| s-1
| ⲁⲣϯⲉⲟⲟⲩ ⲙⲡⲛⲟⲩⲧⲉ ⲧⲱⲛⲉ . |
| s-2
| ⲉⲓϣⲁϫⲉ ⲉⲣⲟ ⲛⲧⲟ ⲁⲫⲑⲟⲛⲓⲁ ⲧϣⲉⲉⲣⲉ ⲙⲡⲕⲟⲙⲉⲥ ⲁⲗⲉⲝⲁⲛⲇⲣⲟⲥ · |
| s-3
| ⲏ ⲁⲣⲧⲁⲓⲉⲡⲙⲁ ⲉⲛⲧⲁⲩⲥⲁⲛⲟⲩϣⲉ ⲛϩⲏⲧϥ ⲕⲁⲧⲁⲡⲛⲟⲩⲧⲉ ⲁⲩⲱ ⲕⲁⲧⲁⲡⲕⲟⲥⲙⲟⲥ , ϩⲛⲛⲟⲩϣⲁϫⲉ ⲙⲛⲛⲟⲩϩⲃⲏⲩⲉ · |
| s-4
| ⲉⲛⲉⲙⲡⲉⲡⲟⲩϩⲏⲧ ⲧⲁⲕⲟ . ⲛⲉⲣⲁⲥⲱϣⲡⲙⲁ ⲁⲛ ⲉⲧⲉⲛϩⲏⲧϥ . |
| s-5
| ⲏ ⲛⲉⲣⲁⲧϭⲁⲓⲉⲛⲉⲥⲛⲏⲩ ⲉⲧϩⲙⲡⲙⲁ ⲛⲙⲙⲉ · |
| s-6
| ⲥⲉⲙⲟⲩⲧⲉ ⲙⲉⲛ ⲉⲣⲟ ϩⲙⲡⲟⲩⲣⲁⲛ ϫⲉⲁⲫⲑⲟⲛⲓⲁ · |
| s-7
| ⲧⲉⲫⲑⲟⲛⲉⲓ ⲇⲉ ⲉⲣⲟ ⲙⲁⲩⲁⲁⲧⲉ · |
| s-8
| ⲁⲩⲱ ⲧⲉⲟ ⲛⲃⲁⲥⲕⲁⲛⲟⲥ ⲉⲣⲟ ⲙⲙⲓⲛⲙⲙⲟ · |
| s-9
| ⲉⲣⲟⲩⲱϣ ⲉⲧⲁⲕⲉⲧⲟⲩⲯⲩⲭⲏ ⲉⲧⲉⲙⲡⲕⲟⲥⲙⲟⲥ ⲧⲏⲣϥ ⲙⲡϣⲁ ⲙⲙⲟⲥ ⲁⲛ · ⲁⲩⲱ ⲉⲥⲱⲣⲙ ⲛⲛⲟⲩϩⲓⲥⲉ ⲉⲡϫⲓⲛϫⲏ · |
| s-10
| ⲉⲃⲟⲗ ϫⲉⲁⲣⲕⲁⲡⲙⲁ ⲙⲡⲥⲁⲧⲁⲛⲁⲥ ⲉϩⲟⲩⲛ ⲉⲣⲟ ⲉⲧⲣⲉϥⲡⲱⲱⲛⲉ ⲙⲡⲟⲩϩⲏⲧ · ⲁⲩⲱ ⲛϥⲥⲣⲙⲣⲱⲙⲉ ⲛⲧϩⲉ ⲛⲛⲓⲉⲥⲟⲟⲩ ⲉⲧⲟ ⲛϩⲟⲟⲗⲉ · |
| s-11
| ⲧⲁⲑⲏⲧ ⲁⲩⲱ ⲧⲁⲧⲥⲃⲱ ⲉⲧⲉⲙⲛⲥⲃⲱ ⲙⲙⲟⲥ · |
| s-12
