| s-2
| ⲁϥϣⲁϫⲉ ⲇⲉ ⲟⲛ ⲉⲧⲃⲉⲛⲉϣⲡⲏⲣⲉ ⲛⲧⲁⲡⲛⲟⲩⲧⲉ ⲁⲁⲩ ⲉⲃⲟⲗ ϩⲓⲧⲟⲟⲧϥ |
| s-3
| ⲁϥϣⲁϫⲉ ⲇⲉ ⲟⲛ ϩⲙⲡⲉⲓⲉⲅⲕⲱⲙⲓⲟⲛ ⲛⲟⲩⲱⲧ ⲉⲧⲃⲉⲡϩⲁⲅⲓⲟⲥ ⲙⲙⲁⲣⲧⲩⲣⲟⲥ ⲁⲩⲱ ⲙⲡⲁⲣⲑⲉⲛⲟⲥ ⲁⲡⲁ ⲡⲉⲧⲣⲟⲥ ⲡⲁⲣⲭⲏⲉⲡⲓⲥⲕⲟⲡⲟⲥ ⲛⲧⲉⲓⲡⲟⲗⲓⲥ ⲛⲟⲩⲱⲧ ⲣⲁⲕⲟⲧⲉ · |
| s-4
| ⲁⲩⲱ ⲉⲧⲃⲉⲧϩⲁⲅⲓⲁ ⲙⲙⲁⲣⲧⲩⲣⲟⲥ ⲧⲣⲙⲧⲁⲛⲧⲓⲟⲭⲓⲁ ⲧⲡⲟⲗⲓⲥ ⲙⲛⲡⲉⲥϣⲏⲣⲉ ⲥⲛⲁⲩ ⲫⲓⲗⲟⲡⲁⲧⲱⲣ ⲙⲛⲉⲩⲧⲣⲟⲡⲓⲟⲥ · |
| s-5
| ⲉⲁϥϣⲁϫⲉ ⲇⲉ ⲟⲛ ⲉⲧⲃⲉⲡⲧⲱⲃⲥ ⲛⲧⲉⲯⲩⲭⲏ ⲁⲩⲱ ⲉⲧⲃⲉⲡⲉϩⲣⲏⲧⲟⲛ ⲉⲧⲥⲏϩ ϩⲛⲓⲉⲣⲉⲙⲓⲁⲥ ⲡⲉⲡⲣⲟⲫⲏⲧⲏⲥ ϫⲉϩⲙⲡⲉϩⲟⲟⲩ ⲉⲧⲙⲙⲁⲩ ϯⲛⲁⲧⲁϩⲟ ⲉⲣⲁⲧⲥ ⲛⲟⲩⲁⲛⲁⲧⲟⲗⲏ ⲙⲙⲉ ϩⲙⲡⲏⲓ ⲛⲇⲁⲩⲉⲓⲇ |
| s-6
| ϩⲛⲟⲩⲉⲓⲣⲏⲛⲏ ⲛⲧⲉⲡⲛⲟⲩⲧⲉ ϩⲁⲙⲏⲛ · |
| s-7
| ⲡⲕⲁⲓⲣⲟⲥ ⲗⲟⲓⲡⲟⲛ ⲕⲓⲙ ⲉⲣⲟⲓ ⲉⲧⲣⲁⲕⲓⲙ ⲉⲡⲟⲣⲅⲁⲛⲟⲛ ⲙⲡⲁⲗⲁⲥ ⲉⲧϭⲟϫⲃ ⲁⲩⲱ ⲧⲁⲧⲁⲡⲣⲟ ⲛⲁⲥⲑⲉⲛⲏⲥ ⲉⲧⲣⲁϫⲟⲟⲥ ϩⲱⲱⲧ ⲙⲛⲡⲣⲉϥⲯⲁⲗⲗⲉⲓ ⲇⲁⲩⲉⲓⲇ ⲁⲩⲱ ⲡⲣⲉϥϩⲱⲥ ⲉⲡⲛⲟⲩⲧⲉ ϫⲉⲁⲕϭⲙⲡϣⲓⲛⲉ ⲙⲡⲕⲁϩ ⲁⲕⲧⲣⲉϥϯϩⲉ ⲁⲕⲧⲁϣⲉ ⲁⲁϥ ⲛⲣⲙⲙⲁⲟ · |
| s-8
| ⲁⲡⲉⲓⲉⲣⲟ ⲡⲛⲟⲩⲧⲉ ⲙⲟⲩϩ ⲙⲙⲟⲟⲩ |
| s-9
| ⲁⲕⲥⲟⲃⲧⲉ ⲛⲧⲉⲩϩⲣⲉ ϫⲉⲡⲁⲓ ⲡⲉ ⲡⲉⲛⲥⲟⲃⲧⲉ ⲛⲁⲙⲉ · |
| s-10
| ⲁϥϭⲙⲡϣⲓⲛⲉ ⲙⲡⲕⲁϩ ⲁϥⲧⲣⲉϥϯϩⲉ ⲁϥⲧⲁϣⲉ ⲁⲁϥ ⲛⲣⲙⲙⲁⲟ · |
| s-11
| ⲉϣϫⲉ ⲟⲩⲉⲩⲫⲣⲟⲥⲩⲛⲏ ⲛⲛⲣⲱⲙⲉ ⲡⲉ ⲡⲏⲣⲡ ⲛϩⲩⲗⲓⲕⲟⲥ ⲡⲁⲓ ⲉⲩϣⲁⲛⲣϩⲟⲩⲟ ⲥⲱ ⲉⲃⲟⲗ ⲛϩⲏⲧϥ ϣⲁⲩϯϩⲉ · ⲁⲩⲱ ϣⲁⲣⲉⲟⲩⲙⲛⲧϣⲛⲁ ϣⲱⲡⲉ ⲛϩⲏⲧϥ · ⲉⲓⲉ ⲟⲩⲏⲣ ⲧⲉ ⲧⲉⲩⲫⲣⲟⲥⲩⲛⲏ ⲙⲛⲡⲣⲁϣⲉ ⲛⲛⲣⲱⲙⲉ ⲛⲧⲁⲩⲥⲱ ⲉⲃⲟⲗ ϩⲛⲧⲡⲏⲅⲏ ⲙⲙⲟⲟⲩ ⲛⲱⲛϩ ⲡⲉⲭⲣⲓⲥⲧⲟⲥ · |
| s-12
| ⲉϣϫⲉ ϣⲁⲣⲉⲡⲕⲁϩ ⲉⲩⲫⲣⲁⲛⲉ ⲉⲣϣⲁⲛⲡϩⲟⲩⲟ ⲙⲡⲉ · ⲉⲓ ⲉϫⲱϥ · ⲉⲓⲉ ⲟⲩⲏⲣ ⲧⲉ ⲧⲉⲩⲫⲣⲟⲥⲩⲛⲏ ⲙⲛⲡⲣⲁϣⲉ ⲛⲛⲣⲱⲙⲉ · ⲙⲡⲛⲁⲩ ⲛⲧⲁⲡⲙⲟⲩⲓ ⲛϩⲱⲟⲩ ⲛⲛⲟⲏⲧⲟⲛ ⲉⲓ ⲉϫⲛⲧⲥⲟⲣⲧ ⲛⲛⲟⲏⲧⲏ · |
| s-13
| ⲡϩⲱⲟⲩ ⲙⲉⲛ ⲉⲧⲟⲩⲟⲛϩ ⲉⲃⲟⲗ ϣⲁϥϯ ⲛⲟⲩⲕⲁⲣⲡⲟⲥ ⲉϥⲟⲩⲟⲛϩ ⲉⲃⲟⲗ ⲥⲁⲣⲕⲓⲕⲟⲥ · |
