| s-2
| ⲥⲙⲟⲩ ⲉⲣⲟⲛ ϩⲁⲙⲏⲛ : — |
| s-3
| ⲁⲩⲥⲟⲛ ⲛⲁⲛⲁⲭⲱⲣⲓⲧⲏⲥ ⲉⲡⲉϥⲣⲁⲛ ⲡⲉ ⲁⲡⲁ ⲡⲁⲡⲛⲟⲩⲧⲉ ⲉⲝⲏⲅⲓⲥⲑⲁⲓ · ⲉϩⲉⲛⲥⲛⲏⲩ ⲙⲙⲁⲓⲛⲟⲩⲧⲉ · |
| s-4
| ⲛⲁⲓ ⲇⲉ ⲛⲉ ⲛϣⲁϫⲉ ⲛⲧⲁϥϫⲟⲟⲩ · ϫⲉⲁⲛⲟⲕ ⲡⲥⲟⲛ ⲁⲓⲙⲉⲉⲩⲉ ⲛⲟⲩϩⲟⲟⲩ ⲉⲧⲣⲁⲃⲱⲕ ⲉϩⲟⲩⲛ ⲉⲡϫⲁⲓⲉ ⲉⲧϩⲓϩⲟⲩⲛ · ⲉⲧⲣⲁⲛⲁⲩ ϫⲉⲟⲩⲛⲥⲟⲛ ⲙⲙⲟⲛⲁⲭⲟⲥ · ⲙⲡⲁϩⲟⲩ · |
| s-5
| ⲁⲓⲙⲟⲟϣⲉ ⲇⲉ ⲛϥⲧⲟⲟⲩ ⲛϩⲟⲟⲩ ⲙⲛϥⲧⲟⲉ ⲛⲟⲩϣⲏ ⲙⲡⲓⲟⲩⲉⲙⲟⲉⲓⲕ · ⲟⲩⲇⲉ ⲙⲡⲓⲥⲉⲙⲟⲟⲩ · ⲉⲓⲙⲟⲟϣⲉ ϩⲓⲡϫⲁⲓⲉ ⲉⲧϩⲓϩⲟⲩⲛ · |
| s-6
| ϩⲣⲁⲓ ⲇⲉ ϩⲙⲡϩⲁⲏ ⲛϩⲟⲟⲩ · ⲁⲓⲉⲓ ⲉϫⲛⲟⲩⲥⲡⲏⲗⲁⲓⲟⲛ · |
| s-7
| ⲁⲩⲱ ⲛⲧⲉⲣⲓϩⲱⲛ ⲉϩⲟⲩⲛ ⲉⲣⲟϥ · ⲁⲓⲕⲱⲗϩ ⲉⲡⲣⲟ ⲛⲁⲡϣⲉ · ⲛⲟⲩⲡⲁϣⲉ ⲛϩⲟⲟⲩ · ⲁⲩⲱ ⲙⲡⲉⲗⲁⲁⲩ ⲣⲟⲩⲱ ⲛⲁⲓ · |
| s-8
| ⲁⲓⲙⲉⲉⲩⲉ ⲇⲉ ϩⲙⲡⲁϩⲏⲧ ϫⲉⲙⲛⲥⲟⲛ ⲙⲡⲉⲓⲙⲁ · |
| s-9
| ⲁⲛⲟⲕ ⲇⲉ ⲁⲓⲛⲁⲩ ⲉⲩⲥⲟⲛ · ⲉϥϩⲙⲟⲟⲥ ⲉϩⲣⲁⲓ ⲉϥⲕⲱ ⲛⲣⲱϥ · |
| s-10
| ⲁⲓⲁⲙⲁϩⲧⲉ ⲇⲉ ⲙⲡⲉϥϭⲃⲟⲓ · ⲁⲩⲱ ⲁⲡⲉϥϭⲃⲟⲓ ⲃⲱⲗ ⲉⲃⲟⲗ ϩⲛⲛⲁϭⲓϫ · ⲁϥⲣⲧϩⲉ ⲛⲛⲉⲓⲙⲓⲥⲗⲏⲥ ⲛⲕⲁϩ · |
| s-11
| ⲁⲓϭⲟⲙϭⲙ ⲉⲡⲉϥⲥⲱⲙⲁ ⲧⲏⲣϥ ⲁⲓϩⲉ ⲉⲣⲟϥ · ⲉⲁϥⲟⲩⲱ ⲉϥⲙⲟⲩ · ⲉⲣⲉⲡϩⲱⲃ ⲟⲥⲕ |
| s-12
| ⲁⲓϭⲱϣⲧ ⲇⲉ ⲁⲓⲛⲁⲩ · ⲉⲩⲕⲟⲗⲟⲃⲓⲟⲛ · ⲉϥⲁϣⲉ ⲉϩⲣⲁⲓ · |
| s-13
| ⲁⲩⲱ ⲛⲧⲉⲣⲓϭⲟⲙϭⲙ ⲉⲡⲉⲓⲕⲉⲧ ⲁϥⲃⲱⲗ ⲉⲃⲟⲗ ⲁϥⲣⲕⲁϩ · |
| s-14
| ⲁⲛⲟⲕ ⲇⲉ ⲁⲓⲁϩⲉⲣⲁⲧ ⲁⲓϣⲗⲏⲗ · ⲁⲩⲱ ⲁⲓϥⲓ ⲛⲧⲁⲥⲧⲟⲗⲏ · |
| s-15
| ⲁⲓⲥⲟⲩⲉⲗⲟⲩⲱⲗⲥ ⲉⲣⲟϥ · ⲁⲓϭⲱϫⲉ ⲛⲛⲁϭⲓϫ ϩⲙⲡⲕⲁϩ · ⲁⲓⲧⲱⲙⲥϥ · ⲁⲩⲱ ⲁⲓⲉⲓ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ · |
