |
| s-42
| ⲁϥⲉⲓⲛⲉ ⲛⲁϥ ⲛϯⲟⲩ ⲛϣⲉ ⲛϩⲟⲗⲟⲕⲟⲧⲧⲓⲛⲟⲥ ⲙⲛϩⲉⲛⲱⲛⲉ ⲙⲙⲉ · ⲉⲩⲧⲁⲓⲏⲩ ⲁϥⲧⲁⲁⲩ ⲛⲟⲩⲥⲁϩ · ⲛϩⲁⲩⲛⲟⲩⲃ · |
| s-43
| ⲁϥⲧⲁⲙⲓⲟ ⲛⲁϥ ⲛⲧⲕⲟⲥⲙⲏⲥⲓⲥ ⲛⲟⲩⲉⲩⲁⲅⲅⲉⲗⲓⲟⲛ ⲛⲧⲁⲩⲥⲁϩϥ · |
| s-44
| ⲁⲩⲱ ⲁⲡⲉϥⲉⲓⲱⲧ ϫⲓⲧϥ ⲁϥⲧⲁⲁϥ ⲛⲓⲱϩⲁⲛⲛⲏⲥ ⲡⲉϥϣⲏⲣⲉ · |
| s-45
| ⲁϥϫⲓⲧϥ ϫⲉⲛϭⲓⲓⲱϩⲁⲛⲛⲏⲥ ⲁϥⲣⲁϣⲉ ⲉϩⲣⲁⲓ ⲉϫⲱϥ · |
| s-46
| ⲁⲩⲱ ⲛϥϫⲓⲥⲃⲱ ϩⲣⲁⲓ ⲛϩⲏⲧϥ ϩⲛⲟⲩⲛⲟϭ ⲛⲙⲕⲁϩ ⲛϩⲏⲧ · |
| s-47
| ⲁⲩⲱ ⲛϥϭⲱϣⲧ ⲉⲃⲟⲗ ϩⲏⲧϥ ⲙⲡⲥⲟⲛ ⲙⲙⲟⲛⲁⲭⲟⲥ ϣⲁⲛⲧϥⲉⲓ ⲛϥⲃⲱⲕ ⲛⲙⲙⲁϥ ⁛— |
| s-48
| ⲙⲛⲛⲥⲁϩⲉⲛⲕⲟⲩⲓ ⲇⲉ ⲛϩⲟⲟⲩ ⲁϥⲉⲓ ⲛϭⲓⲡⲥⲟⲛ ⲙⲙⲟⲛⲁⲭⲟⲥ ⲉⲧⲃⲉⲡⲉⲛⲧⲁⲩⲥⲙⲛⲧϥ ⲙⲛⲛⲉⲩⲉⲣⲏⲩ ⁛— |
| s-49
| ⲛⲧⲉⲣϥⲛⲁⲩ ⲇⲉ ⲛϭⲓⲓⲱϩⲁⲛⲛⲏⲥ ⲉⲡⲥⲟⲛ ⲡⲙⲟⲛⲁⲭⲟⲥ ⲁϥⲣⲁϣⲉ ⲉⲙⲁⲧⲉ ⲁⲩⲱ ⲁϥⲧⲉⲗⲏⲗ ⲁϥⲁⲥⲡⲁⲍⲉ ⲙⲙⲟϥ · ⲉϥϣⲟⲟⲡ ϩⲛⲟⲩⲛⲟϭ ⲛⲣⲁϣⲉ · |
| s-50
| ⲡⲉϫⲁϥ ⲛⲁϥ ϫⲉⲡⲁϫⲟⲉⲓⲥ ⲛⲉⲓⲱⲧ ϯⲥⲟⲟⲩⲛ ⲉⲡⲟⲩⲱϣ ⲛⲛⲁⲉⲓⲟⲧⲉ · ⲙⲛⲡⲉⲩⲙⲉ ⲉϩⲟⲩⲛ ⲉⲣⲟⲓ · |
| s-51
