| s-1
| ⲧⲙⲁⲣⲧⲩⲣⲓⲁ ⲙⲡϩⲁⲅⲓⲟⲥ ⲃⲓⲕⲧⲱⲣ ⲡⲉⲥⲧⲣⲁⲧⲏⲗⲁⲧⲏⲥ ⲁⲩⲱ ⲡⲙⲁⲣⲧⲩⲣⲟⲥ ⲉⲧⲧⲁⲓⲏⲩ ⲙⲡⲉⲭⲣⲓⲥⲧⲟⲥ · ⲁⲩⲱ ⲡϥⲁⲓⲕⲗⲟⲙ ⲛⲁⲙⲉ · ⲛⲧⲁϥϫⲱⲕ ϫⲉⲉⲃⲟⲗ ⲙⲡⲉϥⲁⲅⲱⲛ ⲉⲧⲧⲁⲓⲏⲩ · ⲛⲥⲟⲩϫⲟⲩⲧⲥⲁϣϥⲉ ⲙⲡⲉⲃⲟⲧ ⲫⲁⲣⲙⲟⲩⲧⲉ · |
| s-2
| ϩⲛⲟⲩⲉⲓⲣⲏⲛⲏ ⲛⲧⲉⲡⲛⲟⲩⲧⲉ · ⲉⲣⲉⲛⲉϥⲥⲙⲟⲩ ⲉⲧⲟⲩⲁⲁⲃ ⲛⲁⲉⲓ ⲉϩⲣⲁⲓ ⲉϩⲣⲁⲓ ⲉϫⲱⲛ ⲛⲧⲛⲟⲩϫⲁⲓ ⲧⲏⲣⲛ ϩⲓⲟⲩⲥⲟⲡ ϩⲁⲙⲏⲛ : — — |
| s-3
| ⲁⲥϣⲱⲡⲉ ⲇⲉ ϩⲛⲧⲙⲛⲧⲣⲣⲟ ⲛⲇⲓⲟⲕⲗⲏϯⲁⲛⲟⲥ ⲡⲣⲣⲟ ϩⲛⲧⲙⲉϩϣⲟⲙⲧⲉ ⲛⲣⲟⲙⲡⲉ ⲛⲧⲉϥⲙⲛⲧⲣⲣⲟ · ϩⲙⲡϣⲟⲣⲡ ⲛⲉⲃⲟⲧ · ⲡⲇⲓⲁⲃⲟⲗⲟⲥ ⲁϥⲥⲱⲣⲙ ⲙⲡⲉϥϩⲏⲧ ⲛⲥⲁⲃⲟⲗ ⲙⲡⲛⲟⲩⲧⲉ · ⲉⲧⲣⲉϥⲉⲓⲣⲉ ⲛⲛⲉⲧⲉⲙⲉϣϣⲉ · |
| s-4
| ⲁϥϣⲙϣⲉ ⲛⲛⲉⲓⲇⲱⲗⲟⲛ · ⲁϥⲕⲱ ⲛⲥⲱϥ ⲙⲡⲛⲟⲩⲧⲉ ⲛⲧⲡⲉ · ⲉⲧⲃⲉϩⲉⲛϣⲉ ⲙⲛϩⲉⲛⲱⲛⲉ · ⲙⲛϩⲉⲛⲙⲟⲩⲛⲅ ⲛϭⲓϫ ⲉⲩϣⲟⲩⲉⲓⲧ ⁛ |
| s-5
| ⲥⲱⲧⲙ ϭⲉ ⲧⲉⲛⲟⲩ ⲉⲧⲙⲛⲧϫⲱⲱⲣⲉ ⲛⲟⲩϣⲏⲣⲉ ϣⲏⲙ ϫⲉⲃⲓⲕⲧⲱⲣ · |
| s-6
| ⲇⲓⲟⲕⲗⲏϯⲁⲛⲟⲥ ⲇⲉ ⲡⲣⲣⲟ · ⲁϥⲥⲩⲙⲃⲟⲩⲗⲉⲩⲉ ⲉⲣⲛⲉⲧⲉⲙⲉϣϣⲉ ⲙⲡⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ⲁⲩⲱ ⲛⲁⲓ ⲛⲉ ⲛⲧⲁϥⲁⲁⲩ · |
| s-7
| ⲁϥⲧⲁⲙⲓⲟ ⲛⲥⲁϣϥⲉ ⲛⲧⲟⲩⲱⲧ ⲛⲛⲟⲩⲃ · ⲁϥϯⲣⲁⲛ ⲉⲣⲟⲟⲩ ϫⲉⲛⲟⲩⲧⲉ ⲛϩⲟⲓⲛⲉ ⲁⲛ ⲛⲉ · |
| s-8
| ⲁϥⲙⲟⲩⲧⲉ ⲉⲙⲁⲁⲃⲧⲏ ⲛⲛⲟⲩⲧⲉ ⲛϩⲟⲟⲩⲧ · ⲁⲩⲱ ⲙⲁⲁⲃⲧⲏ ⲛⲛⲟⲩⲧⲉ ⲛⲥϩⲓⲙⲉ · |
| s-9
