| s-1
| ԹԱՅԻՍ ԳԱՐԱԳԻՒԹԻՒՔ |
| s-2
| Պարսելոնայի մէջ երկրորդ օրս էր: |
| s-3
| Զատիկ էր: |
| s-4
| Երբ պտոյտս կը կազմակերպէի, Զատկին Պարսելոնա ըլլալու գաղափարը արդէն զիս ոգեւորած էր, բայց հիւանդութեանս պատճառով առաւօտուն արթնցայ ուժաթափ եւ ուշ: |
| s-5
| Գոնէ տաքութիւն չունէի: |
| s-6
| Մէկ օր առաջ տաքութիւնս արգիլած էր Սուրբ Ընտանիք (Sagrada familia) տաճարը այցելել, բայց այս անգամ պիտի այցելէի Կաուտիի հմայիչ շէնքերը: |
| s-7
| Պիտի սկսէի Սակրատա Ֆամիլիայէն ու պիտի իջնէի դէպի վար: |
| s-8
| Խոստացած էի Սէիտէին՝ թուրք աղջկան, որուն հետ առջի օր ծանօթացած էի, պիտի այցելէի աշխատած ճաշարանը: |
| s-9
| Զատկի օրով փողոցները այսչափ պարապ չէի երեւակայած. Հռոմի փողոցները Ծաղկազարդին անգամ լեցուն էին: |
| s-10
| Նոյնիսկ յուսացած էի, որ քաղաքին մէջ պիտի տեսնէի Զատկուան զարդարանքներ, բայց նոյնիսկ ցուցափեղկերը չէին զարդարուած: |
| s-11
| Միայն կային սիրուն կողովներ, որոնք շոքոլայէ նապաստակով եւ գունաւոր փետուրներով լեցուն էին: |
| s-12
| Հասայ ճաշարան: |
| s-13
| Սէիտէն ներսն էր: |
| s-14
| Իրեն հարցուցի. |
| s-15
| – Ինչո՞ւ փողոցները պարապ են Զատկի օրով: |
| s-16
| Ըսաւ որ մեծամասնութիւնը Իտալիա գացած է Զատիկը տօնելու համար: |
| s-17
| Չեմ գիտեր՝ ճի՞շդ էր ըսածը, թէ ամէն մարդ դեռ եկեղեցին էր այն պահուն: |
| s-18
| Սէիտէն հարցուց. |
| s-19
| – Ե՞րբ կը վերադառնաս Աւստրիա: |
| s-20
| – Երեք օր վերջ: |
| s-21
| – Եթէ կ՚ուզես, վերադառնալէդ առաջ գիշերը միասին կը պտտինք: |
| s-22
| Քեզի կարգ մը տեղեր կը ցուցնեմ: |
| s-23
| Յետոյ քեզ կը ձգեմ հոսթելդ: |
| s-24
| – Շատ լաւ կ՚ըլլայ, բայց այն գիշեր հոսթելը պիտի չանցընեմ: |
| s-25
| Օդանաւը առտուն 7ին է: |
| s-26
| Օդակայանը պիտի անցընեմ գիշերը: |
| s-27
| – Այդպէս բան կ՚ըլլա՞յ : |
| s-28
| Միասին կը պտտինք, յետոյ քովս կը մնաս: |
| s-29
| Սէիտէն լաւ մէկու մը կը նմանէր: |
| s-30
| Առաջարկը հետաքրքրական էր, քան օդակայանը քնանալը: |
| s-31
| Ընդունեցի: |
| s-32
| Քալեցի դէպի Սակրատա Ֆամիլիա: |
| s-33
| Ճամբան աման մը ելակ գնեցի, որպէսզի կենսանիւթ առնեմ: |
| s-34
| Նոյն բանը Ֆլորանսի մէջ ըրեր էի: |
| s-35
| Պէտք է որ այն ժամանակ հասկնայի, թէ հինգ պտուղին կենսանիւթը զիս պիտի չբուժէր: |
| s-36
| Սակրատա Ֆամիլիայի առջեւի տարածութեան մէկ նստարանին նստայ, շէնքը դիտեցի: |
| s-37
| Այն պահուն չուզեցի ուժս վատնել երկար պոչին ետեւը կանգնելով ներս մտնելու համար: |
| s-38
| Ատոր փոխարէն նախընտրեցի կարողութիւնս պահել ուրիշ շէնքեր տեսնելու: |
| s-39
| Վերադառնալէս ետք համացանցէն տեսայ եկեղեցիին նկարները, եւ խորհեցայ որ կ՚արժէր այն երկար պոչին կենալ։ |
| s-40
| Կաուտիի միւս շէնքերը պիտի այցելէի, որոնք Քասա Միլա, Քասա Պաթլլօ, Քասա Ամաթլլեր կը կոչուին: |
| s-41
| Այս շէնքերը իրարու շատ մօտիկ էին: |
| s-42
| Կաուտիի շէնքերը եւրոպական ճաշակով շինուած միւս շէնքերուն չեն նմանիր: |
| s-43
