| s-1
| 28 Յուլիս թուականէն այս կողմ Թուրքիոյ օրակարգի գլխաւոր նիւթը դարձած է անտառային տարածքներու հրդեհները, որոնք կը շարունակուին ամբողջ շաբաթուայ մը ընթացքին ընդմիշտ նոր բռնկումներով։ |
| s-2
| Հրդեհի առաջին դէպքը պատահած էր Անթալիոյ Մանաւկաթ գաւառը եւ այդ աղէտը փճացուցած էր անտառային տարածքները, որոնք վերածուեցան մոխիրի կոյտերու։ |
| s-3
| Թերթիս հրատարակութեան պատրաստուած ժամերու տուեալներով անցնող մէկ շաբաթուայ ընթացքին 34 տարբեր քաղաքներու մերձակայ 174 անջատ հրդեհներ տեղի ունեցան, որոնցմէ 161-ը կարելի եղաւ հսկել։ |
| s-4
| Իսկ 9 անձեր իրենց կեանքը կորսնցուցին բոցերու մէջ, որոնց մէկ մասը հրշէջներ էին, իսկ մէկ մասն ալ խաղաղ բնակիչներ։ |
| s-5
| Այրուած անտառներուն մէջ զոհուած բազմաթիւ անասուններու կողքին, կարելի չեղաւ նաեւ գոմերու մէջ մնացած անասունները փրկել։ |
| s-6
| Այս պահուն բոցերու դէմ պայքարը կը շարունակուի Մուղլա, Անթալիա, Սփարթա, Այտըն եւ Տենիզլի քաղաքներու շրջակայքը։ |
| s-7
| Հրդեհներու կարեւոր դրդապատճառը կը համարուի եղանակի բարձր ջերմութիւնը, տեղումներու բացակայումը եւ ուժգին հիւսիսային քամին։ |
| s-8
| Հրդեհները զանազան վայրերու մէջ կը սպառնան նաեւ բնակավայրերուն, որու հետեւանքով բազմաթիւ գիւղեր եւ հիւրանոցներ պարպուեցան։ |
| s-9
| Այս բոլորին մէջ կառավարութեան ուղղեալ ծանր քննադատութիւններ ու մեղադրանքներ կը հնչեն հրդեհներուն օդային ճամբով միջամտելու նիւթին շուրջ անճարակութեան պատճառաւ։ |
| s-10
| Թուրքիա անցեալին նման աղէտներուն կը միջամտէր հրշէջ ինքնաթիռներով։ |
| s-11
| Իսկ այս վերջին հրդեհի օրինակով յայտնի եղաւ թէ պետութիւնը հրաժարած է այդ օդանաւներէն օգտուելու գաղափարէն եւ նոյնիսկ օդաչուներն ալ աշխատանքէ հեռացուցած։ |
| s-12
| Այս բոլորը կը կատարուին քաղաքական նախասիրութիւններով, քանի որ իշխող Արդարութիւն եւ Զարգացում Կուսակցութեան գործիչները, գլխաւորութամբ նախագահ Էրտողանի, դիրք բռնած են «Թուրք Օդային Հաստատութիւն» ոչ պետական կազմակերպութեան դէմ։ |
| s-13
| Նոյնիսկ կառավարութիւնը պաշտօնանկ ըրած էր այդ միութեան վարչակազմը եւ տեղապահ նշանակած։ |
| s-14
| Անտառային հրդեհները իր հետ բերին նաեւ ընկերաքաղաքական նոր ճգնաժամ մը։ |
| s-15
| Բազմաթիւ ընկերային ցանցերէ ներս տարածուեցաւ «Անտառները ՀՏՓ-ականները կը հրկիզեն» սուտ լրատաուութիւնը։ |
| s-16
| Այդ սուտի տարածման իրենց ելոյթներով նպաստեցին նաեւ կարգ մը քաղաքական գործիչներ եւ պետական այրեր։ |
