| s-2
| ⲛⲉⲣⲉⲡⲙⲁⲕⲁⲣⲓⲟⲥ ⲓⲱϩⲁⲛⲛⲏⲥ ϩⲛⲉⲫⲉⲥⲟⲥ ⲙⲛⲛⲉⲥⲛⲏⲩ · ⲉϥⲧⲉⲗⲏⲗ ϩⲙⲡϫⲟⲉⲓⲥ · |
| s-3
| ⲙⲡⲉϩⲟⲟⲩ ⲇⲉ ⲛⲧⲕⲩⲣⲓⲁⲕⲏ · ⲛⲉⲣⲉⲛⲉⲥⲛⲏⲩ ⲧⲏⲣⲟⲩ ⲥⲟⲟⲩϩ ⲉⲛⲉⲩⲉⲣⲏⲩ · |
| s-4
| ⲁⲓⲱϩⲁⲛⲛⲏⲥ ⲁⲣⲭⲉⲓ ⲛϣⲁϫⲉ ⲛⲙⲙⲁⲩ ⲉϥϫⲱ ⲙⲙⲟⲥ · ϫⲉⲛⲁⲥⲛⲏⲩ · ⲁⲩⲱ ⲛⲁϣⲃⲣⲕⲗⲏⲣⲟⲛⲟⲙⲟⲥ · ⲁⲩⲱ ⲛⲥⲩⲙⲙⲉⲧⲟⲭⲟⲥ ⲙⲡⲉⲭⲣⲓⲥⲧⲟⲥ ⲓⲏⲥⲟⲩⲥ ⲡⲉⲛϫⲟⲉⲓⲥ · ⲉⲓⲙⲉ ϭⲉ ⲛⲏⲧⲛ ϫⲉⲁⲡϫⲟⲉⲓⲥ ϯ ⲛⲏⲧⲛ ⲛⲟⲩϭⲟⲙ ⲉⲃⲟⲗ ϩⲓⲧⲟⲟⲧϥ |
| s-5
| ⲟⲩⲏⲣ ⲛϭⲟⲙ ϩⲓϣⲡⲏⲣⲉ · ϩⲓⲭⲁⲣⲓⲥⲙⲁ · |
| s-6
| ⲁϥⲁⲁⲩ ⲛⲏⲧⲛ · ⲁⲩⲱ ⲧⲉⲧⲛⲥⲟⲟⲩⲛ ϫⲉⲁϣ ⲛⲉ ⲛⲉⲥⲃⲟⲟⲩⲉ ⲙⲛⲛⲉⲣϩⲙⲙⲉ · ⲁⲩⲱ ⲛⲙⲧⲟⲛ ⲙⲛⲧⲇⲓⲁⲕⲟⲛⲓⲁ · ⲙⲛⲛⲉϩⲙⲟⲧ ⲙⲛⲛⲇⲱⲣⲉⲁ · ⲙⲛⲛⲕⲟⲟⲩⲉ ⲧⲏⲣⲟⲩ · |
| s-7
| ⲛⲧⲁⲧⲉⲧⲛⲛⲁⲩ ⲉⲣⲟⲟⲩ ϩⲛⲛⲉⲧⲛⲃⲁⲗ · |
| s-8
| ⲉⲩϯ ⲙⲙⲟⲟⲩ ⲛⲏⲧⲛ ⲉⲃⲟⲗ ϩⲓⲧⲟⲟⲧϥ ⲙⲡⲉⲛⲥⲁϩ · |
| s-9
| ⲛⲉϥⲟⲩⲱⲛϩ ⲉⲣⲱⲧⲛ ⲁⲛ ϩⲛⲛⲃⲁⲗ ⲙⲡⲥⲱⲙⲁ · ⲟⲩⲇⲉ ⲛⲉⲧⲉⲧⲛⲥⲱⲧⲙ ⲉⲣⲟϥ ⲁⲛ ϩⲛⲙⲙⲁⲁϫⲉ ⲙⲡⲥⲱⲙⲁ · ⲁⲗⲗⲁ ⲉϥⲟⲩⲱⲛϩ ⲙⲙⲟϥ ⲉⲣⲱⲧⲛ ϩⲙⲡⲥⲟⲟⲩⲧⲛ ⲙⲡⲉⲧⲛϩⲏⲧ · ϩⲛⲟⲩϩⲟⲣⲟⲙⲁ ϩⲛϩⲃⲏⲩⲉ ⲉⲩⲟⲩⲁⲁⲃ · |
| s-10
| ⲧⲁϫⲣⲉⲧⲏⲩⲧⲛ ϭⲉ ϩⲣⲁⲓ ⲛϩⲏⲧϥ · ⲉⲧⲉⲧⲛⲉⲓⲣⲉ ⲙⲡⲉϥⲙⲉⲉⲩⲉ ⲛⲟⲩⲟⲉⲓϣ ⲛⲓⲙ · ⲉⲧⲉⲧⲛⲉⲓⲣⲉ ⲟⲛ ⲙⲡⲙⲉⲉⲩⲉ ⲙⲡⲙⲩⲥⲧⲏⲣⲓⲟⲛ · ⲙⲛⲧⲕⲟⲓⲛⲱⲛⲓⲁ ⲛⲧⲁⲥϣⲱⲡⲉ ⲉϩⲟⲩⲛ ⲉⲣⲱⲧⲛ · |
| s-11
| ⲁⲡⲉⲛϫⲟⲉⲓⲥ ϫⲟⲕⲟⲩ ⲉⲃⲟⲗ · |
| s-12
| ⲧⲉⲛⲟⲩ ϭⲉ ⲱ ⲛⲉⲥⲛⲏⲩ · ϥⲥⲟⲡⲥ ⲙⲙⲱⲧⲛ ⲉⲃⲟⲗ ϩⲓⲧⲟⲟⲧϥ · ⲁⲩⲱ ϥⲡⲁⲣⲁⲕⲁⲗⲉⲓ ⲙⲙⲱⲧⲛ · ⲉϥⲟⲩⲱϣ · ⲉⲧⲣⲉⲧⲉⲧⲛϭⲱ ⲛⲟⲩⲉϣ ⲛⲗⲩⲡⲉⲓ ⲙⲙⲟϥ · ⲏ ⲉⲥⲟϣϥ · ⲏ ⲉⲉⲡⲓⲃⲟⲩⲗⲉⲩⲉ ⲉⲣⲟϥ · |
