| s-603
| «Тов, кува чийнесь пакша пингем». |
| s-604
| Ды якинь тов а стяко. |
| s-605
| Чаво эзинь велявтне. |
| s-606
| Пештором свал пештния сиякс жойниця валдо ды домка арсемадо. |
| s-607
| Истя вана Эйкакш пингень мастором марто вастнематне лездасть тень пурнамс ве таркас неть велень вайгельтнень. |
| s-608
| Сынь ёвтнить аволь шождынестэ эрязь иетнеде, ёжомарямотнеде, паксятнень-виртнень певтеме мазычидест... |
| s-609
| Лездасть тень сёрмадомо аволь ансяк умонь читне. |
| s-610
| Сонсь течинь шкась, кона теи тевензэ киньгак апак кевкстне, эзь ульне тень нежекс? |
| s-611
| Кие мерсь, чивалгома эрси чилисемавтомо? |
| s-612
| Меельце иетнестэ пек берякадсь перть пельксэнть ёжозо. |
| s-613
| Ансяк седеяк беряньстэ мари прянзо тиринь келенек. |
| s-614
| Ёми сон сельмень неезь. |
| s-615
| Мезе теемс? |
| s-616
| Кода ванстомс мельганок сыцятненень? |
| s-617
| Каня сонзэ марто апарось аволь сюлмавкс умонь ды неень шкатнень марто? |
| s-618
| Книганть ловномсто вастоват, вечкевикс ялгай, стувтовиця валтнэнь мартояк. |
| s-619
| Лиятне эйстэст, мезеяк а теят, сыредсть. |
| s-620
| Ламотне вана, седеяк седей ризкс сайтянзат, полавтовсть ды яла полавтовить рузонь валсо. |
| s-621
| Чуросто вастневиця валтнэнь сёрмадомань коцтонтень совавтомсто ульнесь превсэм ве мель: сюпалгавтомс, кода маштан, течи истя сэредиця чачома келем. |
| s-622
| Лиясто эрси истяяк: кись, кува ансяк эскелить мелявксонь апак сода, а фатяткак, кода туи лия ёнов. |
| s-623
| Мезе теемс? |
| s-624
| Арсят-теят ды сыргат седе тов, ков вети. |
| s-625
| Кодамо сон илязо уле, виде эли кадык тей-тов менчевиця, козоньгак ды ветятанзат. |
| s-626
| Парсте-беряньстэ — ве таркасо а аштят. |
| s-627
| Эрси лиякскак: молят — моро морат, токны седееть паро ёжодонть, ды апак учо — киуло. |
| s-628
| Ков пурдамс? |
| s-629
| Кона ёно ашосо лексить умарь пиретне? |
| s-630
| Кона пелев ноцковтомс ветямо пиксэнть? |
| s-631
| Ва, цёра, иля маняво. |
| s-632
| Талномадонть лангат валови прок пси ведь. |
| s-633
| Кавтолдоматнеде, секень вант, лазови прят. |
| s-634
| Истят стака таркат Эрямонь кинть лангсо вастневить аволь чуросто. |
| s-635
| Лиясто истямо кирашкос эртеват, а содат — конась эйстэст терди валдодо пешксе вирень кужос, конась тусто чопода таркас. |
| s-636
| Киулот... |
| s-637
| Ков эйстэст туят? |
| s-638
| Козонь, ёвтык, кекшат седейс токиця «ков?» кевкстемадонть? |
| s-639
| Ютасть мазый шканзо лёмзёр чувтыненть. |
| s-640
| Оймась. |
| s-641
| Ней ашосо вельтявсть вакссонзо умаринась ды атямаресь. |
| s-642
| Мерят валгсть менельстэнть моданть лангс оймсеме кавто пельнеть. |
| s-643
| Монень маряви, тундонь неть читнестэ ашолгадыть аволь ансяк чувттнэ-куракштне . |
| s-644
| Ашодонть валдоми седей ойменекак. |
| s-645
| Тееви эрьвась эйстэнек седе седеймарицякс ды мель ваныцякс. |
| s-646
| Мазыйгады, теке басом, сонсь эрямоськак. |
| s-647
| Зярдо, кона шкане, видеяк, перьканок седе аламо теевить зыянтнэде ды нулготькс тевтнеде? |
| s-648
| Тунда, ламартнень панжома шкава, эли, паряк, сёксня? |
| s-649
| Седеем тень истя тошкси: майстэ, майстэ... |
| s-650
| Те шкастонть эрьвась бажи улемс лиякс, эрьванть седе валдоми чачозо. |
| s-651
| Те ковось — паро мелень видема ков. |
| s-652
| Видестэ-арась тошкси сон, седеем? |
| s-653
| Ильветькс а маряви сонзэ валтнэсэ? |
| s-654
| Бути, алкукскак, а истя ды ламотне эйстэнек неть ашо моронь морыця шкатнева тейнить чопода тевть... сестэ кить минь? |
| s-655
| — Седеяк парсте туи... — мерсь каршом Саша, зярдо мон невтинь тикшень ледицятнень лангс, — одс кепети, седеяк мазыйстэ карми пижелдэме. |
| s-656
| — Содазь, туи... |
| s-657
| Прындеряй теке марто пиземе. |
| s-658
| «Ансяк...» — арсезевинь ды эзия ёвта, мезе ёвтыксэлинь. |
| s-659
| — «Ансяк»... |
| s-660
| Мезе мериксэлить? — кундась валозом Саша. |
| s-661
| Цёрась сон а берянь. |
| s-662
| Кортамскак мартонзо, кода мерить, ули мезде. |
| s-663
| Чарькодтяно вейкенек-вейкенек пель валсто. |
| s-664
| Эрсить, содазь, ютксонок пелькстамоткак. |
| s-665
| Аволь тентеме. |
| s-666
| Ялатеке, мезде арсинь ней, ве мельс, содан, аволинек пра. |
| s-667
| Секс валомгак эзинь прядо. |
| s-668
| ... Аволить пелюмасост школань умарь пиресэ кавто цёрат. |
| s-669
| Ледить кувтолдыця чахратнеде нар панкскенть. |
| s-670
| Прок сырнень тештинеть сыреждить чувттнэнь ялга-юткова. |
| s-671
| Ванан лангозост, ды маряви тень, морыть ансяк монень марявиця моро. |
| s-672
| Ансяк вана кичкере пеельтне... |
| s-673
| Чахрат ды... пелюма. |
| s-674
| Варштынь эсест, ледицятнень, лангс, ды теке сардынеть сялгсть седейзэм. |
| s-675
| «Кадынк, кадынк пелюманк, цёрат! — ульнесь мелем серьгедемс тенст. |
| s-676
| — Кадык ютавтсызь балягатне пеетькшнема шкаст. |
| s-677
| Кольнить ояст-ялгаст марто. |
| s-678
| Кенярдыть мазычисэст, кенярдовтыть весень». |
| s-679
| Панжовкскетнеде перьканок певтеме. |
| s-680
| Тундонь, кизэнь, сэнть, теке менель, якстереть, ожот... |
| s-681
| Ансяк кодат иляст уле, весемеде мазыйтне эйстэдест, монень маряви, розась ды макось. |
| s-682
| Конась седе мазый эсь ютковаст? |
| s-683
| Ламотне, кеман, невтить розанть лангс. |
| s-684
| Мезе мерят, истя, нать, улияк. |
| s-685
| Зяро стихть ды морот сондензэ сёрмадозь! |
| s-686
| Кодамо свадьба, кодамо чачома чи эрси розавтомо? |
| s-687
| Розат, розат, розат.. |
| s-688
| Теке сялгонзояк те касовксонть арасть. |
| s-689
| Кадык кольневтить те панжовксонть. |
| s-690
| Кадык. |
| s-691
| Кинь мельс мезе тукшны. |
| s-692
| Мезе тень каршо мерят? |
| s-693
| Ансяк... ансяк монень маряви весемеде мазыйкс макось. |
| s-694
| Сонензэ мон максовлия апак кавтолдо васенце тарканть. |
| s-695
| — Маконтень? |
| s-696
| — Сонензэ, седейбелькскем, сонензэ. |
| s-697
| — Мезень сельмень сявадома муить эйстэнзэ? |
| s-698
| Мейсэ токизе седееть? |
| s-699
| Кинь арсят кецневтемс те чахрасонть? |
| s-700
| — Эсень. |
| s-701
| Розась моли мазый, каштан тейтерь ёнов. |
| s-702
| Прянзо сон лови кие соды мезекс. |