| s-1
| ⲧⲛⲇⲟⲅⲙⲁⲧⲓⲍⲉ ϩⲙⲡⲕⲟⲥⲙⲟⲥ ⲛⲧϩⲉ ⲛⲛⲉⲧⲟⲛϩ · |
| s-2
| ⲙⲡⲣϫⲱϩ ⲟⲩⲧⲉ ⲙⲡⲣϫⲓϯⲡⲉ . ⲟⲩⲧⲉ ⲙⲡⲣϩⲱⲛ ⲉϩⲟⲩⲛ · ⲉⲧⲉⲡⲁⲓ ⲡⲉ ϫⲉⲁⲛⲉⲓ ⲉⲃⲟⲗ ϩⲛⲛⲛⲟⲃⲉ ⲙⲡⲕⲟⲥⲙⲟⲥ ⲉⲁⲛⲕⲁⲁⲩ ⲛⲥⲱⲛ · |
| s-3
| ⲁϩⲣⲟⲛ ⲟⲛ ⲉⲛⲕⲧⲟ ⲙⲙⲟⲛ ⲉⲛϭⲗⲟⲙⲗⲙ ϩⲣⲁⲓ ⲛϩⲏⲧⲟⲩ · |
| s-4
| ϩⲙⲡⲁⲓ ⲟⲛ ⲉⲛⲧⲁϥϫⲟⲟⲥ ϫⲉⲙⲡⲓⲟⲩⲟⲉⲓϣ ⲅⲁⲣ ⲛⲉⲧⲉⲧⲛⲟ ⲛⲕⲁⲕⲉ ⲡⲉ · ⲧⲉⲛⲟⲩ ⲇⲉ ⲛⲟⲩⲟⲉⲓⲛ ϩⲙⲡϫⲟⲉⲓⲥ · |
| s-5
| ⲙⲟⲟϣⲉ ϩⲱⲥ ϣⲏⲣⲉ ⲙⲡⲟⲩⲟⲉⲓⲛ · |
| s-6
| ⲉⲣⲉⲡⲕⲁⲣⲡⲟⲥ ⲅⲁⲣ ⲙⲡⲟⲩⲟⲉⲓⲛ ϩⲙⲡⲉⲧⲛⲁⲛⲟⲩϥ ⲛⲓⲙ ⲙⲛⲧⲇⲓⲕⲁⲓⲟⲥⲩⲛⲏ ⲙⲛⲧⲙⲉ · |
| s-7
| ⲉⲧⲉⲧⲛⲇⲟⲕⲓⲙⲁⲍⲉ ϫⲉⲟⲩ ⲡⲉⲉⲧⲣⲁⲛⲁϥ ⲙⲡϫⲟⲉⲓⲥ · ⲁⲩⲱ ⲙⲡⲣⲕⲟⲓⲛⲱⲛⲉⲓ ⲉⲛⲉϩⲃⲏⲩⲉ ⲙⲡⲕⲁⲕⲉ ⲉⲧⲉⲙⲙⲛⲧⲟⲩ ⲕⲁⲣⲡⲟⲥ · ⲛⲧⲉⲧⲛϫⲡⲓⲟⲟⲩ ⲇⲉ ⲛⲧⲟϥ ⲛϩⲟⲩⲟ · |
| s-8
| ⲛⲉⲧⲟⲩⲉⲓⲣⲉ ⲅⲁⲣ ⲙⲙⲟⲟⲩ ⲛϫⲓⲟⲩⲉ , ϩⲉⲛϣⲗⲟϥ ⲛⲉ ⲉⲣⲡⲕⲉ ⲉϫⲟⲟⲩ · |
| s-9
| ϣⲁⲣⲉϩⲱⲃ ⲇⲉ ⲛⲓⲙ ⲟⲩⲱⲛϩ ⲉⲃⲟⲗ ⲉⲧⲟⲩϫⲡⲓⲟ ⲙⲙⲟⲟⲩ ϩⲓⲧⲙⲡⲟⲩⲟⲉⲓⲛ · |