| s-13
| ϥⲥⲟⲟⲩⲛ ⲅⲁⲣ ⲙⲡⲥⲱϣ ⲉⲧϣⲟⲟⲡ ⲉⲃⲟⲗ ϩⲓⲧⲛⲧⲏⲩⲧⲛ · |
| s-14
| ϥⲉⲓⲙⲉ ⲇⲉ ⲟⲛ ⲉⲡⲧϭⲁⲉⲓⲟ ⲁⲩⲱ ϥⲥⲟⲟⲩⲛ ⲉⲧⲉⲡⲓⲃⲟⲩⲗⲏ ⲙⲛⲧⲕⲟⲗⲁⲥⲓⲥ ⲉⲧⲉⲧⲛⲕⲟⲗⲁⲍⲉ ⲙⲙⲟϥ ⲛϩⲏⲧⲥ · |
| s-15
| ϩⲟⲧⲁⲛ ⲉⲧⲉⲧⲛϣⲁⲛⲥⲱⲧⲙ ⲛⲥⲁⲛⲉϥⲉⲛⲧⲟⲗⲏ · ⲉⲧⲟⲩⲁⲁⲃ ϥⲛⲁⲛⲁ ⲛⲏⲧⲛ ϩⲱⲧⲧⲏⲩⲧⲛ · |
| s-16
| ⲙⲡⲣⲧⲣⲉⲡⲁⲅⲁⲑⲟⲥ ⲛⲛⲟⲩⲧⲉ ⲗⲩⲡⲉⲓ ⲉⲧⲃⲉⲧⲏⲩⲧⲛ · ⲡⲛⲁⲏⲧ ⲛϣⲁⲛϩⲧⲏϥ · ⲡⲁⲧⲧⲱⲗⲙ · ⲡⲁⲧϫⲃⲓⲛ · ⲡⲁⲧⲧⲁϩⲟϥ · ⲡⲟⲩⲁ ⲙⲁⲩⲁⲁϥ · ⲡⲁⲧⲡⲱⲱⲛⲉ · ⲡⲁⲧⲕⲣⲟϥ · ⲡⲁⲧϭⲱⲛⲧ · ⲡⲣⲁⲛ ⲉⲧϩⲓϫⲛⲣⲁⲛ ⲛⲓⲙ · ⲉϣⲁⲩⲛⲟⲉⲓ ⲙⲙⲟϥ · |
| s-17
| ⲙⲁⲣⲉϥⲉⲩⲫⲣⲁⲛⲉ ⲛⲙⲙⲏⲧⲛ ⲉⲧⲉⲧⲛⲡⲟⲗⲓⲧⲉⲩⲉ ⲛⲁϥ ⲕⲁⲗⲱⲥ · |
| s-18
| ⲙⲁⲣⲉϥⲣⲁϣⲉ ⲛⲙⲙⲏⲧⲛ · ⲉⲧⲉⲧⲛⲟⲛϩ · ϩⲛⲟⲩⲟⲩⲣⲟⲧ · ⲙⲛⲟⲩⲟⲡ · |
| s-19
| ⲙⲁⲣⲉϥⲙⲧⲟⲛ ⲙⲙⲟϥ ⲛϩⲏⲧⲧⲏⲩⲧⲛ ⲉⲧⲉⲧⲛⲁⲛⲁⲥⲧⲣⲉⲫⲉ ϩⲛⲟⲩⲙⲛⲧⲥⲉⲙⲛⲟⲥ · |
| s-20
| ⲙⲁⲣⲉϥⲣⲁⲧⲣⲟⲟⲩϣ · ⲉⲧⲉⲧⲛⲟⲛϩ · ϩⲛⲟⲩⲉⲅⲕⲣⲁⲧⲓⲁ · |
| s-21
| ⲙⲁⲣⲉϥⲟⲩⲛⲟϥ ⲉⲧⲉⲧⲛⲕⲟⲓⲛⲱⲛⲉⲓ · ⲉⲛⲁⲅⲁⲑⲟⲛ ⲙⲛⲛⲉⲣⲏⲧ · |
| s-22
| ⲙⲁⲣⲉϥⲧⲣⲩⲫⲁ ⲉⲧⲉⲧⲛⲙⲉ ⲙⲙⲟϥ · |
| s-23
| ⲙⲁⲣⲉϥⲥⲱⲃⲉ ⲉⲧⲉⲧⲛⲟ ⲛϩⲁⲕ · |
| s-24
| ⲛⲁⲓ ϭⲉ ⲛⲁⲥⲛⲏⲩ ⲉⲓϫⲱ ⲙⲙⲟⲟⲩ ⲛⲏⲧⲛ · ⲉⲃⲟⲗ ϫⲉ · ⲉⲓϭⲉⲡⲏ ⲉϯ ⲙⲡⲁⲟⲩⲟⲓ ⲉϩⲟⲩⲛ ⲉⲡϩⲱⲃ ⲉⲧⲉϥⲕⲏ ⲛⲁⲓ ⲉϩⲣⲁⲓ ⲡⲁⲓ ⲉⲧⲉⲣⲉⲡⲉϥϫⲱⲕ ⲉⲃⲟⲗ ⲛⲁϣⲱⲡⲉ ⲛⲁⲓ ⲉⲃⲟⲗ ϩⲓⲧⲙⲡϫⲟⲉⲓⲥ · |
| s-25
| ⲁϣ ⲅⲁⲣ ⲡⲉ ⲡⲕⲉϣⲁϫⲉ · ⲉⲧⲓⲛⲁϫⲟⲟϥ ⲉⲣⲱⲧⲛ ⲉⲟⲩⲛⲧⲏⲧⲛ ⲙⲙⲁⲩ ⲙⲡⲉⲛⲉⲭⲉⲣⲟⲛ ⲙⲡⲉⲧⲛⲛⲟⲩⲧⲉ · |
| s-26
