s-101
| ⲉⲓⲧⲁ ⲡⲉϫⲁϥ ⲛⲧⲉϥⲥϩⲓⲙⲉ ϫⲉⲥⲟⲟⲩⲧⲛ ⲉⲃⲟⲗ ⲙⲡⲟⲩⲫⲓⲗⲟⲛⲓⲟⲛ ⲙⲛⲡⲟⲩⲣϣⲱⲛ · |
s-102
| ⲡⲡⲉⲧⲟⲩⲁⲁⲃ ⲇⲉ ⲁϥⲡⲱⲱⲛⲉ ⲛⲛϫⲃⲃⲥ ⲉⲡⲉⲥⲣϣⲱⲛ ⲁⲥϭⲱ ϩⲱⲱⲥ ⲉⲥⲁϩⲉⲣⲁⲧⲥ ϩⲁϩⲧⲏϥ ϩⲛⲧⲙⲏⲏⲧⲉ ⲙⲡⲕⲱϩⲧ ⲙⲡⲉⲥⲣⲱⲕϩ ⲟⲩⲇⲉ ⲡⲉⲥⲣϣⲱⲛ · |
s-103
| ⲡⲁⲣⲭⲏⲉⲡⲓⲥⲕⲟⲡⲟⲥ ⲇⲉ ⲡⲉϫⲁϥ ⲙⲡⲙⲉϩⲥⲡⲥⲛⲁⲩ ϫⲉⲙⲁⲣⲛϣⲗⲏⲗ ⲁⲩⲱ ⲛϫⲃⲃⲥ ⲛⲕⲱϩⲧ ⲛⲉⲩϩⲙⲡⲉⲥⲣϣⲱⲛ ⲙⲡⲉϥⲣⲱⲕϩ · |
s-104
| ⲥⲱⲧⲙ ⲛⲧⲉⲧⲛⲣϣⲡⲏⲣⲉ ⲛⲙⲙⲁⲓ ⲱ ⲛⲁⲙⲉⲣⲁⲧⲉ · |
s-105
| ⲉⲡⲉⲓⲇⲏ ⲁⲓϫⲟⲟⲥ ϫⲉⲉⲣϣⲁⲛⲡⲣⲱⲙⲉ ⲁⲁϥ ⲛⲥⲓⲟⲩⲣ ⲙⲙⲓⲛⲙⲙⲟϥ · ⲉϥⲧⲁⲓⲏⲩ ⲡⲁⲣⲁⲡⲉⲧⲟⲩⲛⲁϫⲡⲟϥ ⲉϥⲟ ⲛⲥⲓⲟⲩⲣ · |
s-106
| ⲉⲧⲃⲉⲡⲁⲓ ⲣⲱ ⲙⲡⲉⲛⲉⲓⲡⲉⲧⲟⲩⲁⲁⲃ ⲣⲱⲕϩ ϫⲉⲁⲩⲟⲩⲱϣⲙ ⲙⲡϣⲁϩ ⲙⲡⲕⲱϩⲧ ⲛⲧϩⲏⲇⲟⲛⲏ · |
s-107
| ⲉⲓⲧⲁ ϫⲉⲛⲛⲉⲛϫⲱⲱⲣⲉ ⲉⲃⲟⲗ ⲙⲡϣⲁϫⲉ ⁛— |
s-108
| ⲙⲁⲣⲛⲕⲧⲟⲛ ⲛⲧⲛϫⲱⲕ ⲉⲃⲟⲗ ⲛⲧϩⲓⲥⲧⲟⲣⲓⲁ ⲉⲩⲉⲟⲟⲩ ⲙⲡⲛⲟⲩⲧⲉ · |
s-109
| ⲛⲧⲉⲣⲟⲩϣⲗⲏⲗ ⲇⲉ ⲁⲩϩⲙⲟⲟⲥ · |
s-110
| ⲡⲉϫⲉⲛⲉⲕⲗⲏⲣⲓⲕⲟⲥ ⲙⲡⲁⲣⲭⲏⲉⲡⲓⲥⲕⲟⲡⲟⲥ ϫⲉⲧⲛⲡⲁⲣⲁⲕⲁⲗⲉⲓ ⲛⲧⲉⲕⲙⲛⲧⲡⲉⲧⲟⲩⲁⲁⲃ ⲉⲧⲣⲉⲕⲧⲁⲙⲟⲛ ϫⲉⲟⲩ ⲡⲉ ⲡⲉⲓⲧⲩⲡⲟⲥ ⲛⲧⲁⲕⲁⲁϥ ϫⲉⲁⲛⲣϣⲡⲏⲣⲉ ⲧⲏⲣⲛ ⲉϩⲣⲁⲓ ⲉϫⲙⲡϩⲱⲃ · |
