| s-1
| Հայ կոմպոզիտորական արվեստի 10-րդ փառատոնի՝ Տերտերյան ֆեստի շրջանակներում Հայաստանի պետական սիմֆոնիկ նվագախմբի հետ հանդես եկավ դաշնակահար Արմեն Բաբախանյանը։ |
| s-2
| Համերգային ծրագրում հնչեցին Էդգար Հովհաննիսյանի Պասակալիան «Անտունի» բալետից, Էդվարդ Միրզոյանի «Լոռեցի Սաքոն» սիմֆոնիկ պոեմը և Հարո Ստեփանյանի Դաշնամուրի կոնցերտը։ |
| s-3
| Համերգը ղեկավարում էր դիրիժոր Ռուբեն Ասատրյանը։ |
| s-4
| Ռուբեն Ասատրյանի ղեկավարությամբ տեղի էր ունեցել նաև Հայ կոմպոզիտորական արվեստի փառատոնի նախորդ սիմֆոնիկ համերգը. դիրիժորը նկատում է, որ հանդիսատեսը մեծ սիրով ու ոգևորությամբ է ընդունում հայ կոմպոզիտորների ստեղծագործությունները։ |
| s-5
| Նա նաև ընդգծում է, որ այս հարցում մեծ դեր ունեն ստեղծագործությունների կատարումները։ |
| s-6
| Հայ կոմպոզիտորական արվեստի փառատոնի նպատակներից մեկը մեր կոմպոզիտորների ստեղծագործությունները թվայնացնելն ու սերունդների համար պահպանելն է։ |
| s-7
| «Հայաստանի պետական սիմֆոնիկ նվագախումբը պեղել-գտել է Հարո Ստեփանյանի Դաշնամուրի կոնցերտի նոտաները, խմբագրել, հասցրել այսօրվա ելույթին։ |
| s-8
| Բավականին գեղեցիկ ստեղծագործություն է։ |
| s-9
| Այս կոնցերտը մի քանի տասնամյակ չի հնչել։ |
| s-10
| Համերգի ընթացքում կներկայացվի Էդվարդ Միրզոյանի վաղ շրջանի գործերից մեկը՝ «Լոռեցի Սաքոն» սիմֆոնիկ պոեմը։ |
| s-11
| Մենք գիտեինք այս ստեղծագործության մասին, սակայն այն չէր հնչում։ |
| s-12
| Կկատարենք նաև Էդգար Հովհաննիսյանի հանճարեղ «Անտունի» բալետի Պասակալիան։ |
| s-13
| «Անտունին» 1970-ական թվականներին ներկայացվում էր մեր թատրոնում»,- ասաց Ռուբեն Ասատրյանը՝ ընդգծելով, որ մենք շատ հարուստ կոմպոզիտորական դպրոց ունենք՝ բարձրարժեք ստեղծագործություններով։ |
| s-14
| Նա, անդրադառնալով Հայաստանի պետական սիմֆոնիկ նվագախմբին, նշեց, որ նվագախմբի ստեղծման օրից հետևում է կոլեկտիվի զարգացմանը, որտեղ իր նախկին սաներն են նվագում, բոլորը պրոֆեսիոնալներ են և առաջատար երաժիշտներ: |
| s-15
| Դաշնակահար Արմեն Բաբախանյանը նկատում է, որ ինքը գիտեր Հարո Ստեփանյանի դաշնամուրային կոնցերտի մասին, բայց նոտաները չկային։ |
| s-16
| «Ընդամենը մի անգամ կատարվել է շատ վաղուց՝ խորհրդային տարիներին. ուղղակի ապշած եմ. բացի այն, որ կոնցերտը բավականին բարդ ստեղծագործություն է, այն նաև շատ արժեքավոր է։ |
| s-17
| Եվ ես ուրախ եմ, որ Հայաստանի պետական սիմֆոնիկ նվագախումբն այս փառատոնի միջոցով ներկայացնում է ստեղծագործություններ, որոնք ցավոք այս կամ այն պատճառներով մոռացված են։ |
| s-18
| Մենք հայ կոմպոզիտորական դպրոցում ունենք հսկայական թվով մոռացված ստեղծագործություններ, և նման նախագծերը նորովի վերածնում են շատ հետաքրքիր գործեր։ |
| s-19
| Վստահ եմ, որ Հարո Ստեփանյանի դաշնամուրային կոնցերտը կգտնի իր տեղը ցանկացած դաշնակահարի երկացանկում»,- նշեց Արմեն Բաբախանյանը։ |
| s-20
| Մարտի 12-ին տեղի կունենա Տերտերյան ֆեստի փակման համերգը։ |
| s-21
| Երեկոյի ընթացքում կներկայացվեն մեր կոմպոզիտորական դպրոցի երախտավորներից Ավետ Տերտերյանի թիվ 7 և թիվ 8 սիմֆոնիաները։ |
| s-22
| Հայ կոմպոզիտորական արվեստի փառատոնի կազմակերպիչն է Հայաստանի պետական սիմֆոնիկ նվագախումբը՝ ՀՀ մշակույթի նախարարության աջակցությամբ։ |