| ⲟⲩⲛⲧⲏⲧⲛ ⲙⲙⲁⲩ ⲙⲡⲁⲣⲏⲃ ⲛⲧⲉϥⲙⲛⲧⲣⲣⲟ · |
| s-27
| ⲟⲩⲛⲧⲏⲧⲛ ⲙⲙⲁⲩ ⲛⲧⲉϥⲡⲁⲣⲟⲩⲥⲓⲁ ⲛⲁⲧⲡⲁⲣⲁⲓⲧⲉⲓ ⲙⲙⲟⲥ · |
| s-28
| ⲉϣⲱⲡⲉ ⲉⲧⲉⲧⲛϣⲁⲛⲧⲙⲣⲛⲟⲃⲉ · ϫⲓⲛⲧⲉⲛⲟⲩ · ⲉⲓⲉ ⲛⲉⲛⲧⲁⲧⲉⲧⲛⲁⲁⲩ ϩⲛⲟⲩⲙⲛⲧⲁⲧⲥⲟⲟⲩⲛ · ϥⲛⲁⲕⲁⲁⲩ ⲛⲏⲧⲛ ⲉⲃⲟⲗ · |
| s-29
| ⲉϣⲱⲡⲉ ⲇⲉ ⲟⲛ ⲙⲛⲛⲥⲁⲧⲣⲉⲧⲉⲧⲛⲥⲟⲩⲱⲛϥ ⲛⲧⲉⲧⲛϭⲱ ⲉⲧⲉⲧⲛⲙⲏⲛ ⲉⲃⲟⲗ ϩⲛⲛⲉⲓϩⲃⲏⲩⲉ ⲛⲟⲩⲱⲧ · ⲥⲉⲛⲁⲉⲡ ⲛϣⲟⲣⲡ ⲉⲣⲱⲧⲛ · ⲛⲥⲉⲡⲁⲣⲁⲇⲓⲇⲟⲩ ⲙⲙⲱⲧⲛ ⲉⲡⲕⲱϩⲧ · |
| s-30
| ⲁⲩⲱ ⲛⲧⲉⲣⲉϥϫⲉⲛⲁⲓ · ⲁϥϣⲗⲏⲗ ⲉϥϫⲱ ⲙⲙⲟⲥ · ϫⲉ · ⲓⲏⲥⲟⲩⲥ ⲡⲉⲛⲧⲁϥϣⲱⲛⲧ ⲙⲡⲉⲕⲗⲟⲙ ⲡⲁⲓ ⲉⲧϩⲙⲡⲉⲕϣⲱⲛⲧ ⲡⲱⲕ · |
| s-31
| ⲱ ⲡⲉⲛⲧⲁϥⲥⲱⲛⲧ ⲙⲡⲉⲕⲗⲟⲙ ⲛⲛⲉⲧⲟⲩⲁⲁⲃ ⲧⲏⲣⲟⲩ · ⲙⲛⲛⲉⲓⲟⲩⲟⲧⲟⲩⲉⲧ ⲉⲧⲟϣ · ⲉⲁϥϣⲟⲃⲟⲩ ϩⲛⲛⲉⲣⲱⲙⲉ · ⲡⲉⲕϩⲣⲏⲣⲉ · ⲉⲧⲉⲙⲉϥϩⲱϭⲃ ϣⲁⲃⲟⲗ · |
| s-32
| ⲱ ⲡⲉⲛⲧⲁϥϫⲟ ϩⲣⲁⲓ ⲛϩⲏⲧⲛ ⲛⲛⲉϥϣⲁϫⲉ · |
| s-33
| ⲱ ⲡϥⲁⲓⲣⲟⲟⲩϣ ⲙⲁⲩⲁⲁϥ ϩⲁⲛⲉϥϩⲙϩⲁⲗ · |
| s-34
| ⲱ ⲡⲥⲁⲉⲓⲛ ⲛⲡⲉⲛⲥⲱⲙⲁ · ⲉϥⲧⲁⲗϭⲟ ⲙⲙⲟⲟⲩ ⲧⲏⲣⲟⲩ ⲛϫⲓⲛϫⲏ · |
| s-35
| ⲱ ⲡⲉⲛⲣⲉϥⲣⲡⲉⲧⲛⲁⲛⲟⲩϥ ⲛⲁⲛ ⲙⲁⲩⲁⲁϥ · |
| s-36
| ⲱ ⲡⲉⲧⲉⲙⲛⲗⲁⲁⲩ ⲙⲙⲛⲧϫⲁⲥⲓϩⲏⲧ ϩⲏⲡ ⲛϩⲏⲧϥ · |
| s-37
| ⲱ ⲡⲛⲁⲏⲧ ⲙⲁⲩⲁⲁϥ · ⲁⲩⲱ ⲡⲙⲁⲓⲣⲱⲙⲉ ⲛⲓⲙ · |
| s-38
| ⲱ ⲡⲥⲱⲧⲏⲣ ⲙⲁⲩⲁⲁϥ · ⲁⲩⲱ ⲡⲇⲓⲕⲁⲓⲟⲥ · ⲡⲉⲧϣⲟⲟⲡ ϩⲙⲙⲁ ⲛⲓⲙ · ⲡⲉⲧϣⲱⲱⲡ ϫⲓⲛⲉⲛⲉϩ · ⲡⲛⲟⲩⲧⲉ ⲡⲉⲭⲣⲓⲥⲧⲟⲥ ⲓⲏⲥⲟⲩⲥ · |
| s-39
| ⲛⲧⲟⲕ ⲡⲉⲧⲥⲕⲩⲡⲁⲍⲉ ⲛⲟⲩⲟⲛ ⲛⲓⲙ ⲉⲧϩⲉⲗⲡⲓⲍⲉ ⲉⲣⲟⲕ · ϩⲛⲛⲉⲕⲇⲱⲣⲉⲁ ⲙⲛⲛⲉⲕⲙⲛⲧⲛⲁ · ⲉⲕⲥⲟⲟⲩⲛ ⲛⲧⲉⲭⲛⲏ ⲛⲓⲙ ⲙⲛⲉⲡⲏⲣⲉⲓⲁ ⲛⲓⲙ ⲛⲧⲉⲡϫⲁϫⲉ ⲉⲧϯⲟⲩⲃⲏⲛ ⲛⲟⲩⲟⲉⲓϣ ⲛⲓⲙ · |
