| s-101
| Հայր սուրբը յատուկ ձեւով յիշեցուց, թէ եկեղեցւոյ առաքելական ստորոգելին կու գայ Քրիստոսի առաքեալներէն եւ առաքեալները այն աշակերտներն են, որոնք Քրիստոսէ կանչուած եւ ապա իր կողմէ աշխարհ ուղարկուած էին Աւետարանը քարոզելու։ |
| s-102
| Առաքեալ բառի նշանակութեան անդրադառնալէ յետոյ՝ յայտնեց, թէ հաւաքական առաքելութիւնները յաջողութեամբ պսակելու համար նախ անհատական առաքելութիւնները պէտք է յաջողին։ |
| s-103
| Հաւատացեալներ պէտք է իւրացնեն իրենց առաքելութիւնը եւ այդ առաքելութիւնը աճեցնելու համար իտէալներ ունենան, ապա իրենց անհատական կարողութիւնները ի սպաս դնեն հասարակութեան։ |
| s-104
| Իբր այդ, ժողովուրդը հրաւիրեց նորոգուելու իրենց արժէքներուն մէջ ու դառնալու հաւատոյ արժէքներու առաքեալներ։ |
| s-105
| Արարողութեան ընթացքին բազմաթիւ հաւատացեալներ հաղորդուեցան, իսկ հայր սուրբի վերջին օրհնութեամբ Ս. Պատարագը իր աւարտին հասաւ։ |
| s-106
| Երկուշաբթի, Յուլիս 5, 2021 |
| s-107
| ԵԴՈՒԱՐԴ ԳՈՎԱՆԻ ՓԱՌԱՇՈՒՔ ՅՈՒՂԱՐԿԱՒՈՐՈՒԹԻՒՆԸ՝ ԳՈՒՄԳԱԲՈՒԻ ԱԹՈՌԱՆԻՍՏ ՄԱՅՐ ԵԿԵՂԵՑՒՈՅ ՄԷՋ |
| s-108
| Գումգաբուի Ս. Աստուածածին Աթոռանիստ Մայր եկեղեցին երէկ կէսօրուան ժամերուն համախմբեց հոծ թիւով յուղարկաւորներ, որոնք փութացած էին իրենց վերջին յարգանքը մատուցելու նորոգ հանգուցեալ ելմտագէտ եւ համայնքային գործիչ Եդուարդ Գովանի նկատմամբ։ |
| s-109
| Վերջին օրերուն Եդուարդ Գովանի կորուստը մեծ ցաւ յառաջացուց համայնքային կեանքէն ներս՝ հաշուի առնելով, որ ան երկար տասնամեակներ անսակարկ նուիրումով ծառայութիւն եւ լուրջ ներդրում բերած էր թրքահայ կեանքին։ |
| s-110
| Տասնամեակներու իր վաստակի լոյսին տակ, Պատրիարքական Աթոռի տնօրինութեամբ Եդուարդ Գովան յաւերժութեան ճամբուեցաւ ազգային յուղարկաւորութեան կարգով։ |
| s-111
| Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան նախագահեց արարողութեան, որ հայրաբար մխիթարեց սգաւոր Գովան ընտանիքի անդամները։ |
| s-112
| Լուսաշող տաճարին կեդրոնը, մահաբեմին վրայ զետեղուած էր հանգուցեալին դագաղը, որու շուրջ շարուած էին կերոնակիրներ։ |
| s-113
| Արարողութեան հանդիսապետեց Կրօնական ժողովի ատենապետ, Պատրիարքական Աթոռի լուսարարապետ ու դիւանապետ Տ. Թաթուլ Ծ. Վրդ. Անուշեան, որու կողքին էին հոգեւոր հայրեր։ |
| s-114
| Յուզումնախառն մթնոլորտի մէջ բոլոր յուղարկաւորները աղօթեցին լուսահոգի Եդուարդ Գովանի յաւիտենական նենջի հանգստութեան համար եւ խորազգած վշտակցութիւններ յայտնեցին հարազատներուն։ |
| s-115
| Յուղարկաւորութենէն վերջ հանգուցեալին մարմինը ամփոփուեցաւ Պալըքլըի գերեզմանատան շիրիմին մէջ։ |
| s-116