| s-16
| ⲁⲓⲙⲟⲟϣⲉ ⲇⲉ ⲉϩⲟⲩⲛ ϩⲛⲧⲉⲣⲏⲙⲟⲥ · ⲁⲓϭⲓⲛⲉ ⲛⲕⲉⲥⲡⲏⲗⲁⲓⲟⲛ · ⲁⲡⲁϩⲏⲧ ⲉⲓ ⲉⲣⲟⲓ ⲁⲓⲧⲱϩⲙ ⲉϩⲟⲩⲛ ⲉⲡⲣⲟ ⲁⲩⲱ ⲙⲡⲉⲗⲁⲁⲩ ⲣⲟⲩⲱ ⲛⲁⲓ · |
| s-17
| ⲁⲓⲃⲱⲕ ⲉϩⲟⲩⲛ ⲙⲡⲓϩⲉ ⲉⲣⲱⲙⲉ · ⲁⲓⲉⲓ ⲉⲃⲟⲗ ⲉⲓϫⲱ ⲙⲙⲟⲥ · ϫⲉⲡⲙⲁ ⲉⲧⲉⲣⲉⲡϩⲙϩⲁⲗ ⲙⲡⲛⲟⲩⲧⲉ ⲛϩⲏⲧϥ ϥⲛⲁϫⲡⲉⲓ ⲉⲡⲉⲓⲙⲁ · |
| s-18
| ⲁⲛⲟⲕ ⲇⲉ ⲁⲓϭⲱ ϩⲙⲡⲙⲁ ⲉⲧⲙⲙⲁⲩ · ⲉⲓϣⲗⲏⲗ ϣⲁⲛⲧⲉⲡⲉϩⲟⲟⲩ ⲡⲣⲟⲕⲟⲡⲧⲉⲓ · |
| s-19
| ⲁⲩⲱ ⲛⲉⲓⲧⲁⲩⲟ ⲡⲉ ⲛⲛⲁⲁⲡⲟⲥⲧⲏⲑⲟⲥ · |
| s-20
| ⲙⲛⲛⲥⲱⲥ ⲇⲉ ⲉⲣⲉⲡⲣⲏ ⲛⲁϩⲱⲧⲡ ⲁⲓϭⲱϣⲧ ⲁⲓⲛⲁⲩ ⲉⲩⲁⲅⲉⲗⲏ ⲛϣⲟϣ ⲉⲁⲥⲉⲓ ⲙⲡⲟⲩⲉ · ⲉⲣⲉⲡⲥⲟⲛ ⲉⲧⲙⲙⲁⲩ ϩⲛⲧⲉⲩⲙⲏⲏⲧⲉ · |
| s-21
| ⲛⲧⲉⲣϥϩⲱⲛ ⲇⲉ ⲉϩⲟⲩⲛ ⲉⲣⲟⲓ ⲛϥⲕⲏⲕⲁϩⲏⲩ ⲡⲉ · ⲁⲩⲱ ⲉⲣⲉⲡⲉϥⲃⲱ ϩⲱⲃⲥ ⲛⲧⲉϥⲁⲥⲭⲏⲙⲟⲥⲩⲛⲏ · ⲁⲩⲱ ⲉϥⲟ ⲛϩⲃⲥⲱ ⲉϥϭⲟⲟⲗⲉ ⲙⲙⲟϥ · |
| s-22
| ⲛⲧⲉⲣⲉϥⲡⲱϩ ⲉⲣⲟⲓ · ⲁϥⲣϩⲟⲧⲉ ⲉⲙⲁⲧⲉ · ⲉϥⲙⲉⲉⲩⲉ ϫⲉⲁⲛⲅⲟⲩⲡⲛⲉⲩⲙⲁ · ⲁϥⲁϩⲉⲣⲁⲧϥ ⲁϥϣⲗⲏⲗ · |
| s-23
| ⲕⲁⲓ ⲅⲁⲣ ⲁϩⲁϩ ⲙⲡⲛⲉⲩⲙⲁ ⲡⲉⲓⲣⲁⲍⲉ ⲙⲙⲟϥ · ⲕⲁⲧⲁⲧϩⲉ ⲛⲧⲁϥϫⲟⲟⲥ ⲉⲡϩⲁⲏ · |
| s-24
| ⲁⲛⲟⲕ ⲇⲉ ⲁⲓⲁⲥⲑⲉ · ϫⲉⲁϥⲣϩⲟⲧⲉ ⲁⲓⲙⲟⲟϣⲉ ⲉⲣⲟϥ |
| s-25
| ⲡⲉϫⲁⲓ ⲛⲁϥ · ϫⲉⲁϩⲣⲟⲕ ⲉⲕⲣϩⲟⲧⲉ · ⲱ ⲡϩⲙϩⲁⲗ ⲙⲡⲛⲟⲩⲧⲉ · |
| s-26
| ϭⲱϣⲧ ⲛⲅⲛⲁⲩ ⲉⲛⲁⲧⲁϭⲥⲉ · ϫⲉⲁⲛⲅⲟⲩⲣⲱⲙⲉ · ⲁⲩⲱ ⲛⲅϭⲟⲙϭⲙ ⲉⲣⲟⲓ ϫⲉⲁⲛⲅⲟⲩⲥⲁⲣⲝ ϩⲓⲥⲛⲟϥ · |
| s-27
| ⲛⲧⲟϥ ⲇⲉ ⲛⲧⲉⲣⲉϥϭⲱϣⲧ ⲉϩⲟⲩⲛ ⲉϩⲣⲁⲓ · ⲁϥⲧⲁⲩⲟ ⲙⲡⲉϣⲗⲏⲗ ⲙⲡⲉⲩⲁⲅⲅⲉⲗⲓⲟⲛ · |
| s-28
| ⲁⲛⲟⲕ ⲇⲉ ⲁⲓϭⲱⲣϣ ⲉⲣⲟϥ · ⲉⲧⲣⲉϥϫⲓⲧ ⲉⲡⲉⲥⲏⲧ ⲉⲡⲉⲥⲡⲏⲗⲁⲓⲟⲛ · |
| s-29