| ⲙⲁⲗⲓⲥⲧⲁ ⲧⲁⲙⲁⲁⲩ ⲛϩⲟⲩⲟ ⲉϣⲱⲡⲉ ⲉⲥϣⲁⲛⲥⲱⲧⲙ ⲉϩⲱⲃ ⲛϯⲙⲓⲛⲉ ⲉϩⲟⲩⲛ ⲉⲣⲟⲓ · ϣⲁⲣⲉⲛⲉⲥⲣⲙⲉⲓⲟⲟⲩⲉ ϯϩⲓⲥⲉ ⲛⲁⲓ ⲉⲡⲉϩⲟⲩⲟ · |
| s-52
| ⲁⲗⲗⲁ ϯⲥⲟⲡⲥⲡ ⲙⲙⲟⲕ ⲙⲁⲣⲛϩⲉ ⲉⲧϩⲉ ⲛⲧⲛⲃⲱⲕ ⲛⲁⲛ ⲛϫⲓⲟⲩⲉ · |
| s-53
| ⲁⲩⲱ ⲙⲡⲣⲧⲣⲉⲗⲁⲁⲩ ⲉⲓⲙⲉ · ⲉⲡⲉⲛϫⲱⲕ · |
| s-54
| ⲡⲉϫⲉⲡⲙⲟⲛⲁⲭⲟⲥ ⲛⲁϥ ϫⲉⲛⲧϩⲉ ⲉⲧⲣⲁⲛⲁⲕ ϯⲛⲁⲁⲁⲥ ⲛⲙⲙⲁⲕ · |
| s-55
| ⲁⲩⲱ ⲡⲉⲛⲧⲁⲕⲉⲡⲉⲓⲑⲩⲙⲓ ⲉⲣⲟϥ ⲡϫⲟⲉⲓⲥ ⲛⲁϫⲟⲕϥ ⲛⲁⲕ ⲉⲃⲟⲗ · |
| s-56
| ⲁϥⲧⲱⲟⲩⲛ ⲇⲉ ⲛϭⲓⲓⲱϩⲁⲛⲛⲏⲥ ⲙⲛⲡⲙⲟⲛⲁⲭⲟⲥ · ⲁⲩⲃⲱⲕ ⲛⲁⲩ ⲛϫⲓⲟⲩⲉ · |
| s-57
| ⲁⲩⲉⲓ ⲇⲉ ⲉϫⲛⲧϩⲁⲗⲗⲁⲥⲁ · ⲉⲩϣⲓⲛⲉ ⲛⲥⲁⲟⲩϫⲟⲓ ⲉⲧⲣⲉⲩⲁⲗⲉ ⲉⲣⲟϥ · |
| s-58
| ⲁⲩⲱ ⲓⲱϩⲁⲛⲛⲏⲥ ⲁϥϣⲁϫⲉ ⲙⲛⲡⲛⲉⲉϥ ⲙⲡϫⲟⲉⲓ ⲉϥϫⲱ ⲙⲙⲟⲥ · ϫⲉϯⲡⲁⲣⲁⲕⲁⲗⲉⲓ ⲙⲙⲟⲕ ⲡⲁⲥⲟⲛ ⲉⲧⲣⲕⲡⲉⲗⲕⲧϩⲏⲙⲉ ⲛⲙⲙⲁⲛ · ϫⲉⲕⲁⲥ ⲉⲕⲉϫⲓ ⲙⲙⲟⲛ ⲙⲡⲉⲥⲛⲁⲩ ⲉⲧⲙⲟⲛⲏ ⲛⲛⲉⲧⲉⲙⲉⲩⲛⲕⲟⲧⲕ · |
| s-59
| ⲡⲛⲉⲉϥ ⲇⲉ ⲙⲡϫⲟⲉⲓ ⲡⲉϫⲁϥ ⲛⲁⲩ ϫⲉϩⲙⲟⲟⲥ ⲛⲏⲧⲛ ϣⲁⲛⲧⲁⲟⲩⲱⲧⲃ ⲙⲡⲁϫⲟⲉⲓ ⲛⲥⲕⲉⲩⲉ · ⲁⲩⲱ ⲧⲛⲛⲁⲥϭⲏⲣ ϩⲙⲡⲟⲩⲱϣ ⲙⲡⲛⲟⲩⲧⲉ · |