| Այս տխուր առթիւ անգամ մը եւս ցաւակցութիւն կը յայտնենք հանգուցեալի այրիին՝ Երջանիկ Գովանի, որդւոյն՝ մեր սիրելի բարեկամ Գարուն-Մելինէ Գովան ամոլին եւ համայն ընտանիքին։ |
| s-117
| Շաբաթ, Յուլիս 3, 2021 |
| s-118
| ՄԻՇՏ ՍՈՒՐ ԵՐԿԸՆՏՐԱՆՔՆԵՐ |
| s-119
| Երէկ երեկոյեան, Ֆէրիգիւղի «Շիրինօղլու» սրահին մէջ տեղի ունեցաւ համայնքային կարեւոր խորհրդակցութիւն մը, որու ընթացքին օրակարգի վրայ եկան այն հրատապ հարցերը, որոնք ներկայիս պոլսահայ կրթական համակարգի օրակարգը կը զբաղեցնեն։ |
| s-120
| Ինչպէս հաղորդած էինք, ժողովին մասնակցեցան ատենապետները կամ ներկայացուցիչները մեր այն մատակարար մարմիններուն, որոնք կը հովանաւորեն վարժարան մը։ |
| s-121
| Նախատեսուած ձեւաչափէն դուրս, խորհրդակցութեան նախագահեց Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան, որու կողքին էր Պատրիարքական փոխանորդ Տ. Գրիգոր Ա. Քհնյ. Տամատեան։ |
| s-122
| Ամեն. Ս. Պատրիարք Հօր փափաքին ընդառաջ, նիստին մասնակցութիւն բերաւ նաեւ Սուրբ Փրկիչ Ազգային հիւանդանոցի հոգաբարձութեան ատենապետ Պետրոս Շիրինօղլու, որ ի պաշտօնէ կը գլխաւորէ նաեւ Թրքահայ վաքըֆներու միութիւնը (ԹՎՄ-ERVAB)։ |
| s-123
| Այս ժողովէն առաջ նախատեսուած էր Պատրիարքարանի եւ Սուրբ Փրկիչ Ազգային հիւանդանոցի կողմէ միայն ներկայացուցիչներու մասնակցութիւնը։ |
| s-124
| Բայց եւ այնպէս, հաշուի առնելով խնդիրներու հրատապ բնոյթը՝ Ամեն. Ս. Պատրիարք Հայրը որոշած էր նախագահել երէկուան խորհրդաժողովին եւ յարմար դատած էր նաեւ՝ Պետրոս Շիրինօղլուի մասնակցութիւնը։ |
| s-125
| Ժողովի ընթացքին Ամեն. Ս. Պատրիարք Հայրը խօսեցաւ ներածական մը, որու լոյսին տակ ծաւալուեցան քննարկումներ եւ բազմաթիւ ատենապետներ հանդէս եկան թեր ու դէմ կարծիքներով։ |
| s-126
| Նորին Ամենապատուութիւնը ժողովականներու տրամադրութեան տակ դրաւ նաեւ Պատրիարքական Աթոռին կողմէ պատրաստուած առաջարկ-նախագիծ մը, որ հիմնական սկզբունքներու շարադրանք մը կը համարուէր մեր կրթական կեանքի հիմնախնդիրներուն առընչութեամբ։ |
| s-127
| Առկայ նիւթական անելի լոյսին տակ՝ միշտ շեշտուեցաւ, որ շուրջ 3 հազար աշակերտութեան համար այսքան բարձր թիւով վարժարաններու ցանցի մը գոյութիւնը աւելի է։ |
| s-128
| Համայնքային վարիչները շեշտեցին նաեւ, որ մեր դպրոցները այլ բազում հասարակաց խնդիրներ ալ ունին՝ պիւտճէի բացերուն առընթեր։ |
| s-129
| Երէկուան խորհրդակցութեան լոյսին տակ Պատրիարքարանի կողմէ ալ հրապարակուեցաւ հաղորդագրութիւն մը, որու մէջ ընդգծուեցան Նորին Ամենապատուութեան ելոյթի կարգ մը առանցքները։ |
| s-130