| s-14
| ⲡϩⲱⲟⲩ ⲇⲉ ⲛⲧⲟϥ ⲙⲡⲛⲉⲩⲙⲁⲧⲓⲕⲟⲛ · ⲛⲧⲉⲣⲉϥⲉⲓ ⲉϫⲙⲡⲕⲁϩ ⲁⲛⲣⲱⲙⲉ · ϯⲕⲁⲣⲡⲟⲥ ⲙⲡⲛⲉⲩⲙⲁⲧⲓⲕⲟⲛ · |
| s-15
| ⲁϣ ϭⲉ ⲧⲉⲛⲟⲩ ⲛⲉ ⲛⲕⲁⲣⲡⲟⲥ ⲉⲧⲙⲙⲁⲩ |
| s-16
| ⲥⲱⲧⲙ ⲁⲛⲟⲕ ϯⲛⲁⲧⲁⲙⲟⲕ · |
| s-17
| ⲟⲩⲙⲟⲛⲟⲛ ⲙⲡⲣⲇⲓⲥⲧⲁⲍⲉ ⲟⲩⲇⲉ ⲙⲡⲣⲕⲣⲙⲣⲙ |
| s-18
| ⲟⲩⲉⲕⲕⲗⲏⲥⲓⲁ ⲛⲟⲩⲱⲧ ⲧⲉⲛⲧⲁⲥϣⲧⲁⲙ |
| s-19
| ⲉⲓϣⲁϫⲉ · ⲉⲧⲥⲩⲛⲁⲅⲱⲅⲏ ⲛⲛⲓⲟⲩⲇⲁⲓ |
| s-20
| ⲧⲁⲓ ⲙⲉⲛ ⲉⲓⲙⲟⲩⲧⲉ ⲉⲣⲟⲥ ⲁⲛ ϫⲉⲉⲕⲕⲗⲏⲥⲓⲁ ⲙⲡⲛⲉⲩⲙⲁⲧⲓⲕⲟⲛ ⲉⲧⲃⲉⲡⲁⲓ ⲣⲱ ⲁⲩϣⲧⲁⲙ ⲙⲙⲟⲥ · ϩⲓⲧⲙ ⲡⲉⲛⲧⲁϥⲧⲱⲟⲩⲛ ⲉⲃⲟⲗ ϩⲛⲛⲉⲧⲙⲟⲟⲩⲧ ⲁϥϩⲙⲟⲟⲥ ϩⲓⲧⲟⲩⲛⲁⲙ ⲙⲡⲉϥⲉⲓⲱⲧ ⲁϥⲣⲣⲱⲙⲉ ϩⲓⲧⲙⲡⲉϥⲟⲩⲉϩⲥⲁϩⲛⲉ · |
| s-21
| ϩⲉⲛϣⲟ ⲛϣⲟ ⲙⲛϩⲉⲛⲧⲃⲁ ⲛⲧⲃⲁ · ⲛⲉⲛⲧⲁⲩⲟⲩⲱⲛ · ⲙⲙⲟⲟⲩ ⲛⲁⲛ ϩⲓⲧⲙⲡⲉϥⲥⲛⲟϥ ⲉⲧⲟⲩⲁⲁⲃ · ⲛⲧⲁⲩⲡⲁϩⲧϥ ⲉⲃⲟⲗ ϩⲁⲣⲟⲛ ⁛— |
| s-22
| ⲛⲕⲁⲣⲡⲟⲥ ⲇⲉ ⲛⲧⲁⲓϣⲣⲡϫⲟⲟⲩ ⲛⲉ ⲛⲁⲓ · ⲧⲉⲅⲕⲣⲁⲧⲉⲓⲁ · ⲡⲧⲃⲃⲟ · ⲧⲡⲁⲣⲑⲉⲛⲓⲁ · ⲧⲙⲛⲧⲛⲁⲏⲧ · ⲧⲉⲓⲣⲏⲛⲏ · ⲧϩⲉⲗⲡⲓⲥ · ⲧⲙⲛⲧⲣⲙⲣⲁϣ · ⲧⲙⲛⲧⲥⲧⲙⲏⲧ · ⲙⲛⲛⲉⲧⲛⲏⲩ ⲙⲛⲛⲥⲁⲛⲁⲓ · |
| s-23
| ⲛⲁⲓ ⲛⲉ ⲛⲧⲁϯⲥⲱϣⲉ ⲙⲡⲛⲉⲩⲙⲁⲧⲓⲕⲟⲛ ⲧⲁⲩⲟⲟⲩ ⲉϩⲣⲁⲓ ϩⲓⲧⲙⲡϩⲱⲟⲩ ⲙⲡⲛⲉⲩⲙⲁⲧⲓⲕⲟⲛ ⲛⲧⲁϥⲉⲓ ⲉϫⲱⲥ · |
| s-24
| ⲡⲕⲁⲓⲣⲟⲥ ⲗⲟⲓⲡⲟⲛ ⲡⲉ ⲡⲁⲓ ⲉⲧⲣⲁϫⲟⲟⲥ · ⲙⲛⲡⲉⲡⲣⲟⲫⲏⲧⲏⲥ · ⲁⲩⲱ ⲡⲛⲟⲙⲟⲑⲉⲧⲏⲥ ⲙⲱⲩⲥⲏⲥ · ϫⲉⲙⲁⲣⲛϫⲱ ⲉⲡϫⲟⲉⲓⲥ ϩⲛⲟⲩⲉⲟⲟⲩ ⲅⲁⲣ ⲁϥϫⲓⲉⲟⲟⲩ ⁛— |
| s-25
| ⲉϣϫⲉ ⲁⲛⲉⲧⲙⲙⲁⲩ ⲣϣⲡⲏⲣⲉ ⲉⲩⲛⲁⲩ ⲉⲛⲉⲩϫⲁϫⲉ ⲉⲩⲙⲟⲩ ϩⲛⲧϩⲁⲗⲗⲁⲥⲁ ⲉⲓⲉ ⲉⲧⲃⲉⲟⲩ ⲛϯⲛⲁⲣϣⲡⲏⲣⲉ ⲁⲛ ⲁⲛⲟⲕ ⲉⲓⲛⲁⲩ ⲉⲡⲉⲛⲧⲁϥⲙⲟⲩ ϩⲁⲣⲟⲛ · ⲁⲩⲱ ⲁϥⲧⲱⲟⲩⲛ ϣⲁⲛⲧϥⲑⲃⲃⲓⲟ ⲙⲡϫⲁⲥⲓϩⲏⲧ ⁛— |
| s-26
| ⲁⲩⲉⲓⲥ ⲗⲟⲓⲡⲟⲛ ⲛⲧⲁⲕⲓⲙ ⲉⲡⲟⲣⲅⲁⲛⲟⲛ ⲙⲡⲁⲗⲁⲥ ⲛⲧⲁⲧⲁⲩⲟ ⲛϩⲉⲛⲕⲟⲩⲓ ⲛⲧⲁⲓⲟ · ⲉⲡⲉⲓⲡⲉⲧⲟⲩⲁⲁⲃ ⲉⲧⲛⲥⲟⲟⲩϩ ⲉϩⲟⲩⲛ ⲉⲡⲉϥⲣⲁⲛ ⲉⲧⲟⲩⲁⲁⲃ · |
| s-27
