| s-805
| sani dugu ka jè minkè, cè ye a fò Mayimuna ye ko a bè segin sani dugujè, ko sègè ka kan ka na a nòfè. |
| s-806
| o tuma na, jinèmusonin seginna ni a ye ka na a sigi jiri nin kan ka a sigi kan. |
| s-807
| sani a ka segin ni a ye, a ye Amadu Tara ka fènkè, a taamana ni minw bèè ye, muru ni tama ninw bèè, a ye bèè minè Amadu Tara bolo ka o bila yen, ka tila ka kurakura di a ma minw nyògòn tè mògò si bolo nyumannyuman minw nyògòn ma deli ka ye fòlò. |
| s-808
| a ye o di a ma. |
| s-809
| a nana ni Amadu Tara ye ka a sigi jiri kan. |
| s-810
| fajiri selen è ! sègè nana Amadu Tara nò fè, sègè nana Amadu Tara nò fè ka taga ni a ye ka taga a sigi kòfèla yen, ba kòfè yen ka sòrò ka a ka so yèlèma ka a di a ma. |
| s-811
| Amadu Tara yèlènna a ka so kan. |
| s-812
| a tagara, a tagara fo a sera sirafarayòrò nin na, fo a sera sirafarayòrò nin na, a korokè ninw tagara sira min fè. |
| s-813
| o tuma na, a tèmèna sira fè ka taga korokè ninw nyini, a kelen kana taga so, fa ka dimi korokèw kòrò. |
| s-814
| a tagara kòròkè ninw yòrò nyini, yala a bè se ka kelen kelen di u ma, u ka segin nyògòn fè ka na u fa bara. |
| s-815
| a tagara, a sera dugu fòlò dò la, u ye a fò ko ko u tèmèna o dugu kan. |
| s-816
| a tagara dugu filanan dò la, a ye u nyininkali kè yen. |
| s-817
| u ye a fò ko ko u bè yen, ko mè ko u bèè bè kaso la. |
| s-818
| o tuma na, u donna kaso la min fana kama u ye o nyèfo Amadu Tara ye ko u nana muso nyini dè, ko u nana muso nyini dè, ko muso nin dun, ko ni cè o cè tagara a nyini, è è ko u ka jamanatigi denmuso don, ko ni cè o cè ye a nyini, ko ni i ko ma diya muso nin dòròn, ko u bè i minè ka i kè u ka jòn de ye. |
| s-819
| ko Amadu seegin nin bèè tagara dennin nyini, ko a ma sòn u si la, ko u bèe kèra u ka jòn ye. |
| s-820
| Amadu Tara fana ko ko ale fana tè se ka segin, ko o tuma ko ale fana bè kè jòn ye. |
| s-821
| ko barisa ko ale tèna segin ka a kòròkèw to, ko a fana bè taga dennin nyini, o fana ka fara u kan. |
| s-822
| Amadu Tara tagara, bèè ye Amadu Tara deli ko a kana taga, ko ni o tè, ko a tè segin a faso la tuguni. |
| s-823
| a ko abada ko fo ale ka taga, ko ko ni a kòròkèw sara yòrò min, ko a bè sa yen. |
| s-824
| a tagara jamanatigi nin ka so, a tagara denmuso nyini. |
| s-825
| jamanatigi ye a fò a ye, ko ayiwa, ko i kana taga, ni i tagara, ni a tè i fè, i bè to yan dè. |
| s-826
| cènin ko ko a ! ko ale ko a bè to yan, ko ale kòni bè dennin fè, ko a bè taga a furu fana, ko a bè taga a nyini ka a furu. |
| s-827
| o tuma na, a tagara u ye a jira dennin na, u tagara dennin ka so jira a la. |
| s-828
| o ye a sòrò dennin tagara a ko, dennin nana Amadu Tara sigilen sòrò dòròn a sinna ka a fò ko a bè cè min nyini, ko kabini a ye sigi nin bèè kè a ma a furu, ko o ye nin cè nin de ye, ko a bè nin cè nin de fè. |
| s-829
| a sinna ka taga jamanatigi wele ka Amadu Tara jira a la, ko bòn ko a denmuso ko ko a bè nin de fè, ko u bè furu siri. |
| s-830
| Amadu Tara fana ko ko a ka furu tè se ka siri, ko fo a kòròkè minw bè yan ko fo olu ka na, ko ale dun ye a mèn, ko kòròkè ninw kèra jòn ye yan. |
| s-831
| o tuma a ye kòròkè ninw tògò fò, o ye a sòrò kòròkè ninw bèè kèra sagagènnaw ni bagènnaw ye. |