| Ամեն. Ս. Պատրիարք Հայրը յիշեցուց համայնքային վարժարաններու դէմ յանդիման մնացած հարցերու մասին կատարելի քննարկումներուն ուղղութիւն մը տալու եւ լուծումներ որոնելու առաջադրութեամբ միասնական աշխատանք կատարելու կարեւորութիւնը։ |
| s-131
| Այս առումով ան ընդգծեց Պատրիարքական Աթոռոյ հովանաւորութեամբ, իր նախագահութեամբ եւ ԹՎՄ-ի ծիրէն ներս կազմելի մասնաւոր յանձնախումբի մը անհրաժեշտութիւնը։ |
| s-132
| Նորին Ամենապատուութիւնը բացատրեց այդ հաւանական յանձնախումբի ձեւաւորման եւ գործունէութեան տրամաբանութիւնը։ |
| s-133
| Ան յիշեցուց համայնքային վարիչներու արհեստավարժ զբաղումներու ծանրութիւնը, հետեւաբար կարեւորեց անոնց մասնակցութեամբ կազմելի ենթայանձնախումբերու գործի լծուիլը։ |
| s-134
| Այսպէս, վարժարաններու տնօրէնները պէտք է ներգրաւուին նախատեսուած աշխատանքներուն։ |
| s-135
| Առ այդ, այս ուղղութեամբ կազմուելիք տարբեր աշխատանքային խումբեր կրնան հետաքրքրուիլ վարժարաններու կրթական մակարդակով, հայերէնի եւ քրիստոնէական հաւատքի դաստիարակութեամբ, գեղարուեստով եւ մարզանքով, ինչպէս նաեւ վարժարաններու շէնքերը ֆիզիքապէս կատարելագործելու աշխատանքներով։ |
| s-136
| Այս բոլորին մէջ յատկապէս շեշտուեցան նաեւ նիւթական հարցերու ազդեցութիւնը եւ անոնց դէմ միջոցներ գտնելու ճանապարհները։ |
| s-137
| Ի շարունակութիւն Ամեն. Ս. Պատրիարք Հայրը անդրադարձաւ կրթական համակարգի դիմագրաւած խնդիրներուն համայնքային կեանքին վրայ գործած ազդեցութեան։ |
| s-138
| Թէեւ, ըստ երեւոյթին, վարժարաններու հիմնական խնդիրը նիւթական ըլլալ կը թուի, բայց եւ այնպէս, գոյութիւն ունին տարաբնոյթ հարցեր. ինչպէս՝ ուսուցիչներու վերապատրաստութիւն, հայերէնով արտայայտուելու դժուարութիւններ եւ այլն։ |
| s-139
| Ան շեշտեց, որ վարժարաններու վերաբերեալ հարցերը նաեւ սանուց միութիւններէ, դպրաց դասերէ եւ զանազան համայնքային կառոյցներէ ներս դուռ կը բանան ժխտական երեւոյթներու։ |
| s-140
| Նորին Ամենապատուութիւնը յիշեցուց, որ վարժարաններու մատակարար մարմիններու անդամները ներկայիս պատասխանատուներն են իրենց տնօրինութեան վստահուած վաքըֆներուն, հետեւաբար պէտք չէ խուսափին պատասխանատուութենէ եւ գործնական քայլեր պէտք է առնեն ի նպաստ մեր համայնքին։ |
| s-141
| Ակնարկելով առկախեալ ընտրութիւններու խնդրին, Ամեն. Ս. Պատրիարք Հայրը յայտնեց, որ համայնքի այժմու աշխարհական վարիչները թէեւ հին են, սակայն ոչ հինցած։ |
| s-142
| Ուստի, փորձառութեան գործօնը կրնայ լուծման խթանի մը վերածուիլ կամք դրսեւորելու պարագային։ |
| s-143
| Քննարկումներու տեւողութեան համայնքային վարիչները կանգ առին արդիւնաւէտութեան հարցերու վրայ։ |
| s-144
| Ընդգծուեցաւ, որ հարցերը սահմանափակուած չեն մի միայն կարգ մը կարիքաւոր կառոյցներու համար՝ մեր ունեւոր կառոյցներէն գումարներ ճարելով։ |
