| s-1
| На сем, брате молѡдшіи, кнꙗз[ь] велики Иван Федѡрович, цѣлꙋи ко мнѣ кр[е]стъ, къ своемꙋ братꙋ старѣишемꙋ, великомꙋ кн[ѧ]зю Васил[ь]ю Васил[ь]евичю, и к моемꙋ братꙋ молодшемꙋ, ко кн[ѧ]зю Иванꙋ Андрѣевичю, и к нашемꙋ братꙋ молодшемꙋ, ко кн[ѧ]зю Михаилꙋ Андрѣевичю, и к нашемꙋ братꙋ молѡдшемꙋ, кн[ѧ]зю Васил[ь]ю ꙗрославичю. |
| s-2
| Имѣти ти менѧ себѣ братѡм старѣишим. |
| s-3
| А брата моег[о] молодшег[о], кн[ѧ]зѧ Ивана Андрѣевича, имѣти ти себѣ братом. |
| s-4
| А брата нашег[о] молодшег[о], кн[ѧ]зѧ Михаила Андрѣевича, имѣти ти себѣ братом молѡдшим. |
| s-5
| А брата нашег[о] молѡдшег[о], кн[ѧ]зѧ Васил[ь]ѧ Ѧрославича, имѣти ти себѣ братом же молодшим. |
| s-6
| А добра ти нам хотѣти вездѣ, во всем, гдѣ бы ни было. |
| s-7
| А что ти слышев о нашем добрѣ или о лисѣ ѡт хр[е]стіанина или ѡт иновѣрца, то ти нам повѣдати въ правдꙋ, без примышлен[і]а. |
| s-8
| А быти ти с нами вездѣ заѡдинъ, без хитрости. |
| s-9
| А нам с тобою быти вездѣ заѡдинъ и печѧловатца тобою нам без хитрости. |
| s-10
| А гдѣ бꙋдеш[ь] хотѧ послал на н[а]ше лихо, тамо ти ѡтослати. |
| s-11
| А не пристати ти к татаром и к Литвѣ никоторою хитростью, ни к иномꙋ х комꙋ, кто бꙋдет нам недрꙋг. |
| s-12
| А быт[и] ти с нами вездѣ заѡдинъ противꙋ их. |
| s-13
| А бꙋдет с ними нам миръ, ино и тобѣ с ними миръ. |
| s-14
| А не бꙋдет с ними нам мирꙋ, ни любви с Литвою, или с татары, или с-ыным с кѣм, кто бꙋдет нам недрꙋг, ино и тебѣ с ними мирꙋ нѣт, ни любви. |
| s-15
| А всхочет с тобою кнꙗз[ь] велики литовскои любви, и тобѣ с ним взѧт[и] любов[ь] со мною по дꙋмѣ, а писат[и] ти с ним в докончалнꙋю грамотꙋ, что есь со мною, с великим кн[ѧ]зем с Васил[ь]емъ Васил[ь]евичем, ѡдинъ ч[е]л[овѣ]къ. |
| s-16
| А бꙋдет емꙋ любѡв[ь] со мною, ино и с тобою. |
| s-17
| А не бꙋдет емꙋ любви со мною, ино и тебѣ с ним любви нѣт. |
| s-18
| А с кѣм бꙋдет мнѣ, великомꙋ кн[ѧ]зю Васил[ь]ю Васил[ь]евичю, любѡв[ь], ино и тобѣ, великомꙋ кн[ѧ]зю Иванꙋ Федѡровичю, с тѣм любѡв[ь]. |
| s-19
| А с кѣм мнѣ, великомꙋ кн[ѧ]зю, любви не бꙋдет, ино и тобѣ, великомꙋ кн[ѧ]зю Иванꙋ, с тѣм любви не держати. |
| s-20
| А кто имет тебѧ, великѡг[о] кн[ѧ]зѧ Ивана, обидѣти, и мнѣ тебѧ, кн[ѧ]зю великомꙋ, бѡронити ѡт ког[о] сѧ сам не възможеш[ь] ѡборонити. |
| s-21
| А комꙋ бꙋдеш[ь] целовал кр[е]стъ, а томꙋ ти целован[ь]е сложити. |
| s-22
| А поидет на тебѧ кнѧз[ь] велики литѡвски, и мнѣ, кн[ѧ]зю великомꙋ Васил[ь]ю, поити самомꙋ тебѧ боронит[и]. |
| s-23
| А пошлет на тебѧ своих вѡевѡд, и мнѣ послати своих воевод тебѧ боронит[и]. |
| s-24
| А тебѣ, кн[ѧ]зю великомꙋ Иванꙋ, любви не имати, ни канчиват[и] ни с кѣм без моег[о] вѣдан[і]а. |
| s-25
| А с кѣм ꙗз, кнꙗз[ь] велики, имꙋ любѡв[ь] имати и докончѧн[ь]е, и мнѣ, кн[ѧ]зю великомꙋ, в докончѧлные грамоты писат[и] тебѧ, кн[ѧ]зѧ великог[о] Ивана. |
| s-26
| А гдѣ поидꙋ ꙗз, кнꙗз[ь] велики Василеи Васил[ь]евич, рат[ь]ю на своег[о] недрꙋга, и тобѣ, кн[ѧ]зю великомꙋ Иванꙋ Федѡровичю, поити со мъною самомꙋ, без ослꙋшан[і]а. |
| s-27
| А пошлю своих воевѡд, и тобѣ с ним[и] послат[и] своих воевѡд. |
| s-28