| s-60
| ⲡⲉϫⲉⲓⲱϩⲁⲛⲛⲏⲥ ⲙⲡⲛⲉⲉϥ ϫⲉⲙⲁⲧⲁⲙⲟⲓ ϫⲉⲟⲩⲏⲣ ⲧⲉ ⲧⲉⲕϩⲏⲙⲉ · |
| s-61
| ⲡⲉϫⲉⲡⲛⲉⲉϥ ⲛⲁϥ ϫⲉϣⲉⲛϩⲟⲗⲟⲕⲟⲧⲧⲓⲛⲟⲥ · ⲧⲉ ⲧϩⲏⲙⲉ ⲙⲡⲁϫⲟⲉⲓ ⁛— |
| s-62
| ⲧⲟⲧⲉ ⲡⲉϫⲉⲓⲱϩⲁⲛⲛⲏⲥ ⲛⲁϥ ϫⲉϯⲛⲁⲧⲁⲁⲩ ⲛⲁⲕ · |
| s-63
| ⲛⲧⲉⲣⲓⲱϩⲁⲛⲛⲏⲥ ⲇⲉ ⲧⲁⲩⲉⲛⲁⲓ ⲉⲡⲛⲉⲉϥ · ⲁϥⲉⲓ ⲉⲡⲙⲁ ⲉⲧⲉⲣⲉⲡⲥⲟⲛ ⲙⲙⲟⲛⲁⲭⲟⲥ ϩⲓⲱⲱϥ · |
| s-64
| ⲡⲉϫⲁϥ ⲛⲁϥ ϫⲉⲡⲁⲉⲓⲱⲧ ⲧϩⲏⲙⲉ ⲙⲡϫⲟⲉⲓ ⲟⲩⲛⲟϭ ⲧⲉ ⲁⲩⲱ ⲡⲉⲧϣϣⲉ ⲉⲣⲟⲕ ⲡⲉ ⲉⲧⲣⲉⲛⲃⲱⲕ ⲛⲁⲛ ⲧⲁⲭⲏ · ⲙⲏⲡⲟⲧⲉ ⲛⲥⲉⲉⲓ ⲉϫⲱⲛ ⲥⲉⲥⲟⲩⲛⲉⲛ ⲛⲥⲉϭⲟⲡⲛ ⲛⲧⲉⲟⲩϣⲓⲡⲉ ϣⲱⲡⲉ ⲛⲁⲛ · ϫⲉⲁⲛⲡⲱⲧ ⲛϫⲓⲟⲩⲉ · |
| s-65
| ⲧⲟⲧⲉ ⲁϥⲃⲱⲕ ⲉϩⲟⲩⲛ ⲉⲡⲉϥⲏⲓ ⲛϭⲓⲓⲱϩⲁⲛⲛⲏⲥ ϣⲁⲧⲉϥⲙⲁⲁⲩ · |
| s-66
| ⲡⲉϫⲁϥ ⲛⲁⲥ ϫⲉϯⲥⲟⲡⲥⲡ ⲙⲙⲟ ⲱ ⲧⲁⲙⲉⲣⲓⲧ ⲙⲙⲁⲁⲩ · ϯⲥⲟⲟⲩⲛ ϫⲉⲁⲣϫⲱⲕ ⲉⲃⲟⲗ ⲛⲛⲁⲟⲩⲱϣ ⲧⲏⲣⲟⲩ · |
| s-67
| ⲕⲉⲟⲩⲁ ⲛⲟⲩⲱⲧ ⲡⲉⲧⲓϣⲁⲁⲧ ⲙⲙⲟϥ · ⲉⲩϣⲟⲩϣⲟⲩ ⲛⲁⲛ ⲡⲉ ϩⲓⲟⲩⲥⲟⲡ · |