| s-10
| ϩⲱⲃ ⲅⲁⲣ ⲛⲓⲙ ⲉⲧⲟⲩⲟⲛϩ ⲉⲃⲟⲗ ϩⲉⲛⲟⲩⲟⲉⲓⲛ ⲛⲉ · |
| s-11
| ⲉⲧⲃⲉⲡⲁⲓ ϩⲱⲱⲛ ⲙⲁⲣⲛϫⲡⲓⲟ ⲛⲛⲉⲛⲙⲛⲧⲥⲟϭ ϩⲣⲁⲓ ⲛϩⲏⲧⲛ ⲙⲛⲙⲙⲉⲉⲩⲉ ⲧⲏⲣⲟⲩ ⲙⲡⲇⲓⲁⲃⲟⲗⲟⲥ ⲉⲧϥⲛⲟⲩϫⲉ ⲙⲙⲟⲟⲩ ⲉϩⲟⲩⲛ ⲉⲣⲟⲛ · ⲙⲛⲙⲙⲛⲧⲁⲧⲛⲁϩⲧⲉ · ⲙⲛⲙⲙⲟⲥⲧⲉ · ⲛⲧϩⲉ ⲉϣⲁⲩⲧⲣⲉⲛⲙⲉⲉⲩⲉ ⲉⲡⲡⲉⲧϩⲟⲟⲩ ⲉϩⲟⲩⲛ ⲉⲛⲉⲛⲉⲣⲏⲩ ⲉⲛⲧⲛϩⲁⲧⲛⲛⲉⲛⲉⲣⲏⲩ ⲁⲛ ⲉⲡⲧⲏⲣϥ · |
| s-12
| ⲁⲩⲱ ⲉⲛϭⲛⲁⲣⲓⲕⲉ ⲉⲛⲉⲛⲉⲣⲏⲩ . ⲁⲩⲱ ⲉⲣⲟⲛ ⲁⲛ ⲙⲙⲓⲛⲙⲙⲟⲛ · ϩⲱⲥ ⲉⲣⲉⲡⲉⲛⲙⲓϣⲉ ϣⲟⲟⲡ ⲉϩⲟⲩⲛ ⲉⲛⲉⲛⲉⲣⲏⲩ · ⲁⲩⲱ ⲉϥϣⲟⲟⲡ ⲁⲛ ⲟⲩⲃⲉⲛⲁⲣⲭⲏ ⲙⲛⲛⲉⲝⲟⲩⲥⲓⲁ · ⲟⲩⲃⲉⲛⲕⲟⲥⲙⲟⲕⲣⲁⲧⲱⲣ ⲙⲡⲕⲁⲕⲉ · ⲟⲩⲃⲉⲛⲉⲡⲛⲉⲩⲙⲁⲧⲓⲕⲟⲛ ⲛⲧⲡⲟⲛⲏⲣⲓⲁ ⲉⲧϩⲁⲙⲡⲏⲩⲉ · ⲁⲩⲱ ⲟⲩⲃⲉⲥⲛⲟϥ ⲁⲛ ϩⲓⲥⲁⲣⲝ · |
| s-13
| ⲛⲧϩⲉ ⲉⲛⲧⲁⲡⲁⲡⲟⲥⲧⲟⲗⲟⲥ ϫⲟⲟⲥ ϫⲉϫⲓ ⲛⲏⲧⲛ ⲛⲧⲡⲁⲛϩⲟⲡⲗⲓⲁ ⲙⲡⲛⲟⲩⲧⲉ ϫⲉⲉⲧⲉⲧⲛⲛⲁϣϭⲙϭⲟⲙ ⲉⲁϩⲉⲣⲁⲧⲧⲏⲩⲧⲛ ⲛⲛⲁϩⲣⲛⲛⲕⲟⲧⲥ ⲙⲡⲇⲓⲁⲃⲟⲗⲟⲥ · ϫⲉⲉⲣⲉⲡⲉⲛⲙⲓϣⲉ ϣⲟⲟⲡ ⲛⲁⲛ ⲁⲛ ⲟⲩⲃⲉⲥⲛⲟϥ ϩⲓⲥⲁⲣⲝ · |
| s-14