| ⲉⲛⲉⲟⲩⲛⲉⲡⲓⲥⲧⲏⲙⲏ ⲅⲁⲣ ⲙⲙⲟ . ⲕⲁⲛ ⲁⲩⲙⲓϣⲉ ⲛⲙⲙⲉ ⲛⲁⲙⲉ ⲧⲉⲏⲡ ⲉⲕⲁⲣⲱⲙⲉ ⲉⲉⲓⲙⲉ ϫⲉⲉⲧⲉⲧⲛⲟ ⲛⲁϣ ⲛϩⲉ ⲛϩⲟⲩⲛ ⲙⲡⲉⲧⲛⲙⲁ · |
| s-13
| ⲙⲁⲗⲓⲥⲧⲁ ⲉⲁⲣϫⲟⲟⲩ ⲙⲡⲟⲩⲉⲓⲱⲧ ⲙⲛⲧⲟⲩⲙⲁⲁⲩ , ϫⲉⲁⲩⲙⲓϣⲉ ⲛⲙⲙⲁⲓ · ⲏ ϫⲉⲁⲩϩⲟⲟⲩϣ ⲉⲣⲟⲓ · |
| s-14
| ⲉⲣϫⲓϭⲟⲗ ⲉⲙⲡⲟⲩⲙⲓϣⲉ ⲛⲙⲙⲉ ⲟⲩⲧⲉ ⲙⲡⲟⲩϩⲟⲟⲩϣ ⲉⲣⲟ · |
| s-15
| ⲛⲧⲁⲩⲙⲓϣⲉ ⲛⲙⲙⲉ ϫⲉⲁⲩϯ ⲛⲉ ⲟⲩⲉⲡⲓⲥⲧⲏⲙⲏ ϩⲙⲡⲧⲣⲉⲡⲁⲣⲁⲃⲁ ⲛⲧⲉⲛⲧⲟⲗⲏ ⲛⲧⲉϫⲓϩⲛⲟ ⲛⲧⲟⲟⲧⲟⲩ ⲛⲛⲟⲩⲉⲓⲟⲧⲉ ⲟⲩⲉϣ ⲛϣⲓⲛⲉ · |
| s-16
| ⲛⲧⲁⲣϣⲓⲛⲉ ⲛⲥⲁⲟⲩ ⲉⲣⲉⲣⲭⲣⲉⲓⲁ ⲛⲁϥ · ⲁⲩⲧⲥⲧⲟ ⲉⲃⲟⲗ · ⲏ ⲉⲙⲡⲟⲩⲧⲁⲁϥ ⲛⲉ · |
| s-17
| ⲉⲣϣⲁⲛϫⲟⲟⲥ ⲙⲡⲟⲩⲉⲓⲱⲧ ⲙⲛⲧⲟⲩⲙⲁⲁⲩ · ⲉⲛⲣϩⲟⲧⲉ · |
| s-18
| ⲙⲁⲗⲓⲥⲧⲁ ⲉⲣϫⲓϭⲟⲗ · |
| s-19
| ⲟⲩⲕⲟⲩⲛ ⲧⲉⲟⲩⲱϣ ⲉⲧⲣⲉⲛⲧⲁⲙⲟⲟⲩ ⲉⲛⲟⲩϩⲃⲏⲩⲉ ⲙⲙⲛⲧⲥⲟϭ ⲉⲧⲉⲉⲓⲣⲉ ⲙⲙⲟⲟⲩ · ⲙⲛⲛⲟⲩϫⲓⲟⲩⲉ ⲙⲛⲛⲟⲩϯⲧⲱⲛ · |
| s-20
| ⲧⲃⲗⲗⲏ ⲛⲁⲙⲉ ⲉⲧϫⲟⲡϫⲡ ⲙⲙⲉⲉⲣⲉ ⲛⲧϩⲉ ⲛⲛⲉⲧϩⲛⲧⲡⲁϣⲉ ⲛⲧⲉⲩϣⲏ · ⲁⲩⲱ ⲛⲧϩⲉ ⲛⲛⲓⲃⲗⲗⲉ , ⲉⲧⲉⲙⲛⲃⲁⲗ ⲙⲙⲟⲟⲩ · |