| s-68
| ⲛⲧⲟⲥ ⲇⲉ ⲡⲉϫⲁⲥ ⲛⲁϥ ϫⲉϩⲱⲃ ⲛⲓⲙ ⲉⲧⲕⲟⲩⲁϣϥ ⲡⲁϣⲏⲣⲉ ⲁⲓⲧⲉⲓ ⲙⲙⲟϥ ⲛⲁⲕ ⲛⲧⲟⲟⲧ · ⲁⲩⲱ ⲁⲛⲟⲕ ϯⲛⲁϫⲟⲕϥ ⲛⲁⲕ ⲉⲃⲟⲗ · |
| s-69
| ⲡⲉϫⲉⲓⲱϩⲁⲛⲛⲏⲥ ⲛⲧⲉϥⲙⲁⲁⲩ ϫⲉⲧⲉⲣⲥⲟⲟⲩⲛ ϫⲉⲛϣⲏⲣⲉ ϣⲏⲙ ⲧⲏⲣⲟⲩ ⲉⲧⲛⲙⲙⲁⲓ ϩⲛⲧⲉⲥⲭⲟⲗⲏ ⲛⲟⲩⲥⲟⲡ ⲛⲟⲩⲱⲧ ⲁⲛ ⲡⲉ · ⲟⲩⲇⲉ ⲛⲥⲛⲁⲩ ⲁⲛ ⲛⲉ · ⲛⲧⲁⲩⲁⲣⲓⲥⲧⲁ ⲙⲙⲟⲓ ϩⲙⲡⲉⲧⲛⲧⲁⲁⲩ · ⲉⲓⲟⲩⲱⲙ ⲉⲃⲟⲗ ϩⲛⲛⲉⲩⲛⲕⲁ ⁛— |
| s-70
| ⲁⲛⲟⲕ ϩⲱⲱⲧ ⲛⲉ ⲙⲛⲗⲁⲁⲩ ϣⲟⲟⲡ ⲛⲁⲓ ⲉⲧⲣⲁⲓⲣⲉ ⲛⲙⲙⲁⲩ ⲛⲧϣⲃⲃⲓⲱ ⲛⲛⲉⲛⲧⲁⲩⲁⲁⲩ ⲛⲁⲓ · |
| s-71
| ⲁⲩⲱ ⲙⲡϣⲓⲡⲉ ⲕⲱ ⲙⲙⲟⲓ ⲁⲛ ⲛⲕⲉⲥⲟⲡ ⲉⲧⲣⲁⲃⲱⲕ ⲉⲧⲉⲥⲭⲟⲗⲁⲥⲧⲓⲕⲏ ⲉⲧⲃⲉⲡⲉⲓϩⲱⲃ · |
| s-72
| ⲡⲉϫⲉⲧⲉϥⲙⲁⲁⲩ ⲛⲁϥ · ϫⲉⲡⲉⲧⲉⲕⲟⲩⲁϣϥ ϯⲛⲁⲁⲁϥ ⲛⲙⲙⲁⲕ · |
| s-73
| ⲉⲣϣⲁⲛⲡⲉⲕⲉⲓⲱⲧ ⲉⲓ ⲉϩⲟⲩⲛ ⲙⲡⲛⲁⲩ ⲙⲙⲉⲉⲣⲉ ϯⲛⲁⲧⲣⲉϥⲧⲁⲁϥ ⲛⲁⲕ ϫⲉⲕⲁⲥ ⲉⲕⲛⲁⲉⲓⲣⲉ ⲙⲡⲉⲕⲟⲩⲱϣ ⲛϩⲏⲧϥ ⲙⲛⲛⲉⲕϣⲃⲏⲣ · |
| s-74
| ⲧⲟⲧⲉ ⲛⲧⲉⲣⲉⲡⲉϥⲉⲓⲱⲧ ⲉⲓ ⲉϩⲟⲩⲛ ⲙⲡⲛⲁⲩ ⲙⲙⲉⲉⲣⲉ · ⲁⲥϫⲱ ⲉⲣⲟϥ ⲛϩⲱⲃ ⲛⲓⲙ ⲛⲧⲁⲓⲱϩⲁⲛⲛⲏⲥ ϫⲟⲟⲩ ⲛⲁⲥ · |