| ⲉⲧⲃⲉⲡⲁⲓ ϭⲉ ⲣⲟⲉⲓⲥ ⲁⲩⲱ ⲛⲧⲛⲁⲙⲁϩⲧⲉ ⲙⲡⲡⲉⲧⲛⲁⲛⲟⲩϥ · ⲉⲃⲟⲗ ϫⲉⲟⲩⲛϩⲁϩ ⲉⲩϩⲁⲧⲛⲛⲉⲩⲉⲣⲏⲩ ϩⲙⲡⲥⲱⲙⲁ · ⲉⲩⲟⲩⲏⲩ ⲇⲉ ⲉⲃⲟⲗ ⲛⲛⲉⲩⲉⲣⲏⲩ ϩⲙⲡϩⲏⲧ ⲁⲩⲱ ⲧⲁⲅⲁⲡⲏ · |
| s-15
| ⲟⲩⲛϩⲁϩ ⲇⲉ ⲟⲛ ⲉⲩϩⲁⲧⲛⲛⲉⲩⲉⲣⲏⲩ ⲁⲛ ϩⲙⲡⲥⲱⲙⲁ · ⲉⲩϩⲁⲧⲛⲛⲉⲩⲉⲣⲏⲩ ⲛⲛⲁⲩ ⲛⲓⲙ ϩⲛⲧⲁⲅⲁⲡⲏ ⲙⲡⲉⲭⲣⲓⲥⲧⲟⲥ ⲙⲛⲧⲁⲅⲁⲡⲏ ⲙⲡⲉⲡⲛⲉⲩⲙⲁ ⲁⲩⲱ ⲡⲟⲩⲱϣ ⲛⲓⲏⲥⲟⲩⲥ : |
| s-16
| ⲛⲧⲱⲧⲛ ⲇⲉ ⲛⲉⲥⲛⲏⲩ ϩⲁⲣⲉϩ ⲁⲩⲱ ⲙⲟⲩⲛ ⲉⲃⲟⲗ ϩⲛⲛⲉⲛⲧⲁⲛⲧⲥⲁⲃⲟ ⲉⲣⲟⲟⲩ · |
| s-17
| ⲁⲩⲱ ⲟⲩⲛϩⲁϩ ⲛⲁϫⲓⲥⲃⲱ ⲁⲩⲱ ⲛⲥⲉϯϩⲏⲩ ⲉⲃⲟⲗ ⲙⲙⲱⲧⲛ · ⲛⲧϩⲉ ⲉⲛⲧⲁϥϫⲟⲟⲥ ϫⲉⲙⲁⲣⲟⲩⲛⲁⲩ ⲉⲛⲉⲧⲛϩⲃⲏⲩⲉ ⲉⲧⲛⲁⲛⲟⲩⲟⲩ ⲛⲥⲉϯⲉⲟⲟⲩ ⲙⲡⲉⲧⲛⲉⲓⲱⲧ ⲉⲧϩⲛⲙⲡⲏⲩⲉ · |
| s-18
| ⲛⲧϩⲉ ⲅⲁⲣ ⲉⲛⲧⲁⲧⲉⲧⲛⲟⲩⲉϩⲧⲏⲩⲧⲛ ⲛⲥⲁⲛⲉⲧⲟⲩⲁⲁⲃ ⲧⲏⲣⲟⲩ ϩⲛⲛⲉⲧⲛⲡⲣⲁⲝⲓⲥ · ⲛⲧϩⲉ ⲉⲛⲧⲁϥϫⲟⲟⲥ ϫⲉⲛⲧⲟⲕ ⲇⲉ ⲁⲕⲟⲩⲁϩⲕ ⲛⲥⲁⲧⲁⲥⲃⲱ . ⲡⲁⲥⲙⲟⲧ ⲡⲁⲧⲱϣ ⲧⲁⲡⲓⲥⲧⲓⲥ · ⲧⲁⲙⲛⲧϩⲁⲣϣϩⲏⲧ · ⲧⲁⲁⲅⲁⲡⲏ · ⲧⲁϩⲩⲡⲟⲙⲟⲛⲏ · ⲛⲁⲇⲓⲱⲅⲙⲟⲥ · ⲛⲁϩⲓⲥⲉ · ⲟⲩⲉϩ ⲧⲏⲩⲧⲛ ⲟⲛ ⲛⲥⲱⲟⲩ ϩⲙⲡϩⲁⲣⲉϩ ⲉⲛⲉⲧⲛϩⲓⲥⲉ ⲛⲏⲧⲛ · |