| s-40
| ⲁⲩⲱ ⲙⲛⲛⲥⲁⲧⲣⲉϥϫⲉⲛⲁⲓ ⲛϭⲓⲡⲡⲉⲧⲟⲩⲁⲁⲃ ⲓⲱϩⲁⲛⲛⲏⲥ ⲡⲉⲩⲁⲅⲅⲉⲗⲓⲥⲧⲏⲥ · ⲁϥϫⲓ ⲛⲟⲩⲟⲉⲓⲕ · ⲁϥϣⲡϩⲙⲟⲧ ⲛⲧⲉⲓϩⲉ ⲉϥϫⲱ ⲙⲙⲟⲥ · ϫⲉⲁϣ ⲡⲉ ⲡⲕⲉⲥⲙⲟⲩ · ⲏ ⲁϣ ⲡⲉ ⲡⲕⲉⲉⲓ ⲉⲃⲟⲗ ⲙⲡϣⲁϫⲉ · ⲏ ⲁϣ ⲧⲉ ⲧⲕⲉⲉⲩⲭⲁⲣⲓⲥⲧⲓⲁ ⲉⲛⲛⲁⲟⲛⲟⲙⲁⲍⲉ ⲙⲙⲟⲟⲩ ⲉϫⲙⲡⲉⲓⲟⲉⲓⲕ ⲉⲛⲡⲱϣ ⲙⲙⲟϥ · ⲉⲓⲙⲏⲧⲓ ⲛⲧⲟⲕ ⲙⲁⲩⲁⲁⲕ · ⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · |
| s-41
| ⲧⲛϯⲉⲟⲟⲩ ⲛⲁⲕ ⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲁⲓ ⲛⲧⲁⲩⲟⲩⲉⲛϩⲡⲉϥⲣⲁⲛ ⲉⲃⲟⲗ ϩⲓⲧⲙⲡⲉⲓⲱⲧ · |
| s-42
| ⲧⲛϯⲉⲟⲟⲩ ⲛⲧⲉⲕϭⲓⲛⲉⲓ ⲉϩⲟⲩⲛ ϩⲓⲧⲙⲡⲣⲟ · |
| s-43
| ⲧⲛϯⲉⲟⲟⲩ ⲛⲧⲉⲕⲁⲛⲁⲥⲧⲁⲥⲓⲥ ⲉⲧⲟⲩⲁⲁⲃ · ⲉⲃⲟⲗ ϩⲛⲛⲉⲧⲙⲟⲟⲩⲧ · ⲧⲁⲓ ⲛⲧⲁⲩⲧⲥⲁⲃⲟⲛ ⲉⲣⲟⲥ · ⲉⲃⲟⲗ ϩⲓⲧⲟⲟⲧⲕ · |
| s-44
| ⲧⲛϯⲉⲟⲟⲩ ⲛⲁⲕ ⲧⲉϩⲓⲏ · |
| s-45
| ⲧⲛϯⲉⲟⲟⲩ ⲛⲁⲕ ⲡⲉϭⲣⲟⲟϭ · ⲡⲗⲟⲅⲟⲥ · ⲡⲉϩⲙⲟⲩ · ⲡⲱⲛⲉ ⲙⲙⲉ · ⲡⲁϩⲟ ⲉⲧⲟⲩⲁⲁⲃ · ⲡϩⲃⲃⲉ · ⲧⲁⲃⲱ · ⲧⲙⲛⲧⲛⲟϭ · ⲡⲉⲛⲧⲁⲩϫⲟⲟⲥ ⲉⲣⲟϥ · ϫⲉϣⲏⲣⲉ ⲛⲣⲱⲙⲉ ⲉⲧⲃⲏⲏⲧⲛ · ϫⲉⲕⲁⲥ ⲉϥⲉⲧⲟⲩϫⲟ ⲙⲡⲅⲉⲛⲟⲥ ⲛⲛⲣⲱⲙⲉ · |
| s-46
| ⲧⲛϯⲉⲟⲟⲩ ⲛⲁⲕ ⲧⲙⲉ · ⲡⲙⲧⲟⲛ · ⲡⲉⲟⲟⲩ · ⲧϭⲟⲙ ⲧⲉⲛⲧⲟⲗⲏ · ⲧⲡⲁⲣⲣⲏⲥⲓⲁ · ⲧⲙⲛⲧⲣⲙϩⲉ · ⲡⲉⲛⲙⲁ ⲙⲡⲱⲧ · |
| s-47
| ⲛⲧⲟⲕ ⲅⲁⲣ ⲡⲉ ⲡϫⲟⲉⲓⲥ · ⲧⲛⲟⲩⲛⲉ ⲛⲧⲙⲛⲧⲁⲧⲙⲟⲩ · ⲁⲩⲱ ⲧⲡⲏⲅⲏ ⲛⲧⲙⲛⲧⲁⲧⲧⲁⲕⲟ · ⲁⲩⲱ ⲡⲧⲁϫⲣⲟ ⲛⲛⲁⲓⲱⲛ · |
| s-48
