| s-402
| gaqumanaim þan hiumam managaim jah þaim þaiei us baurgim gaïddjedun du imma qaþ þairh gajukon |
| s-403
| urrann saiands du saian fraiwa seinamma |
| s-404
| jah miþþanei saiso sum gadraus faur wig jah gatrudan warþ jah fuglos himinis fretun þata |
| s-405
| jah anþar gadraus ana staina jah uskijanata gaþaursnoda in þizei ni habaida qrammiþa |
| s-406
| jah sum gadraus in midumai þaurniwe jah miþuskeinandans þai þaurnjus afƕapidedun þata |
| s-407
| jah anþar gadraus ana airþai godai jah uskeinoda jah tawida akran taihuntaihundfalþ |
| s-408
| þata þan qiþands ufwopida |
| s-409
| saei habai ausona du hausjan gahausjai |
| s-410
| frehun þan ina siponjos is qiþandans |
| s-411
| ƕa sijai so gajuko |
| s-412
| iþ is qaþ |
| s-413
| izwis atgiban ist kunnan runos þiudinassaus gudis |
| s-414
| iþ þaim anþaraim in gajukom ei saiƕandans ni gasaiƕaina jah gahausjandans ni fraþjaina |
| s-415
| aþþan þata ist so gajuko |
| s-416
| þata fraiw ist waurd gudis |
| s-417
| iþ þai wiþra wig sind þai hausjandans |
| s-418
| þaþroh qimiþ diabulus jah usnimiþ þata waurd af hairtin ize ei galaubjandans ni ganisaina |
| s-419
| iþ þai ana þamma staina ize þan hausjand miþ faheidai andnimand þata waurd jah þai waurtins ni haband þaiei du mela galaubjand jah in mela fraistubnjos afstandand |
| s-420
| iþ þata in þaurnuns gadriusando þai sind þai gahausjandans jah af saurgom jah gabein jah gabaurjoþum þizos libainais gaggandans afƕapnand jah ni gawrisqand |
| s-421
| iþ þata ana þizai godon airþai þai sind þai ize in hairtin godamma jah seljamma gahausjandans þata waurd gahaband jah akran bairand in þulainai |
| s-422
| aþþan ni manna lukarn tandjands dishuljiþ ita kasa aiþþau uf ligr satjiþ ak ana lukarnastaþin gasatjiþ ei þai inngaggandans saiƕaina liuhad |
| s-423
| ni auk ist analaugn þatei swikunþ ni wairþai nih fulgin þatei ni gakunnaidau jah in swekunþamma qimai |
| s-424
| saiƕiþ nu ƕaiwa hauseiþ |
| s-425
| unte saei habaiþ gibada imma jah saei ni habaiþ jah þatei þugkeiþ haban afnimada af imma |
| s-426
| atiddjedun þan du imma aiþei jah broþrjus is jah ni mahtedun andqiþan imma faura managein |
| s-427
| jah gataihan warþ imma þatei |
| s-428
| aiþei þeina jah broþrjus þeinai standand uta gasaiƕan þuk gairnjandona |
| s-429
| iþ is andhafjands qaþ du im |
| s-430
| aiþei meina jah broþrjus meinai þai sind þai waurd gudis gahausjandans jah taujandans |
| s-431
| warþ þan in ainamma þize dage |
| s-432
| jah is galaiþ in skip jah siponjos is jah qaþ du im |
| s-433
| galeiþam hindar þana marisaiw |
| s-434
| jah galiþun |
| s-435
| þaruh þan swe faridedun anasaislep |
| s-436
| jah atiddja skura windis in þana marisaiw jah gafullnodedun jah birekjai waurþun |
| s-437
| duatgaggandans þan urraisidedun ina qiþandans |
| s-438
| talzjand fraqistnam |
| s-439
| iþ is urreisands gasok winda jah þamma wega watins |
| s-440
| jah anaslawaidedun jah warþ wis |
| s-441
| qaþ þan du im |
| s-442
| ƕar ist galaubeins izwara |
| s-443
| ogandans þan sildaleikidedun qiþandans du sis misso |
| s-444
| ƕas siai sa ei jah windam faurbiudiþ jah watnam jah ufhausjand imma |
| s-445
| jah atfaridedun in gawi Gaddarene þatei ist wiþrawairþ Galeilaia |
| s-446
| usgaggandin þan imma ana airþa gamotida imma wair sums us baurg saei habaida unhulþons mela lagga jah wastjom ni gawasiþs was jah in garda ni gawas ak in hlaiwasnom |
| s-447
| gasaiƕands þan Iesu jah ufhropjands draus du imma jah stibnai mikilai qaþ |
| s-448
| ƕa mis jah þus Iesu sunau gudis hauhistins |
| s-449
| bidja þuk |
| s-450
| ni balwjais mis |