| s-21
| ⲉⲃⲟⲗ ⲧⲱⲛ ϫⲉⲉⲣⲉⲛⲟⲩⲉⲓⲟⲧⲉ ⲛⲃⲟⲗ ϩⲙⲡⲕⲟⲥⲙⲟⲥ ⲛⲁⲥⲱⲧⲙ ⲉⲡⲟⲩϣⲁϫⲉ ⲛϩⲟⲩⲛ ϩⲙⲡⲉⲓⲙⲁ · ⲛⲧⲛⲧⲙⲉⲓⲙⲉ ⲁⲛⲟⲛ ϩⲛⲧϩⲉⲛⲉⲉⲧⲏ · |
| s-22
| ⲡⲉ ⲁⲩϫⲓⲧⲉ ⲛϭⲟⲛⲥ ⲛⲁⲙⲉ ⲏ ⲁⲩⲑⲙⲕⲟ ⲏ ⲁⲩⲗⲩⲡⲉⲓ ⲙⲙⲟ · |
| s-23
| ⲛⲉⲣⲉⲏⲡ ⲡⲉ ⲉⲧⲁⲙⲟⲛ ⲉⲡⲟⲩⲙⲕⲁϩ · |
| s-24
| ⲧⲁⲣⲛⲉⲓⲙⲉ ϫⲉⲉⲣⲉϫⲉⲙⲉ · ϫⲛ ⲙⲙⲟⲛ · |
| s-25
| ⲏ ⲛⲧⲉⲧⲁⲙⲉⲧⲟⲩⲙⲁⲁⲩ ⲉⲧϩⲙⲡⲙⲁ ϩⲁⲧⲏ . ⲉϣⲱⲡⲉ ⲉⲣⲉⲙⲟⲩⲧⲉ ⲉⲣⲟⲥ ⲁⲛ ⲙⲙⲁⲧⲉ ϩⲛⲧⲟⲩⲧⲁⲡⲣⲟ ϫⲉⲙⲁⲁⲩ . |
| s-26
| ⲉⲣⲉⲡⲟⲩϩⲏⲧ ⲇⲉ ⲟⲩⲏⲩ ⲛⲥⲁⲃⲟⲗ ⲙⲙⲟⲥ . |
| s-27
| ⲛⲧϩⲉ ⲉⲧⲥⲏϩ ϫⲉⲡⲉⲓⲗⲁⲟⲥ ⲧⲁⲓⲟ ⲙⲙⲟⲓ ϩⲛⲛⲉⲩⲥⲡⲟⲧⲟⲩ · ⲡⲉⲩϩⲏⲧ ⲇⲉ ⲟⲩⲏⲩ ⲛⲥⲁⲛⲃⲟⲗ ⲙⲙⲟⲓ · |
| s-28
| ⲉⲛⲉⲙⲡⲉⲡⲟⲩϩⲏⲧ ⲅⲁⲣ ⲛⲁⲧⲥⲃⲱ ⲣⲕⲁⲕⲉ ⲉⲣⲟ . ⲛⲉⲣⲁⲕⲁⲧⲁⲫⲣⲟⲛⲉⲓ ⲡⲉ ⲛⲛⲟⲩⲉⲓⲟⲧⲉ ⲉⲧϩⲛⲧⲥⲩⲛⲁⲅⲱⲅⲏ ⲛⲙⲙⲉ · ⲏ ⲛⲉⲣⲁⲥⲱϣ ⲛⲛⲉⲥⲛⲏⲩ , ⲉⲧⲉⲣⲉⲟⲩⲏϩ ⲛⲙⲙⲁⲩ ϩⲛⲧⲟⲩⲙⲛⲧϫⲁⲥⲓϩⲏⲧ · ⲙⲛⲧⲟⲩⲙⲛⲧⲃⲁⲃⲉⲣⲱⲙⲉ · |