| s-832
| u tagara u nyini kungo kònò, ka na ni u seegin bèè ye o tuma na ka na furu siri. |
| s-833
| o bannen kò ko u bè taga, ko Amadu Tara bè na so minkè, Amadu Tara fana ko ko ale tè se ka na, ko fo ni a ni a kòròw nana nyògòn fè. |
| s-834
| o kama, u ye kòròkè seegin fana bèè bila ka u bèè bò jònya la, u ni Amadu Tara u nana so. |
| s-835
| Amadu Tara fana ko ko u bòra so, ko u bè na fura nyini, ka taga a di u fa ma dè ko komi fura sòròla ko u bè taga ni o ye fòlò, ko aprè ko a bè segin ka na a muso fè. |
| s-836
| a ye o nyini muso nin fè, muso sònna. |
| s-837
| o tuma a ni a kòròkè seegin bèè ye sira minè ko u bè taga u fa bara, fo u selen kungokolonba kònò, o ye a sòrò kòlòn dò bè yen. |
| s-838
| kòròkè ninw ko ko minnògò bè u la, jaa u tun bè a fè ka Amadu Tara faga dè, u tè a fè a ka se so yen. |
| s-839
| u selen kòlònba nin na dòròn, u ko ko minnògò bè u la. |
| s-840
| u tagara yenninnò. |
| s-841
| bòn, minèn tè u bolo ji bè soli cogoya min na, fosi fosi. |
| s-842
| Amadu Tara fana ye a fò u ye, u ko komi Amadu Tara ye dògònin ye, ko u bè o lajigin kòlòn kònò, ka ji soli ka a di u ma ko ni o sera ka ji soli ka a di u ma, ko u bè a labò ko u bè u min ko o tuma, ko u bè taga |
| s-843
| Amadu Tara fana ma sòn ka u sòsò. |
| s-844
| u ye a lajigin kòlòn kònò dòròn, u bèè bolila ka taga ka a to ka a ka so siri jiri la yen ka taga. |
| s-845
| u tagara, u tagara fo u sera u ka dugu la, ka taga fura nin di u fa ma, ka a fò Amadu Tara kòni kabini o bòra yan, ko o farala ko o tagara muso nyini dè, ko u ma a tagafan si dòn. |
| s-846
| jamanatigi nin fana kènèyalen, a ye Amadu Tara ba furu sa, ka a gèn ka bò dugu yòrò bèè la fo ka taga a bila kungokolon kònò, ko mògò si kana se a bara yen, ko mògò si kana se a filè yen, ko hali dugumògò si. |
| s-847
| ni a ye min sen ye yen ko o bè faga. |
| s-848
| Amadu Tara tora kòlòn kònò yen fo a bè nyini ka na sa sagagènna dòw tagara bò a kan kòlòn kònò. |
| s-849
| olu tun tagara ji nyini ka a di u ka sagaw ma. |
| s-850
| olu ka sòrò ka Amadu labò. |
| s-851
| u ye a labò minkè, ale fana ka sòrò ka yèlèn a ka so kan. |
| s-852
| a bè na minkè dòròn kungo kònò, a sera ka bugu dò ye yen dugutilama fè yen. |
| s-853
| a ye bugu dò ye yen, a jiginna ka taga, a ye tasuma mènèmènè ye o buguda la, a tagara o fan fè, ko a bè taga o tigi lajè dòròn, a nana a sòrò a ba de don. |
| s-854
| o tuma a ba fana ye a kunbèn, ko a kana se dugu kònò yen dè, ko ni a sera yen, ko a fa bè a faga, ko a fa ye a gèn dè, ko barisa a ma taga fura nyini ka na di a fa ma. |
| s-855
| Amadu Tara fana ye kuma cogoya bèè nyèfò a ba ye, o tuma na a tora yen. |
| s-856
| Amadu Tara terikè sèbè minw tun bè u ka dugu la, olu tun bè to ka u dogo, ka na dumuni di ba nin ma dugutilama fè. |
| s-857
| mògò si tè bò a kalama. |
| s-858
| olu nalen ni dumunni ye, olu ye Amadu Tara sòrò yen. |
| s-859
| Amadu Tara ye kuma nyèfò olu fana ye, u ka sòrò ka taga u ka dugu. |
| s-860
| Amadu Tara terikè sèbè, o ka jeli nyuman minw bèè bè yen, ni a bè sòn olu ka kuma ma, u tagara olu deli ka kuma nin cogoya bèè fò olu ye, ko u ka taga a fò Amadu Tara fa ye, ko Amadu Tara bè yafa nyini a fa fè, a bè nyini a fè u ka nyògòn ye, a ka kuma kelen dòròn fò a ye, ko o tuma na, ko o bè diya a ye kosèbè. |