| s-145
| Ատենապետ Պետրոս Շիրինօղլու շեշտեց, որ տնտեսական հաւասարակշռութիւնները հետզհետէ կը բարդանան։ |
| s-146
| Գնաճը գործնականօրէն հասած է 40 տոկոսի։ |
| s-147
| Իսկ մեր համայնքային կալուածներու հասոյթները լաւագոյն պարագային 15 տոկոսով կրնան բարձրանալ։ |
| s-148
| Ճար մը պէտք է գտնել այդ տարբերութիւնը հաւասարակշռելու համար։ |
| s-149
| Որոշուեցաւ, որ դպրոց հովանաւորող մատակարար մարմիններու ատենապետները յաջորդ շաբթուընէ սկսեալ աշխատանքային ձեւաչափի մէջ մէկտեղուին՝ վճռական լուծումներ գտնելու համար կրթական կեանքի խնդիրներուն։ |
| s-150
| Ուրբաթ, Յուլիս 2, 2021 |
| s-151
| ԿԵԴՐՈՆԱԿԱՆԻ ՀՈՒՆՁՔԸ |
| s-152
| Կեդրոնական վարժարանի 2020-2021 տարեշրջանի հունձքը նախընթաց օր աւանդական հանդէսով մը հրաժեշտ տուաւ կրթօճախին։ |
| s-153
| Դպրոցը այս տարի ունի 53 շրջանաւարտ։ |
| s-154
| Վկայականի բաշխման հանդիսութիւնը տեղի ունեցաւ վարժարանի սրահին մէջ, ուր անոնց ուղղեալ շնորհաւորութեան խօսքով մը հանդէս եկաւ տնօրէնուհի Սիլվա Գույումճեան։ |
| s-155
| Ներկաներու շարքին էին Ղալաթիոյ խնամակալութեան ատենապետ Յարութիւն Էպէօղլու եւ իր գործակից ընկերները, դպրոցի հիմնադրի ներկայացուցիչ Կարպիս Պալմումճու, կրթական մշակներ, յարակից մարմիններու ներկայացուցիչներ, շրջանաւարտներու ընտանիքները եւ հիւրեր։ |
| s-156
| Հանդէսի ընթացքին ընթացաւարտներուն յանձնուեցան յուշանուէրներ։ |
| s-157
| Այս տարուայ յաջողագոյններն էին՝ Քամի Իւլիւթաշ, Շիլա Եանար, Լուսին Պէպէք, Աքսել Քեշիքճիօղլու, Հերոս Քարա, Սելեն Անայիս Արթուչ եւ Ճուլիանա Պուլմուշ։ |
| s-158
| Յայտագրի գործադրութենէն վերջ սարքուեցաւ ընդունելութիւն մը, որու ընթացքին հատուեցաւ նաեւ շրջանաւարտներուն ի պատիւ պատրաստուած կարկանդակը։ |
| s-159
| Ուրբաթ, Յուլիս 2, 2021 |
| s-160
| ՎԱՐԴԱՎԱՌԻ ՀՐԱՒԷՐ |
| s-161
| Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան, նախընթաց օր, յետմիջօրէին, ընդունեց Սկիւտարի Ս. Կարապետ եկեղեցւոյ երէց Տ. Պետրոս Քհնյ. Պուլտուքեանն ու թաղային խորհուրդի ատենապետ Նուրհան Էնկինը։ |
| s-162
| Պատրիարքարանի մէջ տեղի ունեցաւ քաղաքավարական այս այցելութիւնը, որու ընթացքին հիւրերը Նորին Ամենապատուութեան ուշադրութեան յանձնեցին, թէ եկեղեցւոյ տարեկան տօնախմբութիւնը պիտի կատարուի յառաջիկայ յուլիսի 11-ին, Պայծառակերպութեան (Վարդավառ) տօնին։ |
| s-163
| Անոնք Պատրիարք Հօր օրհնութիւնը ստանալէ յետոյ զինք հրաւիրեցին տօնախմբութեան նախագահելու։ |
| s-164
| Այս շրջագիծով անոնք տեղեկութիւններ փոխանցեցին նաեւ իրենց աշխատանքներուն ու ծրագիրներուն մասին։ |