| s-29
| ⲏ ⲉⲛⲉⲙⲡⲉⲕⲱ ⲛⲥⲱ ⲛⲧⲉⲥⲃⲱ ⲙⲛⲧⲙⲛⲧⲣⲙⲛϩⲏⲧ . ⲁⲩⲱ ⲛⲧⲉⲙⲉⲣⲉⲡⲡⲉⲧϩⲟⲟⲩ , ⲉϩⲟⲩⲉⲡⲡⲉⲧⲛⲁⲛⲟⲩϥ . ⲛⲉⲣⲁⲙⲉⲗⲉⲧⲁ ⲡⲉ ⲛϩⲉⲛϣⲁϫⲉ ⲉⲩⲃⲟⲟⲛⲉ . ⲛⲧⲉϫⲟⲟⲥ ϩⲛⲧⲟⲩⲧⲁⲡⲣⲟ ⲉⲧⲙⲉϩ ⲛⲥⲁϩⲟⲩ ϩⲓⲥⲓϣⲉ , ϫⲉϯⲛⲁⲃⲱⲕ ⲉⲕⲉϩⲉⲛⲉⲉⲧⲏ . |
| s-30
| ⲛⲧⲁⲡⲉⲓⲙⲁ ϫⲓⲧⲉ ⲛϭⲟⲛⲥ ϩⲛⲟⲩ · |
| s-31
| ⲏ ⲟⲩ ⲡⲉ ⲡⲃⲁⲣⲟⲥ ⲉⲛⲧⲁⲩⲟⲩⲁϩϥ ⲉϫⲱ · ⲛⲥⲁⲃⲏⲗ ϫⲉⲁⲩϫⲟⲟⲥ ⲛⲉ ϫⲉⲙⲡⲣⲡⲁⲣⲁⲃⲁ ⲛⲧⲉⲛⲧⲟⲗⲏ ⲙⲡⲛⲟⲩⲧⲉ · ⲉⲃⲟⲗ ϫⲉⲁⲣϯϣⲟⲟⲩ , ⲁⲩⲱ ⲙⲉⲥⲟⲩⲁⲫⲓ ⲛⲟⲩⲗⲉⲗⲟⲩ ⲉⲥϩⲙⲡⲏⲓ ⲛⲙⲙⲉ ϫⲉⲕⲁⲥ ⲉⲧⲉⲧⲛⲛⲁϣⲱⲡⲉ ⲛϫⲣⲟⲡ ⲁⲩⲱ ⲛⲥⲕⲁⲛⲇⲁⲗⲟⲛ ⲛⲛⲉⲧⲛⲉⲣⲏⲩ · |
| s-32
| ⲉⲧⲃⲉⲡⲁⲓ ϯϩⲟⲙⲟⲗⲟⲅⲉⲓ ⲛⲉ ϫⲉⲉϣⲱⲡⲉ ⲉⲣⲉⲧⲙⲕⲁⲉⲡⲓⲥⲧⲏⲙⲏ ⲙⲙⲟ ⲁⲩⲱ ⲛⲧⲉϥⲓ ⲧⲉⲓⲙⲛⲧⲁⲧⲥⲱⲧⲙ ⲉⲃⲟⲗ ⲙⲙⲟ ⲙⲛⲛⲓϯⲧⲱⲛ ⲉⲡϫⲓⲛϫⲏ . ϯⲛⲁⲧⲣⲉⲡⲟⲩϩⲏⲧ ⲙⲕⲁϩ . ⲁⲩⲱ ϯⲛⲁⲧⲣⲉⲩⲉⲓⲣⲉ ⲛⲉ ⲕⲁⲧⲁⲡⲉⲛⲧⲁϥⲉⲓ ⲉⲃⲟⲗ ϩⲛⲧⲟⲩⲧⲁⲡⲣⲟ · |
| s-33
| ⲛⲁⲙⲉ ϯⲙⲟⲕϩ ⲛϩⲏⲧ ⲛⲁⲓ , ⲛⲙⲙⲉ , ⲏ ⲛⲙⲙⲏⲧⲛ · |
| s-34