| s-75
| ⲛⲧⲟϥ ⲇⲉ ⲁϥⲟⲩⲱϣⲃ · |
| s-76
| ⲡⲉϫⲁϥ ϫⲉⲡⲉⲧϥⲟⲩⲁϣϥ ⲧⲏⲣϥ ϯⲛⲁⲧⲁⲁϥ ⲛⲁϥ · |
| s-77
| ⲁⲗⲗⲁ ⲙⲁⲣⲛⲧϣⲟⲩϩⲙϩⲁⲗ ⲉⲣⲟϥ ⲛϥⲣⲟⲉⲓⲥ ⲉⲣⲟϥ ϫⲉⲟⲩϣⲏⲣⲉ ϣⲏⲙ ⲡⲉ · ⲙⲏⲡⲟⲧⲉ ⲛϥⲧⲁⲕⲟⲟⲩ · ϩⲛϩⲉⲛϩⲃⲏⲩⲉ ⲉⲩϩⲟⲟⲩ · |
| s-78
| ⲁϥⲣⲁⲛⲁⲩ ⲇⲉ ⲛϭⲓⲡϣⲁϫⲉ ⲁⲩⲙⲟⲩⲧⲉ ⲉⲡⲉⲩϣⲏⲣⲉ ⲓⲱϩⲁⲛⲛⲏⲥ ⲁⲩϯ ⲛⲁϥ ⲛⲛⲛⲟⲩⲃ · |
| s-79
| ⲁⲩⲱ ⲁⲩⲧⲉϣⲡϩⲙϩⲁⲗ ⲉⲣⲟϥ · |
| s-80
| ⲛⲧⲉⲣϥϫⲓ ⲛⲛⲛⲟⲩⲃ ⲛϭⲓⲓⲱϩⲁⲛⲛⲏⲥ ⲁϥⲉⲓ ⲉⲡⲙⲁ ⲉⲧⲉⲣⲉⲡⲙⲟⲛⲁⲭⲟⲥ ⲛϩⲏⲧϥ · ⲛⲧⲟϥ ⲙⲛⲡϩⲙϩⲁⲗ ⲉⲧⲙⲟⲟϣⲉ ⲛⲙⲙⲁϥ ⲡⲉϫⲁϥ ⲛⲁϥ ϫⲉⲡⲁϫⲟⲉⲓⲥ ⲛⲥⲟⲛ ⲡⲉⲓϩⲙϩⲁⲗ ⲉⲧⲕⲛⲁⲩ ⲉⲣⲟϥ ⲡⲱⲓ ⲡⲉ · |
| s-81
| ⲁⲣⲓⲧⲁⲅⲁⲡⲏ ⲛⲅⲕⲁⲁϥ ϩⲁϩⲧⲏⲕ ⲛⲧⲁⲃⲱⲕ ⲉⲡⲙⲁ ⲛⲛⲁϣⲃⲏⲣ ⲧⲁϣⲓⲛⲉ ⲉⲃⲟⲗ ϩⲓⲧⲟⲟⲧϥ ϫⲉⲉⲩⲛⲏⲩ ϣⲁⲣⲟⲓ ⲧⲛⲁⲩ · |
| s-82
| ⲧⲟⲧⲉ ⲁϥⲉⲓⲙⲉ ⲛϭⲓⲡϩⲗⲗⲟ ⲙⲙⲟⲛⲁⲭⲟⲥ ϫⲉⲉϥϣⲁϫⲉ ⲛⲙⲙⲁϥ ⲉⲧⲃⲉⲡⲛⲉⲉϥ ⲙⲡϫⲟⲉⲓ · |
| s-83
| ⲁⲗⲗⲁ ⲛⲧⲁϥⲟⲩⲱϣ ⲉⲡⲟⲟⲛϥ ⲉⲧⲃⲉⲡϩⲙϩⲁⲗ ⲉⲧⲙⲟⲟϣⲉ ⲛⲙⲙⲁϥ · |
