| s-402
| jah gasatida Seimona namo Paitrus |
| s-403
| jah Iakobau þamma Zaibaidaiaus jah Iohanne broþr Iakobaus jah gasatida im namna Bauanairgais þatei ist sunjus þeiƕons |
| s-404
| jah Andraian jah Filippu jah Barþaulaumaiu jah Matþaiu jah Þoman jah Iakobu þana Alfaiaus jah Þaddaiu jah Seimona þana Kananeiten jah Iudan Iskarioten saei jah galewida ina |
| s-405
| jah atiddjedun in gard jah gaïddja sik aftra managei swaswe ni mahtedun nih hlaif matjan |
| s-406
| jah hausjandans fram imma bokarjos jah anþarai usiddjedun gahaban ina |
| s-407
| qeþun auk þatei usgaisiþs ist |
| s-408
| jah bokarjos þai af Iairusaulwmai qimandans qeþun þatei Baiailzaibul habaiþ jah þatei in þamma reikistin unhulþono uswairpiþ þaim unhulþom |
| s-409
| jah athaitands ins in gajukom qaþ du im |
| s-410
| ƕaiwa mag Satanas Satanan uswairpan |
| s-411
| jah jabai þiudangardi wiþra sik gadailjada ni mag standan so þiudangardi jaina |
| s-412
| jah jabai gards wiþra sik gadailjada ni mag standan sa gards jains |
| s-413
| jah jabai Satana usstoþ ana sik silban jah gadailiþs warþ ni mag gastandan ak andi habaiþ |
| s-414
| ni manna mag kasa swinþis galeiþands in gard is wilwan niba faurþis þana swinþan gabindiþ |
| s-415
| jah þan þana gard is diswilwai |
| s-416
| amen qiþa izwis þatei allata afletada þata frawaurhte sunum manne jah naiteinos swa managos swaswe wajamerjand |
| s-417
| aþþan saei wajamereiþ ahman weihana ni habaiþ fralet aiw ak skula ist aiweinaizos frawaurhtais |
| s-418
| unte qeþun |
| s-419
| ahman unhrainjana habaiþ |
| s-420
| jah qemun þan aiþei is jah broþrjus is jah uta standandona insandidedun du imma haitandona ina |
| s-421
| jah setun bi ina managei |
| s-422
| qeþun þan du imma |
| s-423
| sai aiþei þeina jah broþrjus þeinai jah swistrjus þeinos uta sokjand þuk |
| s-424
| jah andhof im qiþands |
| s-425
| ƕo ist so aiþei meina aiþþau þai broþrjus meinai |
| s-426
| jah bisaiƕands bisunjane þans bi sik sitandans qaþ |
| s-427
| sai aiþei meina jah þai broþrjus meinai |
| s-428
| saei allis waurkeiþ wiljan gudis sa jah broþar meins jah swistar jah aiþei ist |
| s-429
| Jah aftra dugann laisjan at marein jah galesun sik du imma manageins filu swaswe ina galeiþandan in skip gasitan in marein |
| s-430
| jah alla so managei wiþra marein ana staþa was |
| s-431
| jah laisida ins in gajukom manag jah qaþ im in laiseinai seinai |
| s-432
| hauseiþ |
| s-433
| sai urrann sa saiands du saian fraiwa seinamma |
| s-434
| jah warþ miþþanei saiso sum raihtis gadraus faur wig jah qemun fuglos jah fretun þata |
| s-435
| anþar uþ þan gadraus ana stainahamma þarei ni habaida airþa managa jah suns urrann in þizei ni habaida diupaizos airþos |
| s-436
| at sunnin þan urrinnandin ufbrann jah unte ni habaida waurtins gaþaursnoda |
| s-437
| jah sum gadraus in þaurnuns |
| s-438
| jah ufarstigun þai þaurnjus jah afƕapidedun þata jah akran ni gaf |
| s-439
| jah sum gadraus in airþa goda jah gaf akran urrinnando jah wahsjando jah bar ain ·l· jah ain ·j· jah ain ·r· jah qaþ |
| s-440
| saei habai ausona hausjandona gahausjai |
| s-441
| iþ biþe warþ sundro frehun ina þai bi ina miþ þaim twalibim þizos gajukons |
| s-442
| jah qaþ im |
| s-443
| izwis atgiban ist kunnan runa þiudangardjos gudis iþ jainaim þaim uta in gajukom allata wairþiþ ei saiƕandans saiƕaina jah ni gaumjaina jah hausjandans hausjaina jah ni fraþjaina ibai ƕan gawandjaina sik jah afletaindau im frawaurhteis |
| s-444
| jah qaþ du im |
| s-445
| ni wituþ þo gajukon jah ƕaiwa allos þos gajukons kunneiþ |
| s-446
| sa saijands waurd saijiþ |
| s-447
| aþþan þai wiþra wig sind þarei saiada þata waurd jah þan gahausjand unkarjans suns qimiþ Satanas jah usnimiþ waurd þata insaiano in hairtam ize |
| s-448