| ⲉⲓⲣϩⲟⲧⲉ ϫⲉⲙⲏⲡⲟⲧⲉ ⲛⲧϩⲉ ⲉⲛⲧⲁⲡϩⲟϥ ⲉⲝⲁⲡⲁⲧⲁ ⲛⲉⲩϩⲁ ϩⲛⲧⲉϥⲡⲁⲛⲟⲩⲣⲅⲓⲁ ⲛⲥⲉⲧⲁⲕⲟ ⲛϭⲓⲛⲉⲧⲛϩⲏⲧ ⲉⲃⲟⲗ ϩⲛⲧⲙⲛⲧϩⲁⲡⲗⲟⲩⲥ ⲙⲛⲡⲧⲃⲃⲟ ⲉⲧϫⲓ ⲉϩⲟⲩⲛ ⲉⲡⲉⲭⲣⲓⲥⲧⲟⲥ : |
| s-35
| ⲉϣϫⲉ ⲧⲉⲧⲙⲙⲁⲩ ⲙⲡϥⲕⲁⲁⲥ ϩⲙⲡⲡⲁⲣⲁⲇⲉⲓⲥⲟⲥ ⲉϥⲛⲁϯⲥⲟ ⲉⲣⲟ . ⲏ ⲉⲣⲱⲧⲛ ϩⲙⲡⲧⲣⲉⲧⲛⲕⲁⲙⲁ ⲛⲁϥ ⲛϩⲏⲧⲧⲏⲩⲧⲛ · ⲁⲩⲱ ⲛⲧⲉⲧⲛϣⲱⲡ ⲉⲣⲱⲧⲛ ⲛⲛⲉϥϣⲟϫⲛⲉ ⲛⲕⲣⲟϥ ⲙⲛⲛⲉϥϩⲃⲏⲩⲉ ⲙⲡⲟⲛⲏⲣⲟⲛ · |
| s-36
| ⲛϥⲛⲁϣϭⲙϭⲟⲙ ⲅⲁⲣ ⲁⲛ ⲉⲛⲉⲧⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ . ⲛⲁⲓ ⲉⲧⲉⲣⲉⲡⲉⲭⲣⲓⲥⲧⲟⲥ ϣⲟⲟⲡ ⲛⲁⲩ ⲛⲃⲟⲏⲑⲟⲥ ⲁⲩⲱ ⲛⲥⲕⲉⲡⲁⲥⲧⲏⲥ · |
| s-37
| ⲛⲧϩⲉ ⲉⲧⲥⲏϩ ϫⲉⲡⲉⲧⲙⲓϣⲉ ⲉϫⲱⲕ ⲡⲉ ⲡⲉⲕⲃⲟⲏⲑⲟⲥ , ⲁⲩⲱ ⲧⲥⲏϥⲉ ⲡⲉ ⲙⲡⲉⲕϣⲟⲩϣⲟⲩ ⲁⲩⲱ ⲡⲉⲟⲟⲩ ⲙⲡⲉⲥⲧⲉⲣⲉⲱⲙⲁ · |
| s-38
| ⲡⲉⲧⲛⲁⲙⲉⲣⲉⲡⲡⲉⲧϩⲟⲟⲩ , ⲛⲧⲟϥ ⲡⲉⲧⲛⲁⲧⲁⲕⲟ · |
| s-39
| ⲁⲩⲱ ⲛⲧⲟϥ ⲡⲉⲧⲉⲣⲉⲡⲇⲓⲁⲃⲟⲗⲟⲥ ⲛⲁϭⲙϭⲟⲙ ⲉⲣⲟϥ ϩⲛⲛⲉϥϩⲃⲏⲩⲉ ⲙⲙⲛⲧⲣⲉϥϩⲉⲧⲃⲯⲩⲭⲏ · |
| s-40