| Իրենք Պարսելոնային ճաշակը ներկայացնելուն մէջ եզակի բաժին ունին: |
| s-44
| Կաուտիի ճարտարապետական փորձառութիւնը կը սկսէր փողոցի ելեկտրական ձողերուն ծրագրաւորմամբ: |
| s-45
| Յետոյ ան կը ծրագրէ ձեռնոցավաճառի մը ցուցափեղկը եւ ասոր շնորհիւ կը ծանօթանայ Էվսէպի Կիւէլլի հետ: |
| s-46
| Ան կը բարեկամանայ Կիւէլլի ընտանիքին հետ եւ ստեղծագործութիւններ կը կատարէ անոր համար: |
| s-47
| Այսուհետեւ Կաուտին հեղինակաւոր ճարտարապետը կը դառնայ Պարսելոնայի: |
| s-48
| Իր կեանքը ինծի կը յուշէ գրագէտ Այն Ռանտի հետեւեալ տողերը. |
| s-49
| «Լաւ փորձառութեան համար երկու բան պէտք է. մեծ մարդ մը՝ մէկ. իսկ միւսը աւելի հազուագիւտ է. այն որ բաւարար մեծութիւն ունի մեծութիւնը տեսնելու եւ ատոր մասին արտայայտուելու համար»: |
| s-50
| Կաուտիին շէնքերը հոյակապ էին, ինծի կը թուէր, թէ կը պտտէի հեքիաթային աշխարհի մը մէջ: |
| s-51
| Ճարտարապետութիւնը մտապատկերը իրականութեան վերածելու փորձն է: |
| s-52
| Այս շէնքերը տեսնելով խորհեցայ, որ ի՛նչ ձեւով կ՚աշխատէր Կաուտիին միտքը: |
| s-53
| Համացանցէն կարդացեր էի, թէ Փարք Կիւէլլ կարելի էր այցելել Կիրակի ժամը 5էն մինչեւ 8, որ ձրի էր: |
| s-54
| Ժամը ուշ էր, գրեթէ 8 կ՚ըլլար։ |
| s-55
| Բայց նորէն ալ ուզեցի բախտս փորձել: |
| s-56
| Մթննալ սկսած էր, ու ես կը գտնուէի Փարք Կիւէլլի թաղամասէն հեռու տեղ մը: |
| s-57
| Առաջին անգամ Պարսելոնայի մէջ հանրաշարժ նստայ եւ հասայ ուրիշ կայարան մը, բնաւ գաղափար չունէի, թէ ո՛ւր կը գտնուէի: |
| s-58
| Կուկըլ քարտէսը ամենամեծ փրկիչս էր: |
| s-59
| Սկսայ զառիվերը մագլցիլ: |
| s-60
| Հեռաձայնս կը ցուցնէր, թէ հասեր էի: |
| s-61
| Բոլորովին մթագնած էր: |
| s-62
| Պաշտօնեայ մը չկար: |
| s-63
| Երկու երիտասարդ տեսայ ու հարցուցի. |
| s-64
| – Վտանգաւո՞ր է այս ժամուն առանձին պտտիլ: |
| s-65
| – Ընդհանրապէս բան մը չ՚ըլլար, ըսին ու ծիծաղեցան: |
| s-66
| Զբօսաշրջիկի մը այս ժամուն ճեմապարտէզ այցելութիւնը տարօրինակ թուած էր անոնց: |
| s-67
| Ժամը 9 էր եւ Փարք Կիւէլլ մտած էի, առանց պաշտօնեայի մը հարցնելու: |
| s-68
| Ժամուն ուշ ըլլալը գիտցայ, քանի որ մութը կը տիրապետէր ու ճեմապարտէզի լուսաւորութիւնը բաւարար չէր: |
| s-69
| Հոս այցելելը բոլորովին տարբեր զգացումներու մղած էր զիս: |
| s-70
| Կը քալէի հեռաձայնիս լոյսը բացած. Կաուտիին դարձդարձիկ շինութիւնները կը տեսնէի. կը թուէր, թէ կորսուած էի հեքիաթային սարսափելի աշխարհի մը մէջ: |
| s-71
| Լսեցի ոտնաձայն ու հանդարտեցայ, երբ տեսայ կին մը, որ վազքի ելած էր: |
| s-72
| Հասայ տեղ մը, ուր լուսաւոր էր, եւ Պարսելոնան կրնայի դիտել վերէն։ |
| s-73
| Երկինքը դեղին էր ու ծառերուն ստուերները մթնոլորտը բանաստեղծական կը դարձնէին։ |
| s-74
| Որոշեցի իջնել փորձանք մը չպատահած: |
| s-75
| Շատ յոգնած էի: |
| s-76
| Դարձայ հոսթել: |
| s-77
| Կը յուսայի աւելի լաւ արթննալ յաջորդ օր: |
| s-78
| Սակայն ինչպէ՞ս կրնայի գիտնալ, որ ելակներուն վրայ յոյս դրած միամիտս ինքզինքս պիտի գտնէի հիւանդանոցի մը մէջ...: |