| jah þai sind samaleiko þai ana stainahamma saianans þaiei þan hausjand þata waurd suns miþ fahedai nimand ita jah ni haband waurtins in sis ak ƕeilaƕairbai sind |
| s-449
| þaþroh biþe qimiþ aglo aiþþau wrakja in þis waurdis suns gamarzjanda |
| s-450
| jah þai sind þai in þaurnuns saianans þai waurd hausjandans |
| s-451
| jah saurgos þizos libainais jah afmarzeins gabeins jah þai bi þata anþar lustjus innatgaggandans afƕapjand þata waurd jah akranalaus wairþiþ |
| s-452
| jah þai sind þai ana airþai þizai godon saianans þaiei hausjand þata waurd jah andnimand jah akran bairand ain ·l· jah ain ·j· jah ain ·r· jah qaþ du im |
| s-453
| ibai lukarn qimiþ duþe ei uf melan satjaidau aiþþau undar ligr |
| s-454
| niu ei ana lukarnastaþan satjaidau |
| s-455
| nih allis ist ƕa fulginis þatei ni gabairhtjaidau |
| s-456
| nih warþ analaugn ak ei swikunþ wairþai |
| s-457
| jabai ƕas habai ausona hausjandona gahausjai |
| s-458
| jah qaþ du im |
| s-459
| saiƕiþ ƕa hauseiþ |
| s-460
| in þizaiei mitaþ mitiþ mitada izwis jah biaukada izwis þaim galaubjandam |
| s-461
| unte þisƕammeh saei habaiþ gibada imma |
| s-462
| jah saei ni habaiþ jah þatei habaiþ afnimada imma |
| s-463
| jah qaþ |
| s-464
| swa ist þiudangardi gudis swaswe jabai manna wairpiþ fraiwa ana airþa |
| s-465
| jah slepiþ jah urreisiþ naht jah daga jah þata fraiw keiniþ jah liudiþ swe ni wait is |
| s-466
| silbo auk airþa akran bairiþ frumist gras þaþroh ahs þaþroh fulliþ kaurnis in þamma ahsa |
| s-467
| þanuh biþe atgibada akran suns insandeiþ gilþa unte atist asans |
| s-468
| jah qaþ |
| s-469
| ƕe galeikom þiudangardja gudis aiþþau in ƕileikai gajukon gabairam þo |
| s-470
| swe kaurno sinapis þatei þan saiada ana airþa minnist allaize fraiwe ist þize ana airþai |
| s-471
| jah þan saiada urrinniþ jah wairþiþ allaize grase maist jah gataujiþ astans mikilans swaswe magun uf skadau is fuglos himinis gabauan |
| s-472
| jah swaleikaim managaim gajukom rodida du im þata waurd swaswe mahtedun hausjon |
| s-473
| iþ inuh gajukon ni rodida im iþ sundro siponjam seinaim andband allata |
| s-474
| jah qaþ du im in jainamma daga at andanahtja þan waurþanamma |
| s-475
| usleiþam jainis stadis |
| s-476
| jah afletandans þo managein andnemun ina swe was in skipa |
| s-477
| jah þan anþara skipa wesun miþ imma |
| s-478
| jah warþ skura windis mikila jah wegos waltidedun in skip swaswe ita juþan gafullnoda |
| s-479
| jah was is ana notin ana waggarja slepands jah urraisidedun ina jah qeþun du imma |
| s-480
| laisari niu kara þuk þizei fraqistnam |
| s-481
| jah urreisands gasok winda jah qaþ du marein |
| s-482
| gaslawai |
| s-483
| afdumbn |
| s-484
| jah anasilaida sa winds jah warþ wis mikil |
| s-485
| jah qaþ du im |
| s-486
| duƕe faurhtai sijuþ swa |
| s-487
| ƕaiwa ni nauh habaiþ galaubein |
| s-488
| jah ohtedun sis agis mikil jah qeþun du sis misso |
| s-489
| ƕas þannu sa sijai unte jah winds jah marei ufhausjand imma |
| s-490
| Jah qaþ du im |
| s-491
| amen qiþa izwis þatei sind sumai þize her standandane þai ize ni kausjand dauþaus unte gasaiƕand þiudinassu gudis qumanana in mahtai |
| s-492
| jah afar dagans saihs ganam Iesus Paitru jah Iakobu jah Iohannen jah ustauh ins ana fairguni hauh sundro ainans |
| s-493
| jah inmaidida sik in andwairþja ize |
| s-494
| jah wastjos is waurþun glitmunjandeins ƕeitos swe snaiws swaleikos swe wullareis ana airþai ni mag gaƕeitjan |
| s-495
| jah ataugiþs warþ im Helias miþ Mose |
| s-496
| jah wesun rodjandans miþ Iesua |
| s-497
| jah andhafjands Paitrus qaþ du Iesua |
| s-498
| rabbei goþ ist unsis her wisan jah gawaurkjam hlijans þrins þus ainana jah Mose ainana jah ainana Helijin |
| s-499
| ni auk wissa ƕa rodidedi |
| s-500
| wesun auk usagidai |
| s-501
| jah warþ milhma ufarskadwjands im jah qam stibna us þamma milhmin |