| s-1
| ⲁⲩⲱ ⲛⲟⲉⲙⲓⲛ ⲛⲉϥϣⲟⲟⲡ ⲛⲁⲥ ⲛϭⲓⲟⲩⲣⲙⲛⲥⲟⲟⲩⲛ ⲛⲧⲉⲡⲉⲥϩⲁⲓ ⲡⲣⲱⲙⲉ ⲇⲉ ⲉⲧⲙⲙⲁⲩ ⲛⲉⲩⲇⲩⲛⲁⲧⲟⲥ ⲡⲉ ϩⲛⲧⲉϥϭⲟⲙ ⲉⲟⲩⲉⲃⲟⲗ ⲡⲉ ϩⲛⲧⲥⲩⲅⲅⲉⲛⲉⲓⲁ ⲛⲁⲃⲓⲙⲉⲗⲉⲭ ⲉⲡⲉϥⲣⲁⲛ ⲡⲉ ⲃⲟⲉⲥ |
| s-2
| ⲡⲉϫⲉϩⲣⲟⲩⲑ ⲇⲉ ⲧⲙⲱⲁⲃⲓⲧⲏⲥ ⲛⲛⲟⲉⲙⲓⲛ ϫⲉⲧⲁⲃⲱⲕ ⲉⲃⲟⲗ ⲉⲧⲥⲱϣⲉ ⲧⲁⲥⲣⲓⲧ ϩⲛⲛϩⲙⲥ ϩⲁⲣⲁⲧϥ ⲙⲡⲉⲧⲓⲛⲁϭⲛⲭⲁⲣⲓⲥ ⲛⲛⲁϩⲣⲁϥ ⲡⲉϫⲉⲛⲟⲉⲙⲓⲛ ⲛⲁⲥ ϫⲉⲃⲱⲕ ⲧⲁϣⲉⲉⲣⲉ |
| s-3
| ⲁⲥⲃⲱⲕ ⲇⲉ ⲁⲥⲥⲣⲓⲧ ϩⲛⲧⲥⲱϣⲉ ϩⲓⲡⲁϩⲟⲩ ⲛⲛϫⲁⲓⲟϩⲥ ⲁⲩⲱ ⲁⲥⲁⲡⲁⲛⲧⲁ ⲉⲧⲙⲉⲣⲓⲥ ⲛⲧⲥⲱϣⲉ ⲛⲃⲟⲉⲥ ⲡⲉⲉⲃⲟⲗ ϩⲛⲧⲥⲩⲅⲅⲉⲛⲉⲓⲁ ⲛⲁⲃⲓⲙⲉⲗⲉⲭ |
| s-4
| ⲁⲩⲱ ⲉⲓⲥ ⲃⲟⲉⲥ ⲁϥⲉⲓ ⲉⲃⲟⲗ ϩⲛⲃⲏⲑⲗⲉⲉⲙ ⲡⲉϫⲁϥ ⲛⲛⲉϥϫⲁⲓⲟϩⲥ ϫⲉⲡϫⲟⲉⲓⲥ ⲉϥⲉϣⲱⲡⲉ ⲛⲙⲙⲏⲧⲛ ⲛⲧⲟⲟⲩ ϩⲱⲟⲩ ⲡⲉϫⲁⲩ ⲛⲁϥ ϫⲉⲉⲣⲉⲡϫⲟⲉⲓⲥ ⲥⲙⲟⲩ ⲉⲣⲟⲕ |
| s-5
| ⲁⲩⲱ ⲃⲟⲉⲥ ⲡⲉϫⲁϥ ⲙⲡϩⲙϩⲁⲗ ⲡⲉⲧϩⲓϫⲛⲛⲉⲧⲱϩⲥ ϫⲉⲧⲁⲛⲓⲙ ⲧⲉ ⲧⲉⲓϣⲉⲉⲣⲉ ϣⲏⲙ |
| s-6