| ⲁⲩⲱ ⲡⲥⲉⲉⲡⲉ ⲛⲛⲉϥⲛⲟⲩⲧⲉ ⲛϩⲟⲟⲩⲧ ϩⲓⲥϩⲓⲙⲉ · ⲥⲉⲉⲓⲣⲉ ⲛϣⲉϩⲙⲉ ϩⲛⲧⲉⲩⲏⲡⲉ · |
| s-10
| ⲇⲓⲟⲕⲗⲏϯⲁⲛⲟⲥ ⲇⲉ ⲡⲣⲣⲟ · ⲁϥⲧⲱϭⲉ ⲛⲟⲩⲥϩⲁⲓ ⲉⲃⲟⲗ ϩⲓⲣⲙⲡⲣⲟ ⲙⲡⲡⲁⲗⲗⲁϯⲟⲛ · ⲉϥⲥⲏϩ ⲛⲧⲉⲓϩⲉ · |
| s-11
| ⲁⲛⲟⲕ ⲇⲓⲟⲕⲗⲏϯⲁⲛⲟⲥ ⲡⲣⲣⲟ · ϯⲕⲉⲗⲉⲩⲉ ϫⲓⲛⲧⲉϩⲣⲱⲙⲁⲛⲓⲁ ϣⲁⲣⲏⲥ ⲉⲡⲉⲗⲁⲕ · ϫⲉⲉⲓⲧⲉ ⲉⲡⲁⲣⲭⲟⲥ · ⲉⲓⲧⲉ ⲥⲧⲣⲁⲧⲏⲗⲁⲧⲏⲥ · ⲉⲓⲧⲉ ⲕⲟⲙⲉⲥ · ⲉⲓⲧⲉ ⲉⲡⲓⲥⲕⲟⲡⲟⲥ · ⲉⲓⲧⲉ ⲡⲣⲉⲥⲃⲩⲧⲉⲣⲟⲥ · ⲉⲓⲧⲉ ⲇⲓⲁⲕⲟⲛⲟⲥ · ⲉⲓⲧⲉ ⲁⲛⲁⲅⲛⲱⲥⲧⲏⲥ · ⲉⲓⲧⲉ ϩⲙϩⲁⲗ · ⲉⲓⲧⲉ ⲣⲙϩⲉ · ⲉⲓⲧⲉ ⲙⲁⲧⲟⲓ · ⲉⲓⲧⲉ ⲡⲁⲅⲁⲛⲱⲥ ⲉⲩⲉϣⲙϣⲉ ⲧⲏⲣⲟⲩ ⲛⲛⲁⲛⲟⲩⲧⲉ · |
| s-12
| ⲁⲩⲱ ⲡⲉⲧⲛⲁϫⲟⲟⲥ ⲛϩⲏⲧⲟⲩ ϫⲉⲁⲛⲅ ⲟⲩⲭⲣⲓⲥϯⲁⲛⲟⲥ · ⲉⲩⲉϯⲙⲉⲉⲩⲉ ⲙⲙⲟϥ ⲛϥⲙⲟⲩ ϩⲛⲧⲥⲏϥⲉ · |
| s-13
| ⲛⲧⲱⲧⲛ ϭⲉ ⲧⲏⲣⲧⲛ ⲛⲥⲩⲛⲕⲗⲓϯⲕⲟⲥ ⲙⲡⲡⲁⲗⲗⲁϯⲟⲛ · ⲉⲧⲉⲧⲛⲁⲉⲓⲣⲉ ⲕⲁⲧⲁⲡⲇⲓⲁⲧⲁⲅⲙⲁ · ϫⲉⲕⲁⲥ ⲉⲣⲉⲣⲱⲙⲉ ⲛⲓⲙ ⲛⲁϣⲙϣⲉ ⲛⲛⲁⲛⲟⲩⲧⲉ · |
| s-14
| ϫⲉⲛⲁⲓ ⲛⲉ ⲛⲛⲟⲩⲧⲉ ⲉⲧϯ ⲛⲁⲛ ⲙⲡⲉϫⲣⲟ ϩⲙⲡⲡⲟⲗⲉⲙⲟⲥ · ⲁⲩⲱ ⲛⲧⲱⲧⲛ ϩⲱⲧⲧⲏⲩⲧⲛ ⲛⲥⲉϣⲱⲡⲉ ⲛⲏⲧⲛ ⲛⲛⲁϣⲧⲉ · ⲉⲩϯϭⲟⲙ ⲛⲏⲧⲛ ⲙⲛⲡⲉⲥⲧⲣⲁⲧⲉⲩⲙⲁ ⲧⲏⲣϥ · |
| s-15
| ϫⲉⲕⲁⲥ ⲡⲉⲧⲉⲛϥⲛⲁϣⲟⲣⲡϥ ⲁⲛ · ⲛϥⲉⲓ ⲉϩⲧⲟⲟⲩⲉ ⲛⲧⲛⲃⲱⲕ ⲉⲡⲣⲡⲉ ϩⲓⲟⲩⲥⲟⲡ · ⲛⲧⲛⲑⲩⲥⲓⲁⲍⲉ ⲛⲛⲛⲟⲩⲧⲉ · |
| s-16
| ⲁⲩⲱ ⲡⲉⲧⲉⲛϥⲛⲏⲩ ⲁⲛ · ⲉⲩⲉⲕⲁⲧⲁⲡⲟⲛϯⲍⲉ ⲙⲙⲟϥ ⲉⲧⲑⲁⲗⲁⲥⲥⲁ · ϣⲁⲛⲧⲟⲩⲉⲓⲙⲉ ϫⲉⲁⲛⲟⲕ ⲡⲉ ⲡⲣⲣⲟ ⲉⲧⲉⲙⲛⲕⲉⲟⲩⲁ ⲛⲃⲗⲗⲁϥ · |
