| s-102
| nih arbaidjand nih spinnand |
| s-103
| qiþ uh þan izwis þatei nih Saulaumon in allamma wulþau seinamma gawasida sik swe ains þize |
| s-104
| jah þande þata hawi haiþjos himma daga wisando jah gistradagis in auhn galagiþ guþ swa wasjiþ ƕaiwa mais izwis leitil galaubjandans |
| s-105
| ni maurnaiþ nu qiþandans |
| s-106
| ƕa matjam aiþþau ƕa drigkam aiþþau ƕe wasjaima |
| s-107
| all auk þata þiudos sokjand |
| s-108
| wait uh þan atta izwar sa ufar himinam þatei þaurbuþ |
| s-109
| Jah qemun hindar marein in landa Gaddarene |
| s-110
| jah usgaggandin imma us skipa suns gamotida imma manna us aurahjom in ahmin unhrainjamma saei bauain habaida in aurahjom |
| s-111
| jah ni naudibandjom eisarneinaim manna mahta ina gabindan |
| s-112
| unte is ufta eisarnam bi fotuns gabuganaim jah naudibandjom eisarneinaim gabundans was jah galausida af sis þos naudibandjos jah þo ana fotum eisarna gabrak jah manna ni mahta ina gatamjan |
| s-113
| jah sinteino nahtam jah dagam in aurahjom jah in fairgunjam was hropjands jah bliggwands sik stainam |
| s-114
| gasaiƕands þan Iesu fairraþro rann jah inwait ina jah hropjands stibnai mikilai qaþ |
| s-115
| ƕa mis jah þus Iesu sunau gudis þis hauhistins |
| s-116
| ni balwjais mis |
| s-117
| unte qaþ imma |
| s-118
| usgagg ahma unhrainja us þamma mann |
| s-119
| jah frah ina |
| s-120
| ƕa namo þein |
| s-121
| jah qaþ du imma |
| s-122
| namo mein Laigaion unte managai sijum |
| s-123
| jah baþ ina filu ei ni usdrebi im us landa |
| s-124
| was uh þan jainar hairda sweine haldana at þamma fairgunja |
| s-125
| jah bedun ina allos þos unhulþons qiþandeins |
| s-126
| insandei unsis in þo sweina ei in þo galeiþaima |
| s-127
| jah uslaubida im Iesus suns |
| s-128
| jah usgaggandans ahmans þai unhrainjans galiþun in þo sweina jah rann so hairda and driuson in marein |
| s-129
| wesun uþ þan swe twos þusundjos jah afƕapnodedun in marein |
| s-130
| jah þai haldandans þo sweina gaþlauhun jah gataihun in baurg jah in haimom jah qemun saiƕan ƕa wesi þata waurþano |
| s-131
| jah atiddjedun du Iesua jah gasaiƕand þana wodan sitandan jah gawasidana jah fraþjandan þana saei habaida laigaion jah ohtedun |
| s-132
| jah spillodedun im þaiei gaseƕun ƕaiwa warþ bi þana wodan jah bi þo sweina |
| s-133
| jah dugunnun bidjan ina galeiþan hindar markos seinos |
| s-134
| jah inngaggandan ina in skip baþ ina saei was wods ei miþ imma wesi |
| s-135
| jah ni lailot ina ak qaþ du imma |
| s-136
| gagg du garda þeinamma du þeinaim jah gateih im ƕan filu þus frauja gatawida jah gaarmaida þuk |
| s-137
| jah galaiþ jah dugann merjan in Daikapaulein ƕan filu gatawida imma Iesus |
| s-138
| jah allai sildaleikidedun |
| s-139
| jah usleiþandin Iesua in skipa aftra hindar marein gaqemun sik manageins filu du imma jah was faura marein |
| s-140
| jah sai qimiþ ains þize swnagogafade namin Jaeirus |
| s-141
| jah saiƕands ina gadraus du fotum Iesuis jah baþ ina filu qiþands þatei dauhtar meina aftumist habaiþ ei |
| s-142
| qimands lagjais ana þo handuns ei ganisai jah libai |
| s-143
| jah galaiþ miþ imma jah iddjedun afar imma manageins filu jah þraihun ina |
| s-144
| jah qinono suma wisandei in runa bloþis jera twalif jah manag gaþulandei fram managaim lekjam jah fraqimandei allamma seinamma jah ni waihtai botida ak mais wairs habaida gahausjandei bi Iesu atgaggandei in managein aftana attaitok wastjai is |
| s-145
| unte qaþ þatei jabai wastjom is atteka ganisa |
| s-146
| jah sunsaiw gaþaursnoda sa brunna bloþis izos jah ufkunþa ana leika þatei gahailnoda af þamma slaha |
| s-147
| jah sunsaiw Iesus ufkunþa in sis silbin þo us sis maht usgaggandein |
| s-148
| gawandjands sik in managein qaþ |