| ⲁϥϫⲛⲟⲓ ϫⲉⲛⲧⲁⲕⲉⲓ ⲉⲡⲉⲓⲙⲁ · ⲛⲁϣ ⲛϩⲉ · |
| s-30
| ⲁⲛⲟⲕ ⲇⲉ ⲡⲉϫⲁⲓ ϫⲉⲛⲧⲁⲓⲉⲓ ⲉⲡⲉⲓⲙⲁ · ⲉⲓⲟⲩⲉϣ ⲛⲁⲩ ⲛϩⲙϩⲁⲗ ⲙⲡⲛⲟⲩⲧⲉ · ⲉⲧϣⲟⲟⲡ ϩⲙⲡⲉⲓϫⲁⲓⲉ · ⲁⲩⲱ ⲙⲡⲉⲡⲛⲟⲩⲧⲉ · ϥⲟϭⲧ ⲙⲡⲉⲧⲓϣⲓⲛⲉ ⲛⲥⲱϥ · |
| s-31
| ⲁⲓϫⲛⲟⲩϥ ϫⲉⲛⲧⲁⲕⲉⲓ ⲉⲡⲉⲓⲙⲁ ⲛⲁϣ ⲛϩⲉ · ⲁⲩⲱ ⲉⲓⲥⲟⲩⲏⲣ · ⲛⲟⲩⲟⲉⲓϣ ϫⲓⲛⲧⲁⲕⲉⲓ ⲉⲡⲉⲓⲙⲁ · ⲁⲩⲱ ⲛⲉϣⲁⲕⲟⲩⲉⲙⲟⲩ · ⲁⲩⲱ ⲉⲧⲃⲉⲟⲩ ⲉⲕⲕⲏⲕⲁϩⲏⲩ ⲉⲙⲛϩⲃⲥⲱ ⲧⲱ ϩⲓⲱⲱⲕ · |
| s-32
| ⲛⲧⲟϥ ⲇⲉ ⲁϥⲁⲣⲭⲉⲓ ⲛϣⲁϫⲉ ⲛⲙⲙⲁⲓ ⲉϥϫⲱ ⲙⲙⲟⲥ · ϫⲉⲁⲛⲅⲟⲩⲣⲱⲙⲉ ⲙⲙⲟⲛⲁⲭⲟⲥ · ⲉⲓⲟⲩⲏϩ ϩⲛⲟⲩⲥⲟⲟⲩϩⲥ · ⲙⲙⲟⲛⲁⲭⲟⲥ ⲛⲁⲩⲏⲧ ϩⲛⲑⲏⲃⲁⲓⲥ · |
| s-33
| ⲁⲩⲙⲉⲉⲩⲉ ⲉⲓ ⲉⲡⲁϩⲏⲧ · ⲛⲧⲉⲓϩⲉ ϫⲉⲧⲱⲟⲩⲛ ⲁⲙⲟⲩ ⲉⲃⲟⲗ · ⲛⲅϭⲱϩⲙ ⲡⲉⲕⲙⲁ ⲙⲁⲩⲁⲁⲕ · ⲁⲩⲱ ⲕⲛⲁⲉⲥⲩⲭⲁⲍⲉ ⲙⲙⲟⲕ ⲛⲅⲁⲛⲁⲭⲱⲣⲉⲓ · ⲛⲅϣⲡⲛⲉⲥⲛⲏⲩ ⲉⲣⲟⲕ · ⲛⲅⲣⲙⲁⲓϣⲙⲙⲟ · ⲉⲙⲁⲧⲉ · ⲁⲩⲱ ⲕⲛⲁϭⲓⲛⲉ · ⲛⲟⲩϩⲟⲩⲟ ⲃⲉⲉⲕⲉ · ϩⲙⲡϩⲱⲃ ⲛⲛⲉⲕϭⲓϫ · |
| s-34
| ⲡⲉⲛⲧⲁⲓⲙⲉⲉⲩⲉ ⲇⲉ ⲉⲣⲟϥ ⲁⲓⲁⲁϥ · |
| s-35
| ⲁⲓⲉⲓ ⲇⲉ ⲉⲃⲟⲗ ϩⲙⲡⲁⲩⲏⲧ ⲙⲙⲟⲛⲁⲭⲟⲥ · ⲁⲓⲕⲱⲧ ⲛⲁⲓ ⲛⲟⲩⲙⲁ ⲛϣⲱⲡⲉ ⲙⲁⲩⲁⲁⲧ ⲁⲓⲟⲩⲱϩ ⲛϩⲏⲧϥ · |
| s-36
| ⲁⲩⲁⲡⲥ ⲛⲣⲱⲙⲉ · ⲉⲡⲓⲧⲁⲥⲥⲉ ⲛⲁⲓ ⲛϩⲱⲃ ⲛϭⲓϫ ϣⲁⲓⲧⲁⲁⲩ ⲙⲙⲛⲧⲛⲁ ⲛⲛϣⲙⲙⲟ · |
| s-37
| ⲡⲇⲓⲁⲃⲟⲗⲟⲥ ⲁϥⲕⲱϩ ⲙⲡⲉⲟⲩⲟⲉⲓϣ ⲉⲧⲙⲙⲁⲩ · ⲉⲡⲃⲉⲉⲕⲉ ϯϫⲡⲟ ⲙⲙⲟϥ · ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲁⲡⲉⲧⲉⲓⲣⲉ ⲙⲙⲟϥ ⲛⲛϣⲙⲙⲟ · ⲙⲛⲛⲕⲟⲟⲩⲉ · ⲉⲧⲣϭⲣⲱⲱϩ · ⲉϥⲛⲁⲩ ⲉⲧϩⲉ ⲉⲧⲓⲥⲡⲟⲩⲇⲁⲍⲉ ⲉⲡⲁϩⲱⲃ ⲛϭⲓϫ · |
| s-38