| ⲉⲁⲩⲧⲁⲩⲉⲡⲉⲕⲣⲁⲛ ⲉϫⲛⲛⲁⲓ ⲧⲏⲣⲟⲩ · ϫⲉⲕⲁⲥ ⲁⲛⲟⲛ ϩⲱⲱⲛ ⲉⲛⲛⲁⲉⲡⲓⲕⲁⲗⲉⲓ ⲙⲙⲟⲕ ϩⲓⲧⲛⲛⲁⲓ · |
| s-49
| ⲧⲛⲥⲟⲟⲩⲛ ⲅⲁⲣ ⲛⲧⲉⲕⲙⲛⲧⲛⲟϭ ⲛⲁⲧⲛⲁⲩ ⲉⲣⲟⲥ · ⲧⲁⲓ ⲉⲧⲉⲛⲥⲟⲩⲟⲛϩ ⲉⲣⲟⲛ ⲁⲛ ⲧⲉⲛⲟⲩ · |
| s-50
| ϩⲟⲧⲁⲛ ⲉⲕϣⲁⲛⲧⲃⲃⲟⲛ · ⲧⲟⲧⲉ ⲧⲛⲛⲁⲛⲁⲩ ⲉⲣⲟⲕ ϩⲙⲡⲥⲱⲙⲁ ⲙⲁⲩⲁⲁϥ · ⲡⲁⲓ ⲛⲧⲁⲕⲁⲁϥ ⲛⲃⲣⲣⲉ ϩⲛⲟⲩⲙⲛⲧⲁⲥ · |
| s-51
| ⲁⲩⲱ ⲛⲧⲉⲣⲉϥⲡⲉϣ ⲡⲟⲉⲓⲕ · ⲁϥϣⲗⲏⲗ ⲉϫⲙⲡⲟⲩⲁ ⲡⲟⲩⲁ ⲛⲛⲉⲥⲛⲏⲩ · ϫⲉⲕⲁⲥ ⲉⲩⲉⲙⲡϣⲁ ⲛⲧⲉⲭⲁⲣⲓⲥ ⲙⲡϫⲟⲉⲓⲥ · |
| s-52
| ϩⲟⲙⲟⲓⲱⲥ ⲛⲧⲟϥ ϩⲱⲱϥ · ⲡⲡⲉⲧⲟⲩⲁⲁⲃ · ⲓⲱϩⲁⲛⲛⲏⲥ · ⲛⲧⲉⲣⲉϥϫⲓϯⲡⲉ ⲙⲡⲟⲉⲓⲕ · |
| s-53
| ⲉⲁϥϫⲟⲟⲥ ⲛⲧⲉⲓϩⲉ ⲛϭⲓⲡⲑⲉⲟⲗⲟⲅⲟⲥ ⲓⲱϩⲁⲛⲛⲏⲥ · ⲉϥϫⲱ ⲙⲙⲟⲥ · ϫⲉⲙⲁⲣⲉⲟⲩⲙⲉⲣⲓⲥ ϣⲱⲡⲉ ⲛⲁⲓ ϩⲱ ⲛⲙⲙⲏⲧⲛ ϩⲛⲟⲩⲉⲓⲣⲏⲛⲏ · ⲱ ⲛⲁⲙⲉⲣⲁⲧⲉ · |
| s-54
| ⲧⲟⲧⲉ ⲡⲉϫⲁϥ ⲛⲃⲓⲃⲣⲟⲥ ϫⲉϫⲓ ⲛⲙⲙⲁⲕ ⲛⲥⲟⲛ ⲥⲛⲁⲩ · ⲉⲩⲛϩⲉⲛⲃⲓⲣ ⲛⲧⲟⲟⲧⲟⲩ · ⲙⲛϩⲉⲛⲧⲱⲣⲉ · ⲛⲧⲉⲧⲛⲟⲩⲉϩⲧⲏⲩⲧⲛ ⲛⲥⲱⲓ · |
| s-55
| ⲃⲓⲃⲣⲟⲥ ⲇⲉ ⲙⲡⲉϥⲁⲙⲉⲗⲉⲓ ⲉⲡⲧⲏⲣϥ · ⲁⲗⲗⲁ ⲁϥⲉⲓⲣⲉ ⲙⲡⲉⲛⲧⲁⲩⲟⲩⲉϩⲥⲁϩⲛⲉ ⲙⲙⲟϥ ⲛⲁϥ ⲉⲃⲟⲗ ϩⲓⲧⲟⲟⲧϥ ⲙⲡⲡⲉⲧⲟⲩⲁⲁⲃ ⲡⲑⲉⲟⲗⲟⲅⲟⲥ ⲓⲱϩⲁⲛⲛⲏⲥ · ⲡϩⲙϩⲁⲗ ⲙⲡⲛⲟⲩⲧⲉ · |
| s-56
| ⲛⲧⲉⲣⲉⲡⲙⲁⲕⲁⲣⲓⲟⲥ ⲇⲉ ⲓⲱϩⲁⲛⲛⲏⲥ ⲉⲓ ⲉⲃⲟⲗ ϩⲙⲡⲉϥⲏⲓ · ⲁϥⲙⲟⲟϣⲉ ⲡⲃⲟⲗ ⲛⲧⲡⲩⲗⲏ ⲛⲧⲡⲟⲗⲓⲥ · ⲉⲁϥϫⲟⲟⲥ ⲉⲧⲣⲉⲡⲉϩⲟⲩⲟ ⲙⲡⲙⲏⲏϣⲉ ⲉⲧⲟⲩⲏϩ ⲛⲥⲱϥ · ⲃⲱⲕ ⲛⲥⲉⲗⲟ ϩⲁⲣⲟϥ · |
| s-57
| ⲛⲧⲉⲣⲉϥⲡⲱϩ ⲇⲉ ⲉⲩⲙⲁ ⲛⲙϩⲁⲁⲩ · ⲉⲡⲁⲟⲩⲁ ⲡⲉ ϩⲛⲛⲉⲥⲛⲏⲩ ⲁϥϫⲟⲟⲥ ⲛⲛⲉϩⲣϣⲓⲣⲉ · ϫⲉϣⲓⲕⲉ ϩⲙⲡⲉⲓⲙⲁ ⲛⲁϣⲏⲣⲉ · |
| s-58