s-111
| ⲛⲧⲟϥ ⲇⲉ ⲡⲉϫⲁϥ ⲛⲁⲩ ϫⲉⲥⲱⲧⲙ ⲉⲣⲟⲓ ⲛⲧⲁⲧⲁⲙⲱⲧⲛ ⲛⲧⲁⲣⲡⲁⲓ ⲅⲁⲣ ⲁⲛ · ⲉⲓϣⲓⲛⲉ ⲛⲥⲁⲟⲩⲉⲟⲟⲩ ⲛⲣⲱⲙⲉ · |
s-112
| ⲁⲛⲟⲕ ⲅⲁⲣ ϯ ϩⲛⲥⲉ ⲝ ⲛⲣⲟⲙⲡⲉ ⲙⲡϩⲟⲟⲩ · |
s-113
| ⲁⲩⲱ ⲧⲉⲥϩⲓⲙⲉ ⲉⲧⲉⲧⲛⲛⲁⲩ ⲉⲣⲟⲥ ⲧⲁϣⲛ ⲟⲩⲁ ⲧⲉ · |
s-114
| ⲁⲡⲉⲥⲉⲓⲱⲧ ⲙⲟⲩ ⲉⲧⲓ ⲉⲥⲟ ⲛⲕⲟⲩⲓ ⲉⲁⲡⲥⲟⲛ ⲙⲡⲉⲥⲉⲓⲱⲧ ⲉⲧⲉⲡⲁⲉⲓⲱⲧ ⲡⲉ ⲛⲧⲥ ⲉϩⲟⲩⲛ ϩⲁϩⲧⲏⲛ ⲉⲛⲉⲟⲩϣⲉⲉⲣⲉ ⲅⲁⲣ ⲛⲟⲩⲱⲧ ⲧⲉ ⲛⲧϩⲉ ⲛⲁⲛⲟⲕ ⲉⲁⲛⲅ ⲟⲩⲁ ϩⲱ ⲉⲁⲩⲥⲁⲛⲟⲩϣⲛ ϩⲓⲟⲩⲥⲟⲡ ϩⲛⲟⲩⲙⲁ ⲛⲟⲩⲱⲧ · |
s-115
| ⲛⲧⲉⲣⲉⲓⲣⲙⲛⲧⲏ ⲇⲉ ⲛⲣⲟⲙⲡⲉ ⲁⲛⲁⲉⲓⲟⲧⲉ ⲟⲩⲱϣ ⲉϩⲟⲧⲣⲧ ⲛⲙⲙⲁⲥ · |
s-116
| ϣⲟⲣⲡ ⲙⲉⲛ ϫⲉⲁⲛⲟⲛ ⲛⲉⲥⲛⲏⲩ ⲛⲛⲉⲛⲉⲣⲏⲩ ⲙⲛⲛⲥⲱⲥ ⲇⲉ ⲟⲛ ⲕⲁⲧⲁⲧⲙⲛⲧϣⲟⲩϣⲟ ⲙⲡⲉⲓⲕⲟⲥⲙⲟⲥ · ϫⲉⲛⲛⲉⲣⲱⲙⲉ ⲛϣⲙⲙⲟ ⲉⲓ ⲉϩⲟⲩⲛ ⲛⲙⲙⲁⲛ ⲛϥϫⲓ ⲗⲁⲁⲩ ϩⲛⲧⲉⲛⲕⲗⲏⲣⲟⲛⲟⲙⲓⲁ · |
s-117
| ⲛⲧⲉⲣⲟⲩⲣⲧⲉⲛϣⲉⲗⲉⲉⲧ ⲇⲉ ⲕⲁⲧⲁⲡⲉⲧⲡⲣⲉⲡⲉⲓ ⲛⲛⲣⲱⲙⲉ ⲁⲩⲧⲟϣⲧ ⲉⲧⲣⲁⲃⲱⲕ ⲉϩⲟⲩⲛ ϣⲁⲣⲟⲥ · |
s-118
| ⲛⲧⲉⲣⲛⲛⲕⲟⲧⲕ ⲇⲉ ⲡⲉϫⲁⲥ ⲛⲁⲓ ϫⲉⲡⲁⲥⲟⲛ ⲙⲏ ϣⲁⲣⲉⲥⲟⲛ ϫⲓⲥⲱⲛⲉ · |
s-119