| s-17
| ϩⲧⲟⲟⲩⲉ ⲇⲉ ⲛⲥⲟⲩⲟⲩⲁ ⲙⲡⲁⲣⲙⲟⲩⲧⲉ · ⲁⲇⲓⲟⲕⲗⲏϯⲁⲛⲟⲥ ⲡⲣⲣⲟ ⲙⲛⲡⲉϥⲥⲧⲣⲁⲧⲉⲩⲙⲁ ⲧⲏⲣϥ · ⲙⲛⲛⲉⲡⲁⲣⲭⲟⲥ ⲙⲛⲛⲉⲥⲧⲣⲁⲧⲏⲗⲁⲧⲏⲥ · ⲁⲩⲃⲱⲕ ⲉⲡⲣⲡⲉ : — |
| s-18
| ⲡⲣⲣⲟ ⲇⲉ ⲁϥϩⲙⲟⲟⲥ ⲉϫⲙⲡⲉⲑⲣⲟⲛⲟⲥ · ⲁϥⲧⲣⲉⲡⲓⲕⲩⲣⲓⲝ ⲱϣ ⲉⲃⲟⲗ · |
| s-19
| ϫⲉⲁⲙⲏⲓⲧⲛ ⲁⲣⲓⲑⲩⲥⲓⲁⲍⲉ ⲱ ⲛⲣⲱⲙⲉ ⲛϩⲣⲱⲙⲁⲓⲟⲥ · |
| s-20
| ⲁⲡⲣⲣⲟ ⲧⲁⲙⲓⲉⲟⲩⲛⲟϭ ⲛⲃⲟⲙⲱⲥ ⲛϩⲁⲧ ⲙⲛⲟⲩϣⲟⲩⲣⲏ ⲛⲛⲟⲩⲃ : |
| s-21
| ⲁⲩⲱ ⲁϥⲧⲁⲙⲓⲉⲟⲩⲛⲟϭ ⲛⲥⲧⲩⲗⲗⲟⲥ ⲛⲛⲟⲩⲃ · |
| s-22
| ⲁϥⲕⲁⲁϥ ⲙⲡⲙⲧⲟ ⲉⲃⲟⲗ ⲛⲧϣⲏⲩⲉ ϫⲉⲕⲁⲥ ⲉⲩⲉⲧⲁⲗⲉⲡⲁⲡⲟⲗⲗⲱⲛ ⲉϫⲱϥ · |
| s-23
| ⲁϥⲕⲉⲗⲉⲩⲉ ⲛϭⲓⲡⲣⲣⲟ · ⲉⲧⲣⲉⲩⲛⲗⲓⲃⲁⲛⲟⲥ ϩⲓⲥⲁⲙⲓⲧ · ϩⲓⲛⲉϩ ⲙⲙⲉ · ϩⲓⲕⲟⲛϯⲧⲟⲛ · ⲉⲥⲉⲡⲱϩⲧ ⲉϫⲛⲧϣⲏⲩⲉ ⲉⲧⲙⲟⲩϩ · |
| s-24
| ⲙⲛⲛⲥⲱⲥ ⲁϥϫⲉⲣⲟ ⲛϣⲏⲧ ⲛⲕⲉⲣⲱⲛ ⲛⲛⲟⲩⲃ · ⲙⲛϥⲧⲟⲟⲩϣⲉ ⲛⲕⲉⲣⲱⲛ ⲛϩⲁⲧ · ⲙⲛϣⲏⲧ ⲛϩⲧⲟ ⲉⲩⲟⲩⲟⲃϣ · ⲁⲩⲥⲱⲕ ϩⲏⲧⲟⲩ ⲛⲛⲉϥⲛⲟⲩⲧⲉ ϣⲁⲡⲣⲡⲉ · |
| s-25
| ⲡⲣⲣⲟ ⲇⲉ ⲇⲓⲟⲕⲗⲏϯⲁⲛⲟⲥ · ⲛⲧⲉⲣⲟⲩⲉⲓⲛⲉ ⲉϩⲟⲩⲛ ⲛⲛⲉϥⲛⲟⲩⲧⲉ ⲉⲡⲣⲡⲉ · ⲁϥⲟⲛⲕϥ ⲉϩⲣⲁⲓ ϩⲓⲡⲉϥⲑⲣⲟⲛⲟⲥ · |
| s-26
| ⲁϥϥⲓ ⲙⲡⲉϥⲕⲗⲟⲙ ϩⲓϫⲱϥ · ⲁϥⲧⲁⲁϥ ⲉϫⲛⲧⲁⲡⲉ ⲙⲡⲁⲡⲟⲗⲗⲱⲛ · ⲁϥⲟⲩⲱϣⲧ ⲛⲁϥ ⲛϣⲟⲙⲛⲧ ⲛⲥⲟⲡ ⲉϥϫⲱ ⲙⲙⲟⲥ · |
| s-27
| ϫⲉⲛⲧⲕⲟⲩⲛⲟⲩⲧⲉ ⲉϥⲟⲛϩ ⲱ ⲡⲁⲡⲟⲗⲗⲱⲛ ⲡⲛⲟϭ ⲛⲛⲟⲩⲧⲉ · ⲡⲁⲓ ⲉⲧϯ ⲛⲁⲛ ⲙⲡⲉϫⲣⲟ ϩⲙⲡⲡⲟⲗⲉⲙⲟⲥ · |