| s-19
| ⲛⲉⲧⲉⲟⲩⲛⲧⲁⲩ ⲅⲁⲣ ⲙⲙⲁⲩ ⲛⲧⲙⲛⲧⲣⲙⲙⲁⲟ ⲛⲁⲧⲧⲁⲕⲟ ϩⲙⲡⲉⲭⲣⲓⲥⲧⲟⲥ . ⲛⲧⲟⲟⲩ ⲟⲛ ⲛⲉⲧⲏⲡ ⲉⲣⲟⲉⲓⲥ ⲉⲣⲟⲥ ⲛⲁⲩ · |
| s-20
| ⲉϣϫⲉ ⲛⲉⲧⲉⲟⲩⲛⲧⲁⲩ ⲙⲙⲁⲩ ⲛⲟⲩⲭⲣⲏⲙⲁ · ⲟⲩⲛⲟⲩⲃ ⲙⲛⲟⲩϩⲁⲧ ⲙⲛϩⲉⲛϩⲩⲡⲁⲣⲭⲟⲛⲧⲁ · ϣⲁⲩⲣⲟⲉⲓⲥ ϫⲉⲛⲛⲉⲛⲗⲏⲥⲧⲏⲥ ϥⲓⲧⲟⲩ ⲛϫⲓⲟⲩⲉ ⲉⲓⲉ ϣϣⲉ ⲉⲣⲟⲛ ⲛⲟⲩⲏⲣ ⲉⲣⲟⲉⲓⲥ ϫⲉⲛⲛⲉⲡϫⲁϫⲉ ϥⲓ ⲛϫⲓⲟⲩⲉ ⲙⲡⲉⲛⲡⲉⲧⲛⲁⲛⲟⲩϥ ⲉⲧⲛⲉⲓⲣⲉ ⲙⲙⲟϥ · : ⲛⲉⲛϣⲗⲏⲗ · ⲙⲛⲛⲉⲛⲛⲏⲥⲧⲉⲓⲁ · ⲙⲛⲡⲉⲛⲧⲃⲃⲟ · ⲁⲩⲱ ⲧⲉⲛϩⲩⲡⲟⲙⲟⲛⲏ · |
| s-21
| ⲙⲡⲓϣⲱϣ ⲅⲁⲣ ⲁⲛ ⲛⲟⲩⲱⲧ ⲡⲉ ⲡϫⲓⲟⲩⲉ ⲛⲟⲩϩⲁⲧ ⲙⲛⲟⲩⲛⲟⲩⲃ · ⲁⲗⲗⲁ ⲛⲧϩⲉ ⲉⲧⲉⲣⲉⲧⲙⲛⲧⲡⲁⲣⲑⲉⲛⲟⲥ ⲁⲩⲱ ⲧⲙⲛⲧⲙⲟⲛⲁⲭⲟⲥ ⲧⲁⲓⲏⲩ ⲙⲙⲟⲥ · ⲛⲧⲉⲓϩⲉ ⲟⲛ ϥⲥⲡⲟⲩⲇⲁⲍⲉ ⲉϥⲓⲧⲟⲩ ⲛϫⲓⲟⲩⲉ ⲛϭⲓⲡϫⲁϫⲉ · |
| s-22
| ⲡⲉⲛⲧⲁϥϫⲡⲟ ⲇⲉ ⲛⲁϥ ⲛϩⲉⲛⲙⲁⲣⲅⲁⲣⲓⲧⲏⲥ . ⲏ ⲟⲩⲛⲟⲩⲃ . ϣⲁϥⲣⲟⲩϣⲏ ⲛⲣⲟⲉⲓⲥ · |
| s-23
