| s-1
| Սամաթիոյ Ս. Գէորգ եկեղեցւոյ Սահակեան դպրաց դաս երգչախումբը վաւերագրական ֆիլմի մը առանցքը կազմեց։ |
| s-2
| Թուրքիոյ հայոց պատրիարքարանի կողմէ վաւերացուած 20 երգչախումբերէն Սահակեան, պատմականօրէն նոյնացած է Սամաթիա թաղին հետ։ |
| s-3
| Էրտիլ Օնուր Քոճաթիւրքի նկարահանած «Սահակեան՝ իմ ընտանիքը» ֆիլմը կը փորձէ պարզել այս հաստատութեան նշանակութիւնը թէ իր անդամներուն եւ թէ Սամաթիոյ թաղի հայութեան համար։ |
| s-4
| Երկար տարիներ եկեղեցւոյ կամարներուն տակ հոգեւոր երաժշտութիւն կատարած Սահակեանը վերջերս սկսած է աշխարհիկ երգերով բեմերու վրայ ալ հնչեցնել հայ երգը։ |
| s-5
| Այս առթիւ զրուցեցինք «Սահակեան՝ իմ ընտանիքը» ֆիլմի հեղինակ Քոճաթիւրքի հետ։ |
| s-6
| Մեր առաջին հարցումը կը վերաբերէր Սահակեանի մասին վաւերագրական մը նկարահանելու խորհուրդին ո՞ր պայմաններու մէջ ծագելուն։ |
| s-7
| «2017-ին ձեռնարկած էի իմ ալ բնակած Սամաթիա թաղի բնակիչներուն հետ վիտէօ հարցազրոյցներու շարքի մը, որ կոչած էի «Սամաթիա՝ իմ թաղը»: |
| s-8
| Այդ տարիներուն կ՚ուսանէի համալսարանի ռատիոյի, հեռուստացոյցի եւ շարժանկարի բաժինը։ |
| s-9
| Տեսական գիտելիքնիս փորձականի վերածելու համար տեսախցիկս ուղղեցի թաղեցիներուս, որոնց միջոցաւ աւելի ջերմ կապ մը հաստատուեցաւ իմ ու հարեւաններուս միջեւ։ |
| s-10
| Այդ շրջագծով Վարուժան Քէօսէտաղի թէյարանին մէջ երկար զրուցած էինք Արամ Նալչաճեանի հետ, որ կ՚անդամակցէր Սահակեան երգչախումբին։ |
| s-11
| Այդ զրոյցներու ընթացքին ձեւաւորուեցաւ Սահակեան երգչախումբի մասին վաւերագրական ֆիլմ մը նկարահանելու խորհուրդը»։ |
| s-12
| Հեղինակի այս բացատրութենէն ետք կ՚ուզեմ իմանալ թէ ֆիլմը ո՞ր զանգուածին համար նախատեսուած է։ |
| s-13
| Որոնց ի՞նչ պատգամ տալ կ՚ուզէ։ |
| s-14
| Քոճաթիւրք կը յայտնէ այդ զանգուածը յատուկէն դէպի ընդհանուր ծաւալելով։ |
| s-15
| «Նախ կ՚ուզեմ թաղեցիներս տեղեակ դարձնել 1461 թուականէն այս կողմ Սամաթիոյ Ս. Գէորգ եկեղեցւոյ մէջ հնչող այս ձայնին։ |
| s-16
| Ապա կ՚ուզեմ որ քաղաքի ամենափարթամ դահլիճներէն երգած այս երգչախումբը ծանօթ ըլլայ բոլոր Իսթանպուլին։ |
| s-17
| Վերջապէս նման արժէքը մեր օրերուն հասցնող աւանդութիւնը պէտք է իմանայ ամբողջ Թուրքիան։ |
| s-18
| Ես ծնած եմ 1994 թուին Ֆաթիհ թաղի մէջ։ |
| s-19
| 2000էն ի վեր կը բնակիմ Սամաթիա։ |
| s-20
| Կը տեսնեմ թէ բազմաթիւ Սամաթիացիներ իրենց կեանքի ընթացքին գէթ մէկ անգամ իսկ չեն լսած այս պատերու ետին հնչած ձայնը։ |
| s-21
| Իմ հետաքրքրութիւնը թերեւս ոմանց իրենց ենթագիտակցութեան պատերն ալ փլելուն, նոյնիսկ միատեղ գործելուն կը ծառայէ։ |