| ⲟⲩⲉⲓⲱⲧ ⲙⲙⲁⲓⲛⲉϥϣⲏⲣⲉ ⲡⲉ · |
| s-28
| ⲟⲩϣⲱⲥ ⲛⲣⲉϥⲙⲟⲟⲛⲉ ⲕⲁⲗⲱⲥ ⲡⲉ ⲉϥⲫⲟⲣⲉⲓ ⲛⲧⲥⲛⲧⲉ ⲛⲁⲣⲉⲧⲏ · ⲧⲡⲁⲣⲑⲉⲛⲓⲁ · ⲁⲩⲱ ⲡⲅⲁⲙⲟⲥ ⲛⲥⲉⲙⲛⲟⲛ · |
| s-29
| ⲁⲗⲗⲁ ⲙⲉϣⲁⲕ ⲛⲧⲉⲟⲩⲁ ϫⲟⲟⲥ ⲛⲁⲓ · ϫⲉⲙⲛϣϭⲟⲙ ⲉⲧⲣⲉⲡⲣⲱⲙⲉ ⲣⲡⲁⲣⲑⲉⲛⲟⲥ ⲙⲛⲛⲥⲁⲧⲣⲉϥϫⲓⲥϩⲓⲙⲉ · |
| s-30
| ⲙⲁⲣⲉⲡⲉⲧⲙⲙⲁⲩ ⲥⲱⲧⲙ ⲁⲛⲟⲕ ϯⲛⲁϯ ⲛⲁϥ ⲛⲟⲩⲁⲡⲟⲇⲓⲝⲓⲥ ⲉⲃⲟⲗ ϩⲛⲛⲉⲅⲣⲁⲫⲏ ⲉⲧⲟⲩⲁⲁⲃ · |
| s-31
| ⲛⲧⲁϫⲟⲟⲥ ϩⲱ ⲙⲛⲡⲉⲛⲥⲱⲧⲏⲣ ϫⲉⲟⲩⲛϩⲟⲓⲛⲉ ⲉⲁⲩⲁⲁⲩ ⲛⲥⲓⲟⲩⲣ ⲙⲙⲓⲛⲙⲙⲟⲟⲩ ⲉⲧⲃⲉⲧⲙⲛⲧⲣⲣⲟ ⲛⲙⲡⲏⲩⲉ · |
| s-32
| ⲛⲉⲥⲓⲟⲩⲣ ⲅⲁⲣ ⲉϣⲁⲩϫⲡⲟⲟⲩ ⲉⲃⲟⲗ ϩⲛϩⲏⲧⲥ ⲛⲧⲉⲩⲙⲁⲁⲩ ⲉⲩⲟ ⲛⲥⲓⲟⲩⲣ ⲡⲉⲩⲣⲁⲛ ⲙⲙⲁⲧⲉ · |
| s-33
| ⲡⲉⲥⲓⲟⲩⲣ ⲡⲉⲧⲛⲁⲁϥ ⲇⲉ ⲛⲥⲓⲟⲩⲣ ⲙⲙⲓⲛⲙⲙⲟϥ ⲛⲓⲙ ⲡⲉⲧⲛⲁϣϣⲁϫⲉ ⲉⲧⲉϥⲙⲛⲧϫⲱⲱⲣⲉ · |
| s-34
| ⲉⲛⲉⲛⲧⲁⲇⲁⲩⲉⲓⲇ ⲅⲁⲣ ⲡⲁⲧⲁⲥⲥⲉ ⲛⲅⲟⲗⲓⲁⲑ · ⲉⲣⲉⲛⲉⲥⲕⲉⲩⲉ ⲙⲡⲟⲗⲉⲙⲓⲕⲟⲛ ⲧⲟ ϩⲓⲱⲱϥ ⲛⲉⲩⲛⲁⲉⲡⲁⲓⲛⲟⲩ ⲙⲙⲟϥ ⲁⲛ ⲡⲉ ⲛϯϩⲉ ⲧⲏⲣⲥ · |
| s-35
| ⲁⲗⲗⲁ ⲛⲧⲉⲣⲉϥⲡⲁⲧⲁⲥⲥⲉ ⲙⲙⲟϥ ⲭⲱⲣⲓⲥ ϩⲟⲡⲗⲟⲛ ϩⲓⲙⲉⲣⲉϩ ⲛⲧϩⲉ ⲛⲧϩⲉ ⲛⲛⲉⲛⲧⲁⲩⲙⲟⲩ ⲧⲏⲣⲟⲩ · ⲙⲛⲛⲉⲡⲓⲛⲓⲕⲓⲟⲛ ⲉⲧⲉⲛⲉⲧϫⲣⲁⲉⲓⲧ ⲛⲉ · |
| s-36
| ⲛⲧⲉⲓϩⲉ ⲟⲛ ⲉⲣϣⲁⲛⲡⲣⲱⲙⲉ · ⲉⲧⲟⲩⲛⲁϫⲡⲟϥ ⲉϥⲟ ⲛⲥⲓⲟⲩⲣ · ⲁⲅⲱⲛⲓⲍⲉ ⲥⲉⲛⲁⲟⲡⲥ ⲉⲣⲟϥ ⲁⲛ ⲉⲩⲙⲛⲧϫⲱⲱⲣⲉ · ⲛⲧϩⲉ ⲙⲡⲉⲧⲛⲁⲁⲅⲱⲛⲓⲍⲉ ⲉⲣⲉⲛⲉϥⲙⲉⲗⲟⲥ ⲙⲙⲟϥ ⁛— |
| s-37
| ⲇⲁⲩⲉⲓⲇ ⲙⲉⲛ ⲅⲁⲣ ⲛⲧⲁϥⲡⲁⲧⲁⲥⲥⲉ ⲙⲡⲙⲟⲩⲓ ⲙⲛⲧⲁⲣⲝ ⲛⲟⲩⲥⲟⲡ ⲏ ⲥⲛⲁⲩ ⲁⲩⲱ ϣⲁϣⲟⲙⲛⲧ ⲛⲥⲟⲡ · |
| s-38
| ⲇⲏⲙⲏⲧⲣⲓⲟⲥ ⲇⲉ ⲛⲧⲟϥ ⲡⲁⲣⲭⲏⲉⲡⲓⲥⲕⲟⲡⲟⲥ ⲛⲧⲁϥⲡⲁⲧⲁⲥⲥⲉ ⲛⲛϩⲏⲇⲟⲛⲏ ⲙⲙⲏⲛⲉ ⁛— |
| s-39
| ⲡⲉⲧⲙⲓϣⲉ ⲙⲛⲛⲉⲑⲏⲣⲓⲟⲛ ⲛⲟⲩⲙⲛⲧϫⲱⲱⲣⲉ ⲁⲛ ⲡⲉ · ⲛⲧϩⲉ ⲙⲡⲉⲧⲙⲓϣⲉ ⲙⲛⲙⲡⲁⲑⲟⲥ · |
| s-40
| ⲉⲣϣⲁⲛⲛⲉⲑⲏⲣⲓⲟⲛ · ⲟⲩⲱⲙ ⲙⲡⲣⲱⲙⲉ ⲙⲉⲩϩⲉ ⲉⲣⲟϥ ⲛⲕⲉⲥⲟⲡ ⲉⲧⲣⲉϥⲙⲓϣⲉ ⲛⲙⲙⲁϥ · |
| s-41
