| s-1
| † Благословление от владыцѣ, поклонъ от посадника, и от тысячкого, и от всѣхъ старѣишиихъ, и от всѣхъ мѣншиихъ, и от всего Новагорода господину князю великому Михаилу. |
| s-2
| На семь, господине, Новгородъ всь хрьстъ цѣлуеть. |
| s-3
| Княжение твое честьно дьржяти по пошлинѣ, безъ обиды; а тобѣ, господине, такоже дьржяти Новъгородъ по пошлинѣ, безъ обиды. |
| s-4
| Что свободъ Дмитриевыхъ и Андрѣевыхъ, и что сельць тягнуло къ тымъ свободамъ, того всего тобѣ съступитися, то все къ Новугороду бес кунъ. |
| s-5
| А что, княже, селъ твоихъ, и владычьнихъ, и княгыниныхъ, и бояръ твоихъ, и слугъ твоихъ на Новгородьскои земли: которое село зашло бес кунъ, то бес кунъ поидеть къ Новугороду; а кто купилъ, а тыи знаеть своего истьца или дѣти его; истьца ли не будеть ни дѣтии его, цѣловати ему хрьстъ, како истьча не свѣдаеть, взяти ему куны, колико будеть далъ, по исправѣ, а земля къ Новугороду. |
| s-6
| А рубежь ти, княже, межю Суждальскою землею и Новгородьскою дати ти старыи, како было при дѣдѣ твоемь и при отци твоемь Ярославѣ. |
| s-7
| А что волостьи новгородьскыихъ, тѣхъ волостьи тобѣ не дьржяти, княже, своими мужи, дьржати мужи новгородьскыми; а даръ тобѣ имати от тѣхъ волостьи. |
| s-8
| А бес посадника ти, княже, суда не судити, ни волостьи роздавати, ни грамотъ давати. |
| s-9
| А без вины мужя волости не лишити. |
| s-10
| А в Русу ѣздити, княже, въ осень, како пошло. |
| s-11
| А лѣтѣ ездити на Озвадъ звѣрии гонитъ. |
| s-12
| А за Волокъ ти слати своего мужя изъ Новагорода въ дву носаду, по пошлинѣ; а опять ехати туды же на Новъгородъ, а съ Низу ти не слати; такоже и въ Бѣжицѣ. |
| s-13
| А что пошлинъ князю въ Новгородьскои волости, того вы мене не таити въ всѣхъ волостьхъ. |
| s-14
| А холопы и поручникы выдавати. |
| s-15
| А всему тому судъ въ Новѣгородѣ. |
| s-16
| А что ти, княже, пошло, на Тържьку и на Волоцѣ: тиунъ свои дьржяти на своеи части, а новгородца на своеи части. |
| s-17
| А въ Бѣжицахъ тобѣ, княже, ни твоеи княгыни, ни твоимъ бояромъ, ни твоимъ слугамъ селъ не дьржати, ни купити, ни даромъ приимати, ни по всеи волости Новгородьскои. |
| s-18
| А се, княже, волости новгородьскыи: Волокъ съ всѣми волостьми, Тържькъ, Бѣжицѣ, Палиць Городьць, Мелеча, Шипино, Егна, Заволочие, Терѣ, Пермь, Печера, Югра, Вологда. |
| s-19
| А свинии ти бити за 60 вьрстъ от города. |
| s-20
| А в Ладогу ти, княже, слати осетрьника и медовара по грамотѣ дѣда твоего Ярослава. |
| s-21
| А ездити тобѣ, княже, в Ладогу на 3-е лѣто. |
| s-22
| А из Бѣжиць, княже, людьи не выводити въ свою волость, ни зъ иныхъ волостьи новгородьскыихъ, ни грамотъ имъ давати, ни закладневъ приимати ни княгыни твоеи, ни бояромъ твоимъ, ни слугамъ твоимъ: ни смьрда, ни купчины. |
| s-23
| А грамотъ ти не посужати. |
| s-24
| А пожнѣ, что твои и твоихъ мужь пошло, то твое и твоихъ мужь; а новгородьское Новугороду. |
| s-25
| А дворяномъ твоимъ, како пошло, погонъ имати: от князя по 5 кунъ, а от тиуна по двѣ дългѣи. |
| s-26
| А что, княже, мытъ по Суждальскои земли и въ твоеи волости: от воза имати по двѣ вѣкшѣ, и от лодии, и от хмелна короба, и от лняня. |
| s-27
| А дворяномъ твоимъ у купьць повозовъ не имати, развѣ ратнои вѣсти. |
| s-28
| А свободъ ти и мытовъ на Новгородьскои волости не ставити. |
| s-29
| А холопъ или роба почнеть вадити на господу, тому ти вѣры не яти. |
| s-30
| А на Низу тобѣ, княже, новгородчя не судити, ни волости роздавати. |
| s-31
| А кто почнеть [вад]ити к тобѣ, тому ти вѣры не яти. |
| s-32
| А въ Нѣмѣчкомъ дворѣ тобѣ, княже, търговати наше[ю брат]иею; а двора не затворяти; а приставовъ не приставливати. |
| s-33
| А гости нашему гостити межи Суждальскою землею безъ рубежя, по цесаревѣ грамотѣ. |
| s-34
| А судие слати тобѣ свое на Петровъ день, тако пошло. |
| s-35
| А вывода ти, княже, межи Суждальскою землею и Новгородьскою не чинити. |
| s-36
| А что закладниковъ въ Тържьку или индѣ, или за тобою, или за княгынею, или за мужи твоими: кто купьць, поидеть въ свое сто; а смьрдъ поидеть въ свои погостъ; тако пошло въ Новѣгородѣ, отпусти ихъ прочь. |
| s-37
| А гнѣва ти, княже, до Новагорода не дьржяти ни до одиного человека. |
| s-38
| А ряду въ Новгородьскои волости тобѣ, княже, и твоимъ судиямъ не посужяти. |
| s-39
| А самосуда не замышляти. |
| s-40
| А старостѣ ни холопа ни робы безъ господаря твоимъ судиямъ не судити. |
| s-41
| А за рубежь из Новгородьскои волости твоимъ дворяномъ суда не водити, ни судити. |
| s-42
| А свободъ ти и селъ съступитися. |