| ⲛⲉⲧⲙⲙⲁⲩ ⲇⲉ ⲁⲩϣⲓⲕⲉ ⲉⲡⲉⲥⲏⲧ · |
| s-59
| ⲛⲧⲟϥ ⲇⲉ ⲓⲱϩⲁⲛⲛⲏⲥ ⲡⲑⲉⲟⲗⲟⲅⲟⲥ · ⲛⲉϥⲟⲩⲉϩⲥⲁϩⲛⲉ ⲛⲁⲩ · ϫⲉϣⲓⲕⲉ ⲉⲡⲉⲥⲏⲧ ⲕⲁⲗⲱⲥ · |
| s-60
| ⲁⲩⲱ ⲛⲉϥϫⲱ ⲙⲙⲟⲥ · ϫⲉϭⲱϫⲉ ⲉⲡⲉⲥⲏⲧ ⲉⲡⲉϩⲟⲩⲟ · |
| s-61
| ⲉⲩϭⲱϫⲉ ⲇⲉ ⲉⲡⲉⲥⲏⲧ ⲛϭⲓⲛⲉⲧⲙⲙⲁⲩ · |
| s-62
| ⲛⲉϥϣⲁϫⲉ ⲛⲙⲙⲁⲩ ϩⲙⲡϣⲁϫⲉ · ⲁⲩⲱ ⲛⲉϥⲡⲣⲟⲧⲣⲉⲡⲉ ⲙⲙⲟⲟⲩ · ⲉϥⲕⲱⲧ ⲙⲙⲟⲟⲩ · ⲉϥⲥⲟⲃⲧⲉ ⲙⲙⲟⲟⲩ ⲁⲩⲱ ⲉϥⲡⲉⲓⲑⲉ ⲙⲙⲟⲟⲩ ⲉϩⲟⲩⲛ ⲉⲧⲙⲛⲧⲣⲣⲟ ⲙⲡⲛⲟⲩⲧⲉ · |
| s-63
| ⲁⲩⲱ ⲛⲉϥϣⲗⲏⲗ ⲉϫⲙⲡⲟⲩⲁ ⲡⲟⲩⲁ ⲙⲙⲟⲟⲩ · |
| s-64
| ⲛⲧⲉⲣⲉⲛϩⲣϣⲓⲣⲉ ⲇⲉ ⲟⲩⲱ ⲉⲩϭⲱϫⲉ · ⲙⲡⲧⲟⲡⲟⲥ ⲉⲧⲟⲩϣⲓⲕⲉ ⲛϩⲏⲧϥ · ⲉⲁⲩⲥⲙⲛⲧϥ ⲕⲁⲗⲱⲥ · ⲕⲁⲧⲁⲧϩⲉ ⲛⲧⲁϥⲟⲩⲁϣⲥ · |
| s-65
| ⲁⲩⲱ ⲁⲛⲟⲛ ⲙⲡⲉⲛⲉⲓⲙⲉ ⲉⲗⲁⲁⲩ · |
| s-66
| ⲧⲟⲧⲉ ⲁϥⲕⲁⲁϥ ⲕⲁϩⲏⲩ ⲛⲛⲉϩⲟⲓⲧⲉ ⲉⲧⲧⲟ ϩⲓⲱⲱϥ · |
| s-67
| ⲁϥⲛⲟⲩϫⲉ ⲙⲙⲟⲟⲩ ⲉⲡⲉⲥⲏⲧ ⲉⲡⲧⲟⲡⲟⲥ ⲛⲧⲁⲩϭⲱϫⲉ ⲙⲙⲟϥ ⲉⲡⲉⲥⲏⲧ ⲙⲡⲉⲥⲙⲟⲧ · ⲛⲟⲩⲙⲁ ⲉϥⲡⲟⲣϣ · |
| s-68
| ⲛⲧⲟϥ ⲇⲉ ⲉⲛⲉϥⲁϩⲉⲣⲁⲧϥ · ⲉⲣⲉⲟⲩϣⲧⲏⲛ ⲛϩⲃⲟⲟⲥ ϩⲓⲱⲱϥ · ⲙⲁⲩⲁⲁⲥ · ⲉⲥϫⲓ ⲧⲟⲧⲉ ⲉⲡⲥⲁ ⲥⲛⲁⲩ · |
| s-69
| ⲁⲩⲱ ⲁϥⲡⲱⲣϣ ⲛⲛⲉϥϭⲓϫ ⲉⲃⲟⲗ ⲁϥϣⲗⲏⲗ ⲛⲧⲉⲓϩⲉ ⲉϥϫⲱ ⲙⲙⲟⲥ · ϫⲉⲡⲛⲟⲩⲧⲉ ⲡⲉⲛⲧⲁϥⲥⲱⲧⲡ ⲙⲙⲟⲓ ⲛⲁϥ · ⲉⲩⲙⲛⲧⲁⲡⲟⲥⲧⲟⲗⲟⲥ ⲛⲛϩⲉⲑⲛⲟⲥ · ⲉⲁⲕⲧⲛⲛⲟⲟⲩⲧ ⲉⲃⲟⲗ ⲉⲧⲟⲓⲕⲟⲩⲙⲉⲛⲏ · |
| s-70
| ⲡⲉⲛⲧⲁϥⲟⲩⲱⲛϩ ⲉⲃⲟⲗ ⲛⲛⲉⲡⲣⲟⲫⲏⲧⲏⲥ · ⲙⲛⲛⲉϥⲁⲡⲟⲥⲧⲟⲗⲟⲥ · |
| s-71
| ⲡⲉⲧⲉⲙⲡⲉϥϭⲱ ⲉⲛⲉϩ · ⲉϥⲣⲡⲉⲧⲛⲁⲛⲟⲩϥ · ϫⲓⲛⲧⲕⲁⲧⲁⲃⲟⲗⲏ ⲙⲡⲕⲟⲥⲙⲟⲥ · ⲉϥⲧⲟⲩϫⲟ ⲛⲟⲩⲟⲛ ⲛⲓⲙ · ⲉⲧⲉⲙⲛϭⲟⲙ ⲙⲙⲟⲟⲩ · |