| ⲁϥⲕⲱϩ ⲉⲣⲟⲓ ⲉⲙⲁⲧⲉ · ϩⲁⲡⲉⲧⲉⲓⲣⲉ ⲙⲙⲟϥ · ⲁϥⲃⲱⲕ ⲉϩⲟⲩⲛ ⲉⲩⲥϩⲓⲙⲉ · ⲙⲙⲟⲛⲁⲭⲏ ⲉⲥⲛⲏⲩ ϣⲁⲣⲟⲓ ⲉⲁⲥⲧⲁⲥⲥⲉ ⲛⲁⲓ ⲛϩⲉⲛϩⲱⲃ ⲛϭⲓϫ · |
| s-39
| ⲁⲩⲱ ⲛⲧⲉⲣⲓⲟⲩⲱ ⲙⲙⲟⲟⲩ · ⲁⲓⲧⲁⲁⲩ ⲛⲁⲥ · |
| s-40
| ⲁⲥϫⲟⲟⲥ ⲛⲁⲓ ⲟⲛ ⲉⲧⲃⲉϩⲉⲛⲕⲟⲟⲩⲉ · ⲁⲩⲱ ⲛⲧⲉⲣⲉⲧⲥⲩⲛⲏⲑⲓⲁ ϣⲱⲡⲉ · ⲉⲧⲣⲛⲁⲡⲁⲛⲧⲁ ⲉⲛⲉⲛⲉⲣⲏⲩ · ⲁⲡϫⲁϫⲉ ⲧⲁⲁⲥ ⲉⲡⲁϩⲏⲧ · ⲉⲧⲣⲁϫⲓϩⲱⲃ ⲛϭⲓϫ ⲛⲧⲟⲟⲧⲥ · |
| s-41
| ⲛⲧⲉⲣⲉⲧⲡⲁⲣϩⲏⲥⲓⲁ ⲇⲉ ϣⲱⲡⲉ · ⲁⲛⲟⲩⲉⲙⲟⲉⲓⲕ ⲙⲛⲛⲉⲛⲉⲣⲏⲩ · |
| s-42
| ⲁⲩⲱ ⲁⲩϩⲱⲃ ⲟⲩⲱⲛϩ ⲉⲣⲟⲛ · ⲉⲡϩⲁⲉ ⲇⲉ ⲁⲛϯⲛⲁⲁⲕⲉ ⲙⲡⲙⲟⲩ ⲁⲛϫⲡⲟ · ⲛⲧⲁⲛⲟⲙⲓⲁ · |
| s-43
| ⲛⲧⲉⲣⲓϩⲉ ⲇⲉ ⲉⲃⲟⲗ ⲛⲙⲙⲁⲥ · ϩⲛⲟⲩⲙⲛⲧⲁⲧϩⲏⲧ · ⲁⲛϭⲱ ϩⲛϯⲁⲛⲟⲙⲓⲁ ⲛⲥⲟⲟⲩ ⲛⲉⲃⲟⲧ · |
| s-44
| ⲙⲛⲛⲥⲱⲥ ⲁⲓⲙⲉⲉⲩⲉ ⲉⲃⲟⲗ ϩⲙⲡⲁϩⲏⲧ · ⲉⲡⲉⲛⲧⲁⲓⲁⲁϥ ⲁⲓⲣϩⲧⲏⲓ · ⲁⲓⲣⲓⲙⲉ ⲉⲙⲁⲧⲉ ⲁⲩⲱ ⲁⲓϣⲱⲡⲉ · ϩⲛⲟⲩⲁϣⲁϩⲟⲙ |
| s-45
| ⲁⲓⲙⲉⲉⲩⲉ ⲉⲃⲟⲗ ϩⲙⲡⲁϩⲏⲧ ⲉⲡⲉⲛⲧⲁⲓⲁⲁϥ ⲁⲓⲣ ϩⲧⲏⲓ · ⲁⲓⲣⲓⲙⲉ ⲉⲙⲁⲧⲉ · ⲁⲩⲱ ⲁⲓϣⲱⲡⲉ ⲉⲓϣⲟⲟⲡ ϩⲛⲟⲩⲁϣⲁϩⲟⲙ · |
| s-46
| ⲁⲓⲙⲉⲉⲩⲉ ⲉⲃⲟⲗ ϩⲙⲡⲁϩⲏⲧ · ⲙⲁⲩⲁⲁⲧ ϫⲉⲕⲁⲛ ⲡϩⲟⲟⲩ ⲕⲁⲛ ⲣⲁⲥⲧⲉ ⲧⲛⲁⲙⲟⲩ ⲁⲩⲱ ⲥⲉⲛⲁⲕⲟⲗⲁⲍⲉ ⲙⲙⲟⲛ ϩⲛⲕⲟⲗⲁⲥⲓⲥ ⲉⲩⲛⲁϣⲧ · ⲡϭⲁϩϭϩ ⲛⲛⲟⲃϩⲉ ⲁⲩⲱ ⲡⲕⲁⲕⲉ ⲉⲧϩⲓⲃⲟⲗ · ⲡⲕⲱϩⲧ ⲛⲁⲧⲱϣⲙ · ⲙⲛⲡϥⲛⲧ ⲛⲁⲧⲛⲕⲟⲧⲕ · ⲉⲧⲟⲩⲱⲙ ⲛⲥⲁⲧⲉⲯⲩⲭⲏ · |
| s-47
| ⲧⲱⲟⲩⲛ ⲙⲁⲣⲟⲛ ⲉⲃⲟⲗ ϩⲙⲡⲉⲓⲙⲁ · |
| s-48
| ⲙⲁⲣⲟⲛ ⲉⲡϫⲁⲓⲉ · |
| s-49
| ⲁⲛⲟⲕ ⲇⲉ ⲁⲓⲣϩⲛⲁⲓ ⲙⲡⲱⲧ ⲛⲧⲟⲟⲧϥ ⲙⲡⲛⲟⲃⲉ · |
| s-50
| ⲁⲓⲧⲱⲟⲩⲛ ⲁⲓⲉⲓ ⲉⲃⲟⲗ · ⲁⲓⲃⲱⲕ ⲉϯⲉⲣⲏⲙⲓⲁ · |
| s-51
| ⲁⲩⲱ ⲁⲓⲗⲟ ϩⲁϩⲛⲁⲩ ⲛⲓⲙ · ⲛⲧⲉⲧⲉⲥϩⲓⲙⲉ ⲉⲧⲙⲙⲁⲩ · |
