s-1
| Cosaanu mbind ci Afrik |
s-2
| Cosaanu mbind ci Afrik lu mat a fésal la, ndax ñu bari, waay-xeltu yi ak ñeneen dañoo defe ne caada yi nekk Afrik xamuñu ca seen cosaan xaralaay mbind. |
s-3
| Manaam xeetu mbind yi fi nekk yépp dañu leen a jeggani: ci Arab yi mbaa ci Nasaraan yi. |
s-4
| Loolu nag dëppoowul benn yoon ak li am: ndax soo gëstoo dinga xam ci lu wér ne fii sax ci Afrik la mbind fekk baax. |
s-5
| Fii ci Afrik lañu njëkkee bind. |
s-6
| Kon ñakk-a-xam li mu waral bari na! |
s-7
| Li wér ci lu ñu xam ci xam-xamu cosaan moo di: fii ci Afrik, ca Misiraay démb la nit tàmbalee bind. |
s-8
| Booba ak léegi am na lu ëpp juróomi junniy – 5000 at. |
s-9
| Ci ab xaatim àlluwa ji ñuy tuddee alluwaay Narmeer (-3200 laata Juddu Yonnent Yàlla Isaa) lañu firndeel mbind mi gën a yàgg te ñu koy woowee 'Hieroglyphes' ci Nasaraan. |
s-10
| Baat boobu nag du làkki maam ya nekkoon Misiraa, baatu Gerek la. |
s-11
| Mbind moomu turam dëgg moo doon 'medu ntr' muy tekki 'waxi Yàlla' ci làkki maam yooya! |
s-12
| Ca Hieroglyphes yooya mbaa 'medu ntr' ya la yeneen xeeti mbind yi ci àddina yépp daanaka sosoo! |
s-13
| Bindi Gerek yi nga xam ne, la bindi tubaab yi téy jóge, mu nga sosoo ca bindi waa Fenisi. |
s-14
| Waa Fenisi yooyu ña nga jàngee woon bind ñoom itam ca maam ya woon Misira. |
s-15
| Waa Fenisi yooyu ay jaaykat yu mag lañu woon. |
s-16
| Ñoo doon daanaka dox diggante Misiraa ak yeneen réew ya woon Asi mbaa Ëroop. |
s-17
| Jamono jooja sax gaa Ëroop amagul woon. |
s-18
| Yeneen réew yu mel ni yu 'Hitites' ak yeneen ñoo fa nekkoon! |
s-19
| Gànnaaw loolu itam yeneen xeeti mbind yu bari judd nañu fii ci Afrik. |
s-20
| Bi ci gën a siiw di bu Meroe, te ngeen di gis nataal bi fii ci xët wii! |
s-21
| Mbindum Meroe moomu ba bés niki téy xamaguñu lu muy tekki! |
s-22
| Te mbind mu xereñ la, mu am solo. |
s-23
| Maam ya fi nekkoon sàkkoon ko fi! |
s-24
| Kon téy su ñu naan caada Afrik yi ay 'civilisations orales' lañu, cosaanoowuñu bind, dañuy wax rekk, wante lenn lu wér lalu ko! |
s-25
| Ay àtte-ñakkale ak wumpale kese la: Du leneen! |