| s-72
| ⲡⲉⲛⲧⲁϥⲧⲣⲉⲩⲥⲟⲩⲱⲛϥ · ⲉⲃⲟⲗ ϩⲓⲧⲛⲣⲱⲙⲉ ⲛⲓⲙ ⲛⲗⲟⲅⲓⲕⲟⲛ ⲙⲛⲍⲱⲟⲛ ⲛⲓⲙ · ⲉⲩⲇⲓⲁⲕⲟⲛⲉⲓ ⲙⲙⲟⲟⲩ ⲉⲃⲟⲗ ϩⲓⲧⲛⲧⲉϥⲡⲣⲟⲛⲟⲓⲁ · |
| s-73
| ⲡⲉⲛⲧⲁϥⲧⲣⲉⲧⲉⲛⲯⲩⲭⲏ ⲣϩⲩⲙⲉⲣⲟⲥ · ⲉⲁϥⲧⲣⲉⲥϩⲣⲟⲕ · ⲉⲥⲟ ⲛϫⲁⲉⲓⲉ · ⲁⲩⲱ ⲛⲁⲅⲣⲓⲟⲥ · |
| s-74
| ⲡⲉⲛⲧⲁϥⲧⲁⲁⲥ ⲛⲁϥ ⲙⲙⲓⲛⲙⲙⲟϥ ⲉⲥⲱⲃⲉ ⲛⲛⲉϥϫⲁϫⲉ · |
| s-75
| ⲡⲉⲛⲧⲁϥϭⲟⲗⲡⲥ ⲛⲁϥ ⲉⲥⲙⲟⲟⲩⲧ · ⲉⲁϥⲣⲛⲟⲙⲟⲥ ⲛⲁⲥ ⲉⲥⲟⲙⲥ ϩⲙⲡϣⲓⲕ ⲛⲧⲁⲛⲟⲙⲓⲁ · |
| s-76
| ⲡⲉⲛⲧⲁϥⲧⲣⲉⲥϫⲣⲟ ⲉⲛⲉⲥϫⲁϫⲉ ϩⲙⲡⲧⲣⲉⲥⲡⲱⲧ ⲉⲣⲁⲧϥ · |
| s-77
| ⲡⲉⲛⲧⲁϥϯ ⲛⲁⲥ ⲛⲧⲉϥϭⲓϫ · ⲁⲩⲱ ⲁϥⲧⲟⲩϫⲟⲥ ⲉⲃⲟⲗ ϩⲛⲁⲙⲛⲧⲉ · |
| s-78
| ⲡⲉⲧⲙⲡⲉϥⲕⲁⲁⲥ ⲉⲡⲟⲗⲓⲧⲉⲩⲉ ϩⲙⲡⲕⲟⲥⲙⲟⲥ · |
| s-79
| ⲡⲉⲛⲧⲁϥⲧⲥⲁⲃⲉ ⲉⲓⲁⲁⲧⲥ ⲉⲃⲟⲗ ⲉⲛⲉⲥϫⲁϫⲉ · |
| s-80
| ⲡⲉⲛⲧⲁϥⲧⲣⲉⲡⲉϥⲥⲟⲟⲩⲛ ⲣⲟⲩⲟⲉⲓⲛ ϩⲙⲙⲁ ⲛⲓⲙ · |
| s-81
| ⲡϣⲏⲣⲉ ⲙⲡⲛⲟⲩⲧⲉ · ⲡⲥⲱⲧⲏⲣ · ⲡϫⲟⲉⲓⲥ · ⲧⲧⲁⲝⲓⲥ ⲛⲛⲉⲧϩⲙⲡⲁⲏⲣ · |
| s-82
| ⲡⲣⲉϥϩⲁⲣⲉϩ ⲉⲛⲉⲧϩⲓϫⲙⲡⲕⲁϩ · ⲧⲉⲭⲁⲣⲓⲥ · ⲁⲩⲱ ⲡⲣⲁϣⲉ ⲛⲛⲉⲧⲉⲛⲟⲩⲃ ⲛⲉ · |
| s-83
| ϣⲱⲡ ⲉⲣⲟⲕ ⲛⲧⲉⲯⲩⲭⲏ ⲛⲓⲱϩⲁⲛⲛⲏⲥ · ⲡⲉⲧⲉⲡⲱⲕ ⲡⲉ · ⲧⲁⲓ ⲛⲧⲁⲕⲁⲁⲥ ⲛⲙⲡϣⲁ ⲉⲧⲣⲉⲕⲥⲟⲩⲱⲛⲥ · |
| s-84
| ⲛⲧⲟⲕ ⲅⲁⲣ ⲡⲉ ⲛⲧⲁⲕϩⲁⲣⲉϩ ⲉⲣⲟⲓ ϣⲁⲧⲉⲛⲟⲩ ⲙⲡⲉⲓⲧⲱⲗⲙ ϩⲟⲗⲱⲥ ⲙⲛⲥϩⲓⲙⲉ · |
| s-85
| ⲁⲕⲟⲩⲟⲛϩⲕ ⲛⲁⲓ ⲉⲃⲟⲗ · ⲛⲧⲉⲣⲓⲟⲩⲱϣ ⲉϫⲓⲥϩⲓⲙⲉ ϩⲛⲧⲁⲙⲛⲧⲃⲣⲣⲉ · |
| s-86
| ⲁⲩⲱ ⲁⲕϫⲟⲟⲥ ⲛⲁⲓ · ϫⲉⲓⲱϩⲁⲛⲛⲏⲥ · ϯⲣⲭⲣⲉⲓⲁ ⲙⲙⲟⲕ · |
| s-87
| ⲁⲕⲣϣⲟⲣⲡ · |
| s-88