| А вотчины ти н[а]шеи, Москвы и Коломны, и всѣх волостеи Москѡвских и Коломенских, что потѧгло к Москвѣ и х Коломнѣ, по рекꙋ по Окꙋ, и всег[о] моег[о] кнѧжен[і]а великог[о], под нами не обидѣти, ни встꙋпатис[ѧ] никоторою хитростью. |
| s-29
| А межи нас рѡздѣл землѣ по рекꙋ по Ѡкꙋ, ѡт Коломны вверхъ по Ѡцѣ, на Московскои сторонѣ, почен Нѡвгородѡк, Лужа, Вереа, Боровескъ, инаа мѣста Резанскаа, котораа ни бꙋдꙋт на тои сторонѣ, то к Москвѣ. |
| s-30
| А на низ по рецѣ по Ѡцѣ, по рѣкꙋ по Цнꙋ, ѡт ꙋсть Цны въверхъ по Цнѣ, што на Московскои сторонѣ, то к Москвѣ, а что на Резанскои сторонѣ, а то Резанѣ. |
| s-31
| А что Володимерское порꙋбеж[ь]е по томꙋ, как было при наших прадѣдех, при великом кн[ѧ]зѣ Иванѣ Даниловичѣ, и при великом кн[ѧ]зѣ Семенѣ Ивановичѣ, и при великом кн[ѧ]зѣ Иванѣ Ивановичѣ, и при моем дѣде, при великом кн[ѧ]зѣ Дмитріе Ивановичѣ и при моем о[т]цѣ, при великом кн[ѧ]зѣ Васил[ь]е Дмитріевичѣ, и при твоем прадѣде, при великом кн[ѧ]зѣ Иванѣ ꙗрославичѣ, и при твоем прадѣде, при великом кн[ѧ]зѣ Иванѣ Ивановичѣ, и при твоем прадѣде, при великом кн[ѧ]зи Иванѣ Ѡлександровичѣ, и при твоем дѣде, при великом кн[ѧ]зѣ Олзѣ Ивановичѣ, и при твоем о[т]цѣ, великом кн[ѧ]зе Ѳедѡрѣ Ѡлговичѣ. |
| s-32
| А что Резанское на Резанскои сторонѣ за Окою, что доселѣ тѧгло к Москвѣ, почен Лопасна, ꙋѣздъ Мстиславль, Жадѣне горѡдищо, Дꙋб, Жадемль, Броднич с мѣсты, как сѧ ѡтстꙋпили торꙋсскіе кн[ѧ]зи Ѳедѡрꙋ Свѧтославичю, и та мѣста к Резани. |
| s-33
| А в Тꙋлꙋ и в Берестеи не встꙋпат[и]сѧ мнѣ, великомꙋ кн[ѧ]зю Васил[ь]ю Васил[ь]евичю, ни моемꙋ братꙋ молодшемꙋ, кн[ѧ]зю Иванꙋ Андрѣевичю, ни нашемꙋ братꙋ молѡдшемꙋ, кн[ѧ]зю Михаилу Андрѣевичю, ни нашемꙋ братꙋ молодшемꙋ, кн[ѧ]зю Васил[ь]ю ꙗрославичю. |
| s-34
| Тако ж в землю в Резанскꙋю не встꙋпатис[ѧ] и во кн[ѧ]зи резанскіе. |
| s-35
| А со кн[ѧ]зем прѡнским и сь ег[о] брат[ь]ею любѡв[ь] взѧл еси ты, кнѧз[ь] велики Иван. |
| s-36
| А что сѧ промеж вас ꙋчинит, ино промеж вас ꙋправити мнѣ, великомꙋ кн[ѧ]зю Васил[ь]ю Васил[ь]евичю, а вам мене слꙋшати. |
| s-37
| А что сѧ ꙋчинит меж вас какова обида, и вам ѡтослат[и] своих боѧръ, ини ꙋчинѧт исправꙋ. |
| s-38
| А о чем сѧ сопрꙋт, ино им трети ѡ[те]ць наш, митрополит. |
| s-39
| А ког[о] митрополит обвинит, ино обидное ѡтдати. |
| s-40
| А не и ѡтдасть, и мнѣ то, великомꙋ кн[ѧ]зю Васил[ь]ю ѡтправит[и], а то ми не в-ызмѣнꙋ. |
| s-41
| Тако ж на обѣ сторонѣ. |
| s-42
| А с торꙋскими кн[ѧ]зи взѧти ти любѡв[ь], а жити ти с ними без обиды, занеж тѣ кн[ѧ]зи со мною, с великим кн[ѧ]зем с Васил[ь]ем Васил[ь]евичем, ѡдинъ ч[е]л[овѣ]къ. |
| s-43
| А новосилски кн[ѧ]зи добьют мнѣ челом, великомꙋ кн[ѧ]зю Васил[ь]ю Васил[ь]евичю, и тебѣ с ними взѧт[и] любѡв[ь] по томꙋ ж, а жит[и] ти с ними без обиды. |
| s-44
| А что сѧ ꙋчинит меж вас в любви с ними, о чем ни бꙋдет слово, о землѣ или ѡ водѣ или об-ыном о чем, и вам ѡтослат[и] своих бѡѧръ, и они, сьѣхавсѧ, ꙋчинѧт исправꙋ. |
| s-45
| И о чем сѧ сопрꙋт, и они ѣдꙋт на третіи, ког[о] собѣ изберꙋт. |
| s-46
| И на ког[о] помолыт третіи, и виноваты ѡтдасть. |
| s-47
| А не ѡтдасть, и правы пошлет ко мнѣ, к великомꙋ кн[ѧ]зю Васил[і]ю Васил[ь]евичю, и мнѣ послати к виноватомꙋ въпервые, и вдрꙋгіе, и втрет[ь]и. |