| ⲧϩⲏⲇⲟⲛⲏ ⲇⲉ ⲛⲧⲟⲥ ⲡⲣⲱⲙⲉ ⲉⲧⲛⲁⲕⲁⲙⲁ ⲛⲁⲥ ⲛϩⲏⲧϥ ⲙⲉⲥⲗⲟ ⲉⲥⲡⲁⲧⲁⲥⲥⲉ ⲙⲙⲟϥ ⲙⲙⲏⲛⲉ ϣⲁⲛⲧⲉⲥⲧⲁⲕⲟϥ ⲛⲥⲁⲩⲝⲁⲛⲉ ⲛϩⲏⲧϥ · |
| s-42
| ⲁⲩⲱ ⲥⲉⲥⲟⲟⲩⲛ ⲙⲡⲁⲓ ⲛϭⲓⲛⲥⲟⲫⲟⲥ ⲛⲉⲅⲕⲣⲁⲧⲏⲥ ⲉⲧⲃⲉⲡⲁⲓ ⲣⲱ ⲉⲩⲡⲏⲧ ⲉⲡϫⲁⲓⲉ · |
| s-43
| ⲡⲗⲏⲛ ⲙⲁⲣⲛⲕⲧⲉⲡϣⲁϫⲉ ⲉϫⲙⲡⲉⲓⲡⲉⲧⲟⲩⲁⲁⲃ · ⲧⲉⲛⲟⲩ ⲛⲧⲛⲧⲁⲙⲱⲧⲛ ⲉⲛⲉϥⲁⲣⲉⲧⲏ ⲙⲛⲛⲉϥⲙⲛⲧϫⲱⲱⲣⲉ · |
| s-44
| ⲡⲡⲉⲧⲟⲩⲁⲁⲃ ϭⲉ ⲟⲩⲛ ⲇⲏⲙⲏⲧⲣⲓⲟⲥ ⲛⲉⲩⲉⲃⲟⲗ ⲡⲉ ϩⲛⲛⲛⲟϭ ⲙⲡⲣⲉⲥⲃⲩⲧⲉⲣⲟⲥ ⲉⲧϯⲥⲟⲉⲓⲧ ϩⲛⲧⲡⲟⲗⲓⲥ ⲣⲁⲕⲟⲧⲉ · |
| s-45
| ⲙⲛⲛⲥⲁⲧⲣⲉϥⲙⲟⲩ ⲅⲁⲣ ⲛϭⲓⲡⲡⲉⲧⲟⲩⲁⲁⲃ ⲓⲟⲩⲗⲓⲁⲛⲟⲥ ⲡⲁⲣⲭⲏⲉⲡⲓⲥⲕⲟⲡⲟⲥ ⲛⲣⲁⲕⲟⲧⲉ ⲁⲡⲉⲑⲣⲟⲛⲟⲥ ⲛⲣⲁⲕⲟⲧⲉ ⲣⲟⲩⲙⲏⲏϣⲉ ⲛϩⲟⲟⲩ ⲉϥⲕⲏ ⲉⲃⲟⲗ ⲛⲁⲧⲉⲡⲓⲥⲕⲟⲡⲟⲥ ⲙⲡⲉⲣⲱⲙⲉ ϩⲙⲟⲟⲥ ⲉϫⲙⲡⲉⲑⲣⲟⲛⲟⲥ ⲛⲧⲙⲛⲧⲁⲣⲭⲏⲉⲡⲓⲥⲕⲟⲡⲟⲥ ⲉⲃⲟⲗ ϫⲉⲡⲕⲁⲓⲣⲟⲥ ⲡⲉ ⲛⲛⲣⲣⲱⲟⲩ ⲛⲁⲛⲟⲙⲟⲥ · ⲁⲩⲱ ⲛⲣⲉϥϣⲙϣⲉⲉⲓⲇⲱⲗⲟⲛ · ⲉⲣⲉⲟⲩⲛⲟϭ ⲛⲇⲓⲱⲅⲙⲟⲥ ϩⲓϫⲛⲧⲉⲕⲕⲗⲏⲥⲓⲁ · ⲁⲩⲱ ⲛⲉⲣⲉⲡⲗⲁⲟⲥ ⲟ ⲛⲧϩⲉ ⲛⲛⲉⲓⲉⲥⲟⲟⲩ ⲉⲧⲉⲙⲛⲧⲟⲩϣⲱⲥ ⲙⲙⲁⲩ · |
| s-46
| ϩⲓⲧⲙⲡⲟⲩⲱϣ ⲟⲩⲛ ⲙⲡⲛⲟⲩⲧⲉ · ⲙⲛⲧⲉⲯⲏⲫⲟⲥ ⲙⲡⲗⲁⲟⲥ ⲧⲏⲣϥ ⲁⲩⲁⲙⲁϩⲧⲉ ⲛⲓⲱⲥⲏⲫ ⲛⲃⲣⲣⲉ · |
| s-47
| ⲉⲓϣⲁϫⲉ ⲉⲡϩⲁⲅⲓⲟⲥ ⲇⲏⲙⲏⲧⲣⲓⲟⲥ ⲁⲩⲑⲙⲥⲟϥ ⲉϫⲙⲡⲑⲣⲟⲛⲟⲥ · ⲙⲡϩⲁⲅⲓⲟⲥ ⲙⲁⲣⲕⲟⲥ ⲡⲉⲩⲁⲅⲅⲉⲗⲓⲥⲧⲏⲥ · |
| s-48
| ⲁⲗⲗⲁ ⲡⲟⲗⲗⲁⲕⲓⲥ · ⲕⲛⲁϫⲟⲟⲥ ⲛⲁⲓ ⲱ ⲡⲉⲧⲥⲱⲧⲙ ϫⲉⲉⲥⲧⲱ ⲉⲕⲧⲟⲛⲧⲛ ⲙⲡⲉⲓⲡⲉⲧⲟⲩⲁⲁⲃ ⲉⲓⲱⲥⲏⲫ ⲙⲡⲉⲕⲧⲟⲛⲧⲛ ⲛⲧⲉⲥϩⲓⲙⲉ ⲙⲡⲉⲓⲡⲉⲧⲟⲩⲁⲁⲃ ⲁⲩⲱ ⲛϩⲁⲕ ⲉⲧⲉⲥϩⲓⲙⲉ ⲛⲁⲧϣⲁⲩ ⲉⲧⲙⲙⲁⲩ · ⲛⲧⲁⲥⲫⲑⲟⲛⲉⲓ ⲉⲡⲡⲉⲧⲟⲩⲁⲁⲃ ⲓⲱⲥⲏⲫ ⲉⲓϣⲁϫⲉ ⲉⲧⲉⲥϩⲓⲙⲉ ⲛⲣⲙⲛⲕⲏⲙⲉ · |
| s-49
| ⲙⲙⲟⲛ ⲙⲙⲟⲛ ⲙⲏ ⲅⲉⲛⲟⲓⲧⲟ ⲁⲗⲗⲁ ⲕⲱ ⲛⲁⲓ ⲉⲃⲟⲗ ⲱ ⲡⲗⲁⲟⲥ · ⲙⲙⲁⲓⲡⲉⲭⲣⲓⲥⲧⲟⲥ · |
| s-50
| ⲓⲱⲥⲏⲫ ⲅⲁⲣ ⲉⲛⲉⲛⲧⲁϥⲛⲕⲟⲧⲕ ⲙⲛⲧⲣⲙⲛⲕⲏⲙⲉ ⲛⲉⲟⲩⲛⲟⲃⲉ ⲛⲁϥ ⲡⲉ · |
| s-51