| s-84
| ⲓⲱϩⲁⲛⲛⲏⲥ ⲇⲉ ⲁϥϫⲓ ⲙⲡϣⲉ ⲛϩⲟⲗⲟⲕⲟⲧⲧⲓⲛⲟⲥ ⲁϥⲉⲓ ⲉⲡⲙⲁ ⲙⲡⲛⲟϭ ⲛⲛⲉⲉϥ ⲙⲡϫⲟⲉⲓ · |
| s-85
| ⲡⲉϫⲁϥ ⲛⲁϥ ϫⲉϯⲥⲟⲡⲥⲡ ⲙⲙⲟⲕ ⲡⲁϫⲟⲉⲓⲥ ⲛⲥⲟⲛ ϫⲉⲕⲁⲥ ⲉⲕⲉⲥⲃⲧⲉⲡϫⲟⲉⲓ ⲉⲃⲟⲗ · ⲛⲧⲛⲃⲱⲕ ⲛⲁⲛ ϩⲛⲟⲩϭⲉⲡⲏ · ⲁⲛⲟⲕ ⲙⲛⲡⲁⲥⲟⲛ · |
| s-86
| ⲡⲛⲉⲉϥ ⲇⲉ ⲛⲧⲉⲣϥⲥⲱⲧⲙ ⲉⲛⲁⲓ ϫⲉⲉϥⲟⲩⲱϣ ⲉⲃⲱⲕ ⲛⲁϥ ⲛϫⲓⲟⲩⲉ · ⲡⲉϫⲁϥ ⲛⲁϥ ⲛϭⲓⲡⲛⲉⲉϥ ϫⲉⲁⲓⲟⲩⲱ ⲉⲓⲥⲟⲃⲧⲉ ⲙⲡⲁϫⲟⲉⲓ · ⲁⲩⲱ ⲁⲓⲟⲩⲱ ⲉⲓϫⲱ ⲙⲙⲟⲥ ⲛⲁⲕ ⲛⲕⲉⲥⲟⲡ ϫⲉⲧϩⲏⲙⲉ ⲙⲡⲁϫⲟⲉⲓ ⲟⲩⲛⲟϭ ⲧⲉ · |
| s-87
| ⲁⲗⲗⲁ ⲉϣⲱⲡⲉ ϣⲁⲕϭⲱ ⲙⲡⲉⲓⲙⲁ · ϣⲁⲛⲧⲁⲧⲁⲗⲉⲡⲁⲩⲉⲓⲛ ⲉⲡϫⲟⲉⲓ ϣⲁⲓⲧⲁⲗⲟⲧⲛ · |
| s-88
| ⲡⲉϫⲉⲓⲱϩⲁⲛⲛⲏⲥ ϫⲉⲁⲓⲟⲩⲱ ⲉⲓϫⲱ ⲙⲙⲟⲥ ⲛⲁⲕ ϫⲉϣⲁⲓϯⲧϩⲏⲙⲉ ⲛⲁⲕ ⲕⲁⲧⲁⲧϩⲉ ⲛⲧⲁⲕϫⲟⲟⲥ · |
| s-89
| ⲛⲧⲉⲩⲛⲟⲩ ⲇⲉ ⲁϥⲉⲓⲛⲉ ⲉⲃⲟⲗ ⲙⲡϣⲉ ⲛϩⲟⲗⲟⲕⲟⲧⲧⲓⲛⲟⲥ ⲛⲧⲟⲟⲧϥ ⲉϥⲣⲁϣⲉ ⲉⲙⲁⲧⲉ · |
| s-90
| ⲁϥⲧⲁⲁϥ ⲛⲁϥ ⲉϥϫⲱ ⲙⲙⲟⲥ · ϫⲉ ⲛⲉⲛⲧⲁⲕⲧⲁⲙⲟⲓ ⲉϩⲟⲩⲟ ⲉⲛⲁⲓ ϣⲁⲓⲧⲁⲁⲩ ⲛⲁⲕ · |