| ⲉϣϫⲉ ϣⲁⲣⲉⲡϫⲁϫⲉ ⲣⲟⲩϣⲏ ⲛⲣⲟ ⲉⲧⲃⲉⲟⲩⲡⲟⲛⲏⲣⲓⲁ · ⲉⲓⲉ ϥⲛⲁⲣⲟⲉⲓⲥ ⲛⲟⲩⲏⲣ ⲛϭⲓⲡⲉⲧⲉⲟⲩⲛⲧϥ ⲛⲉⲭⲣⲏⲙⲁ · ϫⲉⲛⲛⲉⲩⲉⲡⲓⲃⲟⲩⲗⲉⲩⲉ ⲉⲣⲟⲟⲩ · |
| s-24
| ⲙⲁⲣⲛⲣⲡⲙⲉⲉⲩⲉ ⲛⲛⲉⲛⲧⲁⲡⲉⲛⲉⲓⲱⲧ ϫⲟⲟⲩ ϫⲉϩⲉⲛⲥⲛⲏⲩ ⲕⲁⲧⲁⲡⲉⲛⲃⲓⲟⲥ , ⲉⲩⲛⲏⲥⲧⲉⲩⲉ ⲉⲩϣⲗⲏⲗ ⲇⲉ ⲟⲛ · ⲉⲩⲟ ⲛⲟⲩϣⲏ ⲛⲣⲟⲉⲓⲥ · ⲉⲩϫⲓϭⲟⲗ ⲇⲉ ⲟⲛ · ⲉⲩⲙⲓϣⲉ · ⲉⲩϯⲧⲱⲛ · ⲉⲩⲕⲣⲙⲣⲙ ⲁⲩⲱ ⲉⲩⲕⲁⲧⲁⲗⲁⲗⲉⲓ · ⲉⲩⲙⲟⲥⲧⲉ · ⲉⲩⲙⲟⲟϣⲉ ϩⲛⲟⲩϩⲏⲧ ⲙⲙⲛⲧϣⲙⲙⲟ · ⲉⲩϫⲱϩⲙ ⲙⲙⲟⲟⲩ · ⲁⲩⲱ ⲉⲩⲟ ⲛⲕⲣⲟϥ . ⲉⲩⲉⲓⲣⲉ ⲛϩⲱⲃ ⲛⲓⲙ ⲉϥϩⲟⲟⲩ · |
| s-25
| ⲛⲁⲓ ⲛⲧⲉⲓⲙⲓⲛⲉ ⲉⲩϣⲡϩⲓⲥⲉ ⲉⲡϫⲓⲛϫⲏ · ⲁⲩⲱ ⲙⲙⲛⲗⲁⲁⲩ ⲛⲛⲟϥⲣⲉ ⲛⲁϣⲱⲡⲉ ⲛⲁⲩ · |
| s-26
| ⲉⲡϫⲓⲛϫⲏ ⲛⲁⲩ ⲟⲛ ⲧⲉ ⲧⲉⲩϩⲩⲡⲟⲙⲟⲛⲏ · |
| s-27
| ⲕⲁⲧⲁⲡⲉⲛⲧⲁⲩϫⲟⲟϥ ϫⲉⲟⲩⲕⲛⲁⲁⲩ ⲉϥⲙⲉϩ ⲁⲛ ⲡⲉ , ⲉⲧⲣⲉϥⲣⲛⲟⲉⲓⲧ . |
| s-28
| ϩⲙⲡⲁⲓ ⲟⲛ ⲉⲛⲧⲁⲩϫⲟⲟⲥ ϫⲉϫⲟ ⲛϩⲉⲛⲥⲟⲩⲟ · ⲛⲧⲉⲧⲛⲱϩⲥ ⲛϩⲉⲛϣⲟⲛⲧⲉ · |
| s-29
| ⲛⲉⲩⲕⲗⲏⲣⲟⲥ ⲛⲥⲉⲛⲁϯϩⲏⲩ ⲛⲁⲩ ⲁⲛ · |
| s-30