| s-28
| ⲡⲣⲣⲟ ⲇⲉ ⲛⲧⲉⲣⲉϥⲟⲩⲱϣⲧ · ⲁⲡⲉϥⲕⲉϣⲟⲙⲛⲧ ⲛϣⲃⲏⲣ ⲉⲓ ⲉⲧⲣⲉⲩⲟⲩⲱϣⲧ · ϩⲣⲱⲙⲁⲛⲟⲥ · ⲙⲛⲃⲁⲥⲓⲗⲉⲓⲧⲏⲥ · ⲙⲛⲉⲩϩⲁⲓⲟⲥ · |
| s-29
| ⲛⲁⲓ ⲉϩⲉⲛ ϩⲓⲥⲱⲛ ϩⲱⲟⲩ ⲛⲉ ⲛⲣⲣⲟ · ⲁⲩⲱ ⲉⲣⲉⲡⲣⲣⲟ ⲙⲉ ⲙⲙⲟⲟⲩ ⲉⲙⲁⲧⲉ · |
| s-30
| ⲁϥϯ ⲇⲉ ⲛⲁⲩ ⲛⲧⲁⲉⲓⲟⲩ ⲛⲕⲉⲛⲧⲏⲛⲁⲣⲓⲟⲛ ⲛⲛⲟⲩⲃ ⲉⲡⲟⲩⲁ ⲭⲱⲣⲓⲥ ⲛⲁⲝⲓⲱⲙⲁ ⲛⲧⲙⲛⲧⲥⲧⲣⲁⲧⲏⲗⲁⲧⲏⲥ ⲙⲛⲛⲧⲁⲉⲓⲟ ⲛⲧⲁϥⲧⲁⲁⲩ ⲛⲁⲩ · |
| s-31
| ⲇⲓⲟⲕⲗⲏϯⲁⲛⲟⲥ ⲇⲉ ⲡⲉϫⲁϥ ⲛⲁⲩ · ϫⲉⲱ ⲛⲁϣⲃⲏⲣ ⲡⲉⲓⲑⲉ ⲙⲙⲟⲓ ϩⲱⲧⲧⲏⲩⲧⲛ ⲛⲧⲉⲧⲛⲟⲩⲱϣⲧ ⲛⲛⲁⲛⲟⲩⲧⲉ · |
| s-32
| ⲧⲉⲧⲛⲛⲁⲩ ⲛⲧⲱⲧⲛ ⲉⲛⲉⲓⲛⲟϭ ⲛϣⲁ ⲉⲧⲡⲟⲣϣ ⲉⲃⲟⲗ ⲙⲡⲟⲟⲩ · |
| s-33
| ϣⲉⲡⲟⲩϫⲁⲓ ⲙⲡⲁⲕⲣⲁⲧⲟⲥ · ⲙⲛⲡⲟⲩϫⲁⲓ ⲙⲡⲉⲥϣϥⲉ ⲛⲛⲟⲩⲧⲉ ⲙⲛⲡⲛⲟϭ ⲛⲛⲟⲩⲧⲉ ⲡⲁⲡⲟⲗⲗⲱⲛ · ϯⲛⲁⲧⲣⲉⲡⲕⲟⲥⲙⲟⲥ ⲟⲩⲱϣⲧ ⲛⲛⲁⲛⲟⲩⲧⲉ · |
| s-34
| ⲁⲩⲱ ⲛⲥⲉⲧⲁϣⲉⲟⲉⲓϣ ⲙⲡϣⲁ ⲙⲡⲟⲟⲩ ϩⲙⲡⲕⲟⲥⲙⲟⲥ ⲧⲏⲣϥ · |
| s-35
| ⲁⲩⲱ ⲛⲧⲱⲧⲛ ϩⲱⲧⲧⲏⲩⲧⲛ ⲧⲉⲧⲛⲁϯ ⲛϩⲉⲛⲭⲁⲣⲓⲥⲙⲁ ⲛⲇⲱⲣⲟⲛ ⲉⲡⲣⲡⲉ ⲙⲡⲁⲡⲟⲗⲗⲱⲛ · ⲭⲱⲣⲓⲥ ⲛⲉⲧⲉⲣⲉⲛⲉⲡⲁⲣⲭⲟⲥ ⲛⲁⲧⲁⲁⲩ ⲙⲛⲛⲉⲥⲧⲣⲁⲧⲏⲗⲁⲧⲏⲥ · |
| s-36
| ϩⲣⲱⲙⲁⲛⲟⲥ ⲇⲉ ⲁϥϯⲙⲁⲁⲃ ⲛⲕⲉⲛⲧⲏⲛⲁⲣⲓⲟⲛ ⲛⲛⲟⲩⲃ · ⲃⲁⲥⲓⲗⲉⲓⲧⲏⲥ ⲇⲉ ⲁϥϯϫⲟⲩⲱⲧ · ⲉⲩϩⲁⲓⲟⲥ ⲁϥϯⲙⲏⲧ · ⲡⲣⲣⲟ ⲇⲉ ⲁϥϯⲥⲉ · |
| s-37
| ϩⲱⲥⲧⲉ · ϣⲉ ϫⲟⲩⲱⲧ ⲛⲕⲉⲛⲧⲏⲛⲁⲣⲓⲟⲛ ⲛⲛⲟⲩⲃ ⲛⲥⲉⲧⲁⲁⲩ ⲛⲭⲁⲣⲓⲥⲙⲁ ⲙⲡⲁⲡⲟⲗⲗⲱⲛ · |