| s-52
| ⲁⲓϭⲓⲛⲉ ⲛϯⲡⲩⲅⲏ ⲙⲙⲟⲟⲩ ⲙⲛⲧⲉⲓⲃⲛⲛⲉ ⲙⲛⲡⲉⲓⲥⲡⲩⲗⲁⲓⲟⲛ · |
| s-53
| ϣⲁⲣⲉⲧⲉⲓⲃⲛⲛⲉ ⲧⲁⲩⲉⲙⲛⲧⲥⲛⲟⲟⲩⲥ ⲛⲗⲟⲟⲩ ⲛⲃⲛⲛⲉ · ⲕⲁⲧⲁⲣⲟⲙⲡⲉ · ⲟⲩⲗⲟⲟⲩ ⲕⲁⲧⲁⲉⲃⲟⲧ · |
| s-54
| ⲡⲉⲓⲗⲟⲟⲩ ϭⲉ ⲛⲃⲛⲛⲉ ϣⲁϥⲣⲱϣⲉ ⲉⲣⲟⲓ ⲕⲁⲧⲁⲉⲃⲟⲧ · |
| s-55
| ⲙⲛⲗⲁⲁⲩ ϭⲉ ϣⲟⲟⲡ ⲛⲁⲓ ⲟⲩⲇⲉ ϩⲃⲥⲱ · ⲟⲩⲇⲉ ⲧⲣⲟⲫⲏ ⲛⲟⲉⲓⲕ · |
| s-56
| ⲡⲁϥⲱ ⲇⲉ ⲁϥⲁⲩⲝⲁⲛⲉ · ⲁⲩⲱ ⲛⲁϩⲟⲉⲓⲧⲉ ⲁⲩⲧⲁⲕⲟ ⲉⲡⲧⲏⲣϥ · |
| s-57
| ⲁⲓϩⲱⲃⲥ ϭⲉ ⲙⲡⲙⲁ ⲉⲧⲉϣϣⲉ · ⲉϩⲟⲃⲥϥ ϩⲙⲡⲁϥⲱ · |
| s-58
| ⲁⲩⲱ ⲉⲓⲥ ⲙⲁⲁⲃⲉ ⲛⲣⲟⲙⲡⲉ · ϫⲓⲛⲧⲁⲓⲉⲓ ⲉⲡⲉⲓⲙⲁ · ⲉⲣⲉⲡⲁⲏⲣ ϯ ⲛⲁⲓ ⲛⲟⲩⲕⲣⲁⲥⲓⲥ · ⲉⲥϣⲏϣ ⲁⲩⲱ ⲙⲡⲓⲟⲩⲉⲙⲟⲉⲓⲕ ⲉⲡⲧⲏⲣϥ · |
| s-59
| ⲁⲓϫⲛⲟⲩϥ ϫⲉⲁⲣⲁ ⲧⲁⲣⲭⲏ · ⲛⲧⲁⲕⲉⲓ ⲉⲡⲉⲓⲙⲁ ⲁⲕϩⲓⲥⲉ ⲧⲱⲛⲟⲩ · |
| s-60
| ⲡⲉϫⲁϥ ⲛⲁⲓ · ϫⲉⲁϩⲉ ⲁⲓϩⲓⲥⲉ ⲧⲱⲛⲟⲩ · ⲱ ⲡⲁϣⲏⲣⲉ · ϩⲱⲥⲧⲉ ⲛⲛⲁϣⲛⲟϫⲧ · ⲉⲡⲕⲁϩ ⲉⲧⲃⲉⲡⲙⲕⲁϩ ⲛϩⲏⲧ · ϩⲱⲥⲧⲉ ⲛⲛⲁⲉϣⲛⲟϫⲧ · ⲉⲡⲕⲁϩ ⲉⲧⲃⲉⲡⲙⲕⲁϩ ⲛϩⲏⲧ · ⲉⲓⲱϣ ⲉϩⲣⲁⲓ ⲉⲡϫⲟⲉⲓⲥ ⲉⲧⲃⲉⲛⲁⲛⲟⲃⲉ ⲉⲧⲟϣ · |
| s-61
| ⲁⲓϩⲓⲥⲉ ⲇⲉ ⲟⲛ ϩⲛⲟⲩⲛⲟϭ ⲙⲙⲟⲕϩⲥ · ⲉⲧⲃⲉⲡⲉⲧⲕⲁⲥ ⲉⲧϩⲓϫⲱⲓ |
| s-62
| ⲁⲓϭⲱϣⲧ ⲇⲉ ⲁⲓⲛⲁⲩ ⲉⲩⲣⲱⲙⲉ ⲉϥϩⲁⲉⲟⲟⲩ ⲉⲙⲁⲧⲉ ⲁϥⲁϩⲉⲣⲁⲧϥ ϩⲁϩⲧⲏⲓ |
| s-63
| ⲡⲉϫⲁϥ ⲛⲁⲓ ϫⲉⲉⲕϣⲱⲛⲉ ⲉⲟⲩ · |
| s-64
| ⲁⲛⲟⲕ ⲇⲉ ⲁⲧⲁϭⲟⲙ ⲉⲓ ⲉⲣⲟⲓ ⲛⲟⲩⲕⲟⲩⲓ ⲡⲉϫⲁⲓ ⲛⲁϥ · ϫⲉⲡϫⲟⲉⲓⲥ ⲉⲓϣⲓⲛⲉ ⲉⲡⲁϩⲏⲡⲁⲣ · |
| s-65
| ⲡⲉϫⲁϥ ⲛⲁⲓ ϫⲉⲙⲁ ⲧⲥⲁⲃⲟⲓ ⲉⲡⲙⲁ ⲉⲧⲕϣⲱⲛⲉ ⲉⲣⲟϥ · |
| s-66
| ⲁⲓⲧⲥⲁⲃⲟϥ ⲇⲉ ⲉⲡⲁϩⲏⲡⲁⲣ ⲉⲧϣⲱⲛⲉ · |
| s-67
