| s-201
| gahausjands þan Herodes qaþ þatei þammei ik haubiþ afmaimait Iohanne sa ist |
| s-202
| sah urrais us dauþaim |
| s-203
| sa auk raihtis Herodes insandjands gahabaida Iohannen jah gaband ina in karkarai in Hairodiadins qenais Filippaus broþrs seinis unte þo galiugaida |
| s-204
| qaþ auk Iohannes du Heroda þatei |
| s-205
| ni skuld ist þus haban qen broþrs þeinis |
| s-206
| iþ so Herodia naiw imma jah wilda imma usqiman jah ni mahta |
| s-207
| unte Herodis ohta sis Iohannen kunnands ina wair garaihtana jah weihana jah witaida imma jah hausjands imma manag gatawida jah gabaurjaba imma andhausida |
| s-208
| jah waurþans dags gatils þan Herodis mela gabaurþais seinaizos nahtamat waurhta þaim maistam seinaize jah þusundifadim jah þaim frumistam Galeilaias jah atgaggandein inn dauhtar Herodiadins jah plinsjandein jah galeikandein Heroda jah þaim miþanakumbjandam qaþ þiudans du þizai maujai |
| s-209
| bidei mik þisƕizuh þei wileis jah giba þus |
| s-210
| jah swor izai þatei |
| s-211
| þisƕah þei bidjais mik giba þus und halba þiudangardja meina |
| s-212
| iþ si usgaggandei qaþ du aiþein seinai |
| s-213
| ƕis bidjau |
| s-214
| iþ si qaþ |
| s-215
| haubidis Iohannis þis daupjandins |
| s-216
| jah atgaggandei sunsaiw sniumundo du þamma þiudana baþ qiþandei |
| s-217
| wiljau ei mis gibais ana mesa haubiþ Iohannis þis daupjandins |
| s-218
| jah gaurs waurþans sa þiudans in þize aiþe jah in þize miþanakumbjandane ni wilda izai ufbrikan |
| s-219
| jah suns insandjands sa þiudans spaikulatur anabauþ briggan haubiþ is |
| s-220
| iþ is galeiþands afmaimait imma haubiþ in karkarai jah atbar þata haubiþ is ana mesa jah atgaf ita þizai maujai jah so mawi atgaf ita aiþein seinai |
| s-221
| jah gahausjandans siponjos is qemun jah usnemun leik is jah galagidedun ita in hlaiwa |
| s-222
| jah gaïddjedun apaustauleis du Iesua jah gataihun imma allata jah swa filu swe gatawidedun |
| s-223
| jah duatsniwun |
| s-224
| jah usgaggandam im us skipa sunsaiw ufkunnandans ina birinnandans all þata gawi dugunnun ana badjam þans ubil habandans bairan þadei hausidedun ei is wesi |
| s-225
| jah þisƕaduh þadei iddja in haimos aiþþau baurgs aiþþau in weihsa ana gagga lagidedun siukans jah bedun ina ei þau skauta wastjos is attaitokeina |
| s-226
| jah swa managai swe attaitokun imma ganesun |
| s-227
| Iþ Iesus ahmins weihis fulls gawandida sik fram Iaurdanau jah tauhans was in ahmin in auþidai dage fidwor tiguns fraisans fram diabulau |
| s-228
| jah ni matida waiht in dagam jainaim jah at ustauhanaim þaim dagam biþe gredags warþ |
| s-229
| jah qaþ du imma diabulus |
| s-230
| jabai sunaus sijais gudis qiþ þamma staina ei wairþai hlaibs |
| s-231
| jah andhof Iesus wiþra ina qiþands |
| s-232
| gamelid ist þatei |
| s-233
| ni bi hlaib ainana libaid manna ak bi all waurde gudis |
| s-234
| jah ustiuhands ina diabulaus ana fairguni hauhata ataugida imma allans þiudinassuns þis midjungardis in stika melis |
| s-235
| jah qaþ du imma sa diabulus |
| s-236
| þus giba þata waldufni þize allata jah wulþu ize unte mis atgiban ist jah þisƕammeh þei wiljau giba þata |
| s-237
| þu nu jabai inweitis mik in andwairþja meinamma wairþiþ þein all |
| s-238
| jah andhafjands imma Iesus qaþ |
| s-239
| gamelid ist |
| s-240
| fraujan guþ þeinana inweitais jah imma ainamma fullafahjais |
| s-241
| þaþroh gatauh ina in Iairusalem jah gasatida ina ana giblin alhs jah qaþ du imma |
| s-242
| jabai sunus sijais gudis wairp þuk þaþro dalaþ |
| s-243
| gamelid ist auk þatei aggilum seinaim anabiudiþ bi þuk du gafastan þuk jah þatei ana handum þuk ufhaband ei ƕan ni gastagqjais bi staina fotu þeinana |
| s-244
| jah andhafjands qaþ imma Iesus þatei qiþan ist |
| s-245
| ni fraisais fraujan guþ þeinana |
| s-246
| jah ustiuhands all fraistobnjo diabulus afstoþ fairra imma und mel |
| s-247
| jah gawandida sik Iesus in mahtai ahmins in Galeilaian jah meriþa urrann and all gawi bisitande bi ina |
| s-248
| jah is laisida in gaqumþim ize mikilids fram allaim |
| s-249