| ⲁⲕⲟⲓⲕⲟⲛⲟⲙⲉⲓ ⲙⲡⲁⲥⲱⲙⲁ ⲛⲟⲩⲉϣ ⲛϣⲱⲛⲉ ⲛⲥⲱⲙⲁⲧⲓⲕⲟⲛ · |
| s-89
| ⲛⲧⲟⲕ ⲡⲉⲛⲧⲁⲕϯϫⲣⲟⲡ ⲛⲁⲓ ⲛϩⲁϩ ⲛⲥⲟⲡ · ⲛⲧⲉⲣⲓⲟⲩⲱϣ ⲉϫⲓⲥϩⲓⲙⲉ · |
| s-90
| ⲙⲛⲛⲥⲱⲥ ⲁⲕϣⲁϫⲉ ⲛⲙⲙⲁⲓ ⲛϫⲡϣⲟⲙⲧⲉ ⲙⲡⲉϩⲟⲟⲩ ϩⲓϫⲛⲧϩⲁⲗⲁⲥⲥⲁ · ϫⲉⲓⲱϩⲁⲛⲛⲏⲥ ⲉⲛⲉ ⲛⲧⲟⲕ ⲡⲉⲧⲉⲡⲱⲓ ⲁⲛ ⲡⲉ · ⲛⲉⲓⲛⲁⲗⲟ ϩⲁⲣⲟⲕ ⲡⲉ · ⲛⲅϫⲓⲥϩⲓⲙⲉ · ⲁⲩⲱ ⲛⲅⲣⲃⲗⲗⲉ ⲉⲡⲉⲕⲃⲁⲗ ⲥⲛⲁⲩ · ⲛⲅϭⲱ ⲉⲕⲣϩⲏⲃⲉ · ⲉⲕⲧⲱⲃϩ ⲙⲙⲟⲓ · |
| s-91
| ⲡⲉⲛⲧⲁϥⲟⲩⲱⲛ ⲙⲡⲁϩⲏⲧ ϩⲛⲧⲁⲙⲉϩϣⲟⲙⲧⲉ ⲛⲣⲟⲙⲡⲉ · |
| s-92
| ⲁⲕⲭⲁⲣⲓⲍⲉ ⲛⲁⲓ ⲛϩⲉⲛ ⲕⲉⲃⲁⲗ · ⲛⲥⲉⲟⲩⲟⲛϩ ⲉⲃⲟⲗ ⲁⲛ · |
| s-93
| ⲡⲉⲛⲧⲁϥⲧⲣⲉⲡϭⲱⲛⲧ · ⲏ ⲡⲉⲓⲱⲣϩ ⲛⲛⲉϩⲓⲟⲙⲉ ϣⲱⲡⲉ ⲛⲁⲓ ⲛⲃⲟⲧⲉ · |
| s-94
| ⲡⲉⲛⲧⲁϥⲛⲁϩⲙⲧ ⲉⲃⲟⲗ ϩⲛⲛⲉⲫⲁⲛⲧⲁⲥⲓⲁ ⲙⲡⲣⲟⲥⲟⲩⲟⲉⲓϣ · ⲉⲁϥϩⲁⲣⲉϩ ⲉⲣⲟⲓ ⲉⲡⲱⲛϩ ⲉⲧⲙⲏⲛ ⲉⲃⲟⲗ · |
| s-95
| ⲡⲉⲛⲧⲁϥⲁⲁⲧ ⲛϣⲙⲙⲟ ⲉⲧⲙⲁⲛⲓⲁ ⲉⲧϩⲟⲟⲩ · ⲧⲁⲓ ⲉⲧϣⲟⲟⲡ ϩⲛⲧⲥⲁⲣⲝ ⲉⲁϥⲧⲣⲁⲟⲩⲉ ⲉⲃⲟⲗ ⲙⲡⲙⲟⲩ ⲉⲧⲥⲁϣⲉ · |
| s-96
| ⲡⲉⲛⲧⲁϥⲛⲁϩⲙⲉⲧ ⲉⲡⲙⲟⲩ ⲙⲙⲉϩⲥⲛⲁⲩ · ⲉⲧⲉⲧⲅⲉϩⲉⲛⲛⲁ ⲛⲥⲁⲧⲉ ⲧⲉ · ⲉⲁⲕⲧⲁϩⲟⲓ ⲉⲣⲁⲧ ⲉⲓⲟⲩⲁⲁⲃ · |
| s-97
| ⲡⲉⲛⲧⲁϥⲧⲱⲙ ⲉⲣⲱϥ ⲙⲡϣⲱⲛⲉ ⲉⲧϩⲏⲡ ⲛⲧⲁⲯⲩⲭⲏ · |
| s-98
| ⲁⲩⲱ ⲁⲕϣⲱϣⲧ ⲉⲃⲟⲗ ⲛⲧⲉⲡⲣⲁⲝⲓⲥ ⲉⲧϩⲏⲡ · ⲏ ⲡϩⲱⲃ ⲉⲧⲟⲩⲟⲛϩ ⲉⲃⲟⲗ · ⲡⲁⲓ ⲉϣⲁⲩⲧⲁⲁϥ ϩⲙⲡⲥⲱⲙⲁ · |
| s-99
| ⲡⲉⲛⲧⲁϥⲛⲁϩⲙⲉⲧ · ⲁⲩⲱ ⲁϥⲛⲟⲩϫⲉ ⲉⲃⲟⲗ ⲛϩⲏⲧ · ⲙⲡⲉⲧϣⲧⲟⲣⲧⲣ ⲙⲙⲟⲓ · |
| s-100
| ⲡⲉⲛⲧⲁϥⲥⲟⲃⲧⲉ ⲛⲧⲁϭⲓⲛⲃⲱⲕ ϣⲁⲣⲟϥ ⲉⲥⲟⲩⲁⲁⲃ · |
| s-101
| ⲡⲉⲛⲧⲁϥⲕⲁⲛⲁⲙⲉⲉⲩⲉ ⲉⲩϣⲟⲟⲡ ⲉϩⲟⲩⲛ ⲉⲣⲟϥ ⲛⲁⲧⲧⲱⲗⲙ · |