| ⲟⲩⲡⲟⲣⲛⲉⲓⲁ ⲅⲁⲣ ⲧⲉⲧϥⲛⲁⲁⲥ ⲉⲧⲃⲉⲡⲁⲓ ⲣⲱ ⲁϥϩⲁⲣⲉϩ ⲉⲡⲉϥⲥⲱⲙⲁ ⲉϥⲟⲩⲁⲁⲃ ⲙⲡⲛⲟⲩⲧⲉ ⲛⲧⲁϥⲧⲁⲙⲓⲟϥ · |
| s-52
| ⲡⲡⲉⲧⲟⲩⲁⲁⲃ ⲇⲉ ⲛⲧⲟϥ ⲇⲏⲙⲏⲧⲣⲓⲟⲥ ⲉⲛⲉⲛⲧⲁϥⲛⲕⲟⲧⲕ ⲙⲛⲧⲉϥⲥϩⲓⲙⲉ · ⲛⲉⲙⲛⲛⲟⲃⲉ ⲉⲣⲟϥ ⲡⲉ ⲛⲧⲁⲩϣⲟⲛⲃⲟⲩ ⲙⲛⲛⲉⲩⲉⲣⲏⲩ ⲉⲃⲟⲗ ϩⲓⲧⲙⲡⲛⲟⲩⲧⲉ · |
| s-53
| ⲁⲗⲗⲁ ⲡⲁⲛⲧⲱⲥ ⲕⲛⲁϫⲟⲟⲥ ϫⲉⲟⲩⲉⲡⲓⲥⲕⲟⲡⲟⲥ ⲡⲉ · ⲛⲉϣϣⲉ ⲁⲛ ⲉⲣⲟϥ ⲉϫⲓⲥϩⲓⲙⲉ · |
| s-54
| ⲙⲡⲣϫⲟⲟⲥ ⲛⲧⲉⲓϩⲉ ⲱ ⲡⲥⲟⲛ · |
| s-55
| ⲕⲁⲓ ⲅⲁⲣ ⲁⲛⲕⲁⲛⲱⲛ ⲉⲧⲟⲩⲁⲁⲃ ⲛⲛⲁⲡⲟⲥⲧⲟⲗⲟⲥ ϫⲟⲟⲥ ⲛϯϩⲉ ϫⲉⲉϣⲱⲡⲉ ⲟⲩⲁⲡⲉ ⲉⲟⲩⲛⲧⲁϥ ⲥϩⲓⲙⲉ ⲙⲙⲁⲩ ϩⲁⲧϩⲏ ⲙⲡⲁⲧϥⲣⲉⲡⲓⲥⲕⲟⲡⲟⲥ · ⲙⲛⲛⲥⲱⲥ ⲉϥϣⲁⲛⲣⲉⲡⲓⲥⲕⲟⲡⲟⲥ ⲛⲛϥⲉϣⲛⲟϫⲥ ⲉⲃⲟⲗ ⲁⲗⲗⲁ ⲙⲁⲣϥϭⲱ ⲛⲙⲙⲁⲥ · |
| s-56
| ϣⲁⲣⲉⲡⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ ϫⲟⲟⲥ ϫⲉⲡⲅⲁⲙⲟⲥ ⲧⲁⲓⲏⲩ ϩⲛϩⲱⲃ ⲛⲓⲙ ⲁⲩⲱ ⲡⲙⲁ ⲛⲛⲕⲟⲧⲕ ⲧⲃⲃⲏⲩ · |
| s-57
| ⲙⲡⲟⲣⲛⲟⲥ ⲙⲛⲛⲛⲟⲉⲓⲕ ⲛⲉⲧⲉⲣⲉⲡⲛⲟⲩⲧⲉ ⲛⲁⲕⲣⲓⲛⲉ ⲙⲙⲟⲟⲩ · |
| s-58
| ⲡⲁⲓ ⲡⲉⲧⲟⲩⲁⲁⲃ ϭⲉ ⲁϥⲣⲡⲉⲧⲡⲉ ⲙⲡⲉⲛⲧⲁⲛϫⲟⲟϥ |
| s-59
| ⲛⲧⲉⲣⲟⲩⲕⲁⲑⲓⲥⲧⲁ ⲟⲩⲛ ⲙⲙⲟϥ ⲉϫⲙⲡⲉⲑⲣⲟⲛⲟⲥ ⲛⲧⲉⲡⲓⲥⲕⲟⲡⲏ ⲟⲩⲁϣ ⲙⲙⲓⲛⲉ ⲡⲉ ⲡⲁⲓ |
| s-60
| ⲙⲡⲣϯ ⲛⲁϥ |
| s-61
| ⲁⲩⲱ ϣⲁϥϫⲟⲟⲥ ⲛⲁϥ ϫⲉⲡⲁϣⲏⲣⲉ ⲃⲱⲕ ⲥⲁϩⲱⲱⲕ ⲉⲃⲟⲗ ⲛⲁϣ ⲛⲛⲟⲃⲉ ⲉⲧⲉⲕⲉⲓⲣⲉ ⲙⲙⲟϥ ⲙⲛⲛⲥⲱⲥ ⲛⲅϫⲓ ⲉⲃⲟⲗ ϩⲛⲙⲙⲩⲥⲧⲏⲣⲓⲟⲛ ⲉⲧⲟⲩⲁⲁⲃ · |
| s-62
| ⲛⲧⲉⲣⲉϥϭⲱ ⲟⲩⲛ ⲉϥⲙⲏⲛ ⲉⲃⲟⲗ ⲛⲧⲉⲓϩⲉ ⲁⲧⲡⲟⲗⲓⲥ ⲧⲏⲣⲥ ⲥⲁϩⲱⲱⲥ ⲉⲃⲟⲗ ⲛⲛⲛⲟⲃⲉ · ϩⲱⲥ ⲇⲉ ⲉⲃⲟⲗ ⲛⲛⲛⲟⲃⲉ · |
| s-63
| ϩⲱⲥ ⲇⲉ ⲉⲣϣⲁⲛⲟⲩⲁ ⲛⲁⲩ ⲉⲟⲩⲁ ⲉϥⲉⲓⲣⲉ ⲛⲟⲩⲛⲟⲃⲉ ϣⲁϥϫⲡⲓⲟϥ ϫⲉⲥⲁϩⲱⲱⲕ ⲉⲃⲟⲗ ⲙⲡⲉⲓϩⲱⲃ · ⲙⲏⲡⲟⲧⲉ ⲛⲧⲉⲡⲁⲣⲭⲏⲉⲡⲓⲥⲕⲟⲡⲟⲥ ⲇⲓⲁⲧⲣⲉⲡⲉ ⲙⲙⲟⲕ ⲉⲣⲉⲡⲗⲁⲟⲥ · ⲧⲏⲣϥ ⲑⲉⲱⲣⲉⲓ ⲙⲙⲟⲕ ⲁⲩⲱ ϣⲁⲣⲉⲡⲉⲧⲙⲙⲁⲩ ⲣϩⲟⲧⲉ ⲛϥϭⲱ · |
| s-64
| ϩⲓⲧⲛⲧⲉⲓⲁⲓⲧⲓⲁ ⲟⲩⲛϩⲁϩ ⲥⲁϩⲱⲟⲩ ⲉⲃⲟⲗ ⲉⲧⲙⲣⲛⲟⲃⲉ · |