| jah qam in Nazaraiþ þarei was fodiþs jah galaiþ inn bi biuhtja seinamma in daga sabbato in swnagogein jah usstoþ siggwan bokos |
| s-250
| jah atgibanos wesun imma bokos Eisaeiins praufetus jah uslukands þos bokos bigat stad þarei was gamelid |
| s-251
| ahma fraujins ana mis in þizei gasalboda mik du wailamerjan unledaim |
| s-252
| insandida mik du ganasjan þans gamalwidans hairtin merjan frahunþanaim fralet jah blindaim siun fraletan gamaidans in gaþrafstein merjan jer fraujins andanem |
| s-253
| jah faifalþ þos bokos jah usgibands andbahta gasat |
| s-254
| jah allaim in þizai swnagogein wesun augona fairweitjandona du imma |
| s-255
| dugann þan rodjan du im þatei |
| s-256
| himma daga usfullnodedun mela þo in ausam izwaraim |
| s-257
| jah allai alakjo weitwodidedun imma jah sildaleikidedun bi þo waurda anstais þo usgaggandona us munþa is jah qeþun |
| s-258
| niu sa ist sunus Iosefis |
| s-259
| jah qaþ du im |
| s-260
| aufto qiþiþ mis þo gajukon |
| s-261
| þu leiki hailei þuk silban |
| s-262
| ƕan filu hausidedum waurþan in Kafarnaum tawei jah her in gabaurþai þeinai |
| s-263
| qaþ þan |
| s-264
| amen izwis qiþa þatei ni ainshun praufete andanems ist in gabaurþai seinai |
| s-265
| aþþan bi sunjai qiþa izwis þatei managos widuwons wesun in dagam Heleiins in Israela þan galuknoda himins du jeram þrim jah menoþs saihs swe warþ huhrus mikils and alla airþa |
| s-266
| jah ni du ainaihun þizo insandiþs was Helias alja in Saraipta Seidonais du qinon widuwon |
| s-267
| jah managai þrutsfillai wesun uf Haileisaiu praufetau in Israela jah ni ainshun ize gahrainids was alja Naiman sa Saur |
| s-268
| jah fullai waurþun allai modis in þizai swnagogein hausjandans þata |
| s-269
| jah usstandans uskusun imma ut us baurg jah brahtedun ina und auhmisto þis fairgunjis ana þammei so baurgs ize gatimrida was du afdrausjan ina þaþro |
| s-270
| iþ is þairhleiþands þairh midjans ins iddja |
| s-271
| jah galaiþ in Kafarnaum baurg Galeilaias jah was laisjands ins in sabbatim |
| s-272
| jah sildaleikidedun bi þo laisein is unte in waldufnja was waurd is |
| s-273
| jah in þizai swnagogein was manna habands ahman unhulþons unhrainjana jah ufhropida qiþands |
| s-274
| let |
| s-275
| ƕa uns jah þus Iesu Nazorenu |
| s-276
| qamt fraqistjan unsis |
| s-277
| kann þuk ƕas is |
| s-278
| sa weiha gudis |
| s-279
| jah gaƕotida imma Iesus qiþands |
| s-280
| afdobn jah usgagg us þamma |
| s-281
| jah gawairpands ina sa unhulþa in midjaim urrann af imma ni waihtai gaskaþjands imma |
| s-282
| jah warþ afslauþnan ana allans jah rodidedun du sis misso qiþandans |
| s-283
| ƕa waurde þata þatei miþ waldufnja jah mahtai anabiudiþ þaim unhrainjam ahmam jah usgaggand |
| s-284
| jah usiddja meriþa fram imma and allans stadins þis bisunjane landis |
| s-285
| usstandands þan us þizai swnagogai galaiþ in gard Seimonis |
| s-286
| swaihro þan þis Seimonis was anahabaida brinnon mikilai jah bedun ina bi þo |
| s-287
| jah atstandands ufar ija gasok þizai brinnon jah aflailot ija |
| s-288
| sunsaiw þan usstandandei andbahtida im |
| s-289
| miþþanei þan sagq sunno allai swa managai swe habaidedun siukans sauhtim missaleikaim brahtedun ins at imma |
| s-290
| iþ is ainƕarjammeh ize handuns analagjands gahailida ins |
| s-291
| usiddjedun þan jah unhulþons af managaim hropjandeins jah qiþandeins þatei |
| s-292
| þu is Xristus sunus gudis |
| s-293
| jah gasakands im ni lailot þos rodjan unte wissedun Xristu ina wisan |
| s-294
| biþeh þan warþ dags usgaggands galaiþ ana auþjana stad jah manageins sokidedun ina jah qemun und ina jah gahabaidedun ina ei ni afliþi fairra im |
| s-295
| þaruh is qaþ du im þatei |
| s-296
| jah þaim anþaraim baurgim wailamerjan ik skal bi þiudangardja gudis unte duþe mik insandida |
| s-297
| jah was merjands in swnagogim Galeilaias |
| s-298
| Biþe þan usfullida alla þo waurda seina in hliumans manageins galaiþ in Kafarnaum |
| s-299
| hundafade þan sumis skalks siukands swultawairþja was saei was imma swers |
| s-300
| gahausjands þan bi Iesu insandida du imma sinistans Iudaie bidjands ina ei qimi jah ganasidedi þana skalk is |