| ⲡϩⲙϩⲁⲗ ⲇⲉ ⲉⲧϩⲓϫⲛⲛⲉⲧⲱϩⲥ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲁϥ ϫⲉⲧⲁⲓ ⲧⲉ ϣⲉⲉⲣⲉ ϣⲏⲙ ⲙⲙⲱⲁⲃⲓⲧⲏⲥ ⲧⲉⲛⲧⲁⲥⲕⲧⲟⲥ ⲙⲛⲛⲟⲉⲙⲓⲛ ⲉⲃⲟⲗ ϩⲛⲧⲥⲱϣⲉ ⲙⲙⲱⲁⲃ |
| s-7
| ⲉⲁⲥϫⲟⲟⲥ ϫⲉϯⲛⲁⲃⲱⲕ ⲧⲁⲥⲣⲓⲧ ⲛⲧⲁⲕⲱⲧϥ ϩⲛⲛϩⲙⲥ ϩⲓⲡⲁϩⲟⲩ ⲛⲛϫⲁⲓⲟϩⲥ ⲛⲧⲉⲣⲉⲥⲉⲓ ⲇⲉ ⲙⲡⲥⲗⲟ ⲉⲥⲁϩⲉⲣⲁⲧⲥ ϫⲓⲛϩⲧⲟⲟⲩⲉ ϣⲁⲡⲛⲁⲩ ⲛⲣⲟⲩϩⲉ ⲉⲙⲡⲥⲙⲧⲟⲛ ⲙⲙⲟⲥ ⲗⲁⲁⲩ ϩⲛⲧⲥⲱϣⲉ |
| s-8
| ⲁⲩⲱ ⲃⲟⲉⲥ ⲡⲉϫⲁϥ ⲛϩⲣⲟⲩⲑ ϫⲉⲙⲡⲉⲥⲱⲧⲙ ⲧⲁϣⲉⲉⲣⲉ ϫⲉⲙⲡⲣⲃⲱⲕ ⲉϩⲣⲁⲓ ⲉⲕⲉⲉⲓⲱϩⲉ ⲛϣⲙⲙⲟ ⲉⲥⲣⲓⲧ ⲛϩⲏⲧϥ ⲛⲧⲟ ϭⲉ ⲙⲡⲣⲣⲡⲃⲟⲗ ⲙⲡⲉⲓⲙⲁ ⲁⲗⲗⲁ ⲧⲟϭⲉ ⲉⲛⲁⲕⲉϣⲉⲉⲣⲉ ϣⲏⲙ |
| s-9
| ⲁⲩⲱ ⲛⲟⲩⲃⲁⲗ ⲙⲁⲣⲟⲩϭⲱϣⲧ ⲉⲡⲙⲁ ⲉⲧⲟⲩⲛⲁⲱϩⲥ ⲛϩⲏⲧϥ ⲛⲧⲉⲃⲱⲕ ⲛⲧⲉⲟⲩⲁϩⲉ ⲛⲥⲱⲟⲩ ⲉⲓⲥϩⲏⲏⲧⲉ ⲁⲓϩⲱⲛ ⲉⲧⲟⲟⲧⲟⲩ ⲛⲛϣⲏⲣⲉ ϣⲏⲙ ⲉⲧⲙⲧⲣⲉⲩϫⲱϩ ⲉⲣⲟ ⲁⲩⲱ ⲉⲣϣⲁⲛⲉⲓⲃⲉ ⲉⲣⲉⲃⲱⲕ ⲉⲡⲙⲁ ⲛⲛⲉⲥⲕⲉⲩⲏ ⲛⲧⲉⲥⲱ ϩⲙⲡⲙⲁ ⲉⲧⲉⲣⲉⲛϣⲏⲣⲉ ϣⲏⲙ ⲛⲁⲙⲉϩⲙⲟⲟⲩ ⲉⲣⲟϥ |
| s-10
| ⲁⲩⲱ ⲁⲥⲡⲁϩⲧⲥ ⲉϫⲙⲡⲉⲥϩⲟ ⲉϫⲙⲡⲕⲁϩ ⲁⲥⲟⲩⲱϣⲧ ⲉⲥϫⲱ ⲙⲙⲟⲥ ⲛⲁϥ ϫⲉⲉⲓⲥϩⲏⲏⲧⲉ ⲁⲓϭⲛⲭⲁⲣⲓⲥ ⲛⲛⲁϩⲣⲁⲕ ⲉⲧⲣⲉⲕⲥⲟⲩⲱⲛⲧ ⲁⲩⲱ ⲁⲛⲟⲕ ⲁⲛⲅ ⲟⲩϣⲙⲙⲱ |