| ⲉⲧⲃⲉⲡⲁⲓ ϭⲉ ⲣⲟⲉⲓⲥ ⲙⲡⲣⲕⲁ ⲡϫⲁϫⲉ ⲉⲧⲁⲕⲟ ⲙⲡⲉⲛⲡⲉⲧⲛⲁⲛⲟⲩϥ ⲉⲧⲛⲉⲓⲣⲉ ⲙⲙⲟϥ . |
| s-31
| ⲁⲗⲗⲁ ϩⲛϩⲁⲣⲉϩ ⲛⲓⲙ ϩⲁⲣⲉϩ ⲉⲡⲉⲛϩⲏⲧ ⲉⲃⲟⲗ ϩⲛⲙⲉⲉⲩⲉ ⲛⲓⲙ ⲉϥϫⲁϩⲙ ⲛⲧⲉⲡⲇⲓⲁⲃⲟⲗⲟⲥ · ϫⲉⲕⲁⲥ ⲉⲛⲛⲁⲣⲙⲡϣⲁ ⲛⲥⲱⲧⲙ ⲉⲡⲁⲓ ϩⲛⲟⲩⲧⲱⲧ ⲛϩⲏⲧ ϫⲉⲛⲥⲉⲛⲁⲣϩⲱⲃ ⲁⲛ ⲛϣⲙⲙⲟ ϫⲓⲛⲙⲡⲓⲛⲁⲩ · |
| s-32
| ⲁⲗⲗⲁ ⲉⲩⲛⲁⲣϩⲱⲃ ⲙⲡϫⲟⲉⲓⲥ ⲡⲉⲩⲛⲟⲩⲧⲉ · |
| s-33
| ⲕⲁⲓ ⲅⲁⲣ ⲉϣⲁⲣⲉⲛⲗⲏⲥⲧⲏⲥ ϭⲱⲧϩ ⲁⲛ ⲉⲟⲩⲏⲓ , ⲏ ⲟⲩⲙⲁ ⲉⲙⲛⲭⲣⲏⲙⲁ ⲛϩⲏⲧϥ · ⲁⲗⲗⲁ ⲉϣⲁⲩϭⲱⲧϩ ⲉⲡⲙⲁ ⲉⲧⲟⲩⲛⲁϭⲛⲭⲣⲏⲙⲁ ⲙⲙⲁⲩ · |
| s-34
| ⲟⲩⲧⲉ ⲉϣⲁⲩϭⲱⲧϩ ⲁⲛ ⲉⲡⲙⲁ ⲉⲧⲟⲩⲣⲟⲉⲓⲥ ⲛϩⲏⲧϥ ⲉⲧⲣⲉⲩϣⲱⲗ · ⲁⲗⲗⲁ ⲡⲙⲁ ⲉⲧⲟⲩⲥⲟⲟⲩⲛ ϫⲉ ⲛⲥⲉⲣⲟⲉⲓⲥ ⲁⲛ ⲛϩⲏⲧϥ ⲁⲩⲱ ⲥⲉⲟⲃϣ . |
| s-35
| ⲛⲧⲟⲟⲩ ⲛⲉⲧⲉϣⲁⲩϭⲱⲧϩ ⲉⲣⲟⲟⲩ ⲛⲥⲉⲧⲱⲣⲡ ⲙⲡⲉⲧⲟⲩⲛⲁϭⲛⲧϥ · |
| s-36
| ⲛⲧⲉⲓ ϩⲉ ⲟⲛ ⲉϣⲁⲣⲉⲡⲇⲓⲁⲃⲟⲗⲟⲥ ⲧⲱⲣⲡ ⲁⲛ ⲙⲡⲉⲧⲣⲟⲉⲓⲥ ⲁⲩⲱ ⲉⲧϩⲁⲣⲉϩ ⲉⲡⲉϥϩⲓⲥⲉ ⲛⲁϥ . ⲁⲗⲗⲁ ⲡⲉⲧϥⲛⲁϭⲛⲧϥ ⲉϥⲣⲟⲉⲓⲥ ⲁⲛ · ⲟⲩⲧⲉ ⲛϥⲣϩⲟⲧⲉ ⲁⲛ ϩⲏⲧϥ ⲙⲡⲛⲟⲩⲧⲉ · ⲟⲩⲧⲉ ⲛϥⲉⲓⲣⲉ ⲁⲛ ⲙⲡⲙⲉⲉⲩⲉ ϫⲉⲉϥⲛⲏⲩ ⲉϩⲣⲁⲓ ⲉⲛϭⲓϫ ⲙⲡⲛⲟⲩⲧⲉ ⲛⲁϣ ⲛϩⲉ · ⲁⲗⲗⲁ ⲉϥϣⲉⲉⲓ ⲙⲛⲧⲏⲩ ⲛⲓⲙ · |
| s-37
| ⲛⲧⲟϥ ⲡⲉⲧⲉϣⲁϥⲧⲱⲣⲡ ⲙⲡⲉϥⲡⲉⲧⲛⲁⲛⲟⲩϥ ⲉⲧϥⲉⲓⲣⲉ ⲙⲙⲟϥ ⲁϫⲛϯⲥⲟ · |
| s-38
| ⲉⲧⲃⲉⲡⲁⲓ ϭⲉ ⲛⲉⲥⲛⲏⲩ ⲟⲩⲟⲛ ⲛⲓⲙ ⲉⲧⲟ ⲛⲟⲩϩⲏⲧ ⲛⲟⲩⲱⲧ ⲙⲛⲡⲛⲟⲩⲧⲉ ⲁⲩⲱ ⲙⲛⲛⲉⲛⲉⲓⲟⲧⲉ , ⲁⲩⲱ ⲛⲙⲙⲁⲛ ϩⲱⲱⲛ ⲟⲛ, ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ . ⲉⲓⲧⲉ ⲛⲟϭ ⲉⲓⲧⲉ ⲕⲟⲩⲓ · ϩⲁⲧⲏⲛ , ⲁⲩⲱ ϩⲁⲧⲉⲧⲏⲩⲧⲛ ⲧⲱⲕ ⲛϩⲏⲧ ⲁⲩⲱ ⲣⲟⲉⲓⲥ ⲙⲡⲣϯϩⲓⲛⲏⲃ ⲛⲛⲉⲛⲃⲁⲗ · ⲟⲩⲧⲉ ⲣⲉⲕⲣⲓⲕⲉ ⲛⲛⲉⲛⲃⲟⲩϩⲉ · ϣⲁⲛⲧⲉⲡϫⲟⲉⲓⲥ ⲛⲁϩⲙⲛ ⲉⲡⲉⲓⲣⲁⲥⲙⲟⲥ ⲛⲓⲙ ⲛⲧⲉⲡϫⲁϫⲉ · |
| s-39
| ⲛⲁϣⲉⲛⲉⲧⲫⲑⲟⲛⲉⲓ ⲅⲁⲣ ⲉⲣⲟⲛ · |
| s-40
| ⲁⲩⲱ ⲙⲡⲣⲛⲁⲩ ⲉϩⲉⲛⲥⲛⲏⲩ ⲉⲩϣⲧⲣⲧⲱⲣ ⲛϩⲁϩ ⲛⲥⲟⲡ ϩⲙⲡⲙⲓϣⲉ ⲙⲛⲡϯⲧⲱⲛ ⲁⲩⲱ ⲉⲩⲁⲣⲛⲁ ⲛⲧⲉⲩϩⲩⲡⲟⲙⲟⲛⲏ · ⲛⲥⲉⲥⲕⲁⲛⲇⲁⲗⲓⲍⲉ ⲙⲙⲱⲧⲛ · |
| s-41