| s-65
| ⲡⲗⲏⲛ ϣⲁⲣⲉϩⲁϩ ⲛⲣⲉϥⲧⲱϩ ϫⲟⲟⲥ ϫⲉⲙⲏ ⲙⲛⲧⲏⲡⲁⲓ ⲧⲉϥⲥϩⲓⲙⲉ ⲙⲙⲁⲩ · ⲉϥϫⲱ ⲛⲛⲉⲓϣⲁϫⲉ ⲛϯϩⲉ · |
| s-66
| ⲁⲩⲱ ⲛⲉⲩⲥⲕⲁⲛⲇⲁⲗⲓⲍⲉ ⲧⲏⲣⲟⲩ · ⲉⲣⲉⲟⲩⲕⲣⲙⲣⲙ ϣⲟⲟⲡ ⲉⲧⲃⲏⲏⲧϥ ⲉⲃⲟⲗ ϫⲉⲙⲡⲉⲣⲱⲙⲉ ϩⲙⲟⲟⲥ ⲉϫⲙⲡⲉⲑⲣⲟⲛⲟⲥ ⲛⲧⲙⲛⲧⲁⲣⲭⲏⲉⲡⲓⲥⲕⲟⲡⲟⲥ ϫⲓⲛⲙⲡϩⲁⲅⲓⲟⲥ ⲙⲁⲣⲕⲟⲥ ⲡⲉⲩⲁⲅⲅⲉⲗⲓⲥⲧⲏⲥ · ⲉⲓⲙⲏⲧⲓ ⲡⲁⲣⲑⲉⲛⲟⲥ · |
| s-67
| ⲡⲗⲏⲛ ϣⲁⲣⲉϩⲟⲓⲛⲉ ⲛⲛⲉⲧⲛⲟⲉⲓ ⲛⲛⲉⲅⲣⲁⲫⲏ ϫⲟⲟⲥ ⲛⲛⲉⲧϫⲱ ⲛⲛⲉⲓϣⲁϫⲉ ϫⲉⲡⲅⲁⲙⲟⲥ ⲧⲁⲓⲏⲩ ϩⲛϩⲱⲃ · |
| s-68
| ⲁⲩⲱ ⲡⲙⲁ ⲛⲛⲕⲟⲧⲕ ⲧⲃⲃⲏⲩ · |
| s-69
| ⲁⲩⲱ ⲡⲛⲟⲩⲧⲉ ⲡⲉⲉⲛⲧⲁϥⲥⲟⲛⲧϥ · |
| s-70
| ⲁϩⲣⲱⲧⲛ ⲉⲧⲉⲧⲛⲕⲣⲙⲣⲙ ⲉⲡⲁⲣⲭⲏⲉⲡⲓⲥⲕⲟⲡⲟⲥ · |
| s-71
| ⲡⲗⲏⲛ ⲙⲡⲟⲩⲉϣⲡⲉⲓⲑⲉ ⲙⲙⲟⲟⲩ · ⲉⲩϫⲱ ⲙⲙⲟⲥ ϫⲉⲡⲙⲉϩⲙⲛⲧⲥⲛⲟⲟⲩⲥ ⲡⲉ ⲡⲁⲓ · ⲛⲧⲁϥϩⲙⲟⲟⲥ ⲉϫⲙⲡⲉⲑⲣⲟⲛⲟⲥ ⲛⲧⲙⲛⲧⲁⲣⲭⲏⲉⲡⲓⲥⲕⲟⲡⲟⲥ ⲁⲩⲱ ⲛⲥⲁⲡⲁⲓ ⲙⲁⲩⲁϥ ⲙⲛⲧⲏⲟⲩⲟⲛ ⲥϩⲓⲙⲉ ⲙⲙⲁⲩ · |
| s-72
| ⲡⲛⲟⲩⲧⲉ ⲇⲉ ϩⲱⲱϥ ⲡⲁⲅⲁⲑⲟⲥ ⲡⲉⲧⲉⲛⲉϥⲟⲩⲱϣ ⲁⲛ ⲉⲧⲣⲉⲛⲉϥⲡⲉⲧⲟⲩⲁⲁⲃ ϭⲱ ⲉⲩϩⲏⲡ ⲁⲗⲗⲁ ⲁϥⲟⲩⲱϣ ⲉⲟⲩⲟⲛϩⲟⲩ ⲉⲃⲟⲗ ⲁⲩⲱ ⲛϥϫⲓⲉⲟⲟⲩ ⲉⲃⲟⲗ ϩⲓⲧⲟⲟⲧⲟⲩ ⲕⲁⲧⲁⲡⲉⲛⲧⲁϥϫⲟⲟϥ ϩⲙⲡⲉⲩⲁⲅⲅⲉⲗⲓⲟⲛ ϫⲉⲙⲉⲩϫⲉⲣⲉⲟⲩϩⲏⲃⲥ ⲛⲥⲉⲕⲁⲁϥ ϩⲁⲟⲩϣⲓ ⲁⲗⲗⲁ ⲉϣⲁⲩⲕⲁⲁϥ ⲉϫⲛⲧⲗⲩⲭⲛⲓⲁ ⲉⲧⲣⲉϥⲣⲟⲩⲟⲉⲓⲛ ⲉⲛⲉⲧϣⲟⲟⲡ ⲧⲏⲣⲟⲩ ϩⲙⲡⲏⲓ · |
| s-73
| ⲁⲩⲱ ⲁϥϭⲗⲡⲡϩⲱⲃ ⲉⲃⲟⲗ ⲙⲡⲁⲣⲭⲏⲉⲡⲓⲥⲕⲟⲡⲟⲥ ⲉϥⲛⲕⲟⲧⲕ ⲛⲟⲩⲟⲩϣⲏ · |
| s-74
| ⲉⲓⲥ ⲟⲩⲁⲅⲅⲉⲗⲟⲥ ⲛⲧⲉⲡⲛⲟⲩⲧⲉ ⲁϥⲟⲩⲱⲛϩ ⲛⲁϥ ⲉⲃⲟⲗ ⲡⲉϫⲁϥ ⲛⲁϥ ϫⲉⲇⲏⲙⲏⲧⲣⲓⲟⲥ ⲇⲏⲙⲏⲧⲣⲓⲟⲥ ⲙⲡⲣϣⲓⲛⲉ ⲛⲥⲁⲧⲉⲕⲛⲟϥⲣⲉ ⲙⲁⲩⲁⲁⲕ · ⲁⲗⲗⲁ ⲛⲥⲁⲡⲉⲧϩⲓⲧⲟⲩⲱⲕ · |
| s-75
| ⲟⲛ ⲁⲩⲱ ⲛⲅⲣⲡⲙⲉⲉⲩⲉ · ⲙⲡⲉⲛⲧⲁⲡϫⲟⲉⲓⲥ ϫⲟⲟϥ ϩⲙⲡⲉⲩⲁⲅⲅⲉⲗⲓⲟⲛ ϫⲉⲡϣⲱⲥ ⲉⲧⲛⲁⲛⲟⲩϥ ϣⲁϥⲕⲁⲧⲉϥⲯⲩⲭⲏ ϩⲁⲛⲉϥⲉⲥⲟⲟⲩ · |
| s-76
