| s-303
| ƕa sijai þata |
| s-304
| ƕo so laiseino so niujo ei miþ waldufnja jah ahmam þaim unhrainjam anabiudiþ jah ufhausjand imma |
| s-305
| usiddja þan meriþa is suns and allans bisitands Galeilaias |
| s-306
| jah suns us þizai swnagogen usgaggandans qemun in garda Seimonis jah Andraiins miþ Iakobau jah Iohannen |
| s-307
| iþ swaihro Seimonis lag in brinnon |
| s-308
| jah suns qeþun imma bi ija |
| s-309
| jah duatgaggands urraisida þo undgreipands handu izos jah aflailot þo so brinno suns jah andbahtida im |
| s-310
| andanahtja þan waurþanamma þan gasaggq sauil berun du imma allans þans ubil habandans jah unhulþons habandans |
| s-311
| jah so baurgs alla garunnana was at daura |
| s-312
| jah gahailida managans ubil habandans missaleikaim sauhtim jah unhulþons managos uswarp jah ni fralailot rodjan þos unhulþons unte kunþedun ina |
| s-313
| jah air uhtwon usstandands usiddja jah galaiþ ana auþjana staþ jah jainar baþ |
| s-314
| jah galaistans waurþun imma Seimon jah þai miþ imma |
| s-315
| jah bigitandans ina qeþun du imma þatei allai þuk sokjand |
| s-316
| jah qaþ du im |
| s-317
| gaggam du þaim bisunjane haimom jah baurgim ei jah jainar merjau |
| s-318
| unte duþe qam |
| s-319
| jah was merjands in swnagogim ize and alla Galeilaian jah unhulþons uswairpands |
| s-320
| jah qam at imma þrutsfill habands bidjands ina jah kniwam knussjands jah qiþands du imma þatei |
| s-321
| jabai wileis magt mik gahrainjan |
| s-322
| iþ Iesus infeinands ufrakjands handu seina attaitok imma jah qaþ imma |
| s-323
| wiljau |
| s-324
| wairþ hrains |
| s-325
| jah biþe qaþ þata Iesus suns þata þrutsfill aflaiþ af imma jah hrains warþ |
| s-326
| jah gaƕotjands imma suns ussandida ina jah qaþ du imma |
| s-327
| saiƕ ei mannhun ni qiþais waiht |
| s-328
| ak gagg þuk silban ataugjan gudjin jah atbair fram gahraineinai þeinai þatei anabauþ Moses du weitwodiþai im |
| s-329
| iþ is usgaggands dugann merjan filu jah usqiþan þata waurd swaswe is juþan ni mahta andaugjo in baurg galeiþan ak uta ana auþjaim stadim was |
| s-330
| jah iddjedun du imma allaþro |
| s-331
| Jah galaiþ aftra in Kafarnaum afar dagans |
| s-332
| jah gafrehun þatei in garda ist |
| s-333
| jah suns gaqemun managai swaswe juþan ni gamostedun nih at daura jah rodida im waurd |
| s-334
| jah qemun at imma usliþan bairandans hafanana fram fidworim |
| s-335
| jah ni magandans neƕa qiman imma faura manageim andhulidedun hrot þarei was Iesus jah usgrabandans insailidedun þata badi ana þammei lag sa usliþa |
| s-336
| gasaiƕands þan Iesus galaubein ize qaþ du þamma usliþin |
| s-337
| barnilo afletanda þus frawaurhteis þeinos |
| s-338
| wesun uh þan sumai þize bokarje jainar sitandans jah þagkjandans sis in hairtam seinaim |
| s-339
| ƕa sa swa rodeiþ naiteinins |
| s-340
| ƕas mag afletan frawaurhtins niba ains guþ |
| s-341
| jah suns ufkunnands Iesus ahmin seinamma þatei swa þai mitodedun sis qaþ du im |
| s-342
| duƕe mitoþ þata in hairtam izwaraim |
| s-343
| ƕaþar ist azetizo du qiþan þamma usliþin afletanda þus frawaurhteis þeinos þau qiþan urreis jah nim þata badi þeinata jah gagg |
| s-344
| aþþan ei witeiþ þatei waldufni habaiþ sunus mans ana airþai afletan frawaurhtins qaþ du þamma usliþin |
| s-345
| þus qiþa |
| s-346
| urreis nim uh þata badi þein jah gagg du garda þeinamma |
| s-347
| jah urrais suns jah ushafjands badi usiddja faura andwairþja allaize swaswe usgeisnodedun allai jah hauhidedun mikiljandans guþ qiþandans þatei aiw swa ni gaseƕun |
| s-348
| jah galaiþ aftra faur marein |
| s-349
| jah all manageins iddjedun du imma |
| s-350
| jah laisida ins |
| s-351
| jah ƕarbonds gasaƕ Laiwwi þana Alfaiaus sitandan at motai jah qaþ du imma |
| s-352
| gagg afar mis |
| s-353
| Jah usstandands iddja afar imma |
| s-354