| s-17
| Մանաւկաթի մէջ իրենց առոգանութենէն շփոթելով երկու եղբայրներու դէմ լինչ գործադրուեցաւ, պնդելով թէ քիւրտեր են եւ եկած են անտառը հրկիզելու։ |
| s-18
| Մինչդեռ աւելի ետք պարզուեցաւ թէ այդ երկուքը հրդեհի վայր փութացած էին կատարուած աշխատութիւններու օժանդակելու համար։ |
| s-19
| Երկու եղբայրներ մազապուրծ փրկուեցան դաժան սպանութենէ։ |
| s-20
| Այդ նոյն մթնոլորտի մէջ է որ Քոնիայի Մերամ գաւառի մէջ ալ 7 հոգինոց ընտանիք մը զոհ դարձաւ ատելութեան ոճիրի։ |
| s-21
| Ինչպէս որ բնապահպաններ ահազանգ կը հնչեցնեն էգոլոկիական աղէտի մը դիմաց ընկերաբաններն ալ նոյն եղանակով կը զգուշացնեն ընկերային ճգնաժամի մը դիմաց։ |
| s-22
| Ճգնաժամ մը, որ դիւրաւ կրնայ վերածուիլ քաղաքացիական պատերազմի։ |
| s-23
| Գաղտնիք չէ որ Թուրքիոյ մէջ նման գրգռութիւնները շուտով կը հասնին իրենց նպատակին եւ ժամերու ընթացքին կրնայ պատահիլ այն ինչ, որու հետեւանքները կարելի չէ վերացնել նոյնիսկ երկար տարիներու ջանքերով։ |
| s-24
| Հրդեհը ինքնին կը սպառնայ նաեւ կարգ մը ջերմաելեկտրական կայաններու, քանի որ բոցերը արդէն հասած են անոնց տարածքներուն։ |
| s-25
| Եթէ ցարդ կը խօսինք անտառային հրդեհներու մասին, անդին զանազան քաղաքներու մէջ կը պատահի թուփերու կամ արտերու հրդեհներ, որոնք ընդհանրապէս չեն արժանանար յատուկ ուշադրութեան։ |
| s-26
| Այս տեսակի հրդեհները աւելի յաճախ կը տեսնուին Թրաքիոյ դաշտային վայրերը, որոնք համեմատաբար աւելի դիւրաւ հսկողութեան տակ կ՚առնուին։ |
| s-27
| Կայ անտառային հրդեհներու մի այլ երեսակ եւս, որ դարձեալ իր կարգին կարեւոր հարցականներ կը պարունակէ։ |
| s-28
| Այլեւս գաղտնիք չէ որ թրքական բանակը քրտաբնակ քաղաքներու դաշտային տարածքներու վրայ ինք կը հրահրէ հրդեհներ, անվտանգութեան պատճառաբանութիւնով։ |
| s-29
| Զինուորները կը պնդեն թէ այդ քաղաքներու անտառային տարածքներու մէջ ահաբեկիչներ թաքնուած են եւ անոնք յայտնաբերելու համար դիտումնաւոր կերպով կը հրկիզեն անտառները։ |
| s-30
| Նոյնիսկ այստեղ զինուորները արգելք կ՚ըլլան հրշէջներու աշխատութեան։ |
| s-31
| Այսպէս օրինակ մը ապրուեցաւ նախ Մուշի եւ ապա Տէրսիմի լեռնային տարածքներու մէջ։ |
| s-32
| Զինուորները նոյնիսկ արգիլեցին Տէրսիմի քաղաքապետ Մեհմետ Ֆադիհ Մաչօղլուի հրդեհի վայր փութալը։ |
| s-33
| Անշուշտ որ յառաջիկայ օրերուն հրդեհը իբրեւ աղէտ պիտի հանգի, բայց պատճառ դարձած քաղաքական փոթորիկը տակաւին երկար ժամանակ օրակարգ պիտի զբաղեցնէ երկրի մէջ։ |