| s-38
| ⲁϥϯϣⲟⲙⲛⲧ ⲛⲱⲛⲉ ⲙⲙⲉ ⲉⲡⲉⲕⲗⲟⲙ ⲙⲡⲁⲡⲟⲗⲗⲱⲛ ⲉⲛⲁϣⲉⲥⲟⲩⲉⲛⲧⲟⲩ · |
| s-39
| ⲡⲣⲣⲟ ⲇⲉ ⲡⲉϫⲁϥ ⲛϩⲣⲱⲙⲁⲛⲟⲥ ⲡⲉⲥⲧⲣⲁⲧⲏⲗⲁⲧⲏⲥ · |
| s-40
| ϫⲉⲑⲩⲥⲓⲁⲍⲉ ⲛⲛⲁⲛⲟⲩⲧⲉ · |
| s-41
| ⲁϥϯⲡⲉϥⲟⲩⲟⲓ ⲁϥⲑⲩⲥⲓⲁⲍⲉ ⲙⲛⲡⲉϥⲕⲉϣⲃⲏⲣ ⲥⲛⲁⲩ : — |
| s-42
| ⲁⲩⲱ ⲡⲕⲉⲥⲉⲉⲡⲉ ⲛⲛⲛⲟϭ ⲉⲧϩⲙⲡⲡⲁⲗⲗⲁϯⲟⲛ · |
| s-43
| ϩⲙⲡⲉϩⲟⲟⲩ ⲉⲧⲙⲙⲁⲩ · ⲁⲥⲉ ⲛⲧⲃⲁ ⲙⲙⲁⲧⲟⲓ ⲟⲩⲱϣⲧ ⲙⲛϣⲏⲧ ⲛⲧⲃⲁ ⲙⲡⲁⲅⲁⲛⲱⲥ · ⲉⲣⲉⲙⲙⲏⲏϣⲉ ⲧⲏⲣⲟⲩ ⲥⲟⲟⲩϩ ⲉⲧⲉⲑⲩⲥⲓⲁ ⲙⲡⲣⲣⲟ · |
| s-44
| ⲛⲧⲉⲣⲉⲡⲟⲣⲇⲓⲛⲟⲛ ⲇⲉ ⲛⲟⲩⲡⲣⲟⲧⲉⲕⲧⲱⲣ ⲧⲁϩⲟϥ · ⲉⲡⲉϥⲣⲁⲛ ⲡⲉ ⲃⲁⲥⲓⲗⲉⲓⲧⲏⲥ · |
| s-45
| ⲙⲡⲉϥⲑⲩⲥⲓⲁⲍⲉ ⲛⲛⲛⲟⲩⲧⲉ ⲙⲡⲣⲣⲟ · |
| s-46
| ⲁⲗⲗⲁ ⲁⲇⲓⲟⲕⲗⲏϯⲁⲛⲟⲥ ⲙⲟⲟⲩⲧ ⲙⲙⲟϥ ⲙⲛⲛⲁⲡⲉϥⲏⲓ ⲧⲏⲣⲟⲩ · |
| s-47
| ⲧⲡⲟⲗⲓⲥ ⲇⲉ ⲧⲏⲣⲥ ⲁⲥⲛⲟⲉⲓⲛ ϩⲓⲧⲛⲧⲁⲫⲟⲣⲙⲏ ⲙⲡⲙⲏⲏϣⲉ · |
| s-48
| ⲁⲩⲱ ⲁⲛⲣⲱⲙⲉ ⲣⲁⲡⲟⲡⲛⲓⲅⲉ ϩⲓⲧⲙⲡⲉⲥⲧⲟⲓ ⲙⲡⲗⲓⲃⲁⲛⲟⲥ · ⲙⲛⲡϣⲟⲩϩⲏⲛⲉ ⲉⲧⲉⲣⲉⲛⲣⲱⲙⲉ ⲧⲁⲗⲟ ⲙⲙⲟϥ ⲉϩⲣⲁⲓ : — |
| s-49
| ⲛⲉⲛⲧⲁⲩⲙⲟⲩ ⲅⲁⲣ ϩⲙⲡϩⲟϫϩϫ ⲛⲙⲙⲏⲏϣⲉ · ⲉⲩⲛⲁⲣϯⲟⲩ ⲛϣⲟ · ⲭⲱⲣⲓⲥ ⲛⲉⲛⲧⲁⲩⲙⲟⲩ ϩⲙⲡⲣⲡⲉ · ⲉⲩⲛⲁⲣⲕⲉϥⲧⲟⲟⲩϣⲉ · |
| s-50
| ⲡⲣⲣⲟ ⲇⲉ ⲇⲓⲟⲕⲗⲏϯⲁⲛⲟⲥ ⲁϥϩⲣⲟⲕⲉⲩⲉ ⲛⲧⲡⲟⲗⲓⲥ ⲧⲏⲣⲥ · ⲉϥϫⲱ ⲙⲙⲟⲥ |
| s-51