| ⲁϥⲟⲩⲱϣⲃ ⲛϭⲓⲡⲡⲉⲧⲟⲩⲁⲁⲃ ⲇⲏⲙⲏⲧⲣⲓⲟⲥ ⲡⲉϫⲁϥ ⲙⲡⲁⲅⲅⲉⲗⲟⲥ ϫⲉⲟⲩ ⲡⲉⲧϣⲟⲟⲡ ⲡⲁϫⲟⲉⲓⲥ ⲏ ⲟⲩⲡⲉⲧⲕⲟⲩⲉϩⲥⲁϩⲛⲉ ⲙⲙⲟϥ ⲛⲁⲓ ⲙⲏ ⲉⲕⲧⲛⲛⲟⲟⲩ ⲙⲙⲟⲓ ⲉⲩⲙⲛⲧⲙⲁⲣⲧⲩⲣⲟⲥ ϯⲥⲃⲧⲱⲧ ⲉⲡⲱϩⲧ ⲉⲃⲟⲗ ⲙⲡⲁⲥⲛⲟϥ · ϩⲁⲡⲣⲁⲛ ⲙⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · |
| s-77
| ⲡⲉϫⲉⲡⲁⲅⲅⲉⲗⲟⲥ ⲛⲁϥ ϫⲉⲥⲱⲧⲙ ⲉⲣⲟⲓ ⲱ ⲇⲏⲙⲏⲧⲣⲓⲟⲥ |
| s-78
| ⲛⲧⲁⲡⲉⲭⲣⲓⲥⲧⲟⲥ ⲣⲣⲱⲙⲉ ⲉⲃⲟⲗ ϫⲉⲉϥⲙⲉ ⲙⲙⲟⲛ · ⲁⲩⲱ ⲟⲛ ϫⲉⲉϥⲉⲧⲟⲩϫⲉ ⲡⲉϥⲗⲁⲟⲥ · |
| s-79
| ⲧⲉⲛⲟⲩ ϭⲉ ⲛⲟⲩⲇⲓⲕⲁⲓⲟⲛ ⲡⲉ ⲉⲓⲣⲉ ⲕⲥⲕⲁⲛⲇⲁⲗⲓⲍⲉ ⲙⲡⲗⲁⲟⲥ ⲛⲧⲁⲡⲛⲟⲩⲧⲉ ⲕⲁⲑⲓⲥⲧⲁ ⲙⲙⲟⲕ ⲉϫⲱϥ · |
| s-80
| ⲡⲉϫⲉ ⲡⲁⲣⲭⲏⲉⲡⲓⲥⲕⲟⲡⲟⲥ ⲙⲡⲁⲅⲅⲉⲗⲟⲥ ϫⲉⲡⲁϫⲟⲉⲓⲥ ⲙⲁⲧⲁⲙⲟⲓ ⲉⲡⲁⲛⲟⲃⲉ ⲛⲧⲁⲥⲁϩⲱⲓ ⲉⲃⲟⲗ ⲙⲙⲟϥ · |
| s-81
| ⲡⲉϫⲉⲡⲁⲅⲅⲉⲗⲟⲥ ⲛⲁϥ ϫⲉⲡⲙⲩⲥⲧⲏⲣⲓⲟⲛ ⲉⲧϩⲛⲧⲉⲕⲙⲏⲏⲧⲉ ⲙⲛⲧⲉⲕⲥϩⲓⲙⲉ ⲟⲩⲟⲛϩϥ ⲉⲃⲟⲗ ⲙⲡⲗⲁⲟⲥ ⲧⲏⲣϥ · |
| s-82
| ⲡⲉϫⲉⲇⲏⲙⲏⲧⲣⲓⲟⲥ ϫⲉϯⲥⲟⲡⲥⲡ ⲙⲙⲟⲕ ⲡⲁϫⲟⲉⲓⲥ ⲙⲁⲣⲓⲙⲟⲩ ⲙⲡⲉⲕⲙⲧⲟ ⲉⲃⲟⲗ · ⲟⲩ ⲙⲟⲛⲟⲛ ⲙⲡⲣⲧⲣⲉⲡⲁⲓ ϣⲱⲡⲉ · ⲟⲩⲇⲉ ⲙⲡⲣⲧⲣⲉⲣⲱⲙⲉ ⲉⲓⲙⲉ ⲉⲣⲟϥ · |
| s-83
| ⲡⲉϫⲉⲡⲁⲅⲅⲉⲗⲟⲥ ⲛⲁϥ ϫⲉⲕⲥⲟⲟⲩⲛ ϩⲱⲱⲕ ⲱ ⲇⲏⲙⲏⲧⲣⲓⲟⲥ ⲙⲡⲉⲧⲥⲏϩ ϫⲉⲡⲁⲧⲥⲱⲧⲙ ⲛⲁϣⲱⲡⲉ ϩⲙⲡⲧⲁⲕⲟ · |
| s-84
| ϣⲟⲣⲡⲕ ⲟⲩⲛ ⲉϩⲧⲟⲟⲩⲉ · |
| s-85
| ⲙⲛⲛⲥⲁⲧⲣⲉⲕⲕⲱ ⲧⲥⲩⲛⲁⲝⲓⲥ ⲉⲃⲟⲗ · ⲥⲱⲟⲩϩ ⲉϩⲟⲩⲛ ⲙⲡⲉⲕⲗⲏⲣⲟⲥ ⲧⲏⲣϥ ⲙⲛⲛⲉⲫⲩⲗⲟⲡⲟⲛⲟⲥ ⲛⲅⲧⲁⲙⲟⲟⲩ ⲉⲡⲙⲩⲥⲧⲏⲣⲓⲟⲛ ⲉⲧϩⲛⲧⲉⲕⲙⲏⲏⲧⲉ ⲙⲛⲧⲉⲕⲥϩⲓⲙⲉ · |
| s-86
| ⲛⲧⲉⲣⲉϥϫⲉⲛⲁⲓ ⲇⲉ ⲛⲁϥ ⲛϭⲓⲡⲁⲅⲅⲉⲗⲟⲥ ⲁϥϩⲟⲡϥ ⲉⲣⲟϥ · |
| s-87
| ϩⲧⲟⲟⲩⲉ ⲇⲉ ⲛⲧⲉⲣⲉϥϣⲱⲡⲉ ⲛⲉⲡⲉϩⲟⲟⲩ ⲡⲉ ⲛⲧⲡⲉⲛⲧⲏⲕⲟⲥⲧⲏ ⲉⲧⲟⲩⲁⲁⲃ ⲁⲡⲁⲣⲭⲏⲉⲡⲓⲥⲕⲟⲡⲟⲥ ⲉⲓⲣⲉ ⲛⲟⲩⲕⲁⲑⲟⲗⲓⲕⲏ ⲥⲩⲛⲁⲝⲓⲥ · |
| s-88
| ⲙⲡⲉϩⲟⲟⲩ ⲉⲧⲙⲙⲁⲩ ⲉⲁϥⲉⲝⲏⲅⲉⲥⲑⲁⲓ ⲉⲡⲗⲁⲟⲥ ϩⲛⲧⲉϥⲧⲁⲡⲣⲟ ⲉⲧⲟⲩⲁⲁⲃ · |
| s-89