| ⲁϥⲥⲟⲃⲧⲛ ⲛⲧⲉϥϭⲓϫ ⲉⲃⲟⲗ ⲉⲣⲟⲓ ⲉⲣⲉⲛⲉϥⲧⲏⲏⲃⲉ ⲧⲁⲗⲏⲩ ⲉϫⲛⲛⲉⲩⲉⲣⲏⲩ ⲁϥⲡⲉϩⲡⲁⲥⲡⲓⲣ ⲛⲧϩⲉ ⲛⲟⲩⲥⲏϥⲉ · ⲁⲩⲱ ⲁϥⲉⲓⲛⲉ ⲉⲃⲟⲗ ⲙⲡⲁϩⲏⲡⲁⲣ ⲁϥⲧⲥⲁⲃⲟⲓ ⲉⲛⲉⲡⲗⲩⲅⲏ · ⲉⲩϩⲓⲱⲱϥ · |
| s-68
| ⲁϥϩⲟⲕⲟⲩ ⲁϥϯ ⲛⲛⲉⲩⲟⲩⲁⲙⲟⲙⲉ ⲉⲩⲧⲟⲉⲓⲥ · ⲁϥϯ ⲟⲛ ⲙⲡⲁϩⲏⲡⲁⲣ · ⲉⲡⲉϥⲙⲁ ⲛⲕⲉⲥⲟⲡ · |
| s-69
| ⲁⲩⲱ ⲁϥⲥⲗⲟϭⲗϭ ⲉϫⲙⲡⲁⲥⲱⲙⲁ ϩⲛⲛⲉϥϭⲓϫ · ⲁϥⲧⲱϭⲉ ⲙⲡⲙⲁ ⲛⲧⲁϥⲡⲁϩϥ ⲉϫⲛⲛⲉϥⲉⲣⲏⲩ · |
| s-70
| ⲡⲉϫⲁϥ ⲛⲁⲓ ϫⲉⲉⲓⲥϩⲏⲏⲧⲉ ⲁⲕⲟⲩϫⲁⲓ ⲙⲡⲣⲕⲟⲧⲕ ⲉⲣⲛⲟⲃⲉ ϫⲉⲛⲛⲉⲡⲉⲧϩⲟⲟⲩ ⲉⲡⲁⲓ ϣⲱⲡⲉ ⲙⲙⲟⲕ · ⲁⲗⲗⲁ ⲁⲣⲓϩⲙϩⲁⲗ ⲙⲡϫⲟⲉⲓⲥ · ϫⲓⲛⲧⲉⲛⲟⲩ ϣⲁⲉⲛⲉϩ · |
| s-71
| ϫⲓⲛⲡⲉϩⲟⲟⲩ ⲉⲧⲙⲙⲁⲩ ⲁⲛⲉⲧⲙⲡⲁⲥⲁ ⲛϩⲟⲩⲛ ⲧⲏⲣⲟⲩ · ⲟⲩϫⲁⲓ ⲁⲩⲱ ⲁⲓⲗⲟ ⲉⲓϣⲱⲛⲉ ⲉⲡⲁϩⲏⲡⲁⲣ · |
| s-72
| ϯϣⲟⲟⲡ ϩⲙⲡⲉⲓⲙⲁ ⲛϫⲁⲓⲉ ⲭⲱⲣⲓⲥϩⲓⲥⲉ · |
| s-73
| ⲁϥⲧⲥⲁⲃⲟⲓ ⲇⲉ ⲉⲧⲧⲟⲉⲓⲥ ⲉⲧⲉⲣⲉⲛⲟⲩⲁⲙⲟⲙⲉ ϩⲓⲱⲱⲥ · |
| s-74
| ⲁⲓⲕⲱⲣϣ ⲇⲉ ⲉⲣⲟϥ ⲉⲧⲣⲉϥⲕⲁⲁⲧ ϩⲙⲡⲉⲥⲡⲩⲗⲁⲓⲟⲛ · ⲛⲧⲁⲓⲛⲁⲩ ⲉⲣⲟϥ ⲛϣⲟⲣⲡ · |
| s-75
| ⲡⲉϫⲁϥ ⲛⲁⲓ ϫⲉⲛⲧⲕϭⲟⲙ ⲁⲛ ⲧⲉ ⲉⲧⲱⲟⲩⲛ ϩⲁⲧϩⲟⲣⲙⲏ ⲛⲛⲇⲁⲓⲙⲱⲛ ⲁⲩⲱ ⲁⲓϭⲱⲣϣ ⲉⲣⲟϥ ⲉⲧⲣⲉϥϫⲱ ⲉⲣⲟⲓ ⲙⲡⲉϥⲣⲁⲛ · |
| s-76
| ⲛⲧⲟϥ ⲇⲉ ⲡⲉϫⲁϥ ⲛⲁⲓ ϫⲉϯⲙⲟⲑⲉⲟⲥ ⲡⲉ ⲡⲣⲁⲛ |
| s-77
| ⲁⲣⲓⲡⲁⲙⲉⲉⲩⲉ ϭⲉ ⲱ ⲡⲁⲥⲟⲛ ⲙⲙⲉⲣⲓⲧ ⲛⲧⲉⲡϫⲟⲉⲓⲥ ϫⲱⲕⲧ ⲉⲃⲟⲗ ϩⲙⲡⲁⲅⲱⲛ ⲉⲧⲛⲁⲛⲟⲩϥ ⲛⲧⲁϥⲧⲁϩⲙⲉⲧ ⲉⲣⲟϥ · |
| s-78
| ⲁⲛⲟⲕ ⲇⲉ ⲁⲓⲡⲁϩⲧ ϩⲁⲛⲉϥⲟⲩⲣⲏⲏⲧⲉ ϫⲉⲉϥⲛⲁⲣⲡⲁⲙⲉⲉⲩⲉ ⲛϥⲥⲙⲟⲩ ⲉⲣⲟⲓ · |
| s-79