| s-861
| o tuma na jeli ninw fana tagara, a bè sòn jeli min ka kuma ka tèmèn bèè kan, o tagara ka taga kuma nyèfò a fè, fa fana sònna ko a ka na u ka kuma. |
| s-862
| o tuma na, a nana, a ye a ka kuma fò a ye. |
| s-863
| fa ma da a la. |
| s-864
| bòn, a seginna ka taga a ba fè, fo jinèmuso min ni Amadu Tara furula u ka jinèdugu la, jinèmuso nin nana ka na a nyini u ka dugu la. |
| s-865
| jinèmuso nin nana dòròn, Amadu Tara kòròkè ninw bèè, Amadu Tara kòròkè seegin ninw bèè wulila ka jò jinèmuso nin kama sisan kòni, ko u bè na jinèmuso nin furu |
| s-866
| jinèmusonin fana tagara, ko a bè jamanatigi de nyini ko ka a ye, a tagara a fè yen ka a fò a ye ko ale ko ale furula dò de ma u ka jinèdugu yenninnò ko o tògò ye Amadu Tara, ko o tigi tun tagara fura nyini, ko ka na a di a fa de ma, ko a ye fura sòrò, ko a nana ko ale nana o tigi de nyini sisanninnò. |
| s-867
| fa ka sòrò ka da a la, u tagara ci sama Amadu Tara ma. |
| s-868
| Amadu Tara nana. |
| s-869
| o tuma a ni jinèmuso furula nyògòn ma. |
| s-870
| fa ka sòrò ka jama bèè sigi ka denkè seegin ninw ka u ka nkalon sigi u kun, ka sòrò ka u bèè faga, ka denkè seegin ninw bèè faga. |
| s-871
| o tuma na, Amadu Tara kelen tora a fa bolo. |
| s-872
| u ba ninw fana bèè furu sara. |
| s-873
| nsiirin nin banna. |
| s-874
| NAMARAMATU DENIN KAROGÈLÈN |
| s-875
| nsiirinin, nsiirinin |
| s-876
| ko dennin dò bè yen ko a tògò ye Namaramatu ye. |
| s-877
| a bamuso ye a fò ko a ka taga a fakè wele ka na. |
| s-878
| a fakè tògò ye Nònsi ye. |
| s-879
| a tagara ko baba, ko e ka na dumunni kè. |
| s-880
| ko fònhòn ! |
| s-881
| ko e na dumunni kè ! |
| s-882
| ko fònhòn ! |
| s-883
| a tagara a fò a bamuso ye ko ne ye baba wele, o ko fònhòn ! |
| s-884
| a ye a fò ko sisan ni n tagara bilen tugun, ni n ye baba wele, ni a ko fònhòn, ne bè baba bugò ! |
| s-885
| a tagara ko baba, e na dumunni kè ! |
| s-886
| a ko fònhòn ! |
| s-887
| ko e na dumunni kè ! |
| s-888
| a ko fònhòn ! |
| s-889
| a bilen bolila ka na a fò a bamuso fè, a ye muruda ge ka a don a yèrè kun. |
| s-890
| ko ni baba ye a fò bilen tugun fònhòn, ko ale bè baba kun tigè ! |
| s-891
| a ko baba, na dumunni kè ! |
| s-892
| a ko fònhòn ! |
| s-893
| baba, na dumunni kè ! |
| s-894
| a ko fònhòn ! |
| s-895
| a ye baba kunkolo tigè. |
| s-896
| bamuso fana ko ko ale bè kuma, a ye bamuso sin kelen tigè ka boli ka boli ka taga bèn ni fyèntò dò ye ka o ka bere minè, ka taga o jigin kòlòn kònò ka taga bèn ni fulakè dò ye, ka a fò : fulakè, n bè misiw gèn ! ka kè fulakè ka misiw gèn ye. |
| s-897
| fulakè nana sunògò. |
| s-898
| a ye fulakè ka misiw nyèdenw bèè bò ka taga a balabala, diye na a fò : fulakè, e ma èndutigènankuru ye ? |
| s-899
| èndutigènankuruw ? |
| s-900
| an be èndutigènankuru dun bi ! |
| s-901
| fulakè ye a ka misiw nyèdenw dun ka ban tuma min de, misiw o ye nyògòn tuntun. |
| s-902
| fulakè ye Namaramatu gèn ka a gèn ka a gèn. |
| s-903
| Namaramatu tagara don numunkè dò fè, ko e ma a ye fulakè nin bè n gèn wa ? |
| s-904
| ko ne bèna don e ka aprantiya la ka na e ka fènw kè. |