| s-22
| Օրինակի համար ի՞նչու չունենանք բազմաձայն ու բազմալեզու «Սամաթիոյ Երգչախումբ» մը։ |
| s-23
| Ես այս վաւերագրականի նկարահանումներու ժամանակ անգամ մը եւս պատկանելութիւն զգացի ապրած թաղիս նկատմամբ»։ |
| s-24
| Միտքս տանջող հարցումներէն մէկն ալ կը վերաբերի մեր համայնքի անհատներուն տեսախցիկներու հանդէպ ունեցած վերապահութեան։ |
| s-25
| Փորձով գիտեմ թէ մեր հասարակութիւնը ինչպէս կը խրտչի երբ իրեն երկարի խօսափող մը կամ կ՚ուղղուի տեսախցիկ մը։ |
| s-26
| Քոճաթիւրք կը յայտնէ թէ ինք եւս իր կարգին որոշ մտավախութիւններ ունեցած է եկեղեցւոյ մէջ նկարահանումներ ընելու կամ ալ երգչախումբի անդամներուն հետ մտերմանալու ընթացքին մէջ։ |
| s-27
| «Այդ բոլորը յաղթահարեցինք վաւերագրականի նախագծի համակարգող Տենիս Չաթի միջոցաւ. երգչախումբի խմբավար Սեւան Ակոշեան եւս դիւրացուց մեր աշխատութիւնը. քանի նկարահանումները յառաջացան յարաբերութիւնները ալ աւելի բնականոն դարձան եւ ստացանք անդամներու սրտաբուխ պատասխանները»։ |
| s-28
| Գիտեմ որ Պոլսոյ Հայոց Պատրիարքարանի մօտ պաշտօնապէս գրանցուած են 20 երգչախումբեր։ |
| s-29
| Արդեօք անոնց մասին ալ պատկերացում մը ունեցա՞ծ է։ |
| s-30
| Խօսակիցս յայտնեց թէ տեղեակ է եկեղեցական երաժշտութեան այդ մեծ աւանդին։ |
| s-31
| Նաեւ ուսումնասիրած է այդ 20 երգչախումբերէն մէկ մասը, նաեւ առիթը ունեցած է ոմանց խմբավարներուն կամ անդամներուն հետ ծանօթանալու։ |
| s-32
| «Խոստովանիմ որ սկզբնական շրջանին բաւական մոլորած էի ինծի անծանօթ այդ աշխարհի բառամթերքին ու անոնց նշանակութիւններուն դէմ։ |
| s-33
| Ի՞նչ էր դպրաց դասու եւ երգչախումբի տարբերութիւնը։ |
| s-34
| Այդ բոլորը զիս մղեցին յատուկ ուսումնասիրութիւններու։ |
| s-35
| Որոնց միջոցով նոր բացայայտումներ ալ ունեցայ։ |
| s-36
| Շատ տպաւորիչ էր եկեղեցւոյ շրջափակին մէջ տիրող ընկերային կեանքը։ |
| s-37
| Երեխէք երեկոյեան ժամերուն գնդակ կը խաղային դպրոցի պարտէզը։ |
| s-38
| Տարեցներ օրն ի բուն այդ բակի մէջ կը շաղակրատէին։ |
| s-39
| Շատ տպաւորուած էի այդ կենդանութեան եւ մանաւանդ ալ զօրակցութեան ականատես ըլլալով։ |
| s-40
| Սամաթիան ինծի համար բոլորովին տարբեր նշանակութիւն մը ունեցաւ»։ |
| s-41
| Վերջապէս հետաքրքրուած եմ թէ հասարակութիւնը ո՞ր միջոցներով պիտի կրնայ դիտել «Սահակեան՝ իմ ընտանիքը» վաւերագրականը։ |
| s-42
| Այս հարցումով կ՚իմանամ թէ ֆիլմը կը պատրաստուի զանազան փառատօններու մասնակցելու։ |
| s-43
| Հազիւ այդ օրացոյցի յստակացումէն ետք կարելի պիտի ըլլայ սոց ցանցերու միջոցաւ ֆիլմը դիտել։ |