| ⲛⲧⲟϥ ⲇⲉ ⲁϥⲥⲙⲟⲩ ⲉⲣⲟⲓ ⲉϥϫⲱ ⲙⲙⲟⲥ ϫⲉⲉⲣⲉⲡϫⲟⲉⲓⲥ ⲥⲙⲟⲩ ⲉⲣⲟⲕ · ⲛϥⲛⲁϩⲙⲉⲕ ⲛϭⲟⲣϭⲥ ⲙⲡⲇⲓⲁⲃⲟⲗⲟⲥ ⲁⲩⲱ ⲛϥⲕⲁⲁⲕ ϩⲛⲛⲉϥϩⲓⲟⲟⲩⲉ ⲧⲏⲣⲟⲩ ⲉⲧⲛⲁⲛⲱⲟⲩ ⲛⲟⲩⲟⲉⲓϣ ⲛⲓⲙ · ⲉⲕⲡⲏⲧ ⲉⲣⲁⲧⲟⲩ ⲛⲛⲉⲧⲟⲩⲁⲁⲃ · |
| s-80
| ⲛⲧⲉⲣϥⲟⲩⲱ ⲇⲉ ⲉϥⲥⲙⲟⲩ ⲉⲣⲟⲓ ⲁⲧⲁϭⲟⲙ ⲉⲓ ⲉⲣⲟⲓ · ϩⲱⲥⲧⲉ ⲉⲧⲙⲧⲣⲁⲁⲓⲥⲑⲁⲛⲉ · ⲉⲡⲧⲏⲣϥ ϫⲉϯϩⲕⲟⲉⲓⲧ · ⲏ ϯⲟⲃⲉ · |
| s-81
| ⲛⲧⲉⲣⲓⲛⲁⲩ ⲇⲉ ⲉϯⲛⲟϭ ⲛϣⲡⲏⲣⲉ ⲛⲧⲁⲥⲧⲁϩⲟⲓ · ⲁⲓⲧⲱⲟⲩⲛ ⲁⲓⲙⲟⲟϣⲉ · ⲉϩⲟⲩⲛ ϩⲙⲡⲧⲟⲟⲩ · |
| s-82
| ⲛⲧⲉⲣⲉϥⲧⲟⲟⲩ ⲇⲉ ⲛϩⲟⲟⲩ ⲟⲩⲉⲓⲛⲉ ⲁⲓϩⲓⲥⲉ ⲁⲩⲱ ⲁⲓⲡⲱⲣϣ ⲛⲛⲁϭⲓϫ ⲉϩⲣⲁⲓ ⲉⲧⲡⲉ · |
| s-83
| ⲁⲓϣⲗⲏⲗ · ⲁⲩⲱ ⲉⲓⲥ ⲡⲣⲱⲙⲉ ⲛⲧⲁϥⲉⲓ ϣⲁⲣⲟⲓ ⲛϣⲟⲣⲡ · |
| s-84
| ⲁϥⲉⲓ ϣⲁⲣⲟⲓ ⲟⲛ ⲁϥϯϭⲟⲙ ⲛⲁⲓ ⲛⲧϩⲉ ⲛⲧⲉϩⲟⲩⲉⲓⲧⲉ · |
| s-85
| ϩⲁⲡⲗⲱⲥ ⲁⲡⲙⲉϩϥⲧⲟⲟⲩ · ⲛϩⲟⲟⲩ ⲟⲩⲉⲓⲛⲉ · ⲉⲓⲙⲟⲟϣⲉ ⲉϩⲟⲩⲛ |
| s-86
| ⲛⲧⲉⲩⲛⲟⲩ ⲇⲉ · ⲁⲓϭⲱϣⲧ ⲁⲓⲛⲁⲩ ⲉⲩⲣⲱⲙⲉ · ⲙⲡⲟⲩⲉ ⲉϥⲟ ⲛϩⲟⲧⲉ ⲉⲙⲁⲧⲉ · ⲉⲣⲉⲡⲉϥϥⲱ ⲡⲟⲣϣ ⲉⲃⲟⲗ · ⲉϫⲙⲡⲉϥⲥⲱⲙⲁ · ⲛⲧϩⲉ ⲙⲡⲁⲛⲉⲓⲡⲁⲣⲧⲁⲗⲏⲥ · ⲛϥⲕⲏⲕⲁϩⲏⲩ ⲅⲁⲣ ⲡⲉ · ⲉⲣⲉϩⲉⲛϭⲱⲱⲃⲉ ϩⲱⲃⲥ ⲙⲡⲉϥⲥⲙⲟⲧ ⲛϩⲟⲟⲩⲧ · |
| s-87
| ⲛⲧⲉⲣⲉϥϩⲱⲛ ⲉϩⲟⲩⲛ ⲉⲣⲟⲓ ⲁⲓⲣϩⲟⲧⲉ · |
| s-88
| ⲁⲓⲁⲗⲉ ⲉϩⲣⲁⲓ ⲉϫⲛⲟⲩⲕⲱϩ ⲛⲧⲟⲟⲩ · ϫⲉⲙⲉϣⲁⲕ ⲟⲩⲉⲓⲁ ⲛⲧⲟⲟⲩ ⲡⲉ · |
| s-89
| ⲛⲧⲉⲣⲉϥⲉⲓ ⲇⲉ ⲁϥⲛⲟϫϥ ⲛⲟⲩⲕⲟⲩⲓ · ϩⲁⲧϩⲁⲓⲃⲉⲥ ⲛⲟⲩⲕⲱϩ ⲛⲧⲟⲟⲩ · ⲛϥⲑⲗⲓⲃⲉ ⲉⲙⲁⲧⲉ ⲉⲧⲃⲉⲛϩⲓⲥⲉ ⲉⲧϥϣⲟⲟⲡ ⲛϩⲏⲧⲟⲩ · ⲡⲉϩⲕⲟ · ⲙⲛⲡⲉⲓⲃⲉ · ⲛϥⲕⲓⲛⲇⲩⲛⲉⲩⲉ ⲉⲙⲁⲧⲉ · |
| s-90
| ⲁϥϥⲓ ⲇⲉ ⲛⲛⲉϥⲃⲁⲗ ⲉϩⲣⲁⲓ ⲉⲡⲕⲟⲟϩ · ⲛⲧⲟⲟⲩ · ⲁϥⲛⲁⲩ ⲉⲣⲟⲓ · ⲁϥⲙⲟⲩⲧⲉ ϫⲉⲁⲙⲟⲩ ⲉⲡⲉⲥⲏⲧ ϣⲁⲣⲟⲓ ⲡⲣⲱⲙⲉ ⲉⲧⲟⲩⲁⲁⲃ · |
| s-91