| ϫⲉⲉⲧⲉⲧⲛϣⲁⲛⲟⲩⲱ ⲉⲧⲉⲧⲛⲑⲩⲥⲓⲁⲍⲉ · ⲟⲩⲱⲙ ⲛⲧⲉⲧⲛⲥⲱ ϩⲓⲣⲙⲡⲣⲟ ⲙⲡⲁⲡⲟⲗⲗⲱⲛ ⲙⲛⲧⲁⲣⲧⲉⲙⲓⲥ · |
| s-52
| ⲛⲧⲉⲧⲛϯⲉⲟⲟⲩ ⲛⲁⲩ · ϫⲉⲛⲧⲟⲟⲩ ⲛⲉ ⲛⲧⲁⲩⲧⲁⲙⲓⲉⲧⲡⲉ ⲙⲛⲡⲕⲁϩ · ⲙⲛⲧⲑⲁⲗⲁⲥⲥⲁ ⲙⲛⲛⲣⲱⲙⲉ · |
| s-53
| ⲡⲣⲣⲟ ⲇⲉ ⲁϥⲁⲛⲁⲭⲱⲣⲉⲓ ⲉⲡⲡⲁⲗⲗⲁϯⲟⲛ ⲙⲡⲛⲁⲩ ⲙⲡⲁⲣⲓⲥⲧⲟⲛ · |
| s-54
| ⲁϥⲙⲟⲩⲧⲉ ⲉϩⲣⲱⲙⲁⲛⲟⲥ ⲡⲉⲥⲧⲣⲁⲧⲏⲗⲁⲧⲏⲥ ⲡⲉϫⲁϥ ⲛⲁϥ · |
| s-55
| ϫⲉϫⲓ ⲙⲡⲉⲓⲇⲓⲁⲧⲁⲅⲙⲁ · ⲙⲁⲣⲉⲛⲕⲉⲥⲉⲉⲡⲉ ⲙⲙⲏⲏϣⲉ ⲑⲩⲥⲓⲁⲍⲉ ⲙⲡⲁⲧⲕⲁⲛⲁⲭⲱⲣⲉⲓ · |
| s-56
| ϩⲣⲱⲙⲁⲛⲟⲥ ⲇⲉ ⲡⲉⲥⲧⲣⲁⲧⲏⲗⲁⲧⲏⲥ ⲁϥϫⲓ ⲙⲡⲇⲓⲁⲧⲁⲅⲙⲁ ⲛⲧⲟⲟⲧϥ ⲙⲡⲣⲣⲟ · |
| s-57
| ⲁϥⲕⲉⲗⲉⲩⲉ ⲛⲙⲙⲏⲏϣⲉ ϫⲉⲑⲩⲥⲓⲁⲍⲉ ⲱ ⲛⲣⲱⲙⲉ ⲛϩⲣⲱⲙⲁⲓⲟⲥ · |
| s-58
| ⲁⲥϣⲱⲡⲉ ⲇⲉ ⲛⲧⲉⲣⲟⲩⲑⲩⲥⲓⲁⲍⲉ ⲧⲏⲣⲟⲩ · ⲁⲡⲟⲣⲇⲓⲛⲟⲛ ⲙⲡⲉϥϣⲏⲣⲉ ⲧⲁϩⲟϥ ⲉⲧⲣⲉϥⲑⲩⲥⲓⲁⲍⲉ · |
| s-59
| ⲟⲩϣⲏⲣⲉ ⲡⲉ ⲉϥϩⲛⲙⲛⲧⲯⲓⲧⲉ ⲛⲣⲟⲙⲡⲉ · ⲉϥϣⲙϣⲉ ⲙⲡⲛⲟⲩⲧⲉ · ⲁⲩⲱ ⲉϥⲣϩⲟⲧⲉ ϩⲏⲧⲟⲩ ⲛⲛⲉϥⲉⲛⲧⲟⲗⲏ · |
| s-60
| ⲉϥⲟ ⲙⲡⲁⲣⲑⲉⲛⲟⲥ ϩⲙⲡⲉϥⲥⲱⲙⲁ · ⲉϥⲟⲩⲱⲙ ⲛⲟⲩⲥⲟⲡ ⲕⲁⲧⲁⲥⲁⲃⲃⲁⲧⲟⲛ · ⲉϥϣⲗⲏⲗ ϩⲛⲛⲉⲩϣⲟⲟⲩⲉ · |
| s-61
| ϫⲓⲛⲡⲉϩⲟⲟⲩ ⲛⲧⲁϥⲥⲱⲧⲙ ⲉⲛⲉⲭⲣⲓⲥϯⲁⲛⲟⲥ ⲉⲩⲱϣ ⲉⲣⲟϥ ϩⲛⲧⲉⲕⲕⲗⲏⲥⲓⲁ · ⲁⲡⲉϥϩⲏⲧ ⲃⲱⲕ ⲉϩⲣⲁⲓ ⲉⲙⲡⲏⲩⲉ · |
| s-62
| ⲁϥⲙⲉⲥⲧⲉ ⲡⲕⲟⲥⲙⲟⲥ · ⲛⲉⲙⲉϥⲥⲉⲏⲣⲡ ⲇⲉ · ⲟⲩⲇⲉ ⲙⲉϥⲟⲩⲉⲙϭⲓⲛⲟⲩⲱⲙ ⲉϥϩⲏⲙ · |
| s-63
| ⲟⲩⲇⲉ ⲧⲟⲃⲧⲃ ⲟⲩⲇⲉ ⲙⲉϥϣⲟⲩϣⲟⲩ ⲙⲙⲟϥ ϩⲛⲟⲩϩⲃⲥⲱ ⲛϩⲟⲉⲓⲧⲉ ⲉⲛⲉϩ · |