| s-165
| Պատրիարք Հայրը լսեց փոխանցուած տեղեկութիւնները ու ըրաւ հայրական թելադրութիւններ։ |
| s-166
| Ներկաներուն ուշադրութեան յանձնեց համավարակի առկայ մթնոլորտը, իսկ միւս կողմէ ուրախութիւն յայտնեց, թէ այս տարի կարելի պիտի ըլլայ տօնախմբութիւնը կատարել ժողովուրդի մասնակութեամբ։ |
| s-167
| Մեր Հոգեւոր Պետը կարողութիւն ու յաջողութիւն մաղթեց իրենց աստուածահաճոյ եւ եկեղեցանուէր գործունէութեանց մէջ։ |
| s-168
| Ուրբաթ, Յուլիս 2, 2021 |
| s-169
| ՈՂԲԱՑԵԱԼ ԷՎԱ ՍԱՆԹԱԼՈՒ ՈԳԵԿՈՉՈՒԵՑԱՒ ՄԱՀՈՒԱՆ ՔԱՌԱՍՆԻՑ ԼՐՄԱՆ ԱՌԹԻՒ |
| s-170
| Երէկ, Ղալաթիոյ Ս. Գրիգոր Լուսաւորիչ եկեղեցւոյ մէջ յաւարտ Ս. Պատարագի հոգեհանգստեան պաշտօն կատարուեցաւ նորոգ հանգուցեալ Էվա Սանթալուի մահուան քառասնից լրման առթիւ։ |
| s-171
| Ինչպէս ծանօթ է, Էվա Սանթալուի կորուստը մօտաւոր անցեալին մեծ ցաւ ստեղծած էր համայնքային շրջանակներէն ներս։ |
| s-172
| Եկեղեցւոյ մէջ կատարուած հոգեհանգստեան պաշտօնէն վերջ, կէսօրուան ժամերուն, հանգուցեալի Շիշլիի գերեզմանատան հողակոյտին վրայ ալ տեղի ունեցաւ մասնաւոր ոգեկոչման արարողութիւն մը։ |
| s-173
| Այս հոգեհանգստեան պաշտօնին ալ հանդիսապետեց Տ. Զաքար Քհնյ. Քոփարեան, որ կատարեց թարմ շիրիմի օրհնութիւնը։ |
| s-174
| Հանգուցեալի հարազատները ամբողջ ընտանիքը եւ համայնքային շրջանակներէն իր յիշատակը յարգող սիրելիներ հերթական անգամ համախմբուեցան անոր բարոյական ներկայութեան շուրջ եւ իրենց խոնարհումը բերին իր ազնիւ յիշատակին առջեւ։ |
| s-175
| Էվա Սանթալու կողակիցն էր մեր բարերարներէն Գէորգ Սանթալուի եւ քոյրը՝ նոյնպէս մեր երախտաշատ բարերարներէն Հայկ Ասլանեանի։ |
| s-176
| Ուրբաթ, Յուլիս 16, 2021 |
| s-177
| ՇԻՇԼԻ ՄԱՐԶԱԿՈՒՄԲԻ ԱՄՐԱՆ ԴԱՍԸՆԹԱՑՆԵՐԸ ՍԿՍԱԾ ԵՆ ԳՆԱԼԸ ԿՂԶԻԻ ՄԷՋ |
| s-178
| Շիշլի մարզակումբի ամրան դասընթացները Գնալը կղզիի մէջ կը շարունակուին ամբողջ թափով։ |
| s-179
| Զանազան տարիքային դասաւորումներու համար նախատեսուած այս դասընթացները ներկայիս ունին բացառիկ նշանակութիւն։ |
| s-180
| Արդարեւ, քորոնաժահրի համաճարակի շրջանին մասնաւորապէս փոքր տարիքային դասաւորումներու տղաքը մարմնամարզի հետեւելու հնարաւորութենէն զուրկ մնացած էին։ |
| s-181
| Ուստի, այս ամառուան դասընթացները այդ ամբողջը թօթափելու եւ տղաքը դարձեալ մարմնամարզի վերադարձնելու տեսակէտէ ունին բացառիկ նշանակութիւն։ |
| s-182
| Շիշլիի ամրան դասընթացները կ՚ընթանան փորձառու մարզիչներու հսկողութեան ներքեւ եւ ինչպէս ամէն տարի՝ այս տարի եւս Գնալը կղզիի մէջ կը համախմբեն մեր նոր սերունդը։ |
| s-183
| Ատենապետ Ալէն Թեքպըչաքի կողմէ գլխաւորուած վարչութիւնը մեծ բծախնդրութեամբ կը վերահսկէ աշխատանքներուն ընթացքը։ |