| ⲁⲛⲟⲕ ⲇⲉ ϩⲱ ⲁⲛⲅⲟⲩⲣⲙⲛⲧⲟⲟⲩ ⲛⲧⲉⲕϩⲉ · ⲉⲓϣⲟⲟⲡ ϩⲙⲡⲉⲓϫⲁⲓⲉ · ⲉⲧⲃⲉⲛⲁⲛⲟⲃⲉ · |
| s-92
| ⲛⲧⲟϥ ⲇⲉ ⲡⲉϫⲁϥ ⲛⲁⲓ ϫⲉⲛⲧⲕⲟⲩϣⲃⲏⲣ · ϩⲱⲱⲕ ⲟⲛ ⲛⲧⲉⲡⲛⲟⲩⲧⲉ · |
| s-93
| ⲁⲓϩⲙⲟⲟⲥ ⲟⲛ ⲙⲡⲉϥⲙⲧⲟ ⲉⲃⲟⲗ · ⲁⲩⲱ ⲁⲓⲡⲁⲣⲁⲕⲁⲗⲉⲓ ⲙⲙⲟϥ · ⲉⲧⲣⲉϥϫⲱ ⲉⲣⲟⲓ ⲙⲡⲉϥⲣⲁⲛ · |
| s-94
| ⲛⲧⲟϥ ⲇⲉ ⲡⲉϫⲁϥ ⲛⲁⲓ ϫⲉⲟⲛⲛⲟⲫⲣⲓⲟⲥ ⲡⲉ ⲡⲁⲣⲁⲛ · ⲁⲩⲱ ⲉⲓⲥ ⲥⲉ ⲛⲣⲟⲙⲡⲉ ϯϣⲟⲟⲡ ϩⲛϯⲉⲣⲏⲙⲓⲁ · ⲉⲓⲙⲟⲟϣⲉ ϩⲛⲛⲧⲟⲟⲩ ⲛⲧϩⲉ ⲛⲛⲉⲑⲏⲣⲓⲟⲛ · ⲁⲩⲱ ⲙⲡⲓⲛⲁⲩ ⲉⲣⲱⲙⲉ ⲉⲓⲥⲟⲟⲩⲛ ⲙⲙⲟϥ · |
| s-95
| ⲉⲓϣⲟⲟⲡ ⲇⲉ ϩⲛⲟⲩⲥⲟⲟⲩϩⲥ ⲙⲙⲟⲛⲁⲭⲟⲥ ϩⲙⲡⲧⲟⲟⲩ ⲛϣⲙⲟⲩⲛ ⲛⲧⲉⲑⲏⲃⲁⲓⲥ · |
| s-96
| ⲡⲣⲁⲛ ⲇⲉ ⲛⲧϩⲉⲛⲉⲉⲧⲉ ⲉⲧⲙⲙⲁⲁⲩ ⲡⲉ ⲉⲣⲏⲧⲉ · |
| s-97
| ⲉⲛⲟ ⲛⲟⲩϩⲏⲧ ⲛⲟⲩⲱⲧ ⲙⲛⲛⲉⲛⲉⲣⲏⲩ ϩⲓⲟⲩⲥⲟⲡ · ⲉⲣⲉⲧⲉⲓⲣⲏⲛⲏ ϣⲟⲟⲡ ϩⲛⲧⲉⲛⲙⲏⲏⲧⲉ · ⲉⲛϣⲟⲟⲡ ϩⲛⲟⲩⲉⲥⲩⲭⲓⲁ ⲙⲛⲛⲉⲛⲉⲣⲏⲩ · ⲉⲛϯⲉⲟⲟⲩ ⲙⲡⲛⲟⲩⲧⲉ · |
| s-98
| ⲁⲛⲟⲕ ⲇⲉ ⲛⲉⲓⲟ ⲛⲟⲩϣⲏ ⲛⲣⲟⲉⲓⲥ ⲛⲙⲙⲁⲩ · ⲉⲓϫⲓⲥⲃⲱ ⲛⲕⲱⲧ ⲙⲡⲛⲟⲩⲧⲉ ⲉⲃⲟⲗ ϩⲓⲧⲟⲟⲧⲟⲩ · ⲛϩⲉⲛⲛⲟϭ ⲛⲧⲉⲗⲓⲟⲥ · ⲛⲉ ⲛⲧϩⲉ ⲛⲛⲁⲅⲅⲉⲗⲟⲥ ⲙⲡϫⲟⲉⲓⲥ · |
| s-99
| ⲁⲓⲥⲱⲧⲙ ⲉⲩϣⲁϫⲉ ⲉⲧⲃⲉⲡⲉⲛⲉⲓⲱⲧ ϩⲏⲗⲓⲁⲥ ⲡⲉⲑⲉⲥⲃⲓⲧⲏⲥ · ϫⲉⲛⲧⲁϥϭⲙϭⲟⲙ ϩⲙⲡⲛⲟⲩⲧⲉ ⲛϯϩⲉ ⲧⲏⲣⲥ · ⲉϥϣⲟⲟⲡ ϩⲙⲡⲉⲓϫⲁⲓⲉ · |
| s-100
| ⲁⲩⲱ ⲓⲱϩⲁⲛⲛⲏⲥ ⲡⲃⲁⲡϯⲥⲧⲏⲥ · ⲡⲉⲧⲉⲙⲡϥⲧⲱⲟⲩⲛ ϩⲙⲡⲉϫⲡⲟ ⲛⲛⲉϩⲓⲟⲟⲙⲉ · ⲛϭⲓⲡⲉⲧⲟ ⲛⲛⲟϭ ⲉⲣⲟϥ · ⲉϥϣⲟⲟⲡ ϩⲛⲛϫⲁⲓⲉ · ϣⲁⲡⲉϩⲟⲟⲩ ⲙⲡⲉϥⲟⲩⲱⲛϩ ⲉⲃⲟⲗ ϩⲙⲡⲓⲥⲣⲁⲏⲗ · |
| s-101
| ⲡⲉϫⲁⲓ ⲛⲁⲩ ϫⲉⲛⲁⲉⲓⲟⲟⲧⲉ · ⲟⲩⲕ ⲟⲩⲛ ⲛⲉⲧϩⲙⲡϫⲁⲓⲉ · ⲥⲉⲥⲟⲧⲡ ⲛϩⲟⲩⲟ ⲉⲣⲟⲛ · |