| jah warþ biþe is anakumbida in garda is jah managai motarjos jah frawaurhtai miþanakumbidedun Iesua jah siponjam is |
| s-355
| wesun auk managai jah iddjedun afar imma |
| s-356
| jah þai bokarjos jah Fareisaieis gasaiƕandans ina matjandan miþ þaim motarjam jah frawaurhtaim qeþun du þaim siponjam is |
| s-357
| ƕa ist þatei miþ motarjam jah frawaurhtaim matjiþ jah driggkiþ |
| s-358
| jah gahausjands Iesus qaþ du im |
| s-359
| ni þaurbun swinþai lekeis ak þai ubilaba habandans |
| s-360
| ni qam laþon uswaurhtans ak frawaurhtans |
| s-361
| jah wesun siponjos Iohannis jah Fareisaieis fastandans |
| s-362
| jah atiddjedun jah qeþun du imma |
| s-363
| duƕe siponjos Iohannes jah Fareisaieis fastand iþ þai þeinai siponjos ni fastand |
| s-364
| jah qaþ im Iesus |
| s-365
| ibai magun sunjus bruþfadis und þatei miþ im ist bruþfaþs fastan |
| s-366
| swa lagga ƕeila swe miþ sis haband bruþfad ni magun fastan |
| s-367
| aþþan atgaggand dagos þan afnimada af im sa bruþfaþs jah þan fastand in jainamma daga |
| s-368
| ni manna plat fanins niujis siujiþ ana snagan fairnjana |
| s-369
| ibai afnimai fullon af þamma sa niuja þamma fairnjin jah wairsiza gataura wairþiþ |
| s-370
| ni manna giutiþ wein juggata in balgins fairnjans |
| s-371
| ibai aufto distairai wein þata niujo þans balgins jah wein usgutniþ jah þai balgeis fraqistnand |
| s-372
| ak wein juggata in balgins niujans giutand |
| s-373
| jah warþ þairhgaggan imma sabbato daga þairh atisk jah dugunnun siponjos is skewjandans raupjan ahsa |
| s-374
| jah Fareisaieis qeþun du imma |
| s-375
| sai ƕa taujand siponjos þeinai sabbatim þatei ni skuld ist |
| s-376
| jah is qaþ du im |
| s-377
| niu ussuggwuþ aiw ƕa gatawida Daweid þan þaurfta jah gredags was is jah þai miþ imma |
| s-378
| ƕaiwa galaiþ in gard gudis uf Abiaþara gudjin jah hlaibans faurlageinais matida þanzei ni skuld ist matjan niba ainaim gudjam jah gaf jah þaim miþ sis wisandam |
| s-379
| jah qaþ im |
| s-380
| sabbato in mans warþ gaskapans ni manna in sabbato dagis |
| s-381
| swaei frauja ist sa sunus mans jah þamma sabbato |
| s-382
| Jah galaiþ aftra in swnagogen |
| s-383
| jah was jainar manna gaþaursana habands handu |
| s-384
| jah witaidedun imma hailidediu sabbato daga ei wrohidedeina ina |
| s-385
| jah qaþ du þamma mann þamma gaþaursana habandin handu |
| s-386
| urreis in midumai |
| s-387
| jah qaþ du im |
| s-388
| skuld u ist in sabbatim þiuþ taujan aiþþau unþiuþ taujan saiwala nasjan aiþþau usqistjan |
| s-389
| iþ eis þahaidedun |
| s-390
| jah ussaiƕands ins miþ moda gaurs in daubiþos hairtins ize qaþ du þamma mann |
| s-391
| ufrakei þo handu þeina |
| s-392
| jah ufrakida jah gastoþ aftra so handus is |
| s-393
| jah gaggandans þan Fareisaieis sunsaiw miþ þaim Herodianum garuni gatawidedun bi ina ei imma usqemeina |
| s-394
| jah Iesus aflaiþ miþ siponjam seinaim du marein jah filu manageins us Galeilaia laistidedun afar imma jah us Iudaia jah us Iairusaulwmim jah us Idumaia jah hindana Iaurdanaus |
| s-395
| jah þai bi Twra jah Seidona manageins filu gahausjandans ƕan filu is tawida qemun at imma |
| s-396
| jah qaþ þaim siponjam seinaim ei skip habaiþ wesi at imma in þizos manageins ei ni þraiheina ina |
| s-397
| managans auk gahailida swaswe drusun ana ina ei imma attaitokeina jah swa managai swe habaidedun wundufnjos jah ahmans unhrainjans þaih þan ina gaseƕun drusun du imma jah hropidedun qiþandans þatei |
| s-398
| þu is sunus gudis |
| s-399
| jah filu andbait ins ei ina ni gaswikunþidedeina |
| s-400
| jah ustaig in fairguni jah athaihait þanzei wilda is jah galiþun du imma |
| s-401
| jah gawaurhta twalif du wisan miþ sis jah ei insandidedi ins merjan jah haban waldufni du hailjan sauhtins jah uswairpan unhulþons |
| s-402
| jah gasatida Seimona namo Paitrus |