| ⲡⲥⲟⲫⲟⲥ ⲇⲉ ⲛⲧⲟϥ ⲉⲧⲙⲉ ⲛⲧⲉⲥⲃⲱ . ϥⲛⲁϣⲱⲡ ⲉⲣⲟϥ ⲛⲧⲉⲛⲧⲟⲗⲏ · |
| s-41
| ⲁⲩⲱ ⲡⲣⲙⲛϩⲏⲧ ⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ · ⲛⲁϫⲡⲟ ⲛⲁϥ ⲛⲟⲩⲣϩⲙⲙⲉ · |
| s-42
| ⲡⲗⲏⲛ ⲙⲁⲣⲓⲥⲱⲧⲙ ϫⲉⲁⲣϯⲙⲧⲟⲛ ⲛⲛⲟⲩⲉⲓⲟⲧⲉ ⲉⲧϩⲙⲡⲙⲁ ⲛⲙⲙⲉ . ⲁⲩⲱ ⲛⲧⲉⲥⲱⲧⲙ ⲛⲥⲱⲟⲩ ϩⲛϩⲱⲃ ⲛⲓⲙ · |
| s-43
| ⲧⲁⲣⲉⲡⲉⲛϩⲏⲧ ⲙⲧⲟⲛ · |
| s-44
| ⲁⲩⲱ ⲛⲧⲟ ϩⲱⲱⲧⲉ ⲛⲧⲉⲥⲉⲓ ⲙⲡⲟⲩⲧⲱⲧ ⲛϩⲏⲧ · |
| s-45
| ⲉϣⲱⲡⲉ ⲇⲉ ⲟⲛ · ⲉⲟⲩⲛⲧⲉ ⲟⲩϣⲁϫⲉ ⲉϫⲟⲟϥ . ⲉⲓⲥ ⲛϩⲗⲗⲟⲓ ⲛⲉⲛⲉⲓⲟⲧⲉ ⲁⲩⲱ ⲛⲉⲛⲥⲛⲏⲩ ⲁⲩⲉⲓ ϣⲁⲣⲱⲧⲛ · |
| s-46
| ⲧⲁⲩⲟⲩⲟϥ ⲉⲣⲟⲟⲩ · ⲁⲩⲱ ⲛⲧⲱⲧⲛ ⲧⲏⲣⲧⲛ · |
| s-47
| ⲡⲉ ⲟⲩⲛⲧⲏⲧⲛ ϣⲁϫⲉ ⲙⲙⲁⲩ ⲏ ⲗⲁⲁⲩ ⲛϩⲱⲃ · ϩⲙⲡⲉⲧⲛⲙⲁ · |
| s-48
| ⲙⲡⲣϭⲱ ⲛⲟⲩⲉϣ ⲛⲧⲁⲙⲟⲟⲩ ⲛⲧⲉⲧⲛⲧⲙϩⲉⲡⲗⲁⲁⲩ ⲛϩⲱⲃ ⲉⲣⲟⲟⲩ · ϫⲉⲕⲁⲥ ⲉⲣⲉⲡⲉⲛϩⲏⲧ ⲛⲁⲙⲧⲟⲛ ⲧⲏⲣⲛ ϩⲓⲟⲩⲥⲟⲡ ⲁⲛⲟⲛ ⲁⲩⲱ ⲛⲧⲱⲧⲛ · |
| s-49
| ⲁⲩⲱ ⲟⲛ ⲛⲧⲉⲡϫⲟⲉⲓⲥ ⲧⲱⲧ ⲛϩⲏⲧ ⲉϫⲱⲛ : |