| ⲁⲛⲟⲕ ⲇⲉ ⲡⲉϫⲁⲓ ⲛⲁⲥ ϫⲉⲙⲙⲟⲛ · |
s-120
| ⲛⲧⲟⲥ ⲇⲉ ⲡⲉϫⲁⲥ ⲛⲁⲓ ϫⲉⲉⲧⲃⲉⲟⲩ ⲁⲩⲧⲁⲁⲛ ⲛⲛⲉⲛⲉⲣⲏⲩ ⲙⲏ ⲁⲛⲅⲧⲉⲕⲥⲱⲛⲉ ⲁⲛ · |
s-121
| ⲁⲛⲟⲕ ⲇⲉ ⲡⲉϫⲁⲓ ⲛⲁⲥ ϫⲉⲉⲣϣⲁⲛⲥⲱⲧⲙ ⲛⲥⲱⲓ ⲧⲁⲥⲱⲛⲉ · ⲧⲛⲛⲁϣⲱⲡⲉ ϩⲙⲡⲙⲁ ⲉⲧⲉⲙⲉⲩⲡⲟⲣϫⲛ ⲉⲛⲉⲛⲉⲣⲏⲩ ⲛϩⲏⲧϥ ϣⲁⲉⲛⲉϩ · |
s-122
| ⲁⲗⲗⲁ ⲉⲓϣⲁⲛϫⲓⲧⲉ ϩⲙⲡⲉⲓⲙⲁ · ⲥⲉⲛⲁⲡⲟⲣϫⲧ ⲉⲣⲟ ⲁⲩⲱ ⲛⲥⲉⲡⲟⲣϫⲉ ⲉⲣⲟⲓ ϩⲓⲧⲙⲡⲙⲟⲩ · |
s-123
| ⲉϣⲱⲡⲉ ⲇⲉ ϩⲱⲱϥ ⲉⲛϣⲁⲛϩⲁⲣⲉϩ ⲉⲡⲉⲛⲥⲱⲙⲁ ⲉⲩⲟⲩⲁⲁⲃ ϩⲙⲡⲧⲃⲃⲟ ⲧⲛⲛⲁⲥⲛⲛⲉⲛⲉⲣⲏⲩ ⲉⲃⲟⲗ ⲁⲛ ϩⲛⲧϩⲓⲉⲣⲟⲩⲥⲁⲗⲏⲙ ⲛⲧⲡⲉ · |
s-124
| ⲛⲧⲉⲣⲉⲥⲥⲱⲧⲙ ⲇⲉ ⲉⲛⲉⲓϣⲁϫⲉ ⲉⲃⲟⲗ ϩⲓⲧⲟⲟⲧ ⲁⲛⲥⲙⲛⲧⲥ ⲙⲛⲛⲉⲛⲉⲣⲏⲩ ⲉⲧⲣⲉⲛϩⲁⲣⲉϩ ⲉⲛⲉⲛⲥⲱⲙⲁ ⲉⲩⲟ ⲛⲁⲧⲧⲱⲗⲙ · |
s-125
| ⲛⲁⲉⲓⲟⲧⲉ ⲇⲉ ⲙⲡⲟⲩⲉⲓⲙⲉ ⲉⲡϣⲁϫⲉ · |
s-126
| ⲁⲗⲗⲁ ϣⲁⲩϫⲟⲟⲥ ⲛⲛⲣⲱⲙⲉ ⲉⲧϩⲛⲡⲛⲩⲙⲫⲱⲛ ⲉⲧⲣⲉⲩⲉⲓⲛⲉ ⲙⲡⲉⲥⲙⲟⲧ ⲛⲧⲙⲛⲧⲣⲟⲟⲩⲛⲉ ⲛⲧϣⲉⲗⲉⲉⲧ ⲕⲁⲧⲁⲧϩⲉ ⲧⲉⲧⲛⲥⲟⲟⲩⲛ ⲉⲛⲉϩⲃⲏⲩⲉ ⲉϣⲁⲣⲉⲛⲣⲱⲙⲉ ⲁⲁⲩ · |
s-127
| ⲛⲁⲓ ⲇⲉ ϩⲱⲟⲩ ⲉⲩⲉⲡⲉⲓⲑⲉ ⲛⲛⲉⲛⲉⲓⲟⲧⲉ ϫⲉϩⲉⲛϣⲏⲣⲉ ϣⲏⲙ ⲛⲉ · |
s-128
| ϩⲓⲧⲛⲛⲉⲓϣⲁϫⲉ ⲇⲉ ⲁⲛⲉⲛⲉⲓⲟⲧⲉ ϭⲱ ⲉⲧⲙϣⲓⲛⲉ ⲛⲥⲱⲛ · |