| s-91
| ⲁⲛⲁⲩ ϭⲉ ⲧⲉⲛⲟⲩ ⲉϣⲱⲡⲉ ⲡⲁⲏⲣ ⲕⲉⲣⲁ ⲕⲁⲧⲁⲣⲟⲕ ⲁⲣⲓⲥ ⲛⲙⲙⲁⲛ ⲉⲧⲃⲉⲡⲛⲟⲩⲧⲉ · ⲛⲅⲥⲉⲧⲡϫⲟⲉⲓ ⲉⲃⲟⲗ ϩⲛⲟⲩϭⲉⲡⲏ ⲛⲧⲛⲃⲱⲕ ⲛⲁⲛ ⲛϫⲓⲟⲩⲉ · |
| s-92
| ⲡⲛⲉⲉϥ ⲇⲉ ⲙⲡϫⲟⲉⲓ ⲛⲧⲉⲣϥⲥⲱⲧⲙ ⲉⲛⲁⲓ · ⲁϥϫⲓ ⲙⲡϣⲉ ⲛϩⲟⲗⲟⲕⲟⲧⲧⲓⲛⲟⲥ ⲛⲧⲟⲟⲧϥ ⲉϥⲣⲁϣⲉ ⲉⲙⲁⲧⲉ · |
| s-93
| ⲡⲉϫⲁϥ ⲛⲓⲱϩⲁⲛⲛⲏⲥ · ϫⲉⲃⲱⲕ ⲁⲛⲓⲡⲉⲕϣⲃⲏⲣ ⲛⲅⲉⲓ · |
| s-94
| ⲉϣⲱⲡⲉ ⲡⲟⲩⲱϣ ⲙⲡⲛⲟⲩⲧⲉ ⲡⲉ ϯⲛⲁϥⲓ ⲙⲡⲉⲧⲛⲣⲟⲟⲩϣ ⲕⲁⲗⲱⲥ · |
| s-95
| ⲁϥⲕⲟⲧϥ ⲛϭⲓⲓⲱϩⲁⲛⲛⲏⲥ · |
| s-96
| ⲁϥⲧⲁⲙⲉⲡⲥⲟⲛ ⲙⲙⲟⲛⲁⲭⲟⲥ ⲉϩⲱⲃ ⲛⲓⲙ ⲛⲧⲁϥϣⲱⲡⲉ ⲙⲙⲟϥ · |
| s-97
| ⲙⲛⲛⲥⲁⲕⲉϩⲟⲟⲩ ⲇⲉ ⲥⲛⲁⲩ ⲡⲉϫⲉⲓⲱϩⲁⲛⲛⲏⲥ ⲙⲡⲙⲟⲛⲁⲭⲟⲥ · ϫⲉⲧⲱⲟⲩⲛ ⲛⲧⲛⲃⲱⲕ ⲉϫⲛⲧϩⲁⲗⲗⲁⲥⲁ · ⲉⲡⲉⲓⲇⲏ ⲡⲁⲓ ⲡⲉ ⲡⲉϩⲟⲟⲩ ⲉⲧⲓⲛⲁⲥⲃⲧⲉⲡⲁⲣⲓⲥⲧⲟⲛ ⲉⲛⲁϣⲃⲏⲣ · |
| s-98
| ⲉⲓⲟⲩⲱϣ ⲅⲁⲣ ⲉⲕⲱⲧⲉ ⲛⲥⲁⲟⲩϣⲏⲙ ⲛⲧⲃⲧ ⲛⲁⲩ · |
| s-99
| ⲁⲩⲉⲓ ⲇⲉ ⲉϫⲛⲧϩⲁⲗⲗⲁⲥⲁ ϩⲙⲡⲟⲩⲱϣ ⲙⲡⲛⲟⲩⲧⲉ · |
| s-100
| ⲁϥⲉⲓ ⲛϭⲓⲟⲩⲧⲏⲩ ⲉⲛⲁⲛⲟⲩϥ · |