| s-11
| ⲁϥⲟⲩⲱϣⲃ ⲛϭⲓⲃⲟⲉⲥ ⲉϥϫⲱ ⲙⲙⲟⲥ ⲛⲁⲥ ϫⲉϩⲛⲟⲩⲧⲁⲩⲟ ⲁⲩⲧⲁⲟⲩⲟ ⲉⲣⲟⲓ ⲛⲛⲉϩⲃⲏⲩⲉ ⲉⲛⲧⲁⲁⲩ ⲙⲛⲧⲟⲩϣⲱⲙⲉ ⲙⲛⲛⲥⲁⲛⲧⲉⲡⲟⲩϩⲁⲓ ⲙⲟⲩ ⲁⲩⲱ ⲛⲧϩⲉ ⲉⲛⲧⲁⲕⲱ ⲛⲥⲱ ⲙⲡⲟⲩⲉⲓⲱⲧ ⲙⲛⲧⲟⲩⲙⲁⲁⲩ ⲙⲛⲡⲕⲁϩ ⲉⲛⲧⲁⲩϫⲡⲟ ⲛϩⲏⲧϥ ⲁⲃⲱⲕ ⲉⲣⲁⲧϥ ⲛⲟⲩⲗⲁⲟⲥ ⲉⲛⲧⲉⲥⲟⲟⲩⲛ ⲙⲙⲟϥ ⲁⲛ ⲛⲥⲁϥ ⲙⲛϣⲙⲧ ⲉⲡϩⲟⲟⲩ ⲛϩⲟⲟⲩ ⲉⲣⲉⲡϫⲟⲉⲓⲥ ⲧⲱⲱⲃⲉ ⲛⲉ ⲙⲡⲟⲩϩⲱⲃ |
| s-12
| ⲁⲩⲱ ⲉⲣⲉⲡⲟⲩⲃⲉⲕⲉ ϣⲱⲡⲉ ⲉϥϫⲏⲕ ⲉⲃⲟⲗ ⲛⲧⲟⲟⲧϥ ⲙⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲡⲉⲛⲧⲁϯⲡⲟⲩⲟⲩⲟⲓ ⲉϩⲟⲩⲛ ⲉⲣⲟϥ ⲉⲧⲣⲉⲛⲁϩⲧⲉ ϩⲁⲛⲉϥⲧⲛϩ |
| s-13
| ⲛⲧⲟⲥ ⲇⲉ ⲡⲉϫⲁⲥ ϫⲉⲡϫⲟⲉⲓⲥ ⲉⲓⲉϭⲛⲭⲁⲣⲓⲥ ⲛⲛⲁϩⲣⲁⲕ ϫⲉⲁⲕⲥⲗⲥⲱⲗⲧ ⲁⲩⲱ ϫⲉⲁⲕϣⲁϫⲉ ⲉϩⲣⲁⲓ ⲉⲡϩⲏⲧ ⲛⲧⲉⲕϩⲙϩⲁⲗ ⲉⲓⲥϩⲏⲏⲧⲉ ⲁⲛⲟⲕ ϯⲛⲁϣⲱⲡⲉ ⲛⲁⲕ ⲛⲧϩⲉ ⲛⲟⲩⲉⲓ ⲛⲛⲉⲕϩⲙϩⲁⲗ |
| s-14