| ⲁⲗⲗⲁ ⲛⲛⲉⲡⲛⲟⲩⲧⲉ ϫⲟⲟϥ ⲉⲧⲣⲉⲩⲥⲕⲁⲛⲇⲁⲗⲓⲍⲉ ⲛⲙⲙⲁⲓⲛⲟⲩⲧⲉ ⲉⲛⲉϩ . ⲛⲁⲓ ⲉⲧⲉⲟⲩⲛⲧⲁⲩ ⲙⲙⲁⲩ ⲛⲧⲉⲩⲡⲓⲥⲧⲓⲥ ⲉⲥϫⲏⲕ ⲉⲃⲟⲗ ⲉϩⲟⲩⲛ ⲉⲡⲉⲭⲣⲓⲥⲧⲟⲥ · ⲁⲩⲱ ⲉⲧⲁϩⲉ ⲉⲡⲉⲡⲛⲉⲩⲙⲁ ⲙⲡⲛⲟⲩⲧⲉ · |
| s-42
| ⲛⲧⲱⲧⲛ ⲇⲉ ⲛⲉⲧⲣⲛⲟⲃⲉ ⲁⲩⲱ ⲉⲧⲁⲣⲛⲁ ⲛⲧⲉⲩϩⲩⲡⲟⲙⲟⲛⲏ ⲁⲩⲱ ⲉⲧϣⲧⲟⲣⲧⲣ ⲛⲛⲥⲩⲛⲁⲅⲱⲅⲏ ϩⲛⲧⲙⲛⲧϩⲏⲧ ϣⲏⲙ · ⲙⲛⲡⲕⲱϩ · ⲙⲛⲡⲙⲟⲥⲧⲉ · ⲙⲛⲡⲙⲓϣⲉ · ⲙⲛⲡϯⲧⲱⲛ · ⲙⲛⲡⲉⲕⲣⲟϥ · ⲟⲩⲟⲉⲓ ⲛⲏⲧⲛ . |
| s-43
| ⲉⲧⲉⲧⲛⲁⲣⲟⲩ ϩⲙⲡⲉϩⲟⲟⲩ ⲙⲡⲉⲧⲛϭⲙⲡϣⲓⲛⲉ · |
| s-44
| ⲧⲉⲧⲛⲑⲗⲓⲯⲓⲥ ⲅⲁⲣ ⲛⲏⲩ ⲙⲡⲟⲩⲉ · |
| s-45
| ⲏ ⲟⲩⲕⲣⲓⲙⲁ ⲛⲁⲛ ⲁⲛ ⲡⲉ ⲙⲛⲛⲥⲁⲧⲣⲉⲛⲁⲡⲟⲧⲁⲥⲥⲉ ⲙⲡⲉⲛⲧⲁⲛⲁⲡⲟⲧⲁⲥⲥⲉ ⲙⲙⲟϥ . ⲁⲩⲱ ⲛⲧⲛⲥⲙⲛⲧⲟⲟⲧⲛ ⲙⲛⲡⲉⲛⲧⲁⲛⲥⲙⲛⲧⲟⲟⲧⲛ ⲛⲙⲙⲁϥ ϩⲛⲟⲩⲇⲓⲁⲑⲏⲕⲏ ⲉⲛϩⲟⲙⲟⲗⲟⲅⲉⲓ ϫⲉⲛⲛⲉⲛϫⲓⲟⲩⲉ · ⲛⲛⲉⲛϫⲓϭⲟⲗ · ⲛⲛⲉⲛϫⲉϩⲙⲡⲉⲛⲥⲱⲙⲁ ⲕⲁⲧⲁⲗⲁⲁⲩ ⲛⲥⲙⲟⲧ · ⲛⲛⲉⲛⲣⲙⲛⲧⲣⲉ ⲛⲛⲟⲩϫ · ⲛⲛⲉⲛⲣⲗⲁⲁⲩ ⲛⲕⲣⲟϥ ϩⲛⲟⲩϩⲱⲡ · ⲙⲛⲛⲕⲉϣⲁϫⲉ ⲉⲧⲛⲏⲩ ⲙⲛⲛⲥⲁⲛⲁⲓ · ⲡⲁⲗⲓⲛ ⲛⲧⲛⲕⲧⲟⲛ ⲛⲧⲛⲁⲁⲩ ⲛⲕⲉⲥⲟⲡ · |