| s-451
| unte anabaud ahmin þamma unhrainjin usgaggan af þamma mann |
| s-452
| manag auk mel frawalw ina jah bundans was eisarnabandjom jah fotubandjom fastaiþs was jah dishniupands þos bandjos draibiþs was fram þamma unhulþin ana auþidos |
| s-453
| frah þan ina Iesus qiþands |
| s-454
| ƕa ist namo þein |
| s-455
| þaruh qaþ harjis unte unhulþons managos galiþun in ina |
| s-456
| jah bad ina ei ni anabudi im in afgrundiþa galeiþan |
| s-457
| was uþ þan jainar hairda sweine managaize haldanaize in þamma fairgunja |
| s-458
| jah bedun ina ei uslaubidedi im in þo galeiþan |
| s-459
| jah uslaubida im |
| s-460
| usgaggandans þan suns þai unhulþans af þamma mann galiþun in þo sweina jah rann sa wriþus and driuson in þana marisaiw jah afƕapnodedun |
| s-461
| gasaiƕandans þan þai haldandans þata waurþano gaþlauhun jah gataihun in baurg jah in weihsa |
| s-462
| usiddjedun þan saiƕan þata waurþano jah qemun at Iesua jah bigetun sitandan þana mannan af þammei unhulþons usiddjedun gawasidana jah fraþjandan faura fotum Iesuis jah ohtedun |
| s-463
| gataihun þan im jah þai gasaiƕandans ƕaiwa ganas sa daimonareis |
| s-464
| jah bedun ina allai gaujans þize Gaddarene galeiþan fairra sis unte agisa mikilamma dishabaidai wesun |
| s-465
| iþ is galeiþands in skip gawandida sik |
| s-466
| baþ þan ina sa wair af þammei þos unhulþons usiddjedun ei wesi miþ imma |
| s-467
| fralailot þan ina Iesus qiþands |
| s-468
| jah galaiþ and baurg alla merjands ƕan filu gatawida imma Iesus |
| s-469
| warþ þan miþþanei gawandida sik Iesus andnam ina managei |
| s-470
| wesun auk allai beidandans is |
| s-471
| jah sai qam wair þizei namo Iaeirus sah fauramaþleis swnagogais was jah driusands faura fotum Iesuis bad ina gaggan in gard seinana |
| s-472
| unte dauhtar ainoho was imma swe wintriwe twalibe jah so swalt |
| s-473
| miþþanei þan iddja is manageins þraihun ina |
| s-474
| jah qino wisandei in runa bloþis jera twalif soei in lekjans fraqam allamma aigina seinamma jah ni mahta was fram ainomehun galeikinon atgaggandei du aftaro attaitok skauta wastjos is jah suns gastoþ sa runs bloþis izos |
| s-475
| jah qaþ Iesus |
| s-476
| ƕas sa tekands mis |
| s-477
| laugnjandam þan allaim qaþ Paitrus jah þai miþ imma |
| s-478
| talzjand manageins biƕairband þuk jah þreihand jah qiþis |
| s-479
| ƕas sa tekands mis |
| s-480
| þaruh is qaþ |
| s-481
| taitok mis sums |
| s-482
| ik auk ufkunþa maht usgaggandein af mis |
| s-483
| gasaiƕandei þan so qino þatei ni galaugnida reirandei qam jah atdriusandei du imma in þizei attaitok imma gataih imma in andwairþja allaizos manageins jah ƕaiwa gahailnoda suns |
| s-484
| iþ Iesus qaþ du izai |
| s-485
| galaubeins þeina ganasida þuk |
| s-486
| gagg in gawairþja |
| s-487
| nauhþan imma rodjandin gaggiþ sums manne fram þis fauramaþleis swnagogais qiþands du imma þatei |
| s-488
| gadauþnoda dauhtar þeina |
| s-489
| ni draibei þana laisari |
| s-490
| iþ is gahausjands andhof imma qiþands |
| s-491
| ni faurhtei |
| s-492
| þatainei galaubei jah ganasjada |
| s-493
| qimands þan in garda ni fralailot ainohun inngaggan alja Paitru jah Iakobu jah Iohannen jah þana attan þizos maujos jah aiþein |
| s-494
| gaigrotun þan allai jah faiflokun þo |
| s-495
| þaruh qaþ |
| s-496
| ni gretiþ unte ni gaswalt ak slepiþ |
| s-497
| jah bihlohun ina gasaiƕandans þatei gaswalt |
| s-498
| þanuh is usdreibands allans ut jah fairgreipands handu izos wopida qiþands |
| s-499
| mawi urreis |
| s-500
| jah gawandida ahman izos jah ustoþ suns |
| s-501
| jah anabaud izai giban mat |