| ⲡⲉϫⲉⲃⲟⲉⲥ ⲛⲁⲥ ϫⲉⲏⲇⲏ ⲁⲡⲛⲁⲩ ⲛⲟⲩⲱⲙ ϣⲱⲡⲉ ϯⲡⲟⲩⲟⲩⲟⲓ ⲉϩⲟⲩⲛ ⲉⲡⲉⲓⲙⲁ ⲛⲧⲉⲟⲩⲱⲙ ⲉⲃⲟⲗ ϩⲛⲛⲉⲛⲟⲉⲓⲕ ⲁⲩⲱ ⲛⲧⲉⲥⲉⲡⲧⲟⲩⲗⲁⲕⲙ ϩⲙⲡϩⲙϫ ⲁⲩⲱ ϩⲣⲟⲩⲑ ⲁⲥϩⲙⲟⲟⲥ ⲉϩⲣⲁⲓ ⲛⲥⲁⲥⲡⲓⲣ ⲛⲛⲉⲧⲱϩⲥ ⲁⲃⲟⲉⲥ ⲧⲁⲙⲓⲟ ⲛⲁⲥ ⲙⲡⲉⲧⲥⲛⲁⲟⲩⲟⲙϥ ⲁⲥⲟⲩⲱⲙ ⲁⲥⲥⲉⲓ ⲁⲥⲕⲱ ⲉⲡⲁϩⲟⲩ ⲙⲡⲥⲉⲉⲡⲉ |
| s-15
| ⲁⲩⲱ ⲁⲥⲧⲱⲟⲩⲛ ⲉⲧⲣⲉⲥⲥⲣⲓⲧ ⲃⲟⲉⲥ ⲇⲉ ⲁϥϩⲱⲛ ⲉⲧⲟⲟⲧⲟⲩ ⲛⲛⲉϥϩⲙϩⲁⲗ ⲉϥϫⲱ ⲙⲙⲟⲥ ⲛⲁⲩ ϫⲉⲙⲁⲣⲉⲥⲕⲱⲧϥ ϩⲛⲧⲙⲏⲧⲉ ⲛⲛⲉⲕⲛⲁⲁⲩ ⲛⲧⲉⲧⲛⲧⲙϯϣⲓⲡⲉ ⲛⲁⲥ |
| s-16
| ⲁⲩⲱ ϩⲛⲟⲩⲧⲱⲟⲩⲛ ⲉⲧⲉⲧⲛⲉⲧⲱⲟⲩⲛ ⲛⲁⲥ ⲁⲩⲱ ϩⲛⲟⲩϯ ⲉⲧⲉⲧⲛⲉϯ ⲛⲁⲥ ⲉⲃⲟⲗ ϩⲛⲛⲉⲧⲧⲁⲙⲓⲏⲩ ⲛⲥⲟⲩⲱⲙ ⲁⲩⲱ ⲛⲥⲕⲱⲧϥ ⲟⲛ ⲛⲧⲉⲧⲛⲧⲙⲛⲟϣⲡⲥ |
| s-17
| ⲁⲩⲱ ⲁⲥϭⲱ ⲉⲥⲕⲱⲧϥ ϩⲛⲧⲥⲱϣⲉ ϣⲁⲡⲛⲁⲩ ⲛⲣⲟⲩϩⲉ ⲁⲩⲱ ⲛⲉⲛⲧⲁⲥⲕⲟⲧϥⲟⲩ ⲁⲥⲟⲩⲉϣⲟⲩⲱϣⲟⲩ ⲁⲩⲣⲟⲩϣⲓ ⲛⲉⲓⲱⲧ |
| s-18
| ⲁⲥϥⲓⲧⲟⲩ ⲁⲥⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ⲁⲩⲱ ⲧⲉⲥϣⲱⲙⲉ ⲁⲥⲛⲁⲩ ⲉⲛⲉⲛⲧⲁⲥⲕⲟⲧϥⲟⲩ ⲁⲩⲱ ϩⲣⲟⲩⲑ ⲁⲥⲉⲓⲛⲉ ⲉⲃⲟⲗ ϩⲛⲛⲉⲛⲧⲁⲩⲥⲉⲉⲡⲉ ⲉⲣⲟⲥ ϩⲛⲛⲉⲛⲧⲁⲥⲥⲉⲓ ⲛϩⲏⲧⲟⲩ ⲁⲥⲧⲁⲁⲩ ⲛⲁⲥ |
| s-19