| s-149
| ƕas mis taitok wastjom |
| s-150
| jah qeþun du imma siponjos is |
| s-151
| saiƕis þo managein þreihandein þuk jah qiþis |
| s-152
| ƕas mis taitok |
| s-153
| jah wlaitoda saiƕan þo þata taujandein |
| s-154
| iþ so qino ogandei jah reirandei witandei þatei warþ bi ija qam jah draus du imma jah qaþ imma alla þo sunja |
| s-155
| iþ is qaþ du izai |
| s-156
| dauhtar galaubeins þeina ganasida þuk |
| s-157
| gagg in gawairþi jah sijais haila af þamma slaha þeinamma |
| s-158
| nauhþanuh imma rodjandin qemun fram þamma swnagogafada qiþandans þatei dauhtar þeina gaswalt |
| s-159
| ƕa þanamais draibeis þana laisari |
| s-160
| iþ Iesus sunsaiw gahausjands þata waurd rodiþ qaþ du þamma swnagogafada |
| s-161
| ni faurhtei |
| s-162
| þatainei galaubei |
| s-163
| jah ni fralailot ainohun ize miþ sis afargaggan nibai Paitru jah Iakobu jah Iohannen broþar Iakobis |
| s-164
| jah galaiþ in gard þis swnagogafadis jah gasaƕ auhjodu jah gretandans jah waifairƕjandans filu |
| s-165
| jah innatgaggands qaþ du im |
| s-166
| ƕa auhjoþ jah gretiþ |
| s-167
| þata barn ni gadauþnoda ak slepiþ |
| s-168
| jah bihlohun ina |
| s-169
| iþ is uswairpands allaim ganimiþ attan þis barnis jah aiþein jah þans miþ sis jah galaiþ inn þarei was þata barn ligando |
| s-170
| jah fairgraip bi handau þata barn qaþ uh du izai |
| s-171
| taleiþa kumei þatei ist gaskeiriþ |
| s-172
| mawilo du þus qiþa |
| s-173
| urreis |
| s-174
| jah suns urrais so mawi jah iddja |
| s-175
| was auk jere twalibe |
| s-176
| jah usgeisnodedun faurhtein mikilai |
| s-177
| jah anabauþ im filu ei manna ni funþi þata |
| s-178
| jah haihait izai giban matjan |
| s-179
| Jah usstoþ jainþro jah qam in landa seinamma jah laistidedun afar imma siponjos is |
| s-180
| jah biþe warþ sabbato dugann in swnagoge laisjan jah managai hausjandans sildaleikidedun qiþandans |
| s-181
| ƕaþro þamma þata jah ƕo so handugeino so gibano imma ei mahteis swaleikos þairh handuns is wairþand |
| s-182
| niu þata ist sa timrja sa sunus Marjins iþ broþar Iakobaus jah Iusezis jah Iudins jah Seimonis |
| s-183
| jah niu sind swistrjus is her at unsis |
| s-184
| jah gamarzidai waurþun in þamma |
| s-185
| qaþ þan im Iesus þatei nist praufetus unswers niba in gabaurþai seinai jah in ganiþjam jah in garda seinamma |
| s-186
| jah ni mahta jainar ainohun mahte gataujan niba fawaim siukaim handuns galagjands gahailida |
| s-187
| jah sildaleikida in ungalaubeinais ize jah bitauh weihsa bisunjane laisjands |
| s-188
| jah athaihait þans twalif jah dugann ins insandjan twans ƕanzuh jah gaf im waldufni ahmane unhrainjaize |
| s-189
| jah faurbauþ im ei waiht ni nemeina in wig niba hrugga aina nih matibalg nih hlaif nih in gairdos aiz ak gaskohai suljom |
| s-190
| jah ni wasjaiþ twaim paidom |
| s-191
| jah qaþ du im |
| s-192
| þisƕaduh þei gaggaiþ in gard þar saljaiþ unte usgaggaiþ jainþro |
| s-193
| jah swa managai swe ni andnimaina izwis nih hausjaina izwis usgaggandans jainþro ushrisjaiþ mulda þo undaro fotum izwaraim du weitwodiþai im |
| s-194
| amen qiþa izwis |
| s-195
| sutizo ist Saudaumjam aiþþau Gaumaurjam in daga stauos þau þizai baurg jainai |
| s-196
| jah usgaggandans meridedun ei idreigodedeina |
| s-197
| jah unhulþons managos usdribun jah gasalbodedun alewa managans siukans jah gahailidedun |
| s-198
| jah gahausida þiudans Herodes swikunþ allis warþ namo is jah qaþ þatei Iohannis sa daupjands us dauþaim urrais jah duþþe waurkjand þos mahteis in imma |
| s-199
| anþarai þan qeþun þatei Helias ist |
| s-200
| anþarai þan qeþun þatei praufetes ist swe ains þize praufete |
| s-201
| gahausjands þan Herodes qaþ þatei þammei ik haubiþ afmaimait Iohanne sa ist |