| s-184
| Հինգշաբթի, Յուլիս 15, 2021 |
| s-185
| ՀԱՆՐԱՊԵՏՈՒԹԵԱՆ ՆԱԽԱԳԱՀ ԷՐՏՈՂԱՆ, ՆԵՐՔԻՆ ԳՈՐԾՈՑ ՆԱԽԱՐԱՐ ՍՈՅԼՈՒ ԵՒ ԻՍԹԱՆՊՈՒԼԻ ԿՈՒՍԱԿԱԼ ԵՐԼԻՔԱՅԱ ՓՈՒԹՈՎ ԱՐՁԱԳԱՆԳԵՑԻՆ ԳԱՏԸԳԻՒՂԻ ԵԿԵՂԵՑՒՈՅ ՏՀԱՃ ԴԷՊՔԻՆ |
| s-186
| Գատըգիւղի Ս. Թագաւոր եկեղեցւոյ շաբաթավերջի տհաճ դէպքը երէկ պետական աւագանիի ամենաբարձր մակարդակի վրայ հակազդեցութեան պատճառ դարձաւ։ |
| s-187
| Հանրապետութեան նախագահ Ռեճեփ Թայյիպ Էրտողան անընդունելի անպատշաճութիւն մը որակեց այս դէպքը։ |
| s-188
| Իր խօսքով՝ այս անարգանքը կը համարուի խափանարարութիւն մը՝ մեր միասնականութեան եւ միութեան դէմ։ |
| s-189
| Նախագահ Էրտողան երէկ նշեց, որ այս նիւթին հետամուտ պիտի ըլլան։ |
| s-190
| Նման անպատշաճութեան մը ընդունուիլը կարելի չէ։ |
| s-191
| Էրտողան շեշտեց, որ ո՛ր կրօնին ալ պատկանի՝ սրբավայրերու վրայ այսպիսի յարձակումները անընդունելի են։ |
| s-192
| Նախագահ Էրտողանի այս յայտարարութիւնները արդէն ամուր քաղաքական կամքի մը դրսեւորման առիթ հանդիսացան այս տհաճ խնդրին դէմ՝ մինչ ԱՔ կուսակցութեան բանբեր Էօմէր Չելիքն ալ նոյն վճռակամութեամբ արձագանգեց դէպքին եւ նոյնպէս խափանարարութիւն որակեց կատարուածը։ |
| s-193
| Երէկ օրուայ ընթացքին ընկերային ցանցերու վրայ շարունակուեցաւ Գատըգիւղի եկեղեցւոյ տհաճ դէպքի վերաբերեալ արձագանգը, մինչ զանգուածային լրատուութեան միջոցներն ալ իրադարձութիւնները լուսաբանեցին անմիջականօրէն։ |
| s-194
| Բացի նախագահ Էրտողանէն, պետական աւագանիէն այլ յառաջատար դէմքեր ալ հետաքրքրութիւն ցուցաբերեցին՝ մասնաւորապէս Ներքին գործոց նախարար Սիւլէյման Սոյլու եւ Իսթանպուլի կուսակալ Ալի Երլիքայա։ |
| s-195
| Պետական աւագանիէն դէմքեր այս կապակցութեամբ շփման մէջ անցան Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեանի եւ Գատըգիւղի Ս. Թագաւոր եկեղեցւոյ թաղային խորհուրդի ատենապետ Արման Պիւքիւճեանի հետ։ |
| s-196
| Առաւօտեան կանուխ ժամերէն սկսեալ, ընկերային ցանցերու մէջ տեղ գտաւ Գատըգիւղի Ս. Թագաւոր եկեղեցւոյ դրան առջեւ պատահած անախորժ դէպքը։ |
| s-197
| Ամեն. Տ. Սահակ Ս. Արք. Մաշալեան առաջին իսկ պահէն մօտէն հետաքրքրուեցաւ սոյն դէպքի հետ եւ յայտնեց իր ցաւը։ |
| s-198
| Երէկ օրուան ընթացքին պատկան մարմիններ եւս բարձր մակարդակի վրայ անդրադարձան այս դէպքին եւ պախարակեցին եղելութիւնը։ |
| s-199
| Այս առիթով Իսթանպուլի կուսակալ Ալի Երլիքայա հեռախօսային կապ հաստատեց Ամեն. Տ. Սահակ Ս. Արք. Մաշալեանի հետ եւ պախարակեց կատարուածը։ |
| s-200
| Ան յայտնեց, որ պատկան մարմինները հետամուտ եղած են դէպքին եւ երեք անձերն ալ ձերբակալուած են։ |