| ⲁⲩⲱ ⲧⲉⲥϣⲱⲙⲉ ⲡⲉϫⲁⲥ ⲛⲁⲥ ϫⲉⲛⲧⲁⲕⲱⲧϥ ⲧⲱⲛ ⲙⲡϩⲟⲟⲩ ⲁⲩⲱ ⲛⲧⲁⲧⲁⲙⲓⲟⲟⲩ ⲧⲱⲛ ⲉϥⲉϣⲱⲡⲉ ⲛϭⲓⲡⲉⲛⲧⲁϥⲥⲟⲩⲱⲛⲉ ⲉϥⲥⲙⲁⲙⲁⲁⲧ ⲁⲩⲱ ϩⲣⲟⲩⲑ ⲁⲥⲧⲁⲙⲉⲧⲉⲥϣⲱⲙⲉ ϫⲉⲛⲧⲁⲥⲧⲁⲙⲓⲟⲟⲩ ⲧⲱⲛ ⲁⲩⲱ ⲡⲉϫⲁⲥ ⲛⲁⲥ ϫⲉⲡⲣⲁⲛ ⲙⲡⲣⲱⲙⲉ ⲉⲛⲧⲁϥⲉⲓⲣⲉ ⲛⲙⲙⲁⲓ ⲙⲡϩⲟⲟⲩ ⲡⲉ ⲃⲟⲉⲥ |
| s-20
| ⲡⲉϫⲉⲛⲟⲉⲙⲓⲛ ⲛⲧⲉⲥϣⲉⲗⲉⲉⲧ ϫⲉϥⲥⲙⲁⲙⲁⲁⲧ ⲙⲡϫⲟⲉⲓⲥ ϫⲉⲙⲡϥⲕⲱ ⲛⲥⲱϥ ⲙⲡⲉϥⲛⲁ ⲙⲛⲛⲉⲧⲟⲛϩ ⲁⲩⲱ ⲙⲛⲛⲉⲧⲙⲟⲟⲩⲧ ⲁⲩⲱ ⲛⲟⲉⲙⲓⲛ ⲡⲉϫⲁⲥ ⲛⲁⲥ ϫⲉⲡⲣⲱⲙⲉ ϥϩⲏⲛ ⲉⲣⲟⲛ ⲟⲩⲉⲃⲟⲗ ϩⲙⲡⲅⲉⲛⲟⲥ ⲡⲉ ⲉⲧⲛⲁϫⲓⲧⲛ |
| s-21
| ϩⲣⲟⲩⲑ ⲇⲉ ⲡⲉϫⲁⲥ ⲛⲧⲉⲥϣⲱⲙⲉ ϫⲉⲕⲁⲓ ⲅⲁⲣ ⲁϥϫⲟⲟⲥ ⲛⲁⲓ ϫⲉⲧⲟϭⲉ ⲉⲛⲁϣⲉⲉⲣⲉ ϣⲏⲙ ϣⲁⲛⲧⲟⲩϫⲱⲕ ⲉⲃⲟⲗ ⲙⲡⲱϩⲥ ⲧⲏⲣϥ ⲉⲧϣⲟⲟⲡ ⲛⲁⲓ |
| s-22
| ⲁⲩⲱ ⲛⲟⲉⲙⲓⲛ ⲡⲉϫⲁⲥ ⲛϩⲣⲟⲩⲑ ⲧⲉⲥϣⲉⲗⲉⲉⲧ ϫⲉⲟⲩⲁⲅⲁⲑⲟⲛ ⲛⲉ ⲡⲉ ⲧⲁϣⲉⲉⲣⲉ ϫⲉⲁⲙⲟⲟϣⲉ ⲙⲛⲛⲉϥϣⲉⲉⲣⲉ ϣⲏⲙ ϫⲉⲛⲛⲉⲩⲧⲁϩⲟ ϩⲛⲕⲉⲥⲱϣⲉ |
| s-23
| ⲁⲩⲱ ϩⲣⲟⲩⲑ ⲁⲥⲧⲱϭⲉ ⲙⲙⲟⲥ ⲉⲛϣⲉⲉⲣⲉ ϣⲏⲙ ⲛⲃⲟⲉⲥ ⲉⲧⲣⲉⲥⲕⲱⲧϥ ⲛⲙⲙⲁⲩ ϣⲁⲛⲧⲟⲩⲟⲩⲱ ⲙⲡⲱϩⲥ ⲛⲛⲉⲓⲱⲧ ⲙⲛⲛⲉⲥⲟⲩⲟ ⲁⲩⲱ ⲁⲥϩⲙⲟⲟⲥ ⲉϩⲣⲁⲓ ⲙⲛⲧⲉⲥϣⲱⲙⲉ |