s-129
| ⲛⲧⲉⲣⲟⲩⲙⲟⲩ ⲇⲉ ⲛϭⲓⲛⲉⲛⲉⲓⲟⲧⲉ · ⲁⲛϭⲱ ⲙⲛⲛⲉⲛⲉⲣⲏⲩ ⲉⲛⲟ ⲛⲟⲣⲫⲁⲛⲟⲥ · |
s-130
| ⲡⲉⲓϣⲟⲙⲛⲧ ϭⲉ ⲛϣⲏⲣⲉ ⲛⲧⲁⲛⲕⲁⲁⲩ ⲛⲁⲛ ⲡⲛⲟⲩⲧⲉ ⲛⲧⲁϥⲧⲟϣⲟⲩ ⲙⲛⲛⲉⲛⲉⲣⲏⲩ · |
s-131
| ⲁⲩⲱ ⲡⲉⲡⲣⲏϣ ⲛⲟⲩⲱⲧ ⲡⲉⲧϩⲟⲃⲥ ⲉⲃⲟⲗ ⲉϫⲱⲛ ⲙⲡⲉⲥⲛⲁⲩ ⲙⲛⲛⲉⲛⲉⲣⲏⲩ ⲉⲓⲙⲏⲧⲓ ⲡⲛⲁⲩ ⲉϣⲁⲣⲉⲧⲉⲥϩⲓⲙⲉ ⲡⲱⲣϫ ⲉⲃⲟⲗ ⲙⲡϩⲟⲟⲩⲧ · |
s-132
| ⲁⲩⲱ ⲡϫⲟⲉⲓⲥ ⲡⲉⲧⲥⲟⲟⲩⲛ ⲡⲁⲓ ⲉⲧⲛⲁⲕⲣⲓⲛⲉ ⲛⲛⲉⲧⲟⲛϩ ⲙⲛⲛⲉⲧⲙⲟⲟⲩⲧ · |
s-133
| ⲁⲩⲱ ⲉϥⲥⲟⲟⲩⲛ ⲛⲛⲉⲧϩⲏⲡ ⲙⲡϩⲏⲧ · ϫⲉⲛϯⲥⲟⲟⲩⲛ ⲁⲛ ϫⲉⲟⲩⲥϩⲓⲙⲉ ⲧⲉ ⲟⲩⲇⲉ ⲛⲧⲟⲥ ϩⲱⲱⲥ ⲛⲉⲥⲥⲟⲟⲩⲛ ⲁⲛ · ϫⲉⲁⲛⲅⲟⲩϩⲟⲟⲩⲧ ⲉⲓⲙⲏⲧⲓ ⲉⲡϩⲟ ⲙⲙⲁⲧⲉ ⲛⲛⲉⲛⲉⲣⲏⲩ · |
s-134
| ⲧⲕⲟⲓⲛⲟⲛⲓⲁ ⲇⲉ ⲙⲙⲁ ⲛⲛⲕⲟⲧⲕ ⲉⲡⲁⲡⲉⲓⲕⲟⲥⲙⲟⲥ · ⲛϯⲛⲥⲟⲟⲩⲛ ⲙⲙⲟⲥ ⲁⲛ ⲉⲡⲧⲏⲣϥ · |
s-135
| ⲙⲡⲛⲁⲩ ⲙⲉⲛ ⲉϣⲁⲛⲛⲕⲟⲧⲕ ⲙⲛⲛⲉⲛⲉⲣⲏⲩ ϣⲁⲛⲛⲁⲩ ⲉⲩⲍⲱⲟⲛ ⲛⲧϩⲉ ⲛⲟⲩⲁⲉⲧⲟⲥ ⲉϥϩⲏⲗ ϣⲁϥⲉⲓ ⲛϥϩⲱⲥ ⲉⲃⲟⲗ ⲉϫⲙⲡⲉⲛⲙⲁ ⲛⲛⲕⲟⲧⲕ ⲙⲡⲉⲥⲛⲁⲩ · |
s-136
| ⲁⲛⲟⲕ ⲙⲉⲛ ϣⲁϥϩⲱⲥ ⲙⲙⲟⲓ ϩⲙⲡⲉϥⲧⲛϩ ⲛⲟⲩⲛⲁⲙ · |
s-137
| ⲧⲁⲓ ⲇⲉ ϩⲱⲱⲥ ⲛϥϩⲱⲃⲥ ⲙⲙⲟⲥ ϩⲙⲡⲉϥⲧⲛϩ ⲛϩⲛϩⲃⲟⲩⲣ |