| s-64
| ⲟⲩⲇⲉ ⲙⲉϥⲁⲗⲉ ⲉϩⲧⲟⲟⲩ ⲇⲉ ϩⲁⲣⲙⲁ · |
| s-65
| ⲟⲩⲇⲉ ⲙⲉϥⲟⲩⲱⲙ ⲙⲛⲡⲉϥⲉⲓⲱⲧ · ⲟⲩⲇⲉ ⲙⲉϥϣⲁϫⲉ ⲛⲙⲙⲁϥ · ϩⲓⲧϩⲏ ⲛⲛⲟϭ ⲉⲣⲟϥ · |
| s-66
| ⲏ ⲛϥϫⲱ ⲛⲟⲩϣⲁϫⲉ ⲛϣⲗⲟϥ · |
| s-67
| ⲟⲩⲇⲉ ⲙⲉϥⲱⲣⲕ ⲗⲁⲁⲩ ⲛⲁⲛⲁϣ ⲉⲡⲧⲏⲣϥ · |
| s-68
| ⲁⲩⲱ ⲉϥϣⲁⲛⲥⲱⲧⲙ ⲉⲧⲃⲉⲟⲩⲁ ⲉϥⲟⲧⲡ ⲉϩⲟⲩⲛ · ⲉϣⲱⲡⲉ ⲟⲩⲭⲣⲓⲥϯⲁⲛⲟⲥ ⲡⲉ ϣⲁϥⲇⲓⲁⲕⲟⲛⲉⲓ ⲉⲣⲟϥ · |
| s-69
| ⲁⲩⲱ ϣⲁϥϯⲧⲉϥⲭⲣⲉⲓⲁ ⲛⲁϥ · ⲭⲱⲣⲓⲥ ⲧⲁⲙⲉⲡⲉϥⲉⲓⲱⲧ ⲙⲛⲧⲉϥⲙⲁⲁⲩ : — |
| s-70
| ⲁⲩⲱ ⲟⲛ ⲭⲱⲣⲓⲥ ⲛⲉⲧϥϯ ⲙⲙⲟⲟⲩ ⲛⲛⲉϥϩⲙϩⲁⲗ ⲙⲙⲏⲏⲛⲉ · |
| s-71
| ϣⲁϥϣⲟⲣⲡϥ ⲉϩⲧⲟⲟⲩⲉ ⲙⲙⲏⲏⲛⲉ · ⲛϥⲉⲓ ⲉⲃⲟⲗ ⲉϫⲙⲡⲣⲟ ⲙⲡⲉϥⲏⲓ · |
| s-72
| ⲉϥϣⲁⲛⲛⲁⲩ ⲉⲟⲩⲁ ⲉϥⲕⲏⲕⲁϩⲏⲩ · ϣⲁϥⲕⲁⲁϥ ⲕⲁϩⲏⲩ ⲛⲧⲉϥϣⲧⲏⲛ ⲛϥⲧⲁⲁⲥ ⲛⲁϥ · |
| s-73
| ⲁⲩⲱ ⲛⲉϥⲉⲓⲣⲉ ⲛⲛⲉⲛⲧⲟⲗⲏ ⲧⲏⲣⲟⲩ ⲉⲧⲥⲏϩ · |
| s-74
| ⲁⲩⲱ ⲛⲉϥϫⲱⲕ ⲉⲃⲟⲗ ⲙⲡϣⲁϫⲉ ⲛⲛⲉⲩⲁⲅⲅⲉⲗⲓⲟⲛ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · |
| s-75
| ⲡⲉϥⲉⲓⲱⲧ ⲇⲉ ⲁϥϩⲓⲥⲉ ⲛⲙⲙⲁϥ · ϫⲉⲉⲓⲛⲁϫⲓ ⲛⲁⲕ ⲛⲧϣⲉⲉⲣⲉ ⲛⲃⲁⲥⲓⲗⲉⲓⲧⲏⲥ ⲡⲉⲥⲧⲣⲁⲧⲏⲗⲁⲧⲏⲥ · |
| s-76
| ⲛⲉⲁⲩⲥⲙⲛⲧⲥ ⲅⲁⲣ ⲙⲛⲛⲉⲩⲉⲣⲏⲩ · ⲉϣⲏⲧ ⲛⲕⲉⲛⲧⲏⲛⲁⲣⲓⲟⲛ ⲛⲛⲟⲩⲃ · ⲭⲱⲣⲓⲥ ⲛⲧⲁⲉⲓⲟ · ⲁⲩⲱ ϥⲧⲟⲟⲩϣⲉ ⲛⲕⲉⲛⲧⲏⲛⲁⲣⲓⲟⲛ ⲛϩⲁⲧ · |