| ⲉⲓⲧⲁ ⲙⲛⲛⲥⲁⲡϫⲓ ⲉⲃⲟⲗ ϩⲛⲙⲙⲩⲥⲧⲏⲣⲓⲟⲛ ⲉⲧⲟⲩⲁⲁⲃ ⲛϥϫⲱⲕ ⲉⲃⲟⲗ ⲛⲧⲉϥⲗⲉⲓⲧⲟⲩⲣⲅⲓⲁ · |
| s-90
| ⲁⲡⲁⲣⲭⲏⲉⲡⲓⲥⲕⲟⲡⲟⲥ ⲕⲉⲗⲉⲩⲉ ⲙⲡⲁⲣⲭⲏⲇⲓⲁⲕⲟⲛⲟⲥ ⲉⲧⲙⲕⲁⲗⲁⲁⲩ ⲉⲃⲱⲕ ϩⲙⲡⲗⲁⲟⲥ ⲧⲏⲣϥ ⲁⲗⲗⲁ ⲉⲧⲣⲉⲩⲥⲱⲟⲩϩ ⲉⲡⲥⲩⲛϩⲉⲇⲣⲓⲟⲛ ⲉϥϫⲱ ⲙⲙⲟⲥ ϫⲉⲡⲁⲣⲭⲏⲉⲡⲓⲥⲕⲟⲡⲟⲥ ⲡⲉⲧⲕⲉⲗⲉⲩⲉ ⲛⲏⲧⲛ ϫⲉⲙⲡⲣⲧⲣⲉⲗⲁⲁⲩ ⲙⲙⲱⲧⲛ ⲁⲛⲁⲭⲱⲣⲉⲓ ⲛⲁϥ ϫⲉⲟⲩⲛⲧⲁⲓ ⲟⲩϣⲁϫⲉ ⲉϫⲟⲟϥ ⲉⲣⲱⲧⲛ · |
| s-91
| ⲛⲧⲉⲣⲟⲩϩⲙⲟⲟⲥ ⲇⲉ ϩⲙⲡⲥⲩⲛϩⲉⲇⲣⲓⲟⲛ ⲁⲡⲁⲣⲭⲏⲉⲡⲓⲥⲕⲟⲡⲟⲥ ⲟⲩⲉϩⲥⲁϩⲛⲉ ⲉⲧⲣⲉⲩⲥⲱⲟⲩϩ ⲉϩⲟⲩⲛ ⲛⲟⲩⲙⲏⲏϣⲉ ⲛϣⲓ ⲁϥⲧⲣⲉⲩⲉⲓⲛⲉ ⲛⲟⲩⲕⲱϩⲧ ⲁϥϫⲉⲣⲱⲟⲩ · |
| s-92
| ⲡⲗⲁⲟⲥ ⲇⲉ ⲁϥⲣϣⲡⲏⲣⲉ ϫⲉⲟⲩ ⲡⲉ ⲡⲉⲓϩⲱⲃ · |
| s-93
| ⲉⲓⲧⲁ ⲡⲉϫⲉⲡⲁⲡⲁⲥ ϫⲉⲧⲱⲟⲩⲛ ⲛⲧⲛϣⲗⲏⲗ |
| s-94
| ⲛⲧⲉⲣⲟⲩϣⲗⲏⲗ ⲇⲉ ⲁⲩϩⲙⲟⲟⲥ · |
| s-95
| ⲡⲉϫⲁϥ ⲛⲁⲩ ⲛϭⲓⲡⲁⲡⲁⲥ ϫⲉϯⲡⲁⲣⲁⲕⲁⲗⲉⲓ ⲛⲧⲉⲧⲛⲁⲅⲁⲡⲏ ϫⲉⲕⲁⲥ ⲉⲣⲉⲧⲉⲧⲛϩⲙϩⲁⲗ ⲉⲧⲉⲧⲁⲥϩⲓⲙⲉ ⲧⲉ ⲛⲁⲉⲓ ⲉⲃⲟⲗ ⲛⲥⲁⲡⲟⲗⲁⲩⲉ ⲙⲡⲉⲧⲛⲥⲙⲟⲩ · |
| s-96
| ⲛⲧⲟⲟⲩ ⲇⲉ ⲁⲩⲣϣⲡⲏⲏⲣⲉ ⲁⲩⲱ ⲡⲉϫⲁⲩ ϫⲉϩⲱⲃ ⲛⲓⲙ ⲉⲧⲕⲛⲁⲕⲉⲗⲉⲩⲉ ⲙⲙⲟⲟⲩ ⲡⲉⲛⲉⲓⲱⲧ ⲙⲁⲣⲟⲩϣⲱⲡⲉ · |
| s-97
| ⲡⲁⲣⲭⲏⲉⲡⲓⲥⲕⲟⲡⲟⲥ ⲇⲉ ⲁϥⲙⲟⲩⲧⲉ ⲉⲟⲩⲁ ⲛⲛⲉϥϩⲙϩⲁⲗ ⲡⲉϫⲁϥ ⲛⲁϥ ϫⲉⲃⲱⲕ ⲛⲅⲙⲟⲩⲧⲉ ⲉⲧϩⲙϩⲁⲗ ⲛⲛⲉⲓⲡⲉⲧⲟⲩⲁⲁⲃ ⲉⲧⲉⲧⲁⲥϩⲓⲙⲉ ⲧⲉ · |
| s-98
| ⲧⲉⲥϩⲓⲙⲉ ⲇⲉ ⲉⲧⲟⲩⲁⲁⲃ ⲛⲧⲉⲣⲉⲥⲥⲱⲧⲙ ⲁⲥⲉⲓ ⲉⲧⲙⲏⲏⲧⲉ ⲛⲛⲉⲥⲛⲏⲩ · |
| s-99
| ⲁⲡⲁⲣⲭⲏⲉⲡⲓⲥⲕⲟⲡⲟⲥ ⲧⲱⲟⲩⲛ ⲉⲩϭⲱϣⲧ ⲛⲥⲱϥ ⲧⲏⲣⲟⲩ ⲁϥⲁϩⲉⲣⲁⲧϥ ϩⲓϫⲛⲛϫⲃⲃⲥ ⲛⲥⲁⲧⲉ ⲉⲧⲙⲟⲩϩ ⲁϥⲥⲟⲟⲩⲧⲛ ⲙⲡⲉϥⲫⲓⲗⲟⲛⲓⲟⲛ ⲉⲃⲟⲗ ⲁϥϥⲓ ⲛϩⲉⲛϫⲃⲃⲥ ⲉⲩⲙⲟⲩϩ ϩⲛⲛⲉϥϭⲓϫ ⲁϥⲛⲟϫⲟⲩ ⲉⲡⲉϥⲫⲓⲗⲟⲛⲓⲟⲛ · |
| s-100
| ⲛⲉⲥⲛⲏⲩ ⲇⲉ ⲧⲏⲣⲟⲩ ⲉⲧϩⲙⲟⲟⲥ ϩⲙⲡⲥⲩⲛϩⲉⲇⲣⲓⲟⲛ ⲁⲩⲣϣⲡⲏⲣⲉ · ⲉⲧⲃⲉⲧⲁϣⲉ ⲛⲛϫⲃⲃⲉⲥ ϫⲉⲙⲡⲉⲡⲉϥⲫⲓⲗⲟⲛⲓⲟⲛ ⲣⲱⲕϩ · |
| s-101
| ⲉⲓⲧⲁ ⲡⲉϫⲁϥ ⲛⲧⲉϥⲥϩⲓⲙⲉ ϫⲉⲥⲟⲟⲩⲧⲛ ⲉⲃⲟⲗ ⲙⲡⲟⲩⲫⲓⲗⲟⲛⲓⲟⲛ ⲙⲛⲡⲟⲩⲣϣⲱⲛ · |