| s-77
| ⲙⲛⲙⲏⲧ ⲛϩⲙϩⲁⲗ ⲛϩⲟⲟⲩⲧ · ⲙⲛⲙⲏⲧ ⲛϣⲉ ⲛϩⲙϩⲁⲗ ⲛⲥϩⲓⲙⲉ · ⲉⲩϫⲓ ⲙⲁⲛⲓⲁⲕⲏⲥ ⲛⲛⲟⲩⲃ · ⲙⲛϥⲧⲟⲟⲩ ⲛϣⲉ ⲛϩⲧⲟ · ⲁⲩⲱ ⲙⲏⲧ ⲛϣⲉ ⲙⲙⲁⲥⲡⲟⲣⲕ · ⲙⲛⲙⲏⲧ ⲛϣⲉ ⲛϭⲁⲙⲟⲩⲗ · ⲙⲛⲙⲏⲧ ⲛϣⲉ ⲛⲥⲧⲉⲓⲱϩⲉ ⲛϭⲱⲙ · |
| s-78
| ⲙⲛⲙⲏⲧ ⲛϣⲉ ⲛϭⲓⲛⲟⲩⲃⲁⲗ ⲉⲩⲡⲗⲉⲁ ϩⲛⲧⲑⲁⲗⲁⲥⲥⲁ · ⲙⲛⲙⲏⲧ ⲛⲏⲓ ⲉⲣⲉⲙⲏⲧ ⲛⲥⲧⲉⲓⲱϩⲉ ⲉⲛⲟⲩⲁ ⲛϩⲏⲧⲟⲩ · |
| s-79
| ⲭⲱⲣⲓⲥ ⲛⲉⲧⲉⲣⲉⲡⲉϥⲉⲓⲱⲧ ⲛⲁⲧⲁⲁⲩ ⲛⲁϥ · ϩⲉⲛⲛⲟϭ ⲛϩⲩⲡⲉⲣⲉⲥⲓⲁ ⲛⲉⲩϣⲟⲟⲡ ⲛⲁϥ ϩⲓϫⲙⲡⲕⲁϩ · |
| s-80
| ⲡⲙⲁⲕⲁⲣⲓⲟⲥ ⲇⲉ ⲁⲡⲁ ⲃⲓⲕⲧⲱⲣ · ⲙⲡⲉϥⲡⲉⲓⲑⲉ ⲛⲁⲩ · ⲉϥϫⲱ ⲙⲙⲟⲥ |
| s-81
| ϫⲉⲛⲁⲓ ⲧⲏⲣⲟⲩ ⲥⲉⲛⲁⲧⲁⲕⲟ : — |
| s-82
| ⲉϥϩⲁⲣⲉϩ ⲛⲁϥ ⲉⲧⲙⲛⲧⲣⲣⲟ ⲛⲙⲡⲏⲩⲉ · |
| s-83
| ⲛⲉϣⲁⲣⲉⲡϫⲟⲉⲓⲥ ⲓⲏⲥⲟⲩⲥ ⲟⲩⲱⲛϩ ⲉⲣⲟϥ ⲛϩⲟ ϩⲓϩⲟ · ⲉϥⲙⲉ ⲙⲙⲟϥ ⲉⲧⲃⲉⲡⲉϥⲧⲃⲃⲟ · |
| s-84
| ⲡⲅⲉⲛⲛⲁⲓⲟⲥ ⲇⲉ ⲁⲡⲁ ⲃⲓⲕⲧⲱⲣ · ⲁϥⲕⲱ ⲛⲁϥ ⲛⲟⲩⲉⲝⲉⲇⲣⲁ ⲛϩⲟⲩⲛ ⲙⲡⲉϥⲏⲓ : — ⲉϥⲁⲛⲁⲭⲱⲣⲉⲓ ⲛϩⲏⲧⲥ ⲁϫⲛⲛⲉϥⲉⲓⲟⲧⲉ · |
| s-85
| ⲙⲡϥⲛⲕⲟⲧⲕ ⲅⲁⲣ ⲉϭⲗⲟϭ ϫⲓⲛⲉϥϩⲛⲙⲛⲧⲏ ⲛⲣⲟⲙⲡⲉ · |
| s-86
| ⲁⲗⲗⲁ ⲛⲉϥϣⲗⲏⲗ ⲙⲡⲉϩⲟⲟⲩ ⲙⲛⲧⲉⲩϣⲏ · ⲁⲩⲱ ⲛⲉϥⲛⲏⲥⲧⲉⲩⲉ ϫⲓⲛⲡⲥⲁⲃⲃⲁⲧⲟⲛ ϣⲁⲡⲥⲁⲃⲃⲁⲧⲟⲛ · |
| s-87
| ⲉϥⲉⲓⲣⲉ ⲛⲛⲉϥⲥⲩⲛⲁⲝⲓⲥ · |
| s-88
| ϣⲁϥⲣϣⲙⲛⲧϣⲉⲥⲉⲧⲏ ⲛⲥⲟⲡ ⲛϣⲗⲏⲗ ⲙⲡⲉϩⲟⲟⲩ · ⲁⲩⲱ ⲥⲁϣϥ ⲛϣⲉ ⲙⲁⲁⲃ